Levitiku

14 Yave wubue kamba Mose: 2 “Bo mutu widi buazi kankuenda kuidi nganga nzambi muingi kaba wudiodila, amama mawu mambu kafueti vanga: 3 Mutu widi buazi ayi nganga nzambi, bankuiza basika va kibuangu basi Isaeli bankalanga muingi nganga nzambi kamfiongunina. Mutu beni na kubeluka, 4 nganga nzambi wala kunkamba muingi katuala zinuni wadi zivedila, mua dibaya di nti wu cedro,* nlendi wubenga ayi mua kisafi ki hissopo muingi kundiodisa. 5 Nganga nzambi wunkuiza tuma muingi bavonda nuni yinkaka va mbata kiuma kivangulu mu tuphandu bantulanga nlangu, muidi nlangu batekila va tho yi nlangu. 6 Bosi nganga nzambi wunkuiza bonga nuni yimonyo, mua dibaya di nti wu cedro, nlendi wubenga ayi kisafi ki hissopo, ayi wala buika biuma beni mu nlangu batekila va tho kabe tula menga ma nuni kabe vondila va mbata kiuma kivangulu mu tuphandu bantulanga nlangu. 7 Bosi nandi wunkuiza dakisa menga beni sambuadi di zikhumbu kuidi mutu kadi mu kuvedisa mu kibila ki buazi, ayi nandi wunkuiza nzabikisa ti weka wudiodila. Bosi wunkuiza yekula nuni yimonyo muingi yidumuka.

8 “Mutu ba bediodisa mu kibila ki buazi, kafueti sukula bikhutu kabe vuata, kukomba mika mioso voti minlengi midi mu nyitu’andi ayi kafueti kobila. Mu phila ayoyo, nandi wunkuiza ba wudiodila. 9 Mu kilumbu sambuadi, nandi kafueti vuka minlengi miandi mioso, kuba kuandi minlengi midi ku ntu, mayedu* ayi zitsisi, bosi kafueti kobila ayi kusukula bikhutu kabe vuata. Mu phila ayoyo, nandi wunkuiza ba wudiodila.

10 “Mu kilumbu nana, nandi wala tuala mamemi muadi ayi muana dimemi didi mvu wumueka, vayi biawu bilendi ba ko bibela. Mvandi kafueti tuala zikilu* zisambanu zi falinya yilutidi yimboti basobikisa na nzeta ayi logue* yimueka yi nzeta muingi kuvana nkhailu wu zitheti. 11 Nganga nzambi wala nata mutu beni kamvedisa va khotolo nzo yinlongo, vantuala Yave va kimueka na minkhailu amiomio. 12 Nganga nzambi wala bonga dimemi dimueka muingi kuvana nkhailu wu fotu va kimueka na logue yi nzeta ayi wala diengisa biawu, kibila widi nkhailu bandiengisa vantuala Yave. 13 Bosi nganga nzambi wala vondila dimemi beni va kibuangu kinlongo, vo bamvondilanga bibulu bi kuvanina nkhailu wu disumu ayi nkhailu wuviku. Kibila dedi bo bibulu binsobila mu nkhailu wu disumu bimbelanga bi nganga nzambi, mawu mvandi bafueti vanga mu nkhailu wu fotu, kibila bidi binlongo.

14 “Bosi nganga nzambi wunkuiza bonga mua menga ma kibulu kabe vanina nkhailu wu fotu, ayi wunkuiza vinda mawu va tsongi dikutu di lubakala di dibakala beni kandiodisa, mu luzala lu ngudi lu koko ku lubakala ayi mu luzala lu ngudi lu kulu ku lubakala. 15 Nganga nzambi wunkuiza bonga mua logue yi nzeta ayi wunkuiza dukula yawu va dikanda di koko kuandi ku lukhietu. 16 Nganga nzambi wunkuiza buika luzala lu koko kuandi ku lubakala mu nzeta yidi va dikanda diandi, bosi wunkuiza dakisa nzeta sambuadi di zikhumbu vantuala Yave. 17 Ayi nzeta yinsobila va dikanda diandi, nandi wunkuiza vinda yawu va tsongi dikutu di lubakala di dibakala beni kandiodisa, mu luzala lu ngudi lu koko ku lubakala ayi mu luzala lu ngudi lu kulu ku lubakala, va kibuangu kabe vinda menga ma kibulu kabe vanina nkhailu wu fotu. 18 Nzeta yala sobila va dikanda di nganga nzambi, nandi wala vinda yawu ku ntu mutu kamvedisa. Bosi nganga nzambi wunkuiza dinda nlemvu wu masumu ma mutu beni vantuala Yave.

