YONA
1 Yave wukamba Yona muana Amitai: 2 “Yenda ku divula di Ninive muingi wuba zabikisa zitsangu zi lufundusu bambelama kutambula, kibila bawu bamvanganga mambu mambi.”
3 Vayi Yona wumanga kutumukina Yave, ayi wubaka makani ma kutina ku Tarsi. Nandi wuyenda ku Jope ayi wuyebata dikumbi diaba kuenda ku Tarsi. Nandi wufuta kitiki muingi kukuenda va kimueka na batu baba kuenda kuna, kibila waba tina Yave.
4 Vayi Yave wutuadisa kivuka ki ngolo mu ḿbu ayi mu kibila akiokio, dikumbi ditona kusinda. 5 Batu bansadilanga mu dikumbi batona kudinda lusadusu kuidi zinzambi ziawu, kibila baba boma. Diawu batonina ku loza mu ḿbu mimfuna miba mu dikumbi, muingi diawu dibika kusinda. Vayi Yona wuba wulala ku kibuangu bantulanga mimfuna mu dikumbi. 6 Ntuadisi wu dikumbi wuyenda vaba Yona ayi wunkamba: “A ngie, telama! Ngie kulala wunlala? Dinda kuidi Nzambi’aku, ḿba Nzambi yikiedika kalenda tusadisa muingi tubika kufua.”
7 Bosi batu baba sadilanga mu dikumbi batuba: “Yizanu tutesa muingi tuzaba mu kibila ki nani tuidi mu kuviokila mu mambu amama.” Bawu batesa ayi babakula ti Yona, nandi wuba fotu. 8 Diawu banyuvudila: “Kibila mbi mambu amama madi mu kutumonikina? Kisalu mbi wumvanganga ayi kuidi befumina? Ngie widi musi nani?”
9 Yona wuba vutudila: “Minu yidi musi Yuda ayi yidi kisadi ki Yave, Nzambi wuvanga diyilu, ḿbu ayi ntoto.”
10 Bo bayuwa mambu amomo, bawu baluta ba boma, diawu banyuvudila: “Mambu mbi bevanga? (Kibila Yona wuba kamba ti nandi waba tina kutumukina kiyeku Yave kamvana.) 11 Bawu banyuvula: “Mbi tufueti vanga muingi kivuka kilembama?” Kibila mayo maba buelama mu ḿbu. 12 Yona wuba vutudila: “Khubanu mu ḿbu ayi wawu wunkuiza lembama; kibila yizebi ti mu kibila kiama, diawu kivuka akiokio kidi mu kumonikina.” 13 Bawu baluta vanga mangolo muingi dikumbi divitila kusimu, vayi basa nunga ko kibila kivuka kiluta buelama ayi ḿbu wubuela kutula mayo.
14 Bosi bawu balomba kuidi Yave: “A Yave, lemvuka bika kutuvonda mu kibila ki dibakala adidi! Bika kutuvana fotu mu kutengula menga ma mutu awuwu, kibila ngie Yave widi mu kuvangila mambu mu kutadila luzolo luaku.” 15 Diawu, bawu bakuba Yona mu ḿbu; ayi muna thangu beni ḿbu wulembama. 16 Mu kibila akiokio, bawu batona kukinzika beni Yave, bavana minkhailu kuidi Yave ayi babaka makani ma kubuongimina to nandi.
17 Bosi Yave wufila fu yinneni yimina Yona. Ayi Yona wuviokisa bilumbu bitatu mu kivumu ki fu.
2 Muna khati kivumu ki fu, Yona wusambila kuidi Yave Nzambi, 2 mu kutuba:
“Bo yiba mu ziphasi yisambila kuidi Yave, ayi nandi wuthambudila.
Mu khati dibumbi, minu yidinda lusalusu.
Ngie wuyuwa nsambu’ami.
3 Bo ngie wukhuba kunneni ḿbu, mayo ma ḿbu ngie wutuadisa maphanga kudiama.
4 Minu yituba: Ngie bekhukisa vantualaku!
Buabu, buidi yala bue nungina kukuenda ku tempelu’aku yinlongo?’
5 Luzingu luama luba va kingiela.
Kibila minu woso yidiama ku tsi nlangu.
Ayi bititi bidi kutsi nlangu bizingama mu ntu’ami.
6 Minu yisinda nati kutsi miongo.
Ayi ntoto wuzibika mielu miandi.
Vayi ngie Yave Nzambi’ami wuthitika kutsi dibumbi.
7 A Yave, bo luzingu luami luba va kingiela, minu yi kutebukila moyo.
Diawu yivangila nsambu ayi nsambu’ami wuvitila ku kibuangu kiaku kinlongo.
