Ke Yib Angin e K’adan’ ni i Tay

Boor e piin nib fel’ gum’ircharad e yad baadag ni nge fil e piin nib t’uf rorad murung’agen e n’en nib m’agan’ Got ngay me yog e felfelan’ ngorad. Bochan e ngongol rok boch e girdi’ nib fel’ ma rayog ni nge k’aring be’ ni nge ognag e yafas rok ku Jehovah me pigpig ngak. Aray e n’en ni buch rok reb e fel’ yangaren u Mexico ni Jearim fithingan. Ke pi’ reb e babyor u nap’an e special assembly ko Pi Mich Rok Jehovah ni gaar:

“Gu baadag ni nggog e n’en ni ke felfelan’ug ngay. Ragag nga meruk e duw faram me fil e gallabthir rog e tin riyul’. Ke mon’og e nina rog, ma boch nga tomur me mon’og walageg ni pumoon ma ku arogog. Kug meybil gad ku Jehovah ni nge ayuweg e papa’ rog ni nge nang e tin riyul’. Ere chiney e ka ri gu felfelan’gad ya ra taufe e papa’ rog. Kug pining e magar ku Jehovah ni bochan e rayog ni nge un e papa’ rog ko taufe u m’on ni nge yib e tomur. Kammagar, Jehovah!”

U nap’an e pi duw nem, ma girdien e re tabinaw ney e yad ma lemnag fare thin ni bay ko 1 Peter 3:1, 2 ni gaar: “Ma ku er rogomed pi leengiy nthingar um folgad rok pi figirngimed, ni fan e faanra ba’ boch i yad ndawori mich e thin rok Got u wan’rad ma rayog ni nge mich u wan’rad ni bochan pangimed. Ma aram e dakuriy fan bbugithin ni nga mogned ngorad, ya bay ra guyed rogon feni machalbog pangimed nge rogon ni gimed be ta’ farad.” Mab mudugil ni ke fol Jearim ko fare thin u Deuteronomy 5:16 ni gaar: “Mu liyorgad ko chitamangimed nge chitiningimed, ni bod ni Gag Somol ni Got romed e kug tay chilen ni ngam rined.” Bochan ni fol Jearim nge tabinaw rok ko pi thin ney mar sonnaged Jehovah u fithik’ e gum’an’ ma aram me yib angin ngorad.