Esodu
32 Bo dikabu bamona ti Mose waba kala kisina mu kukuluka ku mongo, bawu baye kutakana vaba Aloni ayi bankamba: “Tusa zaba ko mambu mbi mabe monikina Mose awowo no wutubotula ku ntoto wu Ngipiti. Diawu wutuvangila nzambi muingi ka tutuadisa.” 2 Mu kibila akiokio, Aloni wuba kamba: “Botulanu bilunga bi wola bidi mu makutu ma bakazi binu, bana binu ba bakietu ayi ba babakala, ayi tualanu biawu kuidi minu.” 3 Mu phila ayoyo, dikabu dioso babotula bilunga bi wola biba mu makutu mawu, ayi baye vana biawu kuidi Aloni. 4 Bosi Aloni wubonga wola beni bantuadila, wutula yawu mu kibobola ayi wusiulumuna yawu, ayi wuvanga kitumba kiba buka muana ngombi. Bosi basi Isaeli batona kutuba: “A Isaeli, anono nandi nzambi’aku no wukubotula ku ntoto wu Ngipiti.”
5 Bo Aloni kamona mawu, wutunga kikuma va ndeku kitumba beni. Bosi Aloni wutuba: “Yono tunkuiza kemba nkungi muingi kuzitisa Yave.” 6 Mu kilumbu kilanda va meni, bavana minkhailu miviku ayi minkhailu mi kithuadi. Bosi dikabu bakala muingi kudia ayi kunua. Ayi batelama muingi kukemba nkungi.
7 Bosi Yave wukamba Mose: “Kuluka, kibila dikabu diaku dio wubotula ku Ngipiti bama vekuka. 8 Bawu bama vekuka mu thinu, mukhambu landakana mambu yiba tuma. Bama vanga kitumba kidi buka muana ngombi, ayi badi mu kufukama vantuala kitumba beni mu kuvana minkhailu ayi badi mu kutuba: “ A Isaeli, anono nandi nzambi’aku no wukubotula ku ntoto wu Ngipiti.’” 9 Yave wubue kamba Mose: “Dikabu adiodio, ntu ngolo badi. 10 Diawu bika kumeka kuthula nkaku, kibila minu yeka bavonda baboso, mu kibila ki nganzi yidi, ayi mu nzil’aku, minu yinkuiza vanga dikabu dinneni.”
11 Bosi Mose wulomba kuidi Yave Nzambi’andi mu kutuba: “A Yave, kibila mbi befuemina dikabu diaku, ayi wuntomba kuba vondila, dikabu dio ngie veka wukula ku Ngipiti, mu mangolo mawombo ayi mu mangitukulu? 12 Kibila ngie kuvanga mawu, khanu basi Ngipiti bankuiza tuba: ‘Mayindu mambi maba yandi, diawu kaba botudila ku ntoto wu Ngipiti muingi kuba nata ku mongo ayi kuba vondila kuna.’ Buabu lemvuka vumbika nganzi’aku, ayi balula mayindu maku ma kuvonda dikabu diaku. 13 Tebukila monyo bisadi biaku Abalahami, Izaki, ayi Isaeli bo ngie veka wukanikisa mu kuleva phesi, bo wutuba: ‘Yinkuiza vanga nkun’inu wuba wuwombo buka zimbuetila ku diyilu, ayi yinkuiza vana nkun’inu ntoto wo yibe lumonisa, muingi wuba kiuka kiawu mu zithangu zioso.’”
14 Mu kibila akiokio, Yave wubalula makani mandi ma kuvonda dikabu diandi.
15 Bosi Mose wukuluka ku mongo na mamanya muadi muba Zithumu. Mamanya beni maba masonama mu zikhonzu zia ziwadi, kuntuala ayi kumbusa. 16 Naveka Nzambi wuvanga mamanya beni ayi naveka wusonika zithumu ziba muna. 17 Bo Yosua kayuwa dikabu kutenduka, nandi wukamba Mose: “Yidi mu kukuwa biyoko bi mvita va kibuangu kidi dikabu.” 18 Vayi Mose wutuba:
“Nkunga yinkuwa, wisi ko wu lunungu,
Mvandi wisi ko nkunga wu manyongi.
