LEVITIKU

1 Kuna khati nzo yinlongo, Yave wutela Mose ayi wunkamba: 2 “Kamba basi Isaeli: Boti vadi mutu mu benu wuntomba kuvana Yave nkhailu mu bibulu bantuilanga, buna kalenda vana kuandi ngombi, dimemi voti khombo.

3 “‘Na kusola kuvana ngombi, buna yifueti ba yimbakala ayi yikhambulu yibela. Nandi kafueti vana yawu kuidi Yave mu ntima woso va khotolo nzo yinlongo. 4 Kafueti thetika koko va mbata ntu wu kibulu kamvana nkhailu, ayi mu phila ayoyo, Nzambi wala kikinina nkhailu beni muingi kulemvukila masumu ma mutu beni.

5 “‘Bosi bala vonda ngombi beni vantuala Yave, ayi zinganga nzambi bana ba Aloni, bala nata menga vantuala Nzambi ayi bala muaka mawu mu zikhonzu zinna zi kikuma kidi va khotolo nzo yinlongo. 6 Bafueti botula nkanda kibulu beni ayi kusasa kiawu. 7 Bana ba Aloni zinganga nzambi, bawu bafueti tula bisuadi va kikuma ayi kutatika mbazu. 8 Ayi bawu bafueti tula bitini bi kibulu beni va kimueka na ntu ayi mafuta va mbazu yidi va kikuma. 9 Bafueti sukula mindia* ayi malu ma kibulu beni mu nlangu, ayi nganga nzambi wala vika biabioso va kikuma. Awowo widi nkhailu wuviku widi mfimbu wumboti wunkuangidika Yave.

10 “‘Na kusola kuvana dimemi voti khombo, buna biawu bifueti ba bimbakala ayi bilendi ba ko bibela. 11 Bafueti vondila kibulu beni ku khonzu norte yi kikuma vantuala Yave. Ayi bana ba Aloni zinganga nzambi, bala muaka menga mu zikhonzu zioso zi kikuma. 12 Nandi kafueti sasa kibulu beni, ayi nganga nzambi wunkuiza kupika bitini va kimueka na ntu ayi mafuta ma kibulu beni va mbazu yidi va kikuma. 13 Nandi kafueti sukula mindia ayi malu ma kibulu beni mu nlangu, ayi nganga nzambi wala vika biabioso va kikuma. Awowo widi nkhailu wuviku widi mfimbu wumboti wunkuangidika Yave.

14 “‘Vayi na kusola kuvana nuni muingi kuvana nkhailu wuviku kuidi Yave, buna nandi kafueti vana kiduka voti dibembi. 15 Nganga nzambi wala nata nuni beni va kikuma, ayi wala zenga dinga* di nuni beni mu lungongolo lu koko, ayi wala vika nuni beni va kikuma. Vayi wala bika muingi menga madoda ku khonzu yimueka yi kikuma. 16 Nandi kafueti botula zitsala ayi kiuma* nuni kanlundilanga bidia kidi va dinga. Ayi kafueti tula biawu ku khonzu leste yi kikuma vadi dibombi. 17 Mvandi kafueti basa nuni beni va khati, vayi kalendi zenga ko yawu mu bitini biodi. Bosi nganga nzambi wala vika nuni beni va mbazu yidi va kikuma. Awowo widi nkhailu wuviku widi mfimbu wumboti wunkuangidika Yave.

2 ‘“Boti mutu wuntomba kuvana nkhailu wu zitheti kuidi Yave, buna nandi kafueti vana falinya yilutidi yimboti. Nandi kafueti dukula mu falinya beni nzeta ayi kutula nomi yi olíbanu. 2 Bosi nandi kafueti nata biawu kuidi bana ba Aloni zinganga nzambi. Ayi nganga nzambi wala bonga mua nkadu wu falinya yilutidi na nzeta ayi nomi yi olíbanu, ayi wala vika biawu va kikuma. Awowo widi nkhailu wuviku widi mfimbu wumboti wunkuangidika Yave. 3 Vayi biuma binsobila binkuiza ba bi Aloni ayi bana bandi, kibila bidi biuma bibe sobila mu nkhailu wuviku wu Yave.

4 ‘“Benu kuvana nkhailu wu mapha maviku ku fornu, buna mafueti ba mapha mavangulu mu falinya yilutidi yimboti. Mawu mafueti ba mapha madi buka minlunga* bavinda nzeta ayi makhambulu luvi, voti mafueti ba mapha mabatalala bavinda nzeta makhambulu luvi.

5 ‘“Boti nkhailu wumvana madi mapha makangu mu mafuta, buna mafueti vangulu mu falinya yilutidi yimboti basobikisa na nzeta, ayi mulendi tula ko luvi mu falinya beni. 6 Fueti bukuna mapha beni ayi kudukudila mawu nzeta. Awowo widi nkhailu wu zitheti.

7 ‘“Boti wunkuiza sadila mapha mavangulu mu nzungu muingi kuvana nkhailu, buna fueti vangila mapha beni mu falinya yilutidi yimboti, ayi fueti sobikisa na nzeta. 8 Ngie fueti nata kuidi Yave nkhailu bevangila mu biuma abiobio, ayi fueti vana wawu kuidi nganga nzambi, ayi nandi wala nata wawu va kikuma. 9 Ayi nganga nzambi wala bonga mua nkadu mu nkhailu beni ayi wala vika wawu va kikuma. Wawu widi nkhailu wuviku widi mfimbu wumboti wunkuangidika Yave. 10 Vayi bio binsobila binkuiza ba bi Aloni ayi bana bandi, kibila bidi biuma binlongo bisobila mu nkhailu wuviku bavana kuidi Yave.

11 ‘“Wulendi vana ko kuidi Yave nkhailu wu mapha madi luvi. Mulendi vanga ko mapha madi luvi ayi wika* muingi kuvana nkhailu wuviku kuidi Yave.

12 ‘“Boti mutu wuntomba kuvana kuidi Yave minkhailu mu mimbutu miandi mitheti, buna kalenda tula kuandi wika ayi luvi mu mimbutu beni.

13 ‘“Minkhailu mioso mi zitheti wunkuiza vana kuidi Nzambi, wufueti sobikisanga miawu na tsalu. Wulendi zimbakana ko kutula tsalu yi luwawanu lu Nzambi’aku mu minkhailu miaku mi zitheti.

14 ‘“Boti wuntomba kuvana minkhailu mi zitheti mu mimbutu miaku mitheti miyela kuidi Yave, mvandi fueti tuala zitheti zimazi* zikangu ku mbazu, ayi zitheti bakhambu tuta buboti. Miawu midi minkhailu mi zitheti zi mimbutu miaku mitheti miyela. 15 Ngie fueti dukudila mu minkhailu beni mi zitheti nzeta ayi nomi yi olíbanu. 16 Nganga nzambi wunkuiza vika mua ndambu mu nkhailu beni wu zitheti batuta. Wawu widi nkhailu wuviku bavana kuidi Yave.

3 “‘Boti mutu wuntomba kuvana nkhailu wu kithuadi kuidi Yave, buna kafueti vana ngombi yimbakala voti yikhietu, ayi kibulu beni kilendi ba ko kibela. 2 Mutu wumvana kibulu beni, kafueti tetika koko va mbata ntu wu kibulu, ayi bala vondila kiawu va khotolo nzo yinlongo. Bana ba Aloni zinganga nzambi, bala muaka menga ma kibulu beni mu zikhonzu zioso zi kikuma. 3 Nandi wala vika biuma abibi mu minkhailu mi kuvutudila kithuadi na Yave: “Nzeta yoso yidi mu mindia, 4 mitunga* ayi mafuta ma mitunga beni, ayi mafuta madi mu bifula. 5 Bana ba Aloni bala vika biuma abiobio va kimueka na biuma bibe sobila va kikuma. Awowo, widi nkhailu wuviku widi mfimbu wumboti wunkuangidika Yave.

6 “‘Boti dimemi voti khombo kantomba kuvana nkhailu wu kuvutudila kithuadi na Yave, buna kiawu kifueti ba kimbakala voti kikhietu, ayi kilendi ba ko kibela. 7 Boti muana dimemi kantomba kuvana nkhailu, buna kafueti nata diawu vantuala Yave. 8 Mutu wumvana kibulu, kafueti tetika koko va mbata ntu wu kibulu beni ayi bafueti vondila kiawu va khotolo nzo yinlongo. Bana ba Aloni bala muaka menga ma kibulu beni mu zikhonzu zioso zi kikuma. 9 Nganga nzambi kafueti vika biuma abibi bi nkhailu wu kuvutudila kithuadi na Yave: nkila woso, mafuta moso madi mu mindia, 10 mitunga ayi mafuta ma mitunga beni, mvandi mafuta madi mu bifula. 11 Ayi nganga nzambi wala vika biuma bioso abiobio va kikuma. Awowo widi nkhailu wuviku bamvana kuidi Yave.

12 “‘Vayi boti wuntomba kusadila khombo muingi kuvana nkhailu, buna kafueti nata yawu vantuala Yave. 13 Mutu beni wala tetika koko va mbata ntu wu kibulu beni, ayi bala vondila kiawu va khotolo nzo yinlongo. Ayi bana ba Aloni bala muaka menga ma kibulu beni mu zikhonzu zioso zi kikuma. 14 Ayi muingi kuvana nkhailu kuidi Yave, nandi kafueti vika mafuta moso madi mu mindia,* 15 mitunga, mafuta ma mitunga beni ayi mafuta madi mu bifula. 16 Nganga nzambi wala vika biuma bioso abiobio va kikuma, awowo widi nkhailu wuviku widi mfimbu wunkuangidika Nzambi. Kibila mafuta moso ma bibulu madi ma Yave.

17 “‘Kioso kua kibuangu luala zingilanga, awuwu wawu nsiku wala kadidila mu zimbandu zinu zioso: lulendi dia ko mafuta ma kibulu ni kudia menga.’”

4 Yave wukamba Mose: 2 “Kamba basi Isaeli: ‘Boti mutu bevola disumu mukhambu lutia, mu kuvanga mambu manyongisa Yave, buna lufueti vanga mambu amama:

3 “‘Boti nkulutu wu zinganga nzambi bevola disumu, ayi diawu dimvanga dikabu kuba fotu, buna kafueti nata vantuala Yave muana ngombi wumbakala wukhambulu wubela, mu kibila ki disumu kabe vola. 4 Nandi kafueti nata muana ngombi beni va khotolo nzo yinlongo, vantuala Yave. Wunkuiza tetika koko kuandi va mbata ntu wu muana ngombi beni ayi wunkuiza mvondila vantuala Yave. 5 Bosi nkulutu wu zinganga nzambi wala bonga mua menga ma ngombi beni, ayi wala nata mawu ku khati nzo yinlongo. 6 Nganga nzambi wunkuiza buika luzala mu menga ma ngombi beni, ayi wala muaka mawu sambuadi di zikhumbu vantuala Yave, va ndeku nledi widi ku kibuangu kinlongo. 7 Nkulutu wu zinganga nzambi wala dakisa mvandi mua menga mu ziphoka zi kikuma ki kuvikila malasi kidi ku khati nzo yinlongo vantuala Yave, ayi wala dukula menga mansobila vatsi, va ndeku kikuma ki kuvikila minkhailu kidi va khotolo nzo yinlongo.

8 “‘Bosi nandi wala botula mafuta moso ma muana ngombi beni kabe vana nkhailu mu kibila ki masumu, kubunda mvandi mafuta moso madi mu mindia, 9 mitunga* ayi mafuta mawu, va kimueka na mafuta moso madi mu bifula. 10 Fueti vangila mawu dedi bo bamvangilanga mu nkhailu wu ngombi bamvananga muingi kuvutula kithuadi na Nzambi. Ayi nganga nzambi wala vika biuma bioso abiobio va kikuma ki minkhailu.

11 “‘Vayi fueti bonga nkanda wu muana ngombi beni, nsuni’andi, ntu, malu, mindia ayi matuvi. 12 Bosi nata biawu ku nganda kibuangu basi Isaeli bankalanga, kibuangu kidi kivedila vo banlozilanga dibombi, ayi fueti vikila biawu vana.

13 ‘“Dikabu di Isaeli dia kuba fotu mu kibila ki disumu babe vola mukhambu lutia, ayi mukhambu zaba ti babe vanga diambu dibe nyongisa Yave, 14 vayi ba kubakula ti babe vanga diambu dibe nyongisa Nzambi, buna bafueti nata muana ngombi va khotolo nzo yinlongo, mu kibila ki disumu babe vola. 15 Bakulutu ba dikabu bala tetika mioko miawu va mbata ntu wu muana ngombi beni vantuala Yave, ayi bala vondila kibulu beni vantuala Yave.

16 “‘Bosi nkulutu wu zinganga nzambi wala nata mua menga ma ngombi beni, ku khati nzo yinlongo. 17 Nganga nzambi wunkuiza buika luzala mu menga ma muana ngombi beni, ayi wala muaka mawu sambuadi di zikhumbu vantuala Yave va ndeku nledi widi ku kibuangu kilutidi kinlongo. 18 Nandi wala dakisa mvandi mua menga mu ziphoka zi kikuma ki kuvikila malasi kidi ku khati nzo yinlongo vantuala Yave. Ayi wala dukula menga mansobila vatsi, va ndeku kikuma ki kuvikila minkhailu kidi va khotolo nzo yinlongo. 19 Bosi nandi wala botula mafuta moso ma ngombi beni, ayi wala vikila mawu va kikuma. 20 Dedi bo wuvangila mu nkhailu wu muana ngombi wuvana mu kibila ki masumu, mawu mvandi fueti vanga mu muana ngombi awowo. Nganga nzambi wala dindila dikabu nlemvu, ayi Nzambi wala lemvukila masumu ma dikabu. 21 Nandi wala nata ngombi beni ku nganda kibuangu basi Isaeli bankalanga, ayi wala kumvika dedi bo kavikila ngombi yitheti. Awowo widi nkhailu muingi kulinda nlemvu wu masumu ma dikabu.

22 “‘Nkulutu wu dikabu na kuvola disumu mukhambu lutia, mu kuvanga mambu manyongisa Yave Nzambi, 23 ayi na kuzaba ti bevola disumu mu kubundula minsiku, buna kafueti nata muana khombo wumbakala wukhambulu wubela, muingi kuvana nkhailu. 24 Nandi wala tetika koko kuandi va mbata ntu wu khombo beni, ayi wala kumvondila va kibuangu bamvondilanga kibulu bamvana nkhailu wuviku vantuala Yave. Awowo widi nkhailu wu disumu. 25 Nganga nzambi wala dakisa mua menga mu ziphoka zi kikuma ki kuvikila minkhailu, ayi wala dukula menga mansobila va tsi, va ndeku kikuma ki kuvikila minkhailu. 26 Nganga nzambi wunkuiza vika mafuta moso ma kibulu beni va kikuma, dedi bo kavikila mafuta ma kibulu kavana nkhailu wu kuvutudila kithuadi na Nzambi. Mu phila ayoyo, nganga nzambi wala dinda nlemvu wu masumu ma nkulutu wu dikabu, ayi nandi wunkuiza baka nlemvu.

27 ‘“Boti wumueka mu dikabu wumvola disumu, ayi wumvanga mambu mo Yave kakandimina, 28 voti na kutebuka monyo ti wuvola disumu, buna nandi kafueti vana muana khombo yikhietu yikhambulu yibela, mu kibila ki disumu beni. 29 Nandi wala tetika koko kuandi va mbata ntu wu kibulu kamvana mu kibila ki disumu kavola, ayi wala vondila kibulu beni va kibuangu bamvondilanga bibulu bi minkhailu miviku. 30 Nganga nzambi wala dakisa mua menga mu ziphoka zi kikuma ki kuvikila minkhailu, ayi wala dukula menga mansobila va tsi, va ndeku kikuma ki kuvikila minkhailu. 31 Nandi wala botula mafuta moso ma kibulu beni, dedi bo bambotudilanga mafuta ma kibulu bamvana nkhailu wu kuvutudila kithuadi na Nzambi. Ayi nganga nzambi wunkuiza vika mafuta beni va kikuma, muingi mabasisa mfimbu wumboti wunkuangidika Yave. Mu phila ayoyo, nganga nzambi wunkuiza dindila mutu beni nlemvu.

32 “‘Na kusola kuvana muana dimemi mu kibila ki disumu kabe vola, buna kafueti tuala muana dimemi dikhietu dikhambulu dibela. 33 Nandi wala tetika koko kuandi va mbata ntu wu kibulu kamvana nkhailu mu kibila ki masumu mandi, ayi wala kumvondila va kibuangu bamvondilanga bibulu bamvaninanga minkhailu miviku. 34 Nganga nzambi wunkuiza buika luzala mu menga ma kibulu kamvana nkhailu mu kibila ki masumu, ayi wala dakisa menga beni mu ziphoka zi kikuma ki kuvikila minkhailu, bosi wala dukula menga mansobila va tsi, va ndeku kikuma ki kuvikila minkhailu. 35 Nandi wala botula mafuta moso ma kibulu beni, dedi bo bambotudilanga mafuta ma muana dimemi bamvana nkhailu wu kuvutudila kithuadi na Nzambi. Ayi nganga nzambi wunkuiza vika mafuta beni va kikuma, va mbata biuma bibe sobila bio babe vana nkhailu wuviku kuidi Yave. Ayi nganga nzambi wunkuiza dindila mutu beni nlemvu.

5 “Boti bantumisa mutu muingi kata kimbangi mu mambu kabe kuwa voti kabe mona, vayi nandi kasintuba ko kiedika mu mambu beni, buna widi mu kusumuka ayi wunkuiza tambula tsembolo mu kibila akiokio.

2 “‘Mutu mukhambu lutia na kusimba kioso kua kibulu kifua kikhambulu kidiodila kuba kuandi kibulu kinsitu voti kio bantuilanga, ayi kioso kua kibulu kinkaka kikhambulu kidiodila, nandi kasinkuiza ba ko wudiodila va mesu ma Nzambi ayi wunkuiza ba fotu, kheti bevangila mawu mukhambu lutia. 3 Woso kua mutu mu khambu zaba na kusimba kioso kiuma kikhambulu kidiodila voti kioso kua kiuma kilenda kumvanga kuba mvindu va mesu ma Nzambi, ayi na kuzaba ti kiuma kikhambulu kidiodila kabe simba, buna wunkuiza ba fotu.

4 “‘Woso kua mutu wunleva phesi mukhambu yindula buboti mu dioso kua diambu kuba kuandi dimboti voti dimbi, ayi na kubakula ti beleva phesi mukhambu yindula buboti, buna wunkuiza ba fotu.

5 “‘Ayi woso mutu widi fotu mu mambu amomo, kafueti fungula masumu mandi. 6 Mvandi mu kibila ki disumu kabe vola, kafueti tuala nkhailu muingi kuvana kuidi Yave, ayi nkhailu beni wufueti ba dimemi voti khombo yikhietu. Bosi nganga nzambi wunkuiza dindila mutu beni nlemvu, ayi Nzambi wunkuiza nlemvukila.

7 “‘Vayi boti mutu beni kasi ko mbakulu muingi kuvana Yave dimemi, buna kafueti vana biduka biodi voti mabembi muadi, mu kibila ki masumu kabe vola. Nandi wunkuiza vana nuni yimueka muingi kudindila nlemvu wu masumu, ayi nuni yinkaka muingi kuvana nkhailu wuviku. 8 Mutu beni wala nata zinuni wadi kuidi nganga nzambi, ayi nganga nzambi wala vana nuni yimueka mu kibila ki masumu. Bosi nandi wala lueka nuni beni va dinga mu lungongolo luandi lu koko, vayi kalasa kumbotula ko ntu. 9 Nandi wala dakisa mua menga ma nuni beni ku khonzu mueka yi kikuma, vayi wala dukula menga mansobila va tsi va ndeku kikuma. Awowo widi nkhailu wu disumu. 10 Bosi nandi wunkuiza bonga nuni yinkaka muingi kuvana nkhailu wuviku, dedi bo baba vangilanga. Mu phila ayoyo, nganga nzambi wunkuiza dindila mutu beni nlemvu, ayi Nzambi wunkuiza nlemvukila.

11 “‘Na kukhambu baka bu kuvanina biduka biodi voti mabembi muadi, buna kafueti vana kikhuku ki kumi ki efa yimueka yi falinya yilutidi yimboti mu kibila ki masumu kabe vola. Vayi kalendi tula ko falinya beni nzeta, ni nomi yi olíbanu kibila widi nkhailu wu disumu. 12 Nandi wala nata biawu kuidi nganga nzambi, ayi nganga nzambi wala bonga mua nkadu mu biawu muingi kuvika va kikuma va mbata minkhailu mibe sobila babe vana kuidi Yave. Awowo, widi nkhailu wu disumu. 13 Mu phila ayoyo, nganga nzambi wunkuiza dinda nlemvu mu dioso kua disumu mutu beni kabe vola, ayi Nzambi wunkuiza nlemvukila. Vayi biuma bibe sobila mu nkhailu kabe vana, binkuiza ba bi nganga nzambi dedi bo bamvangilanga mu minkhailu mi zitheti.’”

14 Yave wubue kamba Mose: 15 “Woso mutu wunsadila biuma binlongo bi Yave mu phila yikhambu fuana, kafueti vana kuidi Yave nkhailu wu dimemi dikhambulu dibela mu kibila ki disumu adiodio. Thalu yi dimemi beni yifueti ba dedi mueka na sikulu yi palata bansadilanga ku nzo yinlongo. 16 Mvandi wunkuiza vana biuma bintombulu, kibila besumuka mu matedi nzo yinlongo, nandi wunkuiza buela kikhuku kintanu mu biuma kankuiza futa. Wunkuiza vana biawu kuidi nganga nzambi, ayi nganga nzambi wunkuiza ndindila nlemvu mu kuvika muana dimemi beni mu kibila ki masumu mandi. Mu phila ayoyo, nandi wunkuiza tambula nlemvu wu masumu.

