Uw urngin e Pi Mich Rok Jehovah ni ga manang? Boch i gamad e buguli yoror rom, ara piin ni gimed ma maruwel u taabang, ara piin ni gimed nga skul. Fa reb e kug weliyed e thin nu Bible ngom. Ere, uw rarogomad, ma mang fan ni gamad ma weliy ko girdi’ e n’en nib mich u wan’mad?

Taareb rogomad ko yug girdi’. Gamad gubin nib thilthil rarogomad. Boch i gamad e i un nga reb e teliw nib thil kafram, ma boch i gamad e immoy nde mich Got u wan’. U m’on ni nggu manged e Pi Mich Rok Jehovah, ma kug filed e machib nu Bible nib fel’ rogon. (Acts 17:11) Ke m’agan’mad ko pi n’en ni kug filed, ma kug dugliyed ni nggu pigpiggad ngak Jehovah Got.

Ma yib angin ngomad e fol Bible ni gamad ma tay. Taareb rogomad ngak urngin e girdi’ ni ma yib e magawon ngomad yu ngiyal’, maku bay boch ban’en ni gamad ba meewar riy. Machane, bochan ni gamad ma athamgil ni nggu folgad ko pi kenggin e motochiyel nu Bible, ma ke yag ni nge fel’ rogon e par romad. (Psalm 128:1, 2) Aram reb i fan ni gamad ma weliy ko girdi’ e pi n’en nib fel’ ni kug filed u Bible.

Pi n’en nib ga’ fan u wan’ Got e aram e pi n’en ni kub ga’ fan u wan’mad. Pi n’ey ni bay u lan e Bible e ba ga’ fan ko par romad, maku ma fil ngomad rogon ni ngaug ted fan boch e girdi’, nge rogon ni nga i m’ug boch i fel’ngimad ni bod rogon e yul’yul’ nge gol. Pi n’ey e ma ayuweg e girdi’ ni ngar pared nib fel’ fithik’ i dowrad, mab fel’ e ngongol rorad. Ku ma ayuweg chon e tabinaw ni ngar pared nib taareban’rad mab fel’ e ngongol rorad. Ba mich u wan’mad ni “gubin e girdi’ ma taareb rogorad u wan’ Got,” ere aram fan ni gamad bang u ba ulung i walag u ga’ngin yang e fayleng ni yugu aram rogon nib thilthil e nam nge am romad. Yugu aram rogon nib taareb rogomad ko yug girdi’, machane bay ban’en ko ngongol romad nib thil.​—Acts 4:13; 10:34, 35.

• Mang e taareb rogon ko Pi Mich Rok Jehovah nge yugu boch e girdi’?

• Mang boch ban’en nib ga’ fan ni ke fil e Pi Mich Rok Jehovah ko fol Bible ni yad ma tay?

Boor e girdi’ ni yad ma lemnag ni Pi Mich Rok Jehovah e fithingan reb e teliw ni kab beech. Machane, sogonap’an 2,700 e duw ni ke yan ma yima pining e pi “mich” ko pi tapigpig ko bin riyul’ e Got. (Isaiah 43:10-12) Un pining e Bible Students ara Piin ni Yad Ma Fil e Bible ngomad nge yan i mada’ ko duw ni 1931. Ere, mang fan ni kug mel’eged ni ngaun pining e Pi Mich Rok Jehovah ngomad?

Re ngachal ney e be gagiyelnag e Got romad. Bokum biyu’ yay ni immoy fithingan Jehovah u lan e pi babyor ko Bible kakrom. Boor ken e Bible ni kan piliyeg nga boor mit e thin ni kan chuweg e re ngachal ney riy kan tay boch e liw nga lon ni bod rogon e Somol ara Got. Machane, bin riyul’ e Got e ke tamilangnag ngak Moses ko ir mini’ u daken fithingan ni aram Jehovah, me yog ni gaar: “Ereray fithingag ni bay i par ndariy n’umngin nap’an.” (Exodus 3:15)a Ereray e kanawo’ ni ke gagiyelnag ir riy nib thil ngak yugu boch e got ni googsur. Gamad ba felfelan’ ni ngaug weliyed murung’agen fithingan Got nib thothup.

