Mat’awun e Piin Piilal u Lan e Ulung

1. Mang reb i fan nib taareban’ e girdi’ rok Jehovah?

GAD ba felfelan’ ngay ni gadad boch e girdi’ rok Jehovah. Mang fan ni gad ba gapas mab taareban’dad? Reb i fan e bochan ni gad gubin ni gad ma athamgil u rogon nrayog rodad ni ngad ted fan e piin ke tayrad Jehovah ni nga u rogned e thin rodad. Bin riyul’ riy e, faanra yoor ban’en nda nanged u murung’agen e re yaram ney, ma aram e rra gel e taareban’ rodad.

2. Mang boch e deer ni gad ra weliy e fulweg riy ko re article ney?

² U lan e re article ney e gad ra weliy riy murung’agen e en bay mat’awun ni nge yog e thin u lan e ulung. Ku gad ra weliy e fulweg ko pi deer ni baaray ni be gaar: Mang e maruwel rok e pi walag nib pin? Rriyul’ ni urngin e walag ni pumoon ni yad lolugen urngin e walag nib pin, fa? Taareb rogon mat’awun e piin piilal ni kan pi’ u rogon ni nga u rogned e thin ko pi walag u lan e ulung nga rogon mat’awun e pi matam ni nga u rogned e thin rok pi leengirad nge pi fakrad u lan e tabinaw, fa? Som’on e ngad weliyed rogon ni ngaud lemnaged e pi walag nib pin.

SUSUN NGE UW ROGON U WAN’DAD E PI WALAG NIB PIN?

3. Uw rogon ni ngari ga’ fan u wan’dad e maruwel ni ma rin’ e pi walagdad nib pin?

³ Ba ga’ fan u wan’dad e pi walag nib pin ni yad ma maruwel nib gel ni ngar ayuweged e tabinaw rorad, mar machibnaged fare thin nib fel’, mar pied e ayuw u lan e ulung. Ku rayog ni nge gel feni ga’ fan e pi walag nib pin u wan’dad ni aram e ngad lemnaged rogon ni ma lemnagrad Jehovah nge Jesus. Ku rayog ni ngad nanged rogon ni ngaud ngongolgad ngorad ni aram e ngad lemnaged rogon e ngongol rok apostal Paul ngak e piin nib pin.

4. Uw rogon ni be tamilangnag e Bible nib ga’ fan e piin nib pin u wan’ Jehovah ni bod rogon e piin pumoon?

⁴ Be yog e Bible nib ga’ fan e piin nib pin u wan’ Jehovah ni bod rogon e piin pumoon. Bod ni be yog e Bible nnap’an e bin som’on e chibog, me pi’ Jehovah gelngin nib thothup ngak boch e ppin nge pumoon miki pi’ gelngirad ni ngar ngongliyed boch e maang’ang, ni bod ni ngar nonad ni lungun boch e nam. (Acts 2:1-4, 15-18) Kun dugliy boch e ppin nge pumoon nga gelngin Got nib thothup ni ngar uned ngak Kristus ko gagiyeg. (Gal. 3:26-29) Maku piin nra yag e yafos ni manemus ngorad u fayleng e ku yad boch e ppin nge pumoon. (Rev. 7:9, 10, 13-15) Ku arrogon ni piin nib pin nge piin pumoon e yad ma rin’ fare maruwel ni machib mar filed fare thin nib fel’ ko girdi’. (Matt. 28:19, 20) Bin riyul’ riy e, be weliy fare babyor ni Acts murung’agen reb e walag nib pin ni ka nog Priscilla ngak nra weliyew Aquila ni figirngin ngak Apollos ni be’ nib tolang e skul rok e tin riyul’ u rogon kanawoen nib puluw.​—Acts 18:24-26.

5. Uw rogon ni be dag e Luke 10:38, 39, 42 ni i tay Jesus fan e piin nib pin?

⁵ Jesus e i tayfan e piin nib pin. Da i fol ko n’en ma rin’ e pi Farise ni yad ma darifannag e piin nib pin, ni mus ni ngar nonad ngorad u fithik’ e girdi’ ma darur rin’ed, maku darur weliyed e piin nib pin e n’en bay u lan fare Babyor nib Thothup u taabang. Ya Jesus e nap’an ni yad ra weliy e pi pumoon ni gachalpen e tin riyul’ nib toar fan ma ma uneg e piin nib pin ngay.b (Mu beeg e Luke 10:38, 39, 42.) Ki pag e piin nib pin ni ngar uned ngak u nap’an ni be milekag i yan nga boch e binaw ni be machib. (Luke 8:1-3) Ki pag Jesus e piin nib pin ni nga rogned ngak e pi apostal rok ni kan faseg ko yam’.​—John 20:16-18.

