Boor e girdi’ e kar talgad ni dakurur uned ko pi muulung ni ma tay e teliw rorad ni bochan e der yag ni ngar pirieged e fulweg ko pi deer rorad nib ga’ fan ara der yog ni nge fel’ lanin’rad. Ere, mang fan ni susun e ngam un ko muulung ko Pi Mich Rok Jehovah? Mang e ga ra pirieg u nap’an ni ga ra un ngay?

Ga ra felfelan’ ni ngam chag ko piin ni yad ma t’ufeg e girdi’. Nap’an e bin som’on e chibog, ma immoy e ulung ni Kristiano ni kan yarmiy, ma pi ulung nem e yad ma muulung nga taabang ni fan e ngar pigpiggad ngak Got, ma yad be fil e thin u lan e babyor nib thothup, ma yad be pi’ e athamgil nga lanin’rad. (Hebrews 10:24, 25) Bochan ni bay e t’ufeg u thilrad, ma bod ni yad bay u fithik’ e tin riyul’ e fager, ni aram e pi walagrad ni taareb e michan’ rorad. (2 Thessalonika 1:3; 3 John 14) Ku aram e n’en ni gamad ma rin’, maku gamad ma felfelan’ ni bod yad.

Ga ra fil rogon ni ngam fol ko pi kenggin e motochiyel nu Bible me yib angin ngom. Gamad ma muulung ni pumoon, nge ppin, nge bitir nga taabang ni bod ni un rin’ kakrom. Ma bay boch e girdi’ ni boor ban’en u lan e Bible ni kar nanged ni yad ma fanay e thin riy ni ngar ayuweged gamad u rogon ni nggu fanayed e pi kenggin e motochiyel riy ko par romad u reb e rran ngu reb. (Deuteronomy 31:12; Nehemiah 8:8) Gubin e girdi’ nrayog ni ngar pied e fulweg, maku rayog ni ngar uned ko tang ni yima tay, ya pi n’ey e ma ayuwegmad ni nggu weliyed murung’agen e athap romad.​—Hebrews 10:23.

Ra gel e michan’ rom ngak Got. I non apostal Paul nga reb e ulung kakrom ni gaar: “Ri gub adag ni nggub gguymed,. . . n’en ni gu be lemnag e ra fel’ rogomed riy, ma er rogon gag nra fel’ rogog riy ni baaray rogon: ra fel’ rogomed ko michan’ rog ma ra fel’ rogog ko michan’ romed.” (Roma 1:11, 12) Chag ni gamad ma tay e piin ni taareb e michan’ romad u nap’an e pi muulung ni gamad ma tay e ma gelnag e michan’ romad, ma ma ayuwegmad ni nggu pared nib mudugilan’mad ni ngaug ngongolgad ni gubin ngiyal’ ni bod rogon e piin Kristiano.

Mang ndab mub ngam un ko bin migid e muulung romad, mag guy e pi n’ey? Ba puf mat’awum nrayog ni nga mub. Gubin e muulung ndariy e mokun salpiy riy.

• Mini’ e piin ni gamad ma folwok rorad u rogon ni kan yarmiy e muulung romad?

• Faanra ud uned ko pi muulung ni Kristiano, ma uw rogon nra yib angin ngodad?

Mus ni faanra nggu milekaggad u lan e loway nib palog ara ba kireb e yafang, ma gamad ma athamgil ni nggu uned ko pi muulung ko Kristiano ni gubin ngiyal’. Mang fan ni ma athamgil e Pi Mich Rok Jehovah ni ngaur muulunggad nga taabang ni yugu aram rogon ni boor e magawon rorad ara kar magargad ko maruwel?

Ma yib angin ngomad. Nap’an ni be weliy Paul murung’agen e piin ni yima chag ngorad u lan e ulung, me yog ni gaar: “Nge bagadad ma ngi i lemnag bagadad.” (Hebrews 10:24) Pi thin ney e be yip’ fan ban’en ni “ngan fal’eg i lemnag” ni aram e ngan athamgil ni nge be’ me dag ni be lemnag yugu boch e girdi’. Ere, thin ni yog apostal Paul e be pi’ e athamgil nga lanin’dad ni ngaud lemnaged yugu boch e girdi’. Faan gad ra gay rogon ni ngad nanged boch i chon e tabinaw ni Kristiano, ma gad ra nang ni ku bay boch i yad ni kar mada’naged boch e magawon ni taareb rogon ko magawon rodad ma kar athamgilgad kar gelgad ngay, maku rayog ni ngar ayuweged gadad u rogon ni ngad gelgad ko pi magawon rodad.

