FAANRA kam mada’nag Dianaa ma ga ra nang ni ir be’ nib llowan’, mab gol, ma baadag ni ma chag ngak yugu boch e girdi’. Yugu aram rogon ni gowa be m’ug nib felfelan’, machane bin riyul’ riy e yugu ma par nrib kireban’. I yog ni gaar: “Gubin e rran ni gu ma athapeg ni manga yug gum’, ya ba mich u wan’ug nra fel’ boch e par u fayleng ni faanra da gu moy.”

I yog Diana ndabi li’ ir nge yim’. Machane, bay yu ngiyal’ ni ma lemnag ndariy fan ni ngki par nib fos. Miki gaar: “Gu ma athapeg ni nge buch ban’en rog nggum’. Gu ma changar ngay ni yam’ e fager rog, ma gathi toogor rog.”

Boor e girdi’ ni yad ma lem ni bod rogon Diana, maku bay boch i yad ni kar lemnaged ara kar gayed rogon ni ngar lied yad ngar m’ad. Girdi’ ni yad ma fil murung’agen e re n’ey e ka rogned ni yooren ko pi girdi’ nem ni yad ma guy rogon ni ngar lied yad e gathi yad be rin’ e re n’em ni bochan e yad baadag ni ngar museged e yafos rorad, ya kemus ni yad baadag ni ngar chuwgad u fithik’ e gafgow. Pi girdi’ ney e ba mich u wan’rad ni bay fan ni ngar m’ad. Machane bin riyul’ riy, e thingar ra nanged ndariy tapgin ni ngar m’ad.

Ere, mang fan ni ngki ulul e yafos rom? Baaray dalip i fan.

Ba ga’ ni yima yog ni faanra li’ be’ ir nge yim’, ma aram rogon nrayog ni ngan “pithig e magawon rok.” Machane, mus ko magawon ni gad be lemnag ndabiyog i pithig e bay e puf riy. Bin riyul’ riy e, rayog ni nge thil boch ban’en nge fel’.​—Mu guy fare kahol ni kenggin e “Ke Thil Boch Ban’en Ko Yafos Rorad.”

Mus ni faanra dabi buch e re n’ey, mab fel’ ni ngam gay rogon i pithig e magawon rom ni buchuuw ma buchuuw. I yog Jesus ni gaar: “Dabi magafan’med nga rogomed gabul; ya ba gaman e tin nra magafan’uy ngay ni ba’ riy. Dariy fan ni ngku ni puthuy boch e magafan’ ko magafan’ ni be fek e yu rran i yib.”​—Matthew 6:34.

Machane, uw rogon ni faanra dabi thil boch ban’en? Ni bod ni faanra bay ba mit e m’ar rom nib mo’maw’ ni nge chuw, ara ke chuw e en mabgol rom, fa ke yim’ be’ nib t’uf rom.

Faanra ke buch boch ban’en rom ni aray rogon, maku bay ban’en ni ku rayog ni ngam thilyeg, ni aram e: rogon ni ga be lemnag fare magawon. Ga ra nang rogon ni nge fel’ u wan’um e pi n’en ndabiyog ni ngam thilyeg, ma aram e ga ra nang rogon ni nge puluw e lem rom u boch ban’en. (Proverbs 15:15) Ngam gay boch e kanawo’ u rogon ni ngam athamgil u fithik’ e magawon rom ko bin ni ngam lemnag ni ngam liem nga mum’. Mang angin nra yib ngom? Yugu aram rogon ndabiyog ni ngam chuweg fare magawon, machane rayog ni ngam gagiyegnag rogon ni ga be lemnag.​—Job 2:10.

DAB MU PAGTALIN E RE N’EY: Dabiyog ni ngam furuy em ni taab yay ma kam taw nga peebgul bburey; machane faan ga ra athamgil ngam furuy em ni boor yay, mab mudugil ni ga ra taw nga peebgul fare burey. Re n’ey e taareb rogon ko pi magawon nib mo’maw’ ni gad ma mada’nag.

N’EN NRAYOG NI NGAM RIN’ E NGIYAL’ NEY: Mu weliy e magawon rom ngak e fager rom ara reb e girdi’ u lan e tabinaw rom. Dabisiy nrayog ni nge ayuwegem ni ngam lemnag fare magawon rom ko bin nib fel’ e kanawo’.​—Proverbs 11:14.

Rayog ni ngam lemnag ni kab fel’ ni nga mum’ ni faanra ga be lemnag ndakuriy ban’en nrayog ni ngam rin’ ni ngam thilyeg rarogon e magawon rom. Machane, baaray boch e kanawo’ nrayog ni ngan ayuwegem riy.

Meybil. Gathi kemus ni ngam meybil ni bochan ni nge fel’ lanin’um; ara ngam meybil ni bochan ni dakuriy ban’en ni ka rayog ni ngam rin’ me fel’ e tafinay rom. Meybil ni ga ma tay e aram e ga be non ngak Jehovah Got, ni ir e en ni ma runguyem. Baadag Jehovah ni nga mog e n’en ni bay u lanin’um ngak. Bin riyul’ riy e be yog e Bible ni gaar: “Mu pi’ e gilab rom ngak Somol, ma bayi n’ufegem; dariy e ngiyal’ nra pag e piin yul’yul’ ngar meewargad.”​—Psalm 55:22, BT.

