1, 2. Mang reb e ban’en ni ke guy e pi walag ni yad ma lekag e pi ulung ni gathi ri yibe rin’ u boor e ulung?

KE YAN ni nge m’ay e muulung ni be tay reb e walag ni ma lekag e ulung nge piin piilal ko re ulung nem ni ke yan ni nge guy. Faani sap fare walag nga owchen fapi piilal mi ri runguyrad ni bochan e rib gel e maruwel ni yad ma tay, maku bay boch i yad u fithik’rad ni kar pilibthirgad. Yugu aram rogon, maku bay ban’en nrib ga’ fan ni be magafan’ ngay. Ere, fithrad ni gaar, “Pi walageg, mang boch ban’en ni gimed be rin’ ya nge yag nim ayuweged boch e walag ni nge yag boch e maruwel ngorad u lan e ulung?” Manang e pi piilal nem ni fa yanem ni yib e re walag nem ni nge guy e ulung rorad, me pi’ e athamgil nga lanin’rad ni ngar yoornaged e tayim ni yad be fanay ni ngar skulnaged boch e walag u lan e ulung u rogon ni ngar rin’ed boch e maruwel. Tomur riy me non reb fapi piilal ni gaar, “Bin riyul’ riy, e gathi ri gamad be rin’ e re n’ir.” Maku aram rogon ni ki yog e tin ni ka bay e piilal.

² Faanra gur reb e piilal u lan e ulung, ma sana ka ga ra yog ni aray rogon. Ke guy e pi walag ni yad ma lekag e ulung u fayleng i yan ni boor e ulung ni gathi ri yibe skulnag e pi walag ni pumoon riy u rogon ni ngar ayuweged e ulung. Machane, rib mo’maw’ e re maruwel ney. Ni mang fan?

3. (a) Uw rogon ni be tamilangnag e Bible feni ga’ fan ni ngan skulnag boch e walag u lan e ulung? Mang fan nthingar da rin’ed e re n’ey? (Mu guy e footnote.) (b) Mang fan ni ma lemnag boch e piilal nib mo’maw’ ni ngar skulnaged boch e walag u lan e ulung?

³ Faanra gur reb e piilal, ma dariy e maruwar riy ni ga manang nrib ga’ fan ni ngan skulnag e pi walag ni pumoon u lan e ulung u rogon ni ngar rin’ed boch e maruwel.a Ka ga manang nib t’uf boch e walag ni pumoon ni ngar ayuweged e ulung ni nge par nib gel ko tirok Got ban’en, mu kur sunmiyed boch e ulung nib beech. (Mu beeg e Isaiah 60:22.) Ka ga manang ni be pi’ e Thin rok Got e athamgil nga lanin’med e piin piilal ni ngam skulnaged “boch e girdi’.” (Mu beeg e 2 Timothy 2:2.) Yugu aram rogon, ma sana ga be guy nib mo’maw’ ni ngam rin’ e re n’ey ni bod rogon fapi piilal ni faan kan weliy murung’agrad. Ya thingar mu pi’ e tin nib t’uf ko tabinaw rom, ma sana ka ga ma un ko maruwel, ma ku bay boch e maruwel nib milfan ngom u lan e ulung, nge ku boch e maruwel nib t’uf ni ngam rin’. Ere, bochan e pi maruwel ney nthingar ni rin’, ma bayi n’en ma gowa dakuriy e tayim ni ngkun skulnag boch e walag u lan e ulung. Faanra aray rogon, me ere ngad weliyed ko mang fan nrib ga’ fan ni nge tay e piin piilal e tayim ni ngar skulnaged boch e walag u lan e ulung.

RIB GA’ FAN NI NGAN SKULNAG BOCH E WALAG

4. Mang reb i fan ni bay yu ngiyal’ nder ma tay e piin piilal e tayim ni ngar skulnaged boch e walag ni pumoon riy?

⁴ Mang reb i fan nrayog ni nge mo’maw’ ngak boch e piilal ni ngar pirieged e tayim ni ngar skulnaged boch e walag ni pumoon riy? Sana bay boch i yad ni ma gaar u laniyan’: ‘Riyul’ nib ga’ fan ni ngan skulnag boch e walag u lan e ulung, machane bay boch e maruwel u lan e ulung ndabiyog ni ngan digey, ya thingar ni rin’. Faanra dab gu skulnagrad, ma dariy ban’en nra buch ko ulung.’ Yugu aram rogon nriyul’ ni bay boch ban’en nthingari maruweliy e piin piilal, machane faanra ku dab ra skulnaged boch e walag u rogon ni ngar rin’ed boch e maruwel u lan e ulung, maku rayog ni nge magawon e ulung.

5, 6. Mang e rayog ni ngad filed rok facha’ ni ma yan u karrow nge rogon ni ma ayuweg e karrow rok? Uw rogon nrayog ni ngan taarebrogonnag e re n’ey nga rogon ni yima skulnag boch e walag u lan e ulung?

⁵ Am lemnag e re n’ey. Be’ ni ma yan u karrow e manang nib t’uf ni nga i thilyeg e oil ko karrow rok ni faanra nge yan fare karrow nib fel’ rogon. Machane, rayog ni nge lemnag ni kab ga’ fan ni nge tay e pensin nga karrow rok ko bin ni nge thilyeg e oil riy. Bin riyul’ riy e, faanra dabi tay e pensin ko karrow rok, ma ra tal fare karrow ndab ki yan. Ere, rayog ni nge gaar u wan’, ‘Faanra dariy e tayim ni nggu thilyeg e oil ko re karrow ney, ma ka rayog ni nge yan e re karrow ney u lan ba ngiyal’.’ Machane, mang fan nde fel’ e re n’ey? Faanra i tay facha’ fare karrow ndabi yaliy e masin riy, ma ra munmun me tal ndab ki yan. Faanra buch ni aray rogon, ma thingari n’ag boor e salpiy nge tayim rok ni fan e nge yag nni ngongliy fare karrow bayay. Ere, mang e gad be fil ko re n’ey?