6. Uw rogon ni dag apostal Paul ni be tayfan e piin nib pin?

⁶ I puguran apostal Paul ngak Timothy ni nga i tayfan e piin nib pin. I yog Paul ngak ni nga i tay e ‘piin ni puwelwol ni gowa yad pi chitiningin’ ma nga i tay e piin rugod ni ‘gowa yad pi walagen ni ppin.’ (1 Tim. 5:1, 2) Boor ban’en ni i rin’ Paul ni nge ayuweg Timothy ni nge mang reb e Kristiano ni ke ilal ko tirok Got ban’en. Machane ki yog ni chitiningin Timothy nge titaw rok e ra filew e “thin ni bay u lan fare babyor nib thothup” ngak Timothy ko som’on. (2 Tim. 1:5; 3:14, 15) Ki yog Paul fithingan boch e walag nib pin u lan e babyor rok ni yoloy ngak piyu Roma. Gathi kemus ni manang e n’en ni i rin’ e pi walag nib pin ney, ya ki pining e magar ngorad ko maruwel ni kar rin’ed.​—Rom. 16:1-4, 6, 12; Fil. 4:3.

7. Mang l’agruw e deer ni ngad weliyed e fulweg riy?

⁷ Ba tamilang ko fapi paragraph ni ke yan nder yog e Bible nib sobut’ e pi walag nib pin ko walag ni pumoon. Pi walag nib pin ni yad ma dag e t’ufeg ma yad ba gol e rib ga’ e ayuw ni yad ma pi’ ko ulung rodad, ma ma taga’ e piin piilal ngorad ni ngar mon’ognaged e gapas nge taareban’ u lan e ulung. Yugu aram rogon, ma kab t’uf ni ngan pi’ e fulweg ko gal deer ni baaray ni be gaar: Mang fan nib m’agan’ Jehovah ngay ni bay yu ngiyal’ ni nge upunguy e pi walag nib pin lolugrad? Bochan ni yigoo pi walag ni pumoon e yima dugliyrad ni ngar manged boch e piilal nge ministerial servant u lan e ulung, ma aram e be yip’ fan ni urngin e walag ni pumoon ni yad lolugen urngin e walag nib pin, fa?

URNGIN E WALAG NI PUMOON U LAN E ULUNG NI YAD LOLUGEN URNGIN E WALAG NIB PIN, FA?

8. Urngin e walag ni pumoon u lan e ulung ni yad lolugen urngin e walag nib pin nrogon ni bay ko Efesus 5:23, fa? Mu weliy rogon.

⁸ Urngin e walag ni pumoon u lan e ulung ni yad lolugen urngin e walag nib pin, fa? Fulweg riy e danga’! (Mu beeg e Efesus 5:23.) U lan e tabinaw e en figirngiy e ir lolugen leengin. Ma reb e pagel ni kan taufenag e gathi ir lolugen e chitiningin. (Efe. 6:1, 2) Ma nap’an nra yib nga lan e ulung, ma piin piilal e yad ma yog e thin ko pi walag ni ppin nge pumoon u lan e ulung, machane bay e gin nge mus riy. (1 Thess. 5:12; Heb. 13:17) Pi walag nib pin ni yad ba muchugbil ndakurur pared ko chitamangirad nge chitiningrad e ka yad ma ulul ni ngar ted fan e gallabthir rorad nge piin piilal. Machane ku taareb rogorad ngak e pi walag ni pumoon u lan e ulung ni taabe’ e ir lolugrad ni aram Jesus.

9. Mang fan ni bay yu ngiyal’ nib t’uf ni nge upunguy e pi walag nib pin lolugrad?

⁹ Machane, riyul’ ni ke dugliy Jehovah e piin pumoon ni yad e ngaur yarmiyed rogon ni yibe fil ban’en nge rogon e liyor ni yibe tay u lan e ulung, ma dawori pag fan e biney e maruwel ngak e piin nib pin. (1 Tim. 2:12) Mang fan? Ku taareb fan ko n’en ke rin’ ni aram e ke tay Jesus ni ir e nge mang lolugen urngin e pumoon. Fan ni ke rin’ e re n’ey e bochan e nge yag ni par e ulung nib yaram. Ere faanra thingari rin’ reb e walag nib pin reb e maruwel nib ga’ ni ma rin’ e pi walag ni pumoon, ma aram e ba m’agan’ Jehovah ngay ni nge upunguy lolugen.c (1 Kor. 11:4-7) Baadag Jehovah ni nge rin’ e pi walag nib pin e re n’ey ni bochan e ngar daged ni yad be tayfan e pi motochiyel rok ma gathi bochan e nge m’ug ni yad ba sobut’. Ere chiney e ngad weliyed e fulweg ko re deer ni baaray ni be gaar: Mang e kan pi’ mat’awun e piin lolugen e tabinaw nge piin piilal ni ngar rin’ed?

