Ngan Ayuweg e “Pi Milekag” ni Ngar Liyorgad ngak Jehovah u “Fithik’ e Felfelan’”

1, 2. (a) Mang boch e magawon ni be mada’nag boch i walagdad? (b) Mang boch e deer ni ke sum ni bochan e re n’ey?

I YOG reb e walag ni pumoon ni Lije fithingan ni gaar: “Nap’an ni tabab e cham nib gel u thilin yu ulung i girdi’ u Burundi, ma gamad bay chon e tabinaw rog u reb e assembly. Rayog ni ngguyed boch e girdi’ ni yad be mil, nge boch e girdi’ ni yad be boyochnag yugu boch e girdi’. Ere, gu milgad e gallabthir rog nge pi walageg ni gamad 11 u gubin ndariy ban’en ni yag ni nggu feked. Gu milgad ni kemus ni mad ni bay u dakenmad e aram e n’en ni bay romad. Boch i gamad e ra milekaggad ni 1,000 e mayel palogin nga ranod ra tawgad nga bangi ban’en ni bay u Malawi ni ma par e girdi’ riy ni kar milgad ko binaw rorad. Ma tin ni ka bay i chon e tabinaw rog e ra werwergad nge bagayad ma gin ni sor ngay.”

² Chiney e ke pag 65,000,000 e girdi’ u ga’ngin yang e fayleng ni yad be n’ag taferad ngar milgad nga yugu boch e binaw ni bochan e mahl ara gafgow ni yad be tay. Ireray e tin nth’abi yoor e girdi’ ni yad be mil ko binaw rorad ni kab kafram i yib.a Bokum biyu’ e pi girdi’ ney e yad boch e Pi Mich Rok Jehovah. Boor i yad e dabkiyog ni ngar mada’gad e piin ni yad ba t’uf rorad ma kar digeyed yooren e chugum rorad u taferad. Mang boch e magawon ni ku be mada’nag boch e pi girdi’ ney? Uw rogon nrayog ni ngad ayuweged e pi walag ney ni ngar “liyorgad ngak Somol u fithik’ e felfelan’” ni yugu aram rogon gelngin e magawon ni yad be yan u fithik’? (Ps. 100:2) Ma uw rogon nrayog ni ngad weliyed fare thin nib fel’ ngak boch e pi girdi’ ney ndawor ra nanged Jehovah?

RAROGON E PAR ROK E PIIN NI KAR MILGAD KO BINAW RORAD

3. Mang e rin’ me chuw Jesus nge boor i gachalpen ko binaw rorad?

³ Tomuren ni ginang e engel rok Jehovah Josef u murung’agen e n’en ni ke dugliy Herod ni Pilung ni aram e nge li’ Jesus nge yim’, ma aram me fek Josef nge Maria Jesus ngar milnagew nga Egypt, mar pared u rom nge mada’ ko ngiyal’ ni ke yim’ Herod. (Matt. 2:13, 14, 19-21) Boch e duw nga tomuren, ma aram me wer e tin som’on i gachalpen Jesus “u lan yu Judea i yan ngu Samaria” ni bochan e gafgow ni un tay ngorad. (Acts 8:1) I nang Jesus u m’on riy ni boor i gachalpen e yad ra n’ag taferad ngar milgad nga yugu boch e binaw. I yog ni gaar: “Ngiyal’ ni yad ra gafgownagmed riy u reb e binaw, e ngam milgad nga reb e binaw.” (Matt. 10:23) Ere, ba ga’ nde mom ni nge mil be’ nge n’ag tafen.

4, 5. Mang boch ban’en ni bay e riya’ riy ni ma mada’nag e piin ni kar n’aged taferad u nap’an ni (a) yad be mil ni ngar chuwgad ko binaw rorad? (b) yad be par ko yungi n’en ni ma par e girdi’ riy ni kar milgad ko binaw rorad?