⁶ Bay boch e maruwel ni ma rin’ e piin piilal nib ga’ fan ma thingar ni rin’ nib papey, ya faanra danga’ ma rayog ni nge magawon e ulung. Ere, ba t’uf ni nge lemnag e piin piilal e “tin ni ir e th’abi ga’ fan” ni bod rogon facha’ ni ma yan u karrow nthingari guy rogon ni nga i par ni bay e pensin ko karrow rok. (Fil. 1:10, NW) Machane, bay boch e piilal ni bayi n’en ma kar mitgad u boch ban’en nib t’uf ni ngar rin’ed, ma dab kur ted e tayim ni ngar skulnaged boch e walag u lan e ulung ni bod rogon facha’ ni ma yan u karrow nder yaliy e masin ko karrow rok. Ma faanra dabi tay e piin piilal e tayim ni ngar skulnaged boch e walag u lan e ulung u rogon ni ngar rin’ed boch e maruwel, ma ra munmun me yan i par ndakuriy e walag u lan e ulung nrayog ni ngar rin’ed boch e maruwel nib t’uf ni ngan rin’ ni fan ko ulung.

7. Susun ni nge uw rogon u wan’dad e pi piilal ni yad ma tay e tayim ni ngar skulnaged boch e walag u lan e ulung?

⁷ Ere, susun ndab ud lemnaged nde ga’ fan ni ngaun skulnag boch e walag u lan e ulung. Piin piilal ni yad ma lemnag rarogon e ulung boch nga m’on ma yad ma tay e tayim ni ngar skulnaged boch e walag ni pumoon u lan e ulung, e yad boch e tapigpig rok Got ni yad ba gonop mab ga’ angirad ko pi walag u lan e ulung. (Mu beeg e 1 Peter 4:10.) Uw rogon nra yib angin e re n’ey ko ulung?

NGAN MARUWEL KO TAYIM NIB FEL’ ROGON

8. (a) Mang fan nsusun e nge skulnag e piin piilal boch e walag u lan e ulung? (b) Mang reb e ban’en nrib ga’ fan nib milfan ngak e piin piilal ni yad ma pigpig u boch e ulung nib t’uf e ayuw riy? (Mu guy fare thin ni kenggin e “Ba Maruwel Nrib Ga’ Fan.”)

⁸ Ki mada’ ko pi walag ni ke n’uw nap’an ni kar manged piilal e thingar ra nanged ni yad be pilibthir i yan, ere ra munmun ma dabkiyog ni ngar rin’ed yooren e maruwel ni yad be rin’ e chiney. (Mik. 6:8) Maku reb, e susun ni ngkur nanged ni “ngal’an nge pi n’en ni ma buch ko girdi’ e dan nang,” ere rayog ni nge buch ban’en nib tomgin ma dabkiyog rorad ni ngar rin’ed e pi maruwel nib milfan ngorad u lan e ulung. (Ekl. 9:11, 12, NW; Jas. 4:13, 14) Ere, pi piilal nib t’uf e pi tapigpig rok Jehovah rorad maku yad ma lemnagrad, e yad ma athamgil ni ngar filed boch e salap rorad ngak boch e walag ni pumoon ni ka yad bbitir ngorad.​—Mu beeg e Psalm 71:17, 18.

9. Mang reb e ban’en ni bayi buch ni be dag nrib ga’ fan ni ngan skulnag boch e walag u lan e ulung?

⁹ Piin piilal ni yad ma skulnag boch e walag u lan e ulung e kub ga’ angirad ni bochan e yad ma ayuweg e ulung ni nge par nib gel ko tirok Got ban’en. Ni uw rogon? Bochan e re skul ney ni yad ma tay mab mom ni nge yoor e walag ni pumoon u lan e ulung nrayog ni ngar ayuweged e ulung ni nge par nib mudugil mab taareban’ e pi walag riy. Ma re n’ey e gathi kemus nra ayuweg e ulung e chiney, ya ku ra ayuwegrad u nap’an nra yib fare gafgow nib ga’. (Ezek. 38:10-12; Mik. 5:5, 6) Ere, yibe wenig ngomed e piin piilal ni ngam ted e tayim ni ka chiney ni ngam skulnaged boch e walag u lan e ulung.

10. Faanra nge yib e tayim ni nge skulnag e piin piilal boch e walag u lan e ulung, ma mang e ba t’uf ni ngar rin’ed?

¹⁰ Gamad manang nri boor pa’ u puluwmed ni bochan e pi maruwel ni gimed be rin’ ni fan ko ulung. Ere, rayog ni sana ba t’uf ni ngam fanayed boch ko pi tayim ney ni gimed ma rin’ e pi maruwel ney riy ni ngam skulnaged e pi walag ney. (Ekl. 3:1) Ya faan gimed ra rin’ ni aray rogon, ma aram e gimed be maruwel ko tayim romed nib fel’ rogon ma ra yib angin ko ulung boch nga m’on.

MU FIL BAN’EN NGORAD KO BIN NIB FEL’ E KANAWO’

11. (a) Mang e ke tamilang u rogon e fonow ni ke pi’ e piin piilal u boch e nam nib thilthil? (b) Mang fan nib fel’ ni ngad weliyed murung’agen e pi fonow ni ke pi’ yugu boch e piilal nrogon nib puluw ko Proverbs 15:22?