8 Baboso bambuongiminanga bitumba, bambandanga Nzambi mbusa, no wummonisanga luzolo lukuikama.
9 Vayi minu kuidi ngie yala vana minkhailu miama muingi ku kutonda.
Yinkuiza vanga mamoso yi kukanikisa.
Kibila ngie Yave, ngie to wulenda vukisa batu.”
10 Bosi Yave wuvana nsua kuidi fu muingi kaluka Yona ku disimu.
3 Bosi Yave wubue tuma Yona mu khumbu yimuadi: 2 “Yenda ku divula di Ninive, muingi wuba zabikisa zitsangu yidi mu kuzabikisa.”
3 Mu thangu beni, Yona wutumukina Yave. Diawu kanangukina ayi kayendila ku divula di Ninive. Muingi kununga kudiata divula beni, vaba tombuluanga bilumbu bitatu, kibila diawu diba beni dinneni. 4 Ayi bo Yona kavitila ku divula di Ninive, kilumbu kitheti kasamuna, nandi wutuba: “40 ma bilumbu to masiedi, bankuiza tulula divula di Ninive.”
5 Diawu, baboso baba kalanga ku divula di Ninive, balekila kiminu mu Nzambi ayi babaka makani ma kuvanga jejum ayi kuvuata zitsaku. 6 Bo ntinu wu Ninive kayuwa zitsangu aziozio, wutelama va kikundu kiandi kifumu, wuvula kiyunga kiandi, wuvuata zitsaku ayi wukala va dibombi. 7 Mvandi, bazabikisa nsiku awuwu ku divula di Ninive:
“Mu nsua wu ntinu ayi wu minyadi, ni mutu voti bibulu bafueti dia kioso kiuma voti kunua nlangu. 8 Batu boso ayi bibulu, bafueti vuata zitsaku, ayi dindanu kuidi Nzambi. Bikanu buphunya, ayi mavanga mambi. 9 Befu kuvanga mawu, ḿba Nzambi yikiedika, wunkuiza lembika nganzi’andi, ayi wunkuiza balula mayindu, muingi tubika fua.”
10 Bo Nzambi yikiedika kamona mangolo bavanga mu kubalula mavanga mawu, nandi wubaka makani ma kubalula mayindu mandi matedi lufundusu kabina batuadisa.
4 Vayi mawu manyongisa Yona, ayi nandi wudasuka beni. 2 Bosi Yona wusambila kuidi Yave: “A Yave, mambu amomo mawu maphanga kukuazuka, diawu yibakila makani ma kutina ku Tarsi mu khumbu yitheti, kibila minu yizebi ti ngie widi Nzambi nkua kiadi, nkua nlemvu, widi mvibudulu ayi wuwedi luzolo lukuikama. Ngie wumbanga mu kiunda bo bankaka bantovuka. 3 Buabu, a Yave phonda kuaku, kibila bulutidi mboti minu kufua kena kuzinga.”
4 Yave wunyuvula: “A Yona, ngie wummuena ti didi diambu dimboti kudasuka?”
5 Yona wubasika ayi wuyenda ku khonzu leste yi divula. Nandi wuvanga muanzu ayi wukala vana, muingi kumona mambu mbi mankuiza monika ku divula beni. 6 Bosi, Yave wumenisa nsinga wuba meza muingi kutuadisa mvevu va kibuangu Yona kaba. Ayi Yona wuyangalala beni bo kamona mawu.
7 Vayi bo buisi bukia, Nzambi yikiedika wuvanga muingi mua nsinga beni kamenisa wuyuma. 8 Bo thangu yibasika, Nzambi wubasisa muinya wungolo, wawu wutuadisa ziphasi kuidi Yona, ayi nandi wubina kuenda taka, diawu katubila: “Bulutidi kuandi kufua, kena kuzinga.”
9 Nzambi wuyuvula Yona: “Ngie widi kibila muingi kudasuka, mu kibila ki mua nsinga awowo yibe kumisa?”
Yona wumvutudila: “Ngete, minu yidi kibila ki kudasuka, diawu yintombila kufua.” 10 Vayi Yave wunkamba: “Ngie bemona kiadi mua nsinga wo bekhambu vata, wo wube mena, ayi bo vabe vioka kilumbu kimueka to wawu wube kuma. 11 Buabu minu yilendi mona ko kiadi kuidi 120.000 di batu badi ku Ninive, bakhambu zaba kusuasisa mamboti ayi mambi, kubunda mvandi bibulu biawu?”