Siro’ ko Flak, nge Towal, nge Lungun e Nam

Siro’ ko flak. Pi Mich Rok Jehovah e yad manang ni ngan siro’ ko flak u nap’an ni yibe yon’ e tang ko nam e aram e yibe liyor ko Nam ara pi tayugang’ riy ma gathi Got. (Isaiah 43:11; 1 Korinth 10:14; 1 John 5:21) Reb e pi tayugang’ nem e aram Nebukadnezzar ni Pilung nu Babylon kakrom. Re pilung nem e baadag ni nge nang e girdi’ feni tolang nge feni yul’yul’ ko teliw rok. Ere, ngongliy reb e liyos me yog ko girdi’ ni ngan siro’ ngay u nap’an nra chub e musik ni bod e tang ko nam. Machane, fa dalip i pagel ni Hebrew ni aram Shadrak, nge Meshak, nge Abednego e dar uned i siro’ ko re liyos nem ni yugu aram rogon ni yad manang ni yira li’rad ngar m’ad.​—Daniel, ko guruy ni 3.

I yoloy Carlton Hayes ni ir be’ ni ma yoloy e chep ni, ngiyal’ ney ni gad bay riy e “flak e aram e pow ko yul’yul’ nge liyor ko nam. Ma luf e piin pumoon e urwach u lolugrad u nap’an ni yibe girngiy e flak nga lang; maku bay boch e girdi’ ni yad ma yoloy boch e thin ni be n’uf e flak, ma piin bitir e yad ma yon’ boch e tang.” Miki yog ni yul’yul’ ko nam e ku bay “boch e rran riy nib thothup” nge “yungi n’en ni yima liyor riy ko nam” nge “pow ko nam.” U nap’an reb e madnom nni tay u Brazil, me yog e en nib tolang ko salthaw ni gaar: “Yima liyor ma yima tayfan e flak ni bod e Nam ni yima liyor ngay.” Miki yog reb e babyor ni gaar: “Flak e ba thothup ni bod e kuruth.”​—The Encyclopedia Americana.

Dawori n’uw nap’an ni ki yog e re ke babyor ney ni pi tang ni fan ko nam e “be dag e yul’yul’ ni fan ko nam ma ba ga’ ni yima uneg ngay e meybil ni yibe wenig ngak Got ni nge pow’iy me ayuweg girdien fare nam ara piin ni yad be gagiyegnag.” Gathi ke oloboch e pi tapigpig rok Jehovah ni yad be yog ni siro’ ko flak nge tang ko nam e bay rogon ko teliw. Bin riyul’ riy e nap’an ni be weliy reb e babyor murung’agen boch e bitir ko Pi Mich Rok Jehovah u Meriken ndarur siro’gad ko flak ara rogned boch e thin ni fan ko nam, me yog ni gaar: “Boor e oloboch ni kan pithig ko tin th’abi tolang e Tafen e Puf Oloboch ni ke gagiyel riy ni pi n’ey ni yima rin’ e bay rogon ko teliw.”​—The American Character.

Yugu aram rogon nder ma un e pi tapigpig rok Jehovah nga boch ban’en ni yima rin’ nde puluw ko Bible, machane darur darifannaged e piin ni yad ma un ngay. Ku darur darifannaged e flak ko nam ni bochan e yad manang ni aram e pow ko nam, maku yad manang ni pi “am ni bay” e yad e “tapigpig rok Got” ni yad be maruwel ni fan ngodad. (Roma 13:1-4) Ere, Pi Mich Rok Jehovah e yad ma fol ko fare thin ni be yog ni ngad “meybilgad ni fan ngak e pi pilung nge urngin e girdi’ ni yad be tay murung’agen e girdi’.” Machane, fan ni gad ma rin’ e pi n’ey e bochan e “nge yog nda pired u fithik’ e mocha’ nge gapas, ni gadad be liyor ngak Got ma ba fel’ pangidad.”​—1 Timothy 2:2.