¹¹ Dawori n’uw nap’an ma kan fith ngak boch e piilal ni ke yag ni ngar ayuweged boch e walag ni ngar mon’oggad ko tirok Got ban’en ko uw rogon ni kar rin’ed e re n’ey.b Yugu aram rogon nib thilthil rarogon e pi walag ney, machane taab n’en e ka rogned. Ere, mang e be tamilangnag e re n’ey? Be tamilangnag ni gubin e skul ni yima tay ko pi ulung “u gubin yang i yan” ni ma yib angin, ni bod rogon u nap’an apostal Paul. (1 Kor. 4:17) Ere, biney e article nge bin migid e gad ra weliy boch ban’en riy ni ke yog e pi piilal ney nrayog ni nge ayuweg e piin piilal. (Prov. 15:22) Piin ni yad be skulnag e pi walag e gad ra yog ni yad e “sensey,” ma pi walag ni yibe ayuwegrad e gad ra yog ni yad e “piin ni yibe skulnagrad.”

12. Mang e ba t’uf ni nge rin’ reb e sensey, ma mang fan?

¹² Reb e sensey ara be’ ni ma fil ban’en ngak be’ e thingari guy rogon ni nge fil fare n’em ngak facha’ u reb e kanawo’ nib fel’. Ba t’uf ni nge guy rogon ni nge pi’ e athamgil nga laniyan’ facha’ ara nge pug e tafinay rok u m’on ni nge fil ban’en ngak ni bod rogon reb e tamilay’ nib t’uf ni nge gi’ e but’ me bilbilig nge munguy mfini yung e awoch ngay. Ere, uw rogon ni nge rin’ e piin ni yad be skulnag boch e walag e re n’ey? Rayog ni ngar folgad ko n’en ni rin’ reb e profet kakrom. Mang e re n’em?

13-15. (a) Mang maruwel e ni pi’ ngak Samuel ni profet ni nge rin’? (b) Uw rogon ni rin’ Samuel e maruwel rok? (Mu guy e sasing ni bay u tabolngin e re article ney.) (c) Mang nib ga’ fan e n’en ni rin’ Samuel ngak e piin piilal e ngiyal’ ney?

¹³ Sogonap’an 3,000 e duw ni ke yan u nap’an ni ke pilibthir Samuel ni profet, me yog Jehovah ngak ni gaar: “Gabul ko gonap’an e re ngiyal’ i n’ey e bay gu pi’ be’ ko ganong rok Benjamin nge yib ngom; mu liyef ko gapgep nge par ni ir e nge mang pilung rok piyu Israel ni girdi’ rog.” (1 Sam. 9:15, 16) Manang Samuel ni ke mus nap’an ni nge pow’iy fare nam nu Israel, ere aram fan ni ke yog Jehovah ngak ni nge yan i dugliy be’ ni nge yan nga lon. Dabisiy ni gaar Samuel u laniyan’, ‘Uw rogon ni nggu ayuweg e cha’nem ni nge yag ni tabab ko maruwel rok?’ Baaray e n’en ni lemnag ni nge rin’.

¹⁴ Faani bin migid e rran u nap’an ni guy Samuel Saul, me gaar Jehovah ngak: “Ereray fare moon.” Ma aram me rin’ Samuel e n’en ni ke lemnag. I pining Saul ko abich, ma nap’an ni yib Saul nge reb e tapigpig rok ni ngar unew ko fare abich, me pi’ e gin th’abi fel’ ngorow ni ngar parew ngay, nge yungin th’abi fel’ e ufin ni ngar kew, me gaar: “Ntay ni nge yib e girdi’ ni gu pi’ e thin nge yan ngorad ni ngar bad ngam abichgad e re ngiyal’ i n’ey me gur e ngam longuy e ginir.” Tomuren e abich, me un Saul ngak Samuel nga ranow i yan ko naun rok. Ma nap’an ni yow be yan i yan ngaram ma yow be non. Ma nap’an nra tawgow nga tafen Samuel, ma ranow nga daken e “chigiy ko naun” rok, mar parew u rom ngaur sabethingow nge mada’ ko ngiyal’ ni kar molow. Faani bin migid e rran, ma aram me liyef Samuel e gapgep nga lolugen Saul ni aram e ke dugliy, me faray owchen, ma aram me yog ngak e n’en ni nge rin’. Tomuren e re n’ey, ma aram me yan Saul ni ke fel’ rogon ni nge rin’ e pi n’en ni bay ni nge rin’.​—1 Sam. 9:17-27; 10:1.

¹⁵ Riyul’ nib thil e bin baaray ni ngan dugliy be’ ni nge mang pilung u reb e nam ko bin ni ngan skulnag reb e walag ni pumoon u lan e ulung ni nge mang reb e piilal ara ministerial servant. Yugu aram rogon, ma rayog ni nge fil e piin piilal ban’en ko n’en ni rin’ Samuel. Ngad weliyed l’agruw e pi n’em.

BOCH E SENSEY NGE FAGER NIB MANIGIL

16. (a) Mang e lemnag Samuel u nap’an ni yog piyu Israel ni ngan mel’eg be’ ni nge mang pilung rorad? (b) Mang e rin’ Samuel u nap’an ni yog Jehovah ngak ni nge liyef e gapgep nga lolugen Saul?

¹⁶ Nge m’agan’um ngay ni ngam rin’, ma dabi yoyoor lanin’um. Nap’an ni rung’ag Samuel ni baadag piyu Israel ni nge yag be’ ni nge mang pilung rorad, me kireban’ me lemnag ni kan darifannag. (1 Sam. 8:4-8) Bin riyul’ riy e dalip yay ni sul Jehovah nge yog ngak ni nge motoyil ngorad ni bochan e dabun ni nge rin’ e n’en ni ke yog piyu Israel. (1 Sam. 8:7, 9, 22) Yugu aram rogon, ma de awan’ ara damumuw ngak e en ni yira mel’eg ni nge yib nga lon. Nap’an ni yog Jehovah ngak ni nge liyef e gapgep nga lolugen Saul, me fol ko n’en ni ka nog ngak. Ku de yoyoornag laniyan’, ya rin’ e re n’ey u fithik’ e t’ufeg.

