Piin Fel’ Yangaren, Mu Athamgilgad u Fithik’ e Towasar ko Pi Taab Yangar Romed
“Gubin ngiyal’ nthingar umogned e thin ngorad nib fel’ ma ba’ fan, ma thingar mu nanged rogon ni ngam pied e fulweg nib mat’aw ko tin ni ke fith be’ nge be’ ngomed.”—KOL. 4:6.
1, 2. Uw rogon u wan’ boch e fel’ yangaren ni ngar gagiyelgad ni yad ba thil, ma mang fan?
SANA gathi ke mus ni kam rung’ag murung’agen e towasar ni ma tay e pi taab yangar, ya ki buch rom bayay. Dabisiy ni bay ba ngiyal’ ni kan towasariyem ni ngam rin’ ban’en ni ga manang nib kireb. Mang e ga ma lemnag u nap’an nra buch ban’en rom ni aram rogon? Christopher ni 14 e duw rok e gaar, “Yu ngiyal’ e gu ma finey ni manga yug gu m’ay nga bang, fe taareb rogog ngak e piin ni gamad nga skul ya nge dabki gagiyel ni gub thil u fithik’rad.”
2 Ga be guy nib mo’maw’ ni ngam siyeg e towasar ko pi taab yangar rom, fa? Faanra aram rogon, ma mang fan? Gur, bochan ni ga baadag ni ngam fel’ u wan’rad? Dariy ban’en nib kireb ko re n’em, ya mus ko piin ni kar ilalgad maku yad baadag ni ngar fel’gad u wan’ e pi taab yangar rorad. Demtrug yangaren be’ ma dabun ni nge par ni yugu ba thay nga bang u fithik’ e girdi’. Boch e girdi’ e faanra dab mu un ngorad i rin’ e kireb, ma yad ra dabuy dakenam. Mus ngak Jesus ma ki buch e re n’ey rok. Machane, gubin ngiyal’ ni i par ni be rin’ e tin nib fel’. Immoy boch e girdi’ nra folwokgad rok mi yad mang pi gachalpen, ma immoy boch ni ur gathibthibnaged ni “gowa be’ nib m’ay fan.”—Isa. 53:3.
Uw Feni Gel e Towasar ko Pi Taab Yangar Rom?
3. Mang fan nde fel’ ni ngam un i rin’ e n’en ni be rin’ e pi taab yangar rom?
3 Yu ngiyal’ e rayog ni ngam un ko n’en ni be rin’ e pi taab yangar rom ya nge dab ra dabuyed dakenam. Gab balyang ni faan ga ra rin’ ni aram rogon, ya piin Kristiano e susun ni dab ra boded e ‘bitir, ni be fekrad e n’ew i yan.’ (Efe. 4:14) Piin bitir e yad ma rin’ e n’en ni yad ma guy ni ma rin’ boch e girdi’. Machane, gur, e gathi ka ga bochi tir, ya ga be ilal i yan. Ere faanra ke mich u wan’um nra yib angin e pi motochiyel rok Jehovah ngom, ma thingar mu fol riy. (Deut. 10:12, 13) Machane faanra dab mu fol, ma ga rin’ e n’en ni yibe towasariyem ngay, ma aram e kam bod reb e liyos ni be’ e be guy e n’en ni nge rin’ ngom.—Mu beeg e 2 Peter 2:19.
4, 5. (a) Uw rogon ni ke yan Aron nga laniyan’ e girdi’, ma mang e gad ra fil ko re n’ey? (b) Mang boch ban’en nra rin’ e pi taab yangar rom ya ngar towasariyed gur ngam rin’ e tin yad baadag?
4 Immoy ba ngiyal’ ni rin’ Aron ni walagen Moses e n’en ni ka nog ngak. Nap’an ni yog piyu Israel ngak ni nge ngongliy reb e got ni ngar liyorgad ngay, me rin’. Aron e gathi ir be’ nib papey ni nge yib e marus ngak. U m’on ni buch e re n’ey, ma ranow Moses ra sak’iygow nga p’eowchen Farao ni ir e pilung nu Egypt. Me non Aron nde rus ni be weliy ngak e thin ni ke yog Got. Machane, nap’an ni towasariy piyu Israel Aron me rin’ e n’en ni ka rogned. Ba mo’maw’ ni ngan siyeg e towasar. Ba mom rok Aron ni nge togopuluw ko fare pilung nu Egypt ko bin ni nge togopuluw ngak piyu Israel ni yad.—Ex. 7:1, 2; 32:1-4.