Ma ayuwegmad ni ngari fel’ e tha’ u thilmad. Girdi’ ni gamad ma chag ngorad u nap’an e pi muulung romad e gathi kemus ni bogi girdi’ ni gamad manangrad, ya ku yad e fager romad nrib fel’ e thin romad. Ku bay yu ngiyal’ ni gamad ma rin’ boch ban’en u taabang ni nge chuweg e chalban romad ma be pi’ e athamgil nga lanin’mad. Mang angin e pi n’ey ngomad? Gamad ma fil rogon ni nge ga’ fan e pi walagmad u wan’mad, ma re n’ey e ma gelnag e t’ufeg u thilmad. Ma nap’an nra mada’nag bagamad e magawon, ma gamad ma gur ni nggu ayuweged ni bochan e rib fel’ e tha’ u thilmad. (Proverbs 17:17) Chag ni gamad ma tay pi walagmad u lan e ulung e ma m’ug riy ni gamad ma ‘ayuweged’ gamad.​—1 Korinth 12:25, 26.

Gamad be pi’ e athamgil nga lanin’um ni ngam mel’eg e piin ni yad be rin’ e tin nib m’agan’ Got ngay ni ngar manged fager rom. Ga ra pirieg e fager ni aram rogon u fithik’ e Pi Mich Rok Jehovah. Ere, wenig ngom, dab mu pag ban’en ni nge talegem ni nge dab um chag ngomad.

• Mang fan nib fel’ ni ngaun chag u taabang u nap’an e pi muulung?

• Wuin e ga baadag ni ngam nang boch ban’en u murung’agen e ulung romad?

Pi muulung ni i tay e pi Kristiano kakrom e ba ga’ ni yima tang riy, ma yima meybil, ma yima beeg ma yibe weliy e thin u lan e Babyor nib Thothup. (1 Korinth 14:26) Ku aray rogon e yaram ko muulung ni gamad ma tay e ngiyal’ ney.

Pi n’en ni yima weliy riy e ba puluw ko Bible ma rayog ni ngad fanayed nga lan e yafas rodad. Nap’an e Madnom ara Sabado ma ra reb e ulung ma ma mada’ nga taabang ni ngar motoyilgad nga reb e Welthin ni Fan ko Yoor ni 30 e minit n’umngin nap’an ni be weliy rogon nra ayuwegdad e Thin nu Bible nge rogon nib puluw ko ngiyal’ ni gad be par riy. Yima pi’ e athamgil nga laniyan’ urngin e girdi’ ni ngar yaliyed e pi thin nu Bible ni yibe beeg u nap’an e welthin. Tomuren e welthin, ma bay e Fol “Wulyang ko Damit” ni yima tay u lan reb e awa. Gubin e girdi’ u lan e ulung nrayog ni ngar pied e fulweg rorad ko re article ni yibe fil u lan Fare Wulyang ko Damit. Pi n’en ni yima fil riy e ra ayuwegdad u rogon ni ngad fanayed e fonow nu Bible nga lan e yafas rodad. Taareb rogon e n’en ni gamad ma fil ko pi ulung romad u ga’ngin yang e fayleng ni ke pag 110,000 urngin u gubin.

