Deer Ko Piin Ma Beeg

Mang fan nsusun e nge kol ayuw e piin Kristiano u rogon ni yad ma fanay boch e app ni yima non riy ngak yugu boch e girdi’ ko Internet?

Bay boch e Pi Mich ni yad ma fanay boch ban’en ni kan ngongliy e ngiyal’ ney ni bod e computer, nge tablet, nge cellphone ni ngaur nonad girdien e tabinaw rorad riy ara yugu boch e Pi Mich. Machane reb e Kristiano ni ke ilal ko tirok Got ban’en e thingar dabi pagtalin fare fonow ni be gaar: “Girdi’ nib sul laniyan’ ngak e yad ra guy e oloboch ni be yib mi yad pilo’ riy, ma be’ nib manan’ e ra yan nga fithik’ mfini kalngan’ riy ko tomur.”​—Prov. 27:12, BT.

Gad manang ni baadag Jehovah ni nge ayuwegdad. Ere aram fan ndab ud chaggad ngak e piin yad ma yurba’nag e girdi’, ara piin kan tharbograd ko ulung, ara piin yad ma yog boch e machib nde puluw. (Rom. 16:17; 1 Kor. 5:11; 2 John 10, 11) Bay boch e girdi’ ni yad ma un ko muulung nsana darur folgad ko pi motochiyel u Bible. (2 Tim. 2:20, 21) Thingar dab da paged talin e re n’ey u nap’an ni gad be mel’eg e piin ngar manged fager rodad. Sana ba mo’maw’ ni ngad mel’eged e piin nib fel’ ni ngaud chaggad ngorad u nap’an ni gad be fanay boch e app ni yima non riy ngak yugu boch e girdi’ ko Internet.

Ri kub ga’ fan ni ngad kol ayuwgad u rogon ni ngad mel’eged e piin ngar manged fager rodad ni faanra boor e girdi’ u lan reb e group chat ni gad ma non riy ngak yugu boch e girdi’. Bay boch e Kristiano ni kar uned nga boch e pi group chat ney ma ke yib wenegan ngorad. Ere uw rogon ni nge kol ayuw reb e walag ni faanra boor ko raay ara bbiyu’ e girdi’ ni bay u reb e pi group chat ney ni bay riy? Rib mo’maw’ ni nge nang e bin riyul’ i rarogon e pi girdi’ ney miki nang rogon gelngin e michan’ rorad. Be gaar e Psalm 26:4 (BT): “Dagur ma chagil ko piin ndariy rogorad nga bang; dariy rogog ko piin yad ma dake modingniged yad.” Re thin ney e be tamilangnag ni kab fel’ ni yigoo piin gad manangrad e ngaud nonad ngorad u boch e app ni yima non riy ngak yugu boch e girdi’ ko Internet.

Yugu aram rogon ni kemus ni buchuuw e girdi’ ni bay u reb e group chat, mab t’uf ni nge fal’eg reb e Kristiano i lemnag urngin e tayim ni be fanay ni nga i non riy ko pi girdi’ ney, nge pi n’en yad be weliy murung’agen. Susun e dab da lemnaged ni gubin ban’en ni yibe weliy u lan e pi group chat ney ma ngad pied e fulweg riy ndemtrug ko mang e yibe weliy murung’agen, ara urngin e tayim ni yibe fanay ngay. I ginang Paul Timothy u murung’agen boch e girdi’ ni yad ma “dugdug thin ma yad be yan ra magawonniged e maruwel rok boch e girdi’.” (1 Tim. 5:13) Ngiyal’ ney e ku rayog ni ngan rin’ ban’en ni aray rogon ni yibe fanay e computer, ara tablet, ara cellphone.

Reb e Pi Mich ni ke ilal ko tirok Got ban’en e dabi gathibthibnag yugu boch e Pi Mich ara i motoyil ko tin yibe gathibthibnag u murung’agrad. Ku dabi yog ara motoyil nga boch ban’en u murung’agrad nsusun e nge par nib mith. (Ps. 15:3; Prov. 20:19) Ku dabi yog ara motoyil nga boch ban’en ni kan weliy ni yugu ba pag rogon, ara boch ban’en ndariy e mich riy. (Efe. 4:25) Boor ban’en nib manigil ma kub puluw ko thin nu Bible nrayog ni nge pagan’dad ngay ni bay ko fare website rodad ni jw.org, nge JW Broadcasting^® ni gad ma yaliy ni gubin e pul.

Ku bay boch e Pi Mich ni yad ma fanay boch e app ni yima non riy ngak yugu boch e girdi’ ko Internet ni ngar pied boch ban’en nchuway’, ara ngar chuw’iyed boch ban’en, ara ngar weliyed murung’agen boch ban’en ni nge chuw’iy e girdi’. Ku yad ma fanay e pi app ney ni ngar ognaged e maruwel ngak yugu boch e girdi’. Pi n’ey e bay rogon nga ngongolen e siyobay, ma dariy rogon ko liyor rodad ngak Jehovah. Ere pi Kristiano ndubrad ni nge “m’on e salpiy” u wan’rad e dab ra fanayed pi walagrad ni ngar guyed rogon ni nge yag e salpiy ngorad.​—Heb. 13:5.

Gur, susun e ngad fanayed e pi app ni yima non riy ngak yugu boch e girdi’ ko Internet ni ngad ninged e salpiy ngak boch e walag ni fan ngak yugu boch e walag ni ke t’uf e ayuw rorad, ara kar gafgowgad ni bochan e yoko’, ara durru’, ara boch ban’en ni ma yib ni yima gafgow riy, fa? Rib t’uf pi walagdad rodad ma gad baadag ni ngad ayuweged e piin ke t’uf e ayuw rorad ma gad pi’ e athamgil nga lanin’rad. (Jas. 2:15, 16) Machane faan gad ra guy rogon ni ngad ayuweged yad u daken e pi group chat ni boor e girdi’ ni bay riy, ma rayog ni nge magawonnag e yaram ni ke ngongliy e branch ofis, ara piin piilal u lan e ulung u rogon ni ngan ayuweg e pi walag. (1 Tim. 5:3, 4, 9, 10, 16) Ma dariy bagadad ni baadag ni nge lemnag yugu boch e girdi’ ni kan pi’ reb e maruwel ngak ni yugu ba thil u rogon ni ngan ayuweg e pi saf rok Got.

Gad baadag ni ngad rin’ed ban’en ni yira pining e sorok riy ngak Got. (1 Kor. 10:31) Ere nap’an ni gad be dugliy ko ngad fanayed e pi app ko computer, ara tablet, ara cellphone rodad ni yima non riy ngak yugu boch e girdi’ ko Internet, ma ngad fal’eged i lemnag riy’en ma gad kol ayuw u rogon ni gad be fanay e pi n’ey.