5 Rogon ni kad guyed ko n’en ni ke buch rok Aron, e gathi ke mus ni yigoo piin fel’ yangaren ara piin ni yad baadag ni ngar rin’ed e kireb e yima towasariyrad ni ngar rin’ed e tin nib kireb. Ya mus ko piin ni yad baadag ni ngar rin’ed e tin nib fel’ maku yima towasariyrad ko tin nib kireb, ni ka gab muun ngay. Rayog ni nge towasariyem e pi taab yangar rom ni ngam rin’ ban’en nib kireb, ni bod ni ngam rin’ ban’en ni bay e riya’ riy, fa ngar gathibthibnaged gur, fa ra k’ak’aringed gur. Demtrug rogon, ma towasar ni ma yib ko pi taab yangar rom e ba mo’maw’ ni ngam gel ngay. Ere aram fan ni som’on e nge pagan’um ko n’en ni ke michan’um ngay.
‘Mu Pared ni Gimed Be Ngongol u Fithik’ e Michan’ Romed’
6, 7. (a) Mang nib ga’ fan ni nge mich u wan’um e tin riyul’ ni kam fil, ma uw rogon ni ngam maruweliy e re michan’ ney? (b) Ba miti mang deer e ngam fithem riy nra ayuwegem nge gel e michan’ rom?
6 Faanra ngam gel ko towasar ko pi taab yangar rom ma som’on e nge mich u wan’um ni tin riyul’ ni kam fil nge tin ni ga be lemnag nib fel’ e ba puluw. (Mu beeg e 2 Korinth 13:5.) Faanra kari mudugil u wan’um nib puluw e n’en ni ke michan’um ngay ma ra ayuwegem ni nge dab mu rus ni yugu aram rogon ni gur be’ ni gab tatamra’. (2 Tim. 1:7, 8) Ku ra gur be’ ni damur rus maku ra mo’maw’ ngom ni ngam rin’ ban’en ni faanra gathi rib mich u wan’um. Ere mang ni dab mu fal’eg i yaliy ngam nang ni pi n’en ni kam fil u Bible e ba riyul’? Som’on e ngam fal’eg i yaliy e pi kenggin e machib ni ke mich u wan’um. Bod nib mich Got u wan’um ma kam rung’ag rok boch e girdi’ ni kar weliyed fan nib mich Got u wan’rad. Ngemu’ ma ga fithem ni nge lungum, ‘Mang fan ni ke mich u wan’ug ni bay Got?’ Fan ni ngam fith e re deer ney ngom e gathi bochan e be maruwar lanin’um ya bochan ni nge gelnag e michan’ rom. Maku ngam fithem ni nge lungum, ‘Uw rogon ni kug nang ni thin nu Bible e Got e ke thagthagnag?’ (2 Tim. 3:16) ‘Mang fan nib mich u wan’ug ni gad be par ko “tin tomren e rran”?’ (2 Tim. 3:1-5) ‘Mang fan ni ke mich u wan’ug ni pi motochiyel rok Jehovah e fan ngog?’—Isa. 48:17, 18.
7 Sana dabum ni ngam lemnag e pi deer ney ni bochan e ga be lemnag ni dabiyog ni ngam fulweg. Faanra aram rogon, ma bod ni dabum ni ngam sap ko gauge ko karrow rom ya ga be rus nri mu guy ni “Ke M’ay” e pensin riy. Faanra dakuriy e pensin ko karrow rom mab t’uf ni ngam nang ya nge yog nim rin’ ban’en ngay. Ere ku arrogon nib fel’ ni ngam guy rogon ngam nang e pi n’en ni gathi rib mich u wan’um mag gay rogon ngari mich u wan’um.—Acts 17:11.