17. Uw rogon ni ma folwok e piin piilal rok Samuel e ngiyal’ ney, ma uw rogon ni ma k’aring e re n’ey e felfelan’ ngorad?

¹⁷ Boor e piilal e ngiyal’ ney ni yad ma folwok rok Samuel, ma yad ma skulnag boch e walag u fithik’ e t’ufeg. (1 Pet. 5:2) Ba m’agan’ e pi piilal ney ngay ni ngar skulnaged boch e walag u lan e ulung ma darur dabuyed ni ngar pied boch e maruwel ni yad ma rin’ ngorad. Ku darur lemnaged ni ngaur taarebrogonnaged yad ngorad ni bochan e ngan guy ko mini’ rorad e ba cheg, ya yad ma tay ni pi walag ney e yad be maruwel u taabang ni ngar ayuweged e ulung. (2 Kor. 1:24; Heb. 13:16) Maku ma felfelan’ e pi piilal ney u nap’an ni yad ra guy e pi walag ney ni yad be fanay e pi salap rorad ni ngar ayuweged e ulung ngay.​—Acts 20:35.

18, 19. Uw rogon ni nge pi’ reb e piilal e athamgil nga laniyan’ reb e walag ni nge adag ni ngan skulnag, ma mang nib ga’ fan e re n’ey?

¹⁸ Gathi kemus ni ngam mang sensey rorad, ya ngkum mang fager rorad. Nap’an ni mada’nag Samuel Saul, ma yug de fek fare melor i gapgep nge puog nga daken lolugen Saul nib gurgur, me yog ngak ni nge yan. Ya faan gomanga rin’ ni aram rogon, ma dabiyog ni nge pow’iy Saul e girdi’ rok Got ni bochan e dan skulnag u rogon ni nge rin’. Bin riyul’ riy e, gathi aram rogon ni rin’ Samuel, ya tay e tayim ni nge ayuweg Saul u rogon ni nge rin’ e maruwel rok. Fin tomuren ni kar abichgow, mar sabethingow, mar toffangow, e fin aram e ngiyal’ ni liyef Samuel e gapgep nga lolugen Saul.

¹⁹ Ere, ku arrogon e ngiyal’ ney nu m’on ni nge skulnag reb e piilal reb e walag, ma som’on e thingari guy rogon ni nge m’ag fager ngak facha’. Yug ra reb e piilal ma rogon nra rin’ e re n’ey, ya be yan u rogon e gin ni ma par riy nge yalen ko fare nam. Machane, demtrug e gin ni ga ma par riy, ma faan ga ra tay e tayim ni fan ngak reb e walag ni ga be skulnag, ma bod ni be lungum ngak, “Ba ga’ fam u wan’ug.” (Mu beeg e Roma 12:10.) Mus ni faanra da mog e re bugithin ney, ma ra nang faen ni ga be skulnag nriyul’ nib ga’ fan u wan’um.

20, 21. (a) Uw rogon reb e sensey nrib manigil? (b) Mang e gad ra weliy ko bin migid e article?

²⁰ Gimed e piin piilal e dab mu paged talin nreb e sensey nrib manigil e gathi kemus ni ir be’ ni baadag ni ma skulnag be’, ya ku ma t’ufeg faen ni ma skulnag. (Mu taarebrogonnag ko John 5:20.) Ireray reb e ban’en nib papey ni ma guy faen ni yibe skulnag, maku ireray e n’en nra momnag ngak ni nge adag ni nge mit ngak e pi n’en ni yibe fil ngak. Ere, gimed e piin piilal e nap’an ni gimed be skulnag e pi walag u lan e ulung, mi gimed guy rogon ni gathi kemus ni ngam manged sensey rorad ya ngkum manged fager rorad.​—Prov. 17:17; John 15:15.

²¹ Tomuren ni ke ayuweg fare piilal facha’ ni nge adag ni ngan skulnag, mfin aram e ngiyal’ nrayog ni nge tabab i skulnag. Mang boch e kanawo’ nrayog ni nge skulnag riy? Ireray e n’en ni gad ra weliy ko bin migid e article.

1. (a) Mang reb e ban’en u murung’agen e skul ni yima tay ko girdi’ ni kab kakrom i yib ni manang e pi tapigpig rok Got? Mang rogon e re n’ey ngodad e ngiyal’ ney? (b) Mang e gad ra weliy ko re article ney?

KAB kakrom i yib ni manang e pi tapigpig rok Got ni faan yira skulnag be’ u rogon ni nge rin’ ban’en, ma ra yib angin. Abram e “kunuy e pumoon ni be par rok ni kan skulnagrad” u rogon ni ngar rin’ed boch e maruwel ma ranod ra chamgad ngar gelgad mar ayuweged Lot u pa’ e pi toogor rok. (Gen. 14:14-16, NW) Nap’an David ni Pilung, ma piin ni yad ma tang u tempel rok Got e “kan skulnagrad u rogon ni ngar tanggad ni fan ngak Jehovah” mar pininged e sorok ngak. (1 Kron. 25:7, NW) Ngiyal’ ney e gad be cham ngak Satan nge re fayleng rok ney. (Efe. 6:11-13) Maku reb e, gad be athamgil ni ngaud pininged e sorok ngak Jehovah. (Heb. 13:15, 16) Machane, faanra nge yib angin e pi n’en ni gad be rin’ ni bod rogon e pi tapigpig rok Got kakrom, mab t’uf ni ngkun skulnagdad. Ma ke tay Jehovah e piin piilal ni yad e ngaur skulnaged e pi walag u lan e ulung. (2 Tim. 2:2) Ere, mang boch ban’en ni be fanay boch e piilal ni yad ba salap ni ngar skulnaged e pi walag ni pumoon u lan e ulung u rogon ni ngar ayuweged e ulung rok Got?

