ZITSANGU ZIMBOTI ZISONIKA YOANE

1 Va thonono wuba Diambu, ayi Diambu diba na Nzambi, Diambu beni diba buka nzambi.* 2 Va thonono, nandi wuba na Nzambi. 3 Biuma bioso bivangulu mu nzil’andi, ayi mu bivangu bioso, vasi ko kiuma kivangu mukhambu lusalusu luandi 4 mu nzil’andi luzingu luvangu, ayi luzingu* luyiza ba kiezila kuidi batu. 5 Kiezila kidi mu kulezama ku kitombi, vayi kitombi kisannunga ko.

6 Vayiza monika dibakala dimueka bafila banga mvuala wu Nzambi, dizina diandi Yoane. 7 Dibakala adiodio wuyiza buka mbangi, muingi kuta kimbangi matedi kiezila; ayi muingi mintindu mioso mi batu bakikinina mu nzil’andi. 8 Nandi kasa ba ko kiezila, vayi wuyiza muingi kuta kimbangi matedi kiezila beni.

9 Kiezila ki kiedika kio kinlezamanga kuidi mintindu mioso mi batu, kiaba belama kukuiza mu nza. 10 Nandi wuba mu nza, ayi nza yivangulu mu nzil’andi, vayi nza beni yisa kunzaba ko. 11 Nandi wuyiza kuidi dikabu diandi, vayi bawu basa kunkikinina ko. 12 Vayi nandi wuvana kuidi batu boso bankikinina, luaku lu kuba bana ba Nzambi. Kibila bawu balekila kiminu mu dizina diandi. 13 Ayi bana beni, basa butukila ko mu kinsuni, mu menga, ni mu luzolo lu batu, vayi mu luzolo lu Nzambi.

14 Mu phila ayoyo, Diambu diyiza ba nsuni ayi dizinga yitu, ayi befu tumona nkembu’andi, nkembu buka wu muana wumueka to wu tata. Nandi wuba kiedika ayi wuba lunungu va mesu ma Nzambi. 15 (Yoane wuta kimbangi matedi nandi, mu kutuba: “Awowo, nandi mutu minu yitubila ti: ‘No wunkuiza ku mbus’ami, wuvioka va ntual’ama, kibila nandi wutuama kuzinga kena minu.’”) 16 Mu kibila ki nlemvu’andi ayi kiedika, befu boso tuntatamananga kutambula mamboti malutidi va mbata mamboti malutidi. 17 Kibila Minsiku, miyizila mu Mose, vayi mamboti malutidi ayi kiedika, biyizila mu nzila Yesu Klistu. 18 Vasi ko mutu mana mona Nzambi, vayi muana* wumueka to no widi va khonzu Tata, nandi wu kunzabikisanga.

19 Akiki, kiawu kimbangi Yoane kata, bo basi Yuda bafila zinganga nzambi ayi zilevita, bafumina ku Yelusalemi muingi kunkuvula: “Ngie widi nani?” 20 Nandi kasa manga ko kuba tambudila, bukiedika nandi wutuba: “Minu yisi ko Klistu.” 21 Bawu babue nkuvula: “Buabu ngie widi nani? Elia?” Nandi wuba vutudila: “Ndamba, yisi ko Elia.” Bawu babue nkuvula: “Ngie widi ḿbikudi?” Nandi wuba vutudila: “Ndamba!” 22 Diawu, bawu babue nkuvula: “Ngie widi nani? Wutu kamba muingi befu tubaka mvutu wu kue kamba batu babe tutuma. Mbi wulenda tuba matedi ngie veka?” 23 Nandi wutuba: “Minu yidi mbembu yi mutu yidi mu kutenduka ku thandu: ‘Kubikilanu Yave nzila’, dedi bo ḿbikudi Yesaya katubila.” 24 Batu beni batuma, baba mu dingumba di bafalisi. 25 Bawu babue nkuvula: “Boti ngie wisi ko Klistu, Elia ni ḿbikudi, buabu kibila mbi widi mu kubotikila batu?” 26 Yoane wuba tambudila: “Minu yidi mu kubotikila mu nlangu. Vayi va khat’inu, vadi mutu no benu lukhambu zaba, 27 nandi widi mu kukuiza ku mbus’ama, ayi minu yisi ko wufuana muingi kukutula minsinga mi zisandali ziandi.” 28 Mambu amomo, mamonikina ku Betania, ku disimu dinkaka di muila wu Yolidani, ko Yoane kaba botikila batu.

29 Mu kilumbu kilanda, nandi wumona Yesu wabe kuiza kundengana, ayi wutuba: “Talanu, awowo widi Muana Dimemi di Nzambi, no wunkuiza botula masumu mu nza! 30 Awowo, nandi mutu minu yitubila ti: ‘Ku mbus’ama, kuidi mu kukuiza dibakala wuvioka va ntual’ama, kibila nandi wutuama kuzinga kena minu.’ 31 Minu mvama yabasa kunzabanga ko. Vayi yimbotikilanga batu mu nlangu, mu kibila akiki: muingi basi Isaeli bazaba, nandi widi nani.” 32 Yoane mvandi wuta kimbangi mu kutuba: “Yimona phevi yinlongo kukulumuka ku diyilu buka dibembi, ayi yawu yitatamana mu nandi. 33 Minu mvama yabasa kunzabanga ko, vayi Mutu wuthuma muingi yibotikila mu nlangu wukhamba: ‘Woso mutu wala kulumukina phevi yinlongo, ayi yala tatamana mu nandi, nandi fueti botikila mu phevi yinlongo.’ 34 Minu yimona mawu ayi yita kimbangi ti, nandi widi Muana wu Nzambi.”