8. Mu weliy rogon ni nge mich u wan’um fare motochiyel rok Got ni be yog ni ngad paloggad ko ngongol ni darngal.
8 Mu lemnag reb e pi n’ey. Be yog e Bible ni ‘dab mu ngongliy e ngongol ko darngal.’ Ngam fithem ni nge lungum, ‘Mang fan nib fel’ ni nggu fol ko re motochiyel ney?’ Am lemnag fan ni ma un e pi taab yangar rom ko ngongol ni aray rogon. Mu kum lemnag boch i fan ni faanra un be’ ko ngongol ni darngal ma aram e be “denen nib togopluw ko birok e dowef.” (1 Kor. 6:18) Ngemu’ ma ga fithem ni nge lungum: ‘Mang e ba fel’ ni nggu rin’? Gur, ba fel’ ni nggu un ko ngongol ni darngal?’ Ngemu’ mu kum fithem ni nge lungum, ‘Uw rogon e lem rog ni faan gu ra un ko ngongol ni darngal?’ Sana ga ra fel’ u wan’ boch e taab yangar rom, machane ra uw rogon e lem rom u nap’an ni gimed bay e gallabthir rom nge ku boch e Kristiano u Kingdom Hall? Maku uw rogon e lem rom u nap’an ni ga be gay rogon ni ngam meybil ngak Got? Rayog rom ni ngam rin’ ban’en nra alitnagem u p’eowchen Got ni bochan e ngam fel’ u wan’ e piin ni gimed nga skul?
9, 10. Faanra kari mich u wan’um e tin riyul’ ni kam fil ma uw rogon nra ayuwegem ngam par nib pagan’um u nap’an ni gimed e pi taab yangar rom?
9 Faanra ke fel’ yangarem, ma aram e kam taw nga bang nrayog ni ngam nang e tin nib m’agan’ Got ngay. (Mu beeg e Roma 12:1, 2.) Ere mu fal’eg i lemnag feni ga’ fan ni ngam mang reb e Mich Rok Jehovah. Re n’ey e ra ayuwegem ni ngari mich u wan’um e tin riyul’ ni kam fil. Ma nap’an ni yira towasariyem ko kireb ma rayog ni ngam siyeg u fithik’ e pagan’. Maku ga ra lem ni bod reb e rugod ni Kristiano ni gaar: “Nap’an ni gu ra siyeg e pi n’en ni yibe towasariyeg ngay, ma n’en ni gu be rin’ e gu be yog ko girdi’ ko gag mini’. Ba ga’ fan e teliw rog u wan’ug. Gu ma mon’eg e teliw rog ko pi n’en ni gu ma lemnag, nge pi n’en ni gu ma nameg, nge pi n’en ni gu ma rin’.”
10 Riyul’ ni thingar mu athamgil ngam rin’ e tin ni ga manang nib fel’. (Luke 13:24) Ma sana ga ra lemnag ko aram e n’en nib fel’ ni ngam rin’ fa danga’. Machane, baaray ban’en ni dab mu pagtalin: Faan ga ra tamra’ ko n’en ni ke michan’um ngay ma yad manang, ma aram e n’en nra buch e ra gel boch e towasar ni ngar ted ngom. Machane, faan ga ra gelnag e thin rom ma yad ra palog rom.—Mu taareb rogonnag ko Luke 4:12, 13.
‘Mu Lem u M’on Mfini Mu Pi’ e Fulweg’
11. Mang angin nra yib ngom ni faan ga ra lemnag u m’on riy e pi n’en nrayog ni nge towasariyem e pi taab yangar rom ngay?
11 Reb e ban’en nib ga’ fan nra ayuwegem ni ngam siyeg e towasar e aram e ngam fal’eg rogom u m’on riy. (Mu beeg e Proverbs 15:28.) Re n’ey e be yip’ fan ni ngam lemnag u m’on riy e magawon ni ga ra mada’nag, ya ra ayuwegem ni ngam siyeg e magawon nib ga’. Bod ni susun e kam guy boch e bitir nu skul ni yad be tamagow. Ba mudugil ni yad ra guyem ma yad ra yog ngom ni ngam un ngorad ko tamagow. Ere mang e ngam rin’? Proverbs 22:3, BT, e be gaar: “Be’ nib gonop e ra guy e oloboch ni be yib me pilo’ riy.” Faan ga ra pilo’ rorad ma aram e rayog ni ngam siyeg e towasar. Re n’ey e gathi be dag ni kam rus; ya aram kanawoen e gonop.