MU AYUWEG FAEN NI GA BE SKULNAG NI NGARI T’UF JEHOVAH ROK

2. U m’on ni nge fil reb e piilal boch ban’en ngak reb e walag, ma mang e ba t’uf ni nge rin’, ma mang fan?

² Faanra gur reb e piilal, ma rayog ni ngan taarebrogonnagem ngak reb e tamilay’. U m’on ni nge yung reb e tamilay’ e awoch ko milay’ rok, mab t’uf ni nge athukuy boch ban’en ko but’ riy ya nge yag ni tugul e woldug riy nib fel’ rogon. Ere ku arrogon ni u m’on ni ngam fil boch ban’en ngak reb e walag, ma sana ga ra guy nib t’uf ni ngam weliy boch e thin nu Bible ngak nra ayuweg ni nge adag ni nge fol ko pi n’en ni ga ra fil ngak.​—1 Tim. 4:6.

3. (a) Uw rogon nrayog ni nge fanay reb e piilal fapi thin ni yog Jesus ni bay ko Mark 12:29, 30 u nap’an ni yow be non reb e walag ni be skulnag? (b) Uw rogon nrayog ni nge ayuweg e meybil nra tay fare piilal fare walag ni yibe skulnag?

³ Ba ga’ fan ni ngam nang e n’en ni ke rin’ e tin riyul’ ko lem rok facha’ ni ngam skulnag. Ere, rayog ni ngam fith ni nge lungum, ‘Uw rogon ni ke thil e par rom u nap’an ni kam ognag e yafas rom ngak Jehovah?’ Re deer ney e rayog ni nge ayuwegmew u rogon ni ngam weliyew rogon nrayog ni ngad pigpiggad ngak Jehovah u polo’ i gum’ircha’dad. (Mu beeg e Mark 12:29, 30.) Sana rayog nu tomuren ni kam mu’gow ko non, ma ga fek e meybil romew, ma gog ngak Jehovah ni nge pi’ gelngin nib thothup ni nge ayuweg fare walag ko pi n’en nib t’uf ni nge fil. Dariy e maruwar riy nnap’an nra rung’ag e re walag ney e pi n’ey ko meybil rom, ma ra pi’ e athamgil nga laniyan’!

4. (a) Mog boch ban’en ni bay murung’agen u Bible nra ayuweg be’ ni yibe skulnag ni nge mon’og ko tirok Got ban’en. (b) Mang e ma nameg e piin piilal u nap’an ni yad be skulnag boch e walag ni pumoon?

⁴ Nap’an ni ga ra tabab ni ngam skulnag fare walag, mab fel’ ni ngam beegew boch e thin nu Bible nrayog ni nge ayuweg ni nge nang feni ga’ fan ni nga i m’agan’ ngay ni nge rin’ boch e maruwel, ma rayog ni ngan taga’ ngak, nge feni ga’ fan ni nga i sobut’an’. (1 Ki. 19:19-21; Neh. 7:2; 13:13; Acts 18:24-26) Ireray boch e fel’ngin nrayog ni nge ayuweg facha’ ni yibe skulnag ni bod rogon fapi n’en ni kan athukuy ko fare but’ ni nge yong’olnag. Pi fel’ngin ney e ra papeynag ni nge mon’og facha’ ko tirok Got ban’en. Jean-Claude, nreb e piilal ni ma par u France e yog ni gaar: “N’en ni gu ma nameg u nap’an ni gu be skulnag reb e walag u rogon ni nge rin’ boch e maruwel e aram e nggu ayuweg u rogon ni nga i dugliy boch ban’en nrogon nib puluw ko pi kenggin e motochiyel u Bible. Gu ma gay boch e tayim nrayog ni nggu beegew reb e thin nu Bible u taabang, ya nge yag ni ‘mab owchen’ nge guy ‘fel’ngin e tin nib riyul’’ ni bay u lan e Thin rok Got.” (Ps. 119:18) Ku mang boch e kanawo’ nrayog ni ngan ayuweg faen ni yibe skulnag ni ngari t’uf Jehovah rok?

MOG BOCH BAN’EN NRAYOG NI NGE NAMEG​—NGE FAN

5. (a) Uw feni ga’ fan ni nge weliy reb e piilal murung’agen boch ban’en nrayog ni ngan nameg ni fan ko tirok Got ban’en ngak be’ ni be skulnag? (b) Mang fan nsusun e nge skulnag e piin piilal e pi walag ni kab fel’ yangarrad? (Mu guy e footnote.)

⁵ Mu fith faen ni ga be skulnag ni nge lungum, ‘Mang boch ban’en ni ga be nameg ni fan ko tirok Got ban’en?’ Faanra ga be guy ni gathi ri bay boch ban’en ni be nameg, mag ayuweg ni nge lemnag ban’en nib mom nrayog ni nge nameg ni nge rin’. Mu weliy ngak murung’agen ban’en ni kam nameg ni ngam rin’ kafram, nge gelngin e felfelan’ ni kam tay u nap’an ni ke yag ni ngam rin’ e re n’em. Mu gay rogon ni ngam weliy e re n’ey u fithik’ e felfelan’. Re n’ey e ban’en nrib mom, machane rib ga’ angin. Victor ni ir reb e piilal maku ma pioneer u Africa e yog ni gaar: “Nap’an ni kab fel’ yangareg, me fith reb e piilal in e deer ngog u murung’agen e pi n’en ni kug nameg ni nggu rin’. Pi deer nem e ayuwegeg ni nggu fal’eg i lemnag rogon e machib ni ug tay.” Ki yog boch e walag ni ke n’uw nap’an ni kar manged piilal u lan e ulung nrib ga’ fan ni ngan tabab i skulnag e pi walag ni pumoon u nap’an ni kab fel’ yangarrad. Ma rogon nrayog ni ngan rin’ e re n’ey e aram e ngan pi’ boch e maruwel ni ngar rin’ed u lan e ulung nib m’ag nga yangarrad. Ya re n’ey e ra ayuwegrad ni ngar tedan’rad ko pi n’en ni yad be nameg ni fan ko tirok Got ban’en ni ki mada’ ko ngiyal’ ni kar ilalgad boch ngu nap’an ni kar mada’naged boch ban’en nrayog ni nge magawonnagrad ko tirok Got ban’en.​—Mu beeg e Psalm 71:5, 17.a