35 Mu kilumbu kilanda, Yoane wubue ba va kibuangu beni, na minlandikini miandi miodi, 36 ayi bo kamona Yesu kuviokila vana, nandi wutuba: “Talanu, awowo widi Muana Dimemi di Nzambi!” 37 Bo minlandikini beni bayuwa mawu, bawu balandakana Yesu. 38 Bo Yesu katala ku mbusa ayi kamona ti bawu baba kunlandakana, nandi wuba yuvula: “Mbi benu luidi mu kutomba?” Bawu bamvutudila: “Rabi (dizina dinsundula “nlongisi”), kuidi ngie bevikila?” 39 Nandi wuba kamba: “Yiza monanu.” Bosi bawu bayenda, bamona vama kavikila ayi bakala yandi kilumbu kioso. Kiba kilokula ki kumi. 40 Andele, khomba Simoni Petelo, wuba wumueka mu minlandikini mi miodi bayuwa mambu Yoane katuba, ayi balandakana Yesu. 41 Theti, nandi wuye bata khomb’andi Simoni, ayi wunkamba: “Tuma bakula Mesia” (dizina dinsundula Klistu), 42 bosi, wunnata kuidi Yesu. Bo Yesu kammona, wunkamba: “Ngie widi Simoni, muana Yoane. Tona bubu, bankuiza kutedilanga Sefa” (dizina dinsundula Petelo).

43 Mu kilumbu kilanda, Yesu waba tomba kukuenda ku Ngalili. Bosi nandi wudengana Filipi ayi wunkamba: “Yiza ba nlandikini’ama.” 44 Filipi wuba musi Betesaida, divula dibutukila Andele ayi Petelo. 45 Filipi wudengana mvandi Natanaeli, ayi wunkamba: “Tuma bakula mutu no Mose kasonikina mu Minsiku, ayi no Mimbikudi batubila: Yesu, muana Yozefi, musi Nazaleti.” 46 Vayi Natanaeli wunyuvula: “Bukiedika ti ku Nazaleti, kulenda basikila kiuma kimboti?” Filipi wuntambudila: “Yiza mona.” 47 Bo Yesu kamona Natanaeli kufikama, nandi wutuba matedi nandi: “Awowo, widi musi Isaeli wukiedika, no wukhambu vunanga.” 48 Bosi Natanaeli wunyuvula: “A Mfumu, kuidi ngie wunzabidi?” Yesu wumvutudila: “Ava Filipi ka kutela, bo ngie bedi ku tsi mfigu, minu yibe kumona.” 49 Natanaeli wunkamba: “Rabi, ngie widi Muana Nzambi, ngie widi Ntinu wu Isaeli.” 50 Yesu wumvutudila: “Ngie bekikinina, kibila yibe kukamba ti yibe kumona ku tsi mfigu? Ngie wunkuiza mona mambu malutidi kena amama.” 51 Bosi nandi wuba kamba: “Yiku lukamba mu bukiedika ti: Benu muala mona diyilu kuzibuka, ayi muala mona zimbasi zi Nzambi kukuluka ayi kumaka, mu kibila ki Muana Mutu.”

2 Mu kilumbu kintatu, vaba vangama nkungi wu dikuela ku divula di Kana, ayi ngudi yi Yesu wuba kuna. 2 Yesu ayi minlandikini miandi, mvawu baba tumisa mu nkungi beni wu dikuela.

3 Bo vinu yaba belama kumana, ngudi yi Yesu wutuba: “Bawu basiedi ko vinu.” 4 Vayi Yesu wumvutudila: “Mambu amomo masa tutala ko! Kibila thangu’ami yi kuvanga dioso diambu, yifueniabu ko.” 5 Bosi ngudi yi Yesu wukamba bisadi baba kaba malavu: “Vanganu dioso kua diambu nandi kankuiza lukamba.” 6 Vaba bibasa bisambanu baba tulanga nlangu muingi kuyidiodisa dedi bo bubela kikhulu ki basi Yuda. Kadika kibasa, kiaba kotanga nduka 44 voti 66 di zilitro. 7 Yesu wuba kamba: “Wesanu nlangu mu bibasa abiobio.” Ayi bawu bawesa biawu. 8 Bosi Yesu wuba kamba: “Buabu bonganu mua nkadu ayi yenda vananu kuidi ntuadisi wu nkungi.” Ayi bisadi beni bavanga mawu. 9 Bo ntuadisi wu nkungi kabimba nlangu bakitula vinu mu khambu zaba kuidi yawu yifumina, (vayi bisadi bazaba mambu mamonika); bosi ntuadisi wu nkungi wutumisa dibakala waba kuela 10 ayi wunkamba: “Batu boso bankabanga theti vinu yimboti, ayi bo batu bammana kukolu, bosi bankabulanga vinu yikhambulu beni yimboti. Vayi ngie besueka vinu yimboti nati mu thangu ayiyi.” 11 Yesu wuvanga mambu amomo ku divula di Kana, diba ku Ngalili. Mawu mangitukulu matheti kavanga muingi kumonisa nkembu’andi, ayi minlandikini miandi banlekila kiminu.

12 Bosi Yesu wuyenda ku Kafalinawu va kimueka na mam’andi, zikhomba ziandi ayi minlandikini miandi, vayi basa kala ko kuna bilumbu biwombo.

13 Nkungi wu Pasika wu basi yuda waba fikama ayi Yesu wutombuka ku Yelusalemi. 14 Nandi wuye bata ku tempelu batu baba sumbisa zingombi, mamemi, mabembi ayi batu baba trokanga zimbongo. 15 Mu kibila akiokio, nandi wuvanga kikoti ki minsinga ayi wukukisa batu boso baba sumbisa ku tempelu, wukukisa mvandi mamemi, zingombi ayi wuloza zimbongo zi batu baba troka ayi wutulula zimeza ziawu. 16 Ayi wukamba batu baba sumbisa mabembi: “Botulanu biuma abibi avava! Bikanu kukitula nzo yi Tat’ami, nzo yi lungosu!” 17 Bosi minlandikini miandi batebuka moyo mambu masonama mu Masonoko maba tuba: “Kifuza yidi mu nzo’aku, kiala tatamana mu khati’ami.”

18 Mu kibila akiokio, basi yuda banyuvula: “Kidimbu mbi wulenda tumonisa, kimvana kivisa ti ngie wutambula lutumu lu kuvanga mambu amomo?” 19 Yesu wuba vutudila: “Tululanu tempelu ayoyo ayi minu yinkuiza telimisa yawu mu bilumbu bitatu.” 20 Bosi basi yuda bankamba: “Vatombulu 46 di mimvu muingi kutunga tempelu ayoyo, vayi ngie wuntuba ti wunkuiza telimisa yawu mu bilumbu bitatu?” 21 Vayi tempelu yo nandi kaba tubila, yiba nyitu’andi. 22 Bo bamvulubusa mu bafua, minlandikini miandi batebuka moyo mambu nandi kaba tubanga, ayi bawu bakikinina mu Masonoko ayi mu mambu Yesu katuba.