19 “Nganga nzambi wunkuiza vonda kibulu ki kuvanina nkhailu wu disumu, ayi wunkuiza dindila mutu kandiodisa nlemvu wu masumu muingi kaba wudiodila. Bosi wunkuiza vonda kibulu ki kuvanina nkhailu wuviku. 20 Nganga nzambi wala vika va kikuma nkhailu wuviku ayi nkhailu wu zitheti. Bosi nganga nzambi wala dinda nlemvu wu masumu ma mutu kandiodisa, muingi nandi kaba wudiodila.

21 “Vayi boti kasi ko mbakulu yi kuvana biuma abiobio, buna kafueti bonga muana dimemi muingi kuvana nkhailu wu fotu dedi bo bamvaninanga nkhailu bandiengisa vantuala Nzambi, muingi katambula nlemvu wu masumu. Mvandi kafueti vana zikilu* wadi zi falinya yilutidi yimboti basobikisa na nzeta muingi kuvana nkhailu wu zitheti na logue mueka yi nzeta, 22 ayi biduka biodi voti mabembi muadi, mu kutadila mbakulu’andi. Wunkuiza bonga nuni mueka muingi kuvana nkhailu wu disumu ayi nuni yinkaka muingi kuvana nkhailu wuviku. 23 Mu kilumbu kinana nandi wala nata biawu kuidi nganga nzambi muingi kamvedisa vantuala Yave va khotolo nzo yinlongo.

24 “Nganga nzambi wunkuiza bonga muana dimemi di kuvanina nkhailu wu fotu ayi logue yi nzeta, bosi nandi wunkuiza diengisa biawu, muingi kuvana nkhailu bandiengisa vantuala Yave. 25 Bosi nandi wala vonda dimemi di nkhailu wu fotu, wala bonga mua menga ma kibulu beni, ayi wala vinda va tsongi dikutu di lubakala di mutu kandiodisa, mu luzala lu ngudi lu koko ku lubakala ayi mu luzala lu ngudi lu kulu ku lubakala. 26 Ayi nganga nzambi wala dukula mua nkadu nzeta va dikanda di koko kuandi ku lukietu. 27 Nandi wala buika luzala lu koko kuandi ku lubakala mu nzeta yidi va dikanda diandi, bosi wala dakisa nzeta sambuadi di zikhumbu vantuala Yave. 28 Nzeta yala sobila va dikanda diandi, nandi wala vinda va tsongi dikutu di lubakala di mutu kandiodisa, mvandi wala vinda mu luzala lu ngudi lu koko ku lubakala ayi mu luzala lu ngudi lu kulu ku lubakala, va kibuangu kabe vinda menga ma kibulu kabe vanina nkhailu wu fotu. 29 Ayi nzeta yala sobila va dikanda di nganga nzambi, nandi wala vinda yawu ku ntu mutu kamvedisa, muingi kudindila nlemvu wu masumu vantuala Yave.

30 “Mu kutadila mbakulu yi mutu kamvedisa, nandi wala vana biduka biodi voti mabembi muadi, 31 yimueka muingi kuvanina nkhailu wu disumu, yinkaka muingi kuvanina nkhailu wuviku va kimueka na nkhailu wu zitheti. Mu phila ayoyo, nganga nzambi wunkuiza dinda nlemvu wu masumu ma mutu kamvedisa vantuala Yave.

32 “Awowo, wawu nsiku wu kuvedisila mutu bebakana kimbemvu ki buazi, no wukhambulu beni mbakulu.”

