Fel’ nge Kireb: N’en Ma Pow’iy e Girdi’

Yooren e girdi’ e yad manang ni boch e ngongol e ba fel’ ma boch e ba kireb. Bod ni yooren e girdi’ e yad manang nib kireb ni ngan li’ be’ nge yim’, ara ngan kol be’ ara reb e bitir u gelngiy. Ma yooren e girdi’ e yad ma yog nib fel’ e ngongol nib mat’aw, nge sumunguy, nge ngan nang rogon laniyan’ be’. Machane bay boch ban’en nib muun ngay e par ko pumoon nge ppin, ara yul’yul’, ara chugol bitir ni ma lemnag boor e girdi’ ni yugu dariy rogon kanawoen nib fel’ ara ba kireb ni ngan rin’. Yad ma lemnag ni yugu demtrug e bin ke mel’eg be’ mab fel’. Ba ga’ ni ma dugliy e girdi’ e n’en ngar rin’ed ni be yan u rogon e n’en yad be lemnag nge n’en be lemnag e girdi’ u toobrad. Ere gur, ba fel’ e re n’ey?

N’EN GAD BE LEMNAG

Ba ga’ ni gad ma dugliy ban’en ni be yan u rogon e n’en be yog e nangan’ rodad ngodad. (Roma 2:​14, 15) Mus ko piin bitir nrayog ni ngar nanged e n’en nib thil u thilin e ngongol nib mat’aw nge ngongol nde mat’aw, maku rayog ni nge magawon lanin’rad u nap’an ni kar rin’ed ban’en nib kireb. Nap’an ni gad be ilal i yan ma gad ma nang e n’en nib fel’ nge n’en nib kireb ko piin gad ma chag ngorad ara teliw rodad. Nap’an ni gad ra dugliy ban’en, ma aram e ra yog e nangan’ rodad ko ba puluw fare n’em ko tin nib fel’ ara tin nib kireb ni kad filed fa danga’.

Tin gad manang nib fel’ ara ba kireb e rayog ni nge k’aringdad ni ngaud lemnaged laniyan’ boch e girdi’, mu ud pininged e magar, mu ud rin’ed e tin nib mat’aw, mu ud runguyed e girdi’. Ku ra talegdad ndab da rin’ed ban’en nrayog ni nge kirebnag laniyan’ e piin nib t’uf rodad, ara k’aring e tamra’ ngodad, me magawonnag lanin’dad.

Gubin ngiyal’ nib puluw ni ngad taga’gad ko tin gad be lemnag, fa? Nap’an ni kab pagel Garrick ma rogon e par ni mel’eg e yog ni gaar, “Rayog ni nggu rin’ e n’en nug baadag.” Machane yan i nang nn’en ni i rin’ ni be lemnag nib fel’ e de yib angin ngak. I yog nde yag ni nge pirieg e felfelan’ ni bochan e ma “un ko ngongol ndarngal, ma be fanay e falay ni kireb, ma be chingaw, maku ma un ko cham.”

N’EN BE LEMNAG E GIRDI’

Kub ga’ ni gad ma dugliy boch ban’en ni be yan u rogon e n’en be lemnag e girdi’. Ku rayog ni nge ayuwegdad e re n’ey ni ngad filed ban’en ko n’en ke buch rorad nge gonop rorad. Nap’an ni gad ra rin’ e n’en be lemnag chon e tabinaw, nge pi fager rodad, nge girdi’ u lan binaw nib fel’, ma aram e yad ra tay fadad.

Gubin ngiyal’ nib puluw ni ngad taga’gad ko tin be lemnag e girdi’, fa? Bochan ni kab fel’ yangaren Priscila, ma aram mi i rin’ e n’en be rin’ e pi taab yangar rok ma be un ko par ko pumoon nge ppin ni yugu aram rogon ndawori mabgol. Machane yan i nang nder yag ni nge pirieg e felfelan’ ni yugu aram rogon ni be rin’ e n’en be lemnag boch e girdi’ nib fel’. I gaar: “De yag ni nggu felfelan’ ni bochan e gu be rin’ e n’en be rin’ gubin e girdi’. I k’aringeg ni nggu rin’ boch ban’en nde fel’ ma bay e riya’ riy.”

BAY REB E KANAWO’ NI KAB FEL’ BOCH, FA?

Ba ga’ fan e n’en gad be lemnag nge n’en be lemnag e girdi’ u nap’an ni ngad dugliyed ko mang e ba fel’ nge mang e ba kireb. Machane re n’ey e gathi gubin ngiyal’ nra yib angin ngodad. Ya yu ngiyal’ e rayog ni ngad gafgownaged gadad ara da gafgownaged boch e girdi’ ni bochan e darud lemnaged wenegan e pi n’en gad be mel’eg. (Proverbs 14:12) Ku dabiyog ni ngad micheged ni tin gad be lemnag ara be lemnag e girdi’ nib ga’ fan e rriyul’ nib fel’ ngodad ma dabi t’uf ni ngad thilyeged. Bin riyul’ riy e bay boch e ngongol ni un lemnag nib kireb ni ke fel’ u wan’ e girdi’ e chiney, ma bay boch ni un lemnag nib fel’ ni ke kireb u wan’ e girdi’ e chiney.

Ere gur, bay ban’en ni kab fel’ nrayog ni nge ayuwegdad ni ngad nanged e n’en nib fel’ nge n’en nib kireb, fa? Bay ban’en nrayog ni ngad folgad riy e chiney ndab da kalgadngan’dad riy boch nga m’on, fa?

Bay ban’en nrayog ni nge pow’iy rogon e ngongol ni ngaud rin’ed nra yib angin ngak urngin e girdi’. Bin migid e article e ra weliy e gin nrayog ni ngad pirieged e tin th’abi fel’ e fonow riy nra ayuwegdad ni ngad nanged e n’en nib fel’ nge n’en nib kireb.