Esodu

23 “Bika kutiamuna zitsangu zi luvunu. Ayi ba kutumisa muingi kuta kimbangi ku nzo yi lufundusu, bika kutuba luvunu muingi kusadisa mutu widi fotu. 2 Bika kulandakana bankaka bo bamvanga mambu mambi, ayi bika kuta kimbangi ki luvunu muingi kubuela mioko nkangu wu batu. 3 Bika kumonisa luvasanu kheti bo wumfundisa mambu ma mutu wukhambulu mbakulu.

4 “Ngie kumona ngombi yimbakala voti phunda yi mbeni’aku yibe zimbala, ngie fueti nata kibulu beni kuidi no vuidi kiawu. 5 Ngie kumona phunda yi mutu wu kulendanga yibe bua na mfuna, bika kuviokila bobo mukhambu sadisa mutu vuidi yawu, kutelimisa phunda beni.

6 “Bo wumfundisa mutu wukhambulu mbakulu, bika kumvangila mambu mambi.

7 “Bika kuvunina wadi yaku mambu, ayi bika kuzengila mutu khambulu fotu nkanu wu lufua, kibila minu yala fundisa mutu wumvanganga mambu amomo.

8 “Bo wumfundisa bankaka, bika kutambula zimbongo muingi kubuela mioko mutu widi fotu, kibila mawu malenda balula mayindu ma mutu wumfundisilanga mu phila yisonga.

9 “Bikanu kukuamisa zinzenza zinkalanga va khat’inu. Benu luzebi buboti mbi binsundula kuba nzenza, kibila benu mvinu luba zinzenza ku ntoto wu Ngipiti.

10 “Ngie fueti vata ntoto’aku ayi wala kongula mimbutu mu sambanu di mimvu. 11 Vayi mu mvu wu sambuadi, ngie wulendi vata ko mu tsol’aku muingi kuvundisa yawu. Mu phila ayoyo, biuma biala buta mu tsol’aku biala ba bidia bi batu bakhambulu mbakulu, ayi bio bawu bala bika, biala ba bidia bi bibulu binsitu. Mawu mvandi fueti vanga mu zitsola ziaku zi minti mi makundi ma vinu ayi ma olive.

12 “Ngie fueti vanga bisalu biaku mu sambanu di bilumbu, vayi mu kilumbu ki sambuadi ngie wulendi vanga ko ni kisalu, muingi mimvika miaku, zinzenza bankalanga yaku, ngombi’aku yimbakala ayi bibulu biaku binkaka, babaka bu kuvundila.

13 “Lufueti tumukina mambu moso yima lukamba. Bikanu kusambidila zinzambi zinkaka ni kutanguna mazina mawu.

14 “Kadika mvu, benu lufueti vanganga minkungi mitatu muingi kunzitisa. 15 Mu ngonda yi Abibe, ngonda benu lubasika ku Ngipiti, lufueti kembanga Nkungi wu Mapha Makhambulu Luvi dedi bo yilukambila. Ayi mu sambuadi dioso di bilumbu lunkuiza vangila nkungi beni, lulendi dia ko mapha madi luvi. Ayi bo lunkuiza mbuogimina, ni mutu kalendi kuiza ko mioko yi mioko mukhambu tuala nkhailu. 16 Lufueti kemba Nkungi wu Kuvela Mimbutu Mitheti* Miyela mu zitsola zinu, mvandi lufueti kemba Nkungi wu Zitenda ku tsuka bo lunkuiza vela mimbutu mu zitsola zinu. 17 Khumbu zitatu mu mvu, babakala boso ba dikabu bafueti kuendanga vantuala Yave, Mfumu yikiedika.

18 “Bika kuvana menga ma nkhailu’ama va kimueka na biuma bidi luvi. Ayi lulendi lunda ko mafuta ma kibulu lumvanina minkhailu mu minkungi miama nati mu kilumbu kinlanda.

19 “Ngie fueti nata ku nzo Yave Nzambi’aku mimbutu mitheti milutidi mio wumvela.

“Ayi bika kuvonda muana khombo khidi kuema.

20 “Yinkuiza fila mbasi vantual’inu muingi kalukieba mu viage lunkuiza vanga, ayi kalunata ku ntoto yilukubikila. 21 Tekanu matu ayi tumukinanu mambu kankuiza lukamba. Bikanu kumonisa ntu ngolo, kibila nandi wunkuizila mu dizina diama, ayi kalasa lemvukila ko zinzimbala zinu. 22 Vayi benu kutumukina mambu moso kalukamba ayi kuvanga mambu moso kantuba, minu yinkuiza nuanisa zimbeni zinu zioso ayi kuba tulula. 23 Kibila mbasi’ama wala kuenda vantual’inu ayi wala kulunata ku ntoto wu zi amoreu, wu zi hitita, wu zi perizeu, wu basi kanani, wu zi haveu ayi wu zi jebuzeu. Ayi minu yala tulula mimvila mioso amiomio. 24 Bika kufukimina ni kubuongimina zinzambi ziawu ayi bika kulandakana bikhulu biawu, vayi lufueti tulula bikuma bansambidilanga zinzambi ziawu ayi makunzi mawu manlongo. 25 Lufueti buongimina to Yave Nzamb’inu, benu kuvanga mawu nandi wala kulusakumuna mu kuluvana nlangu ayi bidia. Mvandi wala manisa zimbela va khat’inu. 26 Ku ntoto yinkuiza luvana, bakietu binu balasa ba ko bisita ayi balasa volukanga ko memba. Mvandi yala kulusakumuna muingi luzinga mimvu miwombo.

27 “Minu yala vanga mimvila amiomio bambona boma, ayi yala vanga mimvila amiomio bantomba kulunuanisa baba yazuka yazuka. Yala kulusadisa kununga zimbeni zinu ayi bawu bala kulutina. 28 Minu yala vanga muingi zimbeni zinu baba boma ayi baba yazuka yazuka. Ayi bo benu luala kue fikamanga, minu yala kukisa zi heveu, basi kanani ayi zi hitita vantual’ini. 29 Minu yisinkuiza kukisa ko mimvila mioso amiomio mu mvu wumueka, kibila minu kuvanga mawu, buna bibuangu bankalanga bisinkuiza bue ba ko batu ayi khanu bibulu binsitu binkuiza buelama ayi biawu bilenda kuluvanga phasi. 30 Minu yinkuiza bakukisa malembi malembi nati dikabu dinu dinkuiza buelama mu thalu, muingi luzingila mu kizunga kioso.

31 “Minu yala sikika zindilu zi kizunga kinu, kiawu kiala tonina ku Ḿbu Wubenga nati ku ḿbu wu basi Filisteia, mvandi kutonina ku thandu nati ku Muila wu Eufrates. Kibila minu yala kuluvana mangolo muingi lununga batu bankalanga mu bizunga bioso abiobio ayi benu luala kuba kukisa. 32 Bikanu kuvanga yawu luwawanu ni kubuongimina zinzambi ziawu. 33 Lulendi bika ko muingi bawu bazinga yinu va kimueka, kibila balenda kuluvukumuna muingi kusumuka. Mvandi lulendi buongimina ko zinzambi ziawu kibila mawu malenda kulutuadisa ziphasi.”