⁴ Ra nap’an ni be mil e pi girdi’ ney ni ngar chuwgad ko binaw rorad ara nap’an ni yad be par ko yungi n’en ni ma par e girdi’ riy ni kar milgad ko binaw rorad, ma rayog ni ngar mada’naged boch ban’en nrayog ni nge tay e yafos rorad nga thatharen e riya’. Gad nreb e pumoon ni walagen Lije nib bitir ngak e yog ni gaar: “Bokum e wik ni ug warod u but’. Ma bokum miriay e lldow ni ug guyed ko yungi n’en ni ug warod riy. Ngiyal’ nem e 12 e duw rog. I thow e rifrif u eg mi ri mo’maw’ rogon ni nggu wan. Ere, gog ngak chon e tabinaw rog ni ngar digeyed gag nga ranod. Machane, dabun e chitamag ni nge digeyeg nge lieg e girdi’ ni kireb ni kar chelgad yad be togopuluw ko am. Ere, chibiyeg nge fekeg. Ug athamgilgad ni nge yag ni nggu thapgad ko bin migid e rran, ma gamad be meybil ngak Jehovah ma be pagan’mad ngak. Bay yu ngiyal’ ni bayi n’en ma kemus ni yigoo mangga ni kug t’ared u l’igin e mangga ko yungi n’en ni gamad be yan riy e aram e ggan romad.”​—Fil. 4:12, 13.

⁵ Yooren i girdien e tabinaw rok Lije e ur pared ko yungi n’en ni ke ngongliy fare ulung ni United Nations rogon ni nge par e girdi’ riy ni kar milgad ko binaw rorad, mar pared u rom u lan boor e duw. Yugu aram rogon, machane de fel’ rogon e par rorad u rom. Lije ni ir reb e walag ni ma lekag boch e ulung e chiney e yog ni gaar: “Yooren e girdi’ u rom e darur maruwelgad. Yad ma gun’gun’, ma yad ma chingaw, ma yad ma un nga boch e gosgos ni yima fek e salpiy riy, ma yad ba moro’ro’, ma yad ma un ko ngongol ndarngal.” Ere, Pi Mich ni yad ma par u rom e thingar ra pared ni yad be rin’ boch ban’en ni ma rin’ e pi walag u lan e ulung ni gubin ngiyal’ ya nge dabi af e pi ngongol nem ngorad. (Heb. 6:11, 12; 10:24, 25) Boor i yad e ma maruwel ko tayim rok nib fel’ rogon ni aram e yad ma un ko pioneer ni bochan e nge yag nra pared ni yad ba gel ko tirok Got ban’en. Ma gubin ngiyal’ ni yad ma guy rogon ni ngaur lemnaged fel’ngin boch ban’en ni aram e yad ma guy rogon ndab ra paged talin nra munmun ma yad ra chuw u rom ni bod rogon piyu Israel kakrom ni ur milekaggad u daken e ted i yan.​—2 Kor. 4:18.

NGAN T’UFEG E PIIN NI KAR MILGAD KO BINAW RORAD

6, 7. (a) Bochan “nib t’uf Got” rok e piin Kristiano, ma uw rogon ni ma k’aringrad e re n’ey ni ngar ayuweged pi walagrad ni ke t’uf e ayuw rorad? (b) Mu weliy reb e kanawo’ ni kar rin’ed e re n’ey riy.

⁶ “Rogon nib t’uf Got” rodad e aram e n’en ni ma k’aringdad ni nge bagadad me t’ufeg bagadad, nib ga’ nu nap’an ni gad be mada’nag boch e magawon nib mo’maw’. (Mu beeg e 1 John 3:17, 18.) Nap’an ni magawon e pi Kristiano ni yad ma par u Judea ko bin som’on e chibog ni bochan e uyungol ni ke yib ko re nam nem, ma aram me yarmiy e ulung ni ngan ayuwegrad. (Acts 11:28, 29) Ki pi’ apostal Paul nge Peter e athamgil nga laniyan’ e pi Kristiano ni nge bagayad me gol ngak bagayad. (Rom. 12:13; 1 Pet. 4:9) Ere, faanra ba t’uf ni nge gol e piin Kristiano ngak e pi walag ni kar bad u bang, me ere ku arrogon e piin taareb e michan’ rorad ni yad be mil u boch e binaw ni be buch boch ban’en riy ni be tay e yafos rorad nga thatharen e riya’ ara yibe gafgownagrad ni bochan e michan’ rorad!​—Mu beeg e Proverbs 3:27.b

