Rogon i Mel’eg e Pi N’en nib Fel’ Nra Chuweg e Chalban

1, 2. Mang e ba t’uf ni ngad dugliyed ko pi n’en ni gad ma mel’eg ni ngad chuweged e chalban ngay?

SUSUN e ngam unum ba arfath mag guy ni bay bang riy nib kireb. Ere, mang e ga ra rin’? Reb e rayog ni ngam unum ni ga’ngin, ma reb e ngam n’ag, ma reb e ngam chuweg e gin ni ke kireb riy mfin mu unum. Ere, bin ngan ko pi n’ey e ga ra mel’eg ni ngam rin’?

² Pi n’en ni yima chuweg e chalban ngay ni bod e kachido, nge musik, nge babyor ni yima beeg e ku rayog ni ngan taarebrogonnag ko fare arfath. Yu ngiyal’ e ga baadag ni ngam beeg, ara ngam motoyil, ara ngam yaliy ban’en ni nge chuweg e chalban rom, machane ga manang ni pi n’en nib ga’ ni yima chuweg e chalban ngay e ngiyal’ ney e ba kireb. Ere, mang e ga ra rin’? Boch e girdi’ e sana yugu demtrug e miti n’en nu fayleng ni yad ra chuweg e chalban rorad ngay. Ma boch e sana yad ra siyeg ni gubin, ya nge dabi magawonnag ban’en nib kireb lanin’rad. Ma boch e girdi’ e yad ra siyeg e tin nib kireb, mar mel’eged e tin nib fel’ riy. Ere, mang e susun ni ngam rin’ ni faanra ga baadag ni ngaum par ni gab t’uf rok Got?

3. Mang e ngad weliyed murung’agen?

³ Boor i gadad e ra mel’eg e bin dalip ko pi n’ey, ya yu ngiyal’ e gad baadag ni ngad beeged, ara ngad motoyilgad, ara ngad yaliyed ban’en ni nge chuweg e chalban rodad. Machane, thingar da mel’eged e bin nib fel’. Ere, ba t’uf ni ngad nanged ko tin ngan e ba fel’ ma tin ngan e ba kireb. Machane, som’on e ngad weliyed e n’en nrayog ni nge rin’ e re n’ey ko pigpig rodad ngak Jehovah.

‘URNGIN BAN’EN NI NGAM RIN’ED NI FAN E NGA NOG E SOROK RIY NGAK GOT’

4. Faanra ud fal’eged i lemnag e n’en ni kad micheged ngak Got, ma mang e ra rin’ ko pi n’en ni gad ma mel’eg ni nge chuweg e chalban rodad?

⁴ Reb e Mich Rok Jehovah ni kan taufenag ko duw ni 1946 e gaar: “Gu ma gay rogon ni gubin ngiyal’ ni yira pi’ e welthin ni fan ngak be’ ni nge un ko taufe ma gu ba’ ni gu be motoyil nib fel’ rogon ni gowa gag e nggu un ko taufe.” Mang fan? I yog ni gaar, “Faanra gubin ngiyal’ ni gu be lemnag fan ni kug ognag e yafas rog ngak Got, ma aram reb e ban’en nra ayuwegeg ni nggu par ni gub yul’yul’.” Sana ku aram rogon ni ga ma lemnag. Ga ra guy rogon ni nge dab mu pagtalin ni kam micheg ngak Jehovah ni ngam pigpig ngak, ma ra ayuwegem ni ngaum k’adan’um. (Mu beeg e Eklesiastes 5:4.) Ma reb e faanra um fal’eg i lemnag e n’en ni kam micheg ngak Got ni ngam rin’, ma ra rin’ ban’en nga rogon ni ga ma lemnag e machib nge ku boch ban’en nib muun e pi n’en ni yima chuweg e chalban ngay. I tamilangnag apostal Paul e re n’ey ko thin ni yoloy nge yan ngak boch e Kristiano kakrom ni gaar: “Demtrug e n’en ni gimed ra rin’, ndemtrug ko ngam abichgad ara ngam garbodgad, ma urngin ni ngam rin’ed ni fan e nga nog e sorok riy ngak Got.”​—1 Korinth 10:31.

