Esodu

39 Basadila minledi mivangulu mu minsinga mi linho mi ndimba azul, nledi wu violeta ayi nledi wubenga muingi kuvangila bikhutu binlongo bi kuvangila kisalu ki zinganga nzambi. Mvandi bavanga bikhutu binlongo bi Aloni dedi bo Yave kakambila Mose.

2 Nandi wuvanga éfode mu wola, nledi wuvangulu mu minsinga mi linho mi ndimba azul, nledi wu violeta, nledi wubenga ayi nledi wuvangulu mu minsinga mi linho. 3 Bavanga mua zithata zi wola ayi bakanga muna nsinga wuvangulu mu linho wu ndimba azul, nledi wu violeta, nledi wubenga ayi nledi wuvangulu mu minsinga mi linho. 4 Éfode beni yiba minlunga miodi mu mavangiti, ayi miawu miba mikangama mu zikhonzu zia ziwadi. 5 Wuvanga phonda yo kakanga mu éfode muingi kusikimisa yawu. Wuvangila yawu mu nledi wuvangulu mu minsinga mi linho mi ndimba azul, nledi wu violeta, nledi wubenga ayi nledi wuvangulu mu minsinga mi linho, dedi bo Yave kakambila Mose.

6 Wubonga mamanya ma ônix ayi wusonika muna 12 di mazina ma bana ba Isaeli. Ayi wuvuakika mamanya beni mu mua minlunga mi wola. 7 Nandi wuvuakika mamanya beni mu minlunga mi éfode mimviokila mu mavangiti, muingi Nzambi katebukilanga monyo bana ba Isaeli. Bavangila mawu dedi bo Yave katumina Mose. 8 Bosi wuvanga kikhutu ki thulu dedi bo kavangila éfode. Ayi wuvangila kiawu mu kusadila: wola, nledi wuvangulu mu minsinga mi linho mi ndimba azul, nledi wu violeta, nledi wubenga ayi nledi wuvangulu mu minsinga mi linho. 9 Bo baba futikanga kikhutu beni, kiawu kiaba banga dedimueka mu zikhonzu zioso. Dikanda dimueka di koko mu kukula ayi dikanda dimueka di koko mu kutanduka. 10 Ayi wutula mintanda minna mi mamanya mathalu mu kikhutu beni. Mu ntanda wutheti wutula rubi, topázio ayi esmeralda. 11 Mu ntanda wummuadi wutula turquesa, safira ayi jaspe. 12 Mu ntanda wuntatu wutula dimanya di léshem, ágata ayi ametista. 13 Mu ntanda wunna wutula crisólito, ônix ayi jade. Mamanya amomo mathalu, bavuakika mawu mu makongi ma wola. 14 Kadika dimanya dithalu, basonika muna dizina di muana wu Isaeli. Basonika mazina beni dedi bo bantudilanga kidimbu, ayi mawu maba sundula 12 di mimvila mi Isaeli.

15 Nandi wutula mu nledi beni mua ziphanga zidi buka mua minsinga. 16 Wutula mu kikhutu beni ki thulu minlunga miodi mi wola, ayi miawu miba mu zikhonzu zia ziwadi zi kikhutu. 17 Bosi wutula mua ziphanga beni zi wola zidi buka minsinga, mu minlunga miodi midi mu zikhonzu zia ziwadi zi kikhutu beni. 18 Nandi wukobika mua ziphanga beni mu minlunga miodi, ayi wukobika ziawu mu minlunga miodi mi éfode midi mu mavangiti kuntuala. 19 Bosi wuvanga minlunga miodi mi wola ayi wutula miawu mu zikhonzu ziwadi zi wanda zi kikhutu ki thulu ku khati, ku khonzu yintalasana na éfode. 20 Bosi bavanga mvandi minlunga miodi mi wola, ayi batula miawu mu wanda éfode, muidi makongi muadi madi mu mavangiti, va khonzu mandenginina, vayilu phonda yi éfode. 21 Bosi nandi wubonga nsinga wu ndimba azul, ayi wukanga mu makongi ma kikhutu ki thulu na makongi ma éfode, muingi kikhutu ki thulu kiba kisikama mu éfode va mbata phonda, dedi bo Yave katumina Mose.

