Pi Walag ni Pumoon ​—Gimed Be Nameg ni Ngam Manged Boch e Ministerial Servant, Fa?

1. Uw rogon e pi ministerial servant u wan’ apostal Paul?

BA GA’ fan e maruwel ni ma rin’ e pi ministerial servant u lan e ulung. Ba tamilang nib ga’ fan u wan’ apostal Paul e pi pumoon ney ni yad ba yul’yul’. Bod nnap’an ni be yol ko pi Kristiano u Filippi, me uneg e pi ministerial servant nge piin piilal u lan e babyor rok.​—Fil. 1:1.

2. Uw rogon u wan’ reb e walag ni pumoon ni ka nog Luis ngak e maruwel rok ni ir reb e ministerial servant?

² Boor e walag ni pumoon ndemtrug ko kab fel’ yangarrad ara kar ilalgad boch nib gel e felfelan’ ni yad ma tay ni bochan e yad boch e ministerial servant. Bod ni Devan e 18 e duw rok min dugliy ni nge mang reb e ministerial servant. Ma Luis nreb e walag ni pumoon e nni dugliy ni nge mang reb e ministerial servant u nap’an ni ke pag 50 e duw rok. I weliy rogon laniyan’ boor e ministerial servant u nap’an ni gaar, “Gub felfelan’ ngay ni nggu rin’ e maruwel ni ma rin’ reb e ministerial servant, nib ga’ ni faan gu ra lemnag gelngin e t’ufeg ni ke dag e ulung ngog!”

3. Mang deer e gad ra weliy e fulweg riy?

³ Faanra gur reb e walag ni pumoon ndawor mmang reb e ministerial servant, ma mang ndab mu nameg e re n’ey? Mang e rayog ni nge k’aringem ni ngam rin’ e re n’ey? Ma mang boch e fel’ngin ni be yog e Bible nib t’uf ni nge yag ngom ya nge yag ni bung rogom ni ngam mang reb e ministerial servant? Gad ra weliy e fulweg ko pi deer ney ko re article ney. Machane som’on e ngad weliyed murung’agen e maruwel ni ma rin’ e ministerial servant.

MANG E MARUWEL KO MINISTERIAL SERVANT?

4. Mang e maruwel ko ministerial servant? (Kum guy e sasing.)

⁴ Ministerial servant e reb e walag ni pumoon ni kan dugliy nga gelngin Got nib thothup ni nge ayuweg e piin piilal u boch e maruwel nib ga’ fan u lan e ulung. Bay boch i yad ni ma guy rogon ni nge gaman e gin nge machib e pi tamachib riy, ma kub gaman e babyor rorad ni fan ko machib. Boch i yad e ku ma pi’ e ayuw i klinnag Tagil’ e Liyor rodad mar fal’eged e yungin ke kireb riy. Ku bay boch i yad ni ma ayuweg e piin kar bad ko muulung ni ngar pirieged bang ni ngar pared ngay, maku yad ma pi’ e ayuw ko sound nge video u nap’an e muulung. Yooren e maruwel ni ma rin’ e pi ministerial servant e ba ga’ fan. Machane bin th’abi ga’ fan riy e yad boch e pumoon ni kar ilalgad ko tirok Got ban’en, mab t’uf Jehovah rorad, ma yad ma fol ko pi motochiyel rok. Kub t’uf pi walagrad ni Kristiano rorad. (Matt. 22:​37-39) Ere uw rogon ni nge nameg reb e walag ni pumoon ni nge mang reb e ministerial servant?

5. Uw rogon nrayog ni nge nameg reb e walag ni pumoon ni nge mang reb e ministerial servant?

⁵ Be weliy e Bible boch e fel’ngin nib t’uf ni nge yag ngak reb e walag ni pumoon ya nge yag ni bung rogon ni nge mang reb e ministerial servant. (1 Tim. 3:​8-10, 12, 13) Rayog ni ngam nameg e re tow’ath ney ni aram e ngam fil murung’agen e pi fel’ngin ney, mag maruweliy ni nge yag ngom. Machane som’on e ba t’uf ni ngarim fal’eg i lemnag fan ni ga baadag ni ngam nameg ni ngam mang reb e ministerial servant.

MANG FAN NI GA BAADAG NI NGAM MANG REB E MINISTERIAL SERVANT?