Re ngachal ney e be tamilangnag e maruwel nib milfan ngomad. Boor e girdi’ kakrom ni tabab rok Abel, nib mich Jehovah u wan’rad ma yad ba yul’yul’ ni ur weliyed ko girdi’ e pi n’en ni ke mich u wan’rad. U lan e pi chibog ni ke yan ma Noah, nge Abraham, nge Sarah, nge Moses, nge David, nge ku boch e girdi’ e kur manged boch e “pi girdi’ nem.” (Hebrews 11:4–12:1) Kug dugliyed ni nggu weliyed e tin riyul’ u murung’agen Got ngan nang ni bod rogon be’ ni ke yan nga kort ni nge micheg e n’en ni ke yog be’ nde kireb e rok.

Gamad be folwok rok Jesus. Be yog e Bible ni ir e “mich nib yul’yul’ ma ba riyul’.” (Revelation 3:14) I yog Jesus ni ir e ke ‘weliy murung’agen’ fithingan Got kan nang maku ir e ke ‘weliy e tin riyul’’ u murung’agen Got. (John 17:26; 18:37) Ere, tin riyul’ i gachalpen Jesus e thingar ra machibnaged fithingan Jehovah ngan nang. Ireray e n’en ni be rin’ e Pi Mich Rok Jehovah.

• Mang fan ni mel’eg e Piin ni Yad Ma Fil e Bible ni ngaun pining e Pi Mich Rok Jehovah ngorad?

• Ke uw n’umngin nap’an ni bay e pi mich rok Jehovah u fayleng?

• Mini’ e bin th’abi fel’ e Mich rok Jehovah?

Ke yiiynag e Bible ni tomuren nra yim’ Kristus ma ra sum boch e tamachib ni googsur u fithik’ e pi Kristiano kakrom mar thilyeged fan e tin riyul’ u Bible. (Acts 20:29, 30) Munmun, ma aram e n’en ni buch. Kar athukuyed e machib ko piin ni yad ma meybil nga boch e got ni googsur ko machib rok Jesus, ma aram e n’en ni rin’ me sum e teliw ko pi Kristiano ni googsur. (2 Timothy 4:3, 4) Ere, uw rogon ma gad nang nrib puluw e n’en ni gad be fil u Bible e ngiyal’ ney?

Ke taw nga nap’an ni nge gagiyelnag Jehovah e tin riyul’. Ke yiiynag nra taw ko tin tomuren e rran ma ra “ga’ e llowan’ i yan.” (Daniel 12:4) Nap’an e duw ni 1870, ma immoy boch e girdi’ ni ur gayed e tin riyul’ nra nanged ni boor e machib ko pi yurba’ i teliw nde puluw ko Bible. Ere, ra tababgad i gay e tin nriyul’ u Bible, me ayuwegrad Jehovah ni ngar nanged fan.

Boch e pumoon ni yad ba yul’yul’ e kar filed e Bible. Pi girdi’ nem ni ka nog e Bible Students ngorad ara Piin ni Yad Ma Fil e Bible e ra fanayed reb e kanawo’ ko fol Bible ni bod rogon ni gamad ma rin’ e ngiyal’ ney. Ur weliyed e pi thin nu Bible ni reb nge reb. Ma nap’an ni yad ra pirieg reb e thin nu Bible nib mo’maw’ ni ngar nanged fan, mi yad gay yugu boch e thin nu Bible ni nge tamilangnag fan u wan’rad. Ma nap’an nra taareb fan fare thin nu Bible u wan’rad nrogon nib puluw ko tin ni ka bay e thin nu Bible, mar yoloyed nga but’. Bochan ni kar paged e thin ko Bible ni nge tamilangnag e tin nib riyul’, ma aram fan ni ke yag ni ngar nanged e tin riyul’ u murung’agen fithingan Got, nge Gil’ilungun, nge n’en nib m’agan’ ngay ni fan ko girdi’ nge fayleng, nge rarogon e piin ni kar m’ad, nge athap ko piin ni kar m’ad. Pi n’en ni kar pirieged e ke ayuwegrad ni nge dab kur manged sib ko machib ni googsur nge boch e ngongol nib kireb.​—John 8:31, 32.