Towal. Tin riyul’ e Kristiano e yad ma tayfan mat’awun e girdi’ ni kar uned ko towal. Ma darur togopuluwgad ko towal ni yima tay, maku yad ma tayfan e piin ni kan towaliyrad ni nga rogned e thin. Machane, yad ma par u mathilin ngongolen e am. (Matthew 22:21; 1 Peter 3:16) Ere, mang e thingari rin’ e piin Kristiano ko pi nam ni thingari un gubin e girdi’ riy ko towal fa ra damumuw e girdi’ riy ni faanra dabi un be’ ko gin ni ngan towal riy? Sana rayog ni nge dugliy reb e Kristiano ni nge yan ko gin ni yibe towal riy ni faanra pag e nangan’ rok ni bod e n’en ni rin’ Shadrak, nge Meshak, nge Abednego. Machane, susun ndabi rin’ ban’en ni nge m’ug nder par u mathilin ngongolen e am. Susun ni nge fal’eg i lemnag e re nel’ i kenggin e motochiyel ni baaray:

1. Pi gachalpen Jesus e gathi yad e “girdi’ nu fayleng.”​—John 15:19.

2. Piin Kristiano e yad owchen Kristus nge Gil’ilungun.​—John 18:36; 2 Korinth 5:20.

3. Ulung ni Kristiano e ba taareb e michan’ rorad, ma girdi’ riy e t’ufeg e ke chugumiyrad nga taabang.​—1 Korinth 1:10; Kolose 3:14.

4. Piin ni yad ra towaliy be’ e kub milfan ngorad e n’en nra rin’ facha’.​—Mu tay fanam i yan u fan fapi thin ni bay ko 1 Samuel 8:5, 10-18 nge 1 Timothy 5:22.

5. Bochan ni baadag piyu Israel reb e pilung nib girdi’ ma aram fan ni kar darifannaged Jehovah.​—1 Samuel 8:7.

6. Thingari puf rogon e piin Kristiano ni ngar weliyed murung’agen Gil’ilungun Got ko girdi’ nib thilthil e lem rorad u murung’agen e am.​—Matthew 24:14; 28:19, 20; Hebrews 10:35.

Lungun e nam. U boch e Nam e piin ni yad ra siyeg ni ngar uned ko salthaw e bay boch ban’en ni fan ko nam nthingar rin’ed ni bay n’umngin nap’an. Faanra kad mada’naged ban’en ni aray rogon ma susun ni ngad yibilayed murung’agen, ma gad ning e ayuw ngak reb e Kristiano ni ke ilal ko tirok Got ban’en, ngemu’ ma gad dugliy e n’en ni ngad rin’ed nrogon ni be yog e nangan’ rodad.​—Proverbs 2:1-5; Filippi 4:5.

Be yog e Bible ngodad ni ngad ‘folgad rok e piin ni pilung nge piin ni yad be tay murung’agen e girdi’, ma gad rin’ e tin ni yad be yog, ma gad par ni ngad rin’ed urngin e tin nib fel’. . . . ma gubin ngiyal’ ni ngad sumunguygad.’ (Titus 3:1, 2) Ere, rayog ni ngad fithed gadad ni nge lungudad: ‘Faan gu ra rin’ e re maruwel ney ma ra m’ug riy nda ku gur par u mathilin ngongolen e am fa k’aringeg ni nggu un nga boch ban’en ko teliw ni googsur, fa?’ (Mikah 4:3, 5; 2 Korinth 6:16, 17) ‘Faan gu ra rin’ e re maruwel ney ma ra mo’maw’ ngog ni nggu rin’ e n’en nib milfan ngog ni gag reb e Kristiano fa ra talegneg ndab gu rin’?’ (Matthew 28:19, 20; Efesus 6:4; Hebrews 10:24, 25) ‘Ma gu ra un ko re maruwel ney, ma rayog ni nggu yoornag boch ban’en ni gu be rin’ ni fan ko pigpig ni gu be tay ni bod ni nggu un ko machib u polo’ e tayim, fa?’​—Hebrews 6:11, 12.

Ere, faanra ke fal’eg i lemnag reb e Kristiano ma ke dugliy ni nge un nga lungun e nam ko bin ni nge yan nga kalbus, ma tin ka bay e Kristiano e susun ni ngar ted fan e n’en ni ke dugliy. (Roma 14:10) Machane, faanra ke lemnag ndabiyog rok e pi maruwel ney, ma susun ni ngkun tayfan e n’en ni ke dugliy.​—1 Korinth 10:29; 2 Korinth 1:24.