23 Vayi, bo kaba ku Yelusalemi mu nkungi wu Pasika, bawombo balekila kiminu mu nandi* mu kumona mangitukulu kabe vanganga. 24 Vayi Yesu kabasa bafiatilanga ko beni, kibila wuzaba baboso buboti 25 ayi vabasa tombulu ko ni mutu muingi kuvana kimbangi matedi batu beni, kibila nandi wuzaba mambu maba mu mintima miawu.

3 Mu dingumba di bafalisi, muba dibakala dimueka baba tedilanga Nikodemi, wuba mfumu yi basi yuda. 2 Va builu nandi wuyenda kuidi Yesu ayi wunkamba: “Rabi, tuzebi ti ngie Nzambi wuku fila muingi wuba nlongisi, kibila vasi ko mutu wulenda vanga mangitukulu mo ngie wumvanganga, boti Nzambi kasi ko yandi.” 3 Yesu wumvutudila: “Yiku kamba mu bukiedika ti: Boti mutu kasimbutuka ko mbutukulu yimona, kalendi mona ko Kintinu ki Nzambi.” 4 Nikodemi wunyuvula: “Buidi mutu weka nkulutu kalenda bue butukila? Bukiedika ti nandi kalenda bue kota mu kivumu ki mam’andi, muingi kubue butuka khumbu yinkaka?” 5 Yesu wumvutudila: “Yiku kamba mu bukiedika ti: Boti mutu kasimbotimina* ko mu nlangu ayi mu phevi yinlongo, kalendi kota ko mu Kintinu ki Nzambi. 6 Kioso kua kimbutukila mu nsuni, kidi ki kinsuni, ayi kioso kimbutukila mu phevi, kidi ki phevi. 7 Diawu bika kukuituka kibila yima tuba ti: Benu lufueti butuka mbutukulu yimona. 8 Phemu yimvevubukanga yoso khonzu yawu yitidi, ayi tunkuwanga biyoko biandi, vayi tuzabanga ko kuidi yimfuminanga ayi kuidi yinkuendanga. Buawu mvandi bumbelanga mutu wumbutuka mu kiphevi.”

9 Bosi Nikodemi wunyuvula: “Buidi mambu amomo malenda monikina?” 10 Yesu wumvutudila: “Ngie widi nlongisi ku Isaeli, buabu buidi wunkhambu zabila mambu amomo? 11 Yiku kamba mu bukiedika ti: Befu tuntubanga mambu tuzebi ayi tumvananga kimbangi mambu tumona, vayi benu lukikininanga ko mu kimbangi tumvananga. 12 Minu yibe lukamba mambu ma ntoto, vayi kheti bobo luisinkikinina ko, buabu buidi lunkuiza kikinina minu ku lukamba mambu ma diyilu? 13 Kubotula kuandi amomo, vasi ko mutu mana maka ku diyilu, kubika kuandi Muana Mutu no wukuluka ku diyilu. 14 Dedi bo Mose kazengidikila nyoka ku thandu, buawu mvandi bala zengidikila Muana Mutu, 15 muingi baboso ba kunkikinina, babaka luzingu lu mvu ka mvu.

16 “Kibila Nzambi wuzola batu mu nza, diawu kavanina Muan’andi wumueka to, muingi batu boso ba kunlekila kiminu, babika kubungu, vayi babaka luzingu lu mvu ka mvu. 17 Nzambi kasa fila ko Muana mu nza, muingi kiza fundisa batu mu nza, vayi muingi bavuka mu nzil’andi. 18 Woso mutu wu kunlekila kiminu, kalasa fundusu ko. Vayi woso wukhambu kunlekila kiminu, mafundusu, kibila kasa lekila ko kiminu mu dizina di Muana wumueka to wu Nzambi. 19 Amama, mawu mambu bala fundisila batu mu nza: kiezila kiyiza mu nza, vayi batu bazola kitombi, kubika kuandi kiezila, kibila mavanga mawu maba mambi. 20 Kibila mutu wumvanganga mambu mambi, wunlendanga kiezila ayi nandi kafikamanga ko vadi kiezila, muingi mavanga mandi mabika kumonika. 21 Vayi no wumvanganga mambu ma kiedika, wumfikamanga vadi kiezila, muingi bamona buboti ti mavanga mandi, madi nguizani na luzolo lu Nzambi.”

22 Bosi, Yesu na minlandikini miandi bayenda mu mala mafikama ma divula di Yuda; nandi wuviokisa yawu kuna mua thangu ayi waba botikanga batu. 23 Vayi, Yoane mvandi waba botika batu ku Enom, kibuangu kiba kifikama ku Salim, kibila nlangu wuwombo wuba kuna. Diawu batu baba kuendilanga kuidi nandi, ayi nandi waba kuba botikanga. 24 Mu thangu beni, buna Yoane bantudidiabu ko mu buloku.

25 Bosi minlandikini mi Yoane baba findana ziphaka na musi yuda, mu matedi kuyidiodisa. 26 Minlandikini beni bayenda kue kamba Yoane: “Rabi, tala dibakala no wubedi yaku ku disimu dinkaka di muila wu Yolidani, no ngie wutela kimbangi, widi mu kubotika batu. Ayi batu boso badi mu kukuenda kuidi nandi.” 27 Yoane wuvutudila, mu kutuba: “Mutu kalendi baka ko ni kiuma, boti Nzambi kasa mvana ko kiawu. 28 Benu veka muidi zimbangi ti minu yituba: ‘Minu yisi ko Klistu, vayi bamfila va ntual’andi.’ 29 Dibakala di dikuela, nandi wuvuidi nkietu wu dikuela. Vayi, bo nkundi wu dibakala di dikuela kadi va khonzu’andi, ayi ka kunkuwa, nandi wumbanga beni mu mayangi, mu kibila ki mambu dibakala di dikuela kantuba. Diawu mayangi mami, meka maduka. 30 Kisalu kiandi, kifueti tatamana kubuelama, vayi kisalu kiama, kifueti dekuka.”

