ESTELI

1 Mu bilumbu bi ntinu Assuero no waba yadilanga 127 di mavula, kutonina ku Índia nati ku Etiopia, 2 mu bilumbu bio kintinu ki Assuero kiba ku divula di Suzan, 3 mu mvu wuntatu wu layalu luandi, nandi wuvanga nkungi, wutumisa minyadi ayi bisadi biandi bioso. Mvandi wutumisa zifumu zi masodi ma basi Média ayi Pérsia, batu bankinza ayi minyadi mi mavula. 4 Mu bilumbu biwombo, 180 di bilumbu, nandi wumonisa kimvuama kiandi, nzitusu ayi nkembu wu kifumu kiandi. 5 Bo bilumbu beni bivioka, ntinu wuvanga nyengu va nganda nzo’andi mu sambuadi di bilumbu, ayi baboso katumisa baba vana. 6 Va kibuangu beni vaba zikurtina zivangulu mu linho, mu bukoko,* mvandi vaba minledi mi ndimba azul bakanga mu minsinga. Mvandi vaba minledi mi violeta bakanga mu makongi mavangulu mu palata ayi mu makunzi mavangulu mu mármore. Va tsi vaba mamanya ma pórfiro, ma mármore yi phembi, ma madrepérola ayi ma mármore yi nomba, mvandi vaba mua bika bivangulu mu wola ayi palata.

7 Baba nuina vinu mu zimbungu zi wola ayi kadika mbungu yiba disuasana na mbungu yinkaka. Mu nkungi beni muba vinu yiwombo dedi bo mintinu to baba vangilanga. 8 Basa kuika ko ni mutu kunua, awowo wawu nsiku ntinu kavana, kibila ntinu wukamba bisadi biandi bioso muingi kadika mutu kabaka makani mandi veka.

9 Nkietu wu ntinu baba tedilanga Vasti, mvandi wuvanga nkungi ku nzo yi ntinu Assuero ko katumisa to bakietu.

10 Mu kilumbu ki sambuadi, bo ntinu kaba beni mu mayangi mu kibila ki vinu, nandi wutuma sambuadi di bisadi biandi kaba fiatilanga beni baba tedilanga Meumã, Bizta, Harbona, Bigtá, Abagta, Zetar ayi Carcas, 11 muingi belanda Vasti ayi bannata vantuala ntinu na kolow’andi, muingi ntinu kamonisa kitoko kiandi vantuala dikabu ayi minyadi, kibila nandi wuba beni kitoko. 12 Vayi Vasti wumanga kutumukina mambu ntinu kakamba bisadi biandi. Mu kibila akiokio, ntinu wufuema.

13 Bosi ntinu wuyuvula batu bazaba buboti minsiku mi tsi, kibila mambu moso matedi mintinu baba kuma natanga kuidi batu bapisuka mu minsiku ayi mambu ma lufundusu. 14 Batu baba vananga ntinu malongi baba: Carsena, Setar, Admata, Társi, Meres, Marsena ayi Memucã. Sambuadi adiodio di minyadi mi Média ayi Pérsia, bawu baluta ba bafikama kuidi ntinu ayi baluta ba kifumu mu luyalu luandi. 15 Ntinu wuyuvula batu beni ba luzabu: “Mu kutadila nsiku, mambu mbi tufueti vangila Vasti, mu kumona ti nandi kasa tumukina ko mambu yibe nkamba?”

16 Diawu, Memucã wuvana mvutu vantuala ntinu ayi minyadi, mu kutuba: “Vasti kasa bayisa ko to ntinu, vayi bebayisa mvandi minyadi mioso, ayi makabu moso mankalanga mu mavula ntinu widi mu kuyadila. 17 Kibila bakietu boso bo bala kuwa mambu Vasti kavengi, bala lenzanga banuni bawu mu kutuba, ‘Ntinu Assuero wutumisa nkazi’andi Vasti vantual’andi, vayi nandi wumanga kukuenda.’ 18 Mu kilumbu kio bakietu ba minyadi mi Média ayi Pérsia bala zaba mambu Vasti kavangizi, bawu mvawu bala tona kulenza banuni bawu. Ayi mambu amomo, mala vanga bakietu kuba ntu ngolo ayi kubika tumukina banuni bawu. 19 Diawu, boti ntinu tidi, vana nsua muingi tubasisa nsiku wunkaka mu khati minsiku mi basi Média ayi Pérsia, mio balendi balula ko, wuntuba: Vasti kalendi bue kuendanga ko vantuala ntinu Assuero. Ayi bika ntinu wubotula Vasti va kifumu kiandi, ayi kuvingisa vana nkietu wunkaka wulutidi. 20 Ayi bo baboso badi mu luyalu luaku bala zaba nsiku awowo wu ntinu, bakietu boso bala zitisa banuni bawu.”

21 Mambu Memucã katuba mayangidika beni ntinu ayi minyadi, diawu ntinu kavangila mambu mu phila bankambila. 22 Mu phila ayoyo, ntinu wufila minkanda mu mavula moso kaba yadilanga, ayi minkanda beni misonimina mu phila baba kolukilanga mu kadika divula. Minkanda beni miaba tuba ti nnuni kafueti ba fumu ku nzo’andi, ayi baboso bankalanga ku nzo’andi, bafueti koluka mbembu nnuni kankolukanga.

2 Bo mambu amomo mavioka ayi bo ntinu kayiza ba wuvumbama, nandi wutebuka moyo mambu Vasti kavanga ayi mvandi makani kabaka matedi nandi. 2 Diawu bisadi bi ntinu batubila: “Tufueti tomba bakietu bo ka babundiniabu ko nyitu muingi ntinu kasola nkietu kafueti kuela. 3 Bika ntinu wutuma batu benda mu mavula moso madi mu luyalu luaku, muingi batuala ku nzo yi bakietu yidi ku divula di Suzan bakietu badi kitoko bo ka babundiniabu ko nyitu. Bawu bala ba mu lukiebu lu Hagai kisadi ki ntinu. Nandi wunkuiza bakieba ayi wunkuiza bakubika muingi ba luta ba kitoko. 4 Ayi nkietu no ngie ntinu wunkuiza sola, nandi wunkuiza ba va mvingi Vasti.” Mambu amomo mayangidika beni ntinu ayi mawu ntinu kavanga.

5 Ku divula di Suzan kuba musi yuda baba tedilanga Mordekai, muana wu Jair, muana wu Simei, muana wu Quis, musi Benyamini, 6 nandi wuba mu nkangu batu bo ntinu Nebukadenisali, kanata va buvika ku Babiloni va kimueka na ntinu wu Yuda Jeconias. 7 Nandi wuyonzula Hadasa wunsundula Ester, muana wu titi’andi, kibila nandi kasa ba ko tata ayi ngudi. Ester wuba beni kitoko ayi Mordekai wunyonzula buka muan’andi, kibila tat’andi ayi mam’andi bafua. 8 Ayi bo bazabikisa nsiku wu ntinu, ayi batuala bakietu ku divula di Suzan muingi baba mu lukiebu lu Hagai, batuala mvandi Ester ku nzo ntinu, ayi nandi wuba mu lukiebu lu Hagai mutu waba kiebanga bakietu.

9 Ester wuyiza baka lunungu va mesu ma Hagai, ayi Hagai wuvanga mamoso muingi Ester kabaka bidia ayi khubumunu muingi kaluta ba kitoko, ayi wubieka sambuadi di bisadi bi bakietu bi ntinu muingi bakieba Ester. Mvandi bavingisa Ester ayi bisadi biandi bi bakietu ku kivinga kilutidi kitoko ku nzo yi bakietu. 10 Ester kasa zabikisa ko ni mutu matedi dikabu ayi dikanda diandi, kibila Mordekai wunkamba muingi kabika zabikisa mawu kuidi ni mutu. 11 Kadika kilumbu, Mordekai waba viokilanga vantuala nzo yi bakietu muingi kazaba buidi Ester kadidi ayi mambu mbi mabe monika.

12 Ava kukuenda vantuala ntinu, bakietu boso baba tambulanga khubumunu yi kitoko mu 12 di zingonda, ayi khubumunu batambula muingi kubuela ba kitoko baba ku yivangilanga mu phila ayiyi: baba vindanga malasi ma mirra mu zingonda zi sambanu, ayi mu zingonda zi sambanu zinkaka baba vindanga malasi ma bálsamo ayi ma biuma binkaka. 13 Mu phila ayoyo, bakietu beni baba banga bakubama muingi kukuenda vantuala ntinu, ayi baba tambulanga biabioso baba dindanga muingi kunata ku nzo ntinu. 14 Bawu baba kuendanga ku nzo ntinu va builu, ayi mu kilumbu kinkaka va meni baba kuendanga ku nzo yimmuadi yi bakietu, muingi kuba mu lukiebu lu Sasgaz kisadi ki ntinu no waba kiebanga bimasi bi ntinu. Ayi boti ntinu kasi kuntumisa ko mu kuntedila mu dizina diandi, buna kalendi bue vutuka ko vantuala ntinu.

15 Bo khumbu yi Ester muana wu Abiail titi yi Mordekai yifuana yi kukuenda vantuala ntinu, nandi kasa dinda ko ni kiuma kinkaka kubotula kuandi bio Hagai kisadi ki ntinu no waba kiebanga bakietu, kankamba muingi kadinda. Mu thangu yoso Ester kaba kuna (baboso baba kummonanga, baba kunzolanga.) 16 Banata Ester vantuala ntinu, mu ngonda yi tebete mu mvu sambuadi wu luyalu lu ntinu. 17 Ayi ntinu wuluta zola Ester kena bakietu bankaka. Diawu ntinu kamvuikila kolowa ayi wumvingisa va kibuangu ki Vasti. 18 Bosi ntinu wuvangila Ester nkungi wunneni, wutumisa mu nkungi beni minyadi ayi bisadi biandi. Mvandi wuvana nsua muingi babasisa batu baba mu buloku mu mavula ayi wuvana minkhailu mu kitesu kio mintinu to baba vaninanga.

19 Bo banata bakietu mu khumbu yimmuadi, Mordekai wuba wukala va muelu wu ntinu. 20 Ester kasa zabikisa ko kuidi ni mutu matedi dikabu ayi dikanda diandi dedi bo Mordekai kankambila. Ester mvandi wutatamana kutumukina zithuadusulu zi Mordekai, dedi bo kaba vangilanga mu thangu baba kalanga va kimueka.

21 Mu thangu Mordekai kaba wukala va muelu ntinu, Bigtan ayi Teres bisadi bi ntinu baba kengidilanga mielu, badasuka ayi babaka makani ma kuvonda ntinu. 22 Vayi bo Mordekai kawuya mawu, mu thinu nandi wukamba mawu kuidi Ester. Bosi Ester wuzabikisa mawu kuidi ntinu. 23 Bo bafiongunina mambu amomo ayi bo bamona ti maba makiedika, diawu bavondila babakala abobo mu kuba ledika va makunzi ayi basonika mambu amomo vantuala ntinu mu buku yi binongo.

3 Buviokila thangu, ntinu wubieka Haman muana Hamedata musi agague ayi wumvana kifumu kilutidi kena minyadi mioso minkaka. 2 Ayi bisadi bioso biba va muelu ntinu, baba fukamanga vantuala Haman dedi bo ntinu kavanina nsua. Vayi Mordekai waba manganga kufukama vantual’andi. 3 Bosi bisadi biba va muelu ntinu bayuvula Mordekai: “Kibila mbi ngie wummanginanga kutumukina nsiku wu ntinu?” 4 Bawu baba kunkuvulanga mawu kadika kilumbu, vayi Mordekai kabasa bavananga ko mvutu. Bosi bazabikisa mawu kuidi Haman muingi kumona boti mambu Mordekai kaba vanganga, maba mafuana. Kibila Mordekai wuba kamba ti nandi wuba musi yuda.

5 Bo Haman kazaba ti Mordekai waba manganga kufukama vantual’andi, nandi wudasuka. 6 Vayi Haman kabasa tomba ko to kuvonda Mordekai, kibila bankamba mvandi matedi dikabu di Mordekai. Diawu Haman kaba tombila kuvonda dikabu dioso di Yuda diba ku kizunga kio ntinu Assuero kaba yadila.

7 Mu ngonda yi Nisã mu mvu 12 wu luyalu lu ntinu Assuero, Haman wutuma bakuba “pur” (voti batesa) muingi kuzaba kilumbu ayi ngonda yi kuvondila basi yuda. Ayi bo bavanga mawu, babakula ti bafueti vangila mawu mu ngonda yi Adar. 8 Bosi Haman wukamba ntinu: “Vadi dikabu badi mu mavula moso madi mu luyalu luaku bakhambu tumukinanga minsiku miaku. Minsiku miawu midi beni disuasana na minsiku mi mimvila minkaka. Diawu, busa fuana ko tuba tadila bobo. 9 Yintomba kudinda kuidi ntinu muingi wuvana nsua wu kuvonda dikabu dioso adiodio. Minu yinkuiza vana 10.000 di zitalentu* muingi kufuta batu bankuiza vanga kisalu akiokio.”

10 Mu phila ayoyo, ntinu wubotula nela yi kutudila kidimbu mu luzala luandi ayi wuvana yawu kuidi Haman muana Hamedata, musi agague widi mbeni yi basi yuda. 11 Ntinu wukamba Haman: “Mu matedi dikabu adiodio ayi busina* buawu, vanga dioso diambu tidi.” 12 Diawu bakutikisila minsoniki mioso mi ntinu mu kilumbu 13 ki ngonda yitheti, bawu basonika mambu moso Haman katuma kuidi bisadi bi ntinu, minyadi mi mavula ayi zifumu zi dikabu mu mbembu baba kolukanga mu kadika divula. Basonikina minkanda beni mu dizina di ntinu ayi batula kidimbu mu kusadila nela yi ntinu.

13 Bafila minkanda beni mu mavula moso. Ayi mu minkanda beni muba nsiku waba tuba ti bafueti vonda basi yuda boso mu kilumbu 13 ki ngonda yi Adar, kuba kuandi batendi*, biboba, bakietu ayi bana, mvandi bafueti bonga biuma biawu bioso. 14 Vaba tombulu kutadila mambu maba mu minkanda beni buka nsiku, ayi kuzabikisa mawu kuidi dikabu dioso badi mu mavula moso, muingi bo kilumbu beni kiala fuana, baba bakubama. 15 Mu thinu, zimvuala bayenda muingi kue zabikisa zitsangu beni ku divula di Suzan. Divula dioso di Suzan diba ntengu ntengu, vayi ntinu ayi Haman baba dia ayi baba nua kuawu.

4 Bo Mordekai kazaba mambu moso mamonika, nandi wukakuna bikhutu biandi, wuvuata zitsaku ayi wuyivinda dibombi. Bosi mu kiunda, wutelama ayi wutona kue tendukanga ku divula. 2 Nandi kasa kota ko ku nzo ntinu, kibila babasa bikanga ko mutu bevuata zitsaku kukota. 3 Mu mavula moso bazabikisa zitsangu aziozio, basi yuda baba dila, baba nyonga beni ayi baba vanga jejum*. Bawombo mu bawu bavuata zitsaku ayi bavinda dibombi. 4 Bo bisadi bi bakietu ayi bi babakala bi Ester banzabikisa mambu maba monika, nandi wuba beni mu kiunda. Diawu kafidila bikhutu kuidi Mordekai muingi kavuata, vayi nandi wumanga. 5 Mu kibila akiokio, Ester wutela Hataki no ntinu kavana kiyeku ki kunsadisa. Ester wuntuma muingi kayuvula Mordekai mambu mbi maba vioka, ayi kibila mbi kavuatila zitsaku.

6 Diawu Hataki kaye kolukila na Mordekai va dizandu diba vantuala muelu wu ntinu. 7 Mordekai wunkamba mambu moso maba monika, ayi mvandi wunkamba thalu yi zimbongo Haman kavana muingi kufuta batu bankuiza vonda basi yuda. 8 Nandi mvandi wumvana nkanda muba nsua wu kuvonda basi yuda ku Suzan. Ayi vaba tombulu Hataki kumonisa ayi kusudikisa wawu kuidi Ester, ayi kunkamba kadinda nlemvu kuidi ntinu, muingi babika vonda dikabu diandi.

9 Bo Hataki kavutuka kuidi Ester, nandi wunzabikisa mamoso Mordekai katuba. 10 Bosi Ester wubue tuma Hataki kuidi Mordekai muingi kankamba: 11 “Batu boso mu mavula ayi bisadi bioso bi ntinu bazebi ti, woso kua mutu wunkuenda vantuala ntinu mukhambu kuntumisa, buna bafueti kumvonda. Muingi babika kumvonda, ntinu kafueti kunnonunina nkawu’andi wu wola. Buabu, vama vioka 30 di bilumbu, ntinu kathumisanga ko muingi yenda kuidi nandi.”

12 Bo bazabikisa mambu Ester katuba kuidi Mordekai, 13 nandi wutuma bakamba Ester: “Bika kuyindula ti bo widi luaku lu kukala ku nzo ntinu, buna wala vuka, bo bala vonda basi yuda boso. 14 Ngie kumanga vanga dioso diambu mu thangu ayiyi, zaba kuaku ti vankuiza monika mutu wunkaka muingi kuvukisa basi yuda, vayi ngie ayi dikanda di tat’aku, lualasa vuka ko. Mu mbuenu’ama, ḿba buawu wukuedidi ntinu, muingi wubaka luaku lu kutuvukisa.”

15 Bosi Ester wuvutudila Mordekai: 16 “Yenda ayi kutikisa basi yuda boso bankalanga ku divula di Suzan, ayi vanganu jejum mu kibila kiama. Bikanu kudia ayi kunua ni kiuma mu bilumbu bitatu. Minu ayi bisadi biama, mvitu tunkuiza vanga mawu, bosi yala kuenda vantuala ntinu, kheti mu kuzaba ti yinkuiza bundula nsiku. Ba kuphonda, buna bika baphonda.” 17 Bosi, Mordekai wuvanga mamoso Ester kankamba.

5 Mu kilumbu kintatu, Ester wuvuata bikhutu, bio bakazi ba mintinu baba vuatanga ayi wuyenda muingi keyoluka na ntinu. Nandi waba vingila ntinu vantuala nzo yi ntinu. Ntinu wuba wukala va kikundu ki kifumu kiba vantuala khotolo yi nzo. 2 Ester wuba wutelama vantuala nzo, ayi bo ntinu kammona, nandi wunlemvukila, diawu kanonunina nkawu’andi wu wola kuidi Ester. Bosi Ester wufikama vaba ntinu ayi wusimba va tsongi nkawu beni.

3 Ntinu wunyuvula: “Ester, mambu mbi mabe monika? Mbi wuntomba kundinda? Zaba kuaku ti kioso kiuma wu kundinda, minu yinkuiza kuvana!” 4 Ester wukamba ntinu: “A ntinu, yintomba ku kutumisa na Haman mu nkungi wo yibe kubika.” 5 Bosi ntinu wukamba bisadi biandi: “Kambanu Haman kiza mu thinu, dedi bo Ester kame tubila.” Mu phila ayoyo, ntinu ayi Haman bayenda mu nkungi Ester kakubika.

6 Bo baba nua vinu, ntinu wukamba Ester: “Mbi wuntomba kundinda? Zaba kuaku ti kioso kiuma wu kundinda, minu yinkuiza kuvana!” 7 Ester wunkamba: “Biuma yintomba ku kundinda biakabi, 8 Boti yibe baka lunungu va mesu maku ayi boti ntinu tidi kuphana biuma yi kudinda, buna yiza va kimueka na Haman mu nkungi wo yono yala ku lukubikila. Ayi yono yala kuzabikisa biuma yintomba.”

9 Haman wuba beni mu mayangi bo kaba mu nkungi. Ayi bo kaba kuenda ku nzo’andi, nandi wumona Mordekai va muelunzo yi ntinu. Ayi bo kamona ti kasa fukama ko vantual’andi, Haman wudasuka beni. 10 Vayi Haman kasa kumvangila ko diambu dimbi. Ayi bo kavitila ku nzo, nandi wutumisa nkazi’andi Zeres ayi bakundi bandi. 11 Haman wukiyemisa mu kibila ki kimvuama kiandi, mu kubuta bana bawombo ayi mu phila ntinu kanzitisila mu kumvana kifumu kilutidi kena minyadi mioso ayi bisadi bioso bi ntinu.

12 Haman wubue tuba: “Mvandi Ester minu to katumisini muingi yilandakana ntinu mu nkungi kakubikizi, ayi mabue thumisa muingi yenda na ntinu mu nkungi kala vanga yono. 13 Vayi mambu moso amomo, masi kuthuadisa ko beni mayangi, kibila yikhidi tatamananga kumona Mordekai musi yuda, va khotolo muelu wu ntinu.” 14 Diawu nkazi’andi Zeres ayi bakundi bandi boso bankambila: “Kubika dikunzi didi 50 di zicovadu* mu kukula, ayi yono dinda kuidi ntinu muingi wuvondila Mordekai va dikunzi beni. Mu phila ayoyo, ngie wala nunga kukuangalala mu nkungi na ntinu.” Mambu batuba mayangidika Haman, diawu nandi katumina muingi bakubika dikunzi beni.

6 Va builu ava nkungi wummuadi, ntinu kasa baka ko tolo. Diawu katumina bisadi biandi batuala buku yi binongo baba sonikanga mu thangu’awu, ayi batanga yawu vantuala ntinu. 2 Ayi babakula ti Mordekai nandi wuzabikisa makani mambi Bigtan ayi Teres babaka ma kuvonda ntinu. 3 Ntinu wuyuvula: “Nzitusu mbi Mordekai katambula mu mambu mamboti kavanga?” Bisadi bi ntinu bamvutudila: “Ni kiuma.”

4 Bosi ntinu wuyuvula: “Nani widi va khotolo?” Haman nandi wuba va khotolo wuyiza ku nzo ntinu muingi kudinda nsua wu kuvonda Mordekai mu kunledika va dikunzi kakubika. 5 Bisadi bi ntinu bamvutudila: “Haman nandi widi va khotolo.” Bosi ntinu wutuba: “Nkambanu kakota.”

6 Bo Haman kakota, ntinu wunyuvula: “Boti ntinu wuntomba kuzitisa mutu, buna mambu mbi bafueti vangila mutu beni?” Haman wutuba kutsi ntima: “Vadi mutu wunkaka ntinu kalenda zitisa kubotula kuandi minu?” 7 Diawu Haman kavutudila ntinu: “Mambu amama mawu bafueti vangila mutu ntinu kantomba kuzitisa: 8 bafueti tuala bikhutu bio ntinu kamvuatanga, mvalu wo ntinu kandiatilanga ayi bafueti tula mu ntu mvalu beni kolowa. 9 Bikhutu ayi mvalu bafueti ku bivana mu lukiebu lu nyadi no ntinu kanluta zolanga, ayi kafueti vuika bikhutu beni kuidi mutu no ntinu kantomba kuzitisa, ayi kafueti kundiengisa mu mvalu va dizandu di divula. Ayi mutu beni wu kundiengisa kafueti tuba: ‘Amama mawu mambu bamvangilanga mutu no ntinu kantomba kuzitisa.’” 10 Muna thangu beni, ntinu wukamba Haman: “Yenda mu thinu, bonga mvalu ayi bikhutu, bosi vuika biawu kuidi Mordekai musi yuda no widi wukala va muelu nzo yi ntinu, ayi vangila Mordekai mamoso ngie matuba. Bika kuzimbakana kuvanga mambu matuba.”

11 Bosi Haman wubonga bikhutu wuvuika biawu kuidi Mordekai, wummakisa mu mvalu, ayi wundiengisa va dizandu di divula mu kue tendukanga: “Amama mawu mambu bamvangilanga mutu no ntinu kanzitisa.” 12 Bosi Mordekai wuvutuka va muelu nzo yi ntinu, vayi Haman wufuka ntu ayi wuvutuka ku nzo mu kue dilanga. 13 Haman wuzabikisa kuidi nkazi’andi Zeres ayi kuidi bakundi bandi mambu moso mammonikina, diawu nkazi’andi Zeres ayi bakundi bandi bankambila: “Boti wusa nunga ko Mordekai no wubutukila mu nkuna wu basi yuda mu khumbu ayiyi yitheti, buna zaba kuaku ti walasa kunnunga ko.”

14 Mu thangu bakundi bandi ayi nkazi’andi baba koluka, vayiza bisadi bi ntinu ayi bawu banata Haman mu nkungi Ester kakubika.

7 Ntinu ayi Haman, bayenda mu nkungi Ester kakubika. 2 Bo baba nua vinu mu nkungi wummuadi Ester kakubika, ntinu wubue kamba Ester: “A Ester, mbi wuntomba kundinda? Zaba kuaku ti kioso kua kiuma wu kundinda, minu yinkuiza kuvana!” 3 Ester wumvutudila: “Boti minu yidi lunungu va mesu maku ngie ntinu ayi boti ntinu tidi, yikudinda wuvukisa luzingu luama ayi lu dikabu diama. 4 Kibila minu ayi dikabu diama, ba tuvakudi muingi ba tuvonda. Boti kusumbisa to ba tusumbisidi muingi tuba mimvika, khanu minu yibe vuena sui. Vayi tulendi bika ko mambu amomo mamonika, kibila mawu masinkuiza tuadisa ko ndandu kuidi ntinu.”

5 Ntinu wuyuvula Ester: “Nani wukhambulu boma, wuvengi ntindu mambu amomo mambi?” 6 Ester wumvutudila: “Mbeni wuvengi mambu beni, widi Haman, dibakala adiodio widi mavanga mambi.”

Bo Haman kayuwa mambu amomo, nandi wuba mu boma bu ntinu ayi bu Ester. 7 Bo ntinu kayuwa mambu amomo, nandi wudasuka, wubotuka va nkungi beni, ayi wuyenda kunganda vaba nlumba. Bo Haman kavisa ti ntinu befuema ayi bebaka makani ma kumvonda, diawu kayendila vaba Ester muingi kudinda nlemvu ayi kamvukisa. 8 Bo ntinu kabue kota ku kibuangu baba vangila nkungi, nandi wumona Haman va khonzu mua kika vo vaba Ester, diawu ntinu katubila: “Leka, ngie wuntomba mvandi kubundana nyitu na Ester ku nzo’ama?” Bo ntinu kamana kutuba mambu amomo, bakanga Haman ayi bamfuka kizizi. 9 Harmona, wumueka mu bisadi bi ntinu wutuba: “Haman mvandi wukubikizi dikunzi muingi kuvondila Mordekai, dibakala no wuvukisa luzingu lu ntinu mu mambu katuba. Dikunzi beni Haman kakubikidi, didi va nganda nzo’andi ayi didi 50 di zicovadu mu kukula. Bo ntinu kayuwa mambu amomo, nandi wutuba: “Ledikanu Haman va dikunzi beni.” 10 Mu phila ayoyo, baledika Haman va dikunzi kakubika muingi kuvondila Mordekai, ayi bo bavanga mambu amomo, nganzi yi ntinu yivumbama.

8 Mu kilumbu beni, ntinu wuvana nzo yi Haman mbeni basi yuda kuidi Ester, ayi Mordekai wuyenda vantuala ntinu kibila Ester wuzabikisa ti Mordekai wuba musi dikanda diandi. 2 Bosi ntinu wubonga nela yiba kuidi Haman ayi wuvana yawu kuidi Mordekai, ayi Ester wuvana kuidi Mordekai nzo yi Haman.

3 Bosi Ester wubue yoluka na ntinu. Nandi wufukama vantuala ntinu, wudila ayi wudinda muingi ntinu kabalula mambu maba masonama mu minkanda Haman musi Agague kasonika, matedi kuvonda basi yuda boso. 4 Ntinu wunonuna nkawu’andi wu wola kuidi Ester, bosi Ester wutelama vantuala ntinu. 5 Ester wunkamba: “Boti yibe baka lunungu luaku ayi boti ntinu wu kunzolanga, vana nsua muingi babika tumukina mambu Haman muana Hamedata musi Agague kasonika, muingi kuvonda basi yuda badi mu mavula moso madi mu luyalu luaku. 6 Buidi yilenda vuenina sui kumona mambu mambelama kumonikina dikabu, ayi basi dikanda diama?”

7 Bosi ntinu wukamba Ester ayi Mordekai: “Yivondizi Haman va dikunzi mu kibila ki makani mambi kabaka ma kuvonda basi yuda, ayi yiveni nzo’andi kuidi ngie Ester. 8 Buabu sonika nkanda mu dizina diama, mu matedi basi yuda ayi tulanu wawu kidimbu mu kusadila nela yi ntinu, kibila nkanda bansonikina mu dizina di ntinu ayi bantula kidimbu mu kusadila nela yi ntinu, balendi balulu ko wawu.”

9 Bosi mu kilumbu 23 ki ngonda yi Sivã, bakutikisa minsoniki mi ntinu ayi basonika mamoso Mordekai kaba tomba kuzabikisa kuidi basi yuda, bisadi bi ntinu, minyadi ayi zifumu zi mavula moso, kutonina ku Índia nati ku Etiópia, 127 di mavula. Ayi basonikina minkanda beni mu mbembu bankolukanga mu kadika divula, ayi mvandi mu mbembu yi basi yuda.

10 Mordekai wusonika minkanda beni mu dizina di ntinu, ayi wutula miawu kidimbu mu kusadila nela yi ntinu, nandi wuvana miawu kuidi mimvuala bayendila mu mimvalu mi ntinu. 11 Mu minkanda beni, ntinu wuvana nsua kuidi basi yuda mu mavula moso, muingi bakutakana ayi ba yikakidila. Mvandi bavana nsua wu kuvonda dioso kua dingumba di batu, bannuanisa basi yuda mu mavula moso kubunda mvandi bakazi bawu, bana bawu ayi bafueti bonga biuma biawu. 12 Vaba tombulu kuvanga mambu amomo mu mavula moso mu kiokiawu kilumbu, mu kilumbu 13 ki ngonda yi Adar. 13 Vaba tombulu kutadila zitsangu bafila mu mavula moso buka nsiku. Mvandi vaba tombulu kuzakisa ziawu kuidi batu boso baba mu mavula, muingi basi yuda baba bakubama mu kilumbu beni ayi kunuanisa zimbeni ziawu. 14 Mu lutumu lu ntinu, zimvuala bamaka mu mimvalu mi ntinu, ayi mu thinu bayenda muingi kue zabikisa zitsangu beni ku divula di Suzan.

15 Bosi Mordekai wunanguka vantuala ntinu, nandi wuba wuvuata bikhutu bi zifumu bivangulu mu nledi wu azul ayi wuphembi, ayi wuba wuvuata kiyunga ki thalu kivangulu mu nledi wu violeta, mvandi wuba kolowa ku ntu yivangulu mu wola. Mu kibila ki zitsangu bayamikisa, divula dioso di Suzan diba mu mayangi. 16 Zitsangu aziozio zivukisa luzingu lu basi yuda, mvandi ziba tuadisa mayangi ayi nzitusu. 17 Mu mavula moso bazabikisa zitsangu aziozio, basi yuda bayangalala beni ayi bavanga minkungi. Batu bawombo ba mimvila minkaka baba tuba ti beka basi yuda, kibila baba boma bu basi yuda.

9 Mu kilumbu 13 ki ngonda yi Adar, kilumbu kio zimbeni zi basi yuda baba vingila muingi kuvonda basi yuda boso, vayiza monika diambu adidi: basi yuda bawu bavonda zimbeni ziawu. 2 Basi yuda bakutakana mu mavula moso maba mu luyalu lu ntinu muingi kunuanisa zimbeni ziawu. Ayi zimbeni beni basa nunga ko basi yuda, kibila baboso baba mu mavula beni baba boma mu basi yuda. 3 Zifumu zioso zi mavula, bisadi bi ntinu, minyadi ayi baboso baba kiebanga lungosu lu ntinu, babuela mioko basi yuda kibila baba boma bu Mordekai. 4 Mordekai wuba beni kifumu ku nzo ntinu ayi mambu matedi kifumu kiandi matembakana mu mavula moso, kibila kifumu kiandi kiaba buelama.

5 Ayi basi yuda bavonda baboso baba kuba lendanga. 6 Ku divula di Suzan basi yuda bavonda 500 di batu. 7 Bavonda mvandi Parsandata, Dalfom, Aspata, 8 Porata, Adalia, Aridata, 9 Parmasta, Arisai, Aridai ayi Vaizata, 10 kumi di bana ba Haman mbeni yi basi yuda, muana Hamedata. Vayi basi yuda basa bonga ko biuma bi bana ba Haman.

11 Mu kiokiawu kilumbu, bazabikisa kuidi ntinu thalu yi batu bavonda ku divula di Suzan.

12 Ntinu wukamba Ester: “Boti ku divula di Suzan babe vonda 500 di batu ayi kumi di bana ba Haman, buna mambu mbi babe vanga mu mavula mankaka? Vadi biuma binkaka wuntomba kundinda? Minu yinkuiza kuvana biawu.” 13 Ester wumvutudila: “Boti ntinu tidi, bue vana nsua kuidi basi yuda bankalanga ku divula di Suzan muingi yono babue vanga mambu tube vanga bubu, ayi muingi baledika va makunzi zinyitu zi bana ba Haman. 14 Diawu ntinu kavanina nsua muingi mawu mavangama. Bazabikisa nsua beni ku divula di Suzan ayi baledika va makunzi kumi di bana ba Haman.

15 Mu kilumbu 14 ki ngonda yi Adar, basi yuda babue kutakana ku divula di Suzan ayi babue vonda 300 di batu, vayi basa bonga ko biuma biawu.

16 Basi yuda bankaka baba mu mavula maba mu luyalu lu ntinu, mvandi bakutakana muingi kunuanisa zimbeni ziawu, ayi bavonda 75.000 di batu, vayi basa bonga ko biuma biawu. 17 Bawu bavanga mambu amomo mu kilumbu 13 ki ngonda yi Adar. Vayi mu kilumbu 14 bawu bavunda, bavanga nkungi ayi bayangalala.

18 Vayi basi yuda baba kalanga ku divula di Suzan banuanisa zimbeni ziawu mu kilumbu 13 ayi 14 ki ngonda yi Adar. Mu kilumbu 15 bawu bavunda, ayi kilumbu beni kiyiza ba kilumbu ki nkungi, ayi ki mayangi. 19 Diawu basi yuda baba kalanga mu mavula mankaka bavangila nkungi mu kilumbu 14 ki ngonda yi Adar ayi baba tebukilanga moyo kilumbu beni. Mvandi baba filanga bidia kuidi bankaka.

20 Mordekai wusonika mambu moso amomo ayi wufila minkanda beni kuidi basi yuda baba kalanga mu mavula moso maba mu luyalu lu ntinu. 21 Nandi wuba vana nsua muingi mu kadika mvu, bakembanga nkungi mu kilumbu 14 ayi 15 ki ngonda yi Adar. 22 Kibila mu bilumbu abiobio, basi yuda banunga zimbeni ziawu ayi mu ngonda ayoyo, kiunda baba ki kituka mayangi. Vaba tombulu bawu kutebukilanga moyo bilumbu abiobio ayi kukemba nkungi. Mvandi kufilanga bidia kuidi bankaka ayi kuvananga minkhailu kuidi bakhambulu mbakulu.

23 Basi yuda boso bakikinina muingi bilumbu abiobio biba bilumbu bi kukembila nkungi, ayi kuvanga mamoso Mordekai kaba tuma. 24 Kibila Haman muana Hamedata musi agague mbeni basi yuda, wubaka makani ma kukuba “pur” voti kutesa muingi kuzaba kilumbu mbi bafueti vonda basi yuda boso. 25 Vayi bo Ester kayoluka na ntinu, ntinu wusonika mambu amama: “Bika mambu moso Haman kakana kuvangila basi yuda mamvutukila.” Bosi nandi ayi bana bandi ba baledika va makunzi. 26 Akiokio kiawu kibila batedila bilumbu beni Purim, kiyizila mu kikuma “pur.”* Mu phila ayoyo, mu kutadila mambu moso maba mu minkanda, mambu bamona ayi mambu mamonika, 27 basi yuda, bana bawu ayi baboso bakikinina kuba ku khonzu’awu, babaka makani ma kukembanga nkungi kadika mvu mu bilumbu abiobio ayi kuvanga mamoso maba masonama matedi bawu. 28 Vaba tombulu zimbandu zioso, makanda moso ayi batu boso baba kalanga mu mavula, kukembanga nkungi mu bilumbu abiobio. Mvandi vaba tombulu muingi basi yuda batatamana kukembanga nkungi wu bilumbu bi Purim.

29 Buviokila thangu, basonika nkanda wummuadi matedi bilumbu bi Purim, ayi Ester muana Abiail va kimueka na Mordekai musi yuda, basadila kifumu baba vana, muingi kukikinina mawu. 30 Bosi bafila nkanda beni kuidi basi yuda baba mu 127 di mavula maba mu luyalu lu ntinu, 31 muingi bavanganga nkungi mu bilumbu bi Purim mu thangu batsikika dedi bo Mordekai ayi Ester bavanina nsua. Ayi bavangila mawu mu kutadila makani basi yuda boso ayi bana bawu babaka. 32 Ester wuvana nsua mu mambu amomo matedi bilumbu bi Purim ayi basonika mawu mu buku.

10 Ntinu Assuero wukuika batu kuvanga kisalu kingolo mu mavula moso kaba yadila.

2 Mambu moso ma kukuitukila ntinu kavanga, ayi phila yi kukuitukila kazitisila Mordekai basonika mawu mu buku yintubila matedi binongu bi mintinu mi basi Média ayi Pérsia. 3 Kibila kubotula kuandi ntinu, vasa ba ko mutu wunkaka wuluta kifumu kena Mordekai musi yuda. Basi yuda boso baba kinzikanga beni Mordekai, kibila nandi waba salanga beni muingi kutuadisa ndandu kuidi zikhomba ziandi basi yuda ayi kuidi mvil’andi.