⁷ Dawori n’uw nap’an ma bokum biyu’ e pumoon, nge ppin, nge bitir ni yad boch e Pi Mich Rok Jehovah ni yad ma par ko ngek u Ukraine e ra milgad ngar chuwgad u rom ni bochan boch e magawon ni be buch ko binaw rorad nge gafgow ni yibe tay ngorad. Machane, bay boch i yad ni kan li’rad kar m’ad. Yugu aram rogon, ma yooren i yad e ke fekrad e pi walag ni yad ma par u yugu boch e binaw u Ukraine ni ngar ayuweged yad, maku boor i yad e ke fekrad boch e Pi Mich u Russia ni ngar ayuweged yad. Machane, kar athamgilgad ni ngar pared u mathilin ngongolen e am ko gal nam nem, ma darur uned nga ngongolen e “girdi’ nu fayleng,” maku yad be ulul ni ngar ‘machibnaged ngak e girdi’ fare Thin Nib Fel’’ u fithik’ e pasig.​—John 15:19; Acts 8:4.

NGAN AYUWEG E PIIN NI KAR MILGAD KO BINAW RORAD NI NGAR GELNAGED E MICHAN’ RORAD

8, 9. (a) Mang boch e magawon nrayog ni nge mada’nag e piin ni kar milgad ko binaw rorad u nap’an ni ka ranod nga yugu reb e binaw ara nam nib thil? (b) Mang fan nib t’uf ni ngad gum’an’naged gadad ngad ayuweged yad?

⁸ Boch e pi girdi’ ney e kar milgad nga yugu boch e binaw ni ka bay u lan e nam rorad. Machane, yooren i yad e yad ma mil nga yugu boch e nam ni gathi nam rorad ma dar mechamgad ko par riy. Sana rayog ni ma pi’ e am boch e ggan ni ngar ked, nge mad ni ngar chuwgad ngay, nge gin ni ngar pared riy, machane rayog nib mo’maw’ ni ngar pirieged e ggan ni yad ba mecham ngay. Girdi’ ni kar bad u boch e nam nib gowel e rayog ni fin aram e som’on ni kar uned nga reb e nam nib gel e garbeb riy, ma dar nanged ko ba miti mang mad e ba t’uf ni ngar chuwgad ngay. Ma piin ni kar bad u boch e binaw nib palog ko gin ni ma par yooren e girdi’ riy e sana rayog ndar nanged rogon ni ngar maruwelgad nga boch ban’en ni bay u lan e naun ko ngabchey ni yima lum ara yima klin ngay ni ma fanay e gamig.

⁹ Bay boch e program ni ke ngongliy e am rogon ni nge ayuweg e piin ni kar milgad ko binaw rorad ya nge yag nra mechamgad ko par ko gin ni ka ranod ngay. Machane, ba ga’ ni in e pul nga tomuren ni kan ayuweg e pi girdi’ ney, ma aram e ma pagrad e am ni yad e ngar ayuweged yad. Re n’ey e rayog ni nge k’aring e mochuch ngorad nib gel. Am susunnagem ni ga be guy rogon ni ngam fil yugu reb e thin, mag mecham nga boch e motochiyel nib beech, nge rogon pangiy u fithik’ e girdi’, nge rogon ni ma lemnag e girdi’ e tayim, nge rogon e tax ni yima pi’, nge malfith ni yima thang, nge skul ni yima un ngay, nge rogon i llowan’nag e bitir, ni gubin ni ngam rin’ u taabangiyal’! Ere, rayog ni ngam gum’an’nagem mag ayuweg e pi walag ni yad be mada’nag boch e magawon ni aray rogon u fithik’ e tayfan, fa?​—Fil. 2:3, 4. 