22 Nandi wuvanga dizuela dikhambulu mioko, mu nledi wuvangulu mu minsinga mi linho mi ndimba azul, dio katula kutsi éfode. 23 Nandi wubika mua phuasa mu dizuela beni muingi kukosilanga ntu bo bamvuata diawu. Wutunga mu phuasa beni mua bisengu buka kikhutu bannuaninaga mimvita, muingi kibika bakuka. 24 Mu ḿbilu wu dizuela beni dikhambulu mioko, bawu batunga biteka bidi buka makundi ma romã, mu kusadila nledi wuvangulu mu minsinga mi linho mi ndimba azul, nledi wu violeta ayi nledi wubenga. 25 Mu ḿbilu wu dizuela beni, basobikisa biteka bidi buka makundi ma romã ayi mua zingunga zi wola. 26 Nandi wusobikisa biteka bidi buka makundi ma romã ayi mua zingunga zi wola. Buawu kavangila mu ḿbilu woso wu dizuela baba sadilanga mu kisalu ki zinganga nzambi, dedi bo Yave kakambila Mose.

27 Bavangila Aloni na bana bandi mazuela makula mu nledi wuvangulu mu minsinga mi linho. 28 Bavanga dilensu di Aloni, malensu mankaka ayi bikupa mu nledi wuvangulu mu minsinga mi linho. 29 Mvandi bavanga phonda mu nledi wuvangulu mu minsinga mi linho mi ndimba azul, nledi wu violeta, nledi wubenga ayi nledi wuvangulu mu minsinga mi linho, dedi bo Yave kakambila Mose.

30 Bawu bavanga thata yi wola ayi basonika muna: “Yave nandi tho yi bunlongo.” 31 Ayi batula mu thata beni nsinga wu linho wu ndimba azul, ayi bakanga yawu mu dilensu, dedi bo Yave kakambila Mose.

32 Mu phila yoyo, bawu bamanisa kuvanga bisalu matedi nzo yinlongo. Ayi basi Isaeli bavanga mamoso Yave kakamba Mose. Bawu bavangila buna buawu.

33 Bosi banata kuidi Mose biuma bioso bavanga matedi nzo yinlongo: biuma bi kukobika mu makunzi, makunzi, minkamba, biuma bi kuvuakika makunzi, 34 minledi mi kufuka kuyilu nzo yinlongo mivangulu mu nkanda mamemi midi matona mabenga, minlendi mivangulu mu nkanda kibulu bantedilanga foca, nledi waba vasanga kibuangu kinlongo na kibuangu kilutidi kinlongo, 35 kasu yi luwawanu na mua minti mi kunatina kasu beni, tampa yi kasu, 36 meza na biuma biandi bioso, mapha manlongo, 37 kandelabru yi wola na biuma biandi bioso, minda ayi mafuta ma minda, 38 kikuma ki wola, malasi ma kubiekila, malasi madi mfimbu wumboti, nledi wu kutula va khotolo nzo yinlongo, 39 kikuma ki cobre na biuma biandi bioso, kianga ki cobre, mua minti mi kunatina kikuma beni, dibola, kiuma ki kutetika dibola, 40 minledi mi kutula mu luphangu, makunzi na biuma bi kuvuakika makunzi beni, nledi wu kutula va khotolo luphangu, minsinga miandi ayi biuma bi kusikimisila luphangu beni, mvandi biuma bioso bavanga muingi kusadila ku nzo yinlongo, 41 bikhutu binlongo bi kuvangila kisalu ki zinganga nzambi, bikhutu binlongo bi nganga nzambi Aloni, ayi bikhutu bi bana bandi muingi kuvangila kisalu ki zinganga nzambi.

42 Basi Isaeli bavanga bisalu bioso mu kulandudila phila Yave katumina Mose. 43 Bo Mose kafiongunina bisalu bioso bavanga, nandi wumona ti bawu bavangila buna buawu Yave katumina. Bosi Mose wuba sakumuna.