6. Mang e susun ni nge k’aringem ni ngam rin’ boch ban’en ni fan ngak pi walagem? (Matthew 20:28; Kum guy e sasing.)

⁶ Am lemnag Jesus Kristus ni ir e dag e bin th’abi fel’ e kanawo’ nrayog ni ngad folwokgad riy. Urngin ban’en ni i rin’ ni bochan e ba t’uf e Chitamangin nge girdi’ rok. Re t’ufeg nem e k’aring ni nge maruwel nib gel miki rin’ boch e maruwel nib sobut’ ni fan ngak yugu boch e girdi’. (Mu beeg e Matthew 20:28; John 13:​5, 14, 15) Faanra t’ufeg e aram e n’en be k’aringem ni ngam nameg ni ngam mang reb e ministerial servant, ma aram e ra tow’athnagem Jehovah me ayuwegem ni nge bung rogom ni ngam rin’ e n’en ga be nameg.​—1 Kor. 16:14; 1 Pet. 5:5.

7. Mang fan nde puluw ni nge mang reb e walag ni pumoon reb e ministerial servant ni bochan e nge m’ug ni ir be’ nib ga’ fan?

⁷ Girdi’ ko re fayleng ney e ba ga’ ni yad ma tayfan e piin yad ma guy rogon ni nge m’ug nib ga’ farad. Machane gathi aram rogon e ulung rok Jehovah. Reb e walag ni pumoon ni bay e t’ufeg rok ni bod Jesus e der ma guy rogon ni nge gel lungun, ara gagiyegnag yugu boch e girdi’, ara guy rogon ni nge ga’ fan u wan’ e girdi’. Faanra ni dugliy be’ ni aray rogon ni nge mang reb e ministerial servant, ma dabisiy nra siyeg ni nge rin’ boch e maruwel nib sobut’ nib t’uf ni nge rin’ ya nge ayuweg e pi saf rok Jehovah. Rayog ni nge lemnag ni ir be’ ni kaygi ga’ fan nsusun e dabi rin’ e pi maruwel nem. (John 10:12) Dabi tow’athnag Jehovah be’ ni ma rin’ boch ban’en ni bochan e ba tolangan’ ara baadag ni nge m’ug nib ga’ fan.​—1 Kor. 10:​24, 33; 13:​4, 5. 

8. Mang fonow e pi’ Jesus ngak e pi apostal rok?

⁸ Mus ko pi fager rok Jesus nib chugur thilrad ni immoy yu ngiyal’ nde puluw fan ni ur nameged boch e maruwel ni ngan pi’ ngorad. Am lemnag e n’en ni rin’ James nge John ni yow l’agruw e apostal rok Jesus. Rognew ngak Jesus ni nge pi’ l’agruw e tagil’ ngorow nib tolang u Gil’ilungun. De yog Jesus nib fel’ e re n’ey ni kar rin’ew. Ya tamilangnag ngak fa 12 i apostal rok ni gaar: “Faanra ba adag bigimed ni nge mang ir e ba tolang, ma ir e thingari mang tapigpig romed ni gimed gubin; ma faanra ba adag bigimed ni ir e nge m’on, me ir e thingari mang sib romed ni gimed gubin.” (Mark 10:​35-37, 43, 44) Pi walag ni pumoon ni yad ma nameg ni ngar ayuweged e pi walag e yad ra mang boch e tow’ath ko ulung.​—1 Thess. 2:8.

MANG E RA AYUWEGEM NI NGAM ADAG NI NGAM MANG REB E MINISTERIAL SERVANT?

9. Mang e rayog ni nge ayuwegem ni ngam adag ni ngam mang reb e ministerial servant?

⁹ Dariy e maruwar riy nib t’uf Jehovah rom ma ga baadag ni ngam rin’ boch ban’en ni fan ngak yugu boch e girdi’. Yugu aram rogon, ma sana rayog ni gathi ri ga baadag ni ngam rin’ e maruwel nib milfan ngak reb e ministerial servant. Ere mang e rayog ni nge ayuwegem ni ngam adag ni ngam mang reb e ministerial servant? Mang ndab mu lemnag e felfelan’ ni ga ra tay u nap’an ni ga ra rin’ boch ban’en ni fan ngak pi walagem? I yog Jesus ni gaar: “Ba gel e felfelan’ ni ma yib ko pi’ ban’en ngak be’ ko bin ni be’ e nge pi’ ban’en ngom.” (Acts 20:35) I fol ko re kenggin e motochiyel ney. I pirieg e bin riyul’ e felfelan’ u nap’an ni be rin’ boch ban’en ni fan ngak yugu boch e girdi’, maku arrogon e n’en nrayog ni nge buch rom.