Ma ayuwegmad ni nggu mon’oggad u rogon ni gamad ma fil ban’en ko girdi’. Ku gamad ma mada’ nga taabang u reb e rran u lan e wik ni fan nga reb e muulung ni dalip guruy ni kenggin e Pi N’en ni Ma Rin’ e Piin Kristiano nge Machib ni Yad Ma Tay. Pi n’en ni yima fil ko re muulung ney e ba puluw ko pi n’en ni bay ko fare Babyor ni Fan ko Muulung ni yima ngongliy u gubin e pul. N’en ni yima fil nsom’on e bay u tan fare thin ni kenggin e, Boch e Thin nib Ga’ Fan ko Thin rok Got. Re n’ey e ma ayuweg e ulung ni nge tamilang u wan’rad bang ko Bible ni kar beeged u m’on riy. N’en ni migid ni yima rin’ u nap’an e re muulung ney e bay u tan fare thin ni kenggin e, Pi N’en Nrayog ni Ngam Rin’ u Nap’an e Machib. Ba ga’ ni yima yan u yaan rogon ni ngan weliy e thin nu Bible ko girdi’ u nap’an e machib. Bay reb e walag ni pumoon ni ir e ma yaliy e piin ni yad be pi’ e pi welthin ney ya nge yag ni ayuwegrad u rogon ni ngar mon’oggad ko beeg babyor nge welthin. (1 Timothy 4:13) N’en ni tomur ni yima rin’ e bay u tan fare thin ni kenggin e, Pi N’en ni Ma Rin’ e Piin Kristiano. Ba ga’ ni yima weliy riy rogon ni ngad folgad ko pi kenggin e motochiyel u Bible u reb e rran ngu reb. Ku yima fith boch e deer nrayog ni ngan pi’ e fulweg riy nra ayuweg e ulung ni ngari tamilang e Bible u wan’rad.

Nap’an ni ga ra un ko pi muulung ni gamad ma tay, ma dabisiy ni ga ra gin nga feni fel’ rogon ni yibe fil e Bible ko girdi’.​—Isaiah 54:13.

• Mang boch ban’en nrayog ni ngam rungag u nap’an ni ga ra un ko pi muulung ni ma tay e Pi Mich Rok Jehovah?

• Bin ngan e muulung ni gamad ma tay e ga baadag ni ngam un ngay ko migid?

Kam guy rogon feni yaram e munmad ni ke tay e Pi Mich Rok Jehovah ko pi sasing ni baaray u nap’an ni nga ranod ko muulung? Mang fan ni gamad ma guy rogon ni ngaug munmadgad nib fel’ rogon mab yalen?

Nge m’ug ni gamad be tayfan e Got romad. Riyul’ ni gathi kemus ni yaadad e ma sap Got ngay. (1 Samuel 16:7) Machane, nap’an ni gamad ra muulung nga taabang ni nggu liyorgad ngak Got, ma gamad baadag ni nge m’ug ni gamad be tayfan, maku gamad be tayfan e piin ni gamad ma pigpig u taabang. Faanra nga darod da guyed reb e pilung ara president, ma dabisiy ni gad ra munmad nib fel’ rogon ni bochan e gad baadag ni ngad ted fan e liw rok. Ere, rogon yaamad ni gamad ma un ko muulung e be dag rogon ni gamad be tayfan fare “pilung ko urngin e nam” ni aram Jehovah Got, nge tagil e liyor romad ngak.​—Jeremiah 10:7, BT.

Be m’ug riy e n’en nib ga’ fan u wan’mad. Be pi’ e Bible e athamgil nga laniyan e piin Kristiano ni ‘ngar gonopiyed rogon e mad rorad nge yan i par nib fel’ rogon, mi yad yin’ e mad nrogon yalen e munmad.’ (1 Timothy 2:9, 10) Ra ngan munmad ni “rogon yalen e munmad” ma be yip’ fan ni ngan chuw ko mad nib fel ma gathi kaygi k’ad nga dowey, ara ra karing e ar’ar nib kireb nga laniyan’ boch e girdi’. Maku reb e bochan ni gamad ma ‘gonopiy rogon e mad’ romad ma ma ayuwegmad ni nggu mel’eged e mad nib yalen ni nggu chuwgad ngay. Re kenggin e motochiyel ney e be dag nrayog ni nge be’ me mel’eg e miti mad ni baadag ni nge chuw ngay nib yalen. Ere, yug ra dawor gogned ko thin romad ma rogon e munmad romad e rayog ni nge ‘girngiy e fel’ ko machib ni murung’agen Got’ min pining e “sorok” ngak. (Titus 2:10; 1 Peter 2:12) Bochan nib yalen rogon e munmad ni gamad ma tay u nap’an ni nggu warod ko muulung, ma ma rin’ ban’en nga rogon ni ma lemnag boch e girdi’ e pigpig ni gamad ma tay ngak Jehovah.