Nap’an ni taw ko duw ni 1879, ma ke tamilang u wan’rad ni ke taw nga nap’an ni nge garer e tin riyul’. Ere, nap’an e re duw nem mi yad tabab i ngongliy fare ke babyor ni ka gamad ma ngongliy e chiney ni kenggin e Wulyang ko Damit Ni Be Weliy Morngaagen Gil’ilungun Jehovah. Ngiyal’ ney e ke gaman 240 e nam ma kub pag 750 mit e thin ni gamad be weliy e tin riyul’ u Bible riy ko girdi’. Dariy ba ngiyal’ ni ke garer e bin riyul’ e tamilangan’ ni bod rogon e ngiyal’ ney!

• Mang e buch ko tin riyul’ u Bible u tomuren ni yim’ Kristus?

• Mang e ke ayuwegmad ni ngkug pirieged e tin riyul’ ko Thin rok Got bayay?

Boor e duw ni i fanay, ma be fal’eg, ma be wereg e Pi Mich Rok Jehovah boor ken e Bible nib thilthil. Machane, kug guyed nib t’uf ni ngan fal’eg ba ken e Bible nib beech nra ayuweg e girdi’ ni nge yag ni “ngar nanged e tin nib riyul’” ni aram e n’en nib m’agan’ Got ngay. (1 Timothy 2:3, 4) Ere, nap’an e duw ni 1950 mu gu tababgad i fal’eg fare New World Translation. Re ke Bible ney e kan piliyeg nga boor ko 130 mit e thin nib fel’ rogon mab puluw.a

Ba t’uf reb e Bible nib mom ni ngan nang fan e thin riy. Ra yan boor e duw ma be thil e thin, ma boor ken e Bible ni kan piliyeg nib mo’maw’ ni ngan nang fan e thin riy. Maku boor e babyor nib puluw ko yu ken nsom’on e babyor ko Bible ni thin ni Hebrew, nge Aramaic, nge Greek ni kan piliyeg e thin riy ya nge yag ni ngan nang fan.

Ba t’uf ba ken e Bible nib puluw ko thin rok Got. Piin ni yad ma piliyeg e Bible e ba t’uf ni ngar yul’yul’gad ngar pilyeged e thin riy nib puluw ko tin som’on e babyor. Machane, yooren ken e Bible ni kan pilyeg e kan chuweg fare ngachal ni Jehovah riy.

Ba t’uf ba ken e Bible ni be pining e sorok ngak e en ni thin rok e bay riy. (2 Samuel 23:2) Sogonap’an 7,000 yay ni immoy fithingan Jehovah ko yu ken som’on e babyor ko Bible ni be m’ug yaan aray u but’, ma kan sulweg kan tay ko fare Bible ni New World Translation. (Psalm 83:18) Bochan ni boor e duw ni kan fal’eg i gay murung’agen e thin riy, ma aram fan ni ke yan i aw e re ke Bible ney nrib fel’ e thin riy, ya be tamilangnag rogon e lem rok Got. Demtrug ko bay fare Bible ni New World Translation ko thin rom fa dariy, ma gamad be pi’ e athamgil nga lanin’um ni ngaum beeg e thin rok Jehovah ni gubin e rran.​—Joshua 1:8; Psalm 1:2, 3.

• Mang fan ni kug dugliyed nib t’uf ni ngan piliyeg ba ken e Bible?

• Faanra baadag be’ ni nge nang e n’en nib m’agan’ Got ngay, ma mang e ba t’uf ni nga i rin’ ni gubin e rran?