5. Uw rogon ni ke ayuwegdad fare thin ko Levitikus 22:18-20 ni ngad nanged e n’en ni kan puguran ngodad u Roma 12:1?

⁵ Gubin ban’en ni ga ma rin’ ma bay rogon ko pigpig ni ga be tay ngak Jehovah. Nap’an ni yol Paul ngak piyu Roma me fanay bbugithin ni nge tamilangnag fan e re n’ey ngak e piin taareb e michan’ rorad. I gaar: “Ngam pied gimed ngak Got, ngam manged maligach nib fos ngak, ni kam pied gimed ko maruwel rok ma gimed ba fel’ u wan’. Ereray e bin riyul’ e liyor ni susun e ngam pied ngak Got.” (Roma 12:1) Re n’ey e ba muun lanin’um ngay, nge gum’irchaem, nge gelngim. Gubin e pi n’ey ni ga ma fanay ko pigpig ni ga ma tay ngak Got. (Mark 12:30) Aram fan ni yog Paul ni pigpig ni gad ma tay u polo’ i gelngidad e ba maligach. Re bugithin nem ni fanay e be puguran ban’en ngodad. Rogon ni bay ko fare Motochiyel Nni Pi’ Ngak Moses e de fel’ u wan’ Got e maligach ni bay bang riy nib kireb. (Levitikus 22:18-20) Ere, ku er rogon ni faanra bay ban’en nib kireb ko pigpig ni be tay reb e Kristiano, ma dabi fel’ u wan’ Got. Uw rogon nra buch e re n’ey?

6, 7. Uw rogon nrayog ni nge alitnag reb e Kristiano downgin, ma mang wenegan nra yib riy?

⁶ I fonownag Paul e pi Kristiano nu Roma ni gaar: “Dab kum paged fan bayang u dowmed ngak e denen.” Ki yog Paul ngorad ni ngar ‘lied ngem’ e ngongol rorad nib denen.’ (Roma 6:12-14; 8:13) U tabolngin e gi babyor nem e yog boch e pi “ngongol” nem riy. I weliy murung’agen e girdi’ ni tadenen ni gaar: “L’ugunrad e ba sug ko meybil ni nge buch ban’en rok be’.” “Yad ba gur ni ngar maad’adgad ku be’ ara ra thanged e pogofan.” “Dar nanged . . . rogon ni nge yib madgun Got u wan’rad.”a (Roma 3:13-18) Faanra fanay be’ yu yang u ‘downgin’ nga kireb, ma aram e be kirebnag downgin. Bod rogon ni faanra i yaliy be’ yaan e ngongol ni puwlag ara cham, ma aram e be kirebnag downgin ya ke ‘pag fan lan owchen ngak e denen.’ Ere, pigpig ni be tay e taareb rogon ngab maligach nib alit ma de fel’ u wan’ Got. (Deuteronomy 15:21; 1 Peter 1:14-16; 2 Peter 3:11) Rib kireb wenegan e re n’ey!

⁷ Ere, rib tamilang ni pi n’en ni ma chuweg reb e Kristiano e chalban rok ngay e bay fel’ngin maku bay wenegan. Aram fan nthingar da fal’eged i mel’eg, ya nge dabi kireb e pigpig rodad ngak Got. Chiney e ngad weliyed rogon nrayog ni ngad nanged ko tin ngan e ba fel’ ma tin ngan e ba kireb.

“MU FANENIKAYED E TIN NIB KIREB”

8, 9. Mang boch ban’en ni yima motoyil ngay, ara yima yaliy, ara yima beeg ni nge chuweg e chalban nthingar ni siyeg, ma mang fan?

⁸ L’agruw mit ban’en ni yima motoyil ngay, ara yima yaliy, ara yima beeg ni nge chuweg e chalban. Ba mit e ba muun ngay boch ban’en nthingari siyeg e piin Kristiano; ma ba mit e thingar ra fal’eged i lemnag ko ba fel’ fa danga’. Chiney e ngad weliyed e bin som’on, ni aram e bin nthingari siyeg e piin Kristiano.

⁹ Kad filed ko Guruy ni 1 ni bay boch ban’en ni yima chuweg e chalban ngay ni be yog e Bible nib kireb. Bod ni bay yu yang u computer nge boch ban’en ni yima pag u TV ni ma m’ug yaan e puwlag nge boch e ngongol nib kireb riy, maku er rogon ni ku bay boch e tang ni bay murung’agen ngongolen e pig riy, nge puwlag, maku bay e thin ni kireb riy. Bochan ni ma m’ug yaan boch e ngongol ko pi n’ey nib togopuluw ko pi kenggin e motochiyel nu Bible, ma aram fan nthingari siyeg e tin riyul’ e Kristiano. (Acts 15:28, 29; 1 Korinth 6:9, 10; Revelation 21:8) Faan ga ra siyeg e pi n’ey, ma aram e ga be micheg ngak Jehovah ni ga be ‘fanenikay e tin nib kireb’ ma kam ‘pi’ keru’um’ ngay. Ra aram rogon ma aram e ga be maruweliy e ‘bin riyul’’ i kanawoen e michan’.​—Roma 12:9; Psalm 34:14; 1 Timothy 1:5.