17 “Woso kua mutu wunsumuka mu kuvanga dioso kua diambu Yave kakandimina, kheti wumvangila mawu mukhambu lutia, nandi widi fotu ayi wunkuiza fundusu mu mawu. 18 Nandi kafueti nata dimemi dikhambulu dibela kuidi nganga nzambi, mu kutadila thalu basikika yo bafueti vana mu kibila ki fotu. Bosi nganga nzambi wala dinda nlemvu kuidi Nzambi mu kibila ki disumu mutu beni kabe vola mukhambu zaba. Ayi Nzambi wunkuiza lemvukila mutu beni. 19 Awowo widi nkhailu wu fotu. Nandi besumuka vantuala Yave.”

6 Yave wukamba Mose: 2 Mutu na kusumuka va mesu ma Yave, mu kuvuna wadi yandi matedi biuma bambikila muingi kakieba, voti mu biuma bamvana muingi kasueka nati bankuiza mfuta, voti kuvuna wadi yandi, voti kukuiba biuma bingana, 3 voti na kunonga kiuma kibe zimbala ayi kuleva phesi mu kutuba ti kasa kinonga ko, voti loso kua luvunu lunkaka kankuiza tuba, buna amama mawu kafueti vanga: 4 Nandi kafueti vutula kiuma kabe kuiba, kiuma kabe vinza, kiuma kabe bonga kuidi wadi yandi mu luvunu, kiuma bamvana muingi kasueka, kiuma kizimbala kanonga, 5 voti kioso kua kiuma kinkaka katela kimbangi ki luvunu. Mu phila ayoyo, nandi wunkuiza futa mutu vuidi kiawu thalu yi kiuma beni ayi wala buela va mbata kikhuku kintanu. 6 Nandi wala nata kuidi nganga nzambi nkhailu wu fotu ayi wala vana kuidi Yave muana dimemi dikhambulu dibela, mu kutadila thalu basikika yo bafueti vana mu kibila ki fotu. 7 Nganga nzambi wala dinda nlemvu kuidi Yave mu kibila ki masumu ma mutu beni, ayi Nzambi wala kunlemvukila mu dioso kua disumu kabe vola.”

8 Yave wubue kamba Mose: 9 “Kamba Aloni ayi bana bandi: ‘Awuwu wawu nsiku wu minkhailu miviku: Nkhailu wuviku wufueti banga va mbata kikuma builu boso nati va meni, ayi mbazu yifueti tatamana yitatama va kikuma. 10 Nganga nzambi wunkuiza vuata bikhutu ayi kupa bivangulu mu minsinga mi linho muingi kufuka pheni’andi. Bosi wunkuiza botula dibombi di minkhailu miviku didi va kikuma, ayi kafueti tula dibombi beni va khonzu kikuma. 11 Bosi nganga nzambi wala vuata bikhutu binkaka, ayi wala nata dibombi beni va kibuangu kinlongo kidi ku nganda kibuangu basi Isaeli bankalanga. 12 Mbazu yala tatamana yitatama va kikuma, ayi lulendi bika ko yawu yidoka. Nganga nzambi wala tulanga bisuadi ku mbazu kadika meni, ayi wala tulanga vana bibulu bi minkhailu miviku ayi mafuta ma bibulu bi minkhailu mi kuvutudila kithuadi na Nzambi. 13 Mbazu yala tatamana yitatama va kikuma. Lulendi bika ko yawu yidoka.

14 Awuwu wawu nsiku wutedi minkhailu mi zitheti: Benu bana ba Aloni lufueti vananga nkhailu awowo kuidi Yave va kikuma. 15 Wumueka mu bawu wala bonga mua nkadu falinya yilutidi yimboti mu nkhailu wu zitheti, wala bonga mvandi nzeta ayi nomi yi olíbanu, bosi wala vika biawu muingi bibasisa mfimbu wumboti wunkuangidika Yave. 16 Aloni ayi bana bandi, bawu bala dianga biuma binsobila mu nkhailu awowo. Bala sadila falinya beni muingi kuvangila mapha makhambulu luvi, ayi bala dila mawu va kibuangu kinlongo ku khati luphangu lu nzo yinlongo. 17 Bawu balendi tula ko biawu luvi. Akiokio kidi kikhuku kiawu yiku bavana mu minkhailu miviku ba kuphana. Akiokio kidi kikhuku kinlongo dedi bo minkhailu mi masumu ayi minkhailu mi fotu mididi minlongo. 18 Bana boso ba babakala bambutukila mu dikanda di Aloni, bala dianga biuma abiobio. Akiokio kidi kikhuku bawu bala dianga mu zimbandu ziawu zioso mu minkhailu miviku bamvana kuidi Yave. Ayi biuma bioso bimbunda minkhailu beni, biala ba binlongo.

19 Yave wubue kamba Mose: 20 “Mu kilumbu bala bieka Aloni nkulutu wu zinganga nzambi, awuwu wawu nkhailu Aloni ayi bana bandi bala vana kuidi Yave: kikhuku ki kumi ki efa yi falinya yilutidi yimboti mu minkhailu mi zitheti dedi bo bamvangilanga. Bela vana mua ndambu va meni ayi mua ndambu yinkaka va masika. 21 Ngie fueti sobikisa falinya beni na nzeta ayi fueti kuanga yawu va kianga, ayi fueti bukuna biawu mu bitini. Wawu wunkuiza ba nkhailu wu zitheti ziyangu widi mfimbu wumboti wunkuangidika Yave. 22 Muana wu Aloni no bala bieka nkulutu wu zinganga nzambi muingi kuvinginina Aloni, mvandi wala vananga nkhailu awowo ayi bala vikanga nkhailu woso vantuala Yave. Awowo widi nsiku wala kadidila. 23 Ayi bo bambieka nganga nzambi, nkhailu wu zitheti bamvana bafueti vika wawoso ku mbazu ayi balendi dia ko ni kiuma mu nkhailu beni.”

24 Yave wubue kamba Mose: 25 “Kamba Aloni ayi bana bandi: ‘Awuwu wawu nsiku wutedi nkhailu wu disumu: Va kibuangu lumvondila kibulu ki kuvanina nkhailu wuviku, vawu mvandi lufueti vondila kibulu ki kuvanina nkhailu wu kudindila nlemvu wu masumu kuidi Yave. Kibila awowo widi nkhailu wunlongo. 26 Nganga nzambi wala vika nkhailu wu disumu, nandi wala dia biuma binsobila. Nandi kafueti dila biawu va kibuangu kinlongo ku luphangu lu nzo yinlongo.

27 “‘Biuma bioso bimbumina nsuni wu nkhailu awowo, biala ba binlongo, ayi boti kikhutu ki mutu kibe dodukila menga ma kibulu bamvana nkhailu awowo, buna bafueti sukudila kikhutu beni va kibuangu kinlongo. 28 Boti ba belambila kibulu beni mu nzungu yi tuma, buna bafueti vava nzungu beni, vayi boti ba belambila kiawu mu nzungu yivangulu mu cobre, buna bafueti sukula nzungu beni buboti.

29 “‘Zinganga nzambi zioso bala dia kibulu akiokio, kibila wawu widi nkhailu wunlongo. 30 Vayi boti ba benata ku khati nzo yinlongo menga ma kibulu bamvana nkhailu muingi kudinda nlemvu wu masumu, buna bafueti vika kibulu kioso ku mbazu ayi balendi dia ko nsuni’andi.

7 “‘Awuwu wawu nsiku lufueti landakana matedi nkhailu wu disumu: Kibila wawu widi wunlongo. 2 Bafueti vondila kibulu bamvana nkhailu wu fotu va kibuangu bamvondilanga bibulu bi minkhailu miviku, ayi menga mandi bafueti muanga* mawu mu zikhonzu zioso zi kikuma. 3 Nganga nzambi kafueti nata mafuta moso ma kibulu beni, nkila, ayi mafuta madi mu mindia,* 4 mitunga* ayi mafuta ma mitunga beni. Mvandi mafuta madi mu bifula. 5 Nganga nzambi wunkuiza vika biuma bioso abiobio va kikuma, muingi kuvana nkhailu wuviku kuidi Yave. Awowo widi nkhailu wu fotu. 6 Zinganga nzambi bawu to bafueti dia bibulu bamvana minkhailu amiomio. Vayi bafueti dila biawu va kibuangu kinlongo, kibila nkhailu beni widi wunlongo. 7 Nsiku wutedi nkhailu wu masumu, wawu mvandi lufueti landakana mu matedi nkhailu wu fotu. Ayi kibulu bamvana mu nkhailu beni, kinkuiza ba ki nganga nzambi no wunkuiza dinda nlemvu wu masumu ma mutu beni.

8 “‘Bo nganga nzambi kamvika nkhailu muingi kudindila nlemvu wu masumu ma mutu bevana wawu, nganga nzambi beni nandi wunkuiza vua nkanda kibulu kabe vika.

9 “‘Nkhailu woso wu zitheti bankuanga ku fornu voti banlambila mu nzungu, wunkuiza ba wu nganga nzambi wumvika wawu va kikuma. 10 Vayi nkhailu woso wu zitheti basobikisa na nzeta, voti bakhambu sobikisa, wunkuiza ba wu bana ba Aloni. Kadika mutu mu bawu wunkuiza tambula ndambu’andi.

11 “‘Awuwu wawu nsiku wutedi nkhailu wu kithuadi, wo bafueti vana vantuala Yave. 12 Boti mutu wumvana nkhailu beni muingi kuvutula matondo kuidi Nzambi, buna kafueti vana wawu va kimueka na mapha madi buka nlunga makhambulu luvi bakanga mu nzeta, mapha mabatalala makhambulu luvi bavinda nzeta, ayi mapha madi buka nlunga mavangulu mu falinya yilutidi yimboti basobikisa na nzeta. 13 Nandi wala vana mapha madi buka nlunga batula luvi, bo kamvana nkhailu wu kithuadi muingi kutonda Nzambi. 14 Mu mapha beni, nandi wunkuiza bonga dipha dimueka dimueka muingi kuvana kuidi Yave, kibila madi mapha manlongo. Ayi mapha mansobila mankuiza ba ma nganga nzambi no wunkuiza dukula va kikuma menga ma kibulu bamvana nkhailu wu kithuadi. 15 Kibulu bamvana nkhailu wu kithuadi muingi kuvutula matondo kuidi Nzambi, bafueti dila kiawu mu kio kiawu kilumbu bamvana nkhailu beni. Balendi lunda ko ni kitini muingi kudia mu kilumbu kinlanda.

16 “‘Boti mutu wumvana nkhailu beni muingi kadukisa tsila kavanga, voti kamvanina wawu mu lutia luandi veka, buna bafueti dia mbizi yi kibulu beni mu kio kiawu kilumbu bamvana nkhailu, ayi balenda dia bitini binsobila mu kilumbu kinlanda. 17 Vayi mbizi yinsobila ya kuvitila nate kilumbu kintatu, buna bafueti vika yawu. 18 Vayi mu kilumbu kintatu ba kudia mbizi yi kibulu bavana nkhailu wu kithuadi, buna mutu wuvana nkhailu beni, kasinkuiza yangidika ko Nzambi. Basinkuiza tadila ko nkhailu kabe vana buka nandi bevana wawu, kibila didi diambu dikhenya kudia mbizi beni mu kilumbu kintatu, ayi mutu wundia yawu wunkuiza ba fotu. 19 Lulendi dia ko kibulu kimbumina mu kiuma kikhambulu kidiodila. Lufueti vika mbizi beni ku mbazu. Woso mutu widi wudiodila kalenda dia mbizi yi kibulu kidiodila.

20 “‘Vayi woso mutu wukhambulu wudiodila, wundia mbizi yi kibulu bamvana nkhailu wu kithuadi kuidi Yave, bafueti kumvonda. 21 Woso mutu wunsimba kiuma kikhambulu kidiodila, kuba kuandi mutu wukhambulu wudiodila, kibulu kikhambulu kidiodila, voti kioso kua kiuma kidi khenya, ayi wundia mbizi yi kibulu babe vana nkhailu wu kithuadi kuidi Yave, bafueti kumvonda.’”

22 Yave wubue kamba Mose: 23 “Kamba basi Isaeli: ‘Lulendi dia ko mafuta ma ngombi, ma muana dimemi, voti ma khombo. 24 Lulendi dia ko mafuta ma kibulu kibe fua kiaveka voti babe vonda kuidi kibulu kinkaka, vayi lulenda sadila kuinu mafuta ma bibulu beni mu ziphila zinkaka, vayi lubika ku madia. 25 Woso kua mutu wundia mafuta ma kibulu babe vana nkhailu wuviku kuidi Yave, bafueti kumvonda.

26 “‘Kioso kua kibuangu luala kalanga, lulendi dia ko menga, kuba kuandi ma zinuni voti ma bibulu. 27 Woso mutu wundia menga bafueti kumvonda.’”

28 Yave wubue kamba Mose: 29 “Kamba basi Isaeli: ‘Woso mutu wuntuala nkhailu wu kithuadi kuidi Yave, kafueti vana mua ndambu mu nkhailu beni kuidi Yave. 30 Nandi wala tuala mafuta ma kibulu beni va kimueka na thulu,* muingi kuvana nkhailu wuviku kuidi Yave, ayi wala diengisa wawu, kibila widi nkhailu bandiengisa vantuala Yave. 31 Nganga nzambi wunkuiza vika mafuta ma kibulu beni va kikuma, vayi thulu yinkuiza ba yi Aloni ayi bana bandi.

32 “‘Benu lunkuiza vananga kuidi zinganga nzambi kulu ku lubakala ku kibulu beni, kibila kidi kitini kinlongo mu minkhailu mi kithuadi lumvana. 33 Muana wu Aloni wunkuiza vika mafuta ayi wunkuiza dukula va kikuma menga ma kibulu bamvana nkhailu wu kithuadi, nandi wunkuiza vua kulu ku lubakala ku kibulu beni. 34 Kulu ku lubakala ayi thulu yi bibulu basi Isaeli bamvana mu minkhailu mi kithuadi, binkuiza ba bi Aloni ayi bana bandi. Awowo widi nsiku basi Isaeli bafueti landakananga mu zithangu ziawu zioso.

35 “‘Abiobio biawu biuma Aloni ayi bana bandi bala tambulanga mu bibulu bamvana minkhailu kuidi Yave, kutonina mu kilumbu ba kuba bieka zinganga nzambi zi Yave. 36 Mu kilumbu baba bieka, Yave wukamba basi Isaeli muingi baba vananga bitini abiobio bi bibulu. Awowo widi nsiku wala kadidila mu zimbandu zinu zioso.’”

37 Awowo wawu nsiku matedi nkhailu wu viku, wu zitheti, wu disumu, wu fotu, wu kubiekila, ayi nkhailu wu kithuadi, 38 Yave wuvana minsiku amiomio kuidi Mose ku mongo wu Sinai, kilumbu Mose katuma basi Isaeli bavananga minkhailu kuidi Yave.

8 Yave wubue kamba Mose: 2 “Tumisa Aloni ayi bana bandi, tuala mvandi bikhutu binlongo, malasi ma kubiekila, muana ngombi wu kuvanina nkhailu wu masumu, mamemi ma mamuadi ayi kiphanya kidi mapha makhambulu luvi. 3 Ayi kutikisa dikabu dioso va khotolo nzo yinlongo.

4 Bosi Mose wuvanga mamoso Yave kankamba, ayi dikabu dioso dikutakana va khotolo nzo yinlongo. 5 Mose wukamba dikabu dioso: “Amama mawu mambu Yave kabe tuba muingi tuvanga.” 6 Bosi Mose wutumisa Aloni ayi bana bandi, ayi wuba sukula.* 7 Wuvuika Aloni dizuela dikula, wunkanga phonda mu lukietu, wubue mvuika dizuela dinkaka dikhambulu mioko, ayi va mbata dizuela beni wumvuika éfode ayi wukanga phonda batunga mu éfode beni. 8 Bosi wumvuika kikhutu ki thulu ayi wutula mu kikhutu beni Urim ayi Tumim. 9 Wumvuika dilensu ku ntu ayi wumvuakika va mbulu, thata yi wola muba kidimbu kinlongo, dedi bo Yave kakambila Mose.

10 Bosi Mose wubonga malasi ma kubiekila, wuvedisa nzo yinlongo ayi biuma bioso biba kuna. 11 Nandi wubonga mua malasi wudakisa mawu va kikuma sambuadi di zikhumbu muingi ku kivedisa, ayi kuvedisa biuma biandi bioso. Mvandi wuvedisa dibola ayi kiuma ki kutetika dibola beni. 12 Bosi wudukula mua malasi ma kubiekila ku ntu Aloni muingi kumvedisa.

13 Mose wutumisa mvandi bana ba Aloni, wuba vuika mazuela, wuba kanga ziphonda mu lukietu ayi wuba vuika malensu ku ntu, dedi bo Yave kankambila.

14 Bosi wutuala muana ngombi muingi kuvana nkhailu wu masumu. Ayi Aloni na bana bandi batetika mioko miawu va mbata ntu wu muana ngombi beni. 15 Mose wuvonda muana ngombi beni ayi wubuika luzala luandi mu menga ma kibulu beni ayi wudakisa mawu mu ziphoka zioso zidi va kikuma muingi ku kivedisa. Vayi menga masobila wudukula mawu va tsi va ndeku kikuma, muingi kukitula kiawu kinlongo ayi kiba kifuana muingi kuvanina minkhailu mi kudindila nlemvu wu masumu. 16 Bosi Mose wubonga mafuta moso madi mu mindia, mu bifula ayi wubonga mvandi mitunga* na mafuta ma mitunga beni, bosi wuvika biawu va kikuma. 17 Wubonga biuma bisobila mu kibulu beni, nkanda, mbizi ayi matuvi, muingi kue vika biawu kunganda kibuangu basi Isaeli bankalanga, dedi bo Yave kankambila.

18 Bosi wubonga muana dimemi muingi kuvana nkhailu wuviku. Aloni ayi bana bandi batetika mioko miawu va mbata ntu wu muana dimemi beni. 19 Mose wuvonda kibulu beni, bosi wudakisa menga mu zikhonzu zioso zi kikuma. 20 Mose wusasa kibulu beni mu bitini ayi wuvika bitini beni va kimueka na ntu ayi mafuta mandi. 21 Nandi wusukula mindia ayi malu ma kibulu beni mu nlangu, bosi Mose wuvika kiawu va kikuma, dedi bo Yave kantumina. Awowo wuba nkhailu wuviku widi mfimbu wumboti wunkuangidika Yave.

22 Bosi wubonga muana dimemi dinkaka bavana nkhailu wu kubiekila. Aloni ayi bana bandi batedika mioko va mbata ntu wu muana dimemi beni. 23 Mose wuvonda dimemi beni, wubonga mua menga ayi wuvinda va tsongi dikutu di lubakala di Aloni, mu luzala luandi lu ngudi lu koko ku lubakala ayi mu luzala lu ngudi lu kulu ku lubakala. 24 Bosi Mose wutumisa bana ba Aloni ayi wuvinda kadika mutu mu bawu mua menga ma kibulu beni va tsongi dikutu di khonzu yi lubakala, mu luzala lu ngudi lu koko ku lubakala ayi mu luzala lu ngudi lu kulu ku lubakala. Vayi menga ma sobila ma kibulu beni, Mose wudakisa mawu mu zikhonzu zioso zi kikuma.

25 Mose wubonga mafuta ma kibulu beni, nkila, mafuta moso ma mindia, ma bifula, mitunga na mafuta madi mu mitunga beni ayi kulu ku lubakala ku kibulu beni. 26 Ayi mu kiphanya ki mapha makhambulu luvi kidi vantuala Yave, wubonga muna dipha dimueka didi buka nlunga bavinda nzeta ayi dipha dimueka dibatalala. Bosi wutetika mapha beni va mbata mafuta ma kibulu ayi va mbata kulu ku lubakala ku kibulu beni. 27 Bosi wutula biuma bioso abiobio va mioko mi Aloni ayi mi bana bandi, ayi batona kudiengisa miawu, kibila wuba nkhailu bandiengisa vantuala Yave. 28 Mose wubotula biawu va mioko miawu, bosi wuvika biabioso va kikuma va mbata minkhailu miviku. Awowo widi nkhailu wu kubiekila widi mfimbu wumboti, nkhailu wuviku bamvana kuidi Yave.

29 Mose wubonga thulu yi muana ngombi ayi badiengisa yawu vantuala Yave. Mbizi yi muana ngombi beni bavana nkhailu wu kubiekila, yiyiza ba yi Mose dedi bo Yave kankambila.

30 Mose wubonga mua malasi ma kubiekila ayi mua menga maba va kikuma, wumuaka mawu kuidi Aloni, bana bandi, ayi mu bikhutu biawu. Mu phila ayoyo, Mose wuvedisa Aloni, bana bandi ayi bikhutu biawu.

31 Mose wukamba Aloni ayi bana bandi: “Lambilanu mbizi yi kibulu beni va khotolo nzo yinlongo, ayi vawu lunkuiza dila yawu na mapha madi mu kiphanya ki mapha ma kubiekila, dedi bo Nzambi kakhambila: ‘Aloni ayi bana bandi bafueti dia biawu.’ 32 Mbizi ayi mapha mansobila, fueti vika biawu ku mbazu. 33 Lulendi botuka ko va khotolo nzo yinlongo nate lundukisa sambuadi di bilumbu bi kubiekila, kibila vafueti vioka sambuadi di bilumbu muingi kuba bieka zinganga nzambi. 34 Mambu tuma vanga bubu, mawu Yave katuma tuvanga, muingi lubaka nlemvu wu masumu. 35 Benu lufueti viokisa va khotolo nzo yinlongo sambuadi di bilumbu, ayi lufueti tumukina mambu Yave kalutuma, muingi lubika fua, kibila buawu nandi kakhambila.