10. Uw rogon nrayog ni ngad gelnaged e michan’ rok e pi walag ni kar milgad ko binaw rorad kar bad ko binaw ara nam rodad? (Mu guy e sasing ni bay u tabolngin e re article ney.)

¹⁰ Maku reb e, ku bay yu ngiyal’ ni ma mo’maw’nag e am rogon ngak e pi walagdad ni ngar nonad ko ulung ko gin ni ka ranod ngay. Bay boch e ulung ko am ni ka rogned ko pi walag ney ni faanra dab ra uned nga boch e maruwel nra mo’maw’nag rogon ngorad ni ngar uned ko muulung, ma aram e dab kun ayuwegrad ara ni pagrad ni ngar pared ko fare binaw ara nam ni ka ranod ngay. Bay in e walag nde yag ni ngar pared ni yad ba mudugil u nap’an ni kan towasariyrad ni ngar rin’ed e re n’ey ni bochan e marus nge ku bochan ni yad ba meewar. Ere, ba fel’ nnap’an ni nga yigi taw e pi walag ney ma gad guy rogon ni ngad mada’naged yad ni ka chingiyal’ nem. Ya ba t’uf ni ngar nanged ni gad be lemnagrad. Faan gad ra dag e runguy ngorad ma gad ayuwegrad u boch ban’en nib t’uf rorad, ma aram e rayog ni nge gel e michan’ rorad.​—Prov. 12:25; 17:17.

NGAN AYUWEG E PIIN NI KAR MILGAD KO BINAW RORAD KO TIN NIB T’UF RORAD

11. (a) Mang e som’on nib t’uf ni ngan ayuweg e pi walag riy ni kar milgad ko binaw rorad? (b) Uw rogon nrayog ni nge dag e pi walag ney ni yad be pining e magar ngak e piin ni yad be ayuwegrad?

¹¹ Som’on e rayog nib t’uf ni ngad pied e ggan, ara mad ngorad, ara yugu boch ban’en nib t’uf ko par rorad.c Mus nga bochi ban’en nde ga’ ni bod rogon ni nge pi’ reb e walag e necktie ngak bagayad e pi walag ney ni nge fanay, ma rra felfelan’ ngay. Machane, faanra ki dag e pi walag ney ngak e piin ni yad be ayuwegrad ni yad be pining e magar ko n’en ni kan rin’ ni fan ngorad, ma darur lemnaged ni ngan rin’ boch ban’en ni fan ngorad nib pag rogon, ma aram e ra mom ngak e piin ni yad be ayuwegrad ni ngar felfelan’gad ngay ni yad be pi’ e ayuw. Maku reb e, faanra un par ni yibe ayuwegrad ndab ra guyed rogon ni ngar rin’ed boch ban’en ni fan ngorad, ma aram e rayog ni ngar lemnaged ndabiyog ni ngar ayuweged yad, maku rayog ni nge kireb e tha’ u thilrad e pi walag ni be ayuwegrad. (2 Thess. 3:7-10) Yugu aram rogon, mab t’uf ni ngan ayuwegrad u boch ban’en nib t’uf rorad.

12, 13. (a) Uw rogon nrayog ni ngad ayuweged e piin ni kar milgad ko nam rorad u boch ban’en nib t’uf rorad? (b) Mu weliy reb e kanawo’ ni kan rin’ e re n’ey riy.