31 Mutu no wufumina ku diyilu, nandi lutidi kena batu boso, vayi mutu wubasikila va ntoto, wuntubanga mambu ma ntoto. No wubasikila ku diyilu, lutidi batu boso. 32 Nandi wumvana kimbangi matedi mambu kamona ayi kayuwa, vayi ni mutu kakikininanga ko mu kimbangi beni. 33 Woso mutu wunkikinina kimbangi kiandi, buna wunkikinina ti Nzambi widi wukiedika. 34 Mutu Nzambi kafila, wuntubanga mambu ma Nzambi, kibila Nzambi wumvananga phevi mu kitesu kifuana. 35 Tata wunzolanga Muana, ayi wuyekula biuma bioso mu mioko miandi. 36 Woso wunlekila kiminu mu Muana, wala baka luzingu lu mvu ka mvu. Vayi no wukhambu tumukina Muana, kalasa baka ko luzingu beni, vayi nganzi yi Nzambi yala tatamana mu nandi.

4 Bo Yesu kazaba ti bafalisi bayuwa ti nandi waba luta botika batu kena minlandikini mi Yoane, 2 (kheti naveka Yesu kabasa botikanga ko, vayi minlandikini miandi bawu baba botikanga batu), 3 nandi wunanguka ku Yuda ayi wubue kuenda ku Ngalili. 4 Vayi, vaba tombulu nandi kuviokila ku Samalia. 5 Bosi, nandi wutuka ku divula dimueka di Samalia bantedilanga Sikali, diba difikama mu ndima Yakobi kavana muan’andi Yozefi. 6 Va kibuangu beni, vaba kisima ki Yakobi. Ayi Yesu bo kaba wuvonga mu kibila ki viage, wukala va kisima beni. Kiba kilokula kinsambanu.

7 Nkietu mueka musi Samalia, wuyiza muingi kuteka nlangu. Yesu wunkamba: “Phana mua nlangu.” 8 (Minlandikini miandi, bayenda ku divula muingi kuesumba bidia.) 9 Vayi nkietu beni musi Samalia wunkamba: “A tata, buidi ngie musi Yuda, wu kundindila minu musi Samalia nlangu?” (kibila basi Yuda, babasa wizananga ko na basi Samalia.) 10 Yesu wumvutudila: “Boti ngie zebi nkhailu Nzambi ka kuvana, ayi boti zebi nani wu kukamba: ‘Phana mua nlangu’, ngie khanu wunkuiza ndinda nlangu ayi nandi wunkuiza kuvana nlangu wu luzingu.” 11 Nkietu beni wunkamba: “Ngie wisi ko ni kizenzi muingi kutitikila nlangu, ayi kisima kidi kivinda.* Buabu kuidi wunkuiza bakila nlangu beni wu luzingu? 12 Bukiedika ti ngie lutidi kena nkulu’itu Yakobi, no wu tuvana kisima akiki, ayi wunua nlangu wubasikila muawu va kimueka na bana bandi ayi bibulu biandi?” 13 Yesu wumvutudila, mu kutuba: “Woso mutu wunnua nlangu awowo, wala bue ba phuila. 14 Vayi woso mutu wunnua nlangu minu yi kumvana, kalasa bue ba ko phuila. Ayi nlangu beni wala ba tho yimbasisanga nlangu mu nandi, muingi kuvana luzingu lu mvu ka mvu.” 15 Nkietu beni wunkamba: “A tata, phana nlangu awowo, muingi minu yibika kubue banga phuila, ayi yibika kubue kuizanga va kibuangu akiki, muingi kuteka nlangu.”

16 Yesu wunkamba: “Yenda tela nnuni’aku, bosi vutuka akuku.” 17 Nkietu beni wumvutudila: “Minu yisi ko nnuni.” Yesu wunkamba: “Ngie wunnunga mu kutuba: ‘Minu yisi ko nnuni.’ 18 Kibila ngie wuba banuni batanu, ayi dibakala dio didi mu kuzinga yaku bubu, kasi ko nnuni’aku. Ngie betuba kiedika.” 19 Nkietu beni wutuba: “Yima visa ti ngie widi ḿbikudi. 20 Bakulu bitu, babuongimina Nzambi va mongo awuwu, vayi benu muntubanga ti batu bafueti kuenda to ku Yelusalemi, muingi kue buongimina Nzambi.” 21 Yesu wunkamba: “Kikinina ma yiku kamba, a nkietu: Vala ba thangu yo batu balasa buongimina ko Nzambi va kibuangu akiki, ni ku Yelusalemi. 22 Benu lumbuongiminanga mutu lukhambu zaba; vayi befu tumbuongiminanga mutu tuzebi, kibila phulusu yitonina kuidi basi Yuda. 23 Vayi vala ba thangu, ayi ayiyi, yawu thangu beni, yo batu bambuongiminanga Tata, bala kumbuongimina mu phevi ayi mu kiedika. Kibila Tata, bawu kadi mu kutomba muingi bambuongimina. 24 Nzambi widi phevi, ayi batu ba kumbuongimina, bafueti kumbuongimina mu phevi ayi mu kiedika.” 25 Nkietu beni wunkamba: “Minu yizebi ti Mesia, no bantedilanga Klistu wala kuiza. Bo nandi kala kuiza, wala tukamba mambu moso va nyalu nguba.” 26 Yesu wunkamba: “Minu yidi mu kukoluka yaku, minu Mesia beni.”

27 Muna thangu beni, minlandikini miandi bavitila ayi bayituka, kibila nandi waba koluka na nkietu. Vayi ni wumueka mu bawu kasa nkuvula ko: “A Mfumu, mbi widi mu kutomba?” voti: “Kibila mbi widi mu kukolukila yandi?” 28 Bosi nkietu beni wubika kibasa kiandi ki nlangu, wuyenda ku divula ayi wukamba dikabu: 29 “Yiza monanu dibakala dimueka, no be kukhamba mambu moso minu yivanga. Ḿba nandi Klistu ve?” 30 Bawu bananguka ku divula beni ayi bayenda kuendengana.