12. Mang reb e kanawo’ nib fel’ ni ngam fulweg e deer ni ke fith reb e taab yangar rom ni be moningnagem?
12 Machane uw rogon ni faanra dabiyog ni ngam pilo’ riy? Bod ni faanra ke fithem reb e taab yangar rom ni gaar, “Dawor mu un ko pumoon?” fa “Dawor mu un ko ppin?” N’en nib fel’ ni ngam rin’ e ngam fol ko fare fonow u Kolose 4:6 ni be gaar: “Gubin ngiyal’ nthingar umogned e thin ngorad nib fel’ ma ba’ fan, ma thingar mu nanged rogon ni ngam pied e fulweg nib mat’aw ko tin ni ke fith be’ nge be’ ngomed.” Rogon ni be tamilangnag e re thin nu Bible ney e n’en ni ga ra rin’ e be yan u rogon e magawon ni kam mada’nag. Dabisiy nde t’uf ni ngam weliy boor ban’en u lan e Bible. Ya ka ga ra weliy buchuuw ban’en nib tamilang ma ra nang fan. Bod nrayog ni ngam gaar ngak, “Arrogon,” fa “De t’uf ni ngam nang.”
13. Mang nib ga’ fan ni ngam gonopiy rogon ni ngam fulweg e n’en ni ke fith reb e taab yangar rom ngom?
13 Ba ga’ ni buchuuw ban’en ni ma yog Jesus ni faanra manang ni dabi yib angin ni faanra yog boor ban’en. Bod ni nap’an ni fith Herod boch e deer ngak, ma dariy ban’en ni yog. (Luke 23:8, 9) Yu ngiyal’ e aray e n’en nib fel’ ni ngam rin’ u nap’an ni kan fith boch e deer ngom ni be darifannagem. (Prov. 26:4; Ekl. 3:1, 7) Machane, sana ga ra guy ni faen ni be fith e deer ngom e rriyul’ ni baadag ni nge nang ko mang fan ni damur un nga boch e ngongol nib kireb ni bod e ngongol ni darngal ni mus ni faanra ka i yog boch ban’en nib togopuluw ngom. (1 Pet. 4:4) Faanra aram rogon mab fel’ ni ngam weliy ngak e michan’ rom. Machane dab mu rus ya gubin ngiyal’ ni ngam fal’eg rogom ya nge yog nim ‘pi’ e fulweg ko n’en nra fith be’ ngom.’—1 Pet. 3:15.
14. Uw rogon ni ngam fulweg e thin ni ke yog boch e taab yangar rom ngom?
14 Yu ngiyal’ e rayog ni nga mog ban’en nra k’aring facha’ ni nge lemnag fan ni be towasariyem. Machane, thingar mu gay rogon ni ngam rin’ e re n’ey u fithik’ e gonop. Bod ni faanra be towasariyem reb e bitir nu skul ni ngam thoy e tamagow ma rayog ni ngam gaar ngak, “Danga’ kam magar,” ngemu’ mu kum gaar ngak, “Da gur lemnag ni er fanam balyang ni ngam un ko tamagow.” Ere kam guy e n’en ni ke buch? Dan mu weliy fan ni dab mu un ko tamagow, ya n’en ni kam rin’ e kam ayuweg facha’ ni nge lemnag fan ni be un i thoy e tamagow.
15. Mingiyal’ e ba fel’ ni ngam man ngam chuw, ma mang fan?
15 Ma uw rogon ni faanra kam rin’ e tin nrayog ni ngam rin’ ma ka yad be towasariyem? Ra aram rogon, mab fel’ ni ngam man ngam chuw. Ya faan ga ra par nge n’uw nap’an ma aram e ra mom ni ngam un ko ngongol nib kireb. Rayog ni ngam chuw ndabi kireban’um, ya ga manang ni kam felfelan’nag Jehovah ma dan mu pagem ngorad ngar guyed e n’en ni ngar rin’ed ngom ni bod fare liyos.—Prov. 27:11.