¹² De t’uf ni ngan fanay boor e salpiy ni ngan ayuweg e pi girdi’ ney, ya tayim rodad e aram e n’en nib ga’ fan ma kub t’uf ni ngad daged ngorad ni gad be lemnagrad. Rayog ni kemus nib t’uf ni ngad daged ngorad rogon ni ngar uned u bus, ara taxi, ara boch ban’en ni ma milekag e girdi’ riy, ara rogon ni ngar chuw’iyed boch e ggan nib manigil nib sobut’ puluwon, ara gin nrayog ni ngar feked boch e talin e maruwel riy ara masin ni bod rogon e masin ko wup mad ara thum’ pan ya nge yag nrin’ed boch ban’en ni nge yag e salpiy riy ngorad. Bin th’abi ga’ fan e rayog ni ngam ayuwegrad ni ngar uned ko pi n’en ni yima rin’ u lan e ulung. Ma faanra rayog, mu um fekrad ko muulung. Maku reb e, ba fel’ ni ngam weliy ngorad rogon nib fel’ ni ngan non ko girdi’ u nap’an e machib ko binaw ni ga ma un riy ko machib. Maku rayog ni ngam fekrad ngar uned ngom ko machib.

¹³ Nap’an ni yib aningeg i pagel ni kab fel’ yangarrad ni kar milgad ko binaw rorad nga reb e ulung, ma aram me fil boch e piilal rogon e yan u karrow ngorad, nge rogon ni ngan typenag e babyor, nge rogon ni ngar yoloyed e résumé rorad ara bangi babyor ni ma yoloy be’ ni be guy rogon ni nge un nga barba’ e maruwel ni bay boch ban’en riy u murung’agen, nge tolngin e skul rok, nge murung’agen boch e maruwel ni i un ngay kafram, mu kun ayuwegrad u rogon ni ngar yarmiyed e tayim rorad ya nge yag nra pigpiggad ngak Jehovah nib fel’ rogon. (Gal. 6:10) De n’uw nap’an nga tomuren, ma aram mar uned ko pioneer. Ayuw nni pi’ ngorad nge athamgil nra ted ni ngar nameged boch ban’en ni fan ko tirok Got ban’en e aram e n’en ni ayuwegrad ni ngar mon’oggad ko tirok Got ban’en ma dar manged bang ko re fayleng rok Satan ney.

14. (a) Mang boch ban’en nib t’uf ni nge siyeg e pi walag ni kar milgad ko binaw rorad? (b) Mu weliy reb e kanawo’ ni kan rin’ e re n’ey riy.

¹⁴ Piin ni kar milgad ko binaw rorad e ku taareb rogorad ngak yugu boch e Kristiano, ya ba t’uf ni ngar siyeged e towasar ara boch ban’en nrayog ni nge waliyrad ni ngar guyed rogon ni nge yoor e chugum rorad me magawon e tha’ u thilrad Jehovah.d Lije ni faan kan weliy murung’agen nge pi walagen e dar paged talin e n’en ni fil e chitamangirad ngorad ni ayuwegrad ni nge gel e michan’ rorad ko ngiyal’ ni baaram ni yad be mil ni ngar chuwgad ko binaw rorad. I lungurad: “I n’ag ni t’ataareb e pi n’en nug feked nge un ngomad nde ga’ fan. Me tomur riy ma aram me chibiy fare kabang nga lang ndakuriy ban’en riy, me siminmin me gaar: ‘Kam guyed? Kemus e n’en nib t’uf romed!’”​—Mu beeg e 1 Timothy 6:8.

NGAN AYUWEG E PIIN NI KAR MILGAD KO BINAW RORAD KO N’EN NTH’ABI T’UF RORAD

15, 16. (a) Uw rogon ni ngad ayuweged e piin ni kar milgad ko binaw rorad ko tirok Got ban’en? (b) Uw rogon ni ngad ayuweged e piin ni kar milgad ko binaw rorad u boch ban’en nra fal’eg lanin’rad?

