Be’ nib Filmunguyan’ e Ir Be’ nib Gonop
Toñi ni be’ ni maruwel rok e ma ayuweg e piin ni kar m’argad nge piin pilibthir e yan nga tafen reb e pilibthir ni ma ayuweg, me yib be’ nib pin i bing e mab, ma aram me tabab ni nge puwan’ ngak Toñi, maku be non nib gel e thin ni be yog ngak ni bochan e de yib u m’on ko ngiyal’ nib ga’ ni ma yib riy ni nge ayuweg fare pilibthir ni chitiningin fare pin. Bin riyul’ riy e, dawori sagaal Toñi. Machane, yugu aram rogon me wenig ngak fare pin ko n’en ni ke buch.
NAP’AN e yay ni migid ni yan Toñi nga tafen fare pilibthir, ma aram miki puwan’ fare pin ngak bayay. Ere, mang e rin’? I yog ni gaar: “Rib mo’maw’ e re n’em, ya dariy rogon ni nge non ngog ni aram rogon.” Yugu aram rogon, miki wenig Toñi ngak fare pin bayay me yog ngak ni manang gelngin e gafgow ni be yan u fithik’.
Faan gomanga gur Toñi, ma mang e ga be lemnag ni ga ra rin’? Ga ra guy rogon ni ngam filmunguyan’um? Fa ra mo’maw’ ngom ni ngam gagiyegnag e damumuw rom? Riyul’ ni faan ga ra mada’nag reb e magawon ni bod rogon e n’en ni mada’nag e cha’ney, ma ra mo’maw’ ni ngam filmunguyan’um. Faanra ud mochuchgad ara yibe rin’ boch ban’en ngodad nra k’aring e damumuw ngodad, ma ra mo’maw’ ni ngad filmunguyan’dad.
Machane, be pi’ e Bible e athamgil nga laniyan’ e pi Kristiano ni ngaur filmunguyan’rad. Bin riyul’ riy e, ma puthuy e Thin rok Got e filmunguyan’ ko gonop. I fith James ni gaar: “Ba’ be’ nib llowan’ ma ba gonop u fithik’med fa? Faanra ba’ ma nge micheg nga pangin nib fel’ nge ngongol rok nib fel’ ni be ngongliy u fithik’ e sobut’an’ nge gonop.” (Jas. 3:13) Ere, faanra ba filmunguyan’ be’ ma uw rogon ni bay e gonop rok Got rok? Ma mang e ra ayuwegdad ni nge yag e re fel’ngin ney ngodad?
BE’ NIB FILMUNGUYAN’ E BA GONOP
Faanra gur be’ ni ga ma filmunguyan’um ma rayog ni ngam chuweg e damumuw rok be’. “Lungun be’ nni fulweg nib sumunguy e ma chuweg e damumuw, ma lunguy nni fulweg u fithik’ e thin nib gel e ma k’aring e damumuw.”—Prov. 15:1.
Faan ga ra gur ngam damumuw ma rayog ni ngam k’aring reb e magawon ni nge ga’, ya ra yan i bod ba nifiy ni be daramram ma ka yibe tay e l’ud ngay. (Prov. 26:21) Machane, faan ga ra filmunguyan’um ngam non u fithik’ e sumunguy ma rayog ni nge yib angin. Ku rayog ni nge chuweg e damumuw rok faen ni ke damumuw ngom.
Ireray e n’en ni guy Toñi. Nap’an ni guy fare pin rogon ni ke non Toñi ngak u fithik’ e sumunguy, ma aram me tabab ko meyor. I yog ngak Toñi nri boor e magawon rok nge ku boch e magawon ni be mada’nag u lan e tabinaw rok. Ere, bochan e n’en ni rin’ Toñi, ma aram me yag ni nge tabab i fil e Bible ngak fare pin. I yag ni nge buch e re n’ey ni bochan e ngongol ni dag u fithik’ e sumunguy nge gapas.
Faanra gad ma filmunguyan’dad ma rayog ni ngad felfelan’gad. “Nge felan’ e piin nib fel’ lanin’rad [“piin ni yad ma filmunguyan’rad,” NW], ya rayog ngorad e tin ni ke yog Got nra pi’!”—Matt. 5:5.
