PI N’EN NI MA RIN’ E PIIN KRISTIANO

Mu Gonopiy Rogon ni Ngam Mel’eg e Tin Ngam Chuweg e Chalban Rom Ngay

Gur, mang fan nthingar da gonopiyed rogon ni ngad mel’eged e pi n’en ni gad ma chuweg e chalban rodad ngay? Ya bochan nnap’an ni gad ra mel’eg reb e kachido ni ngad yaliyed, ara reb e tang ni ngad motoyilgad ngay, ara website ni nga darod ngay, ara reb e babyor ni ngad beeged, ara reb e video game ni ngad playnaged, ma aram e gad be mel’eg e pi n’en ni ngad suguyed nga lanin’dad. Ere pi n’en ni gad ma mel’eg ni ngad chuweged e chalban rodad ngay e rayog ni nge gagiyegnag e ngongol rodad. Ba gel e kireban’ riy ni bochan e ngiyal’ ney e yooren e pi n’en ni yima chuweg e chalban ngay e ba sug ko tin ni ma fanenikay Jehovah. (Pr 6:16, 17; Ga 5:19-21) Ireray fan ni kan fonownagdad ko thin nu Bible ni ngaud lemnaged e pi n’en ni ngad rin’ed nra pining e sorok ngak Jehovah.—Fil 4:8.

MU YALIY FARE VIDEO NI KENGGIN E WHAT ENTERTAINMENT SHOULD I CHOOSE? NGEMU’ MIN PI’ E FULWEG KO PI DEER NI BAARAY:

Uw rogon ma fapi gosgos ni un tay u Roma kakrom ni aram e yima fek l’agruw ni’ nga bang ni ke muulung e girdi’ ni yoor ngay ni ngar chamgow nge mada’ ko ngiyal’ ni ke yim’ bagayow e taareb rogon ko pi n’en ni yima chuweg e chalban ngay e ngiyal’ ney?
Uw rogon nrayog ni nge pi’ e pi walag e ayuw ngak e piin bitir u rogon ni ngar gonopiyed rogon ni ngar mel’eged e pi n’en ni ngar chuweged e chalban rorad ngay?
Uw rogon nib l’ag e thin ni bay ko Roma 12:9 ko pi n’en ni gad ma mel’eg ni ngad chuweged e chalban rodad ngay?
Mang boch ban’en ni ga ma chuweg e chalban rom ngay ni bay ko gin ni ga ma par riy nib fel’ nrayog ni ngan yaliy ara ngan motoyil ngay?

GUR, TIN GA MA CHUWEG E CHALBAN ROM NGAY E BOGI BAN’EN NI KEMUS NI NGAN YALIY ARA NGAN BEEG, ARA BAN’EN NI GA BE UN I RIN’?

Yooren e tin ma chuweg e girdi’ e chalban rorad ngay e ma fil ngorad ni kemus ni ngar yaliyed ara ngar beeged e tin be rin’ yugu boch e girdi’ ko bin ni yad e ngar uned i rin’ e pi n’em. Pi kachido, nge pi babyor, nge ku boch ban’en ni yima pag yaan u T.V. e be weliy rogon e lem rok yugu boch e girdi’ ma gathi lem rom. Yugu aram rogon nrayog ni ngaun par ma yibe yaliy e kachido ara ngan beeg e babyor ni ngan n’ag e chalban ngay, machane faan gad ra un i rin’ boch ban’en, ma ra yib angin ngodad. Bod ni bay boch e girdi’ ni yad ma un i chubeg ba mit e talin e musik ara ngar yoloyed yaan boch ban’en. Ma boch e girdi’ e yad ma felfelan’ u nap’an ni yad ra un nga boch e gosgos ni yima tay u wen ara hiking ara camping. Ere demtrug e miti n’en ni gad ra mel’eg, ma thingar da “rin’ed ni fan e nga nog e sorok riy ngak Got.”—1Ko 10:31.