“Nguum Gelniged Gimed ko Mich Romed nib Th’abi Thothup”

1, 2. Mang e ba t’uf ni ngad rin’ed ni faanra ngad pared ni gad ba gel mab fel’ fithik’ i dowdad?

GAD gubin ni gad baadag ni ngaud pared ni gad ba gel mab fel’ fithik’ i dowdad. Machane, faanra ngad pared ni aram rogon, mab t’uf ni ngaud ked e ggan nib fel’, ma kub t’uf ni ngaud rin’ed boch ban’en nib chamag ngodad, mu ud ayuweged gadad ko m’ar. Re n’ey e de mom, machane bochan ni bay rogon ko yafas rodad, ma dab ud malmalgad ngay. Bay ban’en ni kub t’uf ni ngad ayuweged nga i par nib gel. Mang e re n’em?

² Aram e n’en ni weliy Jude nreb i gachalpen Jesus. Nap’an ni yog ngak e pi Kristiano ni gaar, “um pired ni gimed ba t’uf rok Got,” miki tamilangnag ni gaar: “Nguum gelniged gimed ko mich romed nib th’abi thothup.” (Jude 20, 21) Mang boch e kanawo’ nrayog ni ngam gelnag e michan’ rom riy ya nge yag ni ngaum par ni gab t’uf rok Got? Ngad weliyed dalip ban’en nib t’uf ni ngaud tedan’dad ngay.

UM GELNAG E MICHAN’ ROM KO PI MOTOCHIYEL ROK JEHOVAH

3-5. (a) Mang e baadag Satan ni nge bannagem riy u murung’agen e pi motochiyel rok Jehovah? (b) Susun ni uw rogon ni ngad lemnaged e pi motochiyel rok Got? Mang e ra rin’ ko lem rodad? Mu susunnag.

³ Som’on e ba t’uf ni nge gel e michan’ rodad ko pi motochiyel rok Got. Nap’an ni ga be fil e re ke babyor ney ma kam guy boch e motochiyel rok Jehovah riy u murung’agen rogon ni ngaud ngongolgad. Uw rogon e pi motochiyel nem u wan’um? Baadag Satan ni nge bannagem ngam lemnag ni pi motochiyel rok Jehovah, nge pi kenggin e motochiyel rok, nge pi n’en ni baadag ni ngam rin’ e dariy e runguy riy ma be talegem u boch ban’en nib fel’. Nap’an ni yib angin e re ban ney u lan fa gi milay’ nu Eden, ma ke fanay ke mada’ ko chiney. (Genesis 3:1-6) Ere, ku rayog ni nge rin’ e re n’ey ngom, fa? Re n’ey e be yan u rogon ni ga ma lem.

⁴ Susun e ga be yan u bangi ban’en nib fel’ yaan, mag guy ba yoror nib tolang mab gel. Bay ban’en u barba’ fare yoror ni ga baadag, machane dabiyog ni ngam man ngaram. Som’on e sana ga ra lemnag ni fare yoror e be talegem u ban’en nib fel’. Machane faan mu sap u thilin fare yoror mag guy ba layon nib damumuw ni be yan ni be gay be’ ni nge longuy! Fin aram e mu nang ni fare yoror e kan fal’eg ni nge ayuwegey. Bay reb e gamanman nib damumuw ni be gayem e chiney ni nge longuyem, fa? Be puguran e Thin rok Got ngodad ni gaar: “Mu tedan’med mi gimed ayuwegmed! Yi moonyan’ ni ir e toogor romed e yugu be yan ni bod ba layon ni be tolul, ni be gayiy be’ ni nge longuy.”​—1 Peter 5:8.  