36 Aloni ayi bana bandi bavanga mambu moso Yave kakamba Mose.

9 Mu kilumbu kinana, Mose wutumisa Aloni ayi bana bandi ayi wutumisa mvandi bakulutu ba dikabu di Isaeli. 2 Nandi wukamba Aloni: “Bonga muana ngombi muingi wuvana nkhailu wu disumu ayi dimemi di mbakala muingi wuvana nkhailu wuviku. Bibulu bia bibiodi bilendi ba ko bibela ayi vana biawu kuidi Yave. 3 Vayi ngie fueti kamba basi Isaeli: ‘Tualanu khombo yimbakala, muingi muvana nkhailu wu masumu. Muana ngombi ayi muana dimemi badi mvu mueka, muingi kuvana nkhailu wuviku ayi biawu bilendi ba ko bibela. 4 Mvandi mufueti tuala ngombi yi mbakala ayi dimemi dimbakala, muingi muvana nkhailu wu kithuadi. Lufueti vondila biawu vantuala Yave. Mvandi, tualanu nkhailu wu zitheti basobikisa na nzeta, kibila Yave wunkuiza lumonikina mu kilumbu akiki.

5 Mu phila ayoyo, banata biuma Mose ka batuma va khotolo nzo yinlongo. Bosi dikabu dioso bafikama ayi batelama vantuala Yave. 6 Mose wu bakamba: “Amama mawu Yave kabe tuma muvanga, muingi mumona nkembu wu Yave.” 7 Mose wukamba Aloni: “Fikama va kikuma ayi vana nkhailu’aku wu disumu ayi nkhailu wuviku, muingi wudinda nlemvu wu masumu maku ayi ma dikanda diaku. Bosi vana nkhailu wu dikabu ayi dinda nlemvu wu masumu mawu dedi bo Yave kabe khambila.”

8 Aloni wufikama va kikuma ayi wuvonda muana ngombi, muingi kuvana nkhailu mu kibila ki masumu mandi veka. 9 Bosi bana ba Aloni bantuadila menga ma kibulu beni, ayi nandi wubuika luzala lu koko kuandi mu menga beni ayi wuvinda mawu mu ziphoka zidi mu kikuma, ayi wudukula menga masobila va tsi va ndeku kikuma. 10 Aloni wuvika va kikuma mafuta ma kibulu beni, mitunga* ayi mafuta madi mu bifula bi kibulu beni bavana nkhailu wu disumu, dedi bo Yave kakambila Mose. 11 Nandi wuyevikila nkanda kibulu beni ku nganda kibuangu basi Isaeli baba kalanga.

12 Bosi wuvonda kibulu kavana nkhailu wuviku, ayi bana ba Aloni bantuadila menga ayi nandi wudakisa mawu mu zikhonzu zioso zi kikuma. 13 Bana bandi bamvana bitini bi kibulu kavana nkhailu wuviku va kimueka na ntu ayi nandi wuvika biawu va kikuma. 14 Bosi nandi wusukula minlia* ayi malu ma kibulu beni. Ayi wuvika biawu va kimueka na minkhailu miviku misobila va kikuma.

15 Bosi, Aloni wuvana minkhailu mi dikabu. Nandi wubonga khombo yimbakala muingi kuvana nkhailu mu kibila ki disumu di dikabu. Nandi wuvonda khombo beni ayi wuvika yawu dedi bo kavikila kibulu kavana mu kibila ki masumu mandi. 16 Ayi wuvana nkhailu wuviku mu kulandakana zithuadusulu.

17 Bosi wuvana nkhailu wu zitheti. Nandi wubonga mua nkadu mu nkhailu beni, wuvika wawu va mbata minkhailu miviku baba vananga mu kadika meni.

18 Bosi wuvonda ngombi ayi dimemi, muingi kuvana nkhailu wu dikabu wu kithuadi. Bosi bana ba Aloni bamvana menga ma bibulu ayi nandi wudakisa mawu mu zikhonzu zioso zi kikuma. 19 Bantuadila mvandi mafuta ma bibulu bia bibiodi. Nkila, mafuta ma minlia, mitunga ayi ma mafuta madi muawu ayi mvandi bantuadila mafuta ma bifula. 20 Batula mafuta moso va mbata thulu yi bibulu beni, bosi Aloni wuvika mafuta beni va kikuma. 21 Vayi thulu ayi kulu ku lubakala ku bibulu beni, Aloni wudiengisa biawu, kibila wuba nkhailu bandiengisa vantuala Yave, dedi bo Nzambi kakambila Mose.

22 Bo kamana kuvana nkhailu wu disumu, nkhailu wuviku ayi minkhailu mi kithuadi, Aloni wusakumuna dikabu ayi wubotuka va kikuma. 23 Bosi Aloni ayi Mose bakota ku nzo yinlongo. Bo babasika, bawu basakumuna dikabu.

Ayi dikabu dioso bamona nkembu wu Yave. 24 Bosi Yave wufila mbazu yivika mafuta moso ma bibulu ayi minkhailu miviku miba va kikuma. Ayi bo dikabu bamona mawu, bawu batenduka, bafukama ayi bayinika bizizi biawu va tsi.

10 Bo vavioka mua thangu, bana ba Aloni Nadabe ayi Abiú, kadika mutu mu bawu, wubonga kiuma ki kuvikila malasi, batula malasi ayi batula mbazu muna. Bosi bavika nkhailu wu malasi vantuala Yave wo bakhambu ba nsua wu kuvana. 2 Bosi Yave wutuadisa mbazu yivika Nadabe ayi Abiú. Mu phila ayoyo, bawu bafua vantuala Yave. 3 Mose wukamba Aloni: “Amama mawu Yave kabe tuba: ‘Batu boso ba kufhikama bafueti kunzitisa, ayi dikabu dioso bafueti kukhembisa.’” Aloni kasa tuba ko ni diambu.

4 Mu phila ayoyo, Mose wutumisa Mizaeli ayi Elzafã bana ba Uzieli titi yi Aloni ayi wuba kamba: “Botulanu zimvumbi zi basi dikanda dinu va kibuangu kinlongo, ayi natanu ziawu ku nganda kibuangu basi Isaeli bankalanga.” 5 Bawu bananguna zimvumbi beni na mazuela mawu makula, ayi banata ziawu kunganda kibuangu basi Isaeli baba kalanga, dedi bo Mose kaba tumina.

6 Bosi Mose wukamba Aloni ayi bana bandi buadi bankaka, Eleazar ayi Itamali: “Dikabu dioso di Isaeli balenda ba mu lutu mu kibila ki batu Yave kabe vondila mu mbazu. Vayi ngie ayi bana baku mulendi ba ko mu lutu mu kubika sanya minlengi minu voti mu kukakuna bikhutu binu, muingi lubika fua, ayi muingi Nzambi kabika fuemina dikabu dioso. 7 Lulendi botuka ko va khotolo nzo yinlongo muingi lubika fua, kibila benu luidi batu basolo badukudila malasi manlongo ma Yave Nzambi.” Mu phila ayoyo, bawu batumukina mambu Mose kaba kamba.

8 Bosi Yave wukamba Aloni: 9 “Ngie ayi bana baku mulendi nua ko malavu mankolusuanga bo lunkota ku nzo yinlongo, muingi lubika kufua. Awowo widi nsiku wala kadidila mu zimbandu zinu zioso. 10 Mufueti vanga mawu muingi kumonisa disuasana, biuma binlongo ayi bikhambulu binlongo, ayi biuma bivedila na bikhambulu bivedila, 11 ayi muingi kulonga basi Isaeli minsua mioso Yave kavana kuidi Mose.”

12 Mose wukamba Aloni ayi bana bandi buadi basobila, Eleazar ayi Itamali: “Bonganu minkhailu mi zitheti bavana kuidi Yave, vanganu mapha makhambulu luvi, ayi dilanu mawu va ndeku kikuma, kibila bidi biuma binlongo. 13 Lufueti dila mapha beni va kibuangu kinlongo, kibila kidi kikhuku kinu ayi ki bana binu mu minkhailu miviku bamvana kuidi Yave. Amomo mawu Nzambi kakhamba. 14 Mvandi lufueti dila va kibuangu kinlongo kulu ayi thulu yi kibulu bamvana nkhailu bandiengisa vantuala Nzambi, kibila bitini abiobio bi kibulu bamvana nkhailu wu kithuadi kuidi basi Isaeli, bidi binu ayi bi bana binu. 15 Bo basi Isaeli bala tualanga mafuta ma bibulu bamvana nkhailu wuviku, mvandi bala vana kulu ayi thulu yi kibulu bamvana nkhailu wunlongo, minkhailu bandiengisa vantuala Yave, kibila bitini abiobio bidi binu ayi bi bana binu mu zithangu zioso, dedi bo Yave kathumina.”

16 Bosi Mose wubila mbizi yi khombo bavana nkhailu wu masumu, ayi wubakula ti bavika yawu. Diawu Mose kadasukila Eleazar ayi Itamali bana ba Aloni ayi wuba kamba: 17 “Kibila mbi lube khambu dila mbizi yi kibulu lube vana nkhailu wu masumu? Benu khanu lube dila kiawu va kibuangu kinlongo, kibila widi nkhailu wunlongo. Lusa zaba ko ti Nzambi wuvana bitini abiobio kuidi benu muingi ludindila dikabu nlemvu wu masumu vantuala Yave? 18 Mu kumona ti lusa nata ko menga ma kibulu beni ku kibuangu kinlongo, khanu lube dila kibulu beni va kibuangu kinlongo dedi bo Nzambi kathumina.” 19 Aloni wukamba Mose: “Bubu bawu babe vana kibulu ki nkhailu wu masumu, ayi ki nkhailu wuviku vantuala Yave, vayi kheti bobo mambu amama mabe mbonikina. Diawu boti minu yibe dia mbizi yi nkhailu wu masumu, bukiedika ti khanu Yave kasa dasuka ko?” 20 Bo Mose kayuwa mambu Aloni katuba, nandi wuyangalala.

11 Bosi Yave wukamba Mose ayi Aloni: 2 “Kamba basi Isaeli: ‘Mu bibulu bioso bidi va ntoto, abibi biawu lufueti dianga: 3 Bibulu bioso bidi bikodi* ayi bimvutukilanga kukasa bidia ba bemina.

4 “‘Vayi lulendi dia ko bibulu abibi kheti biawu bimvutukilanga kukasa bidia ba bemina voti bidi bikodi: kamela yimvutukilanga kukasa bidia ka bemina, vayi kisi ko bikodi. Kiawu kisi ko kivedila kuidi benu. 5 Procávia* kidi kibulu kimvutukilanga kukasa bidia ka bemina, vayi kisi ko bikodi. Kiawu kisi ko kivedila kuidi benu. 6 Lebre* kidi kibulu kimvutukilanga kukasa bidia ka bemina, vayi kisi ko bikodi. Kiawu kisi ko kivedila kuidi benu. 7 Ngulu kidi kibulu kidi bikodi, vayi kivutukilanga ko kukasa bidia ka bemina. Kiawu kisi ko kivedila kuidi benu. 8 Lulendi dia ko bibulu abiobio ni kusimba biawu bo bimfua. Biawu bisi ko bivedila kuidi benu.

9 “‘Benu lulenda dia yoso kua fu yidi bipapa* ayi mako.* 10 Vayi bibulu bioso bidi mu nlangu bikhambulu bipapa voti mako, kuba kuandi bio binzingilanga mu mangumba voti bibulu binkaka bidi mu mila ayi mu ḿbu, bisi ko bivedila kuidi benu. 11 Lulendi dia ko bibulu abiobio, vayi lufueti kubimona khenya ayi lulendi bisimba ko bo bimfua. 12 Bibulu bioso binzingilanga mu nlangu bikhambulu bipapa ayi mako, bifueti ba biuma bikhenya kuidi benu.

13 “‘Lulendi dia ko zinuni azizi, vayi lufueti mona ziawu khenya: ngo-nuni, mbemba, abutre, 14 kibala ayi mintindu mioso minkaka mi bibala-binomba, 15 mintindu mioso mi zingongongo, 16 avestruz, kifutu nkubi, gaivota, mintindu mioso mi zi falcão, 17 kifutu, ngongongo yi ḿbu, kinguanguandi, 18 kivuadangu ki nlangu, pelicano, abutre, 19 diyezi, mintindu mioso minkaka mi mayezi, poupa* ayi luphukusu.* 20 Lulendi dia ko mvandi bivangu* bioso bindumukanga ayi bindiatilanga mu malu manna, kibila bisi ko bivedila kuidi benu.

21 “‘Mu bivangu* bioso bindumukanga ayi bidi malu manna, benu lulenda dia to bidi malu muadi maviokizi kukula kena malu mankaka ma kunsadisanga kuzotuka.* 22 Mu biawu, benu lulenda dia abibi: mintindu miviakana mi mindedeka minkalanga mu bibuangu biviakana, mindedeka mindiwanga, zinzenzi,* ayi mintindu minkaka mi mindedeka. 23 Benu lulendi dia ko mua bivangu binkaka bindumukanga bidi va ntoto bidi malu manna, kibila bisi ko bivedila kuidi benu. 24 Kibila biawu bilenda kuluvanga kuba mvindu va mesu mami. Diawu woso mutu wunsimba biawu bo bimfua, kasinkuiza ba ko wudiodila nate va masika ma builu. 25 Ayi woso mutu wunnata biawu va kibuangu kinkaka bo bidi bifua, buna kafueti sukula bikhutu biandi ayi nandi kasinkuiza ba ko wudiodila nate va masika ma builu.

26 “‘Kioso kibulu kidi bikodi, vayi bikhambulu bibasuka va khati ayi kikhambu vutukilanga kukasa bidia ka bemina, kisi ko kivedila kuidi benu. Diawu woso mutu wunsimba kibulu beni kalasa ba ko wudiodila. 27 Bibulu bioso bidi malu manna ma makanda, bisi ko bivedila kuidi benu. Ayi woso mutu wunsimba biawu bo bimfua, kasinkuiza ba ko wudiodila nate va masika ma builu. 28 Woso mutu wunnata kibulu beni kifua va kibuangu kinkaka, kafueti sukula bikhutu biandi, ayi kasinkuiza ba ko wudiodila nate va masika ma builu.

29 “‘Mua bibulu abibi, bisi ko bidiodila kuidi benu: phuku bantedilanga toupeira, ziphuku zinkaka, ntindu woso wu biphanda, 30 kikuela khombo, kiphanda kinneni, kiphanda bantedilanga salamandra, kiphanda kinkotanga ku tsi ntoto ayi lunguenyi. 31 Mua bibulu bioso abiobio, bisi ko bivedila kuidi benu. Ayi woso wunsimba biawu bo bimfua, kasinkuiza ba ko wudiodila nate va masika ma builu.

32 “‘Kioso kua kiuma bibulu beni bifua bimbuila, kuba kuandi kiuma kivangulu mu mabaya, bikhutu, nkanda kibulu, zitsaku voti kioso kua kiuma, kuba kuandi buidi ba kisadilanga, bafueti buika kiawu mu nlangu ayi kialasa ba ko kidiodila nate va masika ma builu. 33 Kia kubuila mu kiuma kivangulu mu tuphandu, buna benu lufueti vava kiawu ayi biuma bioso bibedi mu khati kiuma beni ki tuphandu, bisinkuiza ba ko bivedila. 34 Nlangu wubedi mu kiuma beni wa kubuila mu bidia, buna bidia beni bisinkuiza bue ba ko bivedila, ayi kioso kua kiuma kinkaka kibedi mu khati kiuma beni, mvandi kisinkuiza ba ko kivedila. 35 Voso vambuila mua kivangu beni kifua, kuba kuandi vama bamvangilanga mapha voti va dikhuku di mbazu, lufueti vava biuma beni, kibila biawu bisiedi ko bivedila ayi biala tatamana kuba bimvindu kuidi benu. 36 Vayi bia kubuila mu zitho zi minlangu voti mu matanga ma nlangu, zitho zi nlangu ayi matanga beni biala tatamana bivedila. Vayi woso wunsimba bibulu beni bifua, kasinkuiza ba ko wudiodila. 37 Vayi mua bibulu beni bia kubua va mbata mbongu bankuiza vata, yawu yinkuiza tatamana yivedila. 38 Vayi boti mbongu beni yidi yibondama ayi mua bibulu beni bia kubuila vana, buna yawu yisinkuiza ba ko yidiodila kuidi benu.

39 “‘Kibulu kindiwanga kia kufua kiaveka ayi woso mutu wunsimba kibulu beni kifua, kasinkuiza ba ko wudiodila nate va masika ma builu. 40 Woso mutu wundia mbizi yi kibulu ki befua kiaveka voti wunnata kibulu ki befua va kibuangu kinkaka, kafueti sukula bikhutu biandi ayi kasinkuiza ba ko wudiodila nate va masika ma builu. 41 Benu lufueti mona khenya mua bivangu bioso binkokubukanga ayi lulendi dia ko biawu. 42 Lulendi dia ko bibulu bioso binkokubukanga, ni mua bibulu bioso bindiatilanga mu malu manna voti bio bidi malu mawombo, kibila biawu bisi ko bivedila kuidi benu. 43 Bikanu kudia mua bibulu bioso abiobio, khanu luisinkuiza ba ko badiodila va mesu mami. 44 Kibila minu yidi Yave Nzamb’inu, ayi benu lufueti ba banlongo kibila minu yidi wunlongo. Diawu bikanu kudia mua bibulu bioso abiobio bikhambulu bivedila, muingi lubika ba mvindu va mesu mami. 45 Kibila minu yidi Yave Nzamb’inu no wulubotula ku ntoto wu Ngipiti. Diawu banu banlongo kibila minu yidi wunlongo.

46 “‘Amiomio miawu minsiku lufueti landakana matedi bibulu, zinuni, bivangu bioso binkalanga mu nlangu ayi bivangu binkokubukanga, 47 muingi kumonisa disuasana matedi bibulu bidiodila ayi bikhambulu bidiodila, bibulu lulenda dia ayi bio lulendi dia ko.

12 Yave wukamba Mose: 2 “Kamba basi Isaeli: ‘Nkietu widi buemba na kubuta muana dibakala, buna nandi kasinkuiza ba ko wudiodila mu sambuadi di bilumbu, dedi bo kambelanga mu bilumbu kambasikanga menga.* 3 Mu kilumbu kinana, bafueti zengisa muana beni pheni.* 4 Nandi kafueti tatamana kuyidiodisa mu 33 di bilumbu. Kalendi simba ko ni kiuma kinlongo ni kukota ku nzo yinlongo,* nate kala mana kuyidiodisa.

5 “‘Vayi na kubuta muana nkietu, nandi kasinkuiza ba ko wudiodila mu 14 di bilumbu, dedi bo kambelanga mu bilumbu kambasikanga menga. Ayi kafueti tatamana kuyidiodisa nate kandukisa 66 di bilumbu. 6 Bo bilumbu bi kuyidiodisa biala mana, mu kibila ki muana wu dibakala voti wunkietu kabe buta, nandi kafueti nata kuidi nganga nzambi va khotolo nzo yinlongo, muana dimemi dimbakala didi mvu mueka, muingi kuvana nkhailu wuviku ayi kafueti vana dibembi dimueka voti kiduka, muingi kuvana nkhailu wu disumu. 7 Nganga nzambi wela vana nkhailu vantuala Yave, muingi kudindila nkietu beni nlemvu wu masumu. Mu phila ayoyo, nandi wunkuiza ba wudiodila mu menga kabe basika. Awowo, wawu nsiku bakietu bankuiza landakananga boti muana dibakala voti muana nkietu kabe buta. 8 Na kukhambu ba mbakulu, buna kafueti vana biduka biodi voti mabembi muadi. Nuni mueka muingi kuvana nkhailu wuviku ayi nuni yinkaka, muingi kuvana nkhailu wu disumu, ayi nganga nzambi wunkuiza dindila nkietu awowo nlemvu wu masumu. Mu phila ayoyo, nandi wunkuiza ba wudiodila.’”

13 Yave wubue kamba Mose ayi Aloni: 2 “Mutu na kubasika bikhuzu,* na kudinda voti na kubasika matona mu nyitu, buna buazi* buidi yandi ayi bafueti nata mutu beni kuidi Aloni nganga nzambi, voti kuidi wumueka mu bana ba Aloni. 3 Nganga nzambi wunkuiza fiongunina vama beni, ayi na kumona ti vadi mbeza ayi mika mieka miphembi, buna mutu beni weka mbela yi buazi. Nganga nzambi kafueti kunzabikisa ti nandi kasiedi ko wudiodila. 4 Vayi boti matona kabe basika mu nkanda nyitu madi maphembi, vayi vasi ko mbeza ayi mika va kibuangu beni misi ko miphembi, buna nganga nzambi wunkuiza ntula va naveka nate sambuadi di bilumbu. 5 Mu kilumbu sambuadi, nganga nzambi wunkuiza bue mfiongunina. Na kumona ti matona beni masa tembakana ko, ayi ti vama beni vasi ko mbeza, buna nganga nzambi wunkuiza bue ntula va naveka nate sambuadi di bilumbu.

6 “Mu kilumbu sambuadi, nganga nzambi wunkuiza bue mfiongunina, na kumona ti matona beni madi mu kuzimbala ayi ti masa tembakana ko, buna nganga nzambi wunkuiza nkamba ti nandi weka wudiodila, vayi mutu beni kafueti sukula bikhutu kabe vuata. 7 Vayi matona beni ma kutembakana mu nkanda nyitu, kheti nganga nzambi wuzabikisa mutu beni ti weka wudiodila, buna nandi kafueti bue vutuka kuidi nganga nzambi muingi kabue mfiongunina. 8 Ayi nganga nzambi na kumona ti matona beni mabe tembakana mu nkanda nyitu, buna wunkuiza nzabikisa ti nandi kasiedi ko wudiodila. Kibila weka mbela yi buazi.

9 “Va kumonika mutu widi mbela yi nkanda nyitu yintambakananga, bafueti kunnata kuidi nganga nzambi, 10 ayi nganga nzambi wunkuiza mfiongunina. Na kumona ti nkanda nyitu wube basika matona maphembi, mabe vanga mika midi vana kuba miphembi ayi va kuba mbeza, 11 buna mutu beni weka buazi buntambakananga. Nganga nzambi wunkuiza nzabikisa ti nandi kasiedi ko wudiodila, ayi valasa tombulu ko kuntula va kibuangu ki naveka. 12 Vayi nganga nzambi na kumona ti buazi bube tembakana mu nyitu yi mutu beni, kutonina ku ntu nate mu bitambi, 13 ayi matona ma kuba maphembi mu nyitu yoso, buna buidi buazi bunkhambu tambakananga. Ayi nganga nzambi wunkuiza zabikisa mutu beni ti nandi widi wudiodila. 14 Vayi matona beni ma kubasika mbeza, buna nandi kasiedi ko wudiodila. 15 Nganga nzambi na kumona ti mbeza beni yidi yiwonguka,* buna wunkuiza kamba mutu beni ti kasi ko wudiodila, kibila widi buazi. 16 Vayi mbeza beni ya kubeluka ayi vama vabedi mbeza va kuba vaphembi, buna mutu beni kafueti bue kuenda kuidi nganga nzambi. 17 Nganga nzambi na kumfiongunina, ayi na kumona ti vama beni veka vaphembi, buna kafueti kamba mutu beni ti weka wudiodila.

