“Gur e Mu Turguy ni Nge Yodoro’ Nrogon nib M’agan’um Ngay”

1. Mang fan ni “suguy” gelngin Got nib thothup Jesus ko felfelan’? (Mu guy e sasing ni bay u tabolngin e re article ney.)

AM LEMNAG rarogon Jesus Kristus ko ngiyal’ ni baaram ni “suguy” gelngin Got nib thothup ko felfelan’! Dabisiy ni be siminmin ni kari felfelan’. Mang fan ni kari felfelan’? Ya ka fini l’og 70 i gachalpen ni nga ranod ra machibnaged fare thin nib fel’ ni murung’agen Gil’ilungun Got. Ma baadag ni nge nang rogon ni yad ra rin’ e re maruwel nem ni ke pi’ ngorad. Boor e girdi’ ni ur togopuluwgad ko fare thin nib fel’ ni un machibnag e ngiyal’ nem, ni bod rogon e pi tamachib ko motochiyel nge pi Farise ni yad ba llowan’ mab tolang e skul rorad. Yad baadag ni nga i lemnag e girdi’ ni Jesus e kemus ni ir reb e daiksang, ma pi gachalpen e ‘dariy e skul rorad.’ (Acts 4:13; Mark 6:3) Yugu aram rogon, ma nap’an ni sul pi gachalpen Jesus ko machib, ma kar ra felfelan’gad. Ya kar machibgad ni yugu aram rogon ni i togopuluw e girdi’ ngorad ni kub muun e pi moonyan’ ngay! Mang fan ni yag rorad ni ngar pared ni yad ba felfelan’ ma dar rusgad?​—Mu beeg e Luke 10:1, 17-21.

2. (a) Mang e manang Jesus u rarogon pi gachalpen? (b) Mang e ayuweg pi gachalpen Kristus ni ngar nanged fan e tin nib toar e machib ni bay ko thin rok Got?

² Mu tay fanam i yan ko n’en ni yog Jesus ngak Jehovah ni gaar: “Chitamag, ni gur e Somol nu tharmiy ngu fayleng! Kari mmagar ya kam dag ngak e piin ndar skulgad e n’en ni kam mithag rok e piin ni yad ba llowan’ nge piin ni yad ba skul. Chitamag, i gur e mu turguy ni nge yodoroy nrogon nib m’agan’um ngay.” (Matt. 11:25, 26) Manang Jesus nib mom ni ngan fil ban’en ngak pi gachalpen ni bochan e yad bod e bitir ni yad ba thil ngak e piin ni yad ba llowan’ nge piin ni yad ba skul ni ur moyed e ngiyal’ nem ni yad ma lemnag ni yad ba gonop. Maku reb e, ki fil Jesus ngak pi gachalpen ni ngar boded e bitir nib sobut’an’rad mab mom ni ngan fil ban’en ngorad. (Matt. 18:1-4) Ere, bochan nib sobut’an’rad, ma uw rogon ni ke yib angin ngorad? I fanay Jehovah gelngin nib thothup ni nge ayuwegrad ni ngar nanged fan e tin nib toar e machib ni bay ko thin rok. Ma pi machib nem e da i yag ni nge tamilang u wan’ e piin ni yima yog ni yad ba gonop ma yad ba skul ni bochan e ba tolangan’rad ma ki tay Satan lanin’rad u fithik’ e lumor.

3. Mang e gad ra fil ko re article ney?

³ Dariy e maruwar riy ni aram fan ni kari felfelan’ Jesus! Kari felfelan’ ni bochan e ke guy rogon ni ke tamilangnag Jehovah e tin nib toar fan e machib ngak e piin nib sobut’an’rad, ndemtrug tolngin e skul rorad. Ki felfelan’ ni bochan e ba fel’ u wan’ e Chitamangin rogon e machib ni i tay. Ere gur, ke thil rogon e lem rok Jehovah? Ma uw rogon ni be dag ni kab fel’ u wan’ rogon ni gad be fil ban’en ko girdi’ e ngiyal’ ney? Nap’an ni gad be fal’eg i yaliy e fulweg ko gal deer ney, ma dariy e maruwar riy nri ku gad ra felfelan’ ni bod rogon Jesus.

