AZI’NÉ 56
Neung ajou apou anè légheu nguia atchou’té a kouèt ngô ta’
Mpè pou ngô ta’ nnô pô émô’ Ménjheuè-njiô Joovah a nguia atchou’té pa’a, nna’ njou’ ngô pa’ efô David yi a lé leu nguè: “A mbou épô mémia, mbou ngô ajouô mbông tè’ a létchou’té nang-a ta’ nnô!” (Psaume 133:1) Mpè ping ngô lé kouèt ngô ta’ té ghô yi mpè fôk mbœu’. Mpè métseum é pôngtè léneung-è apou anè légheu tè nguia atchou’té a kouèt ngô ta’.
1. Akô tshwi mbông anè méghang-afa’ Ndem?
O gheuô atchou’té anè émô’ méla’, nzi té zhè léshoung-né ashoung-nè ala’ épouô ala’ mèt, mbô o ké jou’ a ghô pa’ éfœu’ zi o nguia atchou’té zi o ghôô nkoo métchou’té éwou la. A poup mela’akô? A mela’mi mékèté mi mpè lôk nzi’nè Biible é pou ngô ta’ azou a nteu ngông ntseum. Nkông-né é zeung mbou ngô a tsetsèrè pimpè. Mpè zi mbou nang-a akô aji’ lè, mbô mpè “wou’tè Joovah, mbing mbou nkouèt ngô ta’ té ndôk nguemtè yi.”—Sophonie 3:9, ghiité.
2. O ghô gheu jou é lèkô té ndôk nkuité a mè lékouèt ngô ta’?
“Pè tchii-nèt nkông-né ménèt mè té fhô taa nteu.” (1 Pierre 1:22) O ghô zing ndeung-ndeung anè nteukné jiô mèt é lèkô? A tchi’ yi o zôkô ghiiè mélô’ épouô, o tchiitè méntsi mbông môp. Té lè ngwoua-a épouô pi pè a pôp é ta’ azou, zeung-è ntra a lézhè épouô pi pè a pôp é ta’ ala’a. Pou ntra jou pa’ o kou’, tè mè lé jiô o wuè apa’tè.—Tông-ô 1 Pierre 2:17.a
3. Ndœu’né a ghô assi o ghaa?
Mpè wè mélô’, té nké mbing mbou ngô ta’ ntchou. A mela’poup tè mbô mpè gha lè ngô émô’ éfœu’, gning a jou’ tépông mela’ pimpè. Ashoung-né Ndem a leu nguè “pè ku’né . . . ntchoussi méfa mè nzeung-nè zeung-né anè ménou mi gning a faa mbou pè,” mbing nzeung ndeu nguè: “Pa’ Joovah a lé kông ntchoussi méfa mè la, pè tchoussi méfaa mè nzeung-né zeung-né.” (Tông-ô Colossiens 3:13.) Mpè émô’ éfœu’, mbou faa a mbou Joovah, a ping ntchoussi méfa mimpè. A poup tè mbô a si nkông-ô nguè mpè zeung ntchoussi méfa épouô pi é faa mbou pimpè. O jiô ngô yi o gheu tè mmô’ meung-mô a jou’ tépông, o lè ntra ngheu tè pè yi é lé nang méssèrè méssèrè.—Tông-ô Matthieu 5:23, 24.b
TCHHI-NÈT NTSA’A MBÔNG-Ô
O ghô gheu lèkô té ndôk nkuité a mè lénang nkouèt ngô ta’, mbing nzeung nang a nteu mbouèné.
O gheuè akô é lôk fa’ léghè mbouèné é ghô assi?
4. Pou ngwa’ apa’té
Mpè si mbou ntsaa a lékông-ô épô mémia ntseum té tsiè mmô’. Tè, a ké té azou nzang-né a léveung a léghô pô épouô pi, é té pa’ pimpè la. Akô a ghô ping nkuitè yimpè? Tông-ô Actes 10:34, 35, mbing ntsô’ ménzèté mouô:
Joovah a veung nguè épouô métseum té tshwi ntsi, é gheumtè yi. Léghô wouô mèt a ghô ping nkuitè wou a léjiô gning yi pè yi é té si ngô ta’ ala’a, é lèkô?
Akô tshounè épouô a léwuè apa’té aji’ zi o nang éwou? Tè o pôngtè léwuè jou apa’té?
Tông-ô 2 Corinthiens 6:11-13, mbing ntsô’ nzèté jiô:
Tè o jiô jou nguè o ghô gheu é lèkô té ndôk tshoutè nèt mbaaté ta’ meung-mô yi a té ta’ ala’ pô wou?
5. Tchoussi méfa épô mémia pou, mbing nang-a nteu mbouèné pô pôp
Joovah a tchoussi méfa mimpè, tè mbô pa’ a ghô lé neung alé’é faa mbou pimpè. Tông-ô Psaume 86:5, mbing ntsô’ ménzèté mouô:
Léleung tchiô mèt a zi’nè yimpè akô anè pa’ Joovah tchoussi méfa mimpè poup?