⁵ Satan e bod reb e gamanman nib damumuw. Bochan ni dabun Jehovah ni nge longuydad Satan, ma aram fan ni ke fal’eg e motochiyel ke tay ni nge ayuwegdad ko “pi ban” rok faanem nib kireb. (Efesus 6:11) Ere, nap’an i gad be fal’eg i lemnag e pi motochiyel rok Got, ma susun e ngad nanged ni fan ni ke ngongliy e pi motochiyel nem e bochan ni gad ba t’uf rok. Faan gad ra lem ni aram rogon, ma aram e rayog ni nge pagan’dad ma gad felfelan’ ngay. I yoloy James nreb i gachalpen Jesus ni gaar: “En nra fal’eg i yaliy ir nga fithik’ fare motochiyel nrib yal’uw ni ir e ma pithig e girdi’ ko kireb . . . e Got e ra ayuweg ko tin ni be rin’.”​—James 1:25.

6. Mang e bin th’abi fel’ e kanawo’ nrayog ni nge gel e michan’ rom riy ko pi motochiyel rok Got nib mat’aw nge pi kenggin e motochiyel rok? Mu weliy reb e kanawo’.

⁶ Faanra ud pared ni gad be fol ko pi motochiyel rok Got ma aram e bin th’abi fel’ e kanawo’ nra gel e michan’ rodad ngak e En ni Ke Pi’ e Pi Motochiyel nem nge gonop rok ni bay riy. Bod ni, “fare motochiyel ni pi’ Kristus” e ba muun ngay fare motochiyel ni ngan fil ngak e girdi’ “gubin e tin ni ke yog [ngodad ni nguud] rin’ed.” (Galatia 6:2; Matthew 28:19, 20) Piin Kristiano e ku yad ma fol ko fare motochiyel ni ngaur muulunggad nga taabang ngaur pied e athamgil nga lanin’rad. (Hebrews 10:24, 25) Pi motochiyel rok Jehovah e kub muun ngay ni ngaun meybil ngak ni gubin ngiyal’ ni yib u gum’irchaey. (Matthew 6:5-8; 1 Thessalonika 5:17) Faanra ud folgad ko pi motochiyel ney ma aram e gad ra nang ni be pow’iydad. Ma faanra ud folgad riy, ma felfelan’ nra yib riy ngodad e dabiyog ni ngan pirieg ko re fayleng ney. Ka ga ra fal’eg i lemnag rogon angin e pi motochiyel nem ngom, ma ra gelnag boch e michan’ rom.

7, 8. Uw rogon ni be pi’ e Thin rok Got e athamgil nga laniyan’ e piin ni be magafan’rad nri de yag ni ngar pared ni yad ba yul’yul’ ngak Jehovah?

⁷ Boch e girdi’ e ma magafan’rad ya yad be lemnag ni kaygi mo’maw’ ni ngar folgad ko pi motochiyel rok Jehovah. Yad be rus ni bochan e ri ba ngiyal’ mi yad mul. Faanra ga ma lem ni aram rogon, ma dab mu pagtalin e pi thin ni baaray ni gaar: “I gag Jehovah ni Got romed, ni Fa En baadag ni nge fil ngomed e tin nra fel’ rogomed riy, me pow’iymed ko fare kanawo’ nib fel’ ni ngam marod riy. Faan gomanga gimed ra motoyil ko pi motochiyel rog! Ma gapas romed e ra bod e lul’, ma tin nib mat’aw nra um rin’ed e ra bod e n’ew u maday.’” (Isaiah 48:17, 18, NW) Bay ba ngiyal’ ni ka am fal’eg i lemnag rogon ni ma pi’ e pi thin ney e athamgil nga lanin’um, fa?

⁸ Be puguran Jehovah ngodad ni faan gad ra fol rok, ma ra yib angin ngodad. L’agruw ban’en ni ke micheg ngodad. Bin som’on e ra gapas lanin’dad ni bod e lul’ ni be par nib mocha’. Ma bin migid e, tin nib fel’ ni gad ma rin’ e ra bod e n’ew u maday. Ga ra par u tabon e yan’ ngam yaliy rogon ni be lobeb e n’ew i yib nga dap’el’ay, ma ga ra nang ndabi tal. Ke yog Jehovah ni faanra um fol rok ma tin nib fel’ ni ga ma rin’ e ra i par ni aram rogon. Faanra um athamgil ni ngam par ni gab yul’yul’ ngak, ma dariy ba ngiyal’ nra pagem! (Mu beeg e Psalm 55:22.) Gathi be gelnag e pi thin ney e michan’ rom ngak Jehovah nge pi motochiyel rok nib mat’aw?