18 “Mutu na kubasika kikhuzu,* ayi kia kubeluka, 19 vayi vama vabedi kikhuzu va kubasika matona maphembi ayi mabenga, buna mutu beni kafueti kuenda kuidi nganga nzambi. 20 Nganga nzambi wunkuiza mfiongunina, ayi na kumona ti vama vabedi kikhuzu veka mbeza yiwonguka, ayi mika midi vana mieka miphembi, buna nganga nzambi wunkuiza kamba mutu beni ti nandi kasiedi ko wudiodila. Kibila mbeza yibe basika vana, yidi buazi. 21 Vayi nganga nzambi na kumona ti mika midi vama beni misi ko miphembi ayi ti mbeza beni yisiedi ko yiwonguka ayi yima tona kubeluka, buna nandi wunkuiza tula mutu beni va kibuangu ki naveka nate sambuadi di bilumbu. 22 Nganga nzambi na kumona ti mbeza beni yibe tembakana, buna wunkuiza zabikisa mutu beni ti nandi kasiedi ko wudiodila, kibila weka mbela yi nkanda nyitu yintambakananga. 23 Vayi matona ma kukhambu tembakana, buna vama beni vabe dindila mu kibila ki kikhuzu kibedi vana. Nganga nzambi wunkuiza zabikisa mutu beni ti weka wudiodila.

24 “Mutu na kuvia, ayi vama kabe via va kubasika matona maphembi ayi mabenga, 25 nganga nzambi wunkuiza mfiongunina. Ayi na kumona ti mika midi vama beni mieka miphembi, ayi va kubasika mbeza yiwonguka, buna buazi bube basika vana. Ayi nganga nzambi wunkuiza nzabikisa ti nandi kasiedi ko wudiodila. 26 Vayi nganga nzambi na kufiongunina mutu beni, ayi na kumona ti mika midi vama kabe via misi ko miphembi ayi mbeza yisi ko yiwonguka voti yembeluka, buna wunkuiza ntula va kibuangu ki naveka nate sambuadi di bilumbu. 27 Mu kilumbu sambuadi, nganga nzambi wunkuiza mfiongunina. Ayi na kumona ti matona mabe tembakana mu nyitu, buna wunkuiza nzabikisa ti nandi kasiedi ko wudiodila, kibila weka buazi. 28 Vayi boti matona beni masa buelama ko ayi masa tembakana ko mu nyitu, ayi mbeza yibe tona kubeluka, buna nganga nzambi wunkuiza kamba mutu beni ti weka wudiodila, kibila vabe dindila bo kavia.

29 “Dibakala voti nkietu na kubakana mbela yi nkanda nyitu, ku ntu voti va kidofo, 30 buna nganga nzambi wunkuiza fiongunina mutu beni. Na kumona ti va kibuangu beni veka mbeza, ayi mika midi vana mia kuba mi amarelu, nganga nzambi kafueti kamba mutu beni ti nandi kasiedi ko wudiodila. Nandi weka mbela yintambakananga, kibila widi buazi ku ntu voti va kidofo. 31 Vayi nganga nzambi na kumona ti mbeza yidi vama beni yisiedi ko yiwonguka, ayi ti mika midi vana misiedi ko minomba, buna nganga nzambi kafueti tula mutu beni va kibuangi ki naveka nate sambuadi di bilumbu. 32 Mu kilumbu ki sambuadi, nganga nzambi kafueti bue kumfiongunina, ayi na kumona ti mbeza yisiedi ko yiwonguka ayi yisa tembakana ko, ayi na kumona ti mika midi vana misiedi ko mi amarelu, 33 buna mutu beni kafueti vuka minlengi voti kukomba mayedu voti mika midi va kidofo, vayi kubika va kibuangu vadi mbeza. Bosi nganga nzambi kafueti tula mutu beni va kibuangu ki naveka nate sambuadi di bilumbu.

34 “Mu kilumbu sambuadi, nganga nzambi wala bue fiongunina mutu beni. Na kumona ti mbeza yidi vama beni yisiedi ko yiwonguka ayi ti yisa tembakana ko, buna nganga nzambi wala kamba mutu beni ti weka wudiodila. Vayi mutu beni kafueti sukula bikhutu kabe vuata. 35 Vayi mbeza beni ya kutembakana, kheti nganga nzambi wunkamba ti weka wudiodila, 36 buna nganga nzambi wala bue fiongunina mutu beni, ayi na kumona ti mbeza yibe tembakana, buna valasa bue tombulu ko nganga nzambi kufiongunina boti mika midi vana midi mi amarelu, kibila mawu mammonisa ti mutu beni kasiedi ko wudiodila. 37 Vayi bo nganga nzambi kamfiongunina mutu beni, ayi na kumona ti mbeza yisa tembakana ko ayi ti vama beni vabe mena mika minomba, buna mutu beni mabeluka. Ayi nganga nzambi kafueti kunzabikisa ti nandi weka wudiodila.

38 “Dibakala voti nkietu na kubasika matona mu nyitu, ayi ma kuba maphembi, 39 buna nganga nzambi wunkuiza fiongunina matona beni. Vayi matona beni ma kuba fufulu, buna mutu beni widi mbela yikhambu tambakananga. Nandi widi wudiodila.

40 “Dioso kua dibakala na kumana minlengi, ayi na kuba divenda, nandi wunkuiza tatamana wudiodila. 41 Dibakala beni na kubotuka minlengi ku ntu, ayi vama beni va kuba divenda, nandi wunkuiza tatamana wudiodila. 42 Vayi vama vabe botuka minlengi voti vadi divenda, va kubasika mbeza yidi matona maphembi ayi mabenga, buna weka buazi ku ntu. 43 Nganga nzambi kafueti fiongunina mutu beni, ayi na kumona ti mbeza yidi va divenda yibe dinda ayi yidi matona maphembi ayi mabenga, 44 buna dibakala beni weka buazi, ayi nganga nzambi kafueti kunkamba ti nandi kasiedi ko wudiodila mu kibila ki mbela yeka yandi ku ntu. 45 Mutu na kubakana mbela yi buazi, kafueti vuatanga bikhutu bibakuka, kalendi bue sananga ko minlengi, kafueti fuka munu’andi ayi kutenduka: ‘Minu yisi ko wudiodila, minu yisi ko wudiodila.’ 46 Mu thangu kambela buazi, nandi wala tatamana kuba wumvindu. Mu kibila akiokio, wala kalanga kunganda kibuangu basi Isaeli bankalanga.

47 “Boti mbela yi buazi yibe tambakana mu bikhutu, kuba kuandi bivangulu mu mika mi mamemi voti bivangulu mu nledi wu minsinga mi linho, 48 kuba kuandi mu ḿbilu wu minsinga batungila nledi wu linho, voti nledi wuvangulu mu mika mi mamemi voti kioso kua kiuma kivangulu mu nkanda kibulu, 49 ayi va kumonika matona ma verde ma amarelu voti mabenga, mu bikhutu, mu nkanda kibulu, mu ḿbilu wu kikhutu, mu minsinga batungila kikhutu voti mu kioso kua kiuma kivangulu mu nkanda kibulu, buna buidi buazi ayi bafueti nata biuma beni kuidi nganga nzambi. 50 Nganga nzambi wunkuiza fiongunina kiuma kidi matona ayi wunkuiza vengubula kiawu va khonzu, nate sambuadi di bilumbu. 51 Mu kilumbu sambuadi, nganga nzambi wunkuiza bue fiongunina matona beni, na kumona ti matona beni mabe tembakana mu kikhutu, mu ḿbilu wu kikhutu, mu minsinga batungila kikhutu voti mu kioso kua kiuma kivangulu mu nkanda kibulu, kuba kuandi buidi ba kisadilanga, buna matona mabe tembakana buidi buazi buntambakananga, ayi kiuma beni kisiedi ko kivedila. 52 Nandi kafueti vika biuma beni, kuba kuandi bivangulu mu nkanda dimemi, mu nledi wu minsinga mi linho voti kioso kua kiuma kivangulu mu nkanda kibulu kibe tembakana matona, kibila kieka buazi buntembakananga.

53 “Vayi nganga nzambi na kufiongunina kiuma beni ayi na kumona ti matona beni masa tembakana ko mu ḿbilu wu kikhutu, mu minsinga batungila kikhutu voti mu kioso kua kiuma kivangulu mu nkanda kibulu, 54 buna nganga nzambi wunkuiza tuma muingi balava kiuma beni, ayi wala bue kivengubula nate sambuadi di bilumbu. 55 Bosi nganga nzambi wunkuiza bue fiongunina kiuma beni ayi na kumona ti matona beni madi buna buawu kheti masa tembakana ko, buna kiuma beni kisi ko kivedila ayi bafueti vika kiawu, kibila kibe tambakana buazi kuba kuandi kunganda voti kukhati.

56 “Vayi nganga nzambi na kumona ti matona beni masa tembakana ko ayi mabe tona kuzimbala, nandi wunkuiza zenga vama vakhidi matona kuba kuandi mu kikhutu, mu ḿbilu wu kikhutu, mu kiuma kivangulu mu nkanda kibulu voti mu minsinga batungila kikhutu. 57 Vayi nganga nzambi na kumona ti matona beni madi mu kutembakana mu kikhutu, mu ḿbilu wu kikhutu, mu minsinga batungila kikhutu voti mu kioso kua kiuma kivangulu mu nkanda kibulu, nandi kafueti vika kiawu. 58 Nganga nzambi na kumona ti matona beni masiedi ko mu kikhutu, mu ḿbilu wu kikhutu, mu minsinga batungila kikhutu, voti mu kioso kua kiuma kivangulu mu nkanda kibulu, buna kafueti tuma muingi balava kiawu mu khumbu yimmuadi. Mu phila ayoyo, kiawu kinkuiza ba kivedila.

59 “Awowo wawu nsiku matedi mbela yi buazi buntambakana mu bikhutu bivangulu mu mika mi dimemi, mu nledi wu minsinga mi linho, mu ḿbilu wu kikhutu, mu minsinga batungila kikhutu, voti mu kioso kua kiuma kivangulu mu nkanda kibulu, muingi kuzaba boti bidi bivedila voti ndamba.”

14 Yave wubue kamba Mose: 2 “Bo mutu widi buazi kankuenda kuidi nganga nzambi muingi kaba wudiodila, amama mawu mambu kafueti vanga: 3 Mutu widi buazi ayi nganga nzambi, bankuiza basika va kibuangu basi Isaeli bankalanga muingi nganga nzambi kamfiongunina. Mutu beni na kubeluka, 4 nganga nzambi wala kunkamba muingi katuala zinuni wadi zivedila, mua dibaya di nti wu cedro,* nlendi wubenga ayi mua kisafi ki hissopo muingi kundiodisa. 5 Nganga nzambi wunkuiza tuma muingi bavonda nuni yinkaka va mbata kiuma kivangulu mu tuphandu bantulanga nlangu, muidi nlangu batekila va tho yi nlangu. 6 Bosi nganga nzambi wunkuiza bonga nuni yimonyo, mua dibaya di nti wu cedro, nlendi wubenga ayi kisafi ki hissopo, ayi wala buika biuma beni mu nlangu batekila va tho kabe tula menga ma nuni kabe vondila va mbata kiuma kivangulu mu tuphandu bantulanga nlangu. 7 Bosi nandi wunkuiza dakisa menga beni sambuadi di zikhumbu kuidi mutu kadi mu kuvedisa mu kibila ki buazi, ayi nandi wunkuiza nzabikisa ti weka wudiodila. Bosi wunkuiza yekula nuni yimonyo muingi yidumuka.

8 “Mutu ba bediodisa mu kibila ki buazi, kafueti sukula bikhutu kabe vuata, kukomba mika mioso voti minlengi midi mu nyitu’andi ayi kafueti kobila. Mu phila ayoyo, nandi wunkuiza ba wudiodila. 9 Mu kilumbu sambuadi, nandi kafueti vuka minlengi miandi mioso, kuba kuandi minlengi midi ku ntu, mayedu* ayi zitsisi, bosi kafueti kobila ayi kusukula bikhutu kabe vuata. Mu phila ayoyo, nandi wunkuiza ba wudiodila.

10 “Mu kilumbu nana, nandi wala tuala mamemi muadi ayi muana dimemi didi mvu wumueka, vayi biawu bilendi ba ko bibela. Mvandi kafueti tuala zikilu* zisambanu zi falinya yilutidi yimboti basobikisa na nzeta ayi logue* yimueka yi nzeta muingi kuvana nkhailu wu zitheti. 11 Nganga nzambi wala nata mutu beni kamvedisa va khotolo nzo yinlongo, vantuala Yave va kimueka na minkhailu amiomio. 12 Nganga nzambi wala bonga dimemi dimueka muingi kuvana nkhailu wu fotu va kimueka na logue yi nzeta ayi wala diengisa biawu, kibila widi nkhailu bandiengisa vantuala Yave. 13 Bosi nganga nzambi wala vondila dimemi beni va kibuangu kinlongo, vo bamvondilanga bibulu bi kuvanina nkhailu wu disumu ayi nkhailu wuviku. Kibila dedi bo bibulu binsobila mu nkhailu wu disumu bimbelanga bi nganga nzambi, mawu mvandi bafueti vanga mu nkhailu wu fotu, kibila bidi binlongo.

14 “Bosi nganga nzambi wunkuiza bonga mua menga ma kibulu kabe vanina nkhailu wu fotu, ayi wunkuiza vinda mawu va tsongi dikutu di lubakala di dibakala beni kandiodisa, mu luzala lu ngudi lu koko ku lubakala ayi mu luzala lu ngudi lu kulu ku lubakala. 15 Nganga nzambi wunkuiza bonga mua logue yi nzeta ayi wunkuiza dukula yawu va dikanda di koko kuandi ku lukhietu. 16 Nganga nzambi wunkuiza buika luzala lu koko kuandi ku lubakala mu nzeta yidi va dikanda diandi, bosi wunkuiza dakisa nzeta sambuadi di zikhumbu vantuala Yave. 17 Ayi nzeta yinsobila va dikanda diandi, nandi wunkuiza vinda yawu va tsongi dikutu di lubakala di dibakala beni kandiodisa, mu luzala lu ngudi lu koko ku lubakala ayi mu luzala lu ngudi lu kulu ku lubakala, va kibuangu kabe vinda menga ma kibulu kabe vanina nkhailu wu fotu. 18 Nzeta yala sobila va dikanda di nganga nzambi, nandi wala vinda yawu ku ntu mutu kamvedisa. Bosi nganga nzambi wunkuiza dinda nlemvu wu masumu ma mutu beni vantuala Yave.

19 “Nganga nzambi wunkuiza vonda kibulu ki kuvanina nkhailu wu disumu, ayi wunkuiza dindila mutu kandiodisa nlemvu wu masumu muingi kaba wudiodila. Bosi wunkuiza vonda kibulu ki kuvanina nkhailu wuviku. 20 Nganga nzambi wala vika va kikuma nkhailu wuviku ayi nkhailu wu zitheti. Bosi nganga nzambi wala dinda nlemvu wu masumu ma mutu kandiodisa, muingi nandi kaba wudiodila.

21 “Vayi boti kasi ko mbakulu yi kuvana biuma abiobio, buna kafueti bonga muana dimemi muingi kuvana nkhailu wu fotu dedi bo bamvaninanga nkhailu bandiengisa vantuala Nzambi, muingi katambula nlemvu wu masumu. Mvandi kafueti vana zikilu* wadi zi falinya yilutidi yimboti basobikisa na nzeta muingi kuvana nkhailu wu zitheti na logue mueka yi nzeta, 22 ayi biduka biodi voti mabembi muadi, mu kutadila mbakulu’andi. Wunkuiza bonga nuni mueka muingi kuvana nkhailu wu disumu ayi nuni yinkaka muingi kuvana nkhailu wuviku. 23 Mu kilumbu kinana nandi wala nata biawu kuidi nganga nzambi muingi kamvedisa vantuala Yave va khotolo nzo yinlongo.

24 “Nganga nzambi wunkuiza bonga muana dimemi di kuvanina nkhailu wu fotu ayi logue yi nzeta, bosi nandi wunkuiza diengisa biawu, muingi kuvana nkhailu bandiengisa vantuala Yave. 25 Bosi nandi wala vonda dimemi di nkhailu wu fotu, wala bonga mua menga ma kibulu beni, ayi wala vinda va tsongi dikutu di lubakala di mutu kandiodisa, mu luzala lu ngudi lu koko ku lubakala ayi mu luzala lu ngudi lu kulu ku lubakala. 26 Ayi nganga nzambi wala dukula mua nkadu nzeta va dikanda di koko kuandi ku lukietu. 27 Nandi wala buika luzala lu koko kuandi ku lubakala mu nzeta yidi va dikanda diandi, bosi wala dakisa nzeta sambuadi di zikhumbu vantuala Yave. 28 Nzeta yala sobila va dikanda diandi, nandi wala vinda va tsongi dikutu di lubakala di mutu kandiodisa, mvandi wala vinda mu luzala lu ngudi lu koko ku lubakala ayi mu luzala lu ngudi lu kulu ku lubakala, va kibuangu kabe vinda menga ma kibulu kabe vanina nkhailu wu fotu. 29 Ayi nzeta yala sobila va dikanda di nganga nzambi, nandi wala vinda yawu ku ntu mutu kamvedisa, muingi kudindila nlemvu wu masumu vantuala Yave.

30 “Mu kutadila mbakulu yi mutu kamvedisa, nandi wala vana biduka biodi voti mabembi muadi, 31 yimueka muingi kuvanina nkhailu wu disumu, yinkaka muingi kuvanina nkhailu wuviku va kimueka na nkhailu wu zitheti. Mu phila ayoyo, nganga nzambi wunkuiza dinda nlemvu wu masumu ma mutu kamvedisa vantuala Yave.

32 “Awowo, wawu nsiku wu kuvedisila mutu bebakana kimbemvu ki buazi, no wukhambulu beni mbakulu.”

33 Bosi Yave wukamba Mose ayi Aloni: 34 “Bo muala zingila ku ntoto wu Kanani wo yikanikisa kuluvana muingi wuba kiuka kinu, minu kubika buazi bumonika ku nzo yi mutu, 35 buna mutu vuidi nzo beni, kafueti kuenda kuidi nganga nzambi, ayi kunkamba: ‘Nzo’ami yima tona kubasika matona.’ 36 Nganga nzambi wala tuma muingi babasisa biuma bioso bidi ku khati nzo ava nandi kufiongunina matona beni, muingi biuma bidi ku nzo beni bibika tambakana matona. Bosi nganga nzambi wala kota ku nzo beni muingi kufiongunina. 37 Nganga nzambi wala fiongunina kibuangu kidi matona, na kumona ti matona ma bebasika mu nzo beni madi ma verde, ma amarelu ayi mabenga, ayi ti mabe kota mu bibaka, 38 nganga nzambi wala kuenda va khotolo nzo beni, ayi wala zabikisa kuidi batu bankalanga kuna ti balendi bue kota ko ku nzo beni nate vamvioka sambuadi di bilumbu.

39 “Mu kilumbu sambuadi, nganga nzambi wala bue vutuka muingi kue fiongunina nzo beni, na kumona ti matona ma betembakana mu bibaka bi nzo, 40 buna nganga nzambi wala tuma muingi babotula mamanya madi matona ayi beloza mawu ku nganda divula, va kibuangu banlozilanga biuma bimvindu. 41 Bosi bela bambula reboku yi nzo yoso ku khati ayi ku nganda, ayi bala loza yawu ku nganda divula va kibuangu banlozilanga biuma bimvindu. 42 Va kibuangu babotula mamanya maba matona, bala bue tunga vana mamanya mankaka ayi bala bue tula reboku yinkaka mu nzo beni.

43 “Vayi matona ma kubue monika mu bibaka kheti bo bantula mamanya ayi reboku yinkaka, 44 nganga nzambi wala kota muingi kubue fiongunina nzo beni. Na kumona ti matona ma betembakana mu bibaka bi nzo, buna buidi buazi buntambakananga ayi nzo beni yisinkuiza bue ba ko yivedila. 45 Nandi wala tuma muingi batolumuna nzo beni ayi baloza biabioso ku nganda divula va kibuangu banlozilanga biuma bimvindu. 46 Vayi woso mutu wunkota ku nzo beni ava sambuadi di bilumbu kuduka, kasinkuiza bue ba ko wudiodila nate va masika ma builu. 47 Woso wunlala ayi wundila ku nzo beni, kafueti lava bikhutu biandi.

48 “Nganga nzambi na kubue fiongunina nzo beni ayi na kumona ti matona masa tembakana ko bo babue tula reboku yinkaka, buna nandi wunkuiza zabikisa ti nzo beni yeka yivedila, kibila matona masa tembakana ko. 49 Muingi kuvedisa nzo beni, nganga nzambi wala bonga zinuni wadi, mua dibaya di cedro, nledi wubenga ayi mua kisafi ki hissopo. 50 Nandi wala vondila nuni yimueka va kiuma kivangulu mu tuphandu bantulanga nlangu, muidi nlangu batekila va tho yi nlangu. 51 Bosi nganga nzambi wunkuiza bonga nuni yimonyo, mua dibaya di cedro, nledi wubenga ayi mua kisafi ki hissopo, ayi wala dakisa mua menga ma nuni kabe vondila va kiuma kivangulu mu tuphandu bantulanga nlangu, muidi nlangu batekila va tho yi nlangu. Mvandi wala muaka menga beni mu nzo. 52 Nganga nzambi wala bonga menga ma nuni kabe vonda, nlangu batekila va tho yi nlangu, nuni yimonyo, mua dibaya di cedro, nledi wubenga ayi mua kisafi ki hissopo, muingi kuvedisa nzo beni. 53 Bosi nganga nzambi wala bikila nuni yimonyo muingi yidumuka ku nganda divula, ayi wala vedisa nzo beni. Mu phila ayoyo, nzo beni yala ba yivedila.