10. Uw rogon ni dag Jesus nib felfelan’ ngay ni nge rin’ boch ban’en ni fan ngak yugu boch e girdi’? (Mark 6:​31-34)

¹⁰ Am lemnag ban’en ni buch ni dag Jesus riy nib felfelan’ ngay ni nge rin’ boch ban’en ni fan ngak yugu boch e girdi’. (Mu beeg e Mark 6:​31-34.) Immoy bayay ni ke aw parowrad e pi apostal rok. Ere ranod nga bang ndariy be’ riy ya nge yag nra toffangad. Machane me m’on ba ulung i girdi’ ngaram ni yad be athapeg ni nge fil Jesus boch ban’en ngorad. Rayog ni nge siyegrad Jesus. Bin riyul’ riy e ‘dariy e ngiyal’ nrayog ni nge abich Jesus nge pi gachalpen riy.’ Ku rayog ni kemus ni taareb ara l’agruw e tin riyul’ ni nge weliy ngorad, ma aram me yog ngorad ni ngar sulod. Machane bochan e t’ufeg rok, ma aram me “tabab i machibnag boor ban’en ngorad.” Miki ulul i machibnagrad nge mada’ ko ngiyal’ ni “ke chugur ni nge aw e yal’.” (Mark 6:35) De rin’ e re n’ey ni bochan e ban’en nthingari rin’, ya rin’ ni bochan e “ri taganan’ ngorad.” Baadag ni nge fil e tin riyul’ ngorad ni bochan e yad ba t’uf rok. Rib gel e felfelan’ ni ma tay Jesus u nap’an nra rin’ boch ban’en ni fan ngak yugu boch e girdi’.

11. Uw rogon ni ayuweg Jesus e girdi’ ko tin nib t’uf rorad? (Kum guy e sasing.)

¹¹ Nap’an nra ayuweg Jesus e girdi’, ma gathi kemus ni ma fil ban’en ngorad. Ya ku ma pi’ e tin nib t’uf ko par rorad. I ngongliy ba maang’ang ya nge yag ni pi’ e ggan ni nge kay ba ulung i girdi’, miki yog ngak pi gachalpen ni ngar f’othed ko pi girdi’ nem. (Mark 6:41) Re n’ey ni rin’ e fil ngak pi gachalpen rogon ni ngaur rin’ed boch ban’en ni fan ngak yugu boch e girdi’. Ki dag ngorad ni mit ney e maruwel ni be yip’ fan e maruwel nib ga’ ni ma rin’ e pi ministerial servant e ba ga’ fan. Am lemnag gelngin e felfelan’ ni tay e pi apostal u nap’an ni yad be un ngak Jesus i pi’ e ggan ngak fapi girdi’ u daken e maang’ang nge mada’ ko ngiyal’ ni “yad urngin nra ked ngar fosgad ngay”! (Mark 6:42) Machane gathi kemus e ngiyal’ ni m’oneg Jesus u wan’ e tin nib t’uf ko girdi’ mfini migid. I rin’ e re n’ey u n’umngin nap’an e yafos rok u fayleng. (Matt. 4:23; 8:16) Ma felfelan’ u nap’an ni be fil ban’en ko girdi’ ma be ayuwegrad ko tin nib t’uf rorad. Ere ku dariy e maruwar riy nib gel e felfelan’ ni ga ra tay ni faan ga ra nameg ni ngam mang reb e ministerial servant.

12. Mang fan ndariy tapgin ni nge lemnag bagadad ndariy ban’en nrayog ni nge ayuweg e ulung riy?

¹² Faanra ga be lemnag ndariy ban’en ni gab salap riy, ma dabi mulan’um. Dariy e maruwar riy ni bay boch i fel’ngim nrayog ni nge yib angin ko ulung. Mu lemnag e n’en ni yog Paul ko 1 Korinth 12:​12-30, ngemu’ mag wenig ngak Jehovah ni nge ayuwegem ni ngam nang rogon nib l’ag e pi thin ney ngom. Ba tamilang ko thin ni yog Paul nib ga’ fam u lan e ulung ni bod e tin ka bay e tapigpig rok Jehovah. Ere faanra dawori bung rogom ni ngam mang reb e ministerial servant e chiney, ma dabi mulan’um. Mu rin’ e tin nrayog rom ni ngam pigpig ngak Jehovah mag ayuweg pi walagem. Ma nge pagan’um ngay nra lemnag e piin piilal e tin nrayog rom u nap’an ni ngar pied reb e maruwel ngom.​—Rom. 12:​4-8.