Mu ‘Tanom nib Fel’ Rogon’
16. Uw rogon nrayog ni nge towasariyem boch e fel’ yangaren u lan e ulung ni ngam rin’ ban’en nib kireb?
16 Yu ngiyal’ e rayog ni nge towasariyem e pi fel’ yangaren u lan e ulung ni yad ma yog ni yad e tapigpig rok Jehovah ni ngam un nga boch e ngongol nib kireb. Uw rogon ni faanra kam un nga reb e abich ni ke yarmiy reb e fel’ yangaren ma kam guy ni dariy be’ nib piilal riy? Ara bay reb e fel’ yangaren ni ma yog ni ir reb e Kristiano ni ke fek e alkul nga reb e abich ma ga manang ni dawori taw nga yangarmed nrayog ni ngam uned ko unum? Boor ban’en nra buch nib t’uf ni ngam fol ko nangan’ rom ni kan skulnag ko thin nu Bible. Reb e Kristiano nib fel’ yangaren e gaar: “Ba’ bayay ni gu chuwgow reb e ppin ni walageg u tafen e miyal kachido ni bochan reb e kachido ni boor e thin ni kireb riy. Ma piin ni gu warod e ngaram e ra turguyed ni ngar pared. Kari felfelan’ e gallabthir romow ko n’en ni kug rin’ew. Machane, fapi cha’ ni gu warod e ngaram e kar damumuwgad ni bochan e ke m’ug ni yad ba kireb.”
17. Nap’an ni kam un nga reb e abich, ma mang boch ban’en ni ngam rin’ ya nge dab mu togopuluw ko motochiyel rok Got?
17 Fare n’en ni ka fin ni weliy e be dag ni de mom ni ngam rin’ e n’en ni be yog e nangan’ rom. Machane dab mu tal i rin’ e n’en ni ga manang nib mat’aw. Mu fal’eg rogom u m’on riy. Faan ga ra un nga reb e abich, ma ngam lemnag rogon ni ngam chuw ni faanra kam guy ban’en ni yibe rin’ riy ni dabum. Boch e fel’ yangaren e kar weliyed e gallabthir rorad ni faanra ke t’uf ni ngar sulod nga tabinaw nib papey ma rayog ni ngar call gad. (Ps. 26:4, 5) Faan ga ra ‘tanom nib fel’ rogon’ ma ra yib angin ngom.—Prov. 21:5.
‘Mu Felfelan’ nga Yangarem’
18, 19. (a) Mang fan ni rayog ni nga mog ni riyul’ ni baadag Jehovah ni ngam felfelan’? (b) Uw rogon u wan’ Got e piin ni yad ma siyeg e towasar ko pi taab yangar rorad?
18 Ke sunmiyem Jehovah ni ngam felfelan’ ko yafas rom, maku baadag ni ngaum par ni gab felfelan’. (Mu beeg e Eklesiastes 11:9.) Dab mu pagtalin ni felfelan’ ni be tay e pi taab yangar rom e chiney e ba “ngoch nap’an.” (Heb. 11:25) Bin riyul’ e Got e baadag ni nge yog ban’en ngom ni kab gel e fel’ riy ko n’en ni ga be guy e chiney. Baadag ni ngam felfelan’ ni dariy n’umngin nap’an. Ere nap’an ni kan waliyem nga ban’en ni ga manang nib kireb u mit Got, ma dab mu pagtalin ni n’en ni ke yog Jehovah ni ngam rin’ e rra fel’ rogom riy.
19 Ba t’uf ni ngam nang ni mus ni faanra adag e pi taab yangar rom dakenam ma ra boch nga m’on ma dabisiy ni yad ra pagtilnem. Machane, faan ga ra gel ko towasar ni ma tay e pi taab yangar rom ngom, ma be guy Jehovah ma dabi pagtilnem nge yul’yul’ ni ga be tay. Ra ‘bing mban e tharmiy me puog nga dakenam e pi n’en nib fel’ nge pag e fol riy.’ (Mal. 3:10) Maku, ra pi’ gelngin nib thothup ni nge ayuwegem ko tin nib t’uf rom. Arrogon, rayog ni nge ayuwegem Jehovah ngam gel ko towasar ko pi taab yangar rom.
Ka Ga Manang?
• Uw feni gel e towasar ni ma tay e pi taab yangar rom ngom?
• Faanra ngam gel ko towasar ko pi taab yangar rom ma uw feni ga’ fan ni nge mich u wan’um e tin riyul’ ni kam fil?
• Uw rogon ni ngam fal’eg rogom ni ngam mada’nag e towasar ko pi taab yangar rom?
• Uw rogon ni kam nang nib ga’ fan e yul’yul’ rom u wan’ Jehovah?
[Picture on page 15]
Mang fan ni ke pag Aron ni ngan ngongliy fare fak e garbaw ni gol?
[Picture on page 17]
Mu lemnag u m’on e n’en ni ga ra yog