Mang fan nib felfelan’ e piin ni yad ma filmunguyan’rad? Boor e girdi’ nib papey e damumuw ngorad kafram e kar guyed rogon ni ngaur daged e sumunguy, ma aram e n’en ni ke ayuwegrad ni ngar felfelan’gad. Ke fel’ e par rorad e chiney ko kafram, ma kar nanged ni bay boch ban’en nib manigil nrayog ni ngar athapeged ni fan ko gabul nge langlath. (Kol. 3:12) Adolfo nreb e walag ni pumoon ni ma lekag e ulung u Spain e yib ngan’ rogon e par rok u m’on ni nge fil e tin riyul’.
I yog ni gaar: “Kafram e dariy gam’engin e yafos rog. Ba ga’ nib papey e damumuw ngog. Bochan e re n’ey, ma aram e bay boch e fager rog ni yad ma rus ngog ni bochan e gu ma wagey u nap’an ni kug damumuw. Machane, bay ban’en ni buch rog ni ir e thilyeg e yafos rog. Bay bayay nug un nga reb e cham ni tay boch e girdi’, ma aram min rugoy e yar ngog ni nel’ yay ma boor e racha’ ni map’ u dowag nge chugur ni nggum’.”
Machane, chiney e ma fil Adolfo rogon ngak yugu boch e girdi’ ni ngaur filmunguyan’rad. Ma rin’ e re n’ey u daken e thin nge ngongol rok. Ere, boor e girdi’ ni yad baadag daken ni bochan e ir be’ nib sumunguy. I yog Adolfo ni ke felfelan’ ko pi n’en ni ke yag ni nge thilyeg ko ngongol rok. Maku be pining e magar ngak Jehovah ni ke ayuweg ni nge nang rogon ni nga i filmunguyan’ ko damumuw rok.
Be’ nib filmunguyan’ e ma felfelan’nag Jehovah. “Fakag, mu gonop, ma gu ra felfelan’; ya bay e fulweg ni gu ra yog ko en be gathibthibnageg.”—Prov. 27:11, BT.
Moonyan’ ni ir e bin th’abi ga’ e toogor rok Jehovah e gubin ngiyal’ ni ma gathibthibnag Jehovah. Ere, bay tapgin ni nge damumuw Jehovah ko re n’ey. Machane, bin riyul’ riy e be yog e Bible ni ir reb e Got ni “gathi mmachreg ni ma yib e puwan’ ngak.” (Ex. 34:6) Ere, faan gad ra athamgil ni ngad folwokgad rok Got ni ir be’ nde papey e damumuw ngak, ma aram e gad be ngongol u fithik’ e gonop. Ma re n’ey e ma felfelan’nag Jehovah.—Efe. 5:1.
Ke gel e wagey ko re fayleng ney. Ere, rayog ni ngaud mada’naged e girdi’ ni yad ba ‘ufanthin, mab tolangan’rad ni yad be lemnag nri ba ga’ farad; ma yad ma yog e thin nib kireb ngak e girdi’, . . . ma yad ma t’ar e thin nga daken e girdi’, ma dariy fan ban’en u wun’rad, ma yad ba damumuw.’ (2 Tim. 3:2, 3) Yugu aram rogon ma piin Kristiano e thingar ra guyed rogon ni ngaur daged e sumunguy. Be puguran e Thin rok Got ngodad ni “fare gonop ni yib u tharmiy e . . . ma fal’eg thiliy nge aw e gapas riy, ma ma sumunguynigey.” (Jas. 3:17) Ere, faanra ud ngongolgad u fithik’ e gapas nge sumunguy, ma aram e gad be dag ni bay e gonop rok Got rodad. Nap’an nra rin’ be’ ban’en nra k’aring e damumuw ngodad ma ireray e n’en nra ayuwegdad ni ngad nonad ngak u fithik’ e sumunguy, miki chugurnagdad ngak e En ni Ke Yib e gonop rok, ni aram Jehovah.