31 Bo mambu amomo maba monika, minlandikini miandi batatamana kunkamba: “Rabi, dia.” 32 Vayi nandi wuba kamba: “Minu yambelama kudia bidia bio benu lukhambu zaba.” 33 Mu kibila akiokio, minlandikini miandi batona kuyikuvusa bawu na bawu: “Vadi mutu bentuadila bidia muingi kadia?” 34 Yesu wuba kamba: “Bidia biama bidi, kuvanga luzolo lu mutu wuthuma, ayi kumanisa kisalu kiandi. 35 Benu luntubanga ti zingonda zinna zinkhambu, muingi kutona kuvela mbongu. Buabu yuwanu mambu yiku lukamba: Vumunanu thalu ayi talanu zitsola zio zieka zifuana muingi kuvela. Kutonina kuandi bubu, 36 mutu wumvela mbongu widi mu kutambula mfutu’andi, ayi widi mu kukutikisa mimbutu miala tambula luzingu lu mvu ka mvu. Muingi mutu wumvata ayi no wumvela bayangalala va kimueka. 37 Kibila matedi mambu amomo, ngana ayiyi yidi yikiedika: Wumueka widi mvati, ayi wunkaka widi mutu wumvelanga mbongu. 38 Minu yibe lutuma muingi mue vela mbongu yo lukhambu kuna. Bankaka bawu bavanga kisalu kingolo, vayi benu luidi mu kubakila ndandu mu kisalu kiawu.”

39 Basi Samalia bawombo ku divula beni, balekila kiminu mu nandi, mu kibila ki kimbangi nkietu wunani kavana, bo katuba: “Nandi bekhamba mambu moso yivanga.” 40 Diawu, bo basi Samalia batuka vo nandi kaba, bandinda muingi kakala yawu ayi nandi wukala kuna bilumbu biodi. 41 Mu phila ayoyo, batu bawombo bankaka bakikinina, mu kibila ki mambu Yesu katuba, 42 diawu bakambila nkietu beni: “Befu tuisinkikinina ko to mu kibila ki mambu ngie be tukamba, kibila befu veka tuma kuwa ayi tuma mona ti dibakala adiodio, widi mvukisi wu nza.”

43 Bo bilumbu beni bivioka, nandi wunanguka kuna ayi wuyenda ku Ngalili. 44 Naveka Yesu waba tubanga ti ḿbikudi banzitisanga ko ku divula diandi. 45 Vayi bo katuka ku Ngalili, basi ngalili banyamba buboti kibila bamona mambu moso nandi kavanga mu nkungi ku Yelusalemi, kibila bawu mvawu bayenda mu nkungi beni.

46 Bosi, nandi wubue kuenda ku Kana, divula diba ku Ngalili, ko kavangila mangitukulu ma kukitula nlangu vinu. Ayi kisadi kimueka ki ntinu kiba kuna, no wuba muana waba bela ku divula di Kafalinawu. 47 Bo dibakala beni kayuwa ti Yesu wunanguka ku Yuda ayi waba kuenda ku Ngalili, nandi wuyenda kuendengana ayi wundinda kenda yandi, muingi kabelusa muan’andi, kibila waba belama kufua. 48 Vayi Yesu wunkamba: “Boti benu luisimmona ko bidimbu ayi mangitukulu, mulendi kikinina ko.” 49 Kisadi beni ki ntinu wunkamba: “A Mfumu, lemvuka yiza muingi muan’ama kabika fua.” 50 Yesu wunkamba: “Yenda kuaku, kibila muan’aku mabeluka.” Dibakala beni wukikinina mu mambu Yesu katuba, diawu kayendila. 51 Bo dibakala beni kaba vutuka, bisadi biandi bayiza kundengana ayi bankamba ti, muan’aku mabeluka. 52 Bosi nandi wuba yuvula thangu kabelukila. Bawu bantambudila: “Zifebre ziandi zimeni kibedi yono, mu kilokula ki sambuadi.” 53 Dibakala beni wuvisa ti yawu thangu Yesu kankamba: “Muan’aku mabeluka.” Nandi ayi baboso baba ku nzo’andi, balekila kiminu mu Yesu. 54 Ayoyo, yawu khumbu yimmuadi Yesu kavanga mangitukulu bo kafumina ku Yuda, muingi kukuenda ku Ngalili.

5 Bosi basi Yuda bakemba nkungi’awu ayi Yesu wuyenda ku Yelusalemi. 2 Ku Isaeli, va ndeku muelu wu mamemi, kuba ditanga di nlangu baba tedilanga mu kiebeleo Betezata. Diawu diba mintanda mitanu mi makunzi. 3 Zimbevu ziwombo babe kuendanga* va kibuangu beni, dedi: Ziphovo, bikata ayi batu babela binama. 4*⁠ —— 5 Ayi vaba dibakala dimueka wuba kimbevu mu 38 di mimvu. 6 Mu kumona ti dibakala beni dinonuka vana ayi mu kuzaba ti nandi wuba kimbevu mu mimvu miwombo, Yesu wunyuvula: “Ngie wuntomba kubeluka?” 7 Dibakala beni wumvutudila: “A Mfumu, vasi ko ni mutu wulenda kutsadisa kudoduka mu ditanga bo nlangu wunyikuka, ayi bo yintombanga kukuenda, vammonikanga wunkaka wuntuamanga va ntual’ama.” 8 Yesu wunkamba: “Telama! Bonga kiteva kiaku ayi tona kudiata.” 9 Muna thangu beni, dibakala beni wubeluka, wubonga kiteva kiandi ayi wutona kudiata.

Kiawu kiba kisabala. 10 Diawu, basi Yuda batona kukamba dibakala beni babelusa: “Bubu kisabala, wisi ko nsua wu kunata kiteva.” 11 Vayi dibakala beni wuba vutudila: “Nonandi mutu be kumbelusa nandi be kukhamba: ‘Bonga kiteva kiaku ayi diata.’” 12 Bawu banyuvula: “Dibakala mbi be kukamba: ‘Bonga kiteva kiaku ayi diata’?” 13 Vayi dibakala beni babelusa, kasa zaba ko mutu wumbelusa, kibila Yesu wufielubuka va khati nkangu wu batu wuba vana.