KE WELIY FAN E TIN NIB TOAR E MACHIB KO GIRDI’

4. Mang fan nrayog ni nga nog ni Fare Wulyang ko Damit ni kan momnag e thin riy e aram reb e tow’ath nrib fel’?

⁴ Nap’an fapi duw ni ka fini yan, ma boor ban’en ni ke mon’ognag e ulung rok Jehovah u rogon ni yad ma fil ban’en ko girdi’ ni bochan e nge tamilang me mom ni ngan nang fan. Baaray dalip ko pi n’ey. Som’on e, Fare Wulyang ko Damit ni kan momnag e thin riy.a Ireray reb e tow’ath ni ke ayuweg boor e girdi’ ni gathi ri yad ba salap ko beeg babyor ara boor e thin ni gathi ri yad manang fan. Boor e pi matam ni kar pirieged ni ke yoor ban’en ni ke tamilang u wan’ e bitir rorad ni bochan e re ke babyor ney ni yibe ngongliy. Ma boor i yad e kar yoloyed boch e babyor kar pied ko tochuch rodad ni yad be pining e magar ni bochan e re n’ey. Bay reb e walag nib pin ni ke yog ni kafram e der ma pi’ e fulweg u nap’an e Fol Wulyang ko Damit. I yog ni gaar: “Gu ma tatamra’. Machane, chiney e da ku gur tamra’!” Nap’an ni tabab i fanay e yu ke Wulyang ko Damit nem ni kan momnag e thin riy, me yoloy ni gaar: “Chiney e boor e fulweg ni gu ma pi’, ma da ku gur ma rus! Ke magar Jehovah, maku er rogomed ni kum magargad.”

5. Mang boch i fel’ngin e ken ni kab beech e Bible ni New World Translation of the Holy Scriptures?

⁵ Bin migid e, fare Bible ni New World Translation of the Holy Scriptures ni kan thilyeg boch ban’en riy. Nni pi’ e re ke babyor ney ko thin ni Meriken u nap’an fare annual meeting nni tay ko October 5, 2013.b Boor e verse ko re ke Bible ney ni kan buchuuwnag e thin riy, machane ka dawori thil fan ma reb e ke tamilang boch. Bod ni, fare thin ni bay ko Job 10:1 e 27 bug e thin riy ko ken ni kafram e Bible, machane chiney e kemus ni 19; ma fare thin ko Proverbs 8:6 e immoy ko 20 ma chiney e kemus ni 13. Gal thin nu Bible ney e ke tamilang boch fan ko ken ni kab beech e Bible ni ka fin nni ngongliy. Bin riyul’ riy, e bay reb e walag nib yul’yul’ ni ir bagayad e piin ni kan dugliyrad ni ke yoor e duw ni ke pigpig ngak Jehovah ni yog ni gaar: “Ka fin gu mu’ i beeg fare babyor rok Job ko ken ni kab beech e Bible, ma gowa ka fini tamilang u wan’ug e thin riy!” Boor e walag ni ku aray e n’en ni ka rogned.

6. Uw rogon u wan’um e pi n’en ni kan tamilangnag ko fare thin ni bay ko Matthew 24:45-47?

⁶ Bin dalip e, boch ban’en ni yibe thilyeg u rogon ni yibe tamilangnag fan boch ban’en ko machib rodad. Bod rogon ni kan tamilangnag murung’agen “fare tapigpig nib yul’yul’ ma ba gonop,” ko fare Wulyang ko Damit ko July 1, 2013. (Matt. 24:45-47) Kan tamilangnag ni fare Ulung ni Ma Pow’iyey e yad fare tapigpig nib yul’yul’ ma ba gonop, ma “tin ni ka bay e tapigpig” e aram urngin e piin ni yibe pi’ e tin nib t’uf rorad ni fan ko tirok Got ban’en, ndemtrug ko yad girdien fachi ulung ara yad ba muun nga “yugu boch e saf.” (John 10:16) Ri gad ba felfelan’ ni ke tamilang e pi machib ney u wan’dad ma ka gad be fil ngak boch e girdi’! Ku mang boch e kanawo’ ni ke dag Jehovah riy ngodad ni baadag ni ngaun fil ban’en u rogon nib tamilang mab mom ni ngan nang fan?

BOCH E THIN NU BIBLE NI KAN MOMNAG ROGON NI YIBE WELIY

7, 8. Mang boch e thin nu Bible ni be weliy murung’agen be’ ara ban’en ni be dag yaan boch ban’en ni ka bay nga m’on?

