GURUY NI 46
Mang Fan ni Ngam Ognagem Ngak Got Ngam Un ko Taufe?
Ga ra ognagem ngak Jehovah, ma aram e kam micheg ngak u daken e meybil ni yigoo ir e ngam liyor ngak mag m’oneg e n’en nib m’agan’ ngay u lan e yafos rom. (Psalm 40:8) Tomuren ma aram mag un ko taufe. Nap’an ni ga ra rin’ e re n’ey, ma aram e ga be dag ko girdi’ ni kam ognagem ngak Got. Ireray e n’en th’abi ga’ fan ni gad ra dugliy ni ngad rin’ed u lan e yafos rodad. Ere mang e rayog ni nge k’aringem ni ngam dugliy ni ngam rin’ e re n’ey?
1. Mang e ra k’aring be’ ni nge ognag ir ngak Got?
T’ufeg e ra k’aringdad ni ngad ognaged gadad ngak Jehovah. (1 John 4:10, 19) Be gaar e Bible: “Thingari t’uf rom Somol, ni ir e Got rom, u polo’ i gum’irchaem, ngu polo’ i lanin’um, ngu polo’ i lem rom, ngu polo’ i gelngim.” (Mark 12:30) Gathi kemus ni gad ma dag nib t’uf Got rodad u daken e thin rodad, ya ku ma m’ug ko ngongol rodad. Ere t’ufeg rodad ngak Jehovah e aram e n’en nra k’aringdad ni ngad ognaged gadad ngak ngad uned ko taufe, ni bod rogon l’agruw ni’ ni kar mabgolgow ni bochan e rib t’uf bagayow rok bagayow.
2. Mang boch e tow’ath ni ma pi’ Jehovah ko Pi Mich rok ni kan taufenagrad?
Ga ra un ko taufe, ma aram e kam mang bang ko tabinaw rok Jehovah nib felfelan’ e girdi’ riy. Aram rogon ni ga ra guy rogon ni be t’ufegem u boor e kanawo’ miki gel boch e chugur ko tha’ u thilmew. (Mu beeg e Malaki 3:16-18.) Gathi kemus nra mang Jehovah ba Matam ngom, ya ku ra yag boch e walag ngom u ga’ngin yang e fayleng ni yad ma t’ufeg Jehovah ma ka gab t’uf rorad. (Mu beeg e Mark 10:29, 30.) Machane bay boch ban’en nthingar mu rin’ u m’on ni ngam un ko taufe. Ba t’uf ni ngam fil murung’agen Jehovah, me t’uf rom, miki mich Fak u wan’um. Ma bin tomur e, thingar mu ognag e yafos rom ngak Jehovah. Faan ga ra rin’ e pi n’ey mag un ko taufe, ma aram e rayog ni nge yag e yafos ni manemus ngom. Be gaar e Thin rok Got: “Taufe . . . e ku aram e n’en ni be thapegmed e chiney.”—1 Peter 3:21, NW.
KUM FIL BOCH BAN’EN U MURUNG’AGEN
Mu fil fan nib t’uf ni ngam ognagem ngak Jehovah ngam un ko taufe.
3. Thingar da mel’eged e en ngad pigpiggad ngak
Immoy boch e girdi’ u Israel kakrom ni ur lemnaged nrayog ni ngar liyorgad ngak Jehovah maku yad be liyor ngak Baal. Machane i l’og Jehovah Elijah ni profet rok ni nge yal’uweg e lem rorad. Mu beegew e 1 Kings 18:21, mi gimew weliy e fulweg ko re deer ni baaray:
Mang e thingari dugliy piyu Israel?
Ku arrogodad nthingar da mel’eged e en ngad pigpiggad ngak ni bod piyu Israel. Mu beegew e Luke 16:13, mi gimew weliy e fulweg ko gal deer ni baaray:
Mang fan ndabiyog ni ngad liyorgad ngak Jehovah ma ka gad be liyor ngak be’ ara yugu ban’en?
Uw rogon ni ngad daged ngak Jehovah ni kad dugliyed ni ngad liyorgad ngak?
4. Mu fal’eg i lemnag rogon e t’ufeg rok Jehovah ngom
Boor e tow’ath nrib manigil ni ke pi’ Jehovah ngodad. Ere mang e rayog ni ngad pied ngak? Mu yaliyew e re VIDEO ney.
