“Ba Mich nib Yul’yul’ u lan e Lang”

PIIN ma yoloy e poem nge tang e ke n’uw nap’an ni ma yog ni pul e ba fel’ yaan. Ni bod ba tang ni thagthagnag Got ni be yog murung’agen be’ ni ppin nib “fel’ yaan ni bod e pul ni ngoon.” (Tang rok Solomon 6:10, NW) Ma fare psalmist e be yog ni fare pul e ba “mich nib yul’yul’ ni be par u lan e lang.” (Psalm 89:37) Mange be yip’ e re bugithin ney fan?

Fare pul ni ba mudugil ni ma liyeg e fayleng u lan 27.3 e rran. Arfan ni n’en ni ma rin’ fare pul nib mudugil e rayog ni nga nog ni yima pagan’uy ngay. Machane, sana ka bay ban’en ni ka ba ga’ fan ni be lemnag fare psalmist. Ke yog ni fare pul e “ba mich nib yul’yul’” u lan e tang rok ni yiiy u murung’agen fare Gil’ilungun ni ir e ke fil Jesus ngak pi gachalpen ni ngar yibilayed.​—Matthew 6:9, 10.

Ke pag 3,000 e duw ni ke yan, ni fal’eg Jehovah e m’ag ni fan ngak nge David ni Pilung rok piyu Israel kakrom. (2 Samuel 7:12-16) Kan ngongliy e re m’ag n’em ni fan ni ngan bing e kanawo’ ngak Jesus Kristus ni aram ke yog mat’awun ni nge mang pilung ndariy n’umngin nap’an ni yib ko tabinaw rok David. (Isaiah 9:7; Luke 1:32, 33) I tang fare psalmist ni murung’agen faen ‘owchen’ ni gaar: “Ra par ndariy n’umngin nap’an ni bod rogon fare pul, me mang mich nib yul’yul’ u lan e lang.”​—Psalm 89:36, 37.

Fare ‘tamilang ni nge tamilangnag e nep’’​—ni aram fare pul—​e ba puluw ni nge puguran feni mudugil e gagiyeg rok Kristus. (Genesis 1:16) Daniel 7:14 e be yog murung’agen Gil’ilungun ni gaar: “Ma mat’awun ko gagiyeg ni nge tay e bay i par ndariy n’umngin nap’an, ma gagiyeg rok e dabi mus.” Fare pul e be puguran ngodad murung’agen e re Gil’ilungun nem nge pi tow’ath nra yibnag ni fan ko girdi’.

Ga Baadag ni Bay Be’ ni Nge Guyem?

Yugu demtrug feni wagey e fayleng e chiney, ma rayog ni nge yog e felfelan’ ni bochan e tamilangan’ rok Got, nge Gil’ilungun, nge tin nib m’agan’ ngay ni fan ko girdi’. Faanra ga ba adag ni ngam nang boch ban’en ara ga baadag ni bay be’ ni nge yib nga tabinaw rom nge guyem ni nge fil e Bible ngom ni dariy puluwon, wenig ngom ngam yoloy e babyor ma ngam pi’ ngak e Pi Mich Rok Jehovah, 143 Jehovah Street, Barrigada, GU 96913, ara yugu boch e address ni kan yoloy ko page 2.