10. Ba miti mang lem u murung’agen e pi n’en ni yima chuweg e chalban ngay e ba kireb, ma mang fan?

¹⁰ Boch e girdi’ e sana yad ma lemnag ndariy ban’en nib kireb ko pi n’ey. Yad ma gaar, ‘Yugu rayog ni nggu yaliy, machane dab gu un ngay.’ Mit ney e lem e rayog ni nge bannagey, maku rayog ni nge fekey i yan ko kireb. (Mu beeg e Jeremiah 17:9.) Ere, faanra gad baadag ni ngaud yaliyed yaan e pi n’en ni dabun Jehovah, ma aram e riyul’ ni gad be ‘fanenikay e tin nib kireb,’ fa? Faanra ud beeged, ara ud yaliyed, ara ud motoyilgad nga boch ban’en nib kireb, ma ra kirebnag e nangan’ rodad. (Psalm 119:70; 1 Timothy 4:1, 2) Pi n’ey e rayog ni nge k’aringdad ni ngad rin’ed boch ban’en nib kireb, maku rayog ni nge thilyeg rogon ni gad ma lemnag e ngongol nib kireb ni ma rin’ boch e girdi’.

11. Uw rogon ni ke m’ug nriyul’ fare thin ni bay ko Galatia 6:7 u murung’agen boch ban’en ni yima chuweg e chalban ngay?

¹¹ Gathi fin aray ni ke buch e re n’ey, ya bay boch e Kristiano ni kar uned ko ngongol nib kireb ni bochan e pi n’en ni yad ma yaliy ni gubin ngiyal’. Nap’an ni keb wenegan e ngongol nib kireb ni ur rin’ed, mfin aram e kar nanged nra be’ ma re “mit i n’en ni yung e ir e ra t’ar wom’engin.” (Galatia 6:7) Machane, rayog ni ngad siyeged ndabi buch e re n’ey ni faan gad ra suguy lanin’dad ko tin nib fel’. Ma faan gad ra suguy lanin’dad ko tin nib fel’, ma tin nib fel’ e ra yib riy ngodad.​—Mu guy fare thin ni kenggin e, “Ba Miti Mang Kachido, nge Musik, nge Babyor e Ba Fel’ ni Nggu Mel’eg?”

BOCH BAN’EN NI NGAN DUGLIY NIB PULUW KO PI KENGGIN E MOTOCHIYEL NU BIBLE

12. Mang rogon fare thin ni bay ko Galatia 6:5 ko pi n’en ni yima chuweg e chalban ngay? Mang e ra pow’iydad u rogon ni ngad mel’eged e pi n’en ni ngad chuweged e chalban rodad ngay?

¹² Chiney e ngad weliyed e bin l’agruw ko pi n’en ni yima chuweg e chalban ngay, ni aram e pi n’en ni gathi ri be tamilangnag e Thin rok Got ko rayog ni ngan guy, ara ni motoyil ngay, ara ni beeg fa danga’. Ra reb e Kristiano ma ir rok e nge mel’eg ko bin ngan e be yog e nangan’ rok ngak nib fel’. (Mu beeg e Galatia 6:5.) Machane, Bible e rayog ni nge pow’iydad u rogon ni ngad mel’eged e pi n’ey. Bay kenggin e motochiyel riy nrayog ni nge ayuwegdad ngad nanged rogon e pi n’ey u wan’ Jehovah. Faan gad ra fal’eg i fil e pi kenggin e motochiyel ney, ma aram e rayog ni ngad nanged e “n’en nib m’agan’ Somol ngay” u gubin ban’en nib muun ngay e pi n’en ni yima chuweg e chalban ngay.​—Efesus 5:17.

13. Mang e ra ayuwegdad ni ngad siyeged e pi n’en ni yima chuweg e chalban ngay ndabun Jehovah?

¹³ Ba thilthil e lem ko piin Kristiano u murung’agen e tin nib mat’aw nge tin de mat’aw. (Filippi 1:9) Maku reb e, ra reb e Kristiano ma rogon e pi n’en ni baadag ni ma chuweg e chalban rok ngay. Ere, dab da lemnaged ni gubin e Kristiano ma taab n’en e yad ra mel’eg. Machane, faan gad ra pag e pi kenggin e motochiyel rok Got ni nge gagiyegnag lanin’dad nge gum’ircha’dad, ma aram e rayog ni ngad siyeged e pi n’en ndabun Jehovah.​—Psalm 119:11, 129; 1 Peter 2:16.