54 “Awowo wawu nsiku matedi woso kua ntindu wu buazi, kuba kuandi ku ntu, va kidofo, 55 mu bikhutu, mu nzo, 56 buazi bumbasika mu bikhuzu,* matona ayi zimbeza, 57 muingi kuzaba boti kiuma kieka kimvindu voti kidiodila. Awowo wawu nsiku matedi buazi.”

15 Yave wubue kamba Mose ayi Aloni: 2 “Kambanu basi Isaeli: ‘Boti dibakala wumbakana mbela yi kubasika biuma mu pheni, buna biuma kambasika mu pheni* binkuiza mvanga kuba wumvindu. 3 Kheti biuma kambasika mu pheni bintatama voti bimmana, dibakala beni wunkuiza ba wumvindu.

4 “‘Kioso kua kika dibakala beni kanlala, ayi kioso kua kiuma nandi kankala, mvandi binkuiza ba bimvindu. 5 Woso wunsimba kika dibakala beni kabedi wulala, buna kafueti kobila ayi kusukula bikhutu kabe vuata. Ayi kasinkuiza ba ko wudiodila nate va masika ma builu. 6 Ayi woso wunkala va kiuma dibakala beni kabedi wukala, buna kafueti kobila ayi kusukula bikhutu kabe vuata. Ayi kasinkuiza ba ko wudiodila nate va masika ma builu. 7 Woso wunsimba dibakala beni, buna kafueti kobila ayi kusukula bikhutu kabe vuata. Ayi kasinkuiza ba ko wudiodila nate va masika ma builu. 8 Dibakala beni widi kimbevu, na kulobutila matha kuidi mutu wudiodila wukhambulu kimbevu, buna mutu babe lobutila matha, kafueti kobila ayi kusukula bikhutu kabe vuata. Ayi kasinkuiza ba ko wudiodila nate va masika ma builu. 9 Mutu beni no widi kimbevu na kumaka mu kioso kua kibulu, buna kibulu beni kisinkuiza ba ko kivedila. 10 Woso wunsimba voti wunnata kiuma dibakala beni kabedi wukala, buna nandi kafueti kobila ayi kusukula bikhutu kabe vuata. Ayi kasinkuiza ba ko wudiodila nate va masika ma builu. 11 Dibakala beni widi kimbevu na kukhambu lava mioko ava kusimba mutu wunkaka, buna mutu kabe simba kafueti kobila ayi kusukula bikhutu kabe vuata. Ayi kasinkuiza ba ko wudiodila nate va masika ma builu. 12 Mutu beni widi kimbevu na kusimba kiuma kivangulu mu tuphandu, buna bafueti vava kiuma beni. Ayi na kusimba kiuma kivangulu mu mabaya, buna bafueti lava kiuma beni.

13 “‘Kimbevu beni ki kubasika biuma ku pheni kia kumana, buna mutu beni kafueti viokisa sambuadi di bilumbu muingi kuyidiodisa. Bosi kafueti sukula bikhutu kabe vuata, ayi kukobila mu nlangu batekila va tho yi nlangu. Na kuvanga mawu, nandi wunkuiza ba wudiodila. 14 Mu kilumbu kinana, nandi kafueti nata biduka biodi voti mabembi muadi va khotolo nzo yinlongo vantuala Yave, ayi kuvana biawu kuidi nganga nzambi. 15 Bosi nganga nzambi wala vana nuni yinkaka mu nkhailu wu disumu, ayi nuni yinkaka mu nkhailu wuviku. Mvandi wala dindila dibakala beni nlemvu kuidi Yave, mu kibila ki kimbevu kabedi ki kubasika biuma mu pheni.

16 “‘Dibakala na kubasika maluma, buna kafueti kobila ayi kasinkuiza bue ba ko wudiodila nate va masika ma builu. 17 Ayi nandi kafueti sukula bikhutu kabe vuata ayi kioso kua kiuma kivangulu mu nkanda kibulu bibe builu maluma, ayi biawu bisinkuiza bue ba ko bidiodila nate va masika ma builu.

18 “‘Dibakala ayi nkietu ba kubundana nyitu ayi dibakala na kubasika maluma, buna baba buadi bafueti kobila ayi basinkuiza bue ba ko badiodila nate va masika ma builu.

19 “‘Nkietu na kubasika menga mu pheni, nandi kasinkuiza bue ba ko wudiodila nate sambuadi di bilumbu mu kibila ki menga kambasika. Ayi woso wukunsimba kasinkuiza bue ba ko wudiodila nate va masika ma builu. 20 Kioso kika kanlala ayi kioso kua kiuma kankala, buna biuma beni bisinkuiza bue ba ko bivedila mu kibila ki menga kambasika. 21 Woso wunsimba va kika nkietu beni kabedi wulala, buna nandi kafueti kobila ayi kusukula bikhutu kabe vuata. Ayi kasinkuiza ba ko wudiodila nate va masika ma builu. 22 Woso wunsimba kiuma nkietu beni kabedi wukala, kafueti kobila ayi kusukula bikhutu kabe vuata. Ayi kasinkuiza ba ko wudiodila nate va masika ma builu. 23 Woso wunsimba kiuma nkietu beni kabedi wukala, buna mutu besimba kiawu kasinkuiza bue ba ko wudiodila nate va masika ma builu. 24 Dibakala na kubundana nyitu na nkietu mu thangu kambasika menga, buna dibakala beni kasinkuiza bue ba ko wudiodila nate sambuadi di bilumbu, ayi kioso kua kika dibakala beni kanlala mvandi kisinkuiza ba ko kidiodila.

25 “‘Nkietu na kubasika menga mu bilumbu biwombo mukhambu ba mu bilumbu kambasikanga menga, voti na kutatamana kubasika menga kuvioka bilumbu kambasikanga menga, buna nandi kasinkuiza ba ko wudiodila mu bilumbu bioso kankuiza basika menga. 26 Kioso kika ayi kioso kua kiuma nkietu beni kankala mu bilumbu bioso kambasika menga, biuma beni bisinkuiza ba ko bivedila. 27 Woso wunsimba kiuma nkietu beni kabedi wukala voti kabedi wulala, buna mutu beni kafueti kobila ayi kusukula bikhutu kabe vuata. Ayi kasinkuiza ba ko wudiodila nate va masika ma builu.

28 “‘Thangu yi kubasika menga yakumana, nkietu beni kafueti viokisa sambuadi di bilumbu muingi kuyidiodisa. Na kuvanga mawu, nandi wunkuiza ba wudiodila. 29 Mu kilumbu nana, nkietu beni kafueti nata kuidi nganga nzambi va khotolo nzo yinlongo, biduka biodi voti mabembi muadi. 30 Bosi nganga nzambi wala vana nuni yimueka mu nkhailu wu disumu, ayi nuni yinkaka mu nkhailu wuviku. Ayi nganga nzambi wala dindila nkietu beni nlemvu vantuala Yave, mu kibila ki kubasika menga.

31 “‘Benu lufueti sadisa basi Isaeli batatamana badiodila, muingi nzo’ami yinlongo yidi va khati’awu yitatamana yidiodila. Kibila ba kukhambu tatamana badiodila, mawu mankuiza bivisa nzo’ami yinlongo ayi mankuiza batuadisa lufua.

32 “‘Awowo wawu nsiku matedi dibakala wukhambulu wudiodila, matedi mbela yi kubasika biuma mu pheni, kubasika maluma, 33 matedi nkietu widi mu thangu yi kubasika menga mu pheni ayi matedi dibakala wumbundana nyitu na nkietu widi mu thangu kambasikanga menga.’”

16 Yave wuyoluka na Mose bo bana ba Aloni bafua, mu thangu bayenda vantuala Yave. 2 Yave wukamba Mose: “Kamba khomb’aku Aloni kabika kukota ku kibuangu kilutidi kinlongo mu yoso kua thangu muingi kabika fua, kibila minu yinkuiza monika va mbata kasu yi luwawanu mu dituti.

3 “Bo Aloni kala kotanga ku kibuangu kilutidi kinlongo, kafueti natanga: muana ngombi muingi kuvana nkhailu wu disumu ayi dimemi muingi kuvana nkhailu wuviku. 4 Ava Aloni kakota kuna, nandi kafueti kobila, kafueti vuata dizuela dikula ayi kupa yivangulu mu nledi wu minsinga mi linho, muingi kufuka pheni’andi. Mvandi kafueti kanga phonda mu lukietu ayi kukanga thata, kibila biuma abiobio bidi binlongo.

5 “Dikabu di Isaeli bafueti vana Aloni zikhombo wadi, muingi kuvana nkhailu wu disumu ayi dimemi dimueka muingi kuvana nkhailu wuviku.

6 “Bosi Aloni wunkuiza bonga muana ngombi muingi kuvana nkhailu wu masumu mandi, ayi wunkuiza dinda nlemvu wu masumu mandi ayi ma dikanda diandi.

7 “Nandi wala bonga zikhombo zia ziwadi ayi wala nata ziawu va khotolo nzo yinlongo vantuala Yave. 8 Aloni wukuba mamanya muingi kuzaba khombo mbi kafueti vana kuidi Yave ayi khombo mbi kafueti nata ku Azazeli.* 9 Aloni wala bonga khombo kabe sola muingi kuvana Yave ayi wala vana yawu mu nkhailu wu disumu. 10 Vayi khombo bannata ku Azazeli bafueti tuala yawu vantuala Yave muingi kudindila dikabu nlemvu, bosi bafueti fila yawu ku thandu ku Azazeli.

11 “Aloni wala vonda muana ngombi muingi kuvana nkhailu wu kudindila nlemvu wu masumu mandi ayi ma dikanda diandi.

12 “Aloni wala bonga kiuma ki kuvikila malasi, wala tula vana makala ma mbazu kala bonga va kikuma kidi vantuala Yave, ayi wala bonga makanda muadi ma malasi batuta, bosi wala nata biuma beni ku kibuangu kilutidi kinlongo. 13 Vana ntuala Yave, nandi wala tula malasi va mbata makala muingi muisi wufutubuka va mbata tampa yi kasu yi luwawanu. Mu phila ayoyo, Aloni kasinkuiza fua ko.

14 “Ayi Aloni wala bonga mua menga ma muana ngombi kabe vonda, wala buika muna luzala luandi ayi wala dakisa menga beni va tsi va ndeku kasu yi luwawanu ku khonzu leste. Mvandi wala bue buika luzala luandi mu menga ayi wala dakisa va ndeku kasu yi luwawanu sambuadi di zikhumbu.

15 “Aloni wala vonda khombo yimbakala muingi kuvana nkhailu wu disumu di dikabu. Nandi wala nata menga beni kukhati kibuangu kilutidi kinlongo, ayi wala vanga momawu mambu kavanga mu menga ma muana ngombi kavonda.

16 “Mu phila ayoyo, Aloni wala vedisa kibuangu kilutidi kinlongo ayi nzo yoso yidi va khati basi Isaeli, mu kibila ki masumu ayi zinzimbala zi basi Isaeli.

17 “Ni mutu kalendi kota ko ku nzo yinlongo mu kilokula kio Aloni kankuiza kota muingi kuvedisa kibuangu kinlongo nate kilokula kankuiza basika. Nandi wunkuiza dinda nlemvu wu masumu mandi, ma dikanda diandi ayi masumu ma dikabu dioso di Isaeli.

18 “Bo kala basika, nandi wala kuenda va kikuma kidi vantuala Yave ayi wala vedisa kikuma beni. Nandi wala bonga mua menga ma muana ngombi kabe vonda ayi ma khombo yimbakala ayi wala dakisa mawu mu ziphoka zioso zi kikuma. 19 Nandi wala buika luzala luandi mu menga beni, ayi wala dakisa mawu sambuadi di zikhumbu va kikuma ayi wala diodisa kikuma beni muingi ku kivedisa mu kibila ki masumu ma basi Isaeli.

20 “Bo Aloni kala mana kuvedisa kibuangu kilutidi kinlongo, nzo yinlongo ayi kikuma, nandi wala bonga khombo yimbakala yimonyo, 21 wala tetika mioko miandi va mbata ntu wu kibulu beni, ayi wala fungula masumu ayi zinzimbala zioso zi basi Isaeli. Mu phila ayoyo, nandi wala tetika masumu ma dikabu va mbata ntu wu khombo beni yimbakala, bosi nandi wala vana kibulu beni kuidi mutu basola muingi kanata kiawu ku thandu. 22 Nandi wala bikidila* khombo beni ku thandu ku kibuangu kikhambu kalanga batu. Mu phila ayoyo, yawu yala nata masumu ma dikabu va mbata ntu’andi.

23 “Bosi Aloni wala kota ku nzo yinlongo, ayi wala vula dizuela dio kabe vuata ava kukota ku kibuangu kilutidi kinlongo, ayi wala bika dizuela beni ku kibuangu kinlongo. 24 Nandi kafueti kobidila ku luphangu lu nzo yinlongo, ayi kafueti vuata bikhutu kansadilanga mu kuba nkulutu zinganga nzambi. Bosi wala vana nkhailu wuviku mu kibila ki masumu mandi ayi nkhailu wunkaka wuviku mu kibila ki masumu ma dikabu. Mu phila ayoyo, nandi wunkuiza dinda nlemvu wu masumu mandi ayi masumu ma dikabu. 25 Nandi wunkuiza vika mafuta ma kibulu kamvanina nkhailu wu disumu.

26 “Dibakala no be kuefila khombo yimbakala ku Azazeli, kafueti kobila ayi kusukula bikhutu biandi ava kakota ku kibuangu dikabu bankalanga.

27 “Muana ngombi ayi khombo yimbakala bavana nkhailu wu disumu, ayi bibulu bivuidi menga banata ku kibuangu kilutidi kinlongo muingi kudindila nlemvu wu masumu, bafueti kubinata ku nganda kibuangu dikabu bankalanga. Nkanda, nsuni ayi matuvi ma bibulu abiobio, bafueti kubivika ku mbazu. 28 Mutu wala vika biuma beni, kafueti sukula bikhutu biandi ayi kukobila ava kakota ku kibuangu dikabu bankalanga.

29 “Awuwu wawu nsiku lufueti landakananga: Mu kilumbu kumi mu ngonda yisambuadi, basi Isaeli boso ayi zinzenza zinkalanga yinu, lufueti ba mu kiunda mu kibila ki masumu minu, ayi lulendi dia ko ni kiuma ni kuvanga bisalu binkaka. 30 Mu kilumbu akiokio, nganga nzambi wala dinda nlemvu mu kibila ki masumu minu. Mu phila ayoyo, benu lunkuiza ba badiodila mu masumu minu moso va mesu ma Yave. 31 Akiokio kidi kisabala muingi luvunda mu bisalu binu bioso, ayi benu lufueti ba mu kiunda mu kibila ki masumu minu. Awowo widi nsiku wala kadidila.

32 “Muana wu Aloni no bala bieka nkulutu wu zinganga nzambi va mvingi tat’andi, mvandi wala dinda nlemvu wu masumu ayi wala vuata mazuela manlongo mavangulu mu minsinga mi linho. 33 Nandi wunkuiza diodisa kibuangu kilutidi kinlongo, nzo yinlongo ayi kikuma. Mvandi wunkuiza dinda nlemvu wu masumu ma zinganga nzambi ayi wu masumu ma dikabu dioso. 34 Fueti vanganga mawu khumbu mueka mu mvu, muingi kudinda nlemvu wu masumu moso ma dikabu. Awowo widi nsiku wala kadidila.

Ayi Aloni wuvanga mamoso dedi bo Yave kakambila Mose.

17 Yave wubue kamba Mose: 2 “Kamba Aloni, bana bandi ayi dikabu dioso di Isaeli: ‘Amama mawu mambu Yave kabe thuma:

3 “‘“Woso mutu wumvonda ngombi yimbakala, muana dimemi voti khombo, ku khati voti ku nganda kibuangu basi Isaeli bankalanga, 4 mukhambu nata kibulu beni va khotolo nzo yinlongo, muingi kuvana kiawu nkhailu kuidi Yave, buna mutu beni wunkuiza ba fotu va mesu ma Yave mu kutengula menga. Bafueti vonda mutu beni, kibila betengula menga. 5 Bawu balendi vondila ko bibulu va kibuangu kinkaka, vayi bafueti nata biawu kuidi nganga nzambi vantuala Yave, va khotolo nzo yinlongo. Bawu bafueti vana bibulu beni mu minkhailu mi kithuadi na Yave. 6 Nganga nzambi wala dakisa menga ma kibulu beni va kikuma ki Yave kidi va khotolo nzo yinlongo. Mvandi wala vika mafuta ma kibulu beni muingi kubasisa mfimbu wumboti wunkuangidika Yave, 7 muingi babika kubue vananga minkhailu kuidi ziphevi zimbi zidi buka zikhombo, bamvanganga yawu kitsuza. Awowo widi nsiku wala kadidila kuidi benu ayi kuidi zimbandu zinu zioso.”’

8 “Ngie fueti kuba kamba: ‘Woso mutu mu dikabu di Isaeli voti nzenza wunkalanga va khat’inu, wumvana nkhailu wuviku voti woso kua nkhailu wunkaka, 9 mukhambu nata kibulu beni va khotolo nzo yinlongo muingi kuvana kibulu beni kuidi Yave, bafueti kumvonda.

10 “‘Woso mutu mu dikabu di Isaeli voti nzenza wunkalanga va khat’inu wundia menga ma kioso kua kivangu, minu yinkuiza mmonisa nganzi’ama ayi yinkuiza mvonda. 11 Monyo wu kioso kua kivangu, widi mu menga. Minu yiluvana nsua wu kusadila menga va kikuma, muingi lubaka nlemvu wu masumu. Ayi mu kumona ti monyo widi mu menga, benu mulenda bakila nlemvu wu masumu mu nzila menga beni. 12 Diawu minu yikambila basi Isaeli: “Ni mutu mu benu voti nzenza wunkalanga va khat’inu, kalenda dia menga.”

13 “‘Woso mutu mu benu voti nzenza wunkalanga va khat’inu, na kuvonda* kibulu ki nsitu voti nuni bandianga, kafueti tengula menga ma kibulu beni ayi kuzika mawu kutsi ntoto. 14 Kibila monyo wu kioso kua kivangu, widi mu menga, ayi menga madi monyo. Diawu yikambila basi Isaeli: “Bikanu kudia menga ma kioso kua kivangu, kibila monyo wu kioso kua kivangu, widi mu menga. Ayi woso mutu wundia menga, bafueti kumvonda.” 15 Woso kua mutu mu benu voti nzenza wunkalanga va khat’inu, wundia kibulu kibe fua kiaveka, voti babe vonda kuidi kibulu kinkaka, buna nandi kafueti kobila ayi kusukula bikhutu kabe vuata. Ayi nandi kasinkuiza ba ko wudiodila nate va masika ma builu. 16 Vayi mutu beni na kumanga kukobila voti kusukula bikhutu biandi, buna wunkuiza ba fotu.’”

18 Yave wubue kamba Mose: 2 “Kamba basi Isaeli: ‘Minu yidi Yave, Nzamb’inu. 3 Mulendi landakana ko zikhadulu ayi bikhulu bi basi Ngipiti. Mvandi bo luala zingila ku ntoto yidi mu kulunata, mulendi vanga ko mambu basi Kanani bamvanganga ayi mulendi landakana ko kifuani kiawu. 4 Vayi benu lufueti tumukina minsiku ayi kulandakana zithumu ziama, kibila minu yidi Yave Nzamb’inu. 5 Benu kutumukina minsiku ayi kulandakana zithumu ziama, luala tatamana kuzinga. Minu yidi Yave.

6 “‘Ni mutu mu benu kalendi bundana ko nyitu na musi dikanda diandi. Minu yidi Yave. 7 Wulendi bundana ko nyitu na tat’aku voti mam’aku, kibila bawu badi matata maku.

8 “‘Wulendi bundana ko nyitu na nkazi wu tat’aku, kibila ngie kuvanga mawu wunkuiza fuisa tat’aku zitsonyi.

9 “‘Wulendi bundana ko nyitu na khomb’aku wunkietu, kuba kuandi no wubutuka yaku tata yimueka voti ngudi yimueka, kheti nandi wubutukila ku nzo tat’aku voti ku nzo yinkaka.

10 “‘Wulendi bundana ko nyitu na ntekulu’aku, kuba kuandi wu dibakala voti wunkietu. Kibila mawu malenda kufuisa zitsonyi.

11 “‘Wulendi bundana ko nyitu na muana wunkietu wu nkazi tat’aku, kibila nandi widi muana wu tat’aku, ayi mvandi widi khomb’aku wunkietu.

12 “‘Wulendi bundana ko nyitu na khomba tat’aku wunkietu, kibila nandi widi musi dikanda di tat’aku.

13 “‘Wulendi bundana ko nyitu na khomba mam’aku, kibila nandi widi musi dikanda di mam’aku.

14 “‘Wulendi bundana ko nyitu na nkazi wu khomba tat’aku, kibila nkietu beni widi mam’aku nleki. Ayi mawu malenda fuisa khomba tat’aku tsonyi.

15 “‘Wulendi bundana ko nyitu na kikuekizi kiaku, kibila nandi widi nkazi wu muan’aku.

16 “‘Wulendi bundana ko nyitu na nkazi wu khomb’aku, ngie kuvanga mawu buna wunkuiza fuisa khamb’aku zitsonyi.

17 “‘Wulendi bundana ko nyitu na ngudi ayi muan’andi wunkietu. Mvandi wulendi bundana ko nyitu na ntekulu wunkietu beni, kuba kuandi wu dibakala voti wunkietu. Mawu madi mambu makhenya, kibila bawu badi basi dikanda di nkietu beni.