6. Mang reb e ban’en nib ga’ fan ni i rin’ Jesus u nap’an ni be fil ban’en ngak boch e girdi’?

⁶ Ku rayog ni ngam ayuweg fare walag ni nge adag ni ngan skulnag ni faan ga ra weliy ngak e n’en ni nge rin’ nge fan ni nge rin’ fare n’em. Faan ga ra weliy fan ngak ni nge rin’ fare n’em, ma aram e ga be folwok rok Jesus ni ir e Bin Th’abi Fel’ e Sensey ni immoy. Bod nnap’an ni pi’ fare maruwel ngak pi gachalpen ni ngar ayuweged boch e girdi’ ni ngkur manged boch i gachalpen, miki weliy fan ni susun e ngar folgad ko re thin nem. I yog ni gaar: “Kan pag fan urngin ban’en ngog u tharmiy ngu but’.” Ngemu’ miki gaar: “Ere mmarod ngak girdien e pi nam u gubin yang ngam pingeged yad ngar manged pi gachalpeg.” (Matt. 28:18, 19) Uw rogon ni ngam folwok u rogon ni i skulnag Jesus pi gachalpen?

7, 8. (a) Uw rogon nrayog ni nge folwok e piin piilal u rogon ni i skulnag Jesus boch e girdi’? (b) Uw feni ga’ fan ni nga mog fel’ngin e n’en ni ke rin’ facha’ ni ga be skulnag ara mu pining e magar ngak? (c) Mang boch e fonow nra ayuweg e piin piilal u rogon ni ngar skulnaged boch e walag ni pumoon u lan e ulung? (Mu guy fare kahol ni kenggin e “Rogon ni Ngan Skulnag Boch e Walag ni Pumoon.”)

⁷ Mu fanay e thin nu Bible ni ngam weliy ngak faen ni ga be skulnag fan nib t’uf ni nge rin’ fapi n’em ni ga be yog ngak. Faan ga ra rin’ ni aray rogon, ma aram e ga be fil ngak rogon ni nge lem nrogon nib puluw ko pi kenggin e motochiyel u Bible. Bod ni, sana ka mog ngak reb e walag ni pumoon ni ir e nga i klinnag langan e garog ko Kingdom Hall nga i par nib beech, mab fel’ yaan, ma dabi dol’ e piin ni yad be yan riy. Rayog ni ngam beeg ngak fare thin ni bay ko Titus 2:10, mag weliy rogon nra girngiy e re maruwel nem e “fel’ ko machib ni murung’agen Got ni ir e ma thapegdad ngak.” Ngemu’ mu ku mog ngak facha’ ni ga be skulnag ni nge lemnag e piin ni kar pilibthirgad u lan e ulung nge rogon nrayog ni nge yib angin e maruwel rok ngorad. Faan ga ra weliy e pi n’ey ngak facha’ ni ga be skulnag ma ra ayuweg ni nga i lemnag rarogon e girdi’, ma gathi pi motochiyel ni bay ni nge fol riy. Nap’an nra guy angin e maruwel ni be tay ni ke yib ngak e pi walag u lan e ulung, mab gel e felfelan’ nra tay ni bochan e be ayuweg boch e girdi’.

⁸ Maku reb e, ngam guy rogon ni ngam pining e magar ngak fare walag ko athamgil ni be tay ni nge rin’ e n’en ni ga be pi’ e athamgil nga laniyan’ ni nge rin’. Uw feni ga’ fan ni ngam rin’ e re n’ey? Ra u mog fel’ngin e n’en ni ke rin’ ara um pining e magar riy ngak, ma rayog ni nge ayuweg ni nge mon’og ko pigpig ni be tay ngak Jehovah, ni bod rogon ni faan ga ra puog e ran nga ba ke woldug, ma ra ayuweg ni nge ga’.​—Mu taarebrogonnag ko Matthew 3:17.

KU REB E MAGAWON

9. (a) Mang fan nib mo’maw’ ko pi piilal ni yad ma par ko pi nam nib fel’ rogon e par ko girdi’ riy ni ngar skulnaged boch e walag ni pumoon? (b) Mang fan ni bay boch e walag ni ka yad ba pagel nde m’on e tin riyul’ u wan’rad?

⁹ Rayog ni nge pirieg e piin piilal ni yad ma par ko pi nam nib fel’ rogon e par ko girdi’ riy nib mo’maw’ ni ngan pi’ e athamgil nga laniyan’ e pi walag ni pumoon ni kan taufenagrad ni bay e duw rorad u thilin e 20 nge yan i mada’ ko 40 ni ngar uned i rin’ boch e maruwel u lan e ulung. Ka nog ko pi walag u sogonap’an 20 e nam u Ken Ngabchey ni ngar weliyed fan ni yad be lemnag ni bay boch e walag ni ka yad ba pagel ndubrad ni ngar rin’ed boch e maruwel u lan e ulung. Nap’an ni kan fith e re deer ney, ma bay taab n’en ni ke gagiyel ko fulweg ni kar pied. Ke gagiyel ni: Nap’an ni kab bitir e pi pagel ney, ma bay boch i yad nda un pi’ e athamgil nga laniyan’ ni nge nameg boch ban’en ni fan ko tirok Got ban’en. Bin riyul’ riy e, bay boch e pi walag ney ni yad baadag ni ngar uned i rin’ boch e pi maruwel ney, machane me yog e gallabthir rorad ngorad ni ngar nameged e skul nib tolang ara boch e maruwel nib fel’ u fayleng! Dariy ba ngiyal’ ni i par e pi pagel ney nib m’on e tin riyul’ u wan’rad.​—Matt. 10:24.