14. (a) Mang e ngad lemnaged u nap’an ni gad be mel’eg e pi n’en ni ngad chuweged e chalban rodad ngay? (b) Uw rogon ni nga i par nib m’on e tirok Got u wan’dad?

¹⁴ Nap’an ni ga be mel’eg e pi n’en ni ngam chuweg e chalban rom ngay, ma kub ga’ fan ni ngam lemnag urngin e tayim ni ga ra n’ag ngay. Yugu aram rogon ndariy ban’en nib kireb riy, machane urngin e tayim ni ga ra n’ag ngay e be dag e n’en nrib ga’ fan u wan’um. Ya piin Kristiano e thingari m’on e tirok Got u wan’rad. (Mu beeg e Matthew 6:33.) Ere, uw rogon ni nga i par nib m’on e tirok Got u wan’um? I yog apostal Paul ni gaar: “Um ayuwgad u rogon e ngongol romed. Dab um ngongolgad ni bod e girdi’ ndawori tamilangan’rad, machane nguum ngongolgad ni bod rogon e girdi’ nib gonop. Urngin yay nra mab e kanawo’ ngomed ma ngam maruwelgad ngay ni fan ko tin nib fel’.” (Efesus 5:15, 16) Riyul’ ni ga ra lichnag e tayim ni ga ma n’ag ko pi n’en ni yima chuweg e chalban ngay, ma ra yoor e tayim rom ni fan ko “tin” nib ga’ fan nra ayuwegem ni ngaum par ni gab gel ko tirok Got ban’en.​—Filippi 1:10.

15. Mang nib fel’ ni ngam siyeg boch ban’en ni yima chuweg e chalban ngay ni be maruwar u wan’um ko ba fel’ fa ba kireb?

¹⁵ Kub ga’ fan ni ngam siyeg boch ban’en ni yima chuweg e chalban ngay nfaanra be maruwar u wan’um ko ba fel’ fa ba kireb. Mang e be yip’ fan e re n’ey? Am lemnag bayay fare arfath. Gathi yigoo gin ni ke kireb riy e ngam chuweg, ya ngkum uneg bang ngay ya nge dab mu koy e fakl’ud. Ku er rogon e pi n’en ni yima chuweg e chalban ngay. Tin riyul’ e Kristiano e gathi kemus ni yigoo pi n’en nib tamilang ni be yog e Bible nib kireb e ngar siyeged, ya kub muun ngay e tin ni gathi rib tamilang ni be yog e Bible nib fel’ ara ba kireb, nge tin rayog ni nge kirebnag e tha’ u thilin be’ nge Jehovah. (Proverbs 4:25-27) Faanra ud folgad ko pi fonow nu Bible ma rayog ni nge ayuwegdad ni ngad rin’ed e re n’ey.

NGAN SUGUY LANIN’UY KO “TIN NIB FEL’”

16. (a) Uw rogon ni nge m’ug ko ngongol rodad ni gad be lemnag laniyan’ Jehovah? (b) Uw rogon ni nge mang e pi kenggin e motochiyel nu Bible bang ko yafas rom?

¹⁶ Nap’an ni be mel’eg e piin Kristiano boch ban’en ni nge chuweg e chalban rorad, ma som’on e ngkur lemnaged rogon laniyan’ Jehovah. Bible e aram e gin ni bay e lem rok Jehovah nge pi motochiyel rok riy. Bod ni ke yoloy Solomon ni Pilung boch ban’en ni ma fanenikay Jehovah ni aram e, ‘yunmon ni ma lifith e thin, paef ni ma thang e pogofan rok e girdi’ ndawor ra bucheged ban’en, ba yon’if ni ma lemnag rogon e tin nib kireb ni nge rin’, nge be’ ni ke yan nib gur ni nge yan i ngongliy e tin nib kireb.’ (Proverbs 6:16-19) Ere, susun ni nge uw rogon e lem rok Jehovah u wan’um? I yog e en ni yoloy e psalm ni gaar: “I Somol e ba t’uf rok e piin nib fanenikay e kireb.” (Psalm 97:10, BT) Pi n’en ni ga ma mel’eg ni ngam chuweg e chalban rom ngay e thingari m’ug riy nriyul’ ni ga be fanenikay e tin ma fanenikay Jehovah. (Galatia 5:19-21) Ku dab mu pagtalin ni pi n’en ni ga ma rin’ u nap’an nder guyem be’ e be dag ko gab miti mang girdi’. (Psalm 11:4; 16:8) Faanra riyul’ ni ga baadag ni ngaum man nga laniyan’ Jehovah u gubin ban’en, ma aram e gubin ban’en nra um mel’eg nrogon nib puluw ko pi kenggin e motochiyel nu Bible. Ga ra rin’ ni aray rogon ma ra mang bang ko yafas rom.​—2 Korinth 3:18.