18 “‘Wulendi kuela ko khomba nkazi’aku, bo nkazi’aku kakhidi wu monyo muingi kaba mbanda yi nkazi’aku.

19 “‘Wulendi bundana ko nyitu na nkietu bo kadi mu thangu kambasikanga menga.

20 “‘Wulendi bundana ko nyitu na nkazi wu wadi yaku, muingi wubika sumuka.

21 “‘Wulendi vonda ko muan’aku muingi wuvana nkhailu kuidi Moloki. Ngie kuvanga mawu, wunkuiza bifisa dizina dinlongo di Nzambi’aku. Minu yidi Yave.

22 “‘Dibakala kalendi bundana ko nyitu na dibakala yandi, kibila mawu madi mambu makhenya.

23 “‘Dibakala kalendi bundana ko nyitu na kibulu, mvandi nkietu kalendi bundana ko nyitu na kibulu. Bakuvanga mawu, buna badi mu kubundula nsiku wu Nzambi.

24 “‘Benu mulendi vanga ko mambu amomo, kibila mawu mimvila yidi mu kukukisa vantual’inu bavanga, ayi bawu basumuka va mesu mami. 25 Diawu ntoto wukitukila wumvindu, ayi minu yinkuiza fundisa batu banzingilanga kuna mu kibila ki masumu mawu, ayi ntoto wunkuiza baluka. 26 Vayi benu basi Isaeli ayi zinzenza bankalanga va khat’inu, lufueti tumukina minsiku ayi kulandakana zithumu ziama. Mvandi mulendi vanga ko mambu amomo makhenya. 27 Kibila batu baba kalanga mu ntoto woso awuwu baba vanganga mambu amomo mamvindu, ayi mu kibila ki mambu amomo, diawu ntoto beni wekila wumvindu. 28 Diawu, bikanu kubifisa ntoto, mu kuvanga mambu amomo makhenya, muingi ntoto wubika ku luluka dedi bo kalukila batu baba kalanga ku ntoto beni. 29 Woso mutu widi va khat’inu wumvanga mambu amomo makhenya, bafueti kumvonda. 30 Lufueti tumukina zithumu ziama zioso, ayi mulendi landakana ko bikhulu bi batu baba zingilanga mu ntoto awuwu, muingi benu lubika ba batu bamvindu va mesu mama. Kibila minu yidi Yave Nzamb’inu.’”

19 Yave wubue kamba Mose: 2 “Kamba dikabu dioso di Isaeli: ‘Benu lufueti ba banlongo kibila minu Yave Nzamb’inu, yidi wunlongo.

3 “‘Kadika mutu mu benu, kafueti kinzika tata ayi ngudi’andi ayi benu lufueti vundanga mu kisabala. Minu yidi Yave Nzamb’inu. 4 Benu lulendi vanga ko zinzambi ni kusambidila ziawu, kibila minu yidi Yave Nzamb’inu.

5 “‘Ngie kuvana nkhailu wu kithuadi kuidi Yave, fueti vanina wawu mu kulandakana zithuadusulu yiluvana, muingi minu yikikinina nkhailu beni. 6 Ayi mbizi yi kibulu bevanina nkhailu beni, lufueti dia yawu muna kilumbu voti mu kilumbu kinlanda. Vayi yakusobila nate mu kilumbu kintatu, benu lufueti vika yawu. 7 Vayi benu kudia bitini binsobila mu kilumbu kintatu, minu yisinkuiza bue kikinina ko nkhailu beni. 8 Woso mutu wundia biawu mu kilumbu kintatu, buna bafueti kumvonda, kibila nandi bebivisa biuma binlongo bi Yave.

9 “‘Bo wumvaka* mbongu mu tsol’aku, bika kuvaka mbongu yoso ayi bika kunonga mvandi yo yindoduka va tsi. 10 Bika kuvela makundi moso ma vinu mu ndim’aku, mvandi bika kunonga makundi ma vinu mambua va tsi, muingi batu bakhambulu mbakulu ayi zinzenza badi va khat’inu babaka bi kunonga. Minu yidi Yave Nzamb’inu.

11 “‘Lulendi kuiba ko, lulendi vuna ko ayi lulendi vangila ko bankaka mambu makhambulu masonga. 12 Lulendi leva ko phesi yi luvunu mu kusadila dizina diama, muingi lubika bivisa dizina di Nzamb’inu. Minu yidi Yave. 13 Bika kuvionya ni kukuiba biuma bi wadi yaku. Bika kusimbidila mfutu wu wadi yaku nate mu kilumbu kinkaka.

14 “‘Wulendi singa ko mutu wufua matu, ni kutula kiuma kuntuala mutu wufua mesu muingi kumbuisa, fueti ba boma bu Nzambi’aku. Minu yidi Yave.

15 “‘Bo wumfundisa bankaka, wulendi vanga ko mambu makhambulu masonga. Bika kumonisa luvasanu bo wumfundisa mutu khambulu mbakulu voti bo wumfundisa mutu widi busina, vayi fueti fundisila wadi yaku mu busonga.

16 “‘Bika kusekanga buezi, ayi bika kuta kimbangi ki luvunu kilenda tula luzingu lu wadi yaku va kingiela. Minu yidi Yave.

17 “‘Bika kulundila wadi yaku nganzi, vayi fueti kunsemba muingi wubika ba fotu mu mambu kabe vanga.

18 “‘Bika kuvutudila wadi yaku mambi, ni kunlundila nganzi, vayi zola wadi yaku dedi bo wuyizodilanga ngie veka. Minu yidi Yave.

19 “‘Benu lufueti tumukina minsiku miama: Lulendi vanga ko mintindu miodi mi bibulu biviakana ba bundana nyitu muingi kubuta, ayi bika kuvata mintindu miodi mi zitheti mu diodiawu dibulu mu tsol’aku. Mvandi wulendi vuata ko bikhutu bivangulu mu mintindu miodi mi minledi.

20 “‘Dibakala na kubundana nyitu na nkietu widi va buvika no bakanikisa makuela kuidi dibakala dinkaka, no kaba kudidiabu ko ayi no kaba veniabu ko kiphuanza, buna dibakala ayi nkietu beni bafueti tambula tsembolo. Vayi balendi kuba vonda ko kibila nkietu beni kabekiabu ko kiphuanza. 21 Dibakala beni kafueti tuala kuidi Yave dimemi muingi kuvana nkhailu wu fotu va khotolo nzo yinlongo. 22 Nganga nzambi wala vika dimemi beni di nkhailu wu fotu muingi kudindila dibakala beni nlemvu vantuala Yave, mu kibila ki disumu kabe vola. Mu phila ayoyo, Nzambi wala nlemvukila.

23 “‘Bo luala zingilanga ku ntoto yi lukanikisa ayi benu kuvata minti mimbutanga makundi bandianga, benu lulendi dia ko makundi beni nate vamvioka mimvu mitatu. Kibila makundi beni malasa ba ko mavedila kuidi benu. 24 Vayi mu mvu wunna makundi moso mala ba nkhailu wunlongo, muingi kukuangidika Yave. 25 Vayi mu mvu wuntanu, benu mulenda dia makundi ma minti beni. Mu phila ayoyo, minti beni miala luta butanga makundi mawombo. Minu yidi Yave Nzamb’inu.

26 “‘Lulendi dia ko menga.

“‘Mvandi lulendi tomba ko batu bambikulanga, ayi lulendi vanga ko minkisi.*

27 “‘Wulendi zenga ko minlengi midi mu zikhonzu zi ntu’aku, mvandi wulendi zenga ko mayedu.

28 “‘Mulendi kuyilueka ko mu zinyitu zinu mu kibila ki mutu befua, ni kuvanga zitatuage.* Minu yidi Yave.

29 “‘Bika kusumuna muan’aku wunkietu mu kuntuma kaba ndumba leta, muingi ntoto widi mu kuzingila wubika wala zindumba leta, ayi wubika tuadisa disumu.

30 “‘Lufueti vundanga mu kisabala, ayi lufueti monisanga lukinzu mu nzo yinlongo kibuangu ba kumbuongiminanga. Minu yidi Yave.

31 “‘Lulendi tomba ko lusalusu kuidi zinganga zi minkisi, ni kuidi batu bantesanga muingi lubika sumuka. Minu yidi Yave Nzamb’inu.

32 “‘Lufueti telama vantuala mutu widi minlengi miphembi, kinzika mutu weka kiboba ayi ba boma bu Nzambi’aku. Minu yidi Yave.

33 “‘Bika kuvangila nzenza wunkalanga va khati’aku diambu dimbi. 34 Ngie fueti tadila nzenza wunkalanga va khat’inu buka musi Isaeli, diawu lufueti kunzola dedi bo luyizodilanga benu veka, kibila benu mvinu luba zinzenza ku ntoto wu Ngipiti. Minu yidi Yave Nzamb’inu.

35 “‘Benu lulendi vuna ko bo lunsadila bizongulu muingi kuzonga kukula, kizitu ayi kutola. 36 Benu lufueti sadila bizongulu bifuana bo lunzonga kizitu, biuma biyuma ayi binlangu. Minu yidi Yave Nzamb’inu no wu lubotula ku ntoto wu Ngipiti. 37 Diawu, lundanu minsiku ayi tumukinanu zithumu ziama. Minu yidi Yave.’”

20 Yave wukamba Mose: 2 “Ngie fueti kamba basi Isaeli: ‘Woso mutu mu dikabu di Isaeli voti nzenza wunkalanga yinu na kuvana muan’andi buka nkhailu kuidi nzambi Moloki, dikabu dioso bafueti kunkuba mamanya nate kamfua. 3 Minu yinkuiza mmonisa nganzi’ama ayi yala kumvonda, kibila bevana wumueka mu bana bandi nkhailu kuidi nzambi Moloki ayi bebifisa kibuangu kiama ayi dizina diama dinlongo. 4 Basi Isaeli ba kukhambu vonda mutu bevana muan’andi nkhailu kuidi nzambi Moloki, 5 buna minu yinkuiza vonda mutu beni, kubunda mvandi dikanda diandi ayi baboso bambuela mioko kusambidila nzambi Moloki.

6 “‘Mu matedi mutu wuntomba lusadusu lu zinganga zi minkisi ayi lu batu bantesanga mu kusambidila zinzambi zinkaka, minu yinkuiza monisa nganzi’ama kuidi mutu beni ayi yala kumvonda.

7 “‘Banu banlongo, kibila minu yidi Yave Nzamb’inu. 8 Lundanu ayi tumukinanu zithumu ziama. Minu yidi Yave, no wu kuluvedisa.

9 “‘Woso mutu wunsinga tat’andi voti ngudi’andi, bafueti kumvonda. Ayi mu kumona ti nandi besinga tat’andi voti ngudi’andi, nandi wunkuiza ba fotu mu lufua luandi veka.

10 “‘Woso mutu wumbundana nyitu na nkazi wu wadi yandi, bafueti kumvonda ayi bafueti mvonda mvandi nkietu beni. 11 Muana dibakala na kubundana nyitu na nkazi tat’andi, widi mu kufuisa tsonyi tat’andi. Bafueti vonda dibakala ayi nkietu beni. Ayi baveka bankuiza ba fotu mu lufua luawu. 12 Dioso dibakala wumbundana nyitu na kikuekizi kiandi, bafueti kumvonda ayi kuvonda mvandi kikuekizi kiandi, kibila badi mu kubundula nsiku wu Nzambi. Ayi baveka bankuiza ba fotu mu lufua luawu.

13 “‘Dibakala na kubundana nyitu na dibakala yandi, ba babuadi bafueti vondu kibila badi mu kuvanga diambu dikhenya. Ayi baveka bankuiza ba fotu mu lufua luawu.

14 “‘Dibakala na kubundana nyitu na ngudi ayi muana, buna bafueti vika dibakala beni va kimueka na bakietu ba babuadi, muingi mambu mambi ba bevanga mabika tatamana va khati dikabu.

15 “‘Dibakala na kubundana nyitu na kibulu, bafueti kumvonda ayi bafueti vonda mvandi kibulu beni. 16 Nkietu na kubundana nyitu na kibulu, bafueti kumvonda ayi bafueti vonda mvandi kibulu beni. Ayi baveka bankuiza ba fotu mu lufua luawu.

17 “‘Dibakala na kubundana nyitu na khomb’andi wunkietu wubutuka yandi tata voti ngudi yimueka, widi mu kufuisa tsonyi khomb’andi ayi mawu madi mambu matsonyi. Diawu bafueti kuba vondila vantuala dikabu dioso.

18 “‘Dibakala na kubundana nyitu na nkietu widi mu thangu kambasikanga menga, bafueti kumvonda ayi bafueti vonda mvandi nkietu beni. Kibila ba babuadi ba bemona menga beni.

19 “‘Wulendi bundana ko nyitu na khomba wunkietu wu mam’aku ayi khomba wunkietu wu tat’aku. Kibila ngie kuvanga mawu wunkuiza fuisa tsonyi musi dikanda diaku. Ayi dibakala na nkietu bamvanga mawu, bafueti vondu. 20 Dibakala na kubundana nyitu na nkazi titi’andi, wunkuiza fuisa tsonyi titi’andi. Dibakala beni ayi nkietu bafueti fuila bobo mukhambu buta ni muana. 21 Dibakala na kubundana nyitu na nkazi khomb’andi, buna bevanga diambu dimbi ayi nandi wunkuiza fuisa tsonyi khomb’andi. Mu phila ayoyo, dibakala beni ayi nkietu bankuiza fuila bobo mukhambu buta ni muana.

22 “‘Lufueti tumukina ayi kulandakana zithumu ziama, muingi ntoto wo luala kalanga wubika kululuka. 23 Batu ba mimvila yidi mu kukukisa vantual’inu baba vanga mambu moso amomo mambi, diawu minu yiba lendilanga. Bikanu kulandakana mavanga mawu. 24 Diawu minu yilukambila: “Benu luala vua ntoto beni ayi yala kuluvana wawu buka kiuka, kibila ntoto beni wuwedi leta ayi wika.* Minu yidi Yave Nzamb’inu, no wulutatula mu makabu mankaka.” 25 Benu lufueti vasa bibulu bidiodila ayi bikhambulu bidiodila, zinuni zidiodila ayi zikhambulu zidiodila ayi bikanu kusimba zinuni voti kioso kua kibulu kinkaka kidi va ntoto kikhambulu kidiodila, muingi lubika ba mvindu. 26 Banu banlongo kibila minu Yave yidi wunlongo. Diawu yidi mu kulutatudila mu mimvila minkaka muingi luba dikabu diama.

27 “‘Woso mutu wuntomba lusadusu lu zinganga zi minkisi voti lu batu bantesanga, dikabu dioso bafueti kunkuba mamanya nate kamfua. Ayi naveka wunkuiza ba fotu mu lufua luandi.’”

21 Yave wubue kamba Mose: “Kamba mambu amama kuidi zinganga nzambi bana ba Aloni: ‘Nganga nzambi kalendi simba ko mutu wufua, muingi kabika ba mvindu. 2 Vayi nandi kalenda simba mvumbi musi dikanda diandi, kuba kuandi tat’andi, ngudi, muan’andi wu dibakala, wunkietu ayi khomb’andi wu dibakala. 3 Mvandi kalenda simba khomb’andi wunkietu befua no wube zinganga yandi va kimueka boti nandi kabundiniabu ko nyitu ayi bankuedidiabu ko. 4 Vayi nandi kalendi ba ko mvindu mu kusimba khomb’andi wu nkietu befua no wubedi wukuela. 5 Zinganga nzambi balendi vuka ko minlengi ni kuvuka mayedu madi mu zikhonzu. Mvandi balendi kuyilueka* ko. 6 Bawu bafueti ba banlongo, ayi balendi bifisa ko dizina di Nzambi’awu, kibila bawu bamvananga minkhailu miviku kuidi Yave midi buka bidia bi Nzambi, diawu bafueti ba banlongo. 7 Nganga nzambi kalendi kuela ko ndumba leta, ni nkietu wubundana nyitu ava kakuela, mvandi kalendi kuela ko nkietu wuvambana na nnuni’andi, kibila zinganga nzambi badi banlongo va mesu ma Nzambi. 8 Dikabu di Isaeli bafueti tadila zinganga nzambi batu banlongo, kibila bawu bamvananga minkhailu midi buka bidia bi Nzambi. Kibila minu Yave yidi wunlongo ayi yisola dikabu di Isaeli muingi baba banlongo.

9 “‘Muana nganga nzambi wunkietu kalendi ba ko ndumba leta, kibila khanu nandi wunkuiza fuisa tat’andi tsonyi. Na kuvanga mawu, bafueti kumvonda ayi kumvika ku mbazu.

10 “‘Nkulutu zinganga nzambi no babieka mu kundukudila nzeta yi kubiekila, ayi no bavuika bikhutu binlongo bi zinganga nzambi, kalendi kakuna ko bikhutu biandi voti kubika sanya minlengi mu kibila ki lutu. 11 Nandi kalendi fikama ko vadi mvumbi, kuba kuandi tat’andi befua voti mam’andi, kibila khanu mankuiza vanga muingi kabika kubue ba wunlongo. 12 Nandi kalendi basika ko ku nganda luphangu lu nzo yinlongo, kibila widi kidimbu kinlongo bo bandukudila nzeta yi kubiekila yi Nzambi’andi. Minu yidi Yave.

13 “‘Nkulutu zinganga nzambi kafueti kuela nkietu no ka kabundiniabu ko nyitu. 14 Vayi kalendi kuela ko nkietu wufuilu nnuni, wuvambana na nnuni’andi, nkietu wubundana nyitu ava kakuela ayi ndumba leta, vayi kafueti kuela to nkietu no ka kabundiniabu ko nyitu. 15 Nandi kalendi vanga ko ni diambu dilenda vanga dikanda diandi dibika ba difuana muingi kuvanga kisalu ki nganga nzambi, kibila minu yidi Yave no wumvedisa.’”

16 Yave wubue kamba Mose: 17 “Kamba Aloni: ‘Dibakala widi kinama kibela no wubutukila va dikanda diandi, kalendi vika ko minkhailu va kikuma. 18 Dibakala wubela binama kalendi fikama ko va kikuma, kuba kuandi dibakala wufua mesu, wubela malu, widi kizizi kivenga, widi koko voti kulu kulutidi kukula, 19 mutu widi koko voti kulu kubokuka, 20 mutu widi khuki, kikuindi, widi mesu mabela, widi mbela yi kudinda voti widi mbela yi nkanda nyitu ayi widi makata mabela. 21 Ni dibakala widi binama bi nyitu bibela, widi mu dikanda di Aloni kalenda fikama va kikuma muingi kuvana minkhailu miviku kuidi Yave. Kibila minkhailu bamvananga midi buka bidia bi Nzambi. 22 Nandi kalenda dia biuma bioso binlongo bamvana nkhailu kuidi Nzambi. 23 Vayi nandi kalendi fikama ko vadi nledi* ni vadi kikuma, kibila widi binama bibela. Nandi kalendi bifisa ko nzo yinlongo, kibila minu yidi Yave yiku bavedisa.’”

24 Bosi Mose wukamba mambu amomo kuidi Aloni, bana bandi ayi kuidi dikabu dioso di Isaeli.

22 Yave wubue kamba Mose: 2 “Kamba Aloni ayi bana bandi muingi baba keba keba ayi babika bifisa dizina diama, mu kusadila mu phila yikhambu fuana minkhailu minlongo basi Isaeli bamvana kuidi minu. Minu yidi Yave. 3 Wuba kamba: ‘Mu zimbandu zinu zioso, woso mutu* wukhambulu wudiodila wunsimba biuma binlongo basi Isaeli bamvana kuidi Yave, bafueti kumvonda. Minu yidi Yave. 4 Woso mutu mu dikanda di Aloni widi buazi, widi mbela yi kubasikanga biuma mu pheni, mutu besimba mutu wukhambu wudiodila mu kibila ki mvumbi, voti no wumbasika maluma, kalendi dia ko minkhailu minlongo. 5 Voti mutu wunsimba bibulu bikhambulu bidiodila, ayi mutu wunsimba mutu wunkaka wukhambulu wudiodila, balendi dia ko biawu. 6 Woso mutu wunsimba biuma abiobio, kasinkuiza ba ko wudiodila nate va masika ma builu, mvandi kasinkuiza dia ko minkhailu minlongo. Vayi kafueti kobila. 7 Bo thangu yindiama, nandi wunkuiza ba wudiodila, ayi kalenda dia kuandi minkhailu minlongo, kibila bidi bidia biandi. 8 Mvandi kalendi dia ko kibulu kimfua kiaveka, voti babe vonda kuidi kibulu ki nsitu, muingi kabika ba mvindu. Minu yidi Yave.

9 “‘Bawu bafueti tumukina mambu yi kuba kamba muingi babika vola disumu, ayi babika kufua mu kubifisa minkhailu minlongo. Minu yidi Yave yiku bavedisa.

10 ‘“Mutu wukhambulu nsua kalendi dia ko bidia binlongo. Kuba kuandi nzenza voti kisadi ki nganga nzambi. 11 Vayi mvika nganga nzambi kankuiza sumbila mu zimbongo ziandi veka, widi nsua wu kudia minkhailu minlongo. Mvandi bana mvika beni kambuta, balenda dia bidia beni. 12 Muana nganga nzambi wu nkietu, na kukuela mutu wukhambulu nganga nzambi, nandi kalendi dia ko minkhailu minlongo. 13 Vayi muana beni na kufuilu nnuni, voti na kuvambana na nnuni’andi, mukhambu buta ni muana ayi na kuvutuka ku nzo tat’andi, buna nandi kalenda dia minkhailu minlongo mi tat’andi. Vayi mutu wukhambulu nsua kalendi dia ko.

14 “‘Woso mutu wundia minkhailu minlongo mukhambu zaba, kafueti vutudila kuidi nganga nzambi biuma kabe dia, ayi kafueti vana mvadi kikhuku kintanu ki thalu yi nkhailu beni. 15 Mu phila ayoyo, bawu basinkuiza bifisa ko minkhailu minlongo basi Isaeli bamvana kuidi Yave, 16 mvandi basinkuiza ba ko fotu, mu kudia minkhailu minlongo. Minu yidi Yave yiku bavedisa.”’