MARUWEL NI KAN PAG FAN NGAK E PIIN LOLUGEN E TABINAW NGE PIIN PIILAL

10. Mang fan ni bay yu ngiyal’ nrayog ni nge adag reb e piilal ni nge ngongliy boch e motochiyel ni nge fol girdien e ulung riy?

¹⁰ Piin piilal e ba t’uf Kristus rorad, ma kub t’uf rorad e pi “saf” rok Jehovah nge Jesus ni kar pagew fan ngorad ni ngar ayuweged. (John 21:15-17) Ere bochan nib t’uf girdien e ulung rok reb e piilal, ma rayog ni nge lemnag ni ir reb e matam u puluwrad. Rayog ni nge lemnag ni faanra bay mat’awun e en lolugen e tabinaw ni nge ngongliy boch e motochiyel ni nge ayuweg girdien e tabinaw rok, me ere ku arrogon reb e piilal u lan e ulung nrayog ni nge ngongliy boch e motochiyel ni be lemnag nra ayuweg e pi saf rok Got. Ku rayog ni nge tay boch e walag yad ngak e piin piilal ni ngar rin’ed e re n’ey ni aram e nga rogned ngorad ni nge mang e piin piilal e ngar dugliyed e n’en ni ngar rin’ed. Machane gur, taareb rogon e n’en ni kan pi’ mat’awun e piin piilal u lan e ulung nge piin lolugen e tabinaw ni ngar rin’ed, fa?

11. Uw rogon nib taareb rogon e maruwel ni kan pag fan ko piin lolugen e tabinaw nge piin piilal?

¹¹ I yog apostal Paul ni bay boch ban’en ni taareb rogon ko maruwel ni kan pag fan ko en lolugen e tabinaw nge reb e piilal u lan e ulung. (1 Tim. 3:4, 5) Bod ni, baadag Jehovah ni nge fol chon e tabinaw rok e en lolugen e tabinaw. (Kol. 3:20) Ku baadag ni nge fol e girdi’ u lan e ulung rok e piin piilal. Baadag Jehovah ni piin lolugen e tabinaw nge piin piilal e ngar filed ngak e piin bay u tan pa’rad rogon ni nge t’uf Jehovah rorad. Piin lolugen e tabinaw nge piin piilal e yad ma guy rogon ni nge nang e piin bay u tan pa’rad ni yibe t’ufegrad. Piin piilal e ku yad bod e piin lolugen e tabinaw nib manigil, ya yad ma ayuweg girdien e ulung ni ke t’uf e ayuw rorad. (Jas. 2:15-17) Maku reb e, kub m’agan’ Jehovah ngay ni nge ayuweg e piin piilal nge piin lolugen e tabinaw e piin bay u tan pa’rad ni ngar folgad ko pi motochiyel rok, ma dab ra ‘thum’gad nga wuru’’ e n’en bay u Bible.​—2 John 9. 

12-13. Uw rogon nib thil e maruwel ni kan pag fan ngak e piin lolugen e tabinaw ko maruwel ni kan pag fan ngak e piin piilal nrogon ni bay ko Roma 7:2?

¹² Machane, ku bay boch ban’en nrib thil u rogon e maruwel ni kan pag fan ngak reb e piilal nge maruwel ni kan pag fan ngak reb i lolugen e tabinaw. Bod ni, ke tay Jehovah e piin piilal ni ngar manged boch e tapuf oloboch, ma kki pi’ mat’awrad ni ngar chuweged u lan e ulung e piin yad be rin’ boch e denen ndarur kalgadngan’rad.​—1 Kor. 5:11-13.

¹³ Machane, bay boch ban’en ni ke pi’ Jehovah mat’awun e piin lolugen e tabinaw ni ngar rin’ed ndawori pi’ ngak e piin piilal. Bod ni ke pi’ mat’awun e piin lolugen e tabinaw ni ngar ngongliyed boch e motochiyel ni fan ko tabinaw rorad, ma ngkur guyed rogon ni nge fol chon e tabinaw rorad ko pi motochiyel nem. (Mu beeg e Roma 7:2.) Bod ni, bay mat’awun reb i lolugen e tabinaw ni nge dugliy e ngiyal’ ni nge sul pi fak nga tabinaw nnep’. Ku bay mat’awun ni nge gechignag pi fak ni faanra dar folgad ko re motochiyel ney. (Efe. 6:1) Riyul’ nthingari puruy’nag e en lolugen e tabinaw nge leengin e pi n’ey u taabang u m’on ni nga fini ngongliy e motochiyel ni nge fol chon e tabinaw rok riy ni bochan e kar “taab girdi’gow.”d​—Matt. 19:6.

