1 Ngari Pagan’uy ko Bible

“Urngin e thin ni bay u lan e babyor nib thothup e Got e yib i pi’ nga laniyan’ e girdi’ ngar yoloyed nga babyor, me ir e ba ga’ fan ya ma fil e tin nib riyul’ e thin ngodad, ma be yal’uweg e tin ni be oloboch e girdi’ riy.”​—2 Timothy 3:16.

MANG E DER TAMILANG U WAN’ BOCH E GIRDI’? Boor e girdi’ ni ma lemnag ni Bible e kemus ni girdi’ e yoloy ko gonop rorad. Ma boch e girdi’ e ma yog ni Bible e ma weliy murung’agen boch ban’en ni ke buch kakrom nde puluw. Ma boch e girdi’ e ma yog ni fonow nu Bible e dakuriy fan e ngiyal’ ney.

UW ROGON NI NGE TAMILANG U WAN’UM? Piin ni ma lemnag ni dakuriy fan e Bible e der pagan’rad ngay ya darir skengnaged nib fel’ rogon. Kemus ni yad ma sul u daken e tin ni ma yog e girdi’. Machane Bible e be ginangey ni gaar: “Be’ nib balyang e yugu demtrug ban’en ma ra mich u wan’, ma girdi’ nib tamilangan’ e ri ma fal’eg i yaliy ban’en.”​—Proverbs 14:15, BT.

Mang ndab mu fol ko n’en ni rin’ e piin Kristiano u Beroea kakrom ni yima yog e chiney ni lel’uch u Greece, ko bin ngam fol ko n’en ni ma yog e girdi’? Gathi yu gur folgad ko n’en ke yog e girdi’ ya “ur gayed u lan e babyor nib thothup ni ngar guyed ko riyul’” fa. (Acts 17:11) Am lemnag l’agruw i fan nrayog ni nge pagan’um ko Bible ya Thin rok Got.

Ba puluw e n’en ni be weliy e Bible ko n’en ni i buch kakrom. Ke n’uw nap’an ni ma yog e girdi’ nder pagan’rad ko Bible ni bochan e de puluw fithingan e girdi’ riy nge yungi binaw ni be weliy murung’agen. Machane ke yoor yay ni ke m’ug e mich riy nde riyul’ e pi n’en ni ma yog e girdi’ u murung’agen e Bible ma thin nu Bible e rayog ni nge pagan’uy ngay.

Bod ni immoy ba ngiyal’ ni i maruwaran’ e girdi’ nib llowan’ u murung’agen Sargon ni pilung nu Assyria kakrom ni bay murung’agen ko Isaiah 20:1. Machane, thilin e pi duw ni 1840 nge yan i mada’ ko 1849 me pirieg e piin ma fil murung’agen e tin kakrom ban’en tafen e re pilung nem. Machane boor e girdi’ ni ke nang murung’agen e re pilung nu Assyria nem.

Ki immoy boch e girdi’ nde riyul’ u wan’rad Pontius Pilate ni governor nu Roma kakrom ni ir e yog ni ngan li’ Jesus ngem’. (Matthew 27:1, 22-24) Machane nap’an e duw ni 1961 min pirieg ba malang u bang nib chugur nga Caesarea u Israel ni bay fithingan Pilate riy nge liw rok.

Fare babyor ni ka nog e U.S.News & World Report ngay ko October 25, 1999 e gaar: “Piin ni ma fil murung’agen e tin kakrom ban’en e ka rogned nib puluw e thin ko bin kakrom nge bin beech e m’ag ko Bible ni bay rogon ko pi ga’ rok piyu Israel nge nap’an ni chuw piyu Israel u Egypt nge pi pilung nra bad ko tabinaw rok David nge rarogon e girdi’ u nap’an Jesus.” Yugu aram rogon nder tor e michan’ rodad ko Bible nga daken e pi n’en ni ke pirieg e piin ma fil murung’agen e tin kakrom ban’en, machane rriyul’ nib puluw gubin e thin u Bible.

Ra yib angin e gonop nu Bible ngak gubin mit e girdi’. Kakrom u nap’an ndawor ni pirieg murung’agen boch e bayking ni ma afweg e m’ar ma bay e thin nu Bible u murung’agen rogon ni ngan par ni yib beech nib ga’ angin ke yib i mada’ ko ngiyal’ ney. (Levitikus 11:32-40; Deuteronomy 23:12, 13) Pi tabinaw ni yad ma fol ko fonow nu Bible e yad ma par ni yad ba felfelan’. (Efesus 5:28–6:4) Be’ ni ma fol ko pi kenggin e motochiyel nu Bible e rayog ni nge mang reb i chon e maruwel fa be’ ni yima maruwel rok nib fel’. (Efesus 4:28; 6:5-9) Ku gad ra fol ko pi kenggin e motochiyel nu Bible ma ra ayuweg lanin’dad. (Proverbs 14:30; Efesus 4:31, 32; Kolose 3:8-10) Rriyul’ ni aram e fonow ni gad be lemnag ni ngeb rok e En ke Sunmiy Gubin Ban’en.

UW ROGON NRA FEL’ ROGOM RIY? Bible e ma pi’ e gonop ngak e piin ndariy rorad. (Psalm 19:7) Kemus ni goo Bible e ra pagan’dad ngay me gelnag e michan’ rodad.

Ra ga baadag ni ngkum nang boch, mag guy fare thin ni “Riyul’ Ni Yib E Bible Rok Got, Fa?” ni bay ko guruy ni 5 ko fare babyor ni Rayog Ni Ngam Par Ni Gab Fas U Paradis U Fayleng.a

[Footnote]