¹⁵ Yugu aram rogon nib t’uf ni ngan ayuweg e pi girdi’ ney ko tin nib t’uf ko par rorad, machane n’en nth’abi t’uf rorad e aram e ngan ayuwegrad ko tirok Got ban’en min fal’eg lanin’rad. (Matt. 4:4) Rayog ni nge pi’ e piin piilal e ayuw ni aram e ngar guyed rogon ni nge yag boch e babyor ni kan ngongliy ni thin rorad min ayuwegrad ni ngar mada’naged boch e walag ni yad manang e thin rorad. Boor e piin ni kar milgad ko binaw rorad e kar paloggad ko girdi’ rorad nrib chugur e tha’ u thilrad, nge girdi’ u lan e binaw rorad, nge ulung rorad. Ere, ba t’uf ni nge dag e pi Kristiano ni taareb e michan’ rorad ngorad ni yad ba t’uf rok Jehovah ma be runguyrad. Ya faanra danga’, ma rayog ni ngar adaged ni ngaur chaggad ko girdi’ rorad ara girdi’ ko nam rorad ndar nanged e tin riyul’ ni yad ma par u rom ni yad manang rogon e yalen rorad nge pi magawon ni kar bad u fithik’. (1 Kor. 15:33) Faan gad ra dag ngorad ni gad ba felfelan’ ngay ni ngar manged bang ko ulung rodad, ma aram e gad be maruwel Jehovah u taabang ni gad be “yoror ko pi milekag ni yad ma par u daken e but’ rodad.”​—Ps. 146:9, BT.

¹⁶ Piin ni kar milgad ko binaw rorad e n’umngin nap’an ni kab fos e piin ni ur gafgownaged yad, ma aram e sana dabkiyog ni ngar sulod ko binaw rorad ni bod rogon e n’en ni buch rok Jesus nge chon e tabinaw rok u nap’an ni kab achig. Maku reb e, ki yog Lije ni “boor e gallabthir ni kar guyed boch i girdien e tabinaw rorad ni kan kolrad u gelngiy min li’rad ngar m’ad e dabki ga’ran’rad ngay ni ngar feked pi fakrad ngar sulod ko yungi n’em ni i buch e pi n’em riy.” Ere, pi walag ni yad ma par ko pi binaw ara nam ni be mil boch e girdi’ ngay ni kar n’aged e binaw rorad e ba t’uf ni ngar daged ngorad ni yad be ‘runguyrad; ma ra bagayad mab t’uf rok bagayad nrogon e piin ni walag ni girdien Kristus, mu ur pired nib fel’ e thin rorad ngorad ma ba sobut’ lanin’rad ngorad.’ (1 Pet. 3:8) Boor e pi girdi’ ney e kar dabuyed ni ngar nonad ngak yugu boch e girdi’ ni bochan e gafgow ni un tay ngorad. Ere, bayi n’en ma yad be tamra’ ni ngar weliyed murung’agen e gafgow ni un tay ngorad nib ga’ nu nap’an ni bay pi fakrad u toobrad. Ere, ba fel’ ni ngam fithem ni nge lungum, ‘Faanra gag bagayad e pi girdi’ ney, ma uw rogon e ngongol ni gu baadag ni ngan dag ngog?’​—Matt. 7:12.

NGAN MACHIBNAG E PIIN NI KAR MILGAD KO BINAW RORAD NI GATHI YAD BOCH E PI MICH

17. Uw rogon nrayog ni nge fel’ laniyan’ e piin ni kar milgad ko binaw rorad u nap’an ni yira machibnagrad?

¹⁷ Boor e girdi’ ni yad be mil ngar chuwgad u boch e nam ni kan taleg e machib riy. Ke magar e Pi Mich ni yad ma par ko pi binaw nge nam ni ma mil e pi girdi’ ney ngay, ya bokum biyu’ i yad e ke yag ni ngar rung’aged e “thin rok Got ni murung’agen e gagiyeg rok.” Ma pi girdi’ nem e fin aram e som’on ni kar rung’aged e machib. (Matt. 13:19, 23) Boor ko pi girdi’ ney ni ‘ke aw parowrad’ e ke yag ni nge fel’ lanin’rad ko muulung ni yad ma un ngay mab papey ni ma lungurad: “Riyul’ ni ba’ Got romed u roy!”​—Matt. 11:28-30; 1 Kor. 14:25.

18, 19. Uw rogon ni ngad daged ni gad ba gonop u nap’an ni gad be machibnag e piin ni kar milgad ko binaw rorad?

