GURUY NI 38
Nge Ga’ Fan u Wan’um e Yafos ni Kan Pi’ Ngodad nib Tow’ath
Boor ban’en nrayog ni ngad rin’ed u lan e yafos rodad nrayog ni ngad felfelan’gad ngay. Mus ni faanra gad be mada’nag e magawon, ma ka rayog ni ngad felfelan’gad nga boch ban’en u lan e yafos rodad. Uw rogon ni ngad daged nib ga’ fan u wan’dad e yafos ni kan pi’ ngodad nib tow’ath? Ma mang e bin th’abi ga’ i fan ni ngad rin’ed e re n’ey?
1. Mang fan nsusun e nge ga’ fan e yafos u wan’dad?
Susun e nge ga’ fan e yafos u wan’dad ni bochan e aram reb e tow’ath ni ke pi’ Jehovah ngodad ni Chitamangidad ni gad ba t’uf rok. Ir “enggin gubin e yafos” ma ir e ke sunmiy gubin ban’en nib fos. (Psalm 36:9, BT) “Ir e ke pi’ e yafos nge pogofan nge urngin ban’en ngak e girdi’.” (Acts 17:25, 28) Ma pi’ Jehovah urngin ban’en nib t’uf rodad ya nge yag nda pared ni gad ba fos. Ki bing e kanawo’ ngodad nrayog ni ngad felfelan’gad ko yafos rodad.—Mu beeg e Acts 14:17.
2. Uw rogon ni ngad daged ngak Jehovah nib ga’ fan u wan’dad e yafos ni ke pi’ ngodad nib tow’ath?
Ka nap’an nni diyennagem ma ma lemnagem Jehovah. Nap’an ni be meybil David nreb e tapigpig rok Got, me yog ngak ni gaar: “Dawor ni gargelegeg ma ga be guyeg.” (Psalm 139:16) Rib ga’ fan e yafos rom u wan’ Jehovah. (Mu beeg e Matthew 10:29-31.) Rib gel e kireban’ nra tay ni faanra thang be’ e fan rok be’ ni lem rok ara li’ ir nge yim’.a (Exodus 20:13) Ku ra kireban’ ni faanra da ted e yafos rodad nga thatharen e riya’ ara dad rin’ed e n’en nib t’uf ni ngad rin’ed ni ngad ayuweged e yafos rok yugu boch e girdi’. Faan gad ra ayuweg e yafos rodad ma gad tayfan e yafos rok yugu boch e girdi’, ma aram e gad be dag nib ga’ fan u wan’dad e yafos ni kan pi’ ngodad nib tow’ath.
KUM FIL BOCH BAN’EN U MURUNG’AGEN
Mu fil murung’agen boch e kanawo’ nrayog ni ngam dag riy nib ga’ fan u wan’um e yafos ni kan pi’ ngodad nib tow’ath.
3. Mu ayuweg fithik’ i dowam
Piin Kristiano ni kar ognaged yad ngak Jehovah e yad ma fanay e yafos rorad ni ngar pigpiggad ngak. Gowa bod ni kar pied e dowef rorad ni maligach ngak Got. Mu beegew e Roma 12:1, 2, mi gimew weliy e fulweg ko gal deer ni baaray:
Mang e susun ni nge k’aringem ni ngam ayuweg fithik’ i dowam?
Mang boch e kanawo’ nrayog ni ngam rin’ e re n’ey riy?
4. Mu kol ayuw ya nge dab mu k’aring be’ ni nge maad’ad ara yim’
Be pi’ e Bible e athamgil ngodad ni ngad siyeged boch ban’en ni yima rin’ ni bay e riya’ riy. Mu yaliyew e re VIDEO ney ni be weliy boch ban’en nrayog ni ngam rin’ ya nge dabi buch ban’en rom ara yugu boch e girdi’.
Mu beegew e Proverbs 22:3, mi gimew weliy rogon ni ngam ayuwegem nge yugu boch e girdi’ ndabi buch ban’en romed . . .
u tabinaw rom.
u tabon e maruwel rom.
u nap’an ni gimed be gosgos boch e girdi’ u taabang.
u nap’an ni ga be kol e yap’ ko karrow ara ga be un ngak be’ u karrow.
5. Mu tayfan e yafos ko bitir ndawor ni gargeleg
I yog David nib ga’ fan u wan’ Jehovah urngin ban’en ni ma buch rok reb e bitir ni be ilal u meyal. Mu beegew e Psalm 139:13-17, mi gimew weliy e fulweg ko re deer ni baaray:
Gur, rogon u wan’ Jehovah e ma tabab e yafos rok be’ u tomuren ni kan gargeleg ara nap’an ni ka bay u lan yin e chitiningin?