MU TAYFAN KRISTUS NI IR LOLUGEN E ULUNG

14. (a) Mang fan nib puluw ni ke dugliy Jehovah Jesus ni ir e nge mang lolugen e ulung nrogon ni bay ko Mark 10:45? (b) Mang e maruwel ko fare Ulung ni Ma Pow’iyey? (Mu guy fare kahol ni kenggin e “Maruwel ko Fare Ulung ni Ma Pow’iyey.”)

¹⁴ Ke chuw’iy Jehovah e pogofan rok urngin e girdi’ u lan e ulung u daken fare biyul ni kub muun ngay urngin e piin nra mich Jesus u wan’rad. (Mu beeg e Mark 10:45; Acts 20:28; 1 Kor. 15:21, 22) Ere ba puluw ni ke dugliy Jesus ni ir e en ke pi’ e yafos rok ni nge biyuliy urngin e girdi’ ngay ni nge mang lolugen e ulung. Bochan ni Jesus e ir lolugdad, ma bay mat’awun ni nge ngongliy e motochiyel ni be gagiyegnag rogon e ngongol rok urngin e girdi’, nge tabinaw, nge ulung ni ga’ngin, ma ngki guy rogon ni ngan fol ko pi motochiyel nem. (Gal. 6:2) Machane gathi kemus ni ke ngongliy Jesus e motochiyel ni ngan fol riy, ya ku ma ayuwegdad ko tin nib t’uf rodad maku ma t’ufegdad ni gad gubin.​—Efe. 5:29.

15-16. Mang e kam fil ko n’en ke yog reb e walag nib pin ni ka nog Marley ngak nge n’en ke yog reb e walag ni pumoon ni ka nog Benjamin ngak?

¹⁵ Pi walag nib pin e yad ma dag ni yad be tayfan Kristus ni aram e yad ma fol u rogon e yaram ni be ngongliy e pi pumoon ni ke dugliyrad ni ngaur ayuweged e pi walag ney. Reb e walag nib pin ni ma par u Meriken ni ka nog Marley ngak e ke weliy rogon e tafinay rok boor e walag nib pin ni gaar: “Rib ga’ fan u wan’ug e maruwel nib milfan ngog ni gag reb i leengiy nge reb e walag nib pin u lan e ulung. Gubin ngiyal’ nthingar gu maruwel nib gel ni nggu tayfan mat’awun figirngig ni ke pi’ Jehovah nge mat’awun e piin piilal u lan e ulung. Machane ke momnag figirngig nge pi walag ni pumoon u lan e ulung e re n’ey ngog ni bochan e yad ma tay fag, maku yad ma pining e magar ngog ko pi maruwel ni gu ma rin’.”

¹⁶ Pi walag ni pumoon e yad ma dag ni ke tamilang u wan’rad fare yaram ni bay rogon ngak e piin kan pi’ mat’awrad ni nga u rogned e thin ni aram e yad ma tayfan e pi walag nib pin. Benjamin nreb e walag ni pumoon ni ma par u England e yog ni gaar: “Boor ban’en ni kug fil ko fulweg ni ma pi’ e pi walag nib pin u nap’an e muulung, nge rogon boch e fonow ni yad ma pi’ nrayog ni nge ayuwegey u rogon e fol Bible ni yima tay, nge rogon ni ngan machib nib fel’ rogon. Gu be lemnag nrib ga’ fan e maruwel ni yad ma rin’.”

17. Mang fan ni ngad ted fan e n’en ke yarmiy Jehovah ni aram e bay boch e girdi’ ni ke pi’ mat’awrad ni nga rogned e n’en ni ngan rin’?

¹⁷ Faanra urngin e pumoon, nge ppin, nge piin lolugen e tabinaw, nge piin piilal u lan e ulung mar ted fan e n’en ke yarmiy Jehovah ni aram e bay mat’awun boch e girdi’ ni nga rogned e n’en ni ngan rin’, ma aram e rayog ni nge par e ulung ni bay e gapas riy. Ma bin th’abi ga’ fan riy e, gad ra pining e sorok ngak Jehovah ni Chitamangidad ni bay u tharmiy ni gad ba t’uf rok.​—Ps. 150:6.