¹⁸ Ba t’uf ni nge kol ‘ayuw’ e piin ni yad ma machibnag e pi girdi’ ney mar ‘gonopiyed’ rogon ni yad ma machibnagrad. (Matt. 10:16; Prov. 22:3) Ba t’uf ni ngam gum’an’nagem ngam motoyil ngorad ni ngar weliyed e pi magafan’ rorad. Machane dab mu weliy ngorad boch ban’en u murung’agen ngongolen e am. Mu fol ko fonow ni ke pi’ e branch ofis nge girdien e am; mag guy rogon ndab mu rin’ ban’en nra tay e yafos rom ara yafos rok yugu boch e girdi’ nga thatharen e riya’. Mu guy rogon ni ngam nang rarogon e teliw nge yalen rorad mag dag ni ga be tayfan. Bod ni, bay boch e pi girdi’ ney ni kar bad u boch e nam nrib mudugil rogon e munmad ni ma tay e piin nib pin riy ma ri yima fal’eg i yaliy e re n’em. Ere, nap’an ni ga be machibnag e piin ni kar milgad ko binaw rorad, mag munmad u reb e kanawo’ ndabi magawonnag lanin’rad.

¹⁹ Gad baadag ni ngad ayuweged e girdi’ ni kar gafgowgad ni kub muun e girdi’ ngay ni gathi yad boch e Pi Mich, ni bod rogon facha’ nu Samaria ni weliy Jesus murung’agen ko fare fanathin rok. (Luke 10:33-37) Bin th’abi fel’ e kanawo’ ni ngam ayuweg e pi girdi’ ney riy e aram e ngam weliy fare thin nib fel’ ngorad. Reb e piilal ni ke ayuweg boor e girdi’ ni kar milgad ko binaw rorad e yog ni gaar: “Rib ga’ fan ni ka ngiyal’ nem ma gad tamilangnag ngorad ni gad boch e Pi Mich Rok Jehovah, ma n’en ni gad be nameg e aram e ngad ayuweged yad ko tirok Got ban’en, ma gathi ngad ayuweged yad ko chugum. Ya faanra danga’, ma rayog ni nga i chag boch i yad ngodad ni bochan e yad be guy rogon ni nge yag ban’en riy ngorad.”

RA YIB ANGIN NI YIRA FELFELAN’ NGAY

20, 21. (a) Mang angin nra yib riy ni faan gad ra dag e t’ufeg ngak e piin ni kar milgad ko binaw rorad? (b) Mang e gad ra weliy ko bin migid e article?

²⁰ Faan yira t’ufeg e “pi milekag,” ma ra yib angin nib fel’. Reb e walag nib pin e yog nra milgad chon e tabinaw rok ngar chuwgad u Eritrea ni bochan e gafgow ni yibe tay ngorad u rom. Tomuren nra milekaggad aningeg i bitir ni fak u but’ u daken e ted u lan meruk e rran, ma aram mar tawgad nga Sudan. I yog e re walag nem ni gaar: “I ayuwegmad e pi walag u rom ni bod rogon ni yad be ayuweg boch i girdien e tabinaw rorad. Ra pied e ggan, nge mad, nge naun ni nggu pared riy, mu ur ayuweged gamad u rogon ni nggu milekaggad u bang nga bang. Mini’ e piin ni yad ra pag boch e girdi’ ndar nanged owcherad ngar pared u taferad ni bochan e yad ma liyor nga taab Got? Kemus ni yigoo Pi Mich Rok Jehovah!”​—Mu beeg e John 13:35.

²¹ Ere, uw rogon pi fak e pi girdi’ ney ni kar milgad ko binaw rorad nge yugu boch e girdi’ ni yad be yib u boch e nam nga daken e nam rodad? Bin migid e article e gad ra weliy riy rogon nrayog ni ngad maruwelgad u taabang ni gad gubin ya nge yag nda ayuweged e pi girdi’ ney ni ngar liyorgad ngak Jehovah u fithik’ e felfelan’.