Mang boch e kanawo’ ni ke dag Jehovah riy ni gab t’uf rok? Mu beegew e Psalm 104:14, 15 nge 1 John 4:9, 10, mi gimew weliy e fulweg ko gal deer ni baaray:
Mang boch e tow’ath ni ke pi’ Jehovah nri ga be pining e magar riy ngak?
Uw rogon Jehovah u wan’um ni bochan e pi tow’ath nem ni ke pi’?
Nap’an nra pi’ be’ ba tow’ath ngodad nri gad baadag, ma aram e ri gad baadag ni ngad pininged e magar ngak facha’. Mu beegew e Deuteronomy 16:16b, 17, mi gimew weliy e fulweg ko re deer ni baaray:
Nap’an ni ga ra lemnag urngin ban’en ni ke rin’ Jehovah ni fan ngom, ma mang e ga baadag ni ngam rin’ ni fan ngak?
5. Ga ra ognagem ngak Jehovah ma boor e tow’ath nra yag ngom
Boor e girdi’ nib mich u wan’rad ni faanra ba gilbuguwrad, ara ba fel’ e maruwel rorad, ara boor e salpiy rorad, ma aram e yad ra felfelan’. Riyul’ e re n’ey, fa? Mu yaliyew e re VIDEO ney, mi gimew weliy e fulweg ko pi deer ni baaray.
Yugu aram rogon ni baadag e re pumoon ney e re miti gosgos ney, machane mang fan ni digey?
I dugliy ni nge pi’ e tin th’abi fel’ rok ngak Jehovah ma gathi nge pi’ ni fan ko re miti gosgos ney. Ga be lemnag nib fel’ e n’en ni dugliy, fa? Mang fan?
U m’on ni nge mang apostal Paul reb e Kristiano, ma i nameg reb e maruwel nib tolang. I fil reb e sensey nib gilbuguwan e motochiyel rok e pi Jew ngak. Yugu aram rogon, me digey e pi n’ey ni fan e nge mang reb e Kristiano. Ere gur, i kalngan’ ko re n’ey? Mu beegew e Filippi 3:8, mi gimew weliy e fulweg ko pi deer ni baaray:
Mang fan ni yog Paul ni pi n’en ni i rin’ u m’on ni nge mang reb e Kristiano e gowa bod e “chubung”?
Mang e yag ngak?
Bin ngan e ga be lemnag nra fal’eg e par rom, ngam pigpig ngak Jehovah ara ngam rin’ yugu boch ban’en?
Ka boor ban’en ni yag ngak Paul u nap’an ni mang reb e Kristiano ko tin ni pag fan
MA GAAR BOCH E GIRDI’: “Gu manang ni ireray e tin riyul’, machane dawori bung rogog ni nggu un ko taufe.”
Mang fan ni ga be lemnag nib fel’ ni ngam ognagem ngak Jehovah?
N’EN KAN FIL
T’ufeg e ra k’aringdad ni ngad ognaged gadad ngak Jehovah ngad uned ko taufe.
Ngan Sul u Daken
Mang fan ni bay rogon ni ngad t’ufeged Jehovah ma gad liyor ngak u polo’ i gum’ircha’dad?
Uw rogon ni ma tow’athnag Jehovah e Pi Mich rok ni kan taufenagrad?
Ga baadag ni ngam ognagem ngak Jehovah, fa?
MU GAY MURUNG’AGEN
Mu guy fan ni dugliy be’ ni ma tang nge be’ ni ma un nga ba mit e gosgos ni ngar ognagew e yafos rorow ngak Jehovah.
Young People Ask—What Will I Do With My Life?—Looking Back (6:54)
Kum beeg boch i fan ni ngam ognagem ngak Got.
“Mang Fan ni Ngam Ognagem Ngak Jehovah?” (Fare Wulyang Ntagil’ E Damit, January 1, 2010)
Mmotoyil ko re music video ney ni ngam nang rogon e felfelan’ nra tay e piin yad ra ognaged yad ngak Jehovah.
Mu guy e n’en ni k’aring be’ nib pin ni nge lemnag e n’en th’abi ga’ fan u wan’.
“The Bible Changes Lives” (The Watchtower, November 1, 2012)