Deer Ko Piin Ma Beeg

Ba puluw ni nga i chaariy reb e Kristiano e boyoch ni nge ayuweg ir ngay u nap’an ni ke yib be’ ni nge li’, fa?

Yugu aram rogon ni ma rin’ e piin Kristiano boch ban’en ni ngar ayuweged yad ndabi buch ban’en rorad, machane yad ma guy rogon ni ngar ngongolgad nib puluw ko pi kenggin e motochiyel nu Bible. Pi kenggin e motochiyel ney e be tamilangnag nde puluw ni nga i chaariy e piin Kristiano boch e talin e cham ni bod rogon e boyoch ni fan e ngar ayuweged yad ngay u nap’an ni ke yib be’ ni nge li’rad. Am lemnag e pi thin ni baaray:

Ba thothup e yafos ko girdi’ u wan’ Jehovah. David ni fare psalmist e manang ni Jehovah e ir “enggin gubin e yafos.” (Ps. 36:9, BT) Ere, faanra dugliy reb e Kristiano ni nge rin’ boch ban’en ni nge ayuweg e yafos rok ara pi n’en nib milfan ngak, ma aram e thingari rin’ u reb e kanawo’ ndabi li’ be’ riy nge yim’ me aw ni ir e ba kireb e rok.​—Deut. 22:8; Ps. 51:14.

Yugu aram rogon ni boor ban’en nrayog ni ngan fanay ni ngan li’ be’ ngay, machane boyoch e aram e bin th’abi mom e talin e cham nrayog ni ngan maad’ad riy ku be’, ndemtrug ko ban’en ni kan kal riy ara ke rin’ be’ ni lem rok.a Maku reb e, facha’ ni keb ni nge liem e rayog ni be magar nrin kol ara guy be’, ere faanra guy ni bay e boyoch rom ma rayog ni nge gel e ubchiya’ ko fare magawon me maad’ad ara yim’ be’ ni bochan.

Bin tomur e nep’ ko yafos rok Jesus u fayleng me yog ngak pi gachalpen ni nge bagayad me guy rogon ni nge yag bang e sayden ngak, machane der yip’ fan ni ngar fanayed e pi sayden nem ni ngar ayuweged yad ngay. (Luke 22:36, 38) Bin riyul’ riy e, fan ni yog Jesus ngorad ni ngar rin’ed e re n’em e bochan e nge fil ngorad nthingar dab ra uned ko cham, ni mus ni faanra ke yib e girdi’ ngorad ni kar feked talin e cham. (Luke 22:52) Tomuren ni fek Peter e sayden rok nge toy ngak fare tapigpig rok e en th’abi tolang ko prist, ma aram me gaar Jesus ngak: “Mu sulweg e sayden rom nga tafen.” Tomuren e re n’ey, ma aram me yog Jesus ba kenggin e motochiyel ni ma pow’iy pi gachalpen e ngiyal’ ney ni gaar: “Urngin e piin ni yad ra girngiy e sayden e yira li’rad ko sayden ngar m’ad.”​—Matt. 26:51, 52.

Girdi’ rok Got e kar pirdiiyed e sayden rorad kar ‘ngongliyed talin e maruwel riy ni ma gi’ e but’, ma kar yodoromnaged e sarey rorad kar ngongliyed e yar riy ni yima th’eth’ab papa’ngin e woldug ngay’ ni bod rogon ni kan yiiynag ko Mikah 4:3. Re n’ey ni ma rin’ e tin riyul’ e Kristiano e ba puluw ko fare thin ni yog apostal Paul ni gaar: “Faanra rin’ be’ ban’en nib kireb ngomed, ma dab mu sulweged taban ngak nib kireb. . . . Mu rin’ed urngin e tin nrayog romed ngam pired ni ba aw e gapas u thilmed nge urngin e girdi’.” (Rom. 12:17, 18) Yugu aram rogon urngin e gafgow ni yan Paul u fithik’, nib muun ngay e girdi’ ni “moro’ro’ ni ma fek ban’en u fithik’ e yargel,” machane de togopuluw ko thin ni yog, maku dariy ba ngiyal’ ni togopuluw ko pi kenggin e motochiyel u Bible ni bochan e nge ayuweg e yafos rok. (2 Kor. 11:26) Bin riyul’ riy e, i pagan’ ngak Got nge Thin Rok ni bay e gonop riy, ni gonop ni “ka boor fel’ngin ko tatalin e cham.”​—Ekl. 9:18, BT.