Dab mu pag e munmad rom ni nge talegnem ndab mub ko muulung nga Kingdom Hall. De t’uf ni nge tolang puluwon e mad ni ngad chuwgad ngay ara nge pag feni fel’ yaan, ya n’en nib ga’ fan e ngad chuwgad ko mad nib yalen, mab beech, mab fel’ u p’eowchen e girdi’.

• Uw feni ga’ fan e munmad rodad u nap’an ni gad be liyor ngak Got?

• Mang boch i kenggin e motochiyel nra ayuwegdad u rogon e munmad ni gad ma tay nge rogon ni gad ma fal’eg yaadad?

Faanra gimew be fil bagayad e Pi Mich Rok Jehovah e Bible, ma dabisiy ni ga ma fal’eg rogom u m’on riy. Kub fel’ ni ngam rin’ e re n’ey u m’on ni ngam un ko muulung ni bochan e ra yib angin ngom. Faan gad ra athamgil ni ngaud rin’ed e re n’ey ni gubin ngiyal’, ma ra yib angin ngodad.

Mmel’eg e ngiyal’ nge gin ni ngam fal’eg rogom riy ni fan ko muulung. Mingiyal’ e rayog ni ngam fal’eg i lemnag e n’en ni ga be fil nib fel’ rogon? Kakadbul u m’on ni ngam tababnag e maruwel rom, ara blayal’ u tomuren ni ke mol e bitir? Yugu aram rogon ni dabiyog ni ngam fil e Bible rom nib n’uw nap’an, machane ngam dugliy n’umngin nap’an nrayog ni ngam rin’ e re n’ey riy, ma dab mu pag ban’en ni nge magawonnagem. Mu gay bang ni dariy lingan ban’en riy, ma ga taleg e radio, nge TV, nge cell phone rom. Ga ra meybil u m’on ni ngam tabab i fil e Thin rok Got, ma ra ayuwegem ni nge dabki magafan’um nga boch ban’en, me yag nim tiyan’um ko n’en ni ngam fil.​—Filippi 4:6, 7.

Mu tay e pow ngay mag fal’eg rogom ni ngam pi’ e fulweg. Som’on e ngam man u daken e n’en ni yira fil. Mu lemnag kenggin fare article ara fare guruy ni yira fil, mag lemnag rogon nib puluw e pi subheading riy. Mu yaliy e pi sasing nge pi deer riy ni be tamilangnag e n’en nib ga’ fan ni ngan nang. Ma aram mag beeg e pi paragraph riy mag gay e fulweg ko pi deer ni bay riy. Mu yaliy e pi thin nu Bible ni bay ko fare paragraph, mag lemnag rogon ni be tamilangnag e n’en ni be weliy fare article murung’agen. (Acts 17:11) Nap’an ni ga ra pirieg e fulweg ko fare deer, mag tay e line ara pow nga in bug e thin riy nra puguran ngan’um e fulweg ko fare deer u nap’an e muulung. Ma nap’an e muulung, ma rayog ni ngam tining paam nga lang ngam pi’ reb e fulweg ni thin rom nib ngoch mab tamilang.

Faanra um fal’eg i fil e pi n’en ni yira weliy u nap’an e muulung ni gubin e wik, ma aram e ga be ulunguy boch ban’en nib beech ko tamilangan’ nu Bible nga ‘singgil rom ni ga ma chaariy ban’en riy.’​—Matthew 13:51, 52.

• Mang boch ban’en nrayog ni ngam rin’ ni fan e ngam fal’eg rogom ko muulung?

• Uw rogon ni ngam fal’eg rogom nge yag nim pi’ reb e fulweg u nap’an e muulung?

Kab kakrom i yib ma baadag Jehovah ni nge tay chon e tabinaw e tayim ni ngar gelnaged e tha’ u thilrad nge tha’ u thilrad Got. (Deuteronomy 6:6, 7) Aram fan ni ma tay e Pi Mich Rok Jehovah ba ngiyal’ u gubin e wik ni fan ko tabinaw, ni ngar filed e Bible u taabang ni aram e ngar weliyed murung’agen e tirok Got ban’en ni bay rogon ko pi n’en nib t’uf ko tabinaw rorad. Mus ni faanra goo gur ni ga ma par, ma rayog ni ngam fanay e re tayim ney ni fan ko fol Bible ni goo gur.