17 Yave wubue kamba Mose: 18 “Kamba Aloni, bana bandi ayi basi Isaeli boso: ‘Musi Isaeli voti nzenza wunkalanga va khat’inu, na kutomba kuvana minkhailu miviku kuidi Yave muingi kudukisa tsila kavanga, voti na kuvana nkhailu mu lutia luandi veka, 19 buna nandi kafueti vana kibulu kikhambulu kibela, kuba kuandi ngombi, dimemi voti khombo yi khietu, muingi yikikinina nkhailu’andi. 20 Bikanu kuvana minkhailu mi bibulu bibela, khanu yisinkuiza kikinina ko miawu.

21 “‘Boti mutu wuntomba kuvana nkhailu wu kithuadi kuidi Yave muingi kudukisa tsila kavanga, voti nkhailu wunkaka mu lutia luandi, buna kafueti vana kibulu kikhambulu kibela, kuba kuandi ngombi, dimemi voti khombo yikhietu, muingi yikikinina nkhailu’andi. 22 Bikanu kuvana kuidi Yave nkhailu wu kibulu kidi mesu mafua, kidi kulu voti koko kubokuka, kidi zimbesa, kidi bikhuzu* ayi kidi mbela yi nkanda nyitu. Mulendi vana ko bibulu abiobio kuidi Yave va kikuma. 23 Boti ngie wuntomba kuvana nkhailu mu lutia luaku veka, ngie wulenda vana ngombi voti dimemi didi koko voti kulu kukula voti kukhufi. Vayi bo wumvana nkhailu muingi kudukisa tsila wuvanga, wulendi vana ko ntindu kibulu akiokio. 24 Mulendi vana ko kuidi Yave nkhailu wu kibulu kidi makata mabela voti bavokula. Mulendi sadila ko bibulu abiobio muingi kuvana minkhailu ku ntoto’inu. 25 Mulendi sadila ko bibulu bi phila ayoyo bimfumina kuidi zinzenza muingi kuvana nkhailu kuidi Nzamb’inu, kibila bisi ko bifuana ayi bidi bibela. Benu kusadila biawu, Nzambi kasinkuiza kikinina ko minkhailu minu.”’

26 Yave wubue kamba Mose: 27 “Va kubutuka muana ngombi, muana dimemi voti muana khombo yi khietu, kibulu beni kifueti tatamana kuidi ngudi’andi mu sambuadi di bilumbu, vayi mu kilumbu nana mulenda vana kiawu nkhailu wuviku kuidi Yave. 28 Mu matedi ngombi voti dimemi, mulendi vonda ko ngudi ayi muan’andi mu kiokiawu kilumbu.

29 “Boti muntomba kuvana nkhailu wu kuvutula matondo kuidi Yave, lufueti vanina wawu mu kulandakana zithuadusulu, muingi nandi kakikinina wawu. 30 Lufueti dia kibulu ki nkhailu beni mu kiokiawu kilumbu. Mulendi bika ko ni kitini muingi kudia mu kilumbu kinlanda. Minu yidi Yave.

31 “Lufueti tumukina ayi kulandakana zithumu ziama. Minu yidi Yave. 32 Mulendi bifisa ko dizina diama dinlongo, ayi dikabu dioso di Isaeli bafueti zitisa dizina diama. Minu yidi Yave yiku luvedisa, 33 no wulubotula ku ntoto wu Ngipiti, muingi yiba Nzamb’inu. Minu yidi Yave.”

23 Yave wubue kamba Mose: 2 “Kamba basi Isaeli: ‘Minkungi basikika lufueti kembilanga Yave, midi minkungi minlongo. Ayi amimi miawu minkungi beni:

3 “‘Benu lufueti vanga bisalu binu mu bilumbu bi sambanu, vayi mu kisabala kilumbu ki sambuadi, benu lufueti vunda muingi luvanga lukutukunu lunlongo. Lulendi vanga ko ni kisalu kinkaka mu kilumbu akiokio, kibila kidi kilumbu ki kubuongimina Yave mu kioso kua kibuangu lunkala.

4 “‘Amimi miawu minkungi minlongo basikika muingi kuzitisa Yave, mio benu lufueti zabikisanga bo thangu yinfuana: 5 Mu kilumbu 14 ki ngonda yitheti, va masika ma builu benu lufueti kembanga nkungi wu Pasika kuidi Yave.

6 “‘Mu kilumbu 15 ki ngonda beni, benu lufueti zitisa Yave mu kuvanga Nkungi wu Mapha Makhambulu Luvi. Mu sambuadi di bilumbu benu lufueti dia mapha makhambulu luvi. 7 Mu kilumbu kitheti lufueti vanga lukutukunu lunlongo, ayi lulendi vanga ko ni bisalu binkaka. 8 Vayi mu sambuadi di bilumbu, lufueti vananga minkhailu miviku kuidi Yave. Ayi mu kilumbu sambuadi lufueti kemba nkungi wunlongo. Benu lulendi vanga ko ni bisalu binkaka.’”

9 Yave wubue kamba Mose: 10 “Kamba basi Isaeli: ‘Bo luala kota ku ntoto yilukanikisa, lufueti vananga kuidi nganga nzambi nko mueka mu mbongu yitheti lunkuiza vaka. 11 Ayi nganga nzambi wunkuiza diengisa mbongu beni vantuala Yave, muingi lubaka lunungu lu Nzambi. Nandi kafueti vangila mawu mu kilumbu kinlanda bo kisabala kimvioka. 12 Mu kilumbu nganga nzambi kankuiza diengisa nko beni, benu lufueti vika dimemi dikhambulu dibela, muingi kuvana nkhailu kuidi Yave. 13 Mvandi lufueti bonga bikhuku biodi bi kumi yi efa yimueka yi falinya basobikisa na nzeta, muingi kuvana nkhailu wuviku widi mfimbu wumboti wunkuangidika Yave. Mvandi wunkuiza vana kikhuku kinna ki him yimueka yi vinu, muingi kuvana nkhailu wu malavu. 14 Benu lulendi dia ko zitheti zi nlangu, zikangu voti kuvangila mapha mu zitheti muingi kudia nate mu kilumbu lunkuiza vana nkhailu kuidi Nzamb’inu. Awowo widi nsiku wala kadidila mu zimbandu zinu zioso, mu kioso kua kibuangu luala kalanga.

15 “‘Lufueti tanga sambuadi di zisabala ziduka, kutonina mu kilumbu luala nata nko wu minkhailu bandiengisa kuidi nganga nzambi. 16 Benu lufueti tanga 50 di bilumbu nate mu sabala yisambuadi, bosi mu kilumbu kinlanda lufueti vana nkhailu wunkaka wu zitheti kuidi Yave. 17 Benu lufueti tuala mapha muadi mavangulu mu bikhuku biodi bi kumi bi efa yimueka yi falinya yilutidi, muingi kuvana nkhailu bandiengisa. Benu lufueti tula mapha beni luvi ayi lufueti yanga mawu ku mbazu, kibila madi mimbutu mitheti miyela lumvana kuidi Yave. 18 Mvandi lufueti vana sambuadi di bana ba mamemi makhambulu mabela madi mvu wumueka, muana mueka wu ngombi ayi mamemi muadi. Bosi lufueti vana mawu mu nkhailu wuviku kuidi Yave va kimueka na nkhailu wu zitheti ayi nkhailu wu malavu widi mfimbu wumboti wunkuangidika Yave. 19 Ayi lufueti bonga khombo yimueka muingi luvana nkhailu wu disumu, mamemi muadi madi mvu wumueka muingi kuvana nkhailu wu kithuadi. 20 Nganga nzambi wunkuiza diengisa mamemi beni ma muadi va kimueka na mapha ma mimbutu mitheti miyela, muingi kuvana nkhailu bandiengisa vantuala Yave. Ayi biawu binkuiza ba bi nganga nzambi, kibila bidi biuma binlongo bamvana kuidi Yave. 21 Ayi mu kilumbu beni, benu luala tumisa bankaka muingi lubuongimina Nzambi va kimueka. Ayi ni mutu kalendi vanga ko bisalu binkaka. Awowo widi nsiku wala kadidila mu zimbandu zinu zioso, mu kioso kua kibuangu luala kalanga.

22 “‘Bo luala vakanga mbongu mu zitsola zinu, lulendi vaka ko mbongu yoso voti kunonga yindoduka va tsi. Vayi lufueti bika muingi batu bakhambulu mbakulu ayi zinzenza babaka bi kudia. Minu yidi Yave, Nzamb’inu.’”

23 Yave wubue kamba Mose: 24 “Kamba basi Isaeli: ‘Kilumbu kitheti ki ngonda yisambuadi, kiala ba kilumbu ki kuvunda ayi bala sika tulumbeta muingi benu boso lubuongimina Nzambi va kimueka. 25 Mu kilumbu beni ni mutu kalendi vanga ko bisalu binkaka, vayi lufueti vana nkhailu wuviku kuidi Yave.’”

26 Yave wubue kamba Mose: 27 “Kilumbu kumi ki ngonda yisambuadi, kiala ba kilumbu ki kudindila nlemvu wu masumu. Benu lufueti kutakana va kimueka muingi kubuongimina Nzambi, lufueti ba mu kiunda mu kibila ki masumu minu ayi lufueti vana nkhailu wuviku kuidi Yave. 28 Mu kilumbu beni ni mutu kalendi vanga ko bisalu binkaka, kibila kidi kilumbu ki kudinda nlemvu wu masumu minu kuidi Yave, Nzamb’inu. 29 Mu kilumbu akiokio, woso wala manga kuba mu kiunda mu kibila ki masumu mandi, bala kumvonda. 30 Ayi woso mutu wala vanga kioso kua kisalu kinkaka mu kilumbu beni, minu veka yala kumvonda. 31 Ni mutu kalendi vanga ko bisalu binkaka mu kilumbu beni. Awowo widi nsiku wala kadidila mu zimbandu zinu zioso, mu kioso kua kibuangu luala kalanga. 32 Kutonina va khotolo muinya mu kilumbu kivua nate va khotolo muinya mu kilumbu kinlanda, kiala ba kilumbu kinlongo ki kuvunda. Ayi benu lufueti ba mu kiunda mu kibila ki masumu minu.”

33 Yave wubue kamba Mose: 34 “Kamba basi Isaeli: ‘Kilumbu 15 ki ngonda yisambuadi, kiawu kilumbu luala kemba Nkungi wu Mavuala mu sambuadi di bilumbu muingi kuzitisa Yave. 35 Mu kilumbu kitheti ki nkungi beni, luala kutakana va kimueka muingi kubuongimina Nzambi, ayi ni mutu kalendi vanga ko bisalu binkaka. 36 Mu sambuadi dioso di bilumbu bi nkungi beni, luala vananga nkhailu wuviku kuidi Yave. Mu kilumbu nana luala kutakana va kimueka muingi kubuongimina Nzambi, ayi luala vana nkhailu wuviku kuidi Yave. Awowo widi nkungi wunlongo. Ni mutu kalendi vanga ko bisalu binkaka mu kilumbu beni.

37 “‘Amiomio, miawu minkungi basikika lufueti kembanga muingi kubuongimina Yave va kimueka: luala vananga minkhailu miviku kuidi Yave, minkhailu mi zitheti ayi minkhailu mi malavu mu kutadila nkhailu wu kadika kilumbu. 38 Amiomio miawu minkhailu lunkuiza vananga kubotula kuandi minkhailu lumvananga mu kisabala kuidi Yave, minkhailu muingi kudukisa luwawanu wuvanga ayi minkhailu wumvanina mu lutia luaku kuidi Yave. 39 Bo luala mana kuvaka mbongu mu zitsola zinu mu kilumbu 15 ki ngonda yisambuadi, luala tona kukemba nkungi muingi kuzitisa Yave mu sambuadi di bilumbu. Mu kilumbu kitheti ki nkungi beni ayi mu kilumbu nana, ni mutu kalendi vanga ko bisalu binkaka. 40 Mu kilumbu kitheti ki nkungi beni, benu lufueti nonga makundi ma minti milutidi mimboti, lufueti zenga zingievu ayi matafi ma minti madi meza mawombo. Ayi mu sambuadi di bilumbu, benu luala kemba nkungi muingi kuzitisa Yave Nzamb’inu. 41 Benu luala kembanga nkungi muingi kuzitisa Yave mu sambuadi di bilumbu. Luala kembanga nkungi beni mu ngonda sambuadi. Awowo widi nsiku wala kadidila mu zimbandu zinu zioso. 42 Mu sambuadi di bilumbu bioso luala kembanga nkungi beni, basi Isaeli boso bafueti kala mu mavuala, 43 muingi zimbandu zinu zioso bazaba ti minu yivanga basi Isaeli kuzingila mu mavuala bo yiba botula ku ntoto wu Ngipiti. Minu yidi Yave Nzamb’inu.’”

44 Bosi Mose wuzabikisa basi Isaeli minsiku mitedi minkungi bafueti kembanga, muingi kuzitisa Yave.

24 Yave wubue kamba Mose: 2 “Ngie fueti kamba basi Isaeli muingi batualanga nzeta yi minda yivangulu mu makundi ma minti mi Olive, muingi minda midi ku nzo yinlongo mitatamananga kuba mitatama. 3 Aloni nandi wunkuiza vanganga mamoso muingi minda mitatamananga kuba mitatama vantuala Yave, ku nzo yinlongo, va kibuangu kinlongo kidi va ndeku Kasu yi Luwawanu, tonina va masika ma builu nate va meni mu kilumbu kinlanda. Awowo widi nsiku wala kadidila mu zimbandu zinu zioso. 4 Nandi kafueti tula minda mu kandelabru,* muingi miawu mitatamananga kuba mitatama vantuala Yave.

5 “Ngie wunkuiza bonga falinya yilutidi yimboti muingi wuvanga 12 di mapha madi buka nlunga. Kadika dipha difueti vangulu mu bikhuku biodi bi kumi bi efa yimueka yi falinya. 6 Ngie wala kupika mapha beni mu bikhuku biodi va mbata meza yivangulu mu wola yidi vantuala Yave. Fueti tula sambanu di mapha mu kadika kikhuku. 7 Ngie fueti tula nomi yi olibanu va khonzu kadika kikhuku ki mapha, muingi kumonisa ti amomo madi mapha ma Nzambi. Awowo widi nkhailu wuviku bamvana kuidi Yave. 8 Kadika Kisabala, nandi kafueti tulanga mapha beni mu bikhuku biodi vantuala Yave. Awowo widi nsiku wala kadidila kuidi basi Isaeli. 9 Aloni ayi bana bandi, bawu bala bonga mapha beni ayi bala dilanga mawu va kibuangu kinlongo, kibila madi mapha manlongo bawu badi nsua mu kutambula, mu minkhailu miviku bamvana kuidi Yave. Awowo widi nsiku wala kadidila.”

10 Nkietu mueka musi Isaeli wubuta muana dibakala na musi Ngipiti, ayi muana beni wubakasana mambu na musi Isaeli. 11 Muana beni wutona kusinga ayi kuvueza dizina di Nzambi, diawu bannatina kuidi Mose. Dizina di mam’andi diba Selomite, muana wu Dibri widi mu mvila wu Dan. 12 Bantula va naveka nate Yave kankuiza zabikisa mambu mbi bafueti kumvangila.

13 Yave wubue kamba Mose: 14 “Nata muana dibakala beni no bevueza ayi besinga dizina diama, ku nganda kibuangu basi Isaeli bankalanga. Ayi batu babe kuwa mambu kabe tuba, bafueti tetika mioko ku ntu’andi, bosi dikabu dioso bafueti kumvondila mu mamanya. 15 Ngie fueti kamba basi Isaeli: ‘Woso mutu wumvueza dizina di Nzambi, kafueti fundusu mu disumu adiodio. 16 Mu phila ayoyo, woso mutu wumvueza dizina di Yave, kuba kuandi musi Isaeli voti nzenza, dikabu dioso bala kumvondila mu mamanya.

17 “Woso mutu wumvonda wadi yandi, mvandi bafueti kumvonda. 18 Woso mutu wunlueka voti wumvonda kibulu ki mutu wunkaka, kafueti futa voti kuvana kibulu kinkaka kuidi mutu vuidi kibulu kabe vonda. 19 Woso mutu wunlueka wadi yandi, mvandi bafueti kunlueka. 20 Na kubokuna wunkaka, mvandi bafueti kumbokuna, diesu mu diesu ayi dienu mu dienu. Moso mambu kamvangila wunkaka, mawu mvandi bafueti kumvutudila. 21 Woso wunlueka ayi wumvonda kibulu ki wadi yandi, kafueti futa kibulu kingana. Vayi woso wunlueka ayi wumvonda wadi yandi, mvandi bafueti kumvonda.

22 “‘Basi Isaeli ayi zinzenza bankalanga va khat’inu, bala bafundisila mu kulandakana wowawu nsiku, kibila minu yidi Yave Nzamb’inu.”’

23 Mose wukamba basi Isaeli banata muana dibakala beni wuvueza dizina di Nzambi ku nganda kibuangu basi Isaeli baba kalanga, muingi bamvondila mu mamanya. Mu phila ayoyo, basi Isaeli bavanga mamoso Yave katuba mu nzila Mose.

25 Yave wubue kamba Mose ku mongo wu Sinai: 2 “Kamba basi Isaeli: ‘Bo lunkuiza kota ku ntoto yinkuiza luvana, lufueti landakana nsiku wu Yave matedi kisabala ayi lufueti vundisa ntoto. 3 Mu mimvu misambanu, ngie wala vata zitsola mu ntoto’aku ayi mu mimvu misambanu wala diodisa minti mi vinu midi ku ndim’aku. Bosi wala vaka* mbongu wuvata. 4 Vayi mu mvu wu sambuadi, ngie fueti tumukina nsiku wu Yave matedi kisabala muingi kuvundisa ntoto. Wulendi vata ko ni kiuma mu zitsola ziaku ayi mvandi wulendi diodisa ko minti mi vinu midi mu ndim’aku. 5 Ngie wulendi vaka ko mbongu yimena yaveka bo zitheti zidoduka mu thangu waba vaka mbongu mu tsol’aku, ni kuvela makundi ma vinu ma minti wukhambu diodisa. Ngie fueti vundisa ntoto mu mvu wumueka. 6 Benu mulenda dia mbongu yala mena mu zitsola zinu mu mvu luala vundisa ntoto. Ngiewu, mvik’aku wu dibakala voti wunkietu, kisadi mfutanga ayi zinzenza bankalanga va khat’inu, mulenda dia kuinu bidia beni. 7 Batu ayi bibulu balenda dia kuawu biuma biala mena mu zitsola zinu mu mvu luala vundisa ntoto.

8 “‘Lunkuiza tanga sambuadi di mimvu mi sabala, mvandi sambuadi di mimvu mu sambuadi di zikhumbu ayi bilumbu bioso bi sambuadi di mimvu mi kisabala binkuiza ba 49 di mimvu. 9 Mu kilumbu kumi ki ngonda yi sambuadi kiala ba kilumbu ki kudindila nlemvu, benu lufueti sika tulumbeta ayi yawu yifueti kuwakana kuidi basi Isaeli boso. 10 Mvu 50 wufueti ba wunlongo, wawu wunkuiza ba yubileu kuidi benu ayi lufueti vana kiphuanza kuidi dikabu dioso. Mimvika mioso basumba bafueti kuba vana kiphuanza muingi bavutuka kuidi makanda mawu, ayi lufueti vutula mintoto mioso lusumba kuidi bavuidi miawu. 11 Mvu makuma tanu wunkuiza ba yubileu kuidi benu, mu mvu beni mulendi vata ko, mulendi vaka ko mbongu yimena yaveka mu zitsola mu zitheti zidoduka ayi mulendi vela ko makundi ma minti mi vinu lukhambu diodisa. 12 Kibila mvu beni widi yubileu ayi widi wunlongo kuidi benu. Lufueti dia to mbongu yala mena yaveka mu zitsola zinu.

13 “‘Mu mvu wu yubileu kadika mutu mu benu, kafueti vutula mintoto mioso kasumba kuidi mutu vuidi miawu. 14 Bika kuvuna wadi yaku bo wunsumbisa kiuma, voti bo wunsumba kiuma. 15 Mutu wunsumbisa tsola kuidi wadi yandi, kafueti tadila mimvu mima vioka tona yubileu yibedi, ayi mutu wunsumba tsola kafueti tadila mimvu mikua kankuiza vakila mbongu nate yubileu. 16 Boti mimvu miwombo minkhambu nate yubileu, buna fueti buela thalu wunsumbisila tsola beni, vayi boti mimvu miluelu minkhambu buna fueti dekula thalu yi tsola, kibila zikhumbu wunkuiza vakila mbongu mu tsola beni, ziawu wunsumbisa. 17 Ni mutu mu benu kalendi vuna ko ni kukuiba wadi yandi. Lufueti ba boma bu Nzambi, kibila minu yidi Yave Nzamb’inu. 18 Tumukinanu minsiku ayi zithumu ziama, muingi luzingila mu nsika ku ntoto lunkuiza kalanga. 19 Biuma luala vata mu zitsola zinu biala mena, benu luala baka bidia biwombo, ayi luala zingila mu nsika.

20 “‘Vayi benu kutuba: “Mbi tuala dianga mu mvu wu sambuadi mu kumona ti befu tualasa vata ko ayi tualasa vaka ko mbongu?” 21 Zabanu kuinu ti minu yala ku lusakumuna mu mvu wunsambanu, ayi zitsola zinu ziala buta mbongu yiwombo yo luala dia mu mimvu mitatu. 22 Bo benu luala vata zitsola zinu mu mvu wu nana, luala tatamana kuba bidia biwombo nate luala vaka mbongu mu mvu wuvua.

23 “‘Benu mulendi sumbisa ko ntoto kuidi bankaka muingi wutatamana kuba wawu, kibila ntoto woso widi wama, ayi benu luidi zinzenza kheti lueka mimvu miwombo mu kuzingila mu ntoto beni. 24 Ntoto woso yinkuiza luvana, kadika mutu mu benu kafueti bue baka luaku lu kukula ntoto kansumbisa kuidi mutu wunkaka.

