Esodu
15 Mu thangu beni, Mose ayi basi Isaeli bayodila Yave nkunga awuwu:
“Yinkuiza yodila Yave nkunga, kibila nandi matambula nkembu wuwombo.
Nandi madiamisa mu ḿbu masodi ma basi Ngipiti ayi makalu mawu.
2 Yah* nandi wu kuphananga mangolo, kibila nandi weka mvukisi’ama.
Anono nandi Nzambi’ama, ayi minu yala tatamana kunzitisa. Nandi widi Nzambi yi tat’ama, minu yala tatamana kunkembisa.
3 Yave widi wupisuka mu mimvita, Yave diawu dizina diandi.
4 Nandi wudiamisa makalu ma mimvita ma Falawo ayi masodi mandi mu ḿbu,
Mvandi wutulula masodi mapisuka ma Falawo mu ḿbu Wubenga.
5 Mayo manneni maba diamisa, ayi bawu badiama buka dimanya dinsinda kutsi nlangu.
6 Koko kuaku ku lubakala a Yave, kuidi beni mangolo.
Koko kuaku ku lubakala a Yave, kulenda tulula zimbeni.
7 Ngie widi mutu wulutidi mangolo, kibila wulenda tulula zimbeni ziaku zioso.
Ayi nganzi’aku yidi buka mbazu yimvika bititi.
8 Bo ngie wufula phemu, nlangu wu ḿbu wukupama.
Ayi mayo ma ḿbu makituka buka bibaka.
Ayi mayo beni mayiza ba ngolo buka mamanya ma gelu.
9 Zimbeni zitu batuba: ‘Befu tunkuiza balandakana, ayi kuba bakidila.
Tunkuiza bonga biuma biawu bioso.
Ayi tuala bavondila mu zimbedi zitu.’
10 Phemu ngie wufula, yivanga ḿbu kuba diamisa.
Ayi bawu badiama dedi bundiaminanga kisengu mu nlangu.
11 Nzambi mbi yinkaka yidi buka ngiewu, a Yave?
Bukiedika ti vadi nzambi yinkaka wulutidi bunlongo kena ngiewu,
no tulenda zitisila mu minkunga mu kibila ki mambu ma kukuitukila kamvanganga?
12 Bo ngie wunonuna koko kuaku ku lubakala, ntoto wumina zimbeni zitu.
13 Mu luzolo luaku lukuikama, ngie wutuadisa dikabu dio wuvukisa.
Ngie wusadila mangolo maku muingi kuba vukisa ayi kuba nata ku kibuangu kiaku kinlongo.
14 Bo batu bala kuwa mambu ngie mavanga, bala titubuka mu boma.
Ayi basi Filistea mvandi, bala mona beni boma bo bala kuwa mambu ngie mavanga.
15 Zimfumu zioso zi makanda zi basi Edom, bala titubuka mu boma.
Minyadi mi basi Moabi mvandi bala mona boma.
Ayi batu boso bankalanga ku Kanani, bala ba mu kiunda.
16 Bawu bala ba mu boma ayi bala titubuka.
Mu kibila ki mangolo maku, bawu bala ba buka dimanya mukhambu nyikuka,
nati dikabu diaku diala vioka vantual’awu, a Yave.
Ngete nati dikabu dio wusola, diala vioka.
17 Ngie wala banata ku mongo wo ngie wusola.
Kibuangu kio ngie wukubika muingi kukalanga, a Yave.
Kibuangu kinlongo a Yave, kio ngie veka wukubika mu mioko miaku.
18 Yave wala tatamana kuyala mvu ka mvu.
19 Bo masodi ma Falawo bakota mu khati ḿbu na makalu mawu ma mimvita, ayi mimvalu miawu,
Yave wuba diamisa mu ḿbu.
Vayi dikabu di Isaeli bavioka va khati ḿbu, mu ntoto wuyuma.”
20 Bosi Mirian khomba yi nkietu yi Aloni no wuba ḿbikudi, wubonga kisiku ki minkunga* ayi va kimueka na bakietu bankaka baba kuenlandakananga, baba sika bisiku beni ayi baba kina. 21 Mirian waba tambudilanga nkunga beni, mu kuyola:
“Yimbidilanu Yave, kibila nandi matambula beni nzitusu.
Nandi wudiamisini mu ḿbu, makalu ayi masodi mawu.”
22 Bosi Mose ayi basi Isaeli, bananguka ku Ḿbu Wubenga, ayi bayenda ku thandu yidi ku Sur. Bawu badiata bilumbu bitatu ku thandu beni, vayi basa bakula ko nlangu. 23 Bosi bavitila ku kizunga baba tedilanga Mara,* vayi basa nunga ko kunua nlangu wuba ku kizunga beni, kibila wuba beni ndudi. Diawu bavanina kibuangu beni dizina Mara. 24 Bosi dikabu ditona kukuana kuidi Mose, mu kutuba: “Mbi tuennua?” 25 Mose wudinda lusalusu kuidi Yave, ayi Yave wummonisa mua nti. Bo Mose kakuba mua nti beni mu nlangu, nlagnu wuyiza ba wumboti muingi kunua.
Nzambi wuvanga mambu moso amomo, muingi batu boso bazaba mambu mbi Nzambi kaba tomba muingi basi Isaeli bavanga. Nandi wuba thota muingi kumona boti bankuiza ntumukina voti ndamba. 26 Nzambi wuba kamba: “Minu yidi Yave Nzamb’inu, benu kukuwa mbembu’ama, kuvanga mambu masulama va mesu mami, ayi benu kuteka matu mu zithumu ziama ayi minsiku miama, yisinkuiza lutuadisa ko zitsingulu dedi zio yituadisidi basi Ngipiti, kibila minu yidi Yave ayi yala tatamana kulukieba.”
27 Bosi bawu bavitila ku kizunga ki Elim, kuba 12 di zitho zi nlangu, ayi 70 di maba.* Mu phila ayoyo, bawu bavundila va kibuangu beni vaba muila.