Ireray e ngiyal’ ni ngan chugur ngak Jehovah. “Mu chugurgad ngak Got, me chugur ngomed.” (James 4:8) Gad ra fil e Bible ma rayog ni ngad nanged boor ban’en u murung’agen pi fel’ngin Jehovah nge pi n’en ni ma rin’. Reb e kanawo’ nib mom ni ngan tababnag e fol Bible ni tabinaw riy, e aram e rayog ni ngan beeg e Bible u taabang nib ga’ lamay ni yibe fol ko pi thin nu Bible ni kan dugliy ni ngan weliy murung’agen u nap’an fare muulung ni yima tay u gubin e wik ni kenggin e, Pi N’en ni Ma Rin’ e Piin Kristiano nge Machib ni Yad Ma Tay. Rayog ni nge be’ me beeg bang u reb e guruy, min weliy u taabang e n’en ni kan fil riy.

Ireray e ngiyal’ ni nge chugur e tha’ u thilin chon e tabinaw. Ma chugur e tha’ u thilin e piin figirngiy nge piin leengiy, nge piin gallabthir nge bitir u nap’an ni yad ra fil e Thin rok Got u taabang. Susun ni ireray ban’en ni ma athapeg chon e tabinaw ni ngar rin’ed u lan e wik ni bay e felfelan’ nge gapas riy. Rayog ni nge mel’eg e gallabthir e n’en ni yira weliy u nap’an e re ngiyal’ i n’em ni be yan u rogon yangaren e bitir, maku rayog ni ngan fanay e pi n’en ni bay ko Fare Wulyang ko Damit nge Awake! ara pi n’en ni bay ko fare website rodad ni jw.org. Ku rayog ni ngam weliyed murung’agen reb e magawon ni ke mada’nag e bitir u skul nge rogon nrayog ni ngan pithig fare magawon. Ku rayog ni ngam yaliyed ban’en ni bay ko fare JW Broadcasting (tv.jw.org) mi gimed weliy murung’agen u taabang. Maku reb e rayog ni ngam filed e pi tang ni yira yon’ u nap’an e muulung mi gimed kay fa mu unumed bochi ban’en u tomuren e fol Bible.

Re ngiyal’ i n’ey ni kan tay u gubin e wik ni fan ko liyor ni yibe tay ngak Jehovah e ra ayuweg chon e tabinaw ni ngar pirieged e felfelan’ ko Thin rok Got, ma ra tow’athnagrad ko athamgil ni yad ma tay.​—Psalm 1:1-3.

• Mang fan ni gamad ma tay ba ngiyal’ ni fan ko fol Bible ni tabinaw?

• Uw rogon ni nge yarmiy e gallabthir e re n’ey ni nge felfelan’ chon e tabinaw ngay?

Mang fan nib felfelan’ e pi girdi’ ney? Ya yad be un nga reb e assembly. Gamad ma felfelan’ ni gamad ma muulung nga taabang ni bod rogon e pi tapigpig rok Got kakrom nnog ngorad ni ngaur muulunggad nga taabang ni dalip yay u lan reb e duw. (Deuteronomy 16:16) Gubin e duw ma bay dalip e muulung ni gamad ma tay ni aram e: lʼagruw e circuit assembly, nge reb e regional convention ni yima tay u lan dalip e rran. Ra reb e pi muulung ney ma taareb e rran ni yima tay. Uw rogon ni ma yib angin e pi muulung ney ngomad?

