GURUY NI 09
Mu Chugur Ngak Got u Daken e Meybil
Bay yu ngiyal’ ni ga ma lemnag nib t’uf ban’en ni nge pow’iyem, fa? Bay boch e deer rom nib ga’ fan ni ga baadag ni ngan pi’ e fulweg riy, fa? Ba t’uf ni ngan fal’eg lanin’um, fa? Ma ga baadag ni nge chugur e tha’ u thilmew Jehovah, fa? Rayog ni nge ayuwegem e meybil u gubin e pi n’ey. Machane mang e bin nib puluw e kanawo’ ni ngan meybil riy? Gubin e meybil ni ma motoyil Got ngay, fa? Ma mang e rayog ni ngam rin’ ya nge yag ni rung’ag e meybil rom? Ngad guyed e fulweg riy.
1. Mini’ e susun ni ngad meybilgad ngak, ma mang e rayog ni ngad yibilayed murung’agen?
I yog Jesus ni Chitamangidad ni bay u tharmiy e ir e susun ni ngad meybilgad ngak. Mus ngak Jesus ma i meybil ngak Jehovah. I gaar: “Baara’ rogon ni ngam meybilgad ni nge lungumed: Chitamangimad ni ga bay u tharmiy . . . ” (Matthew 6:9) Nap’an ni gad ra meybil ngak Jehovah, ma aram e gad be chugurnag e tha’ u thildad.
Demtrug ban’en nrayog ni ngad yibilayed murung’agen. Machane ra nge fulweg Got taban e meybil rodad, ma thingari puluw ko n’en nib m’agan’ ngay. “[Ra] rung’ag e tin ni gadad be yog ni faan gadad ra ning ban’en ngak ni ban’en nib m’agan’ ngay.” (1 John 5:14) I yog Jesus boch ban’en nrayog ni ngad uneged u lan e meybil rodad. (Mu beeg e Matthew 6:9-13.) Gathi kemus ni ngad yibilayed e tirodad ban’en, ya thingar ku dab da paged talin ni ngad pininged e magar ngak Got ko tin ke rin’ ni fan ngodad, mu ku dogned ngak ni nge ayuweg yugu boch e girdi’.
2. Uw rogon nsusun e ngad meybilgad?
Be pi’ e Bible e athamgil nga lanin’dad ni ngad “weliyed ngak [Got] urngin e magafan’ [rodad].” (Psalm 62:8, BT) Ere susun ni ngad meybilgad ni ke yib u gum’ircha’dad. Rayog ni ngad meybilgad nib ga’ lamdad ara ngad meybilgad u lanin’dad ndemtrug rogon ni kad pared. Ku demtrug e ngiyal’ nge gin’en ni gad bay riy, ma rayog ni ngad meybilgad.
3. Uw rogon ni ma fulweg Got taban e meybil rodad?
Boor e kanawo’ ni ma rin’ e re n’ey riy. Ke pi’ Jehovah e Bible ni aram e gin nrayog ni ngad pirieged e fulweg ko pi deer rodad riy. Thin rok Got ni yima beeg e rayog ni nge “pi’ e gonop ngak e piin ndariy rorad.” (Psalm 19:7; mu beeg e James 1:5.) Rayog ni nge pi’ Got e gapas nga lanin’dad u nap’an ni kad mada’naged e magawon. Ku rayog ni nge k’aring e pi tapigpig rok ni ngar ayuweged gadad ko ngiyal’ ni kari t’uf e ayuw rodad.
KUM FIL BOCH BAN’EN U MURUNG’AGEN
Mu fil rogon nrayog ni ngam meybil u reb e kanawo’ nib m’agan’ Got ngay nge rogon nrayog ni nge yib angin e meybil ngom.
4. Bay rogon ni baadag Got ni ngan meybil ngak
Ra uw rogon ma aram e ra m’agan’ Got ko meybil rodad, ma ra uw rogon ma aram e dabi m’agan’ ngay? Mu yaliyew e re VIDEO ney.
Baadag Jehovah ni ngad meybilgad ngak. Mu beegew e Psalm 65:2, mi gimew weliy e fulweg ko gal deer ni baaray:
Ga be lemnag ni baadag e en ma “fulweg taban e meybil” ni ngam meybil ngak, fa? Mang fan ni ka mog ni arrogon?