⁷ Faanra ke yoor e duw ni kam pigpig ngak Jehovah, ma dabisiy ni kam guy rogon ni ke thil rogon ni yima weliy fan boch e thin nu Bible ni murung’agen boch e girdi’ kakrom. Ni uw rogon? Kafram e ba ga’ ni gad ma yog ni bay boch e thin nu Bible ni murung’agen boch e girdi’ ara boch ban’en kakrom ni be dag yaan boch ban’en ni ka bay nga m’on. Gur, ba puluw ni ngan weliy fan e pi thin nu Bible ney ni aray rogon? Arrogon. Bod ni, i weliy Jesus murung’agen “fare maang’ang ni rin’ Got ngak Jonah ni profet.” (Mu beeg e Matthew 12:39, 40.) Me tamilangnag Jesus ni fa ngiyal’ i n’em ni par Jonah u lan yin fare nig nib ga’ e be yip’ fan e ngiyal’ nra par u lan e low ko yam’.

⁸ Ku bay boch e thin nu Bible ni be dag yaan boch ban’en nra buch boch nga m’on. Boor e pi n’ey ni weliy apostal Paul murung’agen. Bod ni, tha’ ni immoy u thilin Abraham nge Hagar nge Sarah e be dag rogon e tha’ u thilin Jehovah nge fare nam nu Israel nge ulung rok u tharmiy. (Gal. 4:22-26) Ku arrogon fare tabernacle nge fare tempel, nge fare Rran ko Biyul, nge fare prist nib tolang, nge boch ban’en ko fare Motochiyel rok Moses ni be dag “yaan e pi n’en nib fel’ ni bay fini yib ni kab samathmath.” (Heb. 9:23-25; 10:1) Rib manigil ni ngad filed murung’agen e pi n’ey, maku ra gelnag e michan’ rodad. Machane, gur, be yip’ fan ni gubin e girdi’, nge pi n’en ni i buch, nge boch ban’en ni bay murung’agen u lan e Bible e be dag yaan be’ ara ban’en ni ka bay nga m’on?

9. Uw rogon ni un weliy fare thin nu Bible ni murung’agen Naboth kafram?

⁹ Kafram e ba ga’ ni aray rogon ni yima tamilangnag fan boch ban’en u Bible. Am lemnag fare thin nu Bible ni be weliy murung’agen Naboth. Cha’ney i Naboth e n’igin Jezebel ni leengin Ahab ni ngan li’ nge yim’, ya nge yag ni lag Ahab fagi milay’ ko grapes ni fiin. (1 Ki. 21:1-16) Nap’an e duw ni 1932, mu unog ko pi babyor rodad nre thin nu Bible ney e be yip’ fan ban’en. Unog ni Ahab nge Jezebel e be yip’ fan Satan nge ulung rok; ma Naboth e be yip’ fan Jesus, ma yam’ ni tay Naboth e be yip’ fan e yam’ ni tay Jesus. Boch e duw nga tomuren, min weliy ko fare ke babyor ni kenggin e “Let Your Name Be Sanctified (Ngan Tayfan Fithingam nib Thothup),” nni ngongliy ko duw ni 1961 ni Naboth e be yip’ fan e piin ni kan dugliyrad, me Jezebel e be yip’ fan e pi yurba’ i teliw ko Kristiano ni googsur. Ku nog ni yam’ ni tay Naboth u pa’ Jezebel e be yip’ fan e gafgow ni yira tay ko piin ni kan dugliyrad u nap’an e tin tomuren e rran. Pi thin nu Bible ney ni un weliy fan ni aray rogon e i gelnag e michan’ ko pi tapigpig rok Got. Machane, mang fan ni ke thil rogon ni yibe tamilangnag boch ban’en e chiney?

10. (a) Uw rogon ni be kol ayuw fare tapigpig nib yul’yul’ u rogon ni yad ma weliy boch e thin nu Bible ni murung’agen boch e girdi’ ara boch ban’en? (b) Mang e ba ga’ ni yima tamilangnag ko pi babyor rodad e ngiyal’ ney?