14 Bosi, Yesu wudengana dibakala beni ku tempelu ayi wunkamba: “Tala, ngie ma beluka. Diawu bika kubue vanga mambu mambi* muingi mambu malutidi mabika kukuizila.” 15 Dibakala beni wuyenda ayi wukamba basi Yuda ti mutu wumbelusa widi Yesu. 16 Mu kibila akiokio, diawu basi Yuda baba lendilanga Yesu, kibila nandi waba vangilanga mambu amomo mu kisabala. 17 Bosi Yesu wuba kamba: “Tat’ama wuntatamananga kusala nati bubu ayi minu mvama yidi mu kusala.” 18 Diawu basi Yuda baba tombila kumvonda, kibila bakana ko to mu kibila ki mambu amomo kaba vanganga mu kisabala, vayi mvandi kibila waba tedilanga Nzambi Tat’andi, mu kuyidedikisa na Nzambi.

19 Mu phila ayoyo, Yesu wuba kamba: “Yiku lukamba mu bukiedika ti: Muana kalendi vanga ko ni diambu dimueka mu lutia luandi veka, vayi wumvanganga to mambu kammona Tat’andi kuvanga. Kibila mambu Tata kamvanganga, mawu mvandi Muana kamvanganga. 20 Kibila Tata wunzolanga Muana ayi wu kummonisanga mambu moso kamvanganga. Mvandi wala kummonisa mambu malutidi kena amama, muingi benu luyituka mu mawu. 21 Ayi dedi bo Tata kamvulubusilanga bafua ayi kuba vana luzingu, bobuawu mvandi, Muana wumvananga luzingu kuidi woso kua mutu katidi. 22 Kibila Tata kafundisanga ko ni mutu, vayi wuvana kiyeku akiokio ki kufundisa kuidi Muana, 23 muingi batu boso bazitisa Muana dedi bo banzitisilanga Tata. Woso wukhambu zitisa Muana, kazitisanga ko Tata no wufila Muana. 24 Yiku lukamba kiedika ti: Woso wunkuwa mambu mami ayi wunkikinina Mutu no wuthuma, wala baka luzingu lu mvu ka mvu ayi nandi kalasa fundusu ko, vayi wala botuka ku lufua muingi kubaka luzingu.

25 “Bukiedika yiku lukamba ti: Vala ba thangu ayi ayiyi yawu thangu beni yo batu bafua bala kuwa mbembu yi Muana Nzambi ayi bo bala teka matu, bala zinga. 26 Dedi bo Tata* kadidi mangolo ma kuvana luzingu kuidi batu, bobuawu mvandi wuvana Muana mangolo ma kuvana luzingu kuidi batu. 27 Ayi wumvana kimfumu ki kumfundisa, kibila nandi widi Muana Mutu. 28 Diawu, bikanu kukuituka mu mambu amomo, kibila vala ba thangu yo baboso badi ku biziami* bela kuwa mbembu’andi 29 ayi bala basika: baboso bavanga mambu mamboti, bala vulubuka muingi kuzinga ayi baboso bavanga mambu mambi, bala vulubuka muingi kufundusu. 30 Yilendi vanga ko ni kiuma mu lutia luama veka. Vayi dedi bo Tata ka kukhambila, buawu yimfundisilanga ayi mfundusulu’ama yidi yisonga, kibila yitombanga ko kuvanga luzolo luama, vayi luzolo lu mutu no wuthuma.

31 “Minu kukamba batu matedi minu veka, bawu basinkuiza kikinina ko mu mambu yinkuiza tuba. 32 Vayi vadi mutu wunkaka wumvananga kimbangi matedi minu, ayi minu yizebi ti mambu nandi kantubanga matedi minu, madi makiedika. 33 Benu lufila batu kuidi Yoane, ayi nandi wuvana kimbangi ki kiedika. 34 Vasintombulu ko mutu wunkaka kukamba batu matedi minu, vayi yiku lukambila mambu amomo, muingi benu lubaka luzingu. 35 Yoane wuba buka muinda wutatama ayi wunlezama, ayi mu mua thangu benu luba bakubama muingi kukuangalala mu kiezila kiandi. 36 Vayi minu yidi mambu malutidi kena mo Yoane katuba, kibila mambu Tata kaphana kiyeku ki kuvanga, ayi mo yimvanganga, mamvana kimbangi ti Tata nandi wuthuma. 37 Mvandi, naveka Tata wutuba ti nandi wuthuma. Benu lualasa kuwa ko mbembu’andi ayi lualasa mona ko phila nandi kadidi, 38 ayi diambu diandi disi ko mu benu, kibila benu lukikininanga ko mu mutu no wuthuma.

39 “Benu lumfionguninanga Masonoko kibila munyindulanga ti buawu lunkuiza bakila luzingu lu mvu ka mvu, ayi Masonoko beni mantubila matedi minu. 40 Vayi kheti bobo, benu lumengi kundandakana muingi lubaka luzingu lu mvu ka mvu. 41 Minu yisintomba ko muingi batu baphana nzitusu, 42 vayi minu yizebi ti benu luzolanga ko Nzambi. 43 Minu yiyizila mu dizina di Tat’ama, vayi benu lusa kukhikinina ko. Vayi va kuba mutu wunkaka wunkuizila mu dizina diandi veka, benu lunkuiza nkikinina. 44 Buidi benu lulenda kikinina, boti luyizitisanga benu na benu, vayi lutombanga ko lunungu* lunkuizila kuidi Nzambi yimueka to? 45 Bikanu kuyindula ti minu yinkuiza lufunda kuidi Tata, vayi vadi mutu wunkaka wu lufunda: Mose no benu lumfiatilanga. 46 Diawu, boti benu lukikinina mu Mose, khanu mvandi luidi mu kukhikinina, kibila nandi wusonika matedi minu. 47 Buabu, boti benu lusa kikinina ko mu mambu nandi kasonika matedi minu, buna buidi lunkuiza kikinina mu mambu yintuba?”

