GURUY NI 53
Mmel’eg e Pi N’en Yima Chuweg e Chalban Ngay Nra M’agan’ Jehovah Ngay
Jehovah e ir “fare Got nib felfelan’.” (1 Timothy 1:11, NW) Baadag ni ngad pared ni gad ba felfelan’ ma kub fel’ u wan’dad rogon e par rodad. Ma felfelan’ u nap’an ni gad ra tal ba ngiyal’ ko maruwel ngad rin’ed boch ban’en ni ngad felfelan’gad ngay. Gad ra guy ko re guruy ney rogon nrayog ni ngad fanayed e tayim rodad u boch e kanawo’ ni gad ra felfelan’ riy, ma ka gad be felfelan’nag Jehovah.
1. Mang e susun ndab da paged talin u nap’an ni gad be mel’eg e n’en ngad chuweged e chalban rodad ngay?
Mang e ga baadag ni ga ma rin’ u nap’an ni ga be toffan? Boch e girdi’ e yad baadag ni yad ma toffan u tabinaw. Yad baadag ni yad ma beeg e babyor, ara ngar motoyilgad ko musik, ara ngar yaliyed reb e kachido, ara nga ranod ko Internet. Ma boch e girdi’ e yad baadag ni yad ma yan e pi fager rorad ko maluk u maday, ara ngar rin’ed reb e gosgos u taabang. Demtrug e n’en gad baadag ni gad ma rin’, mab t’uf ni ngad guyed rogon ni nge yan i aw ni “mm’agan’ Somol ngay.” (Efesus 5:10) Ba t’uf ni nge tamilang e re n’ey u wan’dad ni bochan e boor ban’en ni yima chuweg e chalban ngay e ngiyal’ ney ni bay boch ban’en riy nib fanenikan Jehovah ni bod e cham, ara ngongol ndarngal, ara ngongolen e pig. (Proverbs 6:16-19) Mang e ra ayuwegdad ni ngad mel’eged boch ban’en nib fel’ ni ngad chuweged e chalban rodad ngay?
Faan gad ra mel’eg boch e fager nib t’uf Jehovah rorad, ma aram e rayog ni ngar ayuweged gadad ni ngad mel’eged boch ban’en nib fel’ nib muun ngay e pi n’en gad ma chuweg e chalban rodad ngay. Kad filed u reb e guruy ni ga ra “mpachegem ngak e piin ni yad ba gonop me yog e gonop ngom.” Machane faanra gubin ngiyal’ ni gad ma chag ko girdi’ nde t’uf e pi motochiyel rok Got rorad, ma aram e ‘gad ra kireb.’—Proverbs 13:20.
2. Mang nib ga’ fan ni ngad gonopiyed urngin e tayim ni gad ma tay ni fan ko pi n’en yima chuweg e chalban ngay?
Mus ni faanra de kireb e n’en gad be chuweg e chalban rodad ngay, mab t’uf ndabi pag urngin e tayim ni ngad ted ni fan ngay. Ya ra danga’, ma rayog ndab ki gaman e tayim ni fan ko tin nib ga’ fan ban’en. Be pi’ e Bible e athamgil nga lanin’dad ni ngad maruwelgad “ko tayim [rodad] nib fel’ rogon.”—Efesus 5:15, 16, NW.
KUM FIL BOCH BAN’EN U MURUNG’AGEN
Mu fil rogon ni ngam dugliy boch ban’en nib fel’ ni bay rogon ko pi n’en ni ga ma chuweg e chalban rom ngay.
3. Mu siyeg e pi n’en yima chuweg e chalban ngay nib kireb
Mang fan nsusun e ngad fal’eged i mel’eg e pi n’en gad ma chuweg e chalban rodad ngay? Mu yaliyew e re VIDEO ney, mi gimew weliy e fulweg ko gal deer ni baaray.
Uw rogon nib taareb rogon ba mit e gosgos ni un tay u Roma kakrom nga boch ban’en ni yima chuweg e chalban ngay e ngiyal’ ney?
Mang e fil Danny u murung’agen e pi n’en yima chuweg e chalban ngay?
Mu beegew e Roma 12:9, mi gimew weliy e fulweg ko re deer ni baaray:
Uw rogon nra ayuwegem e re verse ney ni ngam mel’eg e pi n’en nib fel’ ni ngam chuweg e chalban rom ngay?
