Rogon ni Ngad Maruweliyed e T’ufeg Rodad ngak Got nge Girdi’

Yugu aram rogon ndaki moy e piin Kristiano u tan fare Motochiyel rok Moses, machane fa gal motochiyel ni ngan t’ufeg Got nge girdi’ ni bay ko re Motochiyel nem e ku aram l’agruw ban’en ni baadag Jehovah ni ngad folgad riy. (Mt 22:37-39) Re t’ufeg ney e gathi ban’en nni gargelegdad ma bay rodad, ya ban’en nib t’uf ni ngad maruweliyed nge yag ngodad. Uw rogon ni ngad rin’ed e re n’ey? Reb e kanawo’ nrayog ni ngad rin’ed e re n’ey riy, e aram e ngad beeged e Bible rodad ni gubin e rran. Nap’an ni gad ra lemnag rogon ni be tamilangnag e Bible rarogon Got, ma aram e ra tamilang u wan’dad “feni fel’” Jehovah. (Ps 27:4) Angin nra yib riy e ra gel e t’ufeg rodad ngak me puluw rogon ni gad ma lemnag ban’en nga rogon ni ma lemnag. Re n’ey e ra k’aringdad ni ngad folgad ko pi motochiyel rok nib muun ngay fare motochiyel ni ngad daged e t’ufeg ni gad ma pag fadad riy u nap’an ni gad be ayuweg e girdi’. (Joh 13:34, 35; 1Jo 5:3) Baaray dalip e kanawo’ nrayog ni ngam fol riy ya nge yag ni ngam felfelan’ ko beeg Bible ni ga ma tay:

• Mu susunnag e pi n’en ni ga be beeg murung’agen mag fanay fa lal i thamtham ni bay rom. Mu susunnag ni ga bay u rom. Gur, mang e pi n’en nrayog ni ngam guy ara mu rung’ag ara mu faray bon u rom? Ra uw rogon e lem rok e piin ni ga be beeg murung’agrad?

• Mu thilyeg rogon ni ga be beeg. Baaray boch e kanawo’ nrayog ni ngam rin’ e re n’ey riy: Rayog ni ngam beeg e Bible rom nib ga’ lamam ara um beeg u nap’an ni ga be motoyil ko audio recording. Ara mu beeg murung’agen be’ nge be’ ni bay u Bible ara murung’agen reb e ban’en nge reb ko bin ni ngam beeg reb e guruy riy nge reb. Bod nrayog ni ngam fanay e Section 4 ara 16 ni bay ko fare ke babyor ni Boch Ban’en Nra Ayuwegdad u Nap’an e Fol Bible ni ngam beeg murung’agen Jesus. Ku rayog ni ngkum beeg fare guruy ni ir e kan fek e thin ni bay ko fare daily text riy ni gad ma beeg ni gubin e rran. Ara reb e, mu beeg e pi babyor ko Bible ni tabab ko bin som’on e babyor nni yoloy nge yan ko bin migid.

• Mu beeg ya ngam nang fan. Faanra kemus ni ngam beeg taareb e guruy ko Bible rom ni gubin e rran ni ga be fal’eg i lemnag ni bochan e ngam nang fan, ma kab fel’ ko bin ni ngam beeg boor e guruy riy ni bochan e yi ga be beeg e Bible. Ngam lemnag e pi n’en ni be buch nge gin ni be buch riy nge ngiyal’ ni be buch e pi n’em riy mag fal’eg i fil murung’agen. Mu kum fanay e map nge fapi thin nu Bible ni bay ko marginal reference. Ku rayog ni ngam fal’eg i gay reb e ban’en ndam nang fan. Ma faanra rayog mab fel’ ni nge taareb n’umngin nap’an ni ga be beeg e Bible rom nga n’umngin nap’an ni ga be fal’eg i lemnag e pi n’en ni kam beeg.