13. Uw rogon yooren e fel’ngin nib t’uf ni nge yag ko pi ministerial servant?

¹³ Ku baaray reb i fan nsusun e ngam nameg ni ngam mang reb e ministerial servant: Yooren e pi fel’ngin nthingari maruweliy e pi ministerial servant e ku aram e pi fel’ngin nthingari maruweliy urngin e Kristiano. Bin riyul’ riy e, urngin e Kristiano nsusun e ngar chugurgad ngak Jehovah, mar felfelan’gad ni ngar pied boch ban’en ko girdi’, mar daged e kanawo’ nib fel’ nrayog ni ngan folwok riy. Ere ri mang e ba t’uf ni nge rin’ reb e walag ni pumoon ya nge yag ni mang reb e ministerial servant?

ROGON NI NGAM MANG REB E MINISTERIAL SERVANT

14. Mang e be yip’ fan fare thin ni nge ‘par nib fel’ pangin’? (1 Timothy 3:​8-10, 12)

¹⁴ Chiney e ngad weliyed boch e fel’ngin nthingari yag ngak reb e ministerial servant ni kan weliy murung’agen ko 1 Timothy 3:​8-10, 12. (Mu beeg.) Be’ nib ministerial servant e thingari ‘par nib fel’ pangin.’ Re thin ney e ku rayog ni ngan pilyeg ni “ma tiyan’,” ara “rayog ni ngan taga’ ngak,” ara “ma ngongol u reb e kanawo’ nrayog ni ngan tayfan riy.” Re n’ey e gathi be yip’ fan ndabkiyog ni ngaum minmin ara um felfelan’ nga boch ban’en. (Ekl. 3:​1, 4) Machane susun e ngam tiyan’um ko pi n’en kan pag fan ngom ni ngam rin’. Faanra yi manangem ni gur be’ nrayog ni ngan taga’ ngom, ma aram e ra tay e girdi’ u lan e ulung fam.

15. Mang e be yip’ fan fa gal thin ni ‘ba yul’yul’ ko maruwel rok’ nge der ‘chogownag e salpiy’?

¹⁵ Fare thin ni ‘ba yul’yul’ ko maruwel rok’ e be yip’ fan ni gur be’ ni gab yul’yul’ ma rayog ni ngan pagan’uy ngom. Ga ma tay u gil’ e tin ka mog ma damur bannag e girdi’. (Prov. 3:32) Ma fare thin nder ‘chogownag e salpiy’ e be yip’ fan ni gab yul’yul’ ngak e piin gimed ma siyobay u taabang, maku gab yul’yul’ u rogon ni ga ma maruwel ko salpiy. Ku dab mmaruwel ko pi fager rom u lan e ulung u reb e kanawo’ ni nge yag e salpiy riy ngom.

16. (a) Mang e be yip’ fan fare thin ni ‘der unum e wain ni pire’’? (b) Mang e be yip’ fan fare thin ni ‘dariy ban’en ni be yog laniyan’ ngak ni ke rin’ nib kireb’?

¹⁶ Fare thin ni ‘der unum e wain ni pire’’ e be yip’ fan ni gur be’ ndamur unum e alkul nib pag rogon ara yi manangem ni gur be’ ni ga ma unum nib pag rogon. Ma fare thin ni ‘dariy ban’en ni be yog laniyan’ ngak ni ke rin’ nib kireb’ e be yip’ fan ni ga ma fol ko pi motochiyel rok Jehovah. Yugu aram rogon ndawor mu flont, machane ba gapas lanin’um ya ba fel’ e tha’ u thilmew Got.

17. Uw rogon nrayog ni nge dag reb e walag ni pumoon nrayog ni ngan pagan’uy ngak u nap’an ni yibe ‘sikengnag’ ko ra bung rogon ko maruwel fa danga’? (1 Timothy 3:10; kum guy e sasing.)