17. U m’on ni ngad mel’eged ban’en ni ngad chuweged e chalban rodad ngay, ma mang boch e deer ni ngad fithed gadad riy?

¹⁷ Mang e ku rayog ni ngam rin’ ni nge micheg ni ga be ngongol nib puluw nga rogon ni ma lem Jehovah ko ngiyal’ ni ga be mel’eg e pi n’en ni ngam chuweg e chalban rom ngay? Am lemnag e re deer ni baaray ni gaar, ‘Mang e ra rin’ e re n’ey ngog nge tha’ u thilmow Got?’ U m’on ni ngam dugliy ko ga ra yaliy reb e kachido fa danga’, ma ga fithem ni nge lungum, ‘Mang e ra rin’ e re kachido ney ko nangan’ rog?’ Ngad guyed boch e pi kenggin e motochiyel nrayog ni ngad folgad riy.

18, 19. (a) Uw rogon nra ayuwegdad fare kenggin e motochiyel ni bay ko Filippi 4:8 ni ngad nanged ko ba fel’ e n’en ni gad ma chuweg e chalban rodad ngay fa danga’? (b) Ku mang boch e pi kenggin e motochiyel nra ayuwegdad ni ngad mel’eged boch ban’en nib fel’ ni ngad chuweged e chalban rodad ngay? (Mu guy e footnote.)

¹⁸ Reb i kenggin e motochiyel nrayog ni nge ayuwegdad e bay ko Filippi 4:8 ni gaar: “Ngam suguyed lanin’med ko fapi n’en nib fel’, ni yira yog e fel’ ngay: ni n’en nriyul’, nge n’en nib yal’uw, ma mmat’aw, ma mmachalbog, ma mmanigil, nge tin ndariy thibngin.” Riyul’ nder weliy Paul murung’agen e pi n’en ni yima chuweg e chalban ngay, ya be weliy murung’agen e pi n’en ni gad ma suguy nga lanin’dad, ni pi n’em e thingari par ni yigoo tin nib m’agan’ Got ngay. (Psalm 19:14) Yugu aram rogon, ma n’en ni yog Paul e rayog ni ngan taarebrogonnag ko pi n’en ni gad ma chuweg e chalban rodad ngay. Uw rogon?

¹⁹ Am fithem ni nge lungum, ‘Pi kachido, ara video games, ara musik, ara ku boch ban’en ni gu ma chuweg e chalban rog ngay e ma suguy lanin’ug ko “tin nib fel’,” fa?’ Tomuren ni kam yaliy reb e kachido, ma mang e ke magey yaan u lanin’um? Faanra tin nib fel’, ma aram e kam nang ndariy ban’en nib kireb ko fare kachido ni kam yaliy. Machane, faanra tin nib kireb e ke magey yaan u lanin’um, ma aram e de fel’ fare kachido ni kam yaliy. (Matthew 12:33; Mark 7:20-23) Mang fan? Ya faanra um lemnag e tin nib alit e ngongol, ma rayog ni nge magawonnag lanin’um, me kireb e nangan’ rom ni kan skulnag ko thin nu Bible, nge tha’ u thilmew Got. (Efesus 5:5; 1 Timothy 1:5, 19) Ere, thingar mu siyeg e pi n’ey, ya rayog ni nge yib wenegan ngom.b (Roma 12:2) Mu folwok ko en ni yoloy e psalm ni meybil ngak Jehovah ni gaar: “Mu talegneg ni dabki l’agan’ug ko n’en ndariy gam’ingin.”​—Psalm 119:37, BT.

NGKUM LEMNAG BOCH E GIRDI’

20, 21. Uw rogon nra ayuwegdad fare thin ni bay ko 1 Korinth 10:23, 24 u nap’an ni gad be mel’eg boch ban’en ni nge chuweg e chalban rodad?