‘NGAD TEDAN’DAD KO TIN NI KA BA’ NI NGAD FILED NGAD MU’NIGED’

9, 10. (a) Mang nrib fel’ ni nge nameg e piin Kristiano ni ngar ilalgad ko tirok Got ban’en? (b) Faan gad ra ilal ko tirok Got ban’en, ma uw rogon nra ayuwegdad ni ngaud pared ni gad ba felfelan’?

⁹ Bin migid e ba t’uf ni ngad ‘ilalgad’ ko tirok Got ban’en. (Hebrews 5:14; 6:1) Ireray ban’en nib t’uf ni nge nameg e Kristiano. Rayog ni ngad nameged ni ngad ilalgad ko tirok Got ban’en, mab thil ko bin ni ngad nameged ni ngad flontgad, ya gad manang ndabiyog e chiney. Ra ilal reb e Kristiano ko tirok Got ban’en, ma rayog ni nge pirieg e felfelan’ ko pigpig ni be tay ngak Jehovah. Mang fan ni aram rogon?

¹⁰ Be’ ni ke ilal ko tirok Got ban’en e ma sap nga ban’en nrogon ni ma sap Jehovah ngay. (John 4:23) I yoloy Paul ni gaar: “Piin ni yad be ngongol nrogon ni be yog e dowef rorad ngorad e tin ni ba adag e dowef rorad ni ngar rin’ed e ir e ke par ni be gagiyegnag lanin’rad.” (Roma 8:5) Be’ ni ma sap nga ban’en nrogon ni ma sap e girdi’ ngay e dabiyog ni ngari felfelan’, mab ga’ ni goo ir e ma lemnag ir, ma der lemnag e gabul nge langlath, ma kemus ni goo chugum e ba m’on u wan’. Ma be’ ni ke ilal ko tirok Got ban’en e ma par nib felfelan’, ma kemus ni Jehovah ni fare Got nib felfelan’ e ir e ba m’on u wan’. Be’ ni ke ilal ko tirok Got ban’en e baadag ni nge rin’ e tin nib m’agan’ Jehovah ngay, ma ma par nib felfelan’ ni mus ko ngiyal’ ni ke yib e skeng ngak. Mang fan? Pi skeng ni ma yib ngodad e aram reb e kanawo’ ni ngad micheged riy ni Satan e ba malulfith l’igin, ma gad fil rogon ni ngad pared ni gad ba yul’yul’, ma gad felfelan’nag e Chitamangidad nu tharmiy.​—Proverbs 27:11; mu beeg e James 1:2, 3.

11, 12. (a) Mang e yog Paul u murung’agen rogon ni nge nang reb e Kristiano e “tin nib fel’ ko tin nib kireb”? Mang e be yip’ fan fare bugithin ni kan piliyeg ni “filed rogon”? (b) Uw rogon ni ma ilal e dowef me yag ni nge mithmith?

¹¹ Yima ilal ko tirok Got ban’en u daken e fol Bible. Am lemnag e re thin ni baaray ni gaar: “Ggan nib el e piilal e ngar ked, ya kar filed rogon ni ngar nanged e tin nib fel’ ko tin nib kireb.” (Hebrews 5:14) Nap’an ni yog Paul ni ngad “filed rogon” ni ngad nanged e tin nib fel’ ko tin nib kireb, me fanay bbugithin ni Greek ni yima yog u lan e yungi n’en ni yima chamag riy ara gymnasium u Greece ko bin som’on e chibog, ya rayog ni ngan pilyeg ni ‘be’ ni kan skulnag ni bod e gymnast.’a Am lemnag e n’en nib muun ko re n’ey.