Faanra gad baadag ni nge rung’ag Got e meybil rodad, ma thingari puluw e ngongol rodad ko pi motochiyel rok. Mu beegew e Mikah 3:4 nge 1 Peter 3:12, mi gimew weliy e fulweg ko re deer ni baaray:
Ra uw rogon ma aram e ra motoyil Jehovah ko meybil rodad?
Ra nap’an e mahl ma ra barba’ e salthaw ma yad be yibilay ni ngar gelgad. Ere gur, ba puluw ni ngan lemnag nra fulweg Got taban e meybil ni aray rogon, fa?
5. Susun ni ngad meybilgad ni ke yib u gum’ircha’dad
Bay boch e girdi’ ni kan fil ngorad ni ngaur sulod u daken taab meybil ni boor yay. Machane gur, aray rogon ni baadag Got ni ngad meybilgad ngak? Mu beegew e Matthew 6:7, mi gimew weliy e fulweg ko re deer ni baaray:
Mang e ga ra rin’ me yag ni nge dab um sul u “daken taab bugithin ni pire’ yay” u lan e meybil rom?
Gubin e rran nrayog ni ngam lemnag ban’en ni ke tow’athnagem Jehovah riy mag pining e magar riy ngak. Ga ra rin’ e re n’ey u lan reb e wik, ma ra yan i aw ni kam yibilay medlip ban’en. Aray rogon ndab mu sul u daken taab n’en u lan e meybil rom.
Reb e matam nib manigil e baadag ni nge weliy fak rogon laniyan’ ngak. Ku arrogon Jehovah ni baadag ni ngad meybilgad ngak ni ke yib u gum’ircha’dad
6. Meybil e reb e tow’ath ni ke yib rok Got
Uw rogon nrayog ni nge ayuwegdad e meybil nib ga’ nu nap’an ni kad mada’naged e magawon? Mu yaliyew e re VIDEO ney.
Be micheg e Bible ni meybil e rayog ni nge ayuwegdad ni nge gapas lanin’dad. Mu beegew e Filippi 4:6, 7, mi gimew weliy e fulweg ko gal deer ni baaray:
Yugu aram rogon ni gathi gubin ngiyal’ nra chuw e magawon rodad u nap’an ni gad ra meybil, machane uw rogon nra ayuwegdad?
Mang boch ban’en ni ga baadag ni ngam yibilay murung’agen?
Baaray murung’agen ban’en
Fare bugithin ni “amen” e be yip’ fan ni “nge par riy ni errogon” ara “arrogon.” Kab kakrom ni yima yog e “amen” u tungun e meybil.—1 Kronicles 16:36, BT.
7. Mu tay e tayim ni fan ko meybil
Yu ngiyal’ e rayog ni kaygi yoor pa’ nga puluwdad ma gad pagtalin ni ngad meybilgad. Uw feni ga’ fan e meybil u wan’ Jesus? Mu beegew e Matthew 14:23 nge Mark 1:35, mi gimew weliy e fulweg ko gal deer ni baaray:
Mang e i rin’ Jesus ya nge yag ni tay e tayim ni fan ko meybil?
Mingiyal’ e rayog ni ngam meybil riy?
MA GAAR BOCH E GIRDI’: “Demtrug ko mini’ e ngad meybilgad ngak ya gubin e meybil ni ma yan ngak Got.”
Mang e ga ra yog?
N’EN KAN FIL
Meybil ni ke yib u gum’ircha’dad e ma chugurnagdad ngak Got, me gapaseg lanin’dad, me pi’ gelngidad ni ngad rin’ed e n’en nib m’agan’ Jehovah ngay.
Ngan Sul u Daken
Mini’ e susun ni ngad meybilgad ngak?
Uw rogon nsusun e ngad meybilgad?
Mang boch i angin e meybil?
MU GAY MURUNG’AGEN
Mu pirieg e fulweg u boch e deer nib ga’ ni yima fith u murung’agen e meybil.
Mu fil fan nsusun e ngam meybil nge rogon ni ngam mon’ognag rogon e meybil ni ga ma tay.
Mu fil e n’en be yog e Bible u murung’agen e en susun e ngad meybilgad ngak.
Mmotoyil ko re music video ney ni ngam nang ko bay rogon e ngiyal’ nge gin’en ni gad ma meybil riy fa danga’.