¹⁰ Kab kafram i yib ni be ayuweg Jehovah fare “tapigpig nib yul’yul’ ma ba gonop” ni nge ga’ e gonop rorad. Chiney e ma kol ayuw fare tapigpig nib yul’yul’ u rogon ni yad ma weliy murung’agen boch e thin nu Bible ni be weliy murung’agen boch e girdi’ ara boch ban’en nge n’en ni be yip’ fan. Fin ngiyal’ ni yad ma yog ni bay reb e pi thin ney ni be weliy murung’agen ban’en nra buch boch nga m’on e faanra bay e mich riy u Bible. Maku reb e, kun pirieg ni boor e pi thin nu Bible ney ni un weliy murung’agen kafram ni unog ni be yip’ fan ban’en nib mo’maw’ ni ngan nang fan, ma kub mo’maw’ ni nge mit, min fol riy. Ya bin riyul’ riy e, faanra un weliy murung’agen e pi thin nu Bible ney ni aray rogon, ma aram e dab ku un lemnag murung’agen e pi n’en ni yira fil riy. Ere, aram fan ni ngiyal’ ney e ba ga’ nnap’an ni yira weliy murung’agen boch e girdi’ ara boch ban’en u Bible, ma yima guy rogon ni ngan tamilangnag boch ban’en riy nib mom ni ngan nang fan, nge boch ban’en riy nrayog ni nge ayuweg e michan’ rodad, me ayuwegdad ni ngad athamgilgad, ma gad par ni gad ba yul’yul’ ngak Got, nge ku boch e fel’ngin ni bay ko pi girdi’ ney nrayog ni ngad filed ban’en riy.c

11. (a) Uw rogon ni kad nanged fan fare thin nu Bible ni murung’agen Naboth e chiney, ma mang fan nrayog ni nge ayuwegdad e n’en ni buch rok? (b) Mang fan ni gathi ri ku yima weliy murung’agen boch e thin nu Bible nge rogon nra lebug u lan fapi duw ni ka fini yan?

¹¹ Ere, uw rogon ni kad nanged fan fare thin nu Bible ni be weliy murung’agen Naboth? Chiney e ke tamilang rogon ni gad ma weliy e re thin ney ma kki mom ni ngan nang fan. Ke tamilang u wan’dad ni yam’ ni tay Naboth e der dag yaan e n’en ni buch rok Jesus ara piin ni kan dugliyrad. I yim’ Naboth ni bochan e dugliy u wan’ ni nge par nib yul’yul’ ngak Got. I fol ko Motochiyel rok Jehovah ni yugu aram rogon ni chel e en ni be gagiyeg e ngiyal’ nem nge gafgownag. (Num. 36:7; 1 Ki. 21:3) Boor ban’en nrayog ni ngad filed rok Naboth ni bochan e gad manang ndemtrug bagadad nrayog ni nge mada’nag e togopuluw ni aray rogon. (Mu beeg e 2 Timothy 3:12.) Re thin ney ni kan tamilangnag ni aray rogon e gad gubin nrayog ni ngad nanged fan, me mit ngodad, ma gad fol riy, me gelnag e michan’ rodad.

12. (a) Mang e susun ndab da lemnaged u murung’agen e pi thin nu Bible ni be weliy murung’agen boch e girdi’ ara boch ban’en? (b) Mang fan ni ke yag ni nge tamilang rogon ni gad be weliy boch e machib nib toar fan? (Mu guy e footnote.)

¹² Ere gur, re n’ey e be yip’ fan ni pi thin nu Bible ney ni be weliy murung’agen boch e girdi’ ara boch ban’en e dakuriy fan nga bayang? Danga’. Riyul’ ni gathi ri ku yima weliy murung’agen e pi thin nu Bible ni be weliy murung’agen be’ ara ban’en, min lemnag ko mang e be dag yaan boch nga m’on. Machane, kab ga’ ni gad ma yog u lan e pi babyor rodad ni bay boch e thin nu Bible ni be puguran boch ban’en ngan’dad, ara be fanathinnag ban’en. Bod ni, faan gad ra beeg murung’agen e yul’yul’ ni tay Naboth ni yugu aram rogon nni gafgownag min li’ nge yim’, ma ra yib ngan’dad rogon ni par Kristus nib yul’yul’ nge rogon ni be par e piin ni kan dugliyrad ni yad ba yul’yul’. Machane, ku rayog ni nge puguran e re n’ey ngodad rogon e yul’yul’ ni be tay “yugu boch e saf.” Ere, re n’ey e be tamilangnag ngodad rogon ni be fil Jehovah boch ban’en ngodad u reb e kanawo’ nib mom ni ngad nanged fan.d