¹² Nap’an nni gargelnagdad ma dariy ban’en nrayog ni ngad rin’ed. Bod ni bitir ni kab madway e dabiyog ni nge gagiyegnag rogon ni nge mithmitheg pa’ nge ay. Ma bayi n’en me gad pa’ nga owchen. Machane, nap’an ni be ilal i yan ma be gay rogon ni nge mithmith. Som’on e ra gararaw, me munmun me un ko yan, me tomur me yag ni nge mil.b Machane, uw rogon e gymnast? Ga ra guy be’ ni ma un ko mit ney e gosgos ni be chelchel u lan e lang nib fel’ rogon ma ga ra nang nre n’em ni be rin’ e ban’en nib cheg riy. Re n’ey e gathi yigi par me cheg riy, ya ban’en ni ke fil nib n’uw nap’an. Be yog e Bible ni dowef ni yima gelnag ni fan ko gosgos e “ba ga’ fan ko biney e tamilang.” Ere, ba tamilang ni kab ga’ fan ni ngad filed rogon ni ngad nanged e tin nib fel’ ko tin nib kireb!​—1 Timothy 4:8.

13. Uw rogon ni ngad filed rogon ni ngad nanged e tin nib fel’ ko tin nib kireb?

¹³ Boor ban’en ni kad weliyed u lan e re ke babyor ney nra ayuwegem ni ngam nang e tin nib fel’ ko tin nib kireb, me yag ni ngam par ni gab yul’yul’ ngak Jehovah. Mu fal’eg i lemnag e pi motochiyel nge pi kenggin e motochiyel rok ma ga yibilay ni nge ayuwegem u nap’an ni ngam dugliy ban’en. U m’on ni ngam dugliy ban’en, ma ngam fithem ni nge lungum: ‘Mang rogon e motochiyel ara pi kenggin e motochiyel u Bible ko re n’ey? Uw rogon ni nggu fol riy? Mang e gu ra rin’ mu gu felfelan’nag Jehovah?’ (Mu beeg e Proverbs 3:5, 6; James 1:5.) Faan ga ra lemnag e pi deer ney u m’on ni ngam dugliy ban’en, ma aram e ga be fil rogon ni ngam nang e tin nib fel’ ko tin nib kireb. Re n’ey e ra ayuwegem ni ngam ilal ko tirok Got ban’en mag par ni aram rogon.

14. Mang e ba t’uf ni ngad rin’ed ma gad ilal ko tirok Got ban’en? Mang e ngad kol ayuwgad riy?

¹⁴ Yugu aram rogon nrayog ni ngad ilalgad ko tirok Got ban’en, machane ku rayog ni ngki yoor ban’en ni ngad filed. Rogon ni yima ilal e be yan u rogon e ggan ni yima kay. Aram fan ni gaar Paul: “Ggan nib el e piilal e ngar ked.” Reb e kanawo’ nrayog ni nge gel e michan’ rom riy e aram e ngaum fil e tin nib toar fan e machib. Ga ra fol ko tin ni ga be fil, ma aram e ra yag e gonop ngom, ya be gaar e Bible: “Gonop ni nge yog ngom e ireram e n’en th’abi ga’ fan ni ga ra rin’.” Ere, ba t’uf ni ngad adaged ni ngaud filed e tin riyul’ ni be fil Jehovah ngodad. (Proverbs 4:5-7; 1 Peter 2:2) Machane, ra yag e tamilangan’ nge gonop ngodad, ma aram e gathi nge tolangan’dad. Ba t’uf ni nge gubin ngiyal’ ma ngaud yaliyed gadad ya nge dabi sum e tolangan’, ara boch e lem nib kireb u lanin’dad. I yoloy Paul ni gaar: “Mu changargad ngomed ko gimed be par ni gimed be ngongol u fithik’ e michan’ romed ngak Kristus fa danga’.”​—2 Korinth 13:5.

15. Faanra ngad ilalgad ko tirok Got ban’en, ma mang nib ga’ fan e t’ufeg?

¹⁵ Rayog ni nge par be’ nib gel mab fel’ fithik’ i dow, machane rib ga’ fan ni nga i abich nib fel’ rogon ma be kay e ggan nib fel’ nga fithik’ i dow. Mang e ba t’uf ni nge yag ngodad ma gad ilal ko tirok Got ban’en me par e michan’ rodad nib gel? Aram e t’ufeg. Ba ga’ fan ni ngari t’uf Jehovah rodad nge pi walagdad. Faanra dariy e t’ufeg, ma urngin ban’en ni kad filed nge pi n’en ni gad be rin’ e ra yan i aw nib m’ay fan. (1 Korinth 13:1-3) Ere, t’ufeg e rayog ni nge ayuwegdad ngad ilalgad ko tirok Got ban’en me par nib gel e michan’ rodad.