25 “‘Boti khomb’aku musi Isaeli kasiedi ko mbakulu ayi wunsumbisa tereno’andi, buna wumueka mu basi dikanda diandi kalenda kula tereno khomb’andi kabe sumbisa. 26 Boti mutu beni kasi ko khomba wulenda kunsadisa kukula tereno,* vayi bumviokila thangu na kubue baka mbakulu muingi kukula yawu, 27 buna nandi kafueti tanga mimvu mikua mi mavioka tona kasumbisa tereno beni ayi kafueti futa mutu kasumbisa yawu, mu kutanga mimvu mikua minkhambu nate yubileu yinkuiza. Mu phila ayoyo, nandi wunkuiza kula tereno kasumbisa kuidi mutu beni.

28 “‘Vayi boti kasi ko zimbongo zifuana muingi kukula tereno kasumbisa, buna yawu yinkuiza tatamana kuba yi mutu kasumbisa nate mu mvu wu yubileu. Bosi mu mvu wu yubileu bala kumvutudila tereno beni.

29 “‘Mutu na kusumbisa nzo yidi ku divula didi luphangu, buna mvu mueka to widi yandi muingi kukula nzo kasumbisa. 30 Vayi na kukhambu nunga kukula yawu mu mvu beni, buna nzo beni yinkuiza ba yi mutu besumba yawu mu zimbandu zinu zioso. Ayi kalendi vutula ko yawu mu mvu wu yubileu. 31 Vayi zinzo zidi ku divula dikhambulu luphangu, bafueti kuzitadila buka zitsola ayi luaku lu kukula zitsola beni lufueti tatamana. Mu mvu wu yubileu, mutu wusumba nzo beni kafueti vutula yawu kuidi mutu wunsumbisa.

32 “‘Vayi zilevita bafueti tatamana kuba luaku lu kukula zinzo ziawu basumbisa zidi mu mavula bankalanga. 33 Boti levita kasinnunga ko kukula nzo kasumbisa, buna mutu wusumba yawu kafueti mvutudila nzo beni mu mvu wu yubileu. Kibila zinzo zidi mu mavula ma zilevita zifueti tatamana kuba ziawu. 34 Mvandi balendi sumbisa ko bibuangu bidi va ndeku mavula ma zilevita, mo bibulu bandila kibila biawu bifueti tatamana kuba bi zilevita.

35 “‘Boti khomb’aku kasiedi ko mbakulu ayi kasi bue nunga ko kudukisa zitsatu ziandi, buna ngie fueti kunsadisa dedi bo wunsadisilanga nzenza widi va khat’inu muingi nandi kabika kufua. 36 Bika kudinda biuma binkaka va mbata biuma wundevisa. Ba boma bu Nzambi’aku, ngie kuvanga mawu wunkuiza sadisa khomb’aku katatamana kuzinga. 37 Bika kundinda zimbongo zinkaka va mbata zimbongo wundevisa ayi bo wunkabila khomb’aku bidia, bika kutomba ndandu mu mawu. 38 Minu yidi Yave Nzamb’inu, no wulubotula ku ntoto wu Ngipiti muingi kulunata ku ntoto wu Kanani.

39 “‘Boti khomb’aku kasiedi ko mbakulu ayi wunkuiza kuidi ngie muingi wunsumba, bika kunkuika kavanga bisalu bingolo buka mvika. 40 Ngie fueti kuntadila buka kisadi kio wumfutanga, ayi nandi wunkuiza kusadila nate mu mvu wu yubileu. 41 Nandi ayi bana bandi bala vutuka kuidi dikanda diawu ayi ku mintoto mi zikhaya ziandi. 42 Kibila bawu badi mimvika miama yibotula ku Ngipiti. Bawu balendi kuyisumbisa ko muingi baba mimvika mi mutu wunkaka. 43 Bika kumvangila mambu mambi, ngie fueti ba boma bu Nzambi’aku. 44 Boti luntomba kusumba batu muingi baba mimvika minu, buna bawu bafueti ba batu bankalanga mu zitsi zinkaka. 45 Zinzenza bankalanga va khat’inu, bana bawu ayi makanda mawu, benu lulenda ku basumba muingi baba mimvika minu. 46 Bawu balenda ba kiuka ki bana binu mu zithangu zioso. Benu lulenda kuba kitula mimvika minu, vayi bikanu kukitula zikhomba zinu basi Isaeli mimvika.

47 “‘Boti nzenza wunkalanga va khat’inu weka busina, ayi musi Isaeli khambulu mbakulu wu kuyisumbisa kuidi nandi voti kuidi musi dikanda diandi, 48 bankaka mu basi Isaeli bala tatamana kuba luaku lu kumvukisa. 49 Woso kua mutu va dikanda diandi kalenda kumvukisa, kuba kuandi titi’andi voti muana titi’andi.

“‘Mvandi na kubaka mbakulu naveka kalenda kuyivukisa. 50 Nandi ayi mutu wunsumba, bafueti dedikisa thalu kankuiza futa mu mimvu mi mavioka kutonina mvu kayisumbisa nate mvu wu yubileu. Thalu bafueti futa kuidi mutu wusumba mvika beni mu mimvu amiomio minkhambu, yifueti ba dedi mueka na thalu yo bamfutanga kisadi kadika kilumbu. 51 Boti mimvu miwombo minkhambu nate yubileu, buna nandi kafueti futa thalu yindedakana na mimvu mioso minkhambu. 52 Boti mimvu miluelu minkhambu nate yubileu, buna nandi kafueti futa thalu yi mimvu minkhambu. 53 Mutu bansumba bafueti kuntadila buka kisadi bamfutanga kadika mvu. Ayi mulendi bika ko mutu no wunsumba kamvangila mambu mambi. 54 Vayi boti vasi ko musi dikanda diandi wu kunkula ayi naveka kasi ko bu kuyikudila, buna nandi ayi bana bandi bala baka kiphuanza mu mvu wu yubileu.

55 “‘Kibila basi Isaeli badi mimvika miama bo yibotula ku ntoto wu Ngipiti. Minu yidi Yave Nzamb’inu.

26 “‘Lulendi vanga ko zinzambi, kubuongimina bitumba, kuvanga bikuma muingi lubuongimina, kutelimisa dimanya batula zifikula muingi lubuongimina, kibila minu yidi Yave Nzamb’inu. 2 Benu lufueti tumukinanga nsiku matedi kisabala ayi lufueti kinzikanga nzo’ama yinlongo. Minu yidi Yave.

3 “‘Benu kutumukina minsiku ayi kulandakana zithumu ziama, 4 minu yala nokisanga zimvula mu thangu yifuana, ntoto wala menisanga mbongu ayi minti miala buta beni makundi. 5 Benu luala ba bidia biwombo ayi luala zingilanga mu nsika, kibila thangu yi kuvaka mbongu yala vita nate mu thangu luala vela makundi ma vinu ayi thangu yi kuvela makundi ma vinu yala vita nate mu thangu luala vata. 6 Minu yala tuadisa ndembama mu ntoto’inu ayi benu luala lalanga mukhambu boma, kibila yala kukisa bibulu bioso bi nganzi ayi yala kukisa zimbeni bala tomba kulunuanisa. 7 Benu luala nunga zimbeni zinu zioso ayi luala kuba vonda. 8 Batu ba 5 mu benu bela ba bafuana muingi kunuanisa ayi kununga 100 di zimbeni, ayi 100 di batu mu benu bala ba bafuana muingi kunuanisa ayi kununga 10.000 di zimbeni. Mu phila ayoyo, zimbeni zinu zioso ziala fua.

9 “‘Minu yala kulusakumuna ayi yala kulusadisa lubuta bana bawombo ayi yala dukisa luwawanu yivanga yinu. 10 Mu thangu luala dia mbongu luvata mu mvu wuma vioka, vala tombulu kuloza mbongu yikhulu muingi kubaka kibuangu ki kulundila mbongu yimona. 11 Minu yala tula nzo’ama yinlongo va khat’inu ayi yalasa lukuekula ko. 12 Minu yala ba Nzamb’inu, yala tatamana kuba yinu ayi benu luala ba dikabu diama. 13 Minu yidi Yave Nzamb’inu no wulubotula ku ntoto wu Ngipiti muingi lubika bue ba mimvika. Minu yilukula va buvika ayi yiluvanga muingi luba dikabu didi kiphuanza.

14 “‘Vayi benu kukhambu teka matu mu mambu yiku lukamba, benu kumanga kutumukina zithumu ziama, 15 benu kubayisa zithumu ziama, benu kulenza minsiku miama ayi benu kulevula luwawanu yivanga yinu, 16 tala mambu yala kuluvangila: yala kulutuadisa bimbevu, mbela yi ntima, zifebre* zingolo ziala vanga nyitu’inu kulebakana ayi ziala luvanga kubika mona buboti. Benu luala vata mu phamba, kibila zimbeni zinu bawu bala dia mbongu’inu. 17 Minu yala ku lukuekula ayi zimbeni zinu bala ku lunuanisa ayi bala ku lununga. Baboso ba lulendanga bala ku lutuadisa ziphasi, ayi benu luala tina kheti ni mutu kasi lukuka ko.

18 “‘Benu kukhambu kuthumukina kheti mu ziphasi yiku lutuadisa, buna minu yinkuiza buela kulutuadisa ziphasi sambuadi di zikhumbu, mu kibila ki masumu minu. 19 Yala manisa mangolo minu ma kuluvanganga kuyinyemisa, yala vanga muingi diyilu dibika bue nokisa zimvula* ayi ntoto wubika kubue menisa* mbongu. 20 Benu luala vanga kisalu kiphamba, kibila ntoto walasa menisa ko mbongu ayi minti luala vata, mialasa buta ko makundi.

21 “‘Vayi benu kutatamana kulenza ayi kumanga kutumukina minsiku miama, minu yala buela kulutuadisa ziphasi sambuadi di zikhumbu mu kibila ki masumu minu. 22 Minu yala tuadisa bibulu bi nganzi biala vonda bana binu, biala dia bibulu binu luntuilanga ayi biala dekula thalu yi batu mu benu. Mu phila ayoyo, valasa bue ba ko ni mutu wundiata mu zinzila zinu.

23 “‘Benu kumanga kukikinina tsembulu’ama, ayi benu kukhambu tumukina zithumu ziama kheti mu ziphasi yiku lutuadisa, 24 buna minu mvama yinkuiza luyekula ayi yinkuiza lutuadisa ziphasi sambuadi di zikhumbu, mu kibila ki masumu minu. 25 Minu yala vanga muingi zimbeni zinu ba lunuanisa ayi ba lununga, kibila benu lulevula luwawanu yivanga yinu. Benu kutinina mu mavula minu, yala tuadisa bimbevu va khat’inu ayi zimbeni zinu bala ku lukanga. 26 Mu kibila ki ziphasi yala ku lutuadisa, benu lualasa bue baka ko bidia biwombo muingi ludia. Mu kibila akiokio, kumi di bakietu bala vangila mapha mu fornu yimueka ayi kadika mutu mu benu wala tambula kitini kiluelu, benu luala dia vayi lualasa kukuta ko.

27 “‘Vayi kheti bobo, benu kumanga kuthumukina ayi benu kutatamana kubayisa mambu yintuba, 28 minu yala kulufuemina ayi yala buela ku lutuadisa ziphasi sambuadi di zikhumbu mu kibila ki masumu minu. 29 Ayi benu luala lamba bana binu ba babakala ayi ba bakietu muingi mudia. 30 Minu yala kulufuemina ayi yala tulula bikuma bioso lumbuongiminanga zinzambi zi luvunu, bikuma lumvikilanga malasi ayi yala tetika zinyitu zinu va mbata bitumba binu. Mvandi yala ku lumona khenya ayi yala ku lukuekula. 31 Yala tulula mavula minu, zinzo zinu zinlongo ayi yalasa bue kikinina ko minkhailu minu. 32 Minu veka yala vanga muingi ntoto’inu wubika kubue zingila batu, ayi bo zimbeni zinu bala mona mawu bala kuituka. 33 Minu yala vanga muingi zimbeni zinu biza lunuanisa ayi benu luala tiamuka mu zitsi zinkaka. Ntoto’inu walasa bue kalanga ko batu ayi mavula minu mala tuluka.

34 “‘Bo benu luala kue zingila mu zitsi zi zimbeni zinu, ntoto wala baka thangu yiwombo muingi wuvunda, kibila benu luabasa vundisanga ko ntoto’inu. 35 Ntoto wala vunda mu bilumbu bioso luala zingilanga mu zitsi zi zimbeni zinu, kibila bo luaba kalanga kuna, benu luabasa vundisanga ko ntoto’inu mu kisabala.

36 “‘Matedi batu bala tatamana bamonyo, minu yala vanga muingi baba beni boma, kheti dieza diyuma dimbua diala kuba vanga kutina. Bawu bala tina dedi bo bantininanga zimbeni zi kuba kuka ayi bala bua kheti ni mutu kasi kuba kuka ko. 37 Bawu bala bundasana bawu na bawu ayi bala bua dedi bo bumbuilanga batu bankuka kuidi zimbeni ziawu kheti ni mutu kasi kuba kuka ko. Benu lualasa nunga ko zimbeni zinu. 38 Benu luala fuila ku ntoto zimbeni zinu, ayi kuawu bala kuluzikila. 39 Ayi batu bala tatamana bamonyo ku ntoto wu zimbeni ziawu, bala bodila kuna mu kibila ki masumu mawu ayi mu kibila ki masumu ma zikhaya ziawu. 40 Vayi bana binu bala nyongina masumu mawu, ayi ma zikhaya ziawu ayi bala kikinina ti diambu dimbi bavanga mu kumanga kutumukina zithumu ziama. 41 Mawu maphanga minu kuba fuemina ayi kuba nata mu ntoto wu zimbeni ziawu.

“‘Yivangila mawu muingi kumona boti balenda kuyikulula ayi kufungula masumu mawu. 42 Mu phila ayoyo, minu yala tebukila monyo luwawanu yivanga na Yakobi, Izaki ayi Abalahami, mvandi yala tebukila monyo ntoto’awu. 43 Vayi bo bala kue zingila ku tsi yi zimbeni ziawu, ntoto’awu wala baka thangu yiwombo muingi kuvunda, kibila bawu basa tumukina ko zithumu ziama ayi balenza minsiku miama. Diawu bawu bala tambudila tsembolu mu kibila ki masumu mawu. 44 Vayi kheti mu mambu moso amomo, bo bawu bala zingila ku ntoto wu zimbeni ziawu, minu yalasa kuba kuekula ko ayi yalasa kuba tulula ko baboso. Kibila minu kuvanga mawu, khanu yisinkuiza dukisa ko luwawanu yivanga yawu, kibila minu yidi Yave Nzambi’awu. 45 Muingi kuba tuadisa ndandu, yala tebukila monyo luwawanu yivanga na zikhaya ziawu bo yiba botula ku ntoto wu Ngipiti vantuala mimvila miwombo, muingi kuba Nzambi’awu. Minu yidi Yave.’”

46 Aziozio ziawu zithumu ayi minsiku Yave kavana basi Isaeli ku Mongo Sinai mu nzila Mose.

27 Yave wubue kamba Mose: 2 “Kamba basi Isaeli: ‘Boti dibakala vengi tsila yi kukabila Yave mutu, nandi kalenda futila tsila beni mu zimbongo, 3 mu kutadila thalu basikika yo kadika mutu kafueti vana. Babakala badi kutonina 20 nate 60 di mimvu, bafueti vana 50 di zisikulu* zi palata mu kutadila sikulu bansadilanga ku kibuangu kinlongo. 4 Vayi bakietu badi kutonina 20 nate 60 di mimvu, bafueti futa 30 di zisikulu zi palata. 5 Babakala badi kutonina 5 nate 20 di mimvu, bafueti futa 20 di zisikulu. Vayi bakietu badi mimvu amiomio, bafueti futa 10 di zisikulu. 6 Babakala badi kutonina ngonda yimueka nate mimvu mitanu, bafueti futa 5 di zisikulu, vayi bakietu badi phunga ayoyo, bafueti futa zisikulu zitatu zi palata.

7 “‘Babakala badi kutonina 60 di mimvu nate kuyilu, bafueti futa 15 di zisikulu, vayi bakietu badi mimvu amiomio, bafueti futa 10 di zisikulu. 8 Vayi boti mutu wuvanga tsila beni kasi ko mbakulu, ayi kalendi nunga ko kufuta zimbongo zintombulu, buna nandi kafueti kuenda kuidi nganga nzambi muingi kankamba kikua kafueti futa mu kutadila mbakulu yi mutu beni.

9 “‘Mutu na kuvanga tsila yi kuvana kibulu kuidi Yave, buna kibulu beni kinkuiza ba ki Yave kibila kidi kinlongo. 10 Nandi kalendi vingisa ko kibulu kakanikisa Nzambi mu kibulu kinkaka kibela voti kibanda. Na kuvanga mawu, buna kibulu kakanikisa kuidi Nzambi ayi kio kantomba kuvingisa, bia bibiodi binkuiza ba bi Nzambi. 11 Boti kibulu beni kantomba kuvana kuidi Yave kisi ko kivedila, buna mutu mvana kiawu kafueti kukinata kuidi nganga nzambi. 12 Nganga nzambi wala fiongunina kibulu beni muingi kuzaba kikua mutu beni kafueti vana va mvingi kibulu. 13 Vayi boti mutu wuntomba kukula kibulu beni, buna kafueti bue futa kikhuku kintanu va mbata zimbongo nganga nzambi kansikika.

14 “‘Mutu na kuvanga tsila yi kukabila Yave nzo, nganga nzambi wunkuiza fiongunina nzo beni muingi kuzaba boti yidi yifuana voti ndamba. Ayi nganga nzambi wunkuiza sikika thalu mutu beni kafueti futa va mvingi nzo beni. 15 Vayi boti mutu beni wuntomba kukula nzo kakabila Nzambi, buna nandi kafueti buela kufuta kikhuku kintanu va mbata thalu zimbongo nganga nzambi kasikika.

16 “‘Boti mutu bevanga tsila yi kukabila Yave tsola, buna bankuiza sikika thalu yi tsola beni mu kutadila biuma bikua biala tombulu muingi kuvata mu tsola beni: lufueti futa hómer yimueka yi biuma lunkuiza vata muna, yawu yinkuiza ba 50 di zisikulu zi palata. 17 Na kukabila tsola beni kuidi Nzambi mu mvu wu yubileu, buna valasa tombulu ko kubalula thalu basikika. 18 Na kukabila tsola beni kuidi Nzambi bo yubileu yimvioka, buna nganga nzambi wunkuiza sikika thalu yi tsola beni, mu kutadila mimvu mikua minkhambu nate yubileu yinkuiza ayi nandi wala dekula thalu yi tsola beni. 19 Vayi boti mutu beni wuntomba kukula tsola kakabila Nzambi, kafueti buela kikhuku kintanu va mbata thalu yi zimbongo nganga nzambi kasikika, ayi tsola beni yinkuiza tatamana kuba yandi. 20 Vayi na kukhambu kula tsola beni ayi ba kusumbisa yawu kuidi mutu wunkaka, buna dibakala beni kalasa bue baka ko luaku lu kukula tsol’andi. 21 Mu mvu wu yubileu bala bue vutula tsola beni kuidi Yave, kibila yidi yinlongo. Tsola beni yinkuiza ba yi zinganga nzambi.

22 “‘Boti dibakala wuvanga tsila yi kukabila Yave tsola kasumba kuidi mutu wunkaka wukhambulu musi dikanda diandi, 23 nganga nzambi wala tanga mimvu mikua minkhambu nate yubileu, muingi kusikika thalu dibakala beni kankuiza futa ayi nandi kafueti futa zimbongo nganga nzambi kabe sikika muna kilumbu. Kibila yawu yidi yinlongo kuidi Yave. 24 Vayi mu mvu wu yubileu, mutu wusumba tsola beni kafueti vutula yawu kuidi mutu wunsumbisa.

25 “‘Bafueti vanina thalu yi biuma bioso mu kutadila sikulu bansadilanga ku kibuangu kinlongo. Sikulu yimueka yifueti ba 20 di zigera.*

26 “‘Mu kumona ti bana boso batheti ba bibulu badi ba Yave, kuba kuandi ngombi ayi dimemi, diawu ni mutu kalendi vanga ko tsila yi kukabila biawu kuidi Nzambi, kibila bidi bi Yave. 27 Boti kibulu beni kitheti kisi ko kivedila, ayi mutu vuidi kiawu na kukivukisa mu kutadila thalu basikika, buna nandi kafueti buela kikhuku kintanu va mbata zimbongo basikika. Vayi ba kukhambu kula kibulu beni, buna bafueti ku kisumbisila mu thalu basikika.

28 “‘Vayi ni mutu kalendi sumbisa ko voti kukula biuma kavangila tsila yi kuvana to Yave, kuba kuandi mutu, kibulu ayi tsola. Kibila bidi binlongo kuidi Yave. 29 Mvandi balendi kula ko mutu bazengila nkanu wu lufua, vayi bafueti kumvonda.

30 “‘Kikhuku ki kumi ki bivatu bioso bamvaka mu zitsola voti mu zindima, bidi bi Yave. Kibila bidi biuma binlongo bi Yave. 31 Boti mutu wuntomba kukula kikhuku ki kumi kakanikisa Nzambi, buna nandi kafueti buela kufuta kikhuku kintanu va mbata zimbongo bansikika zio kafueti futa. 32 Mu matedi zingombi ayi mamemi, bo wuntanga bibulu abiobio kadika kibulu ki kumi ngie fueti tula kiawu kidimbu, kibila kinkuiza ba kibulu kinlongo ki Yave. 33 Mutu vuidi kibulu beni kalendi fiongunina ko kiawu boti kiawu kidi kimboti voti kimbi, ni kutomba kuvingisa kibulu kinkaka. Na kutomba kuvingisa kibulu kinkaka, buna kibulu kabe tula kidimbu ayi kio kantomba kuvingisa, bia bibiodi binkuiza ba bi Nzambi, kibila kidi kinlongo. Ayi balendi kula ko kibulu beni.’”

34 Aziozio ziawu zithumu Yave kavana basi Isaeli ku mongo Sinai mu nzila Mose.