3 Mu Fil e Tin Riyul’ u Murung’agen Jesus

“Yi Got e rib t’uf e girdi’ nu fayleng rok, ma aram me pi’ Fak ni kari maagirag rok nge yib, ni fan e nge urngin e piin ni michan’rad ngak e aram e dab kur m’ad, ya ke yog e yafos ndariy n’umngin nap’an ngorad.”​—John 3:16.

MANG E MAGAWON NI BAY? Boch e girdi’ e ma guy rogon ni nge dabi mich u wan’um ni riyul’ ni immoy Jesus. Ma boch e ma yog ni immoy Jesus machane kemus nib girdi’ ni immoy ni ba fas ma ki yim’.

UW ROGON NI NGE TAMILANGAN’UM? Mu folwok ko n’en ni rin’ Nathaniel.a Yog Philip ni fager rok ngak ni be lemnag ni ke pirieg fare Mesiah​—ni “ir Jesus, ni fak Josef nu Nazareth.” Machane, de mich u wan’ Nathaniel e thin rok Philip. Ya ke fith ni gaar: “Rayog ni nge yib banen nib fel u Nazareth?” Yugu aram rogon ni be maruwaran’, ke un ngak Philip ya baadag ni nge ‘un ngak nge guy.’ (John 1:43-51) Ku arrogon gur ni ga ra nang ni riyul’ ni faanra mu fal’eg i yaliy e pi n’en ni be micheg ni riyul’ ni immoy Jesus. Mang e rayog ni ngam rin’?

Mu fal’eg i yaliy e pi chep ni be micheg ni riyul’ ni immoy Jesus. Josephus nge Tacitus e l’agruw ni’ ni yow ma yoloy e chep ma yima tayfarow u nap’an e bin som’on e chibog e gathi yow e Kristiano. Ra yoloyew e chep ni Jesus Kristus e riyul’ ni ir be’ ni immoy kakrom. I tamilangnag Tacitus rogon ni yog Nero ni pilung nu Roma ni pi Kristiano e yad e kar tababnaged e nifiy u Roma ni gonap’an 31 e duw u tomren ni ke yim’ Jesus ni gaar: “Ke yog Nero ni pi Kristiano e kar tababnaged e nifiy ni bochan e ke fanenikay piyu Roma e yalen rorad ma ur urfeged e pi Kristiano. Ma kan gafgownag Kristus ni aram e ngochol ni sum fare thin ni Kristiano riy, ma kan gechignag nib gel u tan pa’ Pontius Pilatus u nap’an e gagiyeg rok Tiberius.”

Be yog e Encyclopædia Britannica, ko duw ni 2002 murung’agen e pi babyor ni yoloy ko bin som’on nge bin l’agruw e chibog, ni gaar: “Pi babyor ney e be tamilangnag ni boch e girdi’ kakrom ni ur togopuluwgad ngak e pi Kristiano e de maruwar u wan’rad ni riyul’ ni immoy Jesus, ma aram e n’en ni de tamilang u wan’ e girdi’ u tungun e bin 18 e chibog nge mada’ ko tabolngin e bin 20 e chibog.” U lan bang ko fare babyor ni The Wall Street Journal ni fal’eg ko duw ni 2002 e be gaar: “Boch e girdi’ ni ba ga’ e llowan’ rorad, e ke mich u wan’rad ni bay e chep u murung’agen Jesus nu Nazareth.”

Bay e mich riy ni fas Jesus ko yam’. U nap’an ni kol Jesus me chuw pi gachalpen rok, me yog Peter ni de nang Jesus. (Matthew 26:55, 56, 69-75) Tomren ni kan kol Jesus me wer pi gachalpen. (Matthew 26:31) Ma de n’uw nap’an ma ki tabab bayay pi gachalpen ko machib. Me Peter nge John e dar rusgow mi yow machibnag e pi girdi’ ni baaram ni ra makathnaged ni ngar lied Jesus ngem’. Kari pasig pi gachalpen Jesus mar machibgad u gubin e nam ni be gagiyegnag e am nu Roma, ma dar rusgad ni yira li’rad.

Mang reb i fan ni be thil laniyan’ e girdi’? Yog apostal Paul ni fas Jesus ko yam’ “me m’ug ngak Peter, nge mu’ me m’ug ngak fa ragag nge l’agruw i apostal.” Miki gaar: “Me mug ngak pi gachalpen u taab ngiyal ni yad ba pag e lal miriay.” Boor e pi girdi’ ney e ur moyed ni ka yad ba fas u nap’an ni yoloy Paul e pi thin ney. (1 Korinth 15:3-7) Ra taareb fa l’agruw e girdi’ ni be micheg ban’en ma sana ra mom ni ngan pagtalin. (Luke 24:1-11) Machane faanra ba pag 500 e girdi’ ni kar micheged ni ke fas Jesus ko yam ma aram e mich riy ni riyul’.

UW ROGON NI RA FEL’ ROGOM RIY? Piin ni ba mich Jesus u wan’rad ma yad be fol rok e rayog ni ngan n’ag fan e denen rorad ma ra tamilangan’rad ko tin nib mat’aw. (Mark 2:5-12; 1 Timothy 1:19; 1 Peter 3:16-22) Faan yad ra yim’ ma ke micheg Jesus ni ra ‘fasegrad ko yam’.’​—John 6:40.

Ra ga baadag ni ngkum nang boch, mag guy fare thin ni “Jesus Kristus—Got E L’og?” ni bay ko guruy ni 6 ko fare babyor ni Rayog Ni Ngam Par Ni Gab Fas U Paradis U Fayleng.b

[Footnotes]

[Picture on page 7]

Mu yaliy ko mang e be micheg murung’agen Jesus ni bod e n’en ni rin’ Nathanael