6 Bosi, Yesu wuyenda ku khonzu yinkaka yi ḿbu wu Ngalili, bantedilanga mvandi Tibeliade. 2 Ayi nkangu wu batu waba kuenlandakananga, kibila baba monanga mangitukulu nandi kaba vanganga mu kubelusa zimbevu. 3 Bosi Yesu wutombuka va mbata mongo ayi wukala kuna na minlandikini miandi. 4 Ayi Pasika, nkungi wu basi Yuda waba fikama. 5 Bo Yesu kavumuna thalu ayi kamona nkangu wu batu waba fikama, nandi wuyuvula Filipi: “Leka, kuidi tukue sumbila mapha muingi nkangu woso awowo wu batu badia?” 6 Kaba tubila mawu, muingi kuzaba to mayindu ma Filipi, vayi naveka wuzaba mambu kankuiza vanga. 7 Filipi wumvutudila: “Mapha ma khama wadi di zidenario masi ko mafuana muingi kadika mutu kabaka ni kheti kitini.” 8 Wumueka mu minlandikini miandi baba tedilanga Andele, khomba Simoni Petelo, wunkamba: 9 “Avava vadi muana mueka wu dibakala, widi mapha matanu ayi zimfu wadi. Vayi kheti bobo, masinkuiza fuana ko mu nkangu woso awowo.”

10 Yesu wutuba: “Kambanu batu muingi bakala.” Va kibuangu beni vaba nlumba ayi mu kutala mu kumona 5.000 di babakala baba vana bakala. 11 Yesu wubonga mapha beni, wuvanga nsambu, bosi wukabila kuidi batu baba vana bakala. Mawu mvandi kavanga mu mua zimfu beni ayi bawu badia nati bayukuta. 12 Vayi bo bawu bayukuta, Yesu wukamba minlandikini miandi: “Kongulanu bitini bima sobila, muingi vabika bungana ni kiuma.” 13 Diawu, bawu bakongula bitini bisobila ayi bawesa 12 di biphani, mu mapha beni matanu bawu badia.

14 Bo dikabu bamona mangitukulu nandi kavanga, bawu batuba: “Bukiedika, awowo nandi ḿbikudi batubila wala kuiza va nza.” 15 Bo Yesu kazaba ti baba tomba kumbuila muingi kumbieka ntinu, nandi wunanguka vana ayi wuyenda va mbata mongo naveka.

16 Bo buisi buyila, minlandikini miandi banengumuka ku ḿbu. 17 Bamaka mu buatu ayi bananguka. Bosi basabuka ḿbu muingi kukuenda ku Kafalinawu, vayi Yesu kasa fika vitila ko vo baba. 18 Ayi ḿbu wutona kutula mayo manneni, kibila kuaba tona kivuka kingolo. 19 Vayi bo bavuila* buatu mu zimetro zitanu voti zisambanu, bamona Yesu kudiata va mbata nlangu ayi kufikama vaba buatu. Mu kibila akiokio, bawu baba beni mu boma. 20 Vayi nandi wuba kamba: “Bikanu kumona boma ka minu Yesu!” 21 Bosi bawu bakikana muingi nandi kamaka mu buatu ayi bawu bavitila va kibuangu baba kuenda.

22 Mu kilumbu kilanda, nkangu wu batu wuba ku disimu dinkaka di ḿbu babakula ti buatu bumueka to buba vana ayi Yesu kasa maka ko muawu, vayi minlandikini miandi bananguka baveka. 23 Bosi miatu miba ku Tibeliade mivitila ku kibuangu kio bawu badila mapha, bo Mfumu kamana kuvanga nsambu. 24 Bo nkangu wu batu bakhambu mona Yesu ni minlandikini miandi vana, bawu bamaka mu miatu miawu ayi bayenda ku Kafalinawu, muingi kue tomba Yesu.

25 Bo bawu bamona Yesu ku disimu dinkaka di ḿbu, banyuvula: “Rabi, thangu mbi ngie bevitila akuku?” 26 Yesu wuba vutudila: “Yiku lukamba mu bukiedika ti: Benu luidi mu kuthombila kubika ti mu kibila ki mangitukulu yivengi, vayi kibila benu ludidi mapha ayi luyukutizi. 27 Bikanu kuvanga mangolo muingi kubaka to bidia bimbolanga, vayi vanganu mangolo muingi lubaka bidia bintuadisanga luzingu lu mvu ka mvu, bio Muana Mutu kala luvana, kibila naveka Nzambi wutula mu nandi kidimbu kiandi ki lunungu.”

28 Bosi bawu banyuvula: “Buabu, mbi bintombulu mu befu, muingi tuvanga kisalu ki Nzambi?” 29 Yesu wuba vutudila: “Amama, mawu Nzambi kantomba: lekilanu kiminu mu mutu wo nandi kafila.” 30 Bosi bawu bankamba: “A Mfumu, kidimbu mbi wunkuiza tumonisa, muingi tu kukikinina? Diambu mbi di kukuitukila wunkuiza vanga? 31 Bakulu bitu badia maná ku thandu dedi bo busonimina: ‘Nzambi wuba vana dipha difumina ku diyilu muingi badia.’” 32 Bosi Yesu wuba kamba: “Bukiedika yiku lukamba ti: Mose kasa muvana ko dipha difumina ku diyilu, vayi Tat’ama widi mu ku luvana dipha dikiedika difumina ku diyilu. 33 Kibila mutu no wufumina ku diyilu, nandi dipha di Nzambi ayi nandi wumvananga luzingu kuidi batu.”* 34 Diawu bawu bankambila: “A Mfumu, wu tuvananga dipha adiodio.”

35 Yesu wuba kamba: “Minu yidi dipha dimvananga luzingu lukiedika. Woso wu kundandakana, kalasa bue mona ko nzala ayi woso wu kundekila kiminu, kalasa bue ba ko phuila. 36 Vayi, dedi bo minu yiku lukambila, benu lumbona vayi kheti bobo luisi kukhikinina ko. 37 Batu boso Tata ka kuphana, bala kuiza kuidi minu ayi minu yilendi manga ko woso wu kundandakana. 38 Kibila yikulukila ku diyilu bika ti muingi kuvanga luzolo luama, vayi muingi kuvanga luzolo lu mutu wuthuma. 39 Alulu luawu luzolo lu mutu wuthuma: ti minu yibika zimbisa ni wumueka mu batu kaphana, vayi nandi kantomba muingi yiba vulubusa mu kilumbu kitsuka. 40 Alulu luawu luzolo lu Tat’ama: nandi kantomba, woso mutu wunkikinina mu Muana ayi wu kunlekila kiminu, kabaka luzingu lu mvu ka mvu, ayi minu yala kumvulubusa mu kilumbu kitsuka.”

