BIN 2

Ngan Non nib Fel’ Rogon

2 Korinth 2:17

N’EN NI NGAN RIN’: Mu non u reb e kanawo’ nrayog ni nge m’ug riy ko uw rogon u wan’um e n’en ni ga be weliy nge piin ni ga be non ngorad.

Mmeybil mag fal’eg rogom nib fel’ rogon. Mmeybil ni ngan ayuwegem ni gathi gur e ngam lemnagem, machane ngam lemnag e n’en ni ngam weliy. Mu tay u wan’um e n’en nib ga’ fan ni ngam tamilangnag. Mu non nrogon ni kam nang fan ko bin ni kemus ni ngam beeg u babyor.

Faanra kam lemnag ni ngam beeg e Bible ara ba ken e babyor, mag fal’eg i fil ya nge yag nim beeg nib fel’ rogon. Faanra ga be beeg e thin rok be’, mag beeg nri bod rogon ni yog, machane yugu dabi pag rogon.
Mu non nrogon ni keb u gum’irchaem. Mu lemnag fan nib t’uf ni nge rung’ag fapi cha’ e n’en ni nga mog. Mu lemnagrad. Faan ga ra rin’ e re n’ey, ma ra m’ug u owchem, nge rogon ni kam par, nge rogon ni ga be non ma be un paam ngay nib riyul’ u wan’um e tin ni ga be weliy ma ga be non u fithik’ e sumunguy.

Ra ngam non ni bod rogon ni kag ma non ma gathi aram e be yip’ fan ni ngam non ndariy yaramen e welthin rom, ya ngam guy rogon ni ngam non nib fel’ rogon ni aram e ngam fanay e thin nib tamilang mab puluw.
Mu sap ko piin ni ga be non ngorad. Mu sap nga owchen e girdi’ ni faanra de kireb ni ngam rin’. Nap’an ni ga be pi’ e welthin, mag sap ku be’ nge be’ ko bin ni ngam sap ngak urngin e girdi’ taab yay ara nga yigi yan owchem u daken e girdi’ ni taab yay.