BIN 10

Rogon ni Yibe Thilthilyeg Lamay

Proverbs 8:4, 7

N’EN NI NGAN RIN’: Mu thilthilyeg ga’ngin lamam, nge rogon ni ga be non, nge payngin ni ga be non ya nge yag nim non nib tamilang mag pug laniyan’ e piin be motoyil.

ROGON NI NGAN RIN’:

Mu thilthilyeg ga’ngin lamam. Mu ga’nag lamam ya nge gagiyel e tin nib ga’ fan ko n’en ni ga be weliy, mag pug laniyan’ e piin be motoyil. Kum rin’ e re n’ey u nap’an ni ga be beeg reb e thin nu Bible ni murung’agen e pufthin. Mu achignag lamam ya ngam k’aring e girdi’ ni ngar fal’eged e motoyil, ara nge m’ug riy rogon e marus, ara magafan’ ni be tay e piin ni ga be weliy murung’agrad.

Dab mu ga’nag lamam nib tomgin ya ra lemnag e girdi’ ni ga be puwan’ ngorad. Ku dab mu thilthilyeg ga’ngin lamam nib pag rogon ya ra par e girdi’ ni gur e yibe yaliyem ma dab kur lemnaged e pi n’en ni ga be weliy.
Mu thilthilyeg e tone rom. Faanra ba puluw ni ngan rin’ ko thin rom, mag non nib gel merin u nap’an ni ga be weliy ban’en u fithik’ e pasig ara nap’an ni nga mog ga’ngin ban’en ara palogin bangi ban’en. Mu non nib munguy lamam u nap’an ni ga be weliy rogon e kireban’ ara magafan’ ni be tay e piin ni ga be weliy murung’agrad.
Mu thilthilyeg payngin ni ga be non. Mu non nib papey ni nge m’ug ni kam felfelan’. Mu non nib sagaal u nap’an ni ga be tamilangnag ban’en nib ga’ fan.

Yug dab mu thilyeg payngin e welthin ni ga be tay nib tomgin, ya ra gin e piin be motoyil. Ku dab mu non ni yugu ba machreg ya ku dabin nang fan e n’en ni ga be yog.