33 Bosi Yave wukamba Mose ayi Aloni: 34 “Bo muala zingila ku ntoto wu Kanani wo yikanikisa kuluvana muingi wuba kiuka kinu, minu kubika buazi bumonika ku nzo yi mutu, 35 buna mutu vuidi nzo beni, kafueti kuenda kuidi nganga nzambi, ayi kunkamba: ‘Nzo’ami yima tona kubasika matona.’ 36 Nganga nzambi wala tuma muingi babasisa biuma bioso bidi ku khati nzo ava nandi kufiongunina matona beni, muingi biuma bidi ku nzo beni bibika tambakana matona. Bosi nganga nzambi wala kota ku nzo beni muingi kufiongunina. 37 Nganga nzambi wala fiongunina kibuangu kidi matona, na kumona ti matona ma bebasika mu nzo beni madi ma verde, ma amarelu ayi mabenga, ayi ti mabe kota mu bibaka, 38 nganga nzambi wala kuenda va khotolo nzo beni, ayi wala zabikisa kuidi batu bankalanga kuna ti balendi bue kota ko ku nzo beni nate vamvioka sambuadi di bilumbu.

39 “Mu kilumbu sambuadi, nganga nzambi wala bue vutuka muingi kue fiongunina nzo beni, na kumona ti matona ma betembakana mu bibaka bi nzo, 40 buna nganga nzambi wala tuma muingi babotula mamanya madi matona ayi beloza mawu ku nganda divula, va kibuangu banlozilanga biuma bimvindu. 41 Bosi bela bambula reboku yi nzo yoso ku khati ayi ku nganda, ayi bala loza yawu ku nganda divula va kibuangu banlozilanga biuma bimvindu. 42 Va kibuangu babotula mamanya maba matona, bala bue tunga vana mamanya mankaka ayi bala bue tula reboku yinkaka mu nzo beni.

43 “Vayi matona ma kubue monika mu bibaka kheti bo bantula mamanya ayi reboku yinkaka, 44 nganga nzambi wala kota muingi kubue fiongunina nzo beni. Na kumona ti matona ma betembakana mu bibaka bi nzo, buna buidi buazi buntambakananga ayi nzo beni yisinkuiza bue ba ko yivedila. 45 Nandi wala tuma muingi batolumuna nzo beni ayi baloza biabioso ku nganda divula va kibuangu banlozilanga biuma bimvindu. 46 Vayi woso mutu wunkota ku nzo beni ava sambuadi di bilumbu kuduka, kasinkuiza bue ba ko wudiodila nate va masika ma builu. 47 Woso wunlala ayi wundila ku nzo beni, kafueti lava bikhutu biandi.

48 “Nganga nzambi na kubue fiongunina nzo beni ayi na kumona ti matona masa tembakana ko bo babue tula reboku yinkaka, buna nandi wunkuiza zabikisa ti nzo beni yeka yivedila, kibila matona masa tembakana ko. 49 Muingi kuvedisa nzo beni, nganga nzambi wala bonga zinuni wadi, mua dibaya di cedro, nledi wubenga ayi mua kisafi ki hissopo. 50 Nandi wala vondila nuni yimueka va kiuma kivangulu mu tuphandu bantulanga nlangu, muidi nlangu batekila va tho yi nlangu. 51 Bosi nganga nzambi wunkuiza bonga nuni yimonyo, mua dibaya di cedro, nledi wubenga ayi mua kisafi ki hissopo, ayi wala dakisa mua menga ma nuni kabe vondila va kiuma kivangulu mu tuphandu bantulanga nlangu, muidi nlangu batekila va tho yi nlangu. Mvandi wala muaka menga beni mu nzo. 52 Nganga nzambi wala bonga menga ma nuni kabe vonda, nlangu batekila va tho yi nlangu, nuni yimonyo, mua dibaya di cedro, nledi wubenga ayi mua kisafi ki hissopo, muingi kuvedisa nzo beni. 53 Bosi nganga nzambi wala bikila nuni yimonyo muingi yidumuka ku nganda divula, ayi wala vedisa nzo beni. Mu phila ayoyo, nzo beni yala ba yivedila.

54 “Awowo wawu nsiku matedi woso kua ntindu wu buazi, kuba kuandi ku ntu, va kidofo, 55 mu bikhutu, mu nzo, 56 buazi bumbasika mu bikhuzu,* matona ayi zimbeza, 57 muingi kuzaba boti kiuma kieka kimvindu voti kidiodila. Awowo wawu nsiku matedi buazi.”