¹⁷ Fare thin ni kan ‘sikengnag’ ko ra bung rogon ko maruwel e be yip’ fan ni kam dag nrayog ni ngan pag fan boch e maruwel ngom. Ere nap’an nra pi’ e piin piilal reb e maruwel ngom ni ngam rin’, mag tiyan’um ngam fol u rogon ni ka rogned ni ngam rin’, mu kum fol u rogon ni ke yog e ulung rodad ni ngan rin’ e re maruwel nem. Mu guy rogon ni ngam nang e n’en nib t’uf ni ngam rin’, nge ngiyal’ nsusun e ngam mu’nag e re maruwel nem. Faanra um rin’ e maruwel ni kan pi’ ngom u fithik’ e pasig, ma aram e rayog ni nge guy e girdi’ u lan e ulung e re n’ey me ga’ fan u wan’rad rogon e mon’og ni ga be tay. Gimed e piin piilal e ngam guyed rogon ni ngam skulnaged e pi walag ni pumoon ni kan taufenagrad. (Mu beeg e 1 Timothy 3:10.) Bay boch e walag ni ka yad ba pagel u lan e ulung romed ni kan taufenagrad ni bay e duw rorad u thilin e 10 i yan ko 14 ara ka yad bbitir boch, fa? Yad ma tedan’rad ko fol Bible ni yad ma tay ni yigoo yad, fa? Gubin ngiyal’ ni yad ma pi’ e fulweg u nap’an e muulung maku yad ma un ko machib, fa? Faanra arrogon, mi gimed pi’ boch e maruwel ngorad ni ngar rin’ed nib m’ag nga yangarrad nge rarogorad. Aray rogon nrayog ni ngan ‘sikengnag’ e pi walag ney ni ka yad ba pagel ko ra bung rogorad ko maruwel fa danga’. Ma nap’an ni bay e duw rorad u thilin e 17 nge 19, ma dabisiy nrayog ni nge bung rogorad ni ngar manged boch e ministerial servant.

18. Mang e be yip’ fan fare thin ni “dariy ban’en ni yibe yog ni kar rin’ed nib kireb”?

¹⁸ Fare thin ni “dar mulgad ko sikeng [“dariy ban’en ni yibe yog ni kar rin’ed nib kireb,” NW]” e be yip’ fan ndariy tapgin ni nge yog be’ ni bay ban’en nib kireb ni kam rin’. Riyul’ nrayog ni ngan t’ar e thin nga daken e piin Kristiano. Nni t’ar e thin nga daken Jesus, miki yog ni ku aray e n’en yira rin’ ngak pi gachalpen. (John 15:20) Machane faanra bbeech e ngongol rom ni bod Jesus, ma ra fel’ thim u lan e ulung.​—Matt. 11:19.

19. Mang e be yip’ fan ni nge par reb e pumoon “ni taareb e ppin rok”?

¹⁹ “Thingari par ni taareb e ppin rok.” Faanra gab mabgol, ma thingar mu fol ko yaram ko mabgol ni ngongliy Jehovah aram ko som’on ni aram e taareb e pumoon nge taareb e ppin ni ngar mabgolgow. (Matt. 19:​3-9) Reb e pumoon ni Kristiano e susun e dabi un ko ngongol ndarngal. (Heb. 13:4) Machane bay ban’en ni kub muun ko re n’ey. Thingar mu par ni gab yul’yul’ ngak leengim ma dariy ba ngiyal’ ni ngam adag yugu reb e ppin.​—Job 31:1.

20. Uw rogon ni nge ayuweg be’ nib pumoon girdien e tabinaw rok “nib fel’ rogon”?

²⁰ “Nge yog ni gagiyegnag e bitir rok nge girdien e tabinaw rok nib fel’ rogon.” Faanra gur lolugen reb e tabinaw, ma thingar mu tiyan’um ko maruwel nib milfan ngom. Um ted chon e tabinaw rom e fol Bible ni tabinaw ni gubin ngiyal’. Um machibgad leengim nge pi fakam u taabang u gubin yay nrayog. Mu ayuweg pi fakam ni nge fel’ e tha’ u thilrad Jehovah. (Efe. 6:4) Be’ nib pumoon ni ma ayuweg e tabinaw rok e be m’ug riy nrayog ni nge ayuweg e ulung.​—Mu taarebrogonnag ko 1 Timothy 3:5.

21. Mang e rayog ni ngam rin’ ni faanra dawor mmang reb e ministerial servant?

²¹ Gimed e pi walag ni pumoon e faanra dawor mmanged boch e ministerial servant, ma aram e ngam filed e re article ney nib fel’ rogon mi gimed yibilay murung’agen e re n’ey ngak Jehovah. Mu filed murung’agen e pi fel’ngin nthingari yag ngak be’ me bung rogon ni nge mang reb e ministerial servant, mi gimed athamgil u rogon nrayog romed ni nge yag e pi fel’ngin nem ngomed. Mu lemnaged gelngin nib t’uf Jehovah nge pi walagmed romed. Mu guyed rogon ni ngarim adaged ni ngam rin’ed boch ban’en ni fan ngorad. (1 Pet. 4:​8, 10) Gimed ra guy rogon ni ngam manged boch e ministerial servant, mab gel e felfelan’ ni gimed ra tay u nap’an ni gimed be rin’ boch ban’en ni fan ko pi walag u lan e ulung. Ere manga yigi tow’athnagmed Jehovah ko athamgil ni gimed be tay ni ngam manged boch e ministerial servant!​—Fil. 2:13.