Kab ga’ fan e yafos u wan’ e piin Kristiano ko chugum. “Bin riyul’ e yafos ku be’ e gathi ni ngongliy ko pi n’en ni ir e mmil suwon ngak faanem.” (Luke 12:15) Faanra ke non reb e Kristiano u fithik’ e sumunguy ngak reb e moro’ro’ ni be fek talin e cham ma de yib angin, ma aram e nge fol ko fare fonow ni pi’ Jesus ni gaar: “Dab mu fulweged taban e kireb ngak e en ni ke rin’ e kireb ngomed.” Re n’ey e ku rayog ni nge yip’ fan ni ngad pied ngak facha’ urngin e tin ni baadag ni nge fek. (Matt. 5:39, 40; Luke 6:29)b Machane, bin th’abi fel’ e ngam guy rogon ni ngam siyeg e re n’ey ndabi buch. Reb e kanawo’ nrayog ni ngam rin’ e re n’ey riy e aram e dab um uf ko pi chugum ni ke yag ngom u “roy u fayleng nri ma uf e girdi’ ngay.” Ku rayog ni ngam ayuwegem ni faanra manangem e piin buguli yoror rom ni gur bagayad e Pi Mich Rok Jehovah ni ga ma par u fithik’ e gapas.​—1 John 2:16; Prov. 18:10.

Piin Kristiano e yad ma guy rogon ndab ra magawonnaged e nangan’ rok yugu boch e girdi’. (Rom. 14:21) Faanra nang e pi walag ni bay reb e walag u lan e ulung ni bay e boyoch ni fen ni ke tay ni nge ayuweg ir ngay u nap’an ni ke yib be’ ni nge li’, ma rayog ni ngar gingad ko re n’ey ara magawonnag lanin’rad. Sana de togopuluw ko motochiyel ko am ni ngad fanayed e boyoch, machane bochan nib t’uf pi walagdad rodad, ma aram fan ni dubdad ni ngad rin’ed ban’en nra magawonnag lanin’rad.​—1 Kor. 10:32, 33; 13:4, 5. 

Piin Kristiano e yad ma guy rogon ni ngar daged e ngongol nib fel’ nrayog ni nge folwok yugu boch e girdi’ riy. (2 Kor. 4:2; 1 Pet. 5:2, 3) Faanra bay e boyoch rok reb e Kristiano ni ke tay ni nge ayuweg ir ngay u nap’an ni ke yib be’ ni nge li’, ma aram e ra fonownag e piin piilal facha’. Faanra ke dugliy ndabi chuweg fare boyoch ni yugu aram rogon ni kan fonownag riy, ma aram e be m’ug nder dag e kanawo’ nib fel’ nrayog ni nge folwok yugu boch e girdi’ riy. Ere, dabiyog ni ngan pi’ boch e maruwel ngak u lan e ulung. Ku arrogon reb e Kristiano ni ke un nga reb e maruwel ni yima fanay e boyoch riy. Ere, kab fel’ ni nge gay facha’ yugu reb e maruwel ni nge un ngay!c

Ra reb e Kristiano ma ir rok e ba milfan ngak ni nge dugliy rogon ni nge ayuweg ir, nge chon e tabinaw rok, nge chugum rok, maku ir e ba milfan ngak ni nge dugliy e gin ni nge un riy ko maruwel. Yugu aram rogon ma thingari guy rogon ni nge puluw e n’en ni ke dugliy ko pi kenggin e motochiyel u Bible. Got rodad e ir reb e Got nib gonop, ma ke pi’ e pi kenggin e motochiyel ney ngodad ni bochan e gad ba t’uf rok. Aram fan ni pi Kristiano nib chugur e tha’ u thilrad Jehovah e darur chuw’iyed e boyoch ngar ted ni ferad ni ngar ayuweged yad ngay u nap’an ni ke yib be’ ni nge li’rad. Yad manang ni faanra pagan’rad ngak Got mar folgad ko pi kenggin e motochiyel u Bible, ma aram e rayog ni ngar pared nib pagan’rad ndariy n’umngin nap’an.​—Ps. 97:10; Prov. 1:33; 2:6, 7.