41 Bo Yesu katuba: “Minu yidi dipha difumina ku diyilu.” Basi Yuda batona kunyunguta mu kibila akiokio. 42 Ayi batona kutuba: “Anono kasi ko Yesu muana Yozefi? Ka tuzebi tat’andi ayi mam’andi ve? Buabu, kibila mbi kadi mu kutubila: ‘Minu ku diyilu yifumina’?” 43 Yesu wuba kamba: “Bikanu kunyunguta benu veka. 44 Vasi ko ni mutu kalenda kuiza kuidi minu, boti Tata wuthuma, kasi kuntumisa* ko, ayi minu yala kumvulubusa mu kilumbu ki tsuka. 45 Kibila mimbikudi basonika: ‘Baboso bala kuba longa kuidi Yave.’ Diawu, woso mutu wunkuwa malongi ma Tata ayi wunlonguka, wala kuiza kuidi minu. 46 Vasi ko mutu wumana mona Tata kubotula kuandi no wufumina kuidi Nzambi. Anono, nandi wumona Tata. 47 Bukiedika yiku lukamba ti: Woso wunkikinina, wala baka luzingu lu mvu ka mvu.

48 “Minu yidi dipha dimvananga luzingu lukiedika. 49 Bakulu binu badia maná bo baba ku thandu, vayi kheti bobo bawu bafua. 50 Vayi adidi, diawu dipha difumina ku diyilu, muingi woso kua mutu wundia diawu, kabika fua. 51 Minu yidi dipha di luzingu difumina ku diyilu. Ayi woso kua mutu wala dia dipha beni, wala zinga mvu ka mvu. Bukiedika, dipha yala kumvana, dinsundula nyitu’ama yala vana luzingu kuidi batu mu nza.”

52 Bosi basi Yuda batona kuyikuvusa baveka, mu kutuba: “Buidi dibakala adiodio kalenda tuvanina nyitu’andi muingi tudia?” 53 Mu phila ayoyo, Yesu wuba kamba: “Bukiedika yiku lukamba ti: Benu khambu dia nyitu yi Muana Mutu ayi kunua menga mandi, lulendi baka ko luzingu.* 54 Woso wundia nyitu’ama ayi wunnua menga mami, wala baka luzingu lu mvu ka mvu ayi minu yala kumvulubusa mu kilumbu kitsuka, 55 kibila nyitu’ama yidi bidia bikiedika ayi menga mami, madi malavu makiedika. 56 Woso wundia nyitu’ama ayi wunnua menga mami, wuntatamananga yama kithuadi ayi minu yimbanga yandi kithuadi. 57 Dedi bo Tata, no widi wumoyo kathumina ayi minu yididi wumoyo mu kibila ki Tata, buawu mvandi woso mutu wundia nyitu’ama, wala baka luzingu mu kibila kiama. 58 Adidi diawu dipha difumina ku diyilu. Diawu disi ko buka dio bakulu binu badia, vayi kheti bobo bawu bafua. Woso wundia dipha adidi, wala baka luzingu lu mvu ka mvu.” 59 Yesu wutuba mambu amomo mu thangu kaba longa ku nzo lukutukunu yi Kafalinawu.

60 Bo bayuwa mawu, bawombo mu minlandikini miandi batuba: “Mambu amomo ngolo madi. Nani wulenda kuwa mawu?” 61 Vayi, bo kamona ti minlandikini miandi baba nyunguta mu mambu katuba, Yesu wuba yuvula: “Mawu mabe lulueka ntima?* 62 Buabu, benu kumona Muana Mutu kuvutuka ku kibuangu kafumina, khanu mambu mbi malenda monika? 63 Phevi yawu to yimvananga luzingu. Batu* balendi baka ko luzingu mu baveka. Mambu amama yima lukamba madi ma kiphevi ayi mamvananga luzingu. 64 Vayi bankaka mu benu basinkikinina ko.” Kibila tona vana thonono, Yesu wuzaba banani bankuiza manga kukikinina ayi nani wunkuiza mvakula. 65 Nandi wubue tuba: “Diawu minu yibe lukambila ti: Ni mutu kalendi kuiza ko kuidi minu, boti Tata kasa mvana ko luaku alolo.”

66 Mu kibila akiokio, bawombo mu minlandikini miandi bavutuka kuawu mu bisalu biawu babika ayi babasa bue diatanga ko yandi. 67 Bosi Yesu wuyuvula kuidi Kumi Wadi di bapostolo bandi: “Benu mvinu luntomba kukuenda?” 68 Simoni Petelo wumvutudila: “A Mfumu, nani wunkaka tulenda landakana? Kibila ngie widi malongi mamvananga luzingu lu mvu ka mvu. 69 Befu tunkikinina ayi tuzebi ti ngie widi kisadi Kinlongo ki Nzambi.” 70 Yesu wuba vutudila: “Benu kumi wadi muidi avava, yisi ko minu yi musola? Vayi kheti bobo, wumueka mu benu widi mayindu ma Satana.” 71 Yesu waba tubila matedi Yuda muana Simoni Isikalioti, kibila nandi wuyiza kumvakula, kheti wuba wumueka mu Kumi Wadi di bapostolo.

7 Bosi Yesu wutatamana kuvanga kisalu kiandi ku Ngalili, ayi wumanga kufika kuenda ku Yuda, kibila basi yuda baba tomba kumvonda. 2 Vayi, nkungi basi yuda babe vangilanga mu Mavuala,* waba fikama, 3 ayi zikhomba ziandi bankamba: “Nanguka avava ayi yenda ku Yuda, muingi minlandikini miaku mvandi bamona mambu ma kukuitukila widi mu kuvanga. 4 Kibila vasi ko mutu wuntomba kuba wuzabakana, wumvangilanga mambu ku kinsueki. Boti ngie widi mu kuvanga mambu amomo, buna wufueti kuyizabikisa kuidi batu.” 5 Vayi zikhomba ziandi, babasa lekilanga ko kiminu mu nandi. 6 Diawu Yesu kaba kambila: “Thangu’ama yifueni’abu ko, vayi kuidi benu, yoso thangu yidi yifuana. 7 Batu mu nza basi ko kibila muingi ku mulenda, vayi bawu ba kundendanga, kibila minu yimvananga kimbangi matedi mavanga mawