YOSUA

1 Bo Mose kisadi ki Yave kafua, Yave wukamba Yosua muana Num nsadisi wu Mose, mambu amama: 2 “Mose kisadi kiama, wufuidi. Buabu kubama, sabuka muila wu Yolidani na dikabu dioso adidi ayi yenda yawu va kimueka ku ntoto yinkuiza vana dikabu di Isaeli. 3 Yinkuiza luvana bibuangu bioso benu luala viokila, dedi bo yikanikisila Mose. 4 Kizunga kinu kiala tonina ku thandu nate ku Líbanu. Kiala tonina mvandi ku muila wunneni wu Eufrate nate ku ḿbu wu Mediteranu widi ku este, kubunda mvandi ntoto woso wu zi hitita. 5 Vasi ko ne dikabu diala kununga. Dedi bo yisadisila Mose, mvandi yinkuiza kusadisa. Yalasa kubika ko ayi yalasa kukuekula ko. 6 Ba kibakala ayi mangolo, kibila ngie wunkuiza sadisa dikabu kuvua ntoto yiba kanikisa, dedi bo yilevila phesi kuidi zikhaya ziawu.

7 “Vantombulu kuba kibakala, ayi mangolo muingi wutumukina mamoso madi mu Minsiku, Mose kisadi kiama ka kuvana. Bika kuvekuka ni ku khonzu lubakala ni ku khonzu lukietu muingi wuvangila mambu mu nduenga koso kuma wunkuenda. 8 Fueti tatamana kutanganga buku ayiyi yi Minsiku. Tanganga yawu mu mbembu yivumbama builu ayi muinya, muingi wutumukina buboti mamoso madi masonama momo. Mu phila ayoyo, wunkuiza baka ndandu mu luzingu luaku ayi wala vangila mambu mu nduenga. 9 Ayi bika kuzimbakana ti yikukembi wuba mangolo ayi kibakala. Bika kuba boma, kibila minu Yave Nzambi’aku yala ba yaku koso kuandi kuma wunkuenda.”

10 Bosi Yosua wukamba zimfumu zi dikabu: 11 “Yendanu kuidi dikabu dioso ayi bakambanu: ‘Kubikanu biuma binu, kibila bilumbu bitatu to binkhambu muingi tusabuka muila wu Yolidani, ayi tuevua ntoto Yave ka tukanikisa muingi wuba kiuka kitu.’”

12 Ayi Yosua wukamba mambu amama kuidi mvila wu Rubem, wu Gadi ayi ndambu mvila wu Manase: 13 “Tebukanu monyo mambu Mose kisadi ki Yave kalukamba: ‘Yave Nzamb’inu wunkuiza luvana ndembama, nandi wuluveni ntoto awuwu. 14 Bakazi binu, bana binu ayi bibulu binu, bankuiza siala ku khonzu ayiyi yi muila wu Yolidani, kizunga Mose kaluvana. Vayi benu babakala lunnuananga mvita, lufueti sabuka ku khonzu yinkaka muingi luesadisa zikhomba zinu kunuana mvita. Benu lufueti kuba sadisa 15 nate Yave kankuiza vana zikhomba zinu ntoto’awu dedi bo benu luma tambudila ntoto’inu. Ayi bawu bala vua ntoto wo Yave kankuiza bavana, bosi benu luala vutuka kuinu mu mavula mo Mose kisadi ki Yave kaluvana ku khonzu leste yi muila wu Yolidani.

16 Bawu bavutudila Yosua: “Tunkuiza vanga mamoso ngie matukamba ayi tuala kuenda koso kuma ngie wala tufila. 17 Tunkuiza kutumukinanga mu mambu moso, dedi bo tuaba tumukinanga Mose. Ayi dilutidi nkinza, bika Yave Nzambiꞌaku ka kusadisa dedi bo kasadisila Mose. 18 Woso mutu wumbayisa zithumu ziaku ayi wummanga ku kutumukina, bafueti kumvonda. Vayi ngiewu, ba mangolo ayi kibakala.”

2 Bosi Yosua muana Num wufila babakala buadi bananguka ku Sitim muingi befiongunina ntoto. Nandi wuba kamba: “Yendanu ayi fionguninanu ntoto, bulutidi divula di Yeliko. Mu phila ayoyo, bawu bayenda ayi bavitila ku nzo yi nkietu mueka wuba ndumba leta baba tedilanga Raabi ayi bakala kuna. 2 Bosi bazabikisa mambu amama kuidi ntinu wu Yeliko: “Babakala ba basi Isaeli babe kuiza builu abubu, muingi kufiongunina ntotoꞌitu.” 3 Diawu ntinu wu Yeliko kafidila thumu ayiyi kuidi Raabi: “Basisa babakala babe kuiza ku nzoꞌaku, kibila bawu babe kuizila muingi kufiongunina ntotoꞌitu woso.”

4 Vayi Raabi wukamba babakala beni muingi basuama. Bosi wukamba batu ntinu kafila: “Bukiedika, bawu babe kuiza ku nzoꞌama, vayi yisa zaba ko kuidi babe fumina. 5 Va masika ava buisi kukuila, mu thangu banzibikanga mielu mi divula, bawu babe kuenda kuawu. Minu yisa zaba ko kuidi babe kuenda, vayi benu kuba landakana mu thinu, ḿba mulenda kuba bakidila.” 6 (Vayi nandi wuba tombula ku yilu kibanga ki nzoꞌandi, ayi wuba kamba basuama ku tsi bititi bi linho biba kuna.) 7 Mu phila ayoyo, babakala ntinu kafila baba landakana ku khonzu muila wu Yolidani, ayi bazibika mielu mi divula bo bawu bamana kubasika.

8 Ava minlenga mambu beni kulala, Raabi wutombuka ko baba. 9 Nandi wuba kamba: “Minu yizebi ti Yave wunkuiza luvana ntoto awuwu ayi befu tuidi mu kulumona boma. Batu boso ku divula adidi badi mu boma mu kibila kinu. 10 Kibila tuzabisi phila Yave kakabudila Ḿbu Wubenga vantualꞌinu bo lubasika ku Ngipiti ayi mambu moso benu luvangila mintinu miodi mi zi amorreu, Siom ayi Ogue, mintinu mio benu lutulula ku khonzu yinkaka yi Yolidani. 11 Bo tuzaba mawu, befu tuyiza ba beni mu kiunda ayi tuyiza ba boma mu kibila kinu, kibila Yave Nzambꞌinu nandi to Nzambi yikiedika ku diyilu ayi va ntoto. 12 Buabu lemvukanu, levanu phesi mu dizina di Yave ti dedi bo minu yima lumonisina mamboti, benu mvinu lunkuiza monisa mamboti kuidi minu ayi kuidi baboso bankalanga ku nzo tatꞌama. Phananu kidimbu kimmonisa ti benu luala tuvangila mamboti. 13 Vukisanu tatꞌama, mamꞌami, zikhomba ziama zi babakala, zi bakietu ayi makanda mawu. Tusadisanu muingi tubika kufua.”

14 Mu kibila akiokio, babakala beni bankamba: “Tunleva phesi mu luzingu luitu ti, tunkuiza lusadisa kuvuka. Ngie kukhambu zabikisa kibila tube kuizila akuku, buna tunkuiza kumonisa mamboti ayi lukuikumunu bo Yave kankuiza bunga ntoto awuwu.” 15 Bosi nandi wuba kuludila mu nsinga kakanga va nela, kibila nzoꞌandi yiba ku khonzu bibaka bi divula. Nzo beni yiba kuyilu bibaka bi divula. 16 Bosi nandi wuba kamba: “Yendanu ku kibuangu kidi miongo ayi suamanu mu bilumbu bitatu, muingi batu ntinu kabe fila, babika kulubakula. Bosi bo bawu bala vutuka, benu mulenda tatamana nzilꞌinu.”

17 Babakala beni bankamba: “Tuisinkuiza bue ba ko mu lukuiku lu kuvanga mambu tuma kukanikisa, 18 ngie kukhambu bika nsinga awuwu wubenga va nela yo be tukuludila, bo tunkuiza tulula ntoto awuwu. Ngie fueti kutikisa ku nzoꞌaku tatꞌaku, mamꞌaku, zikhomba ziaku ayi baboso badi mu dikanda di tatꞌaku. 19 Woso mutu wumbasika ku nganda na kufua, naveka wunkuiza ba fotu kubika ti befu. Vayi va kumonikina diambu dimbi kuidi batu badi ku khati nzoꞌaku, buna befu tunkuiza ba fotu. 20 Vayi ngie kuzabikisa mambu tube kuizila akuku, buna tuisinkuiza bue ba ko mu lukuiku lu kudukisa tsila tuma vanga.” 21 Raabi wutuba: “Bika mavangimina dedi bo luma tubila.”

Bosi bawu bayenda. Ayi bo vavioka mua thangu, Raabi wukanga nsinga wubenga va nela yi nzoꞌandi. 22 Babakala beni bananguka ayi bayenda ku kibuangu kidi miongo, bakala kuna bilumbu bitatu nate batu baba kuba tomba bavutuka. Babakala beni baba tomba mu zinzila zioso, vayi basa kuba bakula ko. 23 Batu beni Yosua kafila, bakuluka ku kibuangu kiba miongo, basabuka muila ayi bayenda vaba Yosua muana Num. Bawu banzabikisa mambu moso maba monikina. 24 Bosi bakamba Yosua: “Yave matuvana ntoto woso awuwu. Bukiedika batu boso bankalanga ku ntoto beni, badi beni boma mu kibila kitu.”

3 Bosi Yosua ayi dikabu dioso di Isaeli bananguka meni meni ku Sitim ayi bavitila ku Yolidani. Ayi kuawu baviokisila builu ava basabuka muila wu Yolidani.

2 Bo vavioka bilumbu bitatu, zimfumu zi dikabu badiengila kibuangu kioso basi Isaeli baba 3 ayi bakamba dikabu: “Benu kumona zilevita badi zinganga nzambi bama nanguna Kasu yi Luwawanu yi Yave Nzambꞌinu, benu mvinu lufueti nanguka ayi kuba landakana. 4 Vayi lufueti ba batatuka mu 2.000 di zikovadu, lulendi fikimina ko ngolo. Mu phila ayoyo, benu lunkuiza zaba nzila, kibila benu luviokidiabu ko mu nzila ayiyi.”

5 Bosi Yosua wukamba dikabu: “Luyidiodisanu, kibila yono Yave wunkuiza vanga mambu ma kukuitukila va khatꞌinu.”

6 Bosi Yosua wukamba zinganga nzambi: “Nangunanu Kasu yi Luwawanu ayi banu vantuala dikabu.” Mu phila ayoyo, bawu bananguna Kasu beni ayi batuama vantuala dikabu.

7 Bosi Yave wukamba Yosua: “Kutona bubu, minu yinkuiza kunangika va meso ma basi Isaeli boso, muingi bawu bazaba ti yinkuiza kusadisa dedi bo yisadisila Mose. 8 Ngie fueti kamba mambu amama kuidi zinganga nzambi bankuiza nata Kasu yi Luwawanu: ‘Bo lumvitila va muila wu Yolidani, tibukanu mu nlangu ayi telamanu.’”

9 Ayi Yosua wukamba basi Isaeli: “Yizanu ayi yuwanu mambu Yave kantuba.” 10 Bosi Yosua wutuba: “Mu phila ayiyi benu lunkuiza zaba ti va khatꞌinu vadi Nzambi yimonyo no wunkuiza kukisa vantualꞌinu basi Kanani, zi hitita, zi heveu, zi perizeu, zi girgazeu, zi amorreu ayi zi jebuzeu. 11 Talanu! Kasu yi Luwawanu yi Mfumu yi ntoto wumvimba, badi mu kunata yawu vantualꞌinu va khati nlangu wu muila wu Yolidani. 12 Buabu, solanu kumi wadi di babakala mu kadika mvila wu Isaeli, dibakala dimueka mu kadika mvila. 13 Bo zinganga nzambi bannata Kasu yi Luwawanu yi Yave Mfumu yi ntoto woso, bankuluka mu nlangu, wawu wisinkuiza bue kumba ko, vayi wunkuiza sikama buka bibaka.”

14 Bo dikabu bananguka mu zitenda ziawu ava basabuka muila wu Yolidani, zinganga nzambi baba nata Kasu yi Luwawanu, bayenda vantualꞌawu. 15 Vayi bo zinganga nzambi baba nata Kasu beni batona kukuluka mu nlangu (mu thangu beni, muila wu Yolidani waba banga beni wuwala ayi nlangu waba vitilanga nate ku disimu mu thangu yoso yi kuvela mbongu), 16 nlangu waba fumina ku mongo wusikama. Wawu wuba buka kibaka ki kula kutonina vo vaba basi Isaeli nate ku Adami divula difikama na kizunga ki Zaretã. Ayi nlangu wuba kuwanda muila waba kuendanga nate ku Mar Morto widi ku Arabá, wuyuma. Ayi dikabu dioso di Isaeli banunga kusabuka va ndeku divula di Yeliko. 17 Bo zinganga nzambi baba nata Kasu yi Luwawanu yi Yave baba batelama va khati muila wu Yolidani, dikabu dioso di Isaeli basabuka muila mu ntoto wuyuma, nate baboso bamana kuvioka.

4 Bo dikabu dioso bamana kusabuka muila wu Yolidani, Yave wukamba Yosua: 2 “Solanu 12 di babakala mu dikabu, dibakala dimueka mu kadika mvila, 3 ayi wuba kamba mambu amama: ‘Bonganu 12 di mamanya mu muila wu Yolidani, va kibuangu zinganga nzambi babe telimina, natanu mawu ayi tulanu mawu va kibuangu lunkuiza viokisila builu.’”

4 Bosi Yosua wutumisa 12 di babakala kasola mu dikabu di Isaeli, dibakala dimueka mu kadika mvila, 5 ayi Yosua wuba kamba: “Viokanu kuntuala Kasu yi Luwawanu yi Yave Nzambꞌinu, yidi va khatisika muila wu Yolidani. Ayi kadika mutu mu benu, kafueti nanguna dimanya mu kutadila thalu yi mimvila mi Isaeli. 6 Mawu mankuiza ba kidimbu va khatꞌinu. Ayi bo bana binu bala kulukuvula: ‘Kibila mbi lutuadila mamanya amama akuku?’ 7 Benu lufueti kuba vutudila: ‘Bo tusabuka muila wu Yolidani mu thangu Kasu yi Luwawanu yi Yave yiba vantualꞌitu, nlangu wu muila beni wusikama ayi wuyuma. Mamanya amama madi kidimbu muingi dikabu di Isaeli batebukilanga monyo.’”

8 Ayi basi Isaeli bavangila mambu moso mu phila Yosua katubila. Bawu bananguna 12 di mamanya mu muila wu Yolidani, dedi bo Yave kakambila Yosua, dimanya dimueka mu kadika mvila wu Isaeli. Bawu banata mawu va kibuangu baviokisila builu ayi batula mawu vana.

9 Yosua wutelimisa mvandi 12 di mamanya va khati muila wu Yolidani, va kibuangu zinganga nzambi baba nata Kasu yi Luwawanu baba batelama. Ayi mamanya beni makhidi vana nate bubu.

10 Zinganga nzambi baba nata Kasu yi Luwawanu batatamana batelama va khati muila wu Yolidani, nate bamana kuvanga mambu moso Yave kakamba dikabu mu nzila Yosua, mu kutadila mambu Mose kakamba Yosua. Bo baba vanga mambu amomo, dikabu baba sabuka mu nsualu. 11 Bo dikabu dioso bamana kusabuka, bosi zinganga nzambi baba nata Kasu yi Luwawanu yi Yave, mvandi basabuka vantuala batu boso. 12 Ayi mvila wu Rubem, wu Gadi ayi ndambu mvila wu Manase, basabuka mu mangumba buka masodi vantuala basi Isaeli bankaka, dedi bo Mose kaba kambila. 13 Nduka 40.000 di masodi bakubama muingi kue nuana mvita basabuka mu mangumba vantuala Yave, muingi kukuenda ku thandu yi Yeliko.

14 Mu kilumbu beni, Yave wunangika Yosua va mesu ma dikabu dioso di Isaeli ayi bawu bankinzika beni mu luzingu luandi loso, dedi bo bakinzikila Mose.

15 Bosi Yave wukamba Yosua: 16 “Kamba zinganga nzambi badi mu kunata Kasu yi Luwawanu, muingi bathapuka* mu muila.” 17 Diawu Yosua kakambila zinganga nzambi: “Thapukanu.” 18 Bo zinganga nzambi baba nata Kasu yi Luwawanu yi Yave bathapuka mu nlangu, ayi bo batuka ku disimu, muna thangu beni nlangu wu muila wu Yolidani wutona kubue kumba ayi wuvitila nate ku disimu, dedi bo wubela.

19 Dikabu bananguka va kizunga ki Yolidani mu kilumbu kumi ki ngonda yitheti, ayi bayevundila ku Gilgal kibuangu kidi ku khonzu leste yi Yeliko.

20 Ayi Yosua wutelimisa kumi wadi di mamanya ku Gilgal, mo babonga mu muila wu Yolidani. 21 Bosi nandi wukamba basi Isaeli: “Bo bana binu bala kuvula: ‘Mbi binsundula mamanya amama?’ 22 Benu lufueti kuba vutudila: “Basi Isaeli basabuka muila wu Yolidani mu ntoto wuyuma, 23 bo Yave Nzambꞌitu kavasa muila wu Yolidani vantualꞌitu nate tumana kusabuka, dedi bo Yave kavangila ku Ḿbu Wubenga bo kakabula wawu vantualꞌitu, nate tumana kusabuka. 24 Nandi kavangila mawu, muingi makabu moso va ntoto mazaba ti Yave widi mangolo mawombo ayi muingi benu lutatamana kukinzika Yave Nzambꞌinu.’”

5 Mintinu mioso mi zi amoreu baba ku khonzu oeste yi muila wu Yolidani, kubunda mvandi mintinu mi basi Kanani baba kalanga ku ndeku ḿbu, bayuwa ti Yave wuyumisa muila wu Yolidani vantuala basi Isaeli nate bawu bamana kusabuka. Bo bawu bazaba mawu, bayiza ba beni boma, ayi basa bue ba ko kibakala.

2 Mu thangu beni, Yave wukamba Yosua: “Vanga zimbedi zi mamanya ayi zengisa zipheni zi babakala ba basi Isaeli.” 3 Diawu, Yosua wuvanga zimbedi zi mamanya ayi wuzenga zipheni zi babakala ba basi Isaeli ku Gibeati-Araloti. 4 Akiki kiawu kibila kivanga Yosua kuzengisa zipheni zi babakala zi basi Isaeli: Mu dikabu dioso diba ku Ngipiti, babakala boso baba mu nkangu wu masodi bamana kufuila ku thandu. 5 Babakala boso baba ku Ngipiti baba zipheni zizengu, vayi baboso babutukila ku thandu basa ba ko zipheni zizengusu. 6 Basi Isaeli bazingila ku thandu mu 40 di mimvu, nate babakala boso baba ku Ngipiti baba masodi ayi bakhambu tumukina Yave bamana kufua. Yave wuleva phesi ti balasa kota ko ku ntoto wo Yave ka kanikisa kuidi zikhaya ziawu ti wunkuiza tuvana, ntoto wuwedi leta ayi wika. 7 Mu phila ayoyo, Nzambi wuba manga vayi wuvana ntoto beni kuidi bana bawu. Yosua wuba zengisa zipheni, kibila basa ba ko zipheni zizengusu mu thangu yoso bazingila ku thandu.

8 Bo bamana kuzengusu babakala boso zipheni, bawu bakala mu zitenda ziawu nate babeluka.

9 Bosi Yave wukamba Yosua: “Bubu yima botula kibila kiaba vanganga basi Ngipiti kulusakinina.” Diawu bantedilanga kibuangu beni Gilgal* nate bubu.

10 Basi Isaeli batatamana kukala ku Gilgal, ayi mu kilumbu 14 ki ngonda beni bo buisi buyila, bawu bakemba Nkungi wu Pasika ku thandu yi Yeliko. 11 Ayi mu kilumbu kilanda bo bakemba Nkungi wu Pasika, bawu batona kudia bivatu bi ntoto beni, badia mapha makhambulu luvi ayi zitheti zikangu. 12 Mu kilumbu batona kudia bivatu bi ntoto beni, kiawu balembu kubue dianga maná ayi maná malembu kubue bua, vayi mu mvu beni bawu baba dianga to bivatu bi ntoto wu Kanani.

13 Bo Yosua kafikama divula di Yeliko ayi kananguna thalu, nandi wumona vantualꞌandi dibakala dimueka wuba wutelama na mbedi va koko. Yosua wufikama vo kaba ayi wunyuvula: “Ngie widi ku khonzuꞌitu voti ku khonzu zimbeni zitu?” 14 Nandi wumvutudila: “Minu yidi mfumu masodi ma Yave.” Mu kibila akiokio, Yosua wufukama ayi wuyinika kizizi va tsi ayi wunyuvula: “A mfumuꞌama, mambu mbi wuntomba kukhamba?” 15 Mfumu masodi ma Yave wukamba Yosua: “Vula zisandali ziaku, kibila kibuangu widi, kidi kinlongo.” Ayi Yosua wuvanga mawu muna thangu beni.

6 Mielu mi divula di Yeliko, miba mizibama ayi ne mutu kabasa basikanga ko ayi kabasa kotanga ko, muingi basi Isaeli babika kukota.

2 Bosi Yave wukamba Yosua: “Tala, yimvana divula di Yeliko mu mioko miaku, kubunda mvandi ntinu wu divula ayi masodi mandi moso. 3 Masodi moso bafueti zungidila divula khumbu yimueka ayi bafueti vanga mawu mu sambanu di bilumbu. 4 Sola sambuadi di zinganga nzambi, muingi banata sambuadi di ziphoka zi mamemi ayi bawu bafueti ba kuntuala Kasu. Vayi mu kilumbu sambuadi benu lufueti zungidila divula sambuadi di zikhumbu ayi zinganga nzambi bafueti sika ziphoka. 5 Ayi bo lunkuwa biyoko bi ziphoka beni, masodi moso bafueti tenduka dedi bo bantendukilanga mu mvita. Mu phila ayoyo, bibaka bi divula binkuiza bua ayi masodi moso bafueti duma ku divula beni.”

6 Mu phila ayoyo, Yosua muana wu Num, wukutikisa zinganga nzambi ayi wuba kamba: “Bonganu Kasu yi Luwawanu ayi sambuadi di zinganga nzambi mu benu bafueti nata sambuadi di ziphoka ayi bafueti ba kuntuala Kasu yi Luwawanu yi Yave.” 7 Bosi nandi wukamba masodi: “Yendanu ayi zungidilanu divula, ayi masodi mankaka mu benu badi binuanunu, bawu bafueti ba kuntuala Kasu yi Luwawanu yi Yave.” 8 Mu phila ayoyo, sambuadi di zinganga nzambi baba sika ziphoka zi mamemi vantuala Yave, bayenda kuntuala ayi zinganga nzambi baba nata Kasu yi Luwawanu yi Yave, baba kuba landakana dedi bo Yosua kaba kambila. 9 Masodi baba binuanunu bawu baba kuntuala; zinganga nzambi baba sika ziphoka baba va khati ayi zinganga nzambi baba nata Kasu yi Luwawanu bawu baba kumbusa.

10 Yosua wukamba masodi: “Bikanu kutenduka ayi bikanu kutuba ni diambu nate mu kilumbu minu yinkuiza lukamba: ‘Tendukanu.” 11 Nandi wutuma muingi bavanga Kasu yi Yave kuzungidila divula dioso khumbu yimueka, bosi bavutuka va kibuangu vaba dikabu ayi baviokisa vana builu.

12 Mu kilumbu kilanda va meni, Yosua wunanguka ayi zinganga nzambi ba nata Kasu yi Luwawanu yi Yave. 13 Ayi sambuadi di zinganga nzambi baba sika sambuadi di ziphoka zi mamemi, baba vantuala Kasu yi Luwawanu yi Yave, ayi baba tatamana kusika ziphoka beni. Ndambu di masodi baba binuanunu, bawu bayenda vantuala ayi zinganga nzambi baba nata Kasu yi Luwawanu yi Yave, bawu baba kumbusa. 14 Mu kilumbu kimmuadi, mvandi bazungidila divula beni khumbu yimueka, bosi bavutuka va kibuangu baba kalanga. Mawu bavanga mu sambanu di bilumbu.

15 Ayi mu kilumbu ki sambuadi, bawu bananguka meni meni ayi bazungidila divula mu sambuadi di zikhumbu. Akiokio kiawu to kilumbu bazungidila divula mu sambuadi di zikhumbu. 16 Mu khumbu yi sambuadi bo zinganga nzambi baba sika ziphoka, Yosua wukamba masodi: “Tendukanu, kibila Yave ma luvana divula adiodio. 17 Lufueti tulula divula ayi biabioso bidi ku divula beni, kibila bidi bi Yave. Vayi lulendi vonda ko Raabi nkietu wu kindumba ayi baboso badi ku nzoꞌandi, kibila nandi wusueka minlenga mambu mio tutuma. 18 Vayi lufueti tatuka biuma bioso bio bafueti tulula, ayi bikanu kuzinina ne kubonga biuma beni, muingi dikabu di Isaeli dibika tuluka ayi kumonikina ziphasi. 19 Vayi palata, wola ayi biuma bioso bivangulu mu cobre ayi bisengu, bidi binlongo ayi bi Yave. Bafueti nata biawu va kibuangu banlundilanga biuma bi luvalu bi Yave.”

20 Bosi bo basika ziphoka, masodi batenduka. Ayi bo bawu bayuwa biyoko bi ziphoka beni ayi batenduka mu phila bantendukilanga mu mvita, bibaka bi divula bibua. Bosi bawu bayenda ku divula beni ayi bavua diawu. 21 Bawu bavonda baboso baba ku divula beni, kuba kuandi babakala, bakietu, matoko, biboba, zingombi, mamemi ayi ziphunda.

22 Bosi Yosua wukamba babakala buadi bo katuma muingi kuefiongunina ntoto: “Yendanu ku nzo Raabi nkietu wu kindumba, ntualanu ayi tualanu mvandi baboso badi ku nzoꞌandi dedi bo lunkanikisila.” 23 Diawu matoko beni bayenda kuefiongunina ntoto bayenda ku nzo Raabi, bantuala, batuala mvandi tatꞌandi, mamꞌandi ayi zikhomba ziandi zioso ayi dikanda diandi dioso. Ayi baba nata va kibuangu kidi nsika ku nganda kibuangu basi Isaeli baba kalanga.

24 Bosi bavika divula ayi biabioso biba ku divula beni. Vayi bawu banata palata, wola ayi biuma bioso bivangulu mu cobre ayi mu bisengu va kibuangu baba lundilanga biuma bi luvalu bi Yave. 25 Vayi Raabi nkietu wu kindumba ayi baboso baba kalanga ku nzo tatꞌandi, bawu to Yosua kakhambu vonda. Ayi nandi wunkalanga na basi Isaeli nate bubu, kibila wusueka minlenga mambu mio Yosua kafila muingi befiongunina divula di Yeliko.

26 Mu thangu beni, Yosua wuleva phesi mu kutuba mambu amama: “Bika Yave kasinga woso mutu wala vanga mangolo ma kubue tunga divula di Yeliko. Bo nandi kala vanga lusersu muanꞌandi wutheti wala fua ayi bo kala tula mielu muanꞌandi wutsuka wala fua.”

27 Mu phila ayoyo, Yave wutatamana kuba na Yosua ayi nandi wuyiza ba beni wuzabakana ku ntoto woso.

7 Vayi basi Isaeli basa monisa ko lukuikumunu ayi bayiba biuma bio bavana nsua wu kutulula, kibila Akam, muana wu Karmi ayi Karmi muana Zibdi, Zibdi muana Zinri, widi mu mvila wu Yuda, wubonga mua biuma bio bavana nsua muingi batulula ayi mu kibila akiokio, Yave wufuemina dikabu dioso di Isaeli.

2 Bosi Yosua wufila mua babakala bananguka ku Yeliko, muingi benda ku Ai, divula diba difikama na Bete-Áven, ku khonzu leste yi Beteli ayi wuba kamba: “Yendanu muingi luefiongunina ntoto. Mu kibila akiokio babakala beni bayenda muingi befiongunina divula di Ai. 3 Bo babakala beni bavutuka vaba Yosua, bawu bankamba: “Vasintombulu ko kufila masodi moso. Ḿba, wulenda fila kuandi to, 2.000 voti 3.000 di masodi muingi kununga divula di Ai. Diawu bika kuvongisa masodi moso mu kuba kamba benda, kibila ku divula beni kukalanga ko batu bawombo.”

4 Diawu bafidila 3.000 to di masodi ku divula beni, vayi bawu basa banunga ko ayi batina basi Ai. 5 Basi Ai bavonda 36 di masodi ma Isaeli ayi baba kuka kutonina va muelu wu divula nate ku Sebarim* ayi bavonda bankaka va mongo. Mu kibila akiokio dikabu dioso bayiza ba mu boma.

6 Mu kibila akiokio, Yosua wukhakuna bikhutu, wufukama ayi wuyinika kizizi vantuala Kasu yi Luwawanu yi Yave nate va masika. Nandi ayi bakulutu bankaka ba Isaeli, batula ntoto mu mintu miawu. 7 Yosua wutuba: “A Yave, Mfumu Yilutidi, kibila mbi wutuvengi kusabuka muila wu Yolidani? Bukiedika ti wututuadidi akuku muingi zi amoreu ba tuvonda? Khanu bulutidi kuandi boti tusa sabuka ko muila wu Yolidani muingi kukuiza akuku! 8 A Yave, lemvuka, mbi binkaka yilenda bue tuba, mu kumona ti basi Isaeli bama tina zimbeni ziawu? 9 Bo basi Kanani ayi batu boso bankalanga ku ntoto awuwu bala kuwa mambu amomo, bawu bala tunuanisa ayi bala mana ku tuvonda. Buabu, mambu mbi wala vanga matedi dizina diaku di nzitusu?”

10 Yave wuvutudila Yosua: “Telama! Kibila mbi ngie befukimina ayi beyinikina kizizi kiaku va tsi? 11 Basi Isaeli babe sumuka. Bawu babe levula luwawanu, mu kukhambu tumukina mambu yibe bakamba. Bawu babe kuiba mua biuma bio yivana nsua muingi batulula. Ayi babe lunda biawu va kimueka na biuma biawu binkaka bi luvalu. 12 Diawu, benu luisinkuiza tatamana ko kununga zimbeni zinu. Bawu bala tatamana ku lunuanisa ayi benu luala tatamana kutina, kibila lube bonga biuma bio yivana nsua muingi batulula. Yisinkuiza lusadisa ko benu khambu tulula biuma bio yivana nsua muingi lutulula. 13 Yenda ayi diodisa dikabu! Ngie fueti kuba kamba: ‘Lufueti kuyidiodisa, mu kibila ki mambu mala monika kimba yono. Kibila Yave Nzambi yi Isaeli, betuba: “Va khatꞌinu vadi biuma bio yivana nsua muingi lutulula. Benu luisinkuiza nunga ko zimbeni zinu, benu kukhambu tulula biuma bidi va khatꞌinu bio yivana nsua muingi lutulula. 14 Yono va meni, mimvila mioso mifueti kuenda vantuala Nzambi ayi mvila wo Yave kankuiza sola, wufueti kuenda vantuala. Ayi dikanda dio Yave kankuiza sola va khati mvila beni, difueti kuenda vantuala. Ayi nzo yo Yave kankuiza sola mu makanda amomo, bafueti kuenda vantuala. Ayi mu zinzo beni dibakala dio Yave Nzambi kankuiza sola, difueti kuenda vantuala. 15 Ayi woso mutu besueka biuma bio Nzambi kabe tuba ti bafueti tulula, bankuiza mvika ku mbazu, nandi ayi biabioso kavuidi, kibila bebundula luwawanu lu Yave ayi bevanga diambu di tsoni ku Isaeli.”’”

16 Bosi va meni, Yosua wukutikisa dikabu dioso di Isaeli, mimvila mioso ayi basola mvila wu Yuda. 17 Nandi wutumisa makanda ma mvila wu Yuda vantualꞌandi ayi wusola dikanda di zi Zeraita, bosi wutumisa babakala boso badi mu dikanda beni vantuala ayi mu babakala beni wusola, Zabdi. 18 Bosi wutumisa babakala boso ba dikanda di Zabdi ayi wusola Akam, muana wu Karmi, Karmi muana wu Zabdi, Zabdi muana wu Zera badi mu mvila wu Yuda. 19 Yosua wukamba Akam: “Muanꞌama, lemvuka, zitisa Yave Nzambi yi Isaeli ayi fungula masumu maku. Lemvuka, khamba mambu mbi ngie bevanga. Bika kusueka ni diambu.”

20 Akam wukamba Yosua: “Bukiedika, minu yibe sumuka va mesu ma Yave, Nzambi yi Isaeli ayi adidi, diawu diambu yibe vanga. 21 Bo yimueni kiyunga ki thalu kivangulu mu Sinear, 200 di zisikulu zi palata ayi kitini ki wola kiaba zita 50 di zisikulu, minu yizinina biawu ayi yi bibonga. Ayi yizikisi biawu kuna khati tendꞌama, va kimueka na zimbongo.”

22 Muna thangu beni, Yosua wufila mua babakala. Bawu baduma nate ku tenda beni ayi babakula ku tenda beni, kiyunga va kimueka na zimbongo ziba ku tsi ntoto. 23 Mu phila ayoyo, bawu babonga biuma biba ku khati tenda banata biawu kuidi Yosua ayi dikabu dioso, vantuala Yave. 24 Bosi, Yosua ayi basi Isaeli boso, banata Akam, muana Zinri, va kimueka na palata, kikhutu ki thalu, kitini ki wola, bana bandi ba babakala, ba bakietu, zingombi ziandi, ziphunda, mamemi, tendꞌandi ayi biuma binkaka biba kuna, baba nata ku Ḿbuinga wu Akor. 25 Yosua wutuba: “Kibila mbi ngie be tutuadisila ziphasi? Bubu, Yave mvandi wunkuiza kutuadisa ziphasi. Bosi basi Isaeli boso, baba kuba mamanya ayi baba vika ku mbazu. 26 Ayi bakhupika kikhuku ki mamanya va mbata mvumbi wu Akam ayi mamanya beni makhidi vana nate bubu. Mu kibila akiokio, nganzi yi Yave yidekuka. Diawu nate bubu, bantedilanga kibuangu beni, Ḿbuinga wu Akor.

8 Bosi Yave wukamba Yosua: “Bika kumona boma ni kukuazuka. Yenda na masodi ayi nuanisanu divula di Ai. Tala, yinkuiza kusadisa kununga ntinu wu Ai, divula diandi ayi ntotoꞌandi woso. 2 Vangilanu divula di Ai ayi ntinu wu Ai, momawu mambu luvangila divula di Yeliko ayi ntinuꞌawu. Vayi khumbu ayiyi, benu lulenda bonga biuma biawu bi luvalu ayi bibulu biawu. Lufueti kuba suamina kumbusa divula.”

3 Mu phila ayoyo, Yosua ayi babakala boso baba nuananga mimvita, batombuka ku divula di Ai. Yosua wusola 30.000 di masodi mapisuka ayi wuba fila ku divula beni va builu. 4 Nandi wuba vana nsiku awuwu: “Lufueti kuba suamina kumbusa. Bikanu kutatuka beni divula ayi banu bakubama. 5 Minu ayi masodi moso madi yama, tuala fikama ku divula ayi mu thangu bawu bambasika muingi kutunuanisa dedi bo bavangila mu khumbu yitheti, befu tunkuiza tina. 6 Bo bawu bankuiza tulandakana kumbusa, befu tunkuiza bavanga batatamana kutulandakana ayi batatuka divula, kibila bawu bankuiza tuba, ‘Badi mu ku tutina dedi bo bavangila mu khumbu yitheti.’ Mu phila ayoyo, befu tunkuiza batina. 7 Bosi benu lufueti kota ku divula ayi ku ditulula, kibila Yave Nzambꞌinu, wunkuiza lusadisa kuba nunga. 8 Bo benu lunkuiza kota ku divula, lufueti vika diawu ayi lufueti vangila mamoso dedi bo Yave kabe lukambila. Aziozio, ziawu zithuadusulu yi kuluvana.”

9 Bosi Yosua wuba fila ayi bawu bayenda va kibuangu baye suamina, va ndeku divula di Beteli ayi Ai, ku khonzu leste yi Ai. Vayi Yosua wuviokisa builu na masodi mankaka.

10 Bosi mu kilumbu kilanda va meni, Yosua wukutikisa masodi, nandi ayi bakulutu ba Isaeli, banata masodi beni ku divula di Ai. 11 Masodi moso maba na Yosua, batombuka ayi bayenda vantuala divula. Bawu bayenda kue kala ku khonzu norte yi Ai, va ndeku ḿbuinga wuba kuna. 12 Mu thangu beni, Yosua wusola nduka 5.000 di babakala muingi besuamina va ndeku divula di Beteli ayi Ai, ku khonzu oeste yi divula. 13 Mu phila ayoyo, masodi bayenda kue nuana mvita, batunga kibuangu kiawu ku khonzu norte yi divula ayi masodi mankaka basuamina ku khonzu oeste yi divula. Mu builu beni, Yosua wuyenda nate va ḿbuinga.

14 Ayi bo ntinu wu divula di Ai kamona mawu, nandi ayi masodi mandi bakubama ayi babasika mu kilumbu kilanda va meni, muingi kunuanisa basi Isaeli, va kibuangu kiba va ndeku thandu yi Moabi. Vayi ntinu kasa zaba ko ti vaba masodi mankaka masuama kumbusa divula. 15 Bo masodi ma divula di Ai babasika, Yosua ayi masodi mandi, batinina ku nzila yinkuenda ku khonzu yi thandu. 16 Bosi batumisa masodi moso maba ku divula, muingi baba kuka. Ayi bo baba kuka Yosua, bawu batatuka divula diawu. 17 Vasa siala ko ni dibakala ku divula di Ai ayi ku Beteli, kibila baboso baba kuka masodi ma Isaeli. Mu phila ayoyo, babika divula mukhambulu lukiebu.

18 Bosi Yave wukamba Yosua: “Nonuna didionga didi va koko kuaku ku khonzu divula di Ai, kibila yinkuiza vana divula beni, mu mioko minu.” Mu phila ayoyo, Yosua wunonuna didionga beni ku khonzu divula di Ai. 19 Muna thangu Yosua kanonuna didionga beni, masodi masuamina kumbusa divula, bakota ku divula beni batulula diawu ayi badi vika.

20 Bo masodi ma divula di Ai batala kumbusa, bamona ti divula diawu diaba basika muisi waba vitila nate ku diyilu. Mu phila ayoyo, basa ba ko mangolo ma kukuenda ni khonzu. Bosi masodi ma Isaeli maba tina ku thandu, bavutuka muingi kunuanisa masodi ma Ai. 21 Bo Yosua ayi masodi maba yandi bamona ti masodi mankaka baba basuama ku khonzu yinkaka yi divula banunga ayi bavika divula, bawu bavutuka muingi kunuanisa masodi ma Ai. 22 Ayi bo masodi manunga divula babasika muingi kuba landakana, masodi ma Ai, bayiza ba va khati. Ku khonzu yimueka kuba masodi maba na Yosua ayi ku khonzu yinkaka masodi mavika divula. Mu phila ayoyo, masodi ma Isaeli baba vonda ayi vasa sobila ko ni wumueka. 23 Vayi babuila ntinu wu Ai ayi bannata kuidi Yosua.

24 Bo masodi ma Isaeli bamana kuvonda masodi moso ma Ai, baba ku thandu, kibuangu baba kuba kukila, masodi ma Isaeli bavutuka ku divula ayi bamana kuvonda baboso basobila kuna. 25 Thalu yi batu bafua mu kilumbu beni ku divula di Ai, kuba kuandi babakala ayi bakietu, yiba, 12.000. 26 Yosua wutatamana kunonuna didionga diandi nate bamana kuvonda batu boso baba ku divula di Ai. 27 Vayi basi Isaeli babonga biuma bioso bi luvalu biba ku divula beni, va kimueka na bibulu dedi bo Yave kakambila Yosua.

28 Yosua wuvika divula di Ai ayi diawu dimana kutuluka ayi buawu dididi nate bubu. 29 Nandi wuledika ntinu wu Ai va dikunzi nate va masika, ayi bo thangu yaba kota, Yosua wutuma muingi babotula nyituꞌandi va dikunzi. Bosi batula mvumbi beni va khotolo divula ayi bakhupika vambata nyitu beni mamanya, ayi mawu makhidi vana nate bubu.

30 Akiokio kiawu kibila Yosua katungila Yave Nzambi yi Isaeli kikuma ku mongo wu Ebal, 31 dedi bo Mose kisadi ki Yave kavanina zithuadusulu kuidi basi Isaeli, ayi dedi bo buku yi Minsiku mi Mose yintubila: “Kikuma ki mamanya mo bakhambu zenga mu bisadulu bavangila mu bisengu.” Ayi vambata kikuma beni, vawu bavanina Yave minkhailu miviku ayi mi kithuadi.

32 Bosi nandi wusonika mu mamanya beni, Minsiku Mose kasonika vantuala basi Isaeli. 33 Dikabu diodo di Isaeli, bakulutu, zimfumu ayi mimfundisi, batelama mu zikhonzu zia ziwadi zi Kasu, vantuala zinganga nzambi baba nata Kasu yi Luwawanu yi Yave, kuba kuandi zinzenza voti basi Isaeli baba vana. Ndambu di batu mu bawu baba va ndeku mongo Gerizim ayi bankaka baba va ndeku mongo Ebal (dedi bo Mose kisadi ki Yave kaba kambila), muingi dikabu batambula lusakumunu. 34 Bosi nandi wutanga mu mbembu yinangama mambu moso maba mu Nsiku, kuba kuandi lusakumunu ayi zi tsingulu, mu kutadila mambu moso maba masonama mu buku yi Minsiku. 35 Yosua wutanga mambu moso maba mu Minsiku mi Mose, mu mbembu yinangama vantuala dikabu di Isaeli, kuba kuandi bakietu, bibabana ayi zinzenza ziaba kalanga va khatiꞌawu.

9 Bo zitsangu aziozio zituka kuidi mintinu miaba kalanga ku khonzu oeste wu muila wu Yolidani, miaba kalanga ku khonzu yidi miongo ku Sefela ayi mu ndeku ḿbu wu Mediteranu ayi vantuala Libanu, zi hitita, zi amorreu, basi Kanani, zi perizeu, zi heveu ayi zi jebuzeu— 2 bawu bavanga luwawanu muingi kunuanisa Yosua na basi Isaeli.

3 Batu baba kalanga ku Gibeão mvandi bayuwa mambu Yosua kavangila divula di Yeliko ayi Ai. 4 Diawu mu diela bawu bavanga diambu adidi: batula bidia mu zitsaku zikhulu ayi batula ziawu vambata ziphunda ziawu, va kimueka na bisuekulu bi vinyu balonda. 5 Bavuata mvandi zisandali zisika ayi balonda, bikhutu bikhulu ayi mapha moso banata maba mayuma ayi maba bukuka maveka. 6 Bosi bayenda ku Gilgal kibuangu Yosua ayi basi Isaeli baba ayi baba kamba: “Befu kinanu tuma fumina. Buabu lemvukanu, vanganu yitu luwawanu.” 7 Vayi basi Isaeli bakamba zi heveu: “Ḿba benu lukalanga ko kinanu. Buabu, buidi tulenda vangila yinu luwawanu?” 8 Bawu bavana mvutu kuidi Yosua: “Befu tuidi bisadi biaku.”

Bosi Yosua wuba yuvula: “Benu luidi banani, ayi kuidi luma fumina?” 9 Bawu bamvutudila: “Befu tube fumina ku kinanu ayi tube kuizila akuku, mu kibila ki dizina di Yave Nzambꞌinu. Kibila tuyuwizi mawombo matedi nandi ayi mambu moso kavanga ku Ngipiti. 10 Tuyuwizi mvandi mambu nandi kavangidi mintinu miodi mi zi amorreu, miaba kalanga ku khonzu yinkaka yi muila wu Yolidani, Siom ntinu wu Hesbom ayi Ogue ntinu wu Bazan waba kalanga ku Astaroti. 11 Diawu bakulutu ba dikabu ditu ayi baboso bankalanga ku ntotoꞌitu ba tukambidi: “Natanu bidia mu viage ayi yendanu luaba dengana. Wuba kambanu: “Tunkuiza ba bisadi binu, diawu lemvukanu vanganu yitu luwawanu.’” 12 Mapha amama tuneti muingi kudia mu nzila, maba ma mbazu mu kilumbu tunanguka mu zinzo zitu muingi kukuiza akuku. Buabu, dedi bo ngie veka widi mu kumuena mawu meka mayuma ayi madi mu kubukuka maveka. 13 Ayi bisuekulu abibi bi vinyu biba bimona bo tunanguka vayi bubu bimamana kuvavuka. Zisandali zitu ayi bikhutu mvandi bimamana kuvavuka, mu kibila ki viage yi kinanu.”

14 Mu kibila akiokio, basi Isaeli bafiongunina biuma biawu, vayi bawu basa tomba ko kuzaba mayindu ma Yave. 15 Bosi Yosua wuvanga yawu luwawanu lu ndembama, muingi babika kuba vonda. Ayi bakulutu ba dikabu mvandi baleva phesi muingi babika kuba vonda.

16 Bo vavioka bilumbu bitatu tona bavanga yawu luwawanu, basi Isaeli bayiza zaba ti divula di babakala beni, diba kuandi difikama. 17 Bosi basi Isaeli bananguka ayi bayevitila mu mavula mawu mu kilumbu kintatu. Mavula mawu maba: Gibeão, Kefira, Beeroti ayi Kiriati-jearim. 18 Vayi basi Isaeli basa banuanisa ko kibila bakulutu ba dikabu baleva phesi mu dizina di Yave Nzambi yi Isaeli ti, basinkuiza banuanisa ko. Diawu dikabu dioso batona kukuana mu kibila ki mambu bakulutu bavanga. 19 Mu kibila akiokio, bakulutu boso ba dikabu bakamba dikabu di Isaeli: “Mu kumona ti befu tube vanga tsila mu dizina di Yave, Nzambi yi Isaeli, diawu tulendi banuanisa ko. 20 Diawu ndokuanu tuvanga mambu amama: Tubikanu kuba vonda muingi tubika monikina ni diambu dimbi, mu kibila ki mambu tuba levidi phesi.” 21 Ayi bakulutu ba dikabu babue tuba: “Tubikanu kuba vonda, vayi bawu bankuiza tutebilanga bisuadi ayi ku tutekilanga nlangu.” Amomo mawu makani bakulutu babaka matedi babakala beni.

22 Bosi Yosua wuba tumisa ayi wuba yuvula: “Kibila mbi benu lutuvunini mu kutukamba: ‘Befu kinanu tunkalanga,’ vayi benu lunkalanga kuinu va belama? 23 Diawu tona bubu, benu lueka batu basingu ayi lueka bisadi bitu muingi lutekanga nlangu ayi kutebanga bisuadi bio bankuiza sadilanga ku nzo yi Nzambi.” 24 Bawu bavutudila Yosua: “Tuvangidi mambu amomo, kibila ba tukembi ti Yave Nzambꞌinu, wukamba Mose kisadi kiandi ti, bankuiza bavana ntoto awuwu ayi kutulula makanda moso manzinganga muawu. Diawu mu boma ayi muingi kuvukisa luzingu luitu, diawu tuvangidi mambu amomo. 25 Buabu, tuidi mu mioko miaku. Wutuvangila moso mambu tidi, mo ngie wummona ti madi mamboti ayi masonga.” 26 Amama mawu Yosua kavanga: nandi wuba kula mu mioko mi basi Isaeli ayi kasa bavonda ko. 27 Vayi mu kilumbu beni, Yosua wuba vana kiyeku ki kutebanga bisuadi ayi kutekanga nlangu, wo bankuiza sadilanga va kikuma ki Yave, va kibuangu naveka Nzambi kasola. Ayi bawu bamvanganga kisalu beni nate bubu.

10 Bo Adoni-Zedeki, ntinu wu Yelusalemi kayuwa mambu Yosua kavangila divula di Ai ayi ntinuꞌandi ayi mambu kavangila divula di Yeliko ayi ntinuꞌandi ayi ti basi Gibeão bavanga luwawanu lu ndembama na basi Isaeli ayi baba zinga yawu, 2 nandi wuba beni boma, kibila Gibeão diba divula dinneni, buka mavula mankalanga mintinu. Divula beni diluta ba dinneni kena divula di Ai ayi babakala boso baba kalanga kuna baba masodi. 3 Diawu Adoni-Zedeki ntinu wu Yelusalemi kafidila thumu ayiyi kuidi Hoão ntinu wu Hebrom, Pirão ntinu wu Jarmuti, Jafia ntinu wu Lakis ayi Debir ntinu wu Eglom: 4 “Yizanu muingi lutusadisa kunuanisa divula di Gibeão, kibila bawu bavengi luwawanu lu ndembama na Yosua ayi basi Isaeli boso.” 5 Mu phila ayoyo, mintinu amiomio mitanu mi zi amorreu, ntinu wu Yelusalemi, ntinu wu Hebrom, ntinu wu Jarmuti, ntinu wu Lakis ayi ntinu wu Eglom babundana va kimueka na masodi mawu ayi bayenda muingi kue nuanisa divula di Gibeão.

6 Bosi babakala ba divula di Gibeão bafila batu muingi bekamba mambu amama kuidi Yosua ku Gilgal: “Bika kukuekula bisadi biaku. Yiza mu thinu muingi wu tusadisa, kibila mintinu mioso mi zi amorreu bankalanga ku kizunga kidi miongo, bama kutakana muingi biza tunuanisa.” 7 Diawu Yosua ayi masodi moso mapisuka banangukina ku Gilgal.

8 Bosi Yave wukamba Yosua: “Bika kuba mona boma, kibila yinkuiza kusadisa muingi wuba nunga. Ni wumueka mu bawu kasinkuiza kununga ko. 9 Yosua ayi masodi mandi, bananguka ku Gilgal ayi badiata builu boso, bo bavitila banuanisa zimbeni ziawu mu kinzimbukila. 10 Yave wuba vanga muingi bawu batina basi Isaeli, basi Isaeli baba nuanisa, bavonda bawombo mu bawu mu kuba kuka ku mongo Bete-Horom ayi baba vonda mu nzila nate ku Azeka ayi Makedá. 11 Bo baba tina basi Isaeli ayi bo baba kuluka ku mongo Bete-Horom, Yave wunokisa mvula yi mamanya ma gelo, nate ku Azeka ayi bawu bamana kufua. Bukiedika, thalu yi batu bafuila mu mamanya ma gelo, yiluta kena thalu yi batu bafuila mu zimbedi.

12 Mu kilumbu Yave kasadisa basi Isaeli kununga zi amorreu, Yosua wukamba Yave vantuala dikabu:

13 Mu phila ayoyo, thangu yisikama ayi ngonda mvandi yisikama nate basi Isaeli banunga zimbeni ziawu. Bukiedika ti mambu amomo masi ko masonama mu buku yi Jazar? Thangu yisikama va khati diyilu ayi yiviokisa nduka kilumbu kimvimba mukhambu fika diama. 14 Kiawu kilumbu kitheti Yave katambudila nsambu wu mutu mu phila ayoyo yi kukuitukila, kibila Yave waba sadisa basi Isaeli kununga mvita.

15 Bosi Yosua ayi masodi moso, bavutuka ku Gilgal, kibuangu basi Isaeli baba kalanga.

16 Bo mambu amomo maba monika, mintinu beni mitanu batina ayi bayenda kue suamina ku khati dimanya didi ku Makedá. 17 Bosi bakamba Yosua: “Mintinu mitanu beni babe kuesuamina ku khati dimanya didi ku Makedá.” 18 Diawu Yosua katubila: “Vindubulanu mamanya muingi kufuka va khotolo dimanya beni ayi bikanu vana batu muingi baba kengidila. 19 Vayi bankaka mu benu lufueti tatamana kukuka zimbeni zinu ayi lufueti kuba vondila mu nzila. Kalubika batuka mu mavula mawu, kibila Yave Nzambꞌinu wuba veni mu mioko minu.”

20 Yosua ayi masodi ma basi Isaeli, bamana kuvonda nduka batu boso mu bawu, kubotula kuandi bankaka batinina mu mavula batunga buboti. 21 Bosi masodi moso bavutuka bamonyo kuidi Yosua ku Makedá ayi ni mutu kasa tuba ko ni diambu dimbi matedi basi Isaeli. 22 Bosi Yosua wutuba: “Botulanu mamanya madi va khotolo dimanya ayi tualanu mintinu mioso mitanu midi kuna.” 23 Mu phila ayoyo, bawu babasisa mintinu mitanu miba ku khati dimanya: ntinu wu Yelusalemi, ntinu wu Hebrom, ntinu wu Jarmuti, ntinu wu Lakis ayi ntinu wu Eglom. 24 Bo banata mintinu beni kuidi Yosua, nandi wutumisa babakala boso ba Isaeli ayi wukamba zimfumu zi masodi bayenda yandi: “Fikamanu avava ayi diatilanu makosi ma mintinu amimi.” Bosi bawu bafikama ayi badiatila makosi ma mintinu beni. 25 Bosi Yosua wuba kamba: “Bikanu kuba boma ni kukuazuka. Banu kibakala ayi mangolo, kibila amama mawu Yave kankuiza vangila zimbeni zinu zioso bankuiza lunuanisa.”

26 Bosi Yosua wuba vonda ayi wuba ledika mu makunzi ayi babika zinyitu ziawu mu makunzi nate va masika. 27 Bo thangu yidiama, Yosua wutuma muingi babotula zimvumbi beni mu makunzi ayi batula ziawu ku khati dimanya ko mintinu bayenda kue suamina. Bosi bafuka mamanya manneni va khotolo dimanya beni ayi mawu makhidi vana nate bubu.

28 Mu kilumbu beni, Yosua wununga divula di Makedá ayi wuvonda ntinu wu divula ayi baboso baba kuna mu mbedi, kasa bika ko ni wumueka. Nandi wuvangila ntinu wu Makedá momawu mambu kavangila ntinu wu Yeliko.

29 Bosi Yosua wunanguka ku Makedá ayi wuyenda ku Libna va kimueka na masodi ma Isaeli ayi wuye nuanisa batu baba kalanga ku Libna. 30 Yave mvandi wusadisa basi Isaeli kununga ntinu wu divula beni ayi bawu bavonda baboso baba kalanga kuna mukhambu bika ni mutu. Mu phila ayoyo, bavangila ntinu wu divula beni, momawu mambu bavangila ntinu wu Yeliko.

31 Bosi Yosua wunanguka ku Libna ayi wuyenda ku Lakis va kimueka na masodi ma Isaeli ayi wunuanisa batu baba kalanga kuna. 32 Yave wusadisa basi Isaeli kununga basi Lakis ayi kuvua divula beni. Mu kilumbu kimmuadi, bawu bavonda batu boso baba kuna mu mbedi, dedi bo bavondila basi Libna.

33 Horão ntinu wu Gezer, wuyenda muingi kuesadisa ntinu wu Lakis, vayi Yosua wumvonda ayi wuvonda mvandi dikabu diandi dioso.

34 Bosi Yosua wunanguka ku Lakis ayi wuyenda ku Eglom va kimueka na masodi ma Isaeli, muingi kuenuanisa batu baba kalanga kuna. 35 Bawu batulula divula beni ayi banunga diawu mu kilumbu beni. Bavonda baboso baba ku divula beni, dedi bo bavangila divula di Lakis.

36 Bosi Yosua wunanguka ku Eglom ayi wuyenda ku Hebrom, va kimueka na masodi ma Isaeli, muingi kuenuanisa batu baba kalanga kuna. 37 Bawu banunga divula beni ayi bavondila ntinu mu mbedi ayi baboso baba kalanga kuna. Mu phila ayoyo, nandi wuvonda baboso baba ku divula beni, dedi bo kavangila ku divula di Eglom.

38 Bosi Yosua wuyenda ku Debir va kimueka na masodi ma Isaeli, muingi kuenuanisa batu baba kalanga kuna. 39 Nandi wununga divula beni, wuvonda ntinu mu mbedi ayi baboso baba kalanga kuna. Nandi wuvangila divula di Debir ayi ntinuꞌandi momawu mambu kavangila divula di Hebrom ayi divula di Libna ayi mintinu miawu.

40 Yosua wununga ntoto woso widi ku kizunga kidi miongo, Neguebe, Sefelá, ayi miongo mioso. Wununga mvandi mintinu miawu mioso ayi kasa bika ko ni wumueka wumonyo. Nandi wumana kutulula biuma bioso bimvumukanga, dedi bo Yave Nzambi yi Isaeli kankambila. 41 Yosua wununga baboso, kutonina ku Kades-Barneia nate ku Gaza, kubunda mvandi ntoto woso wu Gozen nate ku Gibeão. 42 Yosua wununga mintinu mioso mu khumbu yimueka, kibila Yave Nzambi yi Isaeli, nandi waba nuanina basi Isaeli. 43 Bosi Yosua ayi masodi ma Isaeli bavutuka ku Gilgal, kibuangu basi Isaeli baba kalanga.

11 Bo Jabim ntinu wu Hazor kayuwa mawu, wufila zimvuala kuidi Jobabi ntinu wu Madom, kuidi ntinu wu Sinrom, kuidi ntinu wu Acsafe, 2 mintinu midi ku kizunga kidi miongo ku norte, mintinu minkalanga ku kizunga kidi thandu ku khonzu sul yi Kinereti, mintinu minkalanga ku Sefelá, mintinu minkalanga mu miongo mi Dor ku khonzu oeste, 3 kuidi basi Kanani ku khonzu leste ayi ku khonzu oeste, kuidi zi amorreu, zi hitita, zi perizeu, kuidi zi jebuzeu bankalanga mu bibuangu bidi miongo ayi kuidi zi heveu badi mu ndeku mongo wu Hermom ku ntoto wu Mispá. 4 Diawu mintinu mioso amiomio va kimueka na masodi mawu banangukina. Bawu baba bawombo buka nsengisini wu ḿbu, na mimvalu miwombo ayi makalu ma mimvita. 5 Mintinu mioso amiomio babaka makani ma kukutakana ayi ba yevundila va divula di Merom vaba zitho zi nlangu, muingi kunuanisa basi Isaeli.

6 Bosi Yave wukamba Yosua: “Bika kuba mona boma kibila yono vameni mu kilokula akiki, yala ku lusadisa muingi luba nunga. Lufueti zenga bikodi bi mimvalu miawu ayi kuvika makalu mawu ma mimvita.” 7 Yosua na masodi ma Isaeli baba nuanisa mu kinzimbukulu va ndeku divula di Merom vaba zitho zi nlangu. 8 Yave wusadisa basi Isaeli baba nunga ayi basi Isaeli baba landakana nate ku Sidon divula dinneni, ku Misrefoti-Maim ayi ku Ḿbuinga wu Mispa ku khonzu leste, bosi basi Isaeli bamana kuvonda baboso. 9 Yosua wuvangila buna buawu Yave kankambila: wuzenga bikodi bi mimvalu miawu ayi wuvika makalu mawu.

10 Bosi Yosua wuvutuka ayi wununga divula di Hazor ayi wuvonda ntinuꞌawu mu mbedi, kibila mu thangu beni, divula di Hazor diawu divula diluta ba nkinza mu mintinu mioso amiomio. 11 Bawu bavonda batu boso baba kuna ayi batulula divula beni. Vasa sobila ko ni kiuma kimonyo, bosi bavika divula di Hazor. 12 Yosua wutulula mavula amomo, kubunda mvandi mintinu miawu. Nandi wuba tulula dedi bo Mose kisadi ki Yave kankambila. 13 Vayi basi Isaeli basa vika ko ni divula diba va mbata mongo, kubotula kuandi to divula di Hazor dio Yosua kavika. 14 Basi Isaeli babonga biuma bioso biluvalu biba mu mavula beni kubunda mvandi bibulu, vayi bavonda mu mbedi batu boso. Ayi basa bika ko ni wumueka kavuka. 15 Dedi bo Yave kakambila Mose kisadi kiandi, buawu mvandi Mose kakambila Yosua ayi mawu Yosua kavanga. Nandi wulandakana mambu moso Yave kakamba Mose.

16 Yosua wununga ntoto woso, kizunga kidi miongo, divula dioso di Neguebe, Gozen, Sefelá, Arabá ayi bizunga bioso bidi miongo bi Isaeli ayi Sefelá yandi yoso, 17 kutonina ku mongo wu Halaki widi ku khonzu Seir nate ku Baal-Gadi, mu Ḿbuinga wu Libanu nate va ndeku mongo wu Hermom. Nandi wubuila mintinu mioso ayi wuba vonda. 18 Yosua wunuanisa mintinu amiomio mu thangu yiwombo. 19 Vasa ba ko ni divula divanga luwawanu lu ndembama na basi Isaeli, kubotula to zi heveu baba kalanga ku divula di Gibeão. Basi Isaeli banunga mavula moso mankaka mu mvita. 20 Yave wubika muingi mintinu amiomio bamonisa ntu ngolo ayi babaka makani ma kunuanisa basi Isaeli, muingi kaba tulula mukhambu bamona kiadi. Kibila vaba tombulu kutulula baboso dedi bo Yave kakambila Mose.

21 Mu thangu beni, Yosua wutulula zi Anakins baba kalanga mu bibuangu bidi miongo ku Hebrom, ku Debir ayi ku Anabi, kubunda mvandi bo baba kalanga ku kizunga kidi miongo ki Yuda ayi ku kizunga kioso kidi miongo ku Isaeli. Yosua wuvonda baboso ayi wutulula mavula mawu. 22 Ku Isaeli kusa sobila ko ni wumueka mu zi anakins. Ku Gaza, ku Gati ayi ku Asdode kuawu to kusobila zi anakins. 23 Mu phila ayoyo, Yosua wununga kuvua ntoto woso dedi bo Yave kakanikisila Mose. Bosi Yosua wuvana wawu kuidi basi Isaeli muingi wuba kiuka kiawu ayi bawu bakabula wawu mu kutadila kitini kadika mvila kafueti tambula. Bosi mimvita miyiza mana mu ntoto woso.

12 Amimi miawu mintinu basi Isaeli banunga, miaba kalanga mu bibuangu bidi ku khonzu leste yi muila wu Yolidani, kutonina ku ḿbuinga wu Arnon nate ku Mongo wu Hermo ayi ku khonzu yoso yi leste yi Arabá: 2 Siom ntinu wu zi amorreu, waba kalanga ku Hesbom ayi waba yadila kutona ku Aroer kizunga kidi va ndeku ḿbuinga wu Arnom, kutonina vana khati ḿbuinga ayi ndambu yi kizunga ki Ngileadi, nate mu ḿbuinga wu Jaboki vadi ndilu na ntoto wu zi amorreu. 3 Nandi mvandi waba yadilanga kizunga ki Arabá nate ku khonzu leste wu ḿbu wu Kinereti kubunda mvandi khonzu leste yi ḿbu wu Arabá, Mar Salgado ku khonzu Bete-Jesimoti ayi ku sul vawanda mongo wu Pisga.

4 Basi Isaeli mvandi bavua kizunga ki Ogue ntinu wu Bazan, wumueka mu zi Refaim waba kalanga ku Astaroti ayi ku Edrei 5 ayi waba yadila kizunga ki Mongo wu Hermom ku Salká ayi kizunga kioso ki Bazan nate ku zindilu zi Gezurita ayi ki zi makatita, kubunda mvandi mua ndambu kizunga ki Ngileadi nate kizunga ki Siom ntinu wu Hesbom.

6 Mose kisadi ki Yave va kimueka na masodi ma Isaeli baba nunga. Bosi Mose kisadi ki Yave wuvana ntotoꞌawu kuidi mvila wu Rubem, wu Gadi ayi ndambu mvila wu Manase.

7 Amimi miawu mintinu miaba kalanga ku ntoto Yosua ayi masodi ma Isaeli banunga ku khonzu oeste yi muila wu Yolidani, kutonina ku Baal-Gadi ḿbuinga wu Libanu nate ku Mongo Halaki wunkuenda ku khonzu Seir. Bawu baba yadilanga bibuangu bio Yosua kavana kuidi mimvila mi Isaeli muingi biba kiuka kiawu, 8 kizunga kidi miongo ku Sefelá, ku Arabá, mu miongo, ku thandu ayi ku Neguebe—ntoto wu zi hitita, wu zi amorreu, wu basi Kanani, wu zi perizeu, wu zi heveu ayi wu zi jebuzeu:

13 Buviokila thangu Yosua wuyisa ba kiboba. Bosi Yave wunkamba: “Ngie weka kiboba, kheti bobo vakhidi khambu kizunga ki ntoto kio fueti nunga. 2 Awuwu wawu ntoto wukhidi khambu: bizunga bioso bi zifilisteu ayi bi zi gesurita, 3 (kutonina ku kizunga kidi ku Nilu ku khonzu leste yi Ngipiti, nate mu zindilu zi Ekrom ku khonzu norte ku kizunga baba tadilanga ti kidi ki basi Kanani), kubunda mvandi kizunga ki mintinu mitanu mi zifilisteu: ntinu wu Gaza, ntinu wu Asdode, ntinu wu Askalom, ntinu wu Gati ayi ntinu wu Ekrom, kubunda mvandi kizunga ki zi avins, 4 kidi ku khonzu sul, ntoto woso wu basi Kanani. Meara kizunga ki zi sidonio nate mu ndilu yi kizunga ki zi amorreu, 5 ntoto wu zi gebalita ayi khonzu yoso yi leste yi Libanu, kutonina ku Baal-Gade nate ku khonzu mongo wu Hermom ayi Lebo-Hamati, 6 batu boso bankalanga ku kizunga kidi miongo, kutonina ku Libanu nate ku Misrefoti-Maim, na zi sidonio zioso. Minu yinkuiza batulula vantuala basi Isaeli. Ngiewu wunkuiza kabula ntotoꞌawu kuidi basi Isaeli muingi wuba kiuka kiawu dedi bo yi kukambila. 7 Ngie fueti kabula ntoto awowo kuidi 9 di mimvila minkaka ayi kuidi ndambu mvila wu Manase muingi wuba kiuka kiawu.”

8 Mua ndambu yinkaka yi mvila wu Manase kubunda mvandi mvila wu Rubem ayi wu Gadi, batambula ntotoꞌawu wo Mose kisadi ki Yave kaba vana ku khonzu leste yi muila wu Yolidani. 9 kutonina ku Aroer kizunga kidi ku khonzu ḿbuinga wu Arnom ayi divula didi va khati ḿbuinga, kubunda mvandi kizunga kioso kidi miongo ku Medeba nate ku Dibom, 10 mavula moso ma Siom ntinu wu zi amorreu waba yadilanga ku Hesbom nate mu ndilu yi zi amonita, 11 kubunda mvandi Ngileadi ayi kizunga ki zi gesurita ayi ki zi maakatita, mongo woso wu Hermom, kizunga kioso ki Bazan nate ku Salká, 12 mawu mansundula kizunga kioso ki Ogue ku Bazan waba yadila ku Astaroti ayi ku Edrei. (Nandi widi wumueka mu zi refains.) Mose wuba nunga ayi wuba kukisa. 13 Vayi basi Isaeli basa kukisa ko zi gesurita ayi zi maakatita, diawu zi gesurita ayi zi maakatita banzingilanga va khatiꞌawu nate bubu.

14 Nandi kasa vana ko zi levita kiuka ki ntoto, kibila minkhailu miviku bamvananga kuidi Yave Nzambi yi Isaeli, miawu kiuka kiawu dedi bo nandi kaba kanikisila.

15 Bosi Mose wuvana mvila wu Rubem kiuka kiawu mu kutadila makanda mawu, 16 ayi kizunga kiawu kiaba toninanga ku Aroer, kibuangu kidi va ndeku ḿbuinga wu Arnom kutonina ku divula didi va khati ḿbuinga beni, nate kibuangu kidi miongo ku Medeba. 17 Hesbom ayi kizunga kioso kidi miongo, Dibom, Bamoti-Baal, Bete-Baal-Meom, 18 Jaaz, Kedemoti, Mefaati, 19 Kiriataim, Sibma, Zereti-Sar mu miongo midi ku ḿbuinga, 20 Bete-Peor, miongo mi Pisga, Bete-Jesimoti, 21 mavula moso madi mu miongo ayi kizunga kioso ki Siom ntinu wu zi amorreu waba yadilanga ku Hesbom. Mose wunnunga ayi wununga mvandi zimfumu zioso zi Midian, zi Evi, zi Rekem, zi Zur, zi Hur ayi zi Rebi— kubunda mvandi mintinu mioso miba mu thuadusulu yi Siom baba kalanga ku ntoto beni. 22 Mu batu boso basi Isaeli bavonda, muba mvandi Balaão muana Beor no waba tesanga. 23 Ndilu yi kizunga ki Rubem yiba mu muila wu Yolidani. Kizunga kioso ki Yolidani kubunda mvandi mavula ayi mala maba muawu, kiawu kiuka bavana mvila wu Rubem mu kutadila makanda mawu.

24 Mose wuvana mvandi mvila wu Gadi kiuka kiawu mu kutadila makanda mawu. 25 Kizunga kiawu kiaba toninanga ku Jazer, mavula moso ku Ngileadi ayi ndambu ntoto wu zi amorreu nate ku Aroer kibuangu kidi va ndeku Rabá, 26 ayi kiaba tonina ku Hesbom nate ku Ramati-Mispa ayi Betonim, mvandi kutonina ku Maanaim nate mu ndilu yi Debir, 27 mu ḿbuinga, kutonina ku Bete-Harã, Bete-Ninra, Sukoti, Zafom ayi kizunga kioso ki Siom ntinu wu Hesbom kubunda mvandi kizunga ki Yolidani ayi ndilu yaba tonina ku khonzu sul ku ḿbu wu Kinereti ku khonzu leste yi muila wu Yolidani. 28 Akiokio kiawu kiuka makanda madi mu mvila wu Gadi batambula, kubunda mvandi mavula ayi mala mawu.

29 Mose mvandi wuvana ndambu mvila wu Manase kiuka kiawu mu kutadila makanda mawu. 30 Ayi kizunga kiawu kiaba toninanga ku Maanaim kubunda mvandi Bazan kizunga ki ntinu Ogue ayi mala moso batungila mu zitenda madi ku Jair kizunga ki Bazan, 60 di mavula. 31 Ayi mua ndambu mu kizunga ki Ngileadi, Astaroti ayi Edrei, mavula ma Ogue ntinu Bazan bavana mawu kuidi ndambu bana ba Makir muana Manase, mu kutadila makanda mawu.

32 Akiokio kiawu kiuka Mose kaba vana ku thandu yi Moabi, ku khonzu yinkaka yi muila wu Yolidani, ku khonzu leste yi Yeliko.

33 Vayi Mose kasa vana ko ni kiuka ki ntoto kuidi zi levita, kibila Yave Nzambi yi Isaeli nandi kiuka kiawu, dedi bo naveka kaba kanikisila.

14 Akiokio kiawu kiuka basi Isaeli batambula ku ntoto wu Kanani, Eliazar nganga nzambi, Yosua muana wu Num ayi zimfunu zi makanda ma mimvila mi Isaeli, bawu bakabula kiuka beni. 2 Kiuka bavana kuidi 9 di mimvila ayi ndambu, baba vanina kiawu mu kuta kisavu, dedi bo Yave katumina Mose. 3 Mose wuvana kuidi mimvila miodi minkaka ayi ndambu mvila wu Manase, kiuka ku khonzu yinkaka yi muila wu Yolidani, vayi kasa vana ko zi levita kiuka. 4 Bana ba Yozefi bayiza ba mimvila miodi, Manase ayi Efraim. Zi levita basa tambula ko ni kiuka ki ntoto, vayi batambula mua mavula muidi bibuangu bi kudikilanga bibulu, muingi bawu ayi bibulu biawu bakalanga. 5 Mu phila ayoyo, basi Isaeli bakabula ntoto dedi bo Yave katumina mu nzila Mose.

6 Bosi bo baba ku Gilgal, mua ndambu di babakala mu mvila wu Yuda bafikama vaba Yosua ayi Kalebi muana Jefune kenizeu, wukamba Yosua: “Ngie zebi mambu Yave kakamba Mose kisadi ki Nzambi yi kiedika ku Kades-Barneia, matedi minu ayi ngiewu. 7 Minu yiba 40 di mimvu bo Mose kisadi ki Yave kathuma ku Kades-Barneia muingi kue fiongunina ntoto ayi bo yivutuka, minu yituala kipholo ki kiedika ayi ki lufiatu. 8 Kheti zikhomba ziama bayenda yama banyongisa dikabu mu kipholo batuala, vayi minu yitatamana kutumukina Yave Nzambiꞌama mu ntima woso. 9 Mu kilumbu beni, Mose wuleva phesi mu kutuba: ‘Ntoto wo ngie bekue fiongunina, wunkuiza ba kiuka kiaku ayi ki bana baku mu zithangu zioso, kibila ngiewu betumukina Yave Nzambiꞌaku mu ntima woso.’ 10 Kibila dedi bo nandi katubila, Yave wukhieba mu 45 di mimvu mioso, kutona thangu Yave kakanikisa mambu amomo kuidi Mose, bo basi Isaeli baba kalanga ku thandu. Vayi bubu minu yeka 85 di mimvu. 11 Ayi bubu yikhidi momawu mangolo yiba mu thangu Mose kathuma. Yikhidi momawu mangolo yiba mu thangu beni, kuba kuandi ma kunuana mvita ayi ma kuvanga bisalu binkaka. 12 Diawu, phana kizunga akiokio kidi miongo kio Yave kakhanikisa mu kilumbu beni. Kheti ngie wuzaba ti zi Anakins bawu baba kalanga kuna ayi kuba mavula matungu buboti, vayi Yave wunkuiza tsadisa muingi kuba nunga, dedi bo Yave kakanikisila.”

13 Bosi Yosua wusakumuna Kalebi muana Jefune, ayi wumvana divula di Hebrom, muingi diba kiuka kiandi. 14 Diawu kizunga ki Hebrom kididi ki Kalebi muana Jefune kenizeu nate bubu, kibila nandi wutumukina Yave Nzambi yi Isaeli mu ntima woso. 15 Divula di Hebrom baba ku ditedilanga Kiriati-arba (Arba nandi wuluta ba wuzangama mu zi Anakins zioso). Bosi mimvita miyiza mana ku ntoto.

15 Ntoto bavana makanda ma mvila wu Yuda, waba toninanga ku kizunga ki Edom kubunda mvandi thandu yi Zim ayi khonzu sul yi Neguebe. 2 Ndiluꞌawu ku khonzu sul yaba toninanga ku Mar Salgado, ku disimu di ḿbu didi ku khonzu sul. 3 Mvandi yaba kuenda ku khonzu sul, nate ku mongo wu Akrabim, yimviokila ku thandu yi Zim ayi yintombuka nate ku khonzu sul yi Kades-Barneia. Mvandi yimviokila ku Eziloni ayi yinkuenda nate ku Adar ayi yinkuenda mvandi nate ku khonzu Karka. 4 Ndilu kizunga beni yaba viokila mvandi ku Azmom ayi yaba vitila ku ḿbuinga widi ku Ngipiti ayi ndilu yi kizunga beni yaba sukila ku Ḿbu wu Mediteraneo. Aziozio ziawu ziba zindilu ku khonzu sul.

5 Ku khonzu leste, ndilu yaba tonina ku Mar Salgado nate kusukila muila wu Yolidani ayi ku khonzu norte, ndilu yaba tonina ku disimu di ḿbu kizunga kusukila muila wu Yolidani. 6 Zindilu zi kizunga beni, ziaba kuenda nate ku Bete-Hogla ayi ziviokila ku khonzu norte yi Bete-Arabá, mvandi zivitila nate kuidi dimanya di Boã muana wu Rubem. 7 Zindilu beni ziyenda nate ku Debir ku ḿbuinga wu Akor ayi ziviokila ku khonzu norte ku kizunga ki Gilgal kidi va khonzu Adumim ku khonzu sul yi ḿbuinga ayi zindulu beni mvandi ziviokila mu zitho zi nlangu zidi ku En-Semes ayi zisukila ku En-Rogel. 8 Zindilu beni ziyenda nate ku ḿbuinga wu muana wu Hinom ayi zivitila mvandi ku khonzu sul yi Jebuzi, voti Yelusalemi. Mvandi ziviokila va mbata mongo widi ku khonzu oeste va khonzu ḿbuinga wu Hinom ayi ku khonzu norte yi ḿbuinga wu Refaim. 9 Ayi zindilu beni ziaba tonina va mbata mongo nate mu zitho zi nlangu zidi ku Neftoa ayi ziaba vitila nate mu mavula madi ku mongo wu Efrom. Zindilu beni mvandi zivitila ku Baalá voti Kiriati-jearim. 10 Kutonina ku Baalá, zindilu beni ziaba kuenda nate ku mongo Seir ku khonzu oeste ayi ziaba viokila mvandi ku khonzu norte ku mongo wu Jearim voti Kesalom ayi ziviokila ku Bete-Seme ayi ku Timina. 11 Ayi zindilu beni ziviokila ku khonzu norte yi Ekrom ayi ziyenda mvandi nate ku Sikerom, ziviokila mvandi ku mongo wu Baalá ayi zitatamana nate ku Jabneli ayi zisukila ku ḿbu.

12 Ayi ku khonzu oeste, lukueku lu Ḿbu Wunneni wu Mediteraneo muawu muba ndilu. Aziozio ziawu zindilu zi kizunga bavana makanda madi mu mvila wu Yuda.

13 Ayi Yosua wuvana Kalebi muana wu Jefune, kiuka va kimueka na mvila wu Yuda, mu kutadila mambu Yave kakamba Yosua. Nandi wumvana Kiriati-arba voti Hebrom (Arba nandi wuba tata yi Anaki). 14 Kalebi wukukisa bana batatu ababa ba Anaki: Sezai, Aiman ayi Talmai. 15 Bosi nandi wunanguka va kizunga beni ayi wuyenuanisa basi Debir. (Ku mbusa baba tedilanga Debir, Kiriati-sefer.) 16 Ayi Kalebi wutuba: “Woso mutu wala nunga ayi kuvua Kiriati-sefer, minu yala kumvana muanꞌama Acsa muingi kaba nkaziꞌandi.” 17 Otnieli muana wu Kenaz khomba Kalebi, wununga divula beni. Bosi Kalebi wumvana muanꞌandi Acsa muingi kaba nkaziꞌandi. 18 Bo Acsa kaba kuenda ku nzo, nandi waba tatamana kukamba nnuniꞌandi Otnieli muingi kadinda tatꞌandi Kalebi kitini ki nsitu. Bosi Acsa wukuluka mu phunda kaba ayi Kalebi wunyuvula: “Mbi wuntomba?” 19 Acsa wumvutudila: “Lemvuka tsakumuna, kibila ngie wupheni kitini ki ntoto ku khonzu sul. Buabu, yintomba wuphana mvandi Guloti-Maim.” Mu phila ayoyo, Kalebi wumvana Guloti yi mongo ayi Guloti yi wanda.

20 Akiki kiawu kiuka makanda madi mu mvila wu Yuda batambula.

21 Amama mawu mavula mvila wu Yuda batambula ku khonzu sul ku ndeku kizunga ki Edom: Kabzeli, Éder, Jagur, 22 Kiná, Dimona, Adada, 23 Kedes, Hazor, Itnan, 24 Zife, Telém, Bealoti, 25 Hazor-Hadata, Kerioti-Esrom voti Hazor, 26 Amão, Sema, Moladá, 27 Hazar-Gada, Hesmom, Bete-Peleti, 28 Hazar-Sual, Berseba, Biziotiá, 29 Baalá, Iim, Ezem, 30 Eltoladi, Kezil, Hormá, 31 Ziklague, Madmana, Sansana, 32 Lebaoti, Silim, Aim ayi Rimom—29 di mavula na mala mawu.

33 Amama mawu mavula maba ku kizunga ki Sefelá: Estaoli, Zorá, Asná, 34 Zanoa, En-Ganim, Tapua, Enã, 35 Jarmuti, Adulão, Azeka, 36 Saraim, Aditaim, Gedera, Gederotaim—14 di mavula na mala mawu.

37 Zenã, Hadaza, Migdal-Gadi, 38 Dileã, Mispa, Jokteeli, 39 Lakis, Boskati, Eglom, 40 Kabom, Lamás, Kitlis, 41 Gederoti, Bete-Dagom, Naamá ayi Makedá—16 di mavula na mala mawu.

42 Libna, Eter, Azã, 43 Iftá, Asná, Nezibi, 44 Keila, Aczibi ayi Mareza—9 di mavula ayi mala mawu.

45 Ekrom, mavula mandi ayi mala mandi moso. 46 Mavula moso ayi mala madi ku ndeku Asdode kutonina ku Ekrom nate ku khonzu oeste.

47 Asdode, mavula mandi moso ayi mala, Gaza mavula mandi moso ayi mala, kubunda mvandi ḿbuinga wu Ngipiti, Ḿbu wu Mediteraneo ayi kizunga kioso kiba kifikama.

48 Amama mawu mavula maba ku kizunga kidi miongo: Samir, Jatir, Soko, 49 Daná, Kiriati-sana voti Debir, 50 Anabi, Estemo, Aném, 51 Gozen, Holom, Gilo—11 di mavula na mala mawu.

52 Arabia, Dumá, Esã, 53 Janim, Bete-Tapua, Afeka, 54 Hunta, Kiriati-arba voti Hebrom ayi Zior—9 di mavula ayi mala mawu.

55 Maum, Karmelu, Zife, Jutá, 56 Jezreeli, Jokdeam, Zanoa, 57 Kain, Gibeá ayi Timina—10 di mavula na mala mawu.

58 Halul, Bete-Zur, Gedor, 59 Maarati, Bete-Anoti ayi Eltekom—6 di mavula na mala mawu.

60 Kiriati-baal voti Kiriati-jearim ayi Rabá—mavula 2 na mala mawu.

61 Amama mawu mavula maba ku thandu: Bete-Arabá, Midim, Sekaká, 62 Nibsan divula di tsalu ayi En-Gedi—6 di mavula na mala mawu.

63 Vayi basi Yuda basa nunga ko kukukisa zi Jebuzeu baba kalanga ku Yelusalemi, ayi bawu bantatamananga kuzinga va kimueka na mvila wu Yuda ku Yelusalemi nate bubu.

16 Ayi kiuka ki ntoto bana ba Yozefi batambula, kiaba toninanga ku muila wu Yolidani va ndeku Yeliko nate mu zitho zi nlangu zidi ku khonzu leste yi Yeliko. Mvandi kiaba kuendanga nate ku thandu yimviokila ku Yeliko ayi kizunga kioso kidi miongo ki Beteli. 2 Ayi kizunga beni mvandi kiaba toninanga ku Beteli, kizunga kidi ku divula di Luz ayi kivitila nate mu zindilu zi kizunga ki zi arkita ku Ataroti. 3 Ayi kizunga beni kivitila ku khonzu oeste mu zindilu zi kizunga ki zi jafletita ayi kivitila mvandi ku Bete-Horom yi wanda, ku Gezer ayi kisukila ku ḿbu.

4 Mu phila ayoyo, Manase ayi Efraim bana ba Yozefi bavua kiuka kiawu. 5 Azizi ziawu zindilu zi kizunga makanda badi mu mvila wu Efraim batambula: ku khonzu leste kizunga kiaba toninanga ku Ataroti-Adar nate Bete-Horom yi mongo. 6 Zindilu beni mvandi ziviokila ku ḿbu. Kizunga ki Mikmetati kiba ku khonzu norte ayi zindilu ziaba toninanga ku leste nate ku Taanate-Silo ayi ziviokila mvandi ku khonzu leste nate ku Janoa. 7 Ayi kutonina ku Janoa zindilu beni zivitila ku Ataroti ayi Naará, zivitila mvandi ku Yeliko nate ku Yolidani. 8 Kutonina ku Tapua, zindilu beni ziyenda ku khonzu oeste nate ku ḿbuinga wu Kanani ayi zisukila mu ḿbu. Akiokio kiawu kiuka ki ntoto makanda madi mu mvila wu Efraim batambula. 9 Mvila wu Efraim mvandi batambula mavula ayi mala madi mu ntoto wu mvila wu Manase.

10 Vayi mvila wu Efraim basa kukisa ko basi Kanani baba kalanga ku Gezer, ayi basi Kanani beni bantatamananga kuzinga va khati mvila wu Efraim nate bubu ayi bamvanganga bisalu bingolo.

17 Bosi mvila wu Manase wutambula kitini ki ntoto, kibila Manase nandi wuba muana wunkulutu wu Yozefi. Mu kumona ti Makir muana wutheti wu Manase tata yi Ngileadi wuba nkua mimvita, diawu katambudila kizunga ki Ngileadi ayi Bazan. 2 Bana bankaka ba Manase, bawu batambula kitini kinkaka ki kiuka mu kutadila makanda mawu. Bawu baba: bana ba Abiezer, bana ba Heleki, bana ba Asriel, bana ba Sikem, bana ba Héfer ayi bana ba Semida. Amomo mawu makanda maba mu mvila wu Manase muana Yozefi. 3 Vayi Zelofeade muana Hefer, Hefer muana Ngileadi, Ngileadi muana Makir, Makir muana Manase, kasa buta ko bana ba babakala vayi bakietu to ayi mazina mawu maba: Maala, Nowa, Hogla, Milka ayi Tirza. 4 Bawu bayenda kuidi Eliazali nganga nzambi, Yosua muana Num ayi bakulutu ba dikabu ayi baba kamba: “Yave wukamba Mose muingi katuvana kiuka ki tatꞌitu va khati zikhomba zitu.” Mu phila ayoyo, mu lutumu lu Yave Yosua wuba vana kiuka ki tatꞌawu va kimueka na zikhomba zi tatꞌawu.

5 Mvila wu Manase batambula mvandi kumi di bibuangu kubotula kuandi ntoto wu Ngileadi ayi wu Bazan widi ku khonzu yinkaka wu muila wu Yolidani. 6 Bana ba Manase ba bakietu batambula kiuka va kimueka na zikhomba ziawu zi babakala ayi ntoto wu Ngileadi wuyiza ba kiuka ki makanda mankaka madi mu mvila wu Manase.

7 Zindilu zi kizunga mvila wu Manase batambula, zitonina ku Azer nate ku Mikmetati yidi ku ndeku Sikem, zindilu beni mvandi ziyenda ku khonzu sul nate ku ntoto waba kalanga basi En-Tapua. 8 Mvila wu Manase bayiza vua kizunga ki Tapua, vayi divula di Tapua mo muviokila zindulu zi kizunga ki Manase, diyiza ba divula di mvila wu Efraim. 9 Zindilu beni ziaba kuenda nate ku khonzu sul ku ḿbuinga wu Kanani. Mu kizunga ki mvila wu Manase, muba mvandi mavula ma mvila wu Efraim. Ayi zindilu zi kizunga ki Manase ziaba toninanga ku khonzu ḿbuinga ayi ziaba sukilanga ku ḿbu. 10 Kizunga kiba ku khonzu sul kiba ki mvila wu Efraim ayi kizunga kiba ku khonzu norte kiba ki mvila wu Manase ayi ḿbu, wawu wuba ndiluꞌawu. Kizunga ki mvila wu Manase kiaba vitilanga ku khonzu norte yi kizunga ki mvila wu Azer ayi ku khonzu leste yi kizunga ki mvila wu Isakali.

11 Mavula amama ayi mala madi ku kizunga ki mvila wu Isakali ayi Azer, mayiza ba ma mvila wu Manase: Bete-Seã, Ibleam, Dor, En-Dor, Taanaki ayi Megido. Mavula matatu mu mawu maba mu kizunga kidi miongo.

12 Vayi mvila wu Manase basa nunga ko kukukisa batu baba kalanga mu mavula amomo. Diawu basi Kanani bantatamananga kuzingila mu kizunga beni. 13 Bo basi Isaeli bayiza ba mangolo, bawu bakuika basi Kanani bavanganga bisalu bingolo, vayi basa kukisa ko basi Kanani boso.

14 Bana ba Yozefi bakamba Yosua: “Befu tueka bawombo, kibila Yave wu tuveni lusakumunu luwombu. Buabu, kibila mbi wutuvanini kibuangu kiluelu muingi kiba kiuka kitu?” 15 Yosua wuba vutudila: “Boti benu lueka bawombo ayi kibuangu kidi miongo ki mvila wu Efraim kieka kiluelu muingi benu luzingila, buna yendanu lue vua ntoto wu zi perizeu ayi wu zi Refaim widi ku nsitu ayi diodisanu wawu. 16 Bana ba Yozefi bankamba: “Kibuangu kidi miongo kidi beni kiluelu muingi befu boso tuzingila, mvandi basi Kanani boso bankalanga ku kizunga kidi ḿbuinga ayi bankalanga mvandi ku kizunga ki Bete-Seã na mala mawu moso, kubunda mvandi bankalanga ku kibuangu kidi ḿbuinga ku Jezreeli, badi makalu ma mimvita bakuika bisengu. 17 Diawu Yosua kakambila mvila wu Efraim ayi wu Manase bana ba Yozefi: “Benu lualasa tambula ko kibuangu kiluelu, kibila luidi bawombo ayi luidi beni mangolo. 18 Benu lunkuiza nunga kukukisa basi Kanani, kheti bawu badi mangolo ayi badi makalu ma mimvita bakuika bisengu. Kizunga kidi miongo kinkuiza ba kinu, kheti kiawu kidi nsitu, vayi benu luala diodisa nsitu beni ayi ku kibuangu beni kuawu kuala sukila zindilu zi kizunga kinu.”

18 Bo basi Isaeli banunga ntoto woso wu Kanani, bawu bakutakana ku Silo ayi batunga kuna tenda yi lukutukunu. 2 Vayi vaba khambu sambuadi di mimvila mi Isaeli kutambula kiuka ki ntoto. 3 Diawu Yosua kaba kambila: “Thangu mbi benu luala vua ntoto wo Yave Nzambi yi zikhaya zinu kaluvana? 4 Solanu babakala batatu mu kadika mvila, ayi minu yinkuiza bafila. Bawu bafueti zungidila ntoto beni muingi kufiongunina kiuka kadika mvila kankuiza tambula. Bosi bawu bafueti vutuka kuidi minu. 5 Bawu bafueti kabula ntoto beni mu sambuadi di bitini. Mvila wu Yuda wufueti tatamana ku kizunga kiandi, ku khonzu sul ayi bana ba Yozefi bafueti tatamana ku kizunga kiawu, ku khonzu norte. 6 Lufueti fiongunina ntoto beni ayi lufueti kabula wawu mu sambuadi di bitini, bosi lufueti tuala kipholo kuidi minu ayi minu yinkuiza ta kisavu muingi kuzaba mayindu ma Yave Nzambꞌitu. 7 Vayi mvila wu Levi balasa tambula ko kiuka ki ntoto, dedi bo benu lunkuiza tambudila, kibila kisalu ki zinganga nzambi, Yave kaba vana, kiawu kiuka kiawu. Mvila wu Gadi, wu Rubem ayi ndambu mvila wu Manase, batambula kiuka kiawu ku khonzu leste yi muila wu Yolidani, kio Mose kisadi ki Yave ka bavana.”

8 Batu beni bakubama muingi benda. Ayi Yosua wukamba batu beni babe kuenda kue fiongunina ntoto: “Yendanu ayi fionguninanu bizunga bidi mu ntoto beni, bosi tualanu kipholo kuidi minu ayi minu yinkuiza ta kisavu akuku ku Silo, muingi kuzaba mayindu ma Yave.” 9 Bosi babakala beni bayenda, badiengila ntoto ayi bafiongunina wawu. Bawu bakabula ntoto beni mu sambuadi di bitini, mu kutadila mavula madi kuna ayi basonika mambu beni mu buku. Bosi bavutuka kuidi Yosua, ku kibuangu basi Isaeli baba kalanga ku Silo. 10 Yosua wuta kisavu ku Silo, muingi kuzaba mayindu ma Yave. Bosi Yosua wukabula ntoto beni kuidi basi Isaeli, mu kutadila kiuka ki kadika mvila.

11 Bosi makanda madi mu mvila wu Benyamini, batambula kizunga kidi kifikama na kizunga ki mvila wu Yuda, ayi ki bana ba Yozefi. 12 Ku khonzu norte, ndilu yaba toninanga ku muila wu Yolidani ayi yaba kuenda nate ku khonzu norte yi Yeliko, mvandi yaba tombuka mongo widi ku oeste ayi yaba kuenda nate ku thandu yi Bete-Áven. 13 Ndilu beni yaba tatamana nate ku Luz, ku khonzu sul yi Luz, voti ku Beteli. Ndilu beni mvandi yaba nengubuka nate ku Ataroti-Adar, ku mongo widi ku khonzu sul yi Bete-Horom yi Wanda. 14 Ndilu beni yaba kuenda ku khonzu oeste ayi ku khonzu sul, kutonina ku mongo widi va khonzu Bete-Horom ku khonzu sul, ayi yisukila ku Kiriati-baal voti Kiriati-jearim, divula di mvila wu Yuda. Ayoyo yawu yiba ndilu ku khonzu oeste.

15 Ku khonzu sul, ndilu yaba toninanga ku Kiriati-jearim ayi yaba kuenda ku khonzu oeste ayi yaba vitila ku zitho zi nlangu zidi ku Neftoa. 16 Ndilu beni yaba kuenda nate ku kizunga kidi miongo kidi va ndeku ḿbuinga wu muana wu Hinom, ku khonzu norte yi ḿbuinga wu Refaim ayi yikuluka nate ku ḿbuinga wu Hinom, ku khonzu sul yi zi Jebuzeu ayi yivitila ku En-Rogel. 17 Ndilu beni mvandi yiyenda ku khonzu norte, ayi yivitila nate ku En-Semes, mvandi yivitila ku Geliloti, kizunga kidi va ndeku mongo wu Adumim. Ayi yiyenda nate va dimanya di Boã, muana wu Rubem. 18 Ndilu beni yitatamana kukuenda ku khonzu norte, va kibuangu kidi va ndeku Arabá ayi yikuluka nate ku Arabá. 19 Ayi ndilu beni yitatamana nate ku khonzu norte yi Bete-Hogla, ayi yisukila ku khonzu norte yi Mar salgado, ku ndeku khonzu sul yi Yolidani. Ayoyo yawu ndilu yiba ku khonzu sul. 20 Ku khonzu leste, muila wu Yolidani wawu wuba ndilu. Aziozio ziawu zindilu zi ntoto makanda ma mvila wu Benyamini batambula.

21 Amama mawu mavula makanda madi mu mvila wu Benyamini batambula: Yeliko, Bete-Hogla, Emeke-Keziz, 22 Bete-Arabá, Zemaraim, Beteli, 23 Avin, Pará, Ofra, 24 Kefar-Amonai, Ofni ayi Geba. 12 di mavula na mala mawu.

25 Gibeão, Ramá, Beeroti, 26 Mispa, Kefira, Moza, 27 Rekem, Irpeel, Tarala, 28 Zela, Ha-Elefi, Jebuzi voti Yelusalemi, Gibeá ayi Kiriati. 14 di mavula ayi mala mawu.

Akiokio kiawu kiuka makanda madi mu mvila wu Benyamini batambula.

19 Bosi mvila wu Simioni, wawu mvila wummuadi wutambula kiuka mu kutadila makanda mawu. Kiuka kiawu kiba mukhati kiuka mvila wu Yuda batambula. 2 Amama mawu mavula maba mu khati kiuka mvila wu Simioni batambula: Berseba, Seba, Moladá, 3 Hazar-Sual, Balá, Ezem, 4 Eltoladi, Betuli, Hormá, 5 Ziklague, Bete-Markaboti, Hazar-Suza, 6 Bete-Lebaoti ayi Saruem—13 di mavula ayi mala mawu. 7 Aim, Rimom, Eter ayi Azã—mavula 4 ayi mala mawu 8 ayi mala moso maba va ndeku mavula beni nate Baalati-Beer, Ramá yidi ku khonzu sul. Akiokio kiawu kiuka makanda madi mu mvila wu Simioni batambula. 9 Kiuka mvila wu Simioni batambula kiba mu khati kizunga ki mvila wu Yuda, kibila kizunga mvila wu Yuda batambula kiba beni kinneni, diawu mvila wu Simioni batambudila kiuka kiawu mu khati kizunga ki mvila wu Yuda.

10 Bosi mvila wu Zebuloni, wawu mvila wuntatu wutambula kiuka mu kutadila makanda mawu ayi zindilu zi kiuka kiawu ziyenda nate ku Saridi. 11 Zindilu beni mvandi ziyenda ku khonzu oeste nate ku Mareali ayi zivitila ku Dabezeti, mvandi zivitila nate ku ḿbuinga widi va ndeku Jokneam. 12 Ayi ziviokila mvandi ku Saridi ku khonzu kumbasikilanga muinya nate mu zindilu zidi ku khonzu Kisloti-Tabor ayi ziyenda mvandi ku Daberati bosi zivitila ku Jafia. 13 Zindilu beni mvandi zivitila ku khonzu leste, kumbasikilanga muinya nate ku Gati-Hefer ayi ku Eti-Kazim bosi zivitila mvandi ku Rimom ayi ku Neá. 14 Zindilu beni mvandi ziviokila ku khonzu norte ayi ziyenda nate ku Hanatom ayi zisukila nate ku ḿbuinga wu Iftá-El, 15 ayi Katati, Naalal, Sinrom, Idala ayi Betelemi—12 di mavula na mala mawu. 16 Amomo mawu mavula ayi mala makanda madi mu mvila wu Zebuloni batambula.

17 Bosi mvila wu Isakali, wawu mvila wunna wutambula kiuka mu kutadila makanda mawu. 18 Zindilu zi kizunga kiawu ziyenda nate ku Jezreeli, Kesuloti, Suném, 19 Hafaraim, Siom, Anaarati, 20 Rabite, Kizion, Ebes, 21 Remeti, En-Ganim, En-Hadá ayi Bete-Pazes. 22 Zindilu beni mvandi zivitila nate ku Tabor, Sazima ayi Bete-Seme, ayi zisukila mu muila wu Yolidani—16 di mavula na mala mawu. 23 Amomo mawu mavula ayi mala makanda madi mu mvila wu Isakali batambula.

24 Bosi mvila wu Azer, wawu mvila wuntanu wutambula kiuka mu kutadila makanda mawu. 25 Zindilu zi kizunga kiawu ziyenda nate ku Helkati, Hali, Beten, Acsafe, 26 Alameleki, Amadi ayi Mizal. Ku khonzu oeste, zindilu beni zivitila nate ku Karmelu ayi ku Sior-Libnati. 27 Zindilu beni mvandi ziyenda ku khonzu leste nate ku Bete-Dagom, mvandi ziviokila ku Zebuloni ku khonzu norte ku ḿbuinga wu Iftá-El ayi zivitila ku Bete-Emeki ayi Neieli. Bosi ziyenda nate ku Kabul ku khonzu lukietu. 28 Mvandi ziyenda nate ku Ebrom, Reobi, Hamom ayi ku Kanani. Mvandi zitatamana nate ku Sidon Yinneni. 29 Bosi zindilu beni mvandi ziyenda ku Ramá nate ku divula di Tile diba bibaka bitungu buboti. Bosi ziyenda nate ku Hosa ayi zisukila ku ḿbu ku kizunga ki Aczibi, 30 Umá, Afeki ayi Reobi—22 di mavula na mala mawu. 31 Amomo mawu mavula ayi mala makanda madi mu mvila wu Azer batambula.

32 Bosi mvila wu Nafitali, wawu mvila wunsambanu wutambula kiuka mu kutadila makanda mawu. 33 Zindilu zi kizunga kiawu zitonina ku Helefi vadi nti wunneni widi ku Zananim, ziviokila ku Adami-Nekebi, Jabneli ayi ziyenda ku Lakum ayi zisukila ku muila wu Yolidani. 34 Zindilu beni mvandi ziyenda ku khonzu oeste nate ku Aznoti-Tabor ayi ziviokila ku Hukoki ayi zivitila ku kizunga ki mvila wu Zebuloni ku khonzu sul ayi ku kizunga ki mvila wu Azer ku khonzu oeste, mvandi zivitila ku kizunga ki mvila wu Yuda ku khonzu leste yi Yolidani. 35 Amama mawu mavula maba bibaka bitungu buboti: Zidim, Zer, Hamati, Rakati, Kinereti, 36 Adamá, Ramá, Hazor, 37 Kedes, Edrei, En-Hazor, 38 Irom, Migdal-El, Horem, Bete-Anati ayi Bete-Seme—19 di mavula na mala mawu. 39 Amomo mawu mavula ayi mala makanda madi mu mvila wu Nafitali batambula.

40 Bosi mvila wu Dan, wawu mvila wusambuadi wutambula kiuka mu kutadila makanda mawu. 41 Zindilu zi kizunga kiawu ziyenda ku Zorá, Estaoli, Ir-Semes, 42 Salabim, Aijalom, Itla, 43 Elom, Timina, Ekrom, 44 Elteki, Gibetom, Baalati, 45 Jeudi, Bene-Beraki, Gati-Rimom, 46 Me-Jarkom ayi Rakon didi ndilu va khonzu divula di Jope. 47 Vayi kizunga mvila wu Dan batambula kiba kiluelu. Diawu bayenuanisina Lezem ayi bavua kizunga kiawu. Bosi bawu batona kuzingila kuna ayi bavana kizunga beni dizina Dan mu kutadila dizina di khayꞌawu Dan. 48 Amomo mawu mavula ayi mala makanda madi mu mvila wu Dan batambula.

49 Bo basi Isaeli bamana kukabula kiuka ki ntoto batambula, bawu bavana Yosua muana Num kiuka va khatiꞌawu. 50 Dedi bo Yave katubila, basi Isaeli bavana Yosua divula dio nandi kadinda, Timnati-Sera, didi ku kizunga kidi miongo ki mvila wu Efraim. Ayi Yosua wutungisa divula beni ayi wutona kuzingila kuna.

51 Eliazali nganga nzambi, Yosua muana Num ayi bakulutu ba dikabu di Isaeli, bakabula ntoto kuidi basi Isaeli vantuala Yave ku Silo va khotolo tenda yi lukutukunu. Mu phila ayoyo, bamana kukabula ntoto kuidi mimvila mioso.

20 Bosi Yave wukamba Yosua: 2 “Kamba basi Isaeli: ‘Lufueti sola mavula ma kutinina, dedi bo yilukambila mu nzila Mose, 3 muingi woso mutu wumvonda wadi yandi mukhambu lutia, katinina kuna. Ayi mavula beni mankuiza ba kibuangu ki kutinina, muingi musi dikanda di mutu befua kabika kuvonda mutu bevonda wadi yandi. 4 Mutu wumvonda wadi yandi mukhambu lutia, kafueti tinina mu mavula beni ayi bo kamvitila va muelu divula, nandi kafueti zabikisa kuidi bakulutu ba divula beni mambu ma bemonika. Bosi bakulutu bafueti kunyamba ayi kumvana kibuangu muingi kakala. 5 Boti musi dikanda di mutu befua wunkuka mutu bevonda musi dikanda diandi, bakulutu ba divula balendi kuekula ko mutu beni mu mioko miandi, kibila nandi bevondila wadi yandi mukhambu lutia ayi kabasa kunlendanga ko. 6 Mutu bevonda wadi yandi mukhambu lutia, kafueti kala ku divula beni di kutinina, nate kala kuenda vantuala mimfundisi mi dikabu ayi kafueti tatamana kukala kuna nate nkulutu wu zinganga nzambi kala fua. Vayi bo nkulutu wu zinganga nzambi kamfua, nandi kalenda vutuka ku nzoꞌandi ku divula kaba kalanga.’”

7 Diawu basodila divula di Kedes didi ku Ngalili ku kibuangu kidi miongo kidi ku kizunga ki mvila wu Nafitali, Sikem kibuangu kidi miongo kidi ku kizunga ki mvila wu Efraim ayi Kiriati-arba voti Hebrom, kibuangu kidi miongo kidi ku kizunga ki mvila wu Yuda. 8 Ku kizunga ki Yolidani ku khonzu leste yi divula di Yeliko, bawu basola mavula maba ku thandu, divula di Bezer didi ku kizunga ki mvila wu Rubem, Ramoti ku Ngileadi didi ku kizunga ki mvila wu Gadi ayi Golam ku Bazan didi ku kizunga ki mvila wu Manase.

9 Amomo mawu mavula basola muingi basi Isaeli voti zinzenza bankalanga yawu batininanga, bo mutu kamvonda wadi yandi mukhambu lutia, muingi musi dikanda di mutu kabe vonda kabika kumvonda, ava nandi kukuenda vantuala mimfundisi mi dikabu.

21 Bakulutu ba mvila wu Levi bafikama vaba Eliazali nganga nzambi, Yosua muana Num ayi bakulutu ba dikabu di Isaeli, 2 ayi baba kamba ku Silo ku ntoto wu Kanani: “Yave wutuba mu nzila Mose muingi lutuvana mavula muingi tukalanga ayi bibuangu bi kudikila bibulu bitu.” 3 Diawu mu kulandakana thuadusulu yi Yave, basi Isaeli bavana mua ndambu mu mavula mawu kuidi zi levita, kubunda mvandi bibuangu bi kudikila bibulu.

4 Bosi makanda ma zi koatita bawu theti batambula mavula. Mvila wu Yuda, wu Simioni ayi wu Benyamini bavana kuidi zilevita babutukila mu dikanda di Aloni, 13 di mavula ayi bibuangu bi kudikila bibulu.

5 Mvila wu Dan ayi ndambu mvila wu Manase, bavana kuidi makanda mankaka ma zi koatita, 10 di mavula ayi bibuangu bi kudikila bibulu.

6 Mvila wu Isakali, wu Azer, wu Nafitali ayi ndambu mvila wu Manase ku Bazan, bavana kuidi zi gersonita, 13 di mavula ayi bibuangu bi kudikila bibulu.

7 Mvila wu Rubem, wu Gadi ayi mvila wu Zebuloni, bavana kuidi makanda ma zi merarita, 12 di mavula ayi bibuangu bi kudikila bibulu.

8 Mu phila ayoyo, basi Isaeli bavana kuidi zilevita mavula amomo ayi bibuangu bi kudikila bibulu, dedi bo Yave katubila mu nzila Mose.

9 Amama mawu mavula mvila wu Yuda ayi mvila wu Simioni bavana 10 kuidi makanda ma zi koatita, bayizila mu dikanda di Aloni, kibila bawu theti batambula mavula. 11 Baba vana Kiriate-Arba, voti Hebrom, divula didi ku kizunga kidi miongo ki mvila wu Yuda. Mvandi baba vana bibuangu bi kudikila bibulu, biba bifikama na divula beni. (Arba wuba tata yi Anaki.) 12 Vayi zitsola ayi mala maba ku divula beni, bavana biawu kuidi Kalebi muana wu Jefune muingi biba kiuka kiandi.

13 Bavana kuidi bana ba Aloni nganga nzambi divula di Hebrom, divula dio mutu kafueti tinina na kuvonda wadi yandi mukhambu lutia, ayi bibuangu bi kudikila bibulu. Mvandi baba vana Libna ayi bibuangu bi kudikila bibulu. 14 Jatir ayi bibuangu bi kudikila bibulu, Estemoa ayi bibuangu bi kudikila bibulu, 15 Holom ayi bibuangu bi kudikila bibulu, Debir ayi bibuangu bi kudikila bibulu, 16 Aim ayi bibuangu bi kudikila bibulu, Juta ayi bibuangu bi kudikila bibulu ayi Bete-Semes ayi bibuangu bi kudikila bibulu, 9 di mavula ma mimvila miodi amiomio.

17 Ayi mvila wu Benyamini wuvana mavula amama: Gibeão ayi bibuangu bi kudikila bibulu, Geba ayi bibuangu bi kudikila bibulu, 18 Anatoti ayi bibuangu bi kudikila bibulu, Almom ayi bibuangu bi kudikila bibulu, mavula manna.

19 Bavana kuidi bana ba Aloni zinganga nzambi, 13 di mavula ayi bibuangu bi kudikila bibulu.

20 Mvila wu Efraim, mvandi wuvana mavula kuidi makanda mankaka ma zi koatita. 21 Zi koatita batambula Sikem divula di kutinina ayi bibuangu bi kudikila bibulu, divula diba ku kizunga ki mvila wu Efraim. Mvandi batambula Gezer ayi bibuangu bi kudikila bibulu, 22 Kibzaim ayi bibuangu bi kudikila bibulu ayi Bete-Horom ayi bibuangu bi kudikila bibulu, mavula manna.

23 Mvila wu Dan wuvana mavula amama: Elteki ayi bibuangu bi kudikila bibulu, Gibetom ayi bibuangu bi kudikila bibulu, 24 Aijalom ayi bibuangu bi kudikila bibulu ayi Gati-Rimom ayi bibuangu bi kudikila bibulu, mavula manna.

25 Ndambu mvila wu Manase wuvana mavula amama: Taanaki ayi bibuangu bi kudikila bibulu, Gati-Rimom ayi bibuangu bi kudikila bibulu, mavula muadi.

26 Makanda mankaka ma zi koatita batambula 10 di mavula ayi bibuangu bi kudikila bibulu.

27 Ndambu mvila wu Manase bavana kuidi zi gersonita divula di Golam didi ku Bazan, divula di kutinina ayi bibuangu bi kudikila bibulu, bavana mvandi Beesterá ayi bibuangu bi kudikila bibulu, mavula muadi.

28 Mvila wu Isakali wuvana mavula amama: Kizion ayi bibuangu bi kudikila bibulu, Daberati ayi bibuangu bi kudikila bibulu, 29 Jarmuti ayi bibuangu bi kudikila bibulu, En-Ganim ayi bibuangu bi kudikila bibulu, mavula manna.

30 Mvila wu Azer wuvana mavula amama: Mizal ayi bibuangu bi kudikila bibulu, Abdom ayi bibuangu bi kudikila bibulu, 31 Helkati ayi bibuangu bi kudikila bibulu, Reobi ayi bibuangu bi kudikila bibulu, mavula manna.

32 Mvila wu Nafitali wuvana mavula amama: “Divula di Kedes, divula di kutinina didi ku Ngalili ayi bibuangu bi kudikila bibulu, Hamoti-Dor ayi bibuangu bi kudikila bibulu ayi Karta ayi bibuangu bi kudikila bibulu, mavula matatu.

33 Makanda ma zi gersonita batambula 13 di mavula, ayi bibuangu bi kudikila bibulu.

34 Mvila wu Zebuloni wuvana kuidi makanda mankaka ma zi merarita, mavula amama: Jokneam ayi bibuangu bi kudikila bibulu, Karta ayi bibuangu bi kudikila bibulu, 35 Dimna ayi bibuangu bi kudikila bibulu ayi Naalal ayi bibuangu bi kudikila bibulu, mavula manna.

36 Mvila wu Rubem wuvana mavula amama: Bezer ayi bibuangu bi kudikila bibulu, Jaaz ayi bibuangu bi kudikila bibulu, 37 Kedemoti ayi bibuangu bi kudikila bibulu, Mefaati ayi bibuangu bi kudikila bibulu, mavula manna.

38 Mvila wu Gadi wuvana mavula amama: Ramoti divula di kutinina didi ku Ngileadi ayi bibuangu bi kudikila bibulu, Maanaim ayi bibuangu bi kudikila bibulu, 39 Hesbom ayi bibuangu bi kudikila bibulu ayi Jazer ayi bibuangu bi kudikila bibulu, mavula manna.

40 Makanda mankaka ma zi merarita batumbula 12 di mavula.

41 Mu khati kiuka basi Isaeli batambula, bawu bavana kuidi basi Levi, 48 di mavula ayi bibuangu bi kudikila bibulu. 42 Mavula moso bavana kuidi basi Levi, muba bibuangu bi kudikila bibulu.

43 Mu phila ayoyo, Yave wuvana kuidi basi Isaeli ntoto woso kakanikisa kuidi zikhaya ziawu, ayi basi Isaeli batona kuzingila muawu. 44 Mvandi Yave wuba vana ndembama, dedi bo nandi kakanikisila kuidi zikhaya ziawu ayi ni wumueka mu zimbeni ziawu kasa bue batatisa ko, kibila Yave wuba sadisa kununga zimbeni ziawu zioso. 45 Mu zikhanu zioso zimboti Yave kavanga na basi Isaeli, ni lukanu lumueka lusa khambu ko kusalama, zia zioso zisalama.

22 Bosi Yosua wutumisa mvila wu Rubem, wu Gadi ayi ndambu mvila wu Manase 2 ayi wuba kamba: “Benu luma vanga mambu moso Mose kisadi ki Yave kalutuma, ayi lutumukini mambu moso minu yilukembi. 3 Benu lusa kuekula ko zikhomba zinu mu thangu yoso ayiyi nate bubu ayi lutumukina zithumu zioso zi Yave Nzambꞌinu. 4 Buabu Yave Nzambꞌinu mavana zikhomba zinu ndembama, dedi bo nandi kakanikisila. Diawu benu mulenda kuinu kuvutuka mu zitenda zinu, ku ntoto Mose kisadi ki Yave kaluvana ku khonzu yinkaka yi muila wu Yolidani, muingi wuba kiuka kinu. 5 Vayi lufueti tumukina Minsiku ayi zithumu Mose kisadi ki Yave kaluvana, mu kuzola Yave Nzambꞌinu, mu kudiatila mu zinzila ziandi, kutumukina zithumu ziandi ayi kunsadila mu ntima woso ayi mu muela woso.”

6 Bosi Yosua wuba sakumuna, wuba kamba benda ayi bawu bavutuka mu zitenda ziawu. 7 Mose wuvana mua ndambu di mvila wu Manase kiuka ku Bazan ayi ndambu dinkaka mu mvila beni, Yosua wuba vana ntoto ku khonzu oeste yi muila wu Yolidani va kimueka na zikhomba ziawu. Ayi bo Yosua kaba kamba bavutuka mu zitenda ziawu, nandi wuba sakumuna 8 ayi wuba kamba: “Benu luemvutuka mu zitenda zinu na busina buwombo, bibulu, palata, wola, cobre, bisengu ayi bikhutu biwombo. Kabananu na zikhomba zinu biuma luma baka mu mvita.”

9 Bosi mvila wu Rubem, wu Gadi ayi ndambu mvila wu Manase, babika basi Isaeli bankaka ku Silo ntoto wu Kanani ayi bavutuka ku Ngileadi ntoto wo batambula muingi wuba kiuka kiawu ayi bazingila kuna, dedi bo Yave katubila mu nzila Mose. 10 Bo bavitila ku kizunga ki Yolidani ku ntoto wu Kanani, mvila wu Rubem, wu Gadi ayi mua ndambu mvila wu Manase, batunga kuna kikuma kinneni ayi ki kukuitukila. 11 Bo vavioka mua thangu, basi Isaeli bankaka bayuwa mambu amama: “Mvila wu Rubem, wu Gadi ayi ndambu mvila wu Manase, batungidi kikuma va ndeku divula di Kanani ku kizunga ki Yolidani, ku khonzu yi basi Isaeli.” 12 Bo basi Isaeli bayuwa mawu, dikabu dioso dikutakana ku Silo, muingi kuba nuanisa.

13 Bosi basi Isaeli bafila Fineia muana Eliazali nganga nzambi, kuidi mvila wu Rubem, wu Gadi ayi mua ndambu mvila wu Manase ku ntoto wu Ngileadi. 14 Bafila mvandi 10 di bakulutu muingi benda yandi, mu kadika mvila basola nkulutu mueka ayi kadika mutu mu bawu wuba mfumu dikanda mu mimvila mi Isaeli. 15 Bo bavitila kuidi mvila wu Rubem, wu Gadi ayi ndambu mvila wu Manase ku ntoto wu Ngileadi, bawu baba kamba:

16 “Amama mawu dikabu dioso di Yave bama tuba: ‘Kibila mbi luma vangila diambu adiodio dimbi mukhambu monisa lukuikumunu kuidi Nzambi yi Isaeli? Bubu benu luma manga kutumukina Yave ayi luma tunga kikuma kinu veka muingi kubalukila Yave. 17 Benu luntomba kubue vanga nzimbala yinkaka kubotula kuandi yo tuvanga ku Peor? Nate bubu befu tukhidi tovuka mu nzimbala beni, kheti vamonika kivunga kibina vonda dikabu dioso di Yave. 18 Buabu benu luisi bue tomba ko kusadila Yave. Benu kubalukila Yave bubu, buna yono nandi wunkuiza balukila dikabu dioso di Isaeli. 19 Boti ntoto ba luvana muingi wuba kiuka kinu wisi ko wudiodila, buna sabukanu ku khonzu yinkaka yi muila muingi luenda ku ntoto wu Yave, ko kuidi nzo yinlongo yi Yave ayi tu zingilanu va kimueka. Vayi bikanu kubalukila Yave ayi bikanu kutuvanga tumbanda mbusa mu kutunga kikuma kinu veka, kubika kuandi kio Yave Nzambꞌitu katuma. 20 Bo Akan muana wu Zera kavola disumu, mu kubonga biuma Nzambi katuba ti bafueti tulula, bukiedika ti dikabu dioso basa monikina ko ziphasi? Kasi ko to nandi veka wufua mu kibila ki nzimbala kavanga.’”

21 Bosi mvila wu Rubem, wu Gadi ayi ndambu mvila wu Manase, bakamba mambu amama kuidi bakulutu ba dikabu di Isaeli: 22 “Yave Nzambi yi zinzambi. Yave Nzambi yi zinzambi. Nandi zebi, ayi dikabu dioso di Isaeli bankuiza zaba. Boti befu tusiedi ko bakuikama mu Yave, buna bika nandi katuvonda mu kilumbu akiki. 23 Boti tube tungila kikuma akiki muingi kubalukila Yave ayi muingi kuvanina vawu minkhailu miviku, minkhailu mi zitheti ayi minkhailu mi kithuadi, buna bika Yave katufundisa. 24 Befu tuvangidi kiawu, kibila tubedi boma mu kibila ki mambu malenda monika kuntuala: ‘bana binu balenda kamba bana bitu: “Benu luisi ko nsua wu kubuongimina Yave Nzambi yi Isaeli, va kimueka na befu. 25 Yave wutula muila wu Yolidani muingi wuba ndilu yi kizunga kitu ayi kinu, mvila wu Rubem ayi wu Gadi. Benu luisi ko nsua wu kubuongimina Yave.” Ayi bana binu bala tula nkaku bana bitu kubuongimina Yave.’

26 “Diawu tutubila: ‘Ndokuꞌanu tutunga kikuma, vayi bakana ko muingi kuvanina minkhailu miviku, 27 vayi muingi kita kimbangi matedi befu ayi benu, ayi matedi bana bitu ayi bana binu ti, tunkuiza vanga kisalu ki Yave vantualꞌandi, mu kumvana minkhailu miviku, minkhailu mi kithuadi ayi minkhailu minkaka, muingi kuntuala bana binu babika kamba bana bitu: “Benu luisi ko nsua wu kubuongimina Yave.’” 28 Diawu befu tuyindudila: ‘Kuntuala bawu ba kukamba mambu amomo kuidi befu, ayi kuidi bana bitu, befu tuala bakamba: “Tala kikuma akiokio tuvengi kidi dedi mueka na kikuma ki Yave kio zikhaya zitu bavanga, bakana ko muingi kuvaninanga minkhailu miviku ni minkhailu mi kithuadi, vayi muingi kuta kimbangi matedi benu ayi befu.’” 29 Befu tulendi balukila ko Yave ayi kubika tumukina Yave bubu, mu kutunga kikuma muingi kuvanina minkhailu miviku, minkhailu mi zitheti ayi minkhailu minkaka, kubotula kuandi kuvanina va kikuma ki Yave Nzambꞌitu kidi ku nzo yinlongo.”

30 Bo Fineia nganga nzambi ayi bakulutu bankaka ba dikabu baba yandi bayuwa mambu batu baba mu mvila wu Rubem, wu Gadi ayi ndambu mvila wu Manase batuba, bawu bayangalala. 31 Mu phila ayoyo, Fineia muana Eliazali nganga nzambi, wukamba mvila wu Rubem, wu Gadi ayi wu Manase: “Bubu befu tuma zaba ti Yave widi va khatꞌitu, kibila benu lusa vanga ko ni diambu dimbi muingi kubalukila Yave. Mu kibila akiokio, Yave kasinkuiza tutuadisa ko ziphasi.”

32 Bosi Fineia muana Eliazali nganga nzambi ayi bakulutu bankaka, bananguka vaba mvila wu Rubem ayi wu Gadi ku ntoto wu Ngileadi ayi bavutuka ku Kanani. Bawu banata zitsangu aziozio kuidi basi Isaeli bankaka. 33 Ayi bo basi Isaeli batambula kipholo akiokio, bawu bayangalala mu mawu. Bosi bawu bazitisa Nzambi ayi basa bue baka ko makani ma kunuanisa mvila wu Rubem ayi wu Gadi, muingi kutulula ntoto baba zingilanga.

34 Bosi mvila wu Rubem ayi wu Gadi, bavana kikuma* beni dizina, kibila “kiawu kinta kimbangi matedi befu ti Yave nandi Nzambi yikiedika.”

23 Bo vavioka mimvu miwombo tona Yave kavana ndembama kuidi dikabu di Isaeli ku ntoto woso ayi bo Yosua kayiza ba beni kiboba, 2 Yosua wutumisa dikabu dioso di Isaeli, bakulutu ba dikabu, mimfundisi, zimfumu ayi wuba kamba: “Minu yeka beni kiboba. 3 Benu veka lumueni mambu Yave Nzambꞌinu kavangidi mimvila mioso amiomio mu kibila kinu, kibila Yave Nzambꞌinu nandi wulunuanina. 4 Buabu monanu, minu yiveni kuidi mimvila minu mioso ntoto wu makabu amomo muingi wuba kiuka kinu, ntoto wu mimvila mio benu lutulula kutonina ku Yolidani nate ku ḿbu wu Mediteraneo ku khonzu oeste. 5 Yave Nzambꞌinu nandi wuba kukisa vantualꞌinu mu kibila kinu ayi benu luyiza vua ntotoꞌawu dedi bo Yave kalukanikisila.

6 Buabu, monisanu kibakala muingi lutumukina mambu moso madi mu buku yi Minsiku mi Mose ayi bikanu kuvekuka mukhambu tumukina minsiku beni. 7 Bikanu kuba kithuadi na makabu amomo madi va kizunga kinu. Bikanu kusadila mazina ma zinzambi ziawu, ni kulevila phesi mu mazina beni. Mvandi bikanu kubuongimina zinzambi beni. 8 Vayi tatamananu bakuikama kuidi Yave Nzambꞌinu, dedi bo luidi mu kumonisina lukuikumunu nate bubu. 9 Kibila Yave wunkuiza kukisa makabu malutidi batu ayi mangolo kena benu. Nate bubu, vasi ko ni mutu wulenda lununga. 10 Musi Isaeli wumueka wala nunga kutulula kivevi di zimbeni, kibila Yave Nzambꞌinu nandi widi mu kulunuanina dedi bo kalukanikisila. 11 Diawu banu keba keba muingi luzolo luinu mu Yave lubika mana.

12 Ayi benu kukhambu monisa lukuikumunu mu Nzambi, mu kuba kikundi na makabu amomo mankalanga va kizunga kinu ayi kuba kuela, 13 zabanu kuinu ti Yave kalasa tatamana ko kukukisa makabu amomo. Bawu bala ba buka ntambu kuidi benu, bala ba buka lusuadi bamviva ku mbusꞌinu ayi bala ba buka zitsendi zibe kota mu mesu minu, nate benu boso luala mana kufua ku ntoto awuwu wumboti Yave kaluvana.

14 “Talanu, minu yambelama kufua ayi benu luzebi mu ntimꞌinu ayi mu muelꞌinu woso ti, zikhanu zioso Yave Nzambꞌinu kavanga, zisalama. Ayi ni lukanu lumueka lusa khambu salama ko, kibila ziazioso zisalama. 15 Vayi dedi bo Yave kadukisila zikhanu zioso zimboti nandi kavanga, bobuawu mvandi Yave wala tuala ku ntoto awuwu zitsingulu zioso zio nandi katuba ti ziala salama ayi Yave wala mana kulutulula ku ntoto awuwu wumboti kaluvana. 16 Benu kulevula luwawanu lo Yave Nzambꞌinu kalukamba muingi lutumukina ayi benu kubuongimina zinzambi zinkaka, Yave wunkuiza ludasukila ayi benu boso lunkuiza mana kufuila ku ntoto awuwu wumboti kaluvana.”

24 Bosi Yosua wutumisa mimvila mioso ku Sikem ayi wutumisa mvandi bakulutu ba dikabu, mimfundisi ayi zimfumu ayi bawu bayenda vantuala Nzambi yikiedika. 2 Yosua wukamba dikabu dioso: “Buakabu butubidi Yave Nzambi yi Isaeli: “Zikhaya zinu, kubunda mvandi Tera tata yi Abalahami ayi tata yi Naor bazingila mimvu miwombo ku khonzu yinkaka yi muila wu Eufrate ayi bawu babuongimina zinzambi zinkaka.

3 “‘Buviokila thangu, yibotula khayꞌinu Abalahami ku khonzu yinkaka yi muila wu Eufrate ayi yimvanga kadiengila ntoto woso wu Kanani ayi mvandi yivanga muingi dikanda diandi diba diwombo. Minu yinsadisa kubuta Izaki, 4 ayi yisadisa Izaki kabuta Yakobi ayi Ezau. Bosi yivana kizunga kidi miongo ku Seir kuidi Ezau muingi kiba kiuka kiandi. Vayi Yakobi na bana bandi bakuluka ku Ngipiti. 5 Buviokila thangu, minu yifila Mose ayi Aloni ayi yituadisa zitsingulu ziwombo ku Ngipiti. Bosi minu yilukula ku Ngipiti. 6 Bo yikula matata minu ku Ngipiti ayi bo bawu bavitila ku ḿbu, basi Ngipiti baba landakana na makalu mawu ma mimvita ayi mimvalu nate ku Ḿbu Wubenga. 7 Ayi matata minu badinda lusalusu kuidi minu Yave ayi yituadisa kitombi va khatiꞌawu muingi kubasueka kuidi basi Ngipiti ayi minu yituadisa nlangu wu ḿbu muingi kuba diamisa. Benu lumona mambu moso minu yivangila basi Ngipiti. Bosi benu luzingila ku thandu mu mimvu miwombo.

8 “‘Ayi minu yilunata ku ntoto wu zi amorreu baba kalanga ku khonzu yinkaka yi muila wu Yolidani ayi bawu balunuanisa. Vayi minu yilusadisa muingi luba nunga ayi luvua ntotoꞌawu, bosi minu yiba tulula vantualꞌinu. 9 Bosi Balaki muana wu Zipor ntinu wu Moabi, wubaka makani ma kunuanisa basi Isaeli. Nandi wutumisa Balaão muana wu Beor muingi kalusinga. 10 Vayi minu yisa kuwila ko Balaão. Mu phila ayoyo, nandi wulusakumuna zikhumbu ziwombo ayi minu yiluvukisa mu mioko miawu.

11 “‘Bosi benu lusabuka muila wu Yolidani ayi luvitila ku Yeliko. Ayi zimfumu zi Yeliko, kubunda mvandi zi amorreu, zi perizeu, basi Kanani, zi hitita, zi girgazeu, zi heveu ayi zi jebuzeu bayiza lunuanisa. Vayi minu yilusadisa muingi luba nunga. 12 Ava benu kuvitila kuna, minu yiba vanga baba yazuka yazuka ayi baba boma mu kibila kinu. Bawu balutina dedi bo yivangila mintinu miodi mi zi amorreu. Benu luba nungina bakana ko mu kusadila zimbedi voti madionga minu. 13 Mu phila ayoyo, minu yiluvana ntoto wo benu lukhambu vangila beni mangolo muingi kuvua ayi yiluvana mavula mo benu lukhambu tunga, bosi benu lutona kuzingila kuna. Benu luidi mu kudia makundi ma minti mi vinyu ayi makundi ma olive mo lukhambu vata.’

14 “Diawu, kinzikanu Yave ayi mbuongiminanu mu lukuikumunu, botulanu va khatꞌinu zinzambi zio zikhaya zinu baba buongiminanga ku khonzu yinkaka yi muila wu Eufrate ayi ku Ngipiti, vayi buongiminanu to Yave. 15 Buabu boti disi ko diambu dimboti kuidi benu kubuongimina Yave, buna solanu bubu nani lunkuiza buongimina, boti lunkuiza buongimina zinzambi zio zikhaya zinu baba buongiminanga ku khonzu yinkaka yi muila wu Eufrate, voti zinzambi zi amorreu bavuidi ntoto wo benu luidi mu kuzingila bambuongiminanga. Vayi minu ayi basi dikanda diami, tunkuiza tatamana kubuongimina to Yave.”

16 Bosi dikabu dioso batuba: “Befu tulendi banda ko Yave mbusa muingi kubuongimina zinzambi zinkaka. 17 Kibila Yave Nzambꞌitu, nandi wukula matata mitu ku Ngipiti ntoto wu buvika ayi nandi wuvanga mambu amomo ma kukuitukila, mvandi nandi wutukieba mu zinzila ayi bibuangu bi makabu amomo tuviokila. 18 Yave nandi wukukisa makabu moso amomo, kubunda mvandi zi amorreu baba kalanga ku ntoto awuwu ava befu tuiza akuku. Diawu befu mvitu tunkuiza tatamana kubuongimina to Yave, kibila nandi widi Nzambꞌitu.”

19 Yosua wukamba dikabu: “Benu lualasa nunga ko kutatamana kubuongimina to Yave, kibila nandi widi wunlongo ayi widi Nzambi wuntomba bambuongimina to nandi. Benu kukhambu vanga mawu, nandi kalasa lemvukila ko zinzimbala ayi masumu minu. 20 Benu kubanda Yave mbusa ayi benu kubuongimina zinzambi zinkaka, nandi wala ludasukila ayi wala luvonda, kheti wuluvangila mambu mamboti.”

21 Vayi dikabu dioso bakamba Yosua: “Befu Yave to tunkuiza tatamana kubuongimina.” 22 Bosi Yosua wukamba dikabu: “Benu veka luidi mu kuta kimbangi ti luma sola kubuongimina to Yave.” Bawu bamvutudila: “Ngete, befu tuidi mu kuta kimbangi.”

23 “Diawu botulanu zinzambi zidi va khatꞌinu ayi buongiminanu to Yave Nzambi yi Isaeli.” 24 Bosi dikabu di Isaeli bakamba Yosua: “Tunkuiza buongimina to Yave ayi tunkuiza tumukina mambu moso kantuba.”

25 Mu phila ayoyo, muna kilumbu beni Yosua wuvanga yawu luwawanu, ayi wuba vana minsiku ayi zithuadusulu ku Sikem muingi batumukina. 26 Bosi Yosua wusonika mambu amomo mu buku yi Minsiku mi Nzambi. Ayi wubonga dimanya dinneni ayi wutula diawu kutsi nti wunneni widi va ndeku nzo yinlongo yi Yave.

27 Yosua wubue kamba dikabu: “Dimanya adidi dinta kimbangi matedi befu, kibila diawu dibe kuwa mambu moso Yave kama tukamba, ayi diawu dinkuiza ta kimbangi matedi benu muingi lubika manga Nzambꞌinu.” 28 Bosi Yosua wukanina dikabu ayi kadika mutu wuvutuka ku kizunga kiandi.

29 Bo mambu amomo mavioka, Yosua muana Num kisadi ki Yave wufua bo kadukisa 110 di mimvu. 30 Ayi dikabu banzikila ku ntoto katambula ku Timnati-Sera, ku kizunga kidi miongo ki mvila wu Efraim, ku khonzu norte yi mongo wu Gaás. 31 Dikabu di Isaeli batatamana kubuongimina Yave mu bilumbu bioso Yosua kaba wumonyo ayi mu bilumbu bi bakulutu batatamana bamonyo bo Yosua kafua ayi bazaba mambu moso mamboti Yave kavangila basi Isaeli.

32 Mimvesi mi nyitu yi Yozefi mio basi Isaeli batuala ku Ngipiti, bazika miawu ku Sikem va kibuangu kio Yakobi kasumba kuidi bana ba Hamor tata yi Sikem mu 100 di zimbongo zi palata ayi kibuangu beni, kiyiza ba kiuka ki bana ba Yozefi.

33 Bosi Eliazali muana wu Aloni, mvandi wuyiza fua ayi banzikila va kibuangu kiba mua mongo kio bavana muanꞌandi Fineia kiba ku kizunga kidi miongo ki mvila wu Efraim.