Pi muulung ney e ma gelnag e tha’ u thilmad e pi walagmad ni Kristiano. Gamad ma felfelan’ ni nggu liyorgad ngak Jehovah u taabang u nap’an e pi muulung ney ni bod rogon piyu Israel ni yad ma felfelan’ ni ngar n’ufed Jehovah “u lan e ulung ko girdi’ rok.” (Psalm 26:12; 111:1, BT) Nap’an e pi muulung ney ma gamad ma mada’nag e pi walagmad u lan e ulung romad ma yu ngiyal’ e gamad ma mada’nag boch e walag ni kar bad u boch e nam. Ra reb e tabinaw ara be’ ma ke fek buchuuw e ggan, me misiw’ ma gamad abich u taabang ko gin ni yibe tay e muulung riy, ma gamad be sabethin boch e walag nge yugu boch e girdi’ ni kar bad ko muulung. (Acts 2:42) Aram e ngiyal’ ni gamad ma guy fare t’ufeg ni ma taarebnag e piin ni ‘ke mich Got u wan’rad’ u ga’ngin yang e fayleng.​—1 Peter 2:17.

Pi muulung ney e ma ayuwegmad ni nggu mon’oggad ko tirok Got ban’en. ‘Ke nang’ piyu Israel fan e thin ko Babyor nib Thothup ni kan weliy ngorad ma ke yib angin ngorad. (Nehemiah 8:8, 12) Kub ga’ fan u wan’mad e pi fonow nu Bible ni yima weliy u nap’an e assembly. Pi n’en ni kan yarmiy ni fan ko muulung romad e kan fek u Bible. Gamad ma fil rogon ni nggu rin’ed e tin nib m’agan’ Got ngay u lan e yafas romad u daken e pi welthin, nge boch ban’en ni yima yan u yaan. Ma yib e athamgil nga lanin’mad u nap’an ni gamad ma motoyil ngak boch e walag ni Kristiano ni yad be weliy murung’agen boch e magawon ni yad ma mada’nag e ngiyal’ ney ni ke mo’maw’ e par, nge rogon ni kar gelgad ngay. Nnap’an e regional convention ma bay e drama ara boch ban’en ni yima yan u yaan ni ma tamilangnag boch ban’en u Bible, maku ma fil ngomad rogon ni nggu fanayed nga lan e yafas romad. Ku bay e piin ni kar ognaged yad ngak Got ni yad ma un ko taufe u nap’an e assembly.

• Mang fan ni gamad ma felfelan’ u nap’an e assembly?

• Ga ra un nga reb e assembly, ma uw rogon nra yib angin ngom?

U m’on ni nge yim’ Jesus, me yog ni gaar: “Re Thin rok Got ney Nib Fel’ ni murung’agen e gagiyeg rok Got e bay ni machibnag u gubin yang u fayleng ni nge urngin e girdi’ me nang, ma aram mfini taw nga tomuren e fayleng.” (Matthew 24:14) Machane, uw rogon ni ngan rin’ e re maruwel ney ni ngan machibnag gubin e girdi’ u ga’ngin yang e fayleng? Aram e ngan folwok ko n’en ni rin’ Jesus u nap’an ni immoy u fayleng.​—Luke 8:1.

Gamad ma athamgil ni nggu nonad ko girdi’ u tabinaw rorad. Ke skulnag Jesus pi gachalpen u rogon ni ngar machibgad u mit e tabinaw i yan. (Matthew 10:11-13; Acts 5:42; 20:20) Ma piin ni ur uned ko machib u nap’an e bin som’on e chibog e un dugliy e gin ni nga ranod ngay. (Matthew 10:5, 6; 2 Korinth 10:13) Ku er rogomad e ngiyal’ ney nib yaram e machib ni gamad ma tay, ma ra reb e ulung ma kan yarmiy e gin ni nga ranod ngay ko machib. Re n’ey e ma ayuwegmad ni nggu lebguyed e n’en ni tay Jesus chilen ngomad ni ‘nggu machibniged gubin e girdi’.’​—Acts 10:42.

Gamad ma athamgil ni nggu machibnaged e girdi’ ko gin ni yad bay riy. Ke dag Jesus e kanawo’ ni ngan folwok riy u nap’an ni i machib ko yungi n’en ni boor e girdi’ riy, ni bod rogon dap’elay, ara tooben e luwed ni ma fanay e girdi’ e ran riy. (Mark 4:1; John 4:5-15) Ku er rogomad ni gamad ma weliy murung’agen e Bible ko girdi’ ko yungi n’en ni kug pirieged e girdi’ riy, ndemtrug ko kanawo’, ara tagil’ e siyobay, ara park, ara telefon. Ku gamad ma machibnag e piin buguli yoror romad, nge piin ni gamad nga maruwel, nge piin ni gamad nga skul, nge girdi’ romad ko ngiyal’ ni ke mab e kanawo’ ngomad nrayog ni nggu rin’ed riy. Bochan e athamgil ni yibe tay ma ke yag rok bokum milyon e girdi’ u ga’ngin yang e fayleng ni ngar rung’aged fare “thin nib fel’.”​—Psalm 96:2.

Bay be’ ni ga baadag ni ngam weliy fare thin nib fel’ ngak ni murung’agen Gil’ilungun Got nge n’en nra rin’ ni fan ngak boch nga m’on? Dab mu tay e re thin ney rom. Mu gur nigem ngam weliy ngak u rogon nrayog rom.

• Mang “fare thin nib fel’” nthingar ni machibnag?

• Uw rogon ni be folwok e Pi Mich Rok Jehovah u rogon ni i machib Jesus?

Fare bugithin ni “pioneer” e ba ga’ ni be yip’ fan e piin ni yad ma machib u polo’ e tayim rorad, ni yad ma yan nga boch e binaw ndawor ni machib riy ni ngar machibgad u rom mar tababnaged boch e ulung. Jesus e bod reb e pioneer ara be’ ni ma machib u polo’ e tayim rok, ya ni pi’ nge yib nga fayleng ni nge machib me bing e kanawo’ ni nge yag e yafas ni manemus ko girdi’. (Matthew 20:28) Ngiyal’ ney e be folwok pi gachalpen Jesus rok, ma yad be tay boor e tayim ni fan e ngar pingeged e girdi’ ‘ngar manged pi gachalpen’ Jesus. (Matthew 28:19, 20) Boch i yad e ke yag ni nge un ko pioneer ara nge machib u polo’ e tayim.

Pioneer e be’ ni ma un ko machib u polo’ e tayim rok. Gubin e Pi Mich Rok Jehovah e yad ma machibnag fare thin nib fel’. Machane, boch i yad e ke fal’eg rogon e par rok ya nge yag ni nge un ko regular pioneer ara nge machib u polo’ e tayim rok, ni be thognag 70 e awa u gubin e pul. Boor e girdi’ ni kar lichnaged e tayim rorad ni fan ko maruwel ni nge yag e salpiy riy, ya nge yag nra rin’ed e re n’ey. Boch e girdi’ e kan mel’egrad ni ngar uned ko special pioneer ni ngar machibgad ko yungi n’en nib t’uf e ayuw riy ko machib, ma ra reb e pul ma kar thognaged 130 e awa ara ba pag. Pi tamachib ney e ba fel’ u wan’rad e tin ni bay rorad, ya ba pagan’rad nra pi’ Jehovah e tin nib t’uf rorad. (Matthew 6:31-33; 1 Timothy 6:6-8) Piin ni dabiyog ni ngar machibgad u polo’ e tayim rorad e rayog ni ngar uned ko auxiliary pioneer ara pioneer ni ayuw u rogon nrayog rorad ni ngar uned ko machib u lan 30 ara 50 e awa u reb e pul.

Be’ nib pioneer e ma machib ni bochan e ba t’uf Got nge girdi’ rok. Gamad manang nib t’uf ni nge nang e girdi’ murung’agen Got nge n’en nib m’agan’ ngay e ngiyal’ ney ni bod rogon Jesus. (Mark 6:34) Machane, bay e tamilangan’ romad nrayog ni nge ayuwegrad e ngiyal’ ney me pi’ e bin riyul’ e athap ngorad ni fan ko gabul nge langlath. T’ufeg ko girdi’ e ir e ma k’aring reb e pioneer ni nge fanay e tayim rok nge gelngin ni nge ayuweg e girdi’ ko tirok Got ban’en. (Matthew 22:39; 1 Thessalonika 2:8) Angin ni ma yib ngak e ma gel e michan’ rok, ma be chugur e tha’ u thilrow Got, ma be par nib felfelan’.​—Acts 20:35.

• Uw rogon ni ga ra weliy fan fare bugithin ni pioneer?

• Mang e ma k’aring boch e girdi’ ni ngar uned ko machib u polo’ e tayim rorad?

Kab kakrom i yib ni ma tay e Pi Mich Rok Jehovah boch e skul ni yima fil e thin rok Got riy. Ere, ku bay boch e skul ni yima tay ni fan ngak e piin ni yad ma machibnag murung’agen Gil’ilungun Got u polo’ e tayim rorad. Yima tay e pi skul ney ni nge ayuwegrad ni ngar ‘ngongliyed urngin e maruwel ni kan pi’ ngorad nrogon e tapigpig rok Got.’​—2 Timothy 4:5.

Pioneer Service School. Nap’an nra gaman reb e duw ni ke un be’ ko pioneer, ma aram e rayog ni nge un nga reb e skul ni yira tay u reb e Kingdom Hall nib chugur ko gin ni ma par riy ni nel’ e rran n’umngin nap’an. Re skul nem e ma ayuweg e piin pioneer ni ngar chuchugurgad ngak Jehovah, mar mon’oggad ko machib, miki ayuwegrad ni ngar ululgad ko pigpig ni yad be tay ngak Got u fithik’ e yul’yul’.

School for Kingdom Evangelizers. Re skul ney ni l’agruw e pul n’umngin nap’an e yima tay ni fan ngak e pi pioneer ni ke m’agan’rad ngay ni ngar chuwgad ko gin ni yad ma par riy ni nga ranod ra pied e ayuw ko yungi n’en nib t’uf e ayuw riy. Ere, bod ni be lungurad, “Bay gu wan! Mu l’ugeg!,” ya yad be folwok rok Jesus Kristus ni ir e bin th’abi salap e Tamachib ni immoy u fayleng. (Isaiah 6:8; John 7:29) Nap’an ni yad ra chuw u taferad nga ranod ra pared nga bang, ma bay yu ngiyal’ nib t’uf ni ngar thilyeged rogon e par rorad ya nge m’ag ko par ko fare nam. Rayog nib thil e yalen, nge yafang, nge ggan ko fare nam ni ka ranod ngay. Maku rayog ni kub t’uf ni ngar filed yugu reb e thin. Re skul ney e ma ayuweg e piin mabgol, nge ku boch e walag ndawor ra uned ko mabgol ni bay e duw rorad u thilin e 23 nge yan i mada’ ko 65 u rogon ni ngar mon’ognaged boch e fel’ngin ni bay rorad nra ayuwegrad ko maruwel ni yira pi’ ngorad, miki ayuwegrad ni nge yag boch e salap ngorad ya nge yag ni fanayrad Jehovah nge ulung rok ni ngar rin’ed boch e maruwel.

Watchtower Bible School of Gilead. Gilead ko thin nu Hebrew e be yip’ fan “Ba Ulung i Ban’en nib Puguran Ngodad.” Ka nap’an ni tabab e re skul ney ko duw ni 1943, mab pag 8,000 e walag ni kar uned ko re skul ney ni kan pi’rad nga boch e nam ni ngar manged missionary mar machibnaged e thin rok Got “ngak urngin e girdi’ nu fayleng” nib fel’ rogon. (Acts 13:47) Nap’an ni yan boch e walag ni kar uned ko re skul ney nga reb e nam ni ka nog yu Peru ngay, ma dariy e ulung ko Pi Mich Rok Jehovah u rom. Machane, chiney e ke pag 1,000 e ulung u rom. Som’on ni yan boch e missionary romad nga Sapan ma de gaman e ragag e Pi Mich Rok Jehovah ko re nam nem. Machane, chiney e ke pag 200,000. Lal e pul n’umngin nap’an e re skul ney. Ma piin ni yad ma un ngay e ri yad ma fil e Thin rok Got nib fel’ rogon. Piin ni yad e special pioneer, ara missionary, ara yad ma maruwel ko pi branch ofis, ara yad ma lekag e ulung e aram e piin ni yima piningrad ni ngar uned ko re skul ney ya nge yag nni skulnagrad u rogon ni ngar ayuweged mar mon’ognaged fare maruwel ni machib ni yibe tay u ga’ngin yang e fayleng.

• Mang fan ni yima tay fare Pioneer Service School?

• Mini’ e piin nrayog ni ngar uned ko fare School for Kingdom Evangelizers?