Vayi widi ntindu wunkaka wu nkunga.”
19 Mu phila ayoyo, bo Mose kavitila, nandi wumona kitumba ki muana ngombi bavanga, ayi bo kamona ti dikabu baba kina, nandi wudasuka ayi wukuba va tsi va ndeko mongo, mamanya maba yandi muba musonama zithumu, ayi mawu mabudika. 20 Mose wubonga kitumba beni bawu bavanga, wusiulumuna kiawu ku mbazu, bosi wutula kiawu mu nlangu wuba vana, ayi wuba kamba banua nlangu beni. 21 Ayi Mose wukamba Aloni: “Kibila mbi ngie bebikila dikabu adiodio ba kuvukumuna kuvola disumu adiodio dingolo?” 22 Aloni wuvutudila Mose: “A mfumu’ama bika kudasuka, ngie zebi buboti ti dikabu adiodio mayindu mambi makala yawu. 23 Bawu babe khamba: ‘Tusa zaba ko mambu mbi mabe monikina Mose, dibakala no wutubotula ku ntoto wu Ngipiti, diawu wutuvangila nzambi muingi ka tutuadisa.’ 24 Diawu minu yiba kambidi: ‘Woso mutu widi biuma bi wola, kabotula muingi katuala kuidi minu.’ Bosi minu yikubizi biawu ku mbazu, ayi biawu bikitukizi kitumba akiokio kidi buka muana ngombi.”
25 Mose wumona ti Aloni kasa nunga ko kutuadisa buboti dikabu, ayi wuba yekula muingi bavanga moso mambu batidi, ayi mawu mavanga muingi zimbeni ziawu baba vueza. 26 Bosi Mose wutelama va khotolo kibuangu kiba dikabu, ayi wutuba: “Woso widi ku khonzu Yave, kiza akuku.” Zilevita zioso baye kutakana vaba Mose. 27 Ayi Mose wukamba zilevita beni: “Buakabu butubidi Yave Nzambi yi basi Isaeli: ‘Bonganu zimbedi zinu ayi zungidilanu kibuangu kioso kidi dikabu, muingi luvonda batu boso babe vola disumu, kuba kuandi zikhomba zinu voti bakundi binu.’” 28 Zilevita beni bavanga mamoso Mose kaba tuma. Mu kibila akiokio, 3.000 di babakala bayiza fua mu kilumbu beni. 29 Bosi Mose wutuba: “Luyidiodisanu muingi luvanga kisalu ki Yave, kibila bubu benu lube vonda batu boso babe vola disumu, kuba kuandi bana binu voti zikhomba zinu. Nzambi wunkuiza lusakumuna mu kibila akiokio.”
30 Mu kilumbu kilanda, Mose wukamba dikabu: “Benu lube vola disumu dingolo, diawu minu yemmaka ku mongo muingi kuedengana Yave ayi kundinda muingi ka mulemvukila.” 31 Mu phila ayoyo, Mose wuvutuka vaba Yave, ayi wutuba: “Dikabu babe vola disumu dingolo, kibila babe vanga nzambi yi kitumba ki wola. 32 Buabu, boti ngie tidi, wuba lemvukila mu disumu babe vola, vayi boti wisi balemvukila ko, buna kubula dizina diama mu buku besonika.” 33 Vayi Yave wukamba Mose: “Minu yala kubula to mu buku, dizina di woso mutu wumvola disumu. 34 Buabu yenda, ayi nata dikabu ku ntoto yibe kukamba. Mbasi’ama wala kuenda vantual’inu, vayi bo thangu yala fuana, minu yala kuba fundisa mu kibila ki disumu babe vola.” 35 Bosi Yave wubika dikabu batona kuviokila mu ziphasi, mu kibila ki kitumba ki muana ngombi kio Aloni kavanga.