Mang boch ban’en ni ma fanenikan Jehovah? Mu beegew e Proverbs 6:16-19 nge Galatia 5:19-21. Tomuren ni kam beegew reb ko gal thin nu Bible ney, mi gimew weliy e fulweg ko re deer ni baaray:
Mang boch ban’en ni kan weliy ko pi thin nu Bible ney ni bay ko pi n’en yima chuweg e chalban ngay e ngiyal’ ney?
Rogon ni ngam mel’eg e n’en ngam chuweg e chalban rom ngay
Mu fithem ni nge lungum:
Bay ban’en riy nib fanenikan Jehovah, fa?
Be magawonnag boch ban’en ni kab ga’ fan, fa?
Be chugurnageg ngak e piin nde t’uf Jehovah rorad ara be k’aringeg ni ngaug chag ngorad ni gubin ngiyal’, fa?
Kab fel’ ni ngam par u orel u boch ban’en ni bay e riya’ riy. Aram fan nsusun e ngad paloggad ko pi n’en yima chuweg e chalban ngay ni gad be guy nde fel’ ngodad
4. Mmaruwel ko tayim rom nib fel’ rogon
Mu yaliyew e re VIDEO ney, mi gimew weliy e fulweg ko re deer ni baaray.
Yugu aram rogon nder yaliy fare walag ban’en nib kireb, machane mang e magawon rok?
Be gaar e Filippi 1:10, NW: “Ya nge yag nim mel’eged e tin ir e th’abi ga’ fan.”
Uw rogon nrayog ni nge ayuwegdad e re verse ney ni ngad dugliyed urngin e tayim ni gad ma tay ni fan ko pi n’en gad ma felfelan’ ngay?
5. Mmel’eg e pi n’en nib fel’ ni yima chuweg e chalban ngay
Yugu aram rogon ni bay boch ban’en ni yima chuweg e chalban ngay nde m’agan’ Jehovah ngay, machane boor ban’en nrayog ni ngad rin’ed nib m’agan’ ngay. Mu beegew e Eklesiastes 8:15 nge Filippi 4:8, mi gimew weliy e fulweg ko re deer ni baaray:
Mang boch ban’en nib fel’ ni ga baadag ni ga ma chuweg e chalban rom ngay?
Rayog ni ngam chuweg e chalban rom nga boch ban’en nib fel’
MA GAAR BOCH E GIRDI’: “De kireb ni ngaug chuweg e chalban rog ko pi n’en bay yaan e cham, ara ngongol ndarngal, ara ngongolen e pig riy ya da gur un i rin’ e pi n’em.”
Mang e ga ra yog?
N’EN KAN FIL
Baadag Jehovah ni ngad mel’eged e pi n’en nib fel’ ni ngaud chuweged e chalban rodad ngay.
Ngan Sul u Daken
Mang boch ban’en ni yima chuweg e chalban ngay nsusun e nge siyeg e piin Kristiano?
Mang fan nsusun e ngad gonopiyed urngin e tayim ni gad ma tay ni fan ko pi n’en yima chuweg e chalban ngay?
Mang fan ni ga baadag ni ngam mel’eg e pi n’en yima chuweg e chalban ngay nib m’agan’ Jehovah ngay?
MU GAY MURUNG’AGEN
Mu beeg ko mini’ e ba milfan ngak ni nge mel’eg e n’en ngad chuweged e chalban rodad ngay.
“Do Jehovah’s Witnesses Ban Certain Movies, Books, or Songs?” (Article ni bay ko website)
Mu guy rogon nrayog ni ngam dugliy boch ban’en nib fel’ ni bay rogon ko pi n’en ni ga ma rin’ ni ngam felfelan’ ngay.
“Pi N’en ni Ga Ma Felfelan’ Ngay, Bay Angin, Fa?” (Fare Wulyang ko Damit, October 1, 2011)
Mu beeg murung’agen fan ni thilyeg be’ nib pumoon e n’en ma chuweg e chalban rok ngay.
“The Bible Changes Lives” (The Watchtower, February 1, 2010)
Mu guy rogon ni dugliy reb e matin e n’en nib fel’ ni nge rin’ ni bay rogon ko pi n’en yima chuweg e chalban ngay ni murung’agen ngongolen e moonyan’.