NGAUM PAR NI GA BE LEMNAG E ATHAP NI KE PI’ JEHOVAH NGODAD

16. Ba miti mang lem e ma guy Satan rogon ni nge meewarnag lanin’dad? Mang e ke pi’ Jehovah nra ayuwegdad?

¹⁶ Ngkud weliyed reb e ban’en nra ayuweg e michan’ rom. Rogon ni nge gel e michan’ rom ni gur reb i gachalpen Kristus, e ba t’uf ni ngam kol ayuw u rogon ni ga ma lem. Satan ni ir e be gagiyegnag e re fayleng ney e rib salap i pingeg laniyan’ e girdi’ ngar lemnaged boch ban’en nra meewarnag lanin’rad, ara ngar lemnaged nra buch boch ban’en nib kireb, ara i maruwaran’rad, fa ra lemnaged ndakuriy e athap rorad. (Efesus 2:2) Lem ni aray rogon e rayog ni nge magawonnag reb e Kristiano. Gad be felfelan’ ya ke pi’ Jehovah ban’en nrayog ni nge ayuwegdad, ni aram e athap.

17. Uw rogon ni ke tamilangnag e Bible feni ga’ fan e athap rodad?

¹⁷ Be weliy e Bible murung’agen e pi talin e cham rodad ni ke pi’ Got nib t’uf ni ngad fanayed ni ngad chamgad ngak Satan nge re fayleng ney. Reb e pi talin e cham rodad nem e urwach, ni be yip’ fan e “tin ni be l’agan’dad ngay ni bay da guyed ni bochan e kad thapgad ngak Got.” (1 Thessalonika 5:8) Salthaw kakrom e yad manang ndabiyog ni ngar mageygad ni yad ba fas ni faanra dab ra ted e urwach nga lolugrad u nap’an e mahl. Pi urwach nem e kan ngongliy ko wasey. Ere, athap rom e rayog ni nge ayuweg rogon ni ga ma lem ni bod fare urwach ni ma ayuweg lolugey.

18, 19. Mang kanawo’ e ke dag Jesus u rogon ni nga i par ni bay e athap rodad? Uw rogon ni ngad folwokgad rok?

¹⁸ Jesus e ir e dag e bin th’abi fel’ e kanawo’ u rogon ni nga i par ni bay e athap rodad. Am lemnag e gafgow ni tay ko fare nep’ u m’on ni nge yim’. Be’ nrib fel’ e thin rorow e yognag ni bochan e salpiy. Maku reb e fager rok e yog nde nang. Ma tin ka bay e ra digeyed ngar milgad. Ma girdi’ ko nam rok e ra chelgad ngar togopuluwgad ngak, mu ur tolulgad ni yad be yog ko salthaw nu Roma ni ngan richibiy nga ba ley i gek’iy nge yim’. Ere, dariy e maruwar riy ni kab gel e skeng ni yib ngak Jesus ko skeng ni ma yib ngodad. Mang e ayuweg? Bay e fulweg riy u Hebrews 12:2 ni gaar: “Bochan e felfelan’ ni be sonnag ma daki tafinaynag e tamra’ nra tay ko yam’ ni nge tay u daken fare ley i gek’iy, me ere chiney e ke par nga but’ u ba’ ni mat’aw rok Got u tagil’ Got.” Dariy ba ngiyal’ ni pag Jesus talin e “felfelan’ ni be sonnag.”