10, 11. (a) Uw rogon nrayog ni nge ayuweg reb e piilal reb e walag ni pumoon ni gathi ri baadag ni nge un i rin’ boch e maruwel u lan e ulung? (b) Mang boch e thin nu Bible nrayog ni nge weliy fare piilal nge fare walag u taabang, ma mang fan? (Mu guy e footnote.)

¹⁰ Faanra der m’ug ni baadag reb e walag ni nge rin’ boch e maruwel u lan e ulung, mab t’uf ni ngan gay rogon ni ngan ayuweg min gum’an’ u puluwon, machane rayog ni ngan rin’ e re n’ey. Be’ nib tamilay’ e nap’an nra yung reb e woldug ma ma k’ik’iyag kenggin fare woldug ya nge n’uw i yan nga lang nib fel’ rogon. Ku arrogon nnap’an ni ga be skulnag reb e walag ma rayog ni ngam ayuweg ni buchuuw ma buchuuw ya nge yag ni adag ni nge un i rin’ boch e maruwel u lan e ulung. Machane, uw rogon ni ngam rin’ e re n’ey?

¹¹ Mu tay e tayim ni ngam fal’eg thilmew fare walag. Mog ngak nib t’uf e ayuw rok u lan e ulung. Munmun ma rayog ni ngam parew nga taabang ngam weliyew boch e thin nu Bible mag ayuweg ni nge fal’eg i lemnag e n’en ni ke micheg ngak Jehovah ni nge rin’ u nap’an ni ke ognag e yafas rok ngak. (Ekl. 5:4; Isa. 6:8; Matt. 6:24, 33; Luke 9:57-62; 1 Kor. 15:58; 2 Kor. 5:15; 13:5) Rayog ni ngam fith ni nge lungum, ‘Mang e mmicheg ngak Jehovah u nap’an nim ognag e yafas rom ngak?’ Mag gay rogon ni nge taw e n’en ni ga be weliy nga gum’irchaen ni aram e nge lungum ngak, ‘Ga be lemnag ma uw rogon e lem rok Jehovah ko rofen nim un ko taufe?’ (Prov. 27:11) ‘Ma uw rogon e lem rok Satan?’ (1 Pet. 5:8) Pi thin nu Bible ni ga ra beeg ngak e rib gel gelngin ma rayog ni nge ayuweg e re walag nem.​—Mu beeg e Hebrews 4:12.b

GIMED E PIIN NI YIBE SKULNAGMED, MU PARED NI GIMED BA YUL’YUL’

12, 13. (a) Uw rogon e lem rok Elisha u nap’an ni un skulnag u rogon ni nge rin’ boch e maruwel? (b) Uw rogon ni tow’athnag Jehovah Elisha ko yul’yul’ ni tay?

¹² Ere, uw rogomed e piin pagel? Ya rib t’uf e ayuw romed u lan e ulung. Mang lem e ra ayuwegmed ni ngam mon’oggad? Ra ngad nanged e fulweg ko re deer ney ma som’on e ngad weliyed e n’en ni buch rok be’ kakrom ni kun skulnag u rogon ni nge rin’ boch e maruwel.

¹³ Sogonap’an 3,000 e duw ni ke yan me pining Elijah ni profet be’ ni ka nog Elisha ngak ni nge mang taayuw rok. Ka chingiyal’ nem me m’agan’ Elisha ko n’en ni ke yog Elijah ngak, ma aram me un ngak nga i ayuweg u boch e maruwel. (2 Ki. 3:11) Tomuren nel’ e duw ni kan skulnag Elisha, ma aram me nang Elisha ni ke chugur ni nge mus nap’an e maruwel ni nge rin’ Elijah u Israel. Ere, yog Elijah ngak ndab ki un ngak, machane dalip yay ni gaar Elisha ngak Elijah: “Dab gu pagem.” Ke dugliy Elisha u wan’ ni nge par rok e en ni ke ayuweg u n’umngin nap’an nrayog rok. Bochan ni par Elisha nib yul’yul’, ma aram me tow’athnag Jehovah ni aram e pag ni nge guy Elijah ni kan fek nga yugu bang u fithik’ ba nanyor.​—2 Ki. 2:1-12, BT.

14. (a) Uw rogon nrayog ni nge folwok e piin ni yibe skulnagrad rok Elisha? (b) Mang nrib ga’ fan ni nge yul’yul’ faen ni yibe skulnag?

¹⁴ Uw rogon nrayog ni ngam folwok rok Elisha? Nap’an ni yira ognag boch e maruwel ngom, mag gur ngam fek, ni kub muun ngay boch e maruwel ni gathi rib ga’ fan. Mu tay e en ni be skulnagem ni ir e fager rom, mag weliy ngak feni ga’ fan u wan’um e athamgil ni be tay ni nge ayuwegem. Ga ra rin’ e re n’ey, ma bod ni be lungum ngak: “Dab gu pagem.” Ma bin th’abi ga’ fan riy e demtrug e miti maruwel ni kan pi’ ngom ni ngam rin’, mag rin’ u fithik’ e yul’yul’. Mang nrib ga’ fan e re n’ey? Ya fin ra guy e piin piilal ni gur be’ ni gab yul’yul’, ma rayog ni ngan taga’ ngom mfin aram e ngiyal’ ni yad ra nang ni baadag Jehovah ni ngan pag fan boch e maruwel ngom u lan e ulung.​—Ps. 101:6; mu beeg e 2 Timothy 2:2.