KAN WELIY E PI FANATHIN ROK JESUS U ROGON NIB MOM NI NGAN NANG FAN

13. Mang boch ban’en ni be dag ni chiney e gad ma weliy boch e fanathin rok Jesus u rogon nib mom ni ngan nang fan?

¹³ Jesus Kristus e ir e bin th’abi fel’ e Sensey ni immoy u fayleng. Ri baadag ni ma fanay e fanathin u nap’an ni be fil ban’en ko girdi’. (Matt. 13:34) Rib ga’ angin e fanathin ni yima fanay ni bochan e ma momnag ni ngan nang fan boch ban’en nib mo’maw’ ni ngan nang fan, maku ma k’aringdad ni ngad fal’eged i lemnag boch ban’en me taw nga gum’ircha’dad. Ere gur, ke thil rogon ni yima weliy murung’agen e pi fanathin rok Jesus u lan e pi babyor rodad, fa? Arrogon! Rib gel e felfelan’ ni kad ted u nap’an ni kan tamilangnag boch ban’en ko fapi fanathin rok Jesus ni murung’agen fare n’em ni ma thownag e flowa, nge fare awochngin e mustard, nge fagi nug u lan Fare Wulyang ko Damit ko July 1, 2008. Chiney e ke tamilang u wan’dad ni pi fanathin ney e be weliy murung’agen Gil’ilungun Got, nge rogon ni yibe ayuweg boor e girdi’ ko re fayleng nib kireb ney ni ngar manged e tin riyul’ i gachalpen Kristus.

14. (a) Uw rogon ni ud weliyed fare fanathin ni murung’agen facha’ nu Samaria kafram? (b) Uw rogon ni ke tamilang e re fanathin rok Jesus nem e chiney?

¹⁴ Ere, uw rogon e tin baaray e chep nge fanathin ni i weliy Jesus nrib tamilang ma de math’math’? Bay boch e pi chep nem ni be yip’ fan ban’en ara be yiiynag murung’agen ban’en; ma boch e i weliy ni bochan e nge fil e girdi’ ban’en riy. Ere, uw rogon ma gad nang ko bin ngan e pi chep ney e be yip’ fan ban’en ma bin ngan e danga’? Gubin e duw ni be tamilang e fulweg riy i yan. Am lemnag rogon ni ud weliyed fare fanathin rok Jesus kafram ni murung’agen facha’ nu Samaria. (Luke 10:30-37) Nap’an e duw ni 1924, min tay ko Fare Wulyang ko Damit ni fare pumoon nu Samaria e be yip’ fan Jesus; ma fare pa’ i kanawo’ ni log u Jerusalem nga Jeriko e be yip’ fan rarogon e par ko girdi’ ni be kireb i yan ni ka nap’an e togopuluw nni tay u Eden, ma fapi moro’ro’ e be yip’ fan boch e ulung nib ga’ nge pi ta fol chuway’ ni yad ba chogow, ma fare prist nge fare Levite e be yip’ fan e pi yurba’ i teliw ko Kristiano ni googsur. Machane, chiney e ba ga’ ni yima weliy e re fanathin ney u lan e pi babyor rodad ni bochan e nge puguran ko piin Kristiano nthingar dab ur laniyan’gad ko girdi’. Gathi gad be felfelan’ ni gad be guy ni ke momnag Jehovah rogon ni ma fil ban’en ngodad?

15. Mang e gad ra weliy ko bin migid e article?

¹⁵ Bin migid e article e gad ra weliy riy fare fanathin rok Jesus ni murung’agen fa ragag i rugod. (Matt. 25:1-13) Uw rogon ni lemnag Jesus ni nge tamilang e re fanathin ney u wan’ pi gachalpen u nap’an e tin tomuren e rran? Gur, baadag ni ngad lemnaged ni gubin e girdi’ nni weliy murung’agen riy, nge pi n’en ni ur rin’ed ma be dag yaan boch ban’en ni ka bay nga m’on? Fa weliy e re fanathin nem ni bochan e nge fil pi gachalpen boch ban’en riy nrayog ni nge ayuwegrad u nap’an e tin tomuren e rran? Ngad guyed ko mang e be yog.