¹⁹ Mang felfelan’ e i sonnag Jesus? Manang ni faanra athamgil u fithik’ e gafgow, ma aram e rayog ni nge un i tayfan fithingan Jehovah nib thothup. Maku rayog ni nge micheg ni Satan e ba malulfith l’igin. Ere, dakuriy reb e athap nga bang nra felfelan’nag Jesus ni bod e biney! Ku manang nra pi’ Jehovah e tow’ath rok ni bochan e yul’yul’ ni i tay, ma rayog ni nge sul ko Chitamangin ngar parew u taabang ni yow ba felfelan’. Aram e n’en ni i par u laniyan’ Jesus ngki mada’ ko ngiyal’ ni mada’nag e tin th’abi mo’maw’ e skeng. Ku aram e n’en nib t’uf ni ngad rin’ed. Bay boch ban’en nga m’on nrayog ni nge felfelan’dad ngay. Gad gubin ni ke pi’ Jehovah reb e tow’ath ngodad ni aram e ngad uned i tayfan fithingan nib thothup. Faan gad ra mel’eg ni nge mang Jehovah e Got rodad Nth’abi Tolang, mu ud pared ni gad ba t’uf rok ni demtrug e miti skeng ni gad ra mada’nag, ma aram e rayog ni ngad micheged ni Satan e ba malulfith l’igin.

20. Mang e ra ayuwegem ni nge dab kum lemnag boch ban’en nra meewarnag lanin’um?

²⁰ Gathi kemus nrayog rok Jehovah ni nge tow’athnag e pi tapigpig rok ni yad ba yul’yul’, ya ri ku baadag ni nge rin’. (Isaiah 30:18; mu beeg e Malaki 3:10.) Ba felfelan’ ngay ni nge pi’ ngak e pi tapigpig rok e tin ni yad be yim’ ni bochan. (Psalm 37:4) Ere, ngaum par ni ga be lemnag e athap ni ke pi’ Got ngodad. Ma dab um lem ni bod e girdi’ ko re fayleng rok Satan ney. Faanra kam thamiy ni ke yib e re lem nem ngom, ma ngam meybil ngak Jehovah nib gel ni ngam ning e ‘gapas rok ndabi chuchugur ni nge nang e girdi’ fan.’ Re gapas nem e ra yororiy gum’irchaem nge tafinay rom.​—Filippi 4:6, 7.

21, 22. (a) Mang e athap ko fare ulung nib ga’ ara fapi girdi’ ni “pire’ ni pire’”? (b) Mang athap ni ke pi’ Got ngodad e ri ga baadag? Mang e kam dugliy ni ngam rin’?

²¹ Aygum lemnag e athap rom! Faanra gur bang ko fare ulung nib ga’ ara fapi girdi’ ni “pire’ ni pire’” ni yad ra magey u tomuren “fare gafgow ni ba ga’” ma ngam lemnag e felfelan’ ni ga ra tay. (Revelation 7:9, 14) Felfelan’ ni ga ra tay e ngiyal’ nem ndaki moy Satan nge pi moonyan’ rok e ba mo’maw’ ni ngam nang fan e chiney. Mini’ rodad e manang rogon e par ko ngiyal’ nde moy Satan ni be suruy laniyan’ e girdi’ ko kireb? Ra chuw Satan ma ri gad ra par u fithik’ e felfelan’, ma gad un i fal’eg e re fayleng ney nge mang paradis u tan e gagiyeg rok Jesus nge fare 144,000 e girdi’ ni yad ra un ngak ko gagiyeg! Ma ri kab gel e felfelan’ ni gad ra tay u nap’an ni gad ra guy ni ke chuw urngin mit e m’ar, ma gad mada’ bayay e piin ni yad ba t’uf rodad ni kar m’ad, ma gad par nrogon ni baadag Got ni ngad pared! Ma nap’an ni gad be flont i yan ma aram e gad be chugur i yan ko fare tow’ath ni kan micheg ko Roma 8:21 ni aram e ngad uned ko “flaab rok pi fak Got.”

²² Baadag Jehovah ni ngam par ni ke puf rogom. Machane rogon me yag e re puf rogon nem ngom e ngam fol. Gathi bay angin nra yib ngom ni faanra um athamgil ngaum fol rok Jehovah ni gubin e rran? Faanra aram rogon, ma aram e ngaum gelnag e michan’ rom ni th’abi thothup ya nge yag ni um par ni gab t’uf rok Got ndariy n’umngin nap’an!