MU TAYFAN E PIIN PIILAL

15, 16. (a) Mang boch ban’en ni rin’ Elisha ni i m’ug riy ni be tayfan e en ni ke skulnag? (Mu guy e sasing ni bay u tabolngin e re article ney.) (b) Mang e n’en ni rin’ Elisha ni ir e ayuweg yugu boch e profet ni nge pagan’rad ngak?

¹⁵ Fapi thin nu Bible ni be weliy murung’agen Elisha e ku be dag nib t’uf ni nga i tay e pi walag ni pumoon ni yibe skulnagrad fan e piin piilal ni ke n’uw nap’rad u lan e ulung. Tomuren ni yan Elijah nge Elisha ra guyew boch e profet u Jeriko, ma aram ma ranow u but’ i yan ko fare Lul’ nu Jordan. Ma aram “me fek Elijah wuru’ e mad rok nge bachiy me toy nga daken e ran; me ki’ e ran u lan e lul’.” Tomuren nra th’abew fare lul’ nga barba’, ma aram mu u ranow ni “yow be non.” Ba tamilang ndariy ba ngiyal’ ni i lemnag Elisha ni gubin ban’en ni manang. Ya gubin ngiyal’ ni u ranow Elijah u taabang ma be tay u laniyan’ urngin ban’en ni ke fil Elijah ngak. Ma aram min fek Elijah nga lan e tharmiy u fithik’ ba nanyor. Boch nga tomuren u nap’an ni bay Elisha ko fare lul’ nu Jordan, ma aram me toy wuru’ e mad rok Elijah nga daken e ran me gaar: “Bu uw Somol ni fare Got rok Elijah?” Ma nap’an ni yodorom, ngemu’ me ki’ bayay e ran ko fare lul’.​—2 Ki. 2:8-14, BT.

¹⁶ Kam tay fanam i yan riy ni bin th’abi som’on e maang’ang ni ngongliy Elisha e ri taareb rogon ko bin tomur e maang’ang ni ngongliy Elijah? Ere, mang e be fil e re n’ey ngodad? Ba tamilang nnap’an nda ki moy Elijah ma de lemnag Elisha ni aram e ir e nga i guy ko mang e nge rin’. Ya ulul nga i folwok rok Elijah, me dag ni be tayfan e en ni skulnag. Ma aram e n’en ni ayuweg yugu boch e profet ni nge pagan’rad ngak Elisha. (2 Ki. 2:15) Boch nga tomuren me pigpig Elisha ni ir reb e profet u lan 60 e duw me pi’ Jehovah gelngin ni nge ngongliy e maang’ang ni ka boor ko tin ni i ngongliy Elijah. Ere faanra gur e yibe skulnagem e ngiyal’ ney, ma mang e rayog ni ngam fil rok Elisha?

17. (a) Uw rogon nrayog ni nge folwok e piin ni yibe skulnagrad rok Elisha u rogon ni i lemnag e maruwel nni pi’ ngak? (b) Ra munmun ma uw rogon nra fanay Jehovah e piin ni yibe skulnagrad ni yad ba yul’yul’?

¹⁷ Nap’an ni yira pag fan boch e maruwel ngom u lan e ulung, ma dab mu lemnag ni aram e ngam thilyeg rogon ni yima rin’ fapi n’em nga rogon ni un rin’ kafram. Dab mu pagtalin ni pi n’en ni yima thilyeg u lan e ulung e gathi be yan u rogon e n’en ni ga baadag ni ngan rin’, ya be yan u rogon e n’en nib t’uf ko ulung nge pi n’en ni be yarmiy e ulung rok Jehovah. I dag Elisha ngak yugu boch e profet nrayog ni nge pagan’rad ngak ma be tayfan e en ni i skulnag, ni aram e i ulul ni nga i fol ko pi n’en ni fil Elijah ngak. Ere, ku arrogon gur nrayog ni ngam dag ni ga be tayfan e piin piilal ni ke n’uw nap’rad u lan e ulung, mu kum dag ko pi walag nrayog ni nge pagan’rad ngom ni aram e ngam fol ko pi n’en ni kan fil ngom nib puluw ko Bible. (Mu beeg e 1 Korinth 4:17.) Ra munmun ni ke yoor boch ban’en ni kam nang, ma dariy e maruwar riy nrayog ni ngam un i thilyeg boch ban’en u lan e ulung nra ayuweg e ulung ni nga i mon’og i yan ma be fol u rogon ni be pow’iy Jehovah. Bin riyul’ riy e, rayog ni nge pow’iyem Jehovah ni ngam rin’ boch e maruwel ni ka boor ko tin ni i rin’ e piin nra skulnaged gur ni bod rogon e n’en ni buch rok Elisha.​—John 14:12.

18. Mang nrib ga’ fan ni ngan skulnag e pi walag ni pumoon u lan e ulung?

¹⁸ Gamad be athapeg ni manga yigi fol e piin piilal ko pi fonow ni bay ko re article ney nge fa binem ni ke yan ni aram e ngar ted e tayim ni ngar skulnaged boch e walag ni pumoon u lan e ulung. Ku gamad be yibilay ni manga yigi m’agan’ e pi walag ni pumoon u lan e ulung ngay ni ngan skulnagrad, mar fanayed e pi n’en ni yira fil ngorad u fithik’ e gonop ya nge yag nra ayuweged e pi saf rok Jehovah u lan e ulung. Faan yira fol ko pi n’ey ma rayog ni nge par e ulung rok Got u fayleng nib gel, maku ra ayuwegdad ni gad gubin ni ngad pared ni gad ba yul’yul’ u nap’an ni gad be sonnag e pi n’en ni ka bay nga m’on.