Mang fan ndab mu non ngak Got u daken e meybil? Mu fanay fithingan Jehovah, mag weliy e n’en ni bay u lanin’um ngak. (Psalm 62:8) Baadag Jehovah ni ngam chugur ngak ni bod reb e fager. (Isaiah 55:6; James 2:23) Meybil e aram reb e kanawo’ nrayog ni ngam non ngak Got riy ni yugu demtrug ngal’an nge gi n’en ni ga bay riy.

Piin ni yad ma lemnagem. Ku bay boch e girdi’ ni yad ma lemnag rarogom, nib muun ngay girdien e tabinaw rom ara pi fager rom. Girdi’ ni ku yad ma lemnagem e kub muun ngay e piin ndawor mu mada’nagrad ba ngiyal’. Bod ni yu ngiyal’ u nap’an ni be machib e Pi Mich Rok Jehovah ma yad ma pirieg e piin ni kari kireban’rad, ma bay boch e pi girdi’ ney ni yad ma yog ni ke t’uf e ayuw rorad ma kar lemnaged ni ngar lied yad ngar m’ad. Bochan e machib u mit e tabinaw, ma ke yag rok e Pi Mich Rok Jehovah ni ngar ayuweged e pi girdi’ ney. Bochan ni yad ma folwok rok Jesus ma aram fan nib t’uf e girdi’ rorad. Maku yad ma lemnagem.​—John 13:35.

Piin rayog ni ngar pied e ayuw. Girdi’ ni yad ma lemnag ni ngar lied yad ngar m’ad e ba ga’ ni bay ban’en ni ke buch rorad ni ke k’aringrad ni nga yugu ra pired nib kireban’rad. Faanra bay e biney e magawon rom, ma dab mu tamra’ ngay ni bod rogon ni faanra bay ba mit e m’ar u fithik’ i dowam, ma dab mu tamra’ ni nga mog. Bin riyul’ riy e, bay boch e girdi’ nib llowan’ ni ka rogned ni kireban’ e bod e “m’ar ni misilpig.” Yugu demtrug be’ nrayog ni nge af e misilpig ngak, machane rayog ni ngan tafalaynag nge gol. Maku aram rogon e kireban’.a

DAB MU PAGTALIN E RE N’EY: Ba ga’ nnap’an nra yib e kireban’ ngom nib gel, ma dabiyog ni ngam gel ngay ni yigoo gur. Machane, faanra bay be’ nrayog ni nge ayuwegem, ma rayog ni ngam gel ngay.

N’EN NRAYOG NI NGAM RIN’ E NGIYAL’ NEY: Rayog ni ngam gay reb e togta ni ma ayuweg e piin ni kari kireban’rad.

Be tamilangnag e Bible ni yafos e ba “sug ko oloboch.” (Job 14:1, BT) Ngiyal’ ney e gubin e girdi’ ni yad ma mada’nag e magawon. Machane, bay boch e girdi’ ni yad ma lemnag ni gowa dakuriy e athap rorad, ni bod ni dabkiyog ni nge fel’ e par rorad boch nga m’on. Me gur, ga ma lem ni aray rogon, fa? Faanra arrogon, ma nge pagan’um, ya be weliy e Bible ni bay e athap ni gathi kemus ni fan ngom, ya ku fan ngak urngin e girdi’. Bod ni:

• Be fil e Bible ngodad ni bay boch ban’en nib fel’ ni ke lemnag Jehovah Got ni fan ngodad.​—Genesis 1:28.

• Ke micheg Jehovah Got nra paradisnag e fayleng.​—Isaiah 65:21-25.

• Ba mudugil nra lebguy e n’en ni ke micheg. Ya be gaar e Revelation 21:3, 4:

  “Chiney e keb i par tafen Got nga fithik’ e girdi’! Bayi par rorad, ma bay ra manged girdien. Mi Got e bay i par rorad, mi ir e bayi mang Got rorad. Ma bayi n’ag urngin e lu’ u owcherad. Ma aram e dab ku unim’, ma dab ki i kireban’uy, ma dab ku un yor, ma dab ku un amith. Ya tin kakrom ban’en e ke chuw.”

Re athap ney e gathi ban’en ni dabi yib i riyul’. Ba m’agan’ Jehovah Got ngay ni nge rin’ e re n’ey, ma bay gelngin maku baadag ni nge rin’. Rayog ni ngan pagan’uy ko re athap ney ni bay u Bible, ma rayog ni ngan pirieg e fulweg riy ko fare deer ni gaar, “Mang fan ni ngki ulul e yafos rom?”

DAB MU PAGTALIN E RE N’EY: Rayog ni ngan taarebrogonnag lanin’um nga reb e bowoch ni bay u maday u nap’an nib gel e day, ma thin nu Bible ni bay e athap riy e bod ba yiluy nrayog ni nge ayuwegem ngam par ni gab mudugil.

N’EN NRAYOG NI NGAM RIN’ E NGIYAL’ NEY: Mu gay ko mang e be yog e Bible u murung’agen e athap ni fan ko gabul nge langlath. Pi Mich Rok Jehovah e yad ba felfelan’ ni ngar ayuweged gur. Rayog ni ngam non ngorad ara mman ko fare Web site rorad ni jw.org.a