²⁰ I weliy Paul murung’agen reb i kenggin e motochiyel nib ga’ fan ni ngan lemnag u m’on ni ngan dugliy boch ban’en ni gaar: “‘Urngin ban’en nrayog ni ngad rin’ed,’ ara’ rogon ni ka nog. Er rogon, machane gathi urngin ban’en ma ba fel’. ‘Urngin ban’en nrayog ni ngad rin’ed,’ machane gathi urngin ban’en ma ba fel’ ngodad. Ra be’ ma gathi goo ir e ngi i tafinaynag e tin nib fel’ ngak, ya ngki tafinaynag e tin nib fel’ ngak boch e girdi’.” (1 Korinth 10:23, 24) Uw rogon nra ayuwegdad e re thin ney u nap’an ni gad be mel’eg boch ban’en ni nge chuweg e chalban rodad? Thingar mu fithem ni nge lungum, ‘Mang e ra rin’ e pi n’en ni gu ma mel’eg ni nge chuweg e chalban rog ngak boch e girdi’?’

²¹ Bay boch ban’en ni yima chuweg e chalban ngay ni ga ma lemnag ni ‘rayog’ ni ngam yaliy, ara ngam motoyil ngay, ara ngam beeg, ya der magawonnag e nangan’ rom. Machane, faanra kam guy nra magawonnag e nangan’ rok e piin taareb e michan’ romed, mab fel’ ni ngam digey. Mang fan? Ya ba kireb ni ngam “denen nib togopluw ngak pi girdien Kristus ni aram pi walagem” ara mu “denen nib togopluw ngak Kristus” mag mo’maw’nag ngak e piin taareb e michan’ romed ni ngar pared ni yad ba yul’yul’ ngak Got. Ngaum lemnag fare thin ni gaar: “Um ngongolgad ni gimed be guy rogon ndab mu magawonniged laniyan’ e girdi’.” (1 Korinth 8:12; 10:32) Tin riyul’ e Kristiano e ngiyal’ ney e yad ma fol ko fonow rok Paul ni ngar siyeged e pi n’en ni yima chuweg e chalban ngay ni gowa ‘rayog’ ni ngan chuweg e chalban ngay, machane bin riyul’ riy e de “fel’.”​—Roma 14:1; 15:1.

22. Mang fan ni boch e Kristiano e ba thilthil rogon e lem rorad u boch ban’en?

²² Ku bay ban’en nib fel’ ni ngad lemnaged. Faanra bay reb e Kristiano ni boor mit ban’en nder ma pag e nangan’ rok ni nge chuweg e chalban rok ngay, ma susun ndabi lemnag ni gubin e Kristiano ma ngar folgad ko tin ni baadag. Ya faanra i lem be’ ni aram rogon ma bod be’ ni be yan u karrow ma be lemnag ni gubin e karrow ni nge fol u payngin ni be yan. Lem ni aray rogon e de fel’. Ere, faanra bay reb e Kristiano ni boor mit ban’en nder ma pag e nangan’ rok ni nge chuweg e chalban rok ngay, mab t’uf ni nge tayfan yugu boch e Kristiano nib thil e n’en ni yad baadag. Ya rayog ni bay boch e kachido, ara musik, ara babyor ni yad baadag ni ngar chuweged e chalban rorad ngay nde kireb. Ma faanra aram rogon ma aram e be ‘sumunguy ngak urngin e girdi’.’​—Filippi 4:5; Eklesiastes 7:16.

23. Uw rogon mag nang nib fel’ e pi n’en ni ga ma mel’eg ni nge chuweg e chalban rom?

²³ Uw rogon mag nang nib fel’ e pi n’en ni ga ma mel’eg ni nge chuweg e chalban rom? Ngam siyeg e pi n’en ni bay e ngongol nib kireb riy nib togopuluw ko Thin rok Got. Mag fol ko pi kenggin e motochiyel nu Bible ni bay rogon ko pi n’en ni yima chuweg e chalban ngay nder tamilangnag e Bible ko ba kireb fa danga’. Thingar kum siyeg e pi n’en ni yima chuweg e chalban ngay nra alitnag e nangan’ rom miki magawonnag e nangan’ rok boch e girdi’ nib ga’ ni piin taareb e michan’ romed. Manga yugum dugliy ni ngam rin’ ni aray rogon, ya nge yag ni ngan pining e sorok riy ngak Got mi gimed par chon e tabinaw rom ni gimed ba t’uf rok.