Boch Ban’en ni Ngan Fanay ko Machib u Mit e Tabinaw

Bay dalip ban’en nib t’uf ni ngad lemnaged u nap’an ni gad be lemnag rogon ni ngad tababgad i machibnag be’: (1) Fare thin ni kan tay chilen ngodad ni ngad weliyed ko girdi’ e aram fare ‘Thin nib Fel’ ni murung’agen e gagiyeg rok Got.’ (Matt. 24:14) Yugu aram rogon ni gathi ireram e n’en ni gad be weliy murung’agen ko girdi’, machane susun ni ngad guyed rogon ni nge tamilang u wan’rad feni ga’ fan e re n’ey, ara ngad guyed rogon ni nge chuw boch ban’en u lanin’rad ni ir e be mo’maw’nag ni ngar lemnaged e re n’ey. (2) Faan gad ra folwok rok Jesus ngaud lemnaged e tin nra fel’ rogon e girdi’ ni gad ma machibnagrad riy, ma aram e rayog ni nge taw e thin ni gad be weliy nga gum’ircha’rad. (Mark 6:34) Rayog ni nge m’ug ni gad be lemnagrad ni faan gad ra sap ngorad ma gad siminmin, ara da motoyilgad ngorad u nap’an ni yad be weliy salperad ngodad, mu kud fithed boch e deer nra pi’ e athamgil nga lanin’rad ni ngar weliyed lanin’rad ngodad. Fare thin ni bay ko 1 Korinth 9:19-23 e be dag ni ke thiliyeg apostal Paul rogon e machib ni i tay ya nge m’ag nga rarogon e piin ni be machibnagrad. (3) U boch e binaw u fayleng, e nap’an ni ga ra yan nga tafen be’ ma u m’on ni ngam weliy fan ni kam man e ngaram, ma bay boch ban’en nthingar mu rin’ nib m’ag ko yalen ko fare binaw. Ma boch e binaw, e baadag e girdi’ riy ni ngam weliy fan ni kam man nga tafen ko som’on.​—Mu taarebnag ko Luke 10:5.