Joovah a tchoussi méfa mou pa’a, o pou ngô mé lékak mela’akô?
Akô a ghô gheu tè a pou nteue a mbou pimpè a léjou’né pô émô’ épouô?
Mpè ghô ghaa té fœu’nè Joovah anè lékouèt ngô ta’ pô épô mémia pimpè? Tông-ô Proverbes 19:11, mbing ntsô’ nzèté jiô:
Gning a taktè wou, kèè ngheuè ajoumi a peukè wou lè, mbô o ghô ghaa tè pè yi é lé zôkô shoung-nè ménèt kèè ngwuè méntsang?
A ping nké ngô émô’ éfœu’ pa’a, mpè mè gheu ajoumi a ghô peukè gning. A pik té ngô poup pa’a nzètè nguè mpè ghaa? Jiô VIDÉO wouô, mbing ntsô’ nzèté jiô.
Meung-mô yi méngwi yi mè jiô yi a nteu vidéo la, a lé gheuè akô té ndôk mbaa méntsang?
6. Mpè fa’ ménkô’ô mbông épô mémia pimpè
Mpè nông fa’a lézhè épô mémia pimpè pa’a, njiô ménkô’ô mbông môp, mbô mélô’ môp. Mpè ghô ping ngheu lèkô té ngô éfœu’ métseum, mbou ntshiè athouô zimpè anè ménkô’ô mbông môp? Jiô VIDÉO wouô, mbing ntsô’ nzèté jiô.
Akô ghô a kuitè wou a léjiô ménkô’ô mbông épô mémia pou?
Joovah a tchii-nèt njiô méntsi mbông mi mpè wè. Tông-ô 2 Chroniques 16:9a, mbing ntsô’ nzèté jiô:
Lézhè léghè Joovah a tshwi njiô ntsi mbông zi mpè wè, a gheu o jou’ ngô lèkô?
Mè zi ndôkô tsitsi yi teue nkap tè’ ntchoungté mmô’ kweung, mbô a ghô nna’ ké ngwè émô’ épô mélô’, tè, nké nteue-nzwing; a poup tè mbô épô mémia pimpè é wè mélô’, tè, nzwing wôp ké mbing nteue a mbou Joovah tè’
ÉPOUÔ É MMÔ’ ÉFŒU’ NDEUÈ NGUÈ: “A zèté nguè meung ngué tchoussi gning, mbô ngang a zi ndôô gha tchoussi.”
Mela’akô a zèté nguè mpè lèè ngakné ntchoussi méfaa émô’ épouô?
KIMTÉ
O tchoussi méfa épô mémia pou, mbing nkông mémia pou ntseum, mbô o tsia poup é neung ajou apou anè légheu tè nguia atchou’té ntseum a pou nkouèt ngô ta’.
O ghô tsô’ lèkô
O ghô gheu lèkô té mbou ngwa’ apa’té?
O ghô ping ngheu lèkô afœu’ zi o wè ntsang pô mmô’ meung-mô?
A si nzètè nguè o fœu’nè Joovah anè létchoussi émô’ épouô mela’akô?
KU’NÈ FA’A LÉZHÈ
Lèè njiô ta’ éfœu’ zi Yésso a lé pè azi a ghô kuitè yimpè a lé ghô lé zeung nthou mélô’ épouô.
Tè a si nzètè nguè mpè lôô a tchoussi tè a zi ngô yi mpè si njiô mbô mpè mè ka faa?
“Lélôô tchoussi a kuité a lénang nteu mbouèné” (La Tour de Garde, 1er Novembre 2002)
Lèè njiô pêté anè lénang wômbang-a mémpia pi, pô lé kwhiè nteu ala’ zi apa’té pou ngô éwou, mbing shi’ nzi’nè ajoumi lékouèt ngô ta’ é si ngô aziè.
Johny pô Gideon: pô tsetsông-ô ngô épô mémia, tè mbô pô lè méghang-mboo (6:42)
Mè ghô gheu lèkô té ntchoungté méntsang tè é zè té neung taka-taka a nguia atchou’té?
“Lôkô nkông-né ntchoungté méntsang” (La Tour de Garde, mai 2016)
a Ghiité mbaaté 6 a tsui pa’ kritèn yi a kông épô mémia pi a ghô gheu poup tè a lé tsakné amô’ aghôô zi a wuè anè yi, neung anè pôp-ô.
b Ghiité mbaaté 7 a tswhi nkè’té shoung yimpè pa’ mpè ghô gheu poup tè mpè lé wuè taka-taka pô ta’ meung-mô kèè anè nthouô éssaa lè, kèè a mvhô ndeukè lè.