Pi motochiyel ni pi’ Jehovah ni fan ngak piyu Israel kakrom e i ayuweg e pi matin ndabi buch ban’en rorad nge fakrad u meyal. Mu beegew e Exodus 21:22, 23,b mi gimew weliy e fulweg ko pi deer ni baaray:
Uw rogon u wan’ Jehovah be’ ni ke li’ reb e bitir u meyal ni ke kal riy?
Uw rogon u wan’ ni faanra ke rin’ be’ e re n’ey ni lem rok?c
Uw rogon u wan’um e lem rok Got u murung’agen e re n’ey?
Mus ngak be’ nib pin nib ga’ fan e yafos u wan’ ma rayog ni nge lemnag ni kemus ni n’en nrayog ni nge rin’ e nge li’ fak u meyal. Mu beegew e Isaiah 41:10, mi gimew weliy e fulweg ko gal deer ni baaray:
Faanra yibe towasariy reb e ppin ni nge li’ fak u meyal ara be lemnag ni kemus e n’en nrayog ni nge rin’, ma mini’ e susun ni nge ning e ayuw ngak? Mang fan?
MA GAAR BOCH E GIRDI’: “Ra reb e ppin ma bay mat’awun ni nge dugliy ko nge li’ fak u meyal fa danga’ ni bochan e ir e ke diyen.”
Mang e be micheg ngom nib ga’ fan u wan’ Jehovah e yafos rok reb e matin nge fak ni ka bay u meyal?
N’EN KAN FIL
Be fil e Bible ngodad ni nge ga’ fan u wan’dad e yafos ni ke pi’ Jehovah ngodad nib tow’ath, ma gad tayfan, mu kud ayuweged. Re n’ey e ba muun ngay e yafos rodad nge yafos rok yugu boch e girdi’.
Ngan Sul u Daken
Mang nib ga’ fan e yafos ko girdi’ u wan’ Jehovah?
Uw rogon u wan’ Jehovah ni faanra thang be’ e fan rok be’ ni lem rok?
Mang nib ga’ fan u wan’um e yafos ni kan pi’ ngodad nib tow’ath?
MU GAY MURUNG’AGEN
Uw rogon nrayog ni ngad pininged e magar ngak Jehovah ko yafos rodad ni ke pi’ nib tow’ath?
Mu gay e fulweg ko fare deer ni be gaar, Ra n’ag Got fan e kireb rok be’ nib pin ni ke li’ fak u meyal fa danga’?
“What Does the Bible Say About Abortion?” (Article ni bay ko website)
Mu beeg murung’agen rogon e yafos u wan’ Got nge rogon nra ayuwegdad u nap’an ni gad be mel’eg e re miti n’en ni ngad chuweged e chalban rodad ngay.
“‘Extreme Sports’—Should You Take the Risk?” (Awake!, October 8, 2000)
Uw rogon ni faanra be lemnag be’ ni nge li’ ir nge yim’? Mu beeg rogon nrayog ni nge pi’ e Bible e ayuw.
“I Want to Die—Can the Bible Help Me When I Have Suicidal Thoughts?” (Article ni bay ko website)
a Ri ma lemnag Jehovah e piin ke mulan’rad. (Psalm 34:18) Manang e pi n’en ma kirebnag laniyan’ e girdi’ me k’aringrad ni ngar adaged ni ngar lied yad ngar m’ad, ma baadag ni nge ayuwegrad. Ra ngam nang rogon nrayog ni nge ayuweg be’ ni nge dabki lemnag ni nge li’ ir, mag beeg fare article ni “I Want to Die—Can the Bible Help Me When I Have Suicidal Thoughts?” ni bay u tan fare thin ni Mu Gay Murung’agen ko re guruy ney.
b Exodus 21:22, 23 (NW): “Faanra be cham bogi pumoon mi yad bit ngak be’ nib pin nib diyen me gargel nde gaman pulan, machane de yim’ fare pin nge fare tir, ma aram e faen ni bit ngak e thingari pi’ puluwon ni urngin nra yog figirngin fare pin, ni faanra m’ag u wan’ e pi tapuf oloboch. Machane faanra ke yim’ fare pin ara fare tir, ma gechig riy e puluwon e pogofan e ku pogofan.”
c Piin kar lied fakrad u meyal e de t’uf ni nga yugu ra pared ni be kireban’rad nib pag rogon ni bochan e kireb ni kar rin’ed, ya rayog ni nge n’ag Jehovah fan rorad. Ra ga baadag ni ngkum nang boch, mag guy fare article ni “What Does the Bible Say About Abortion?” ni bay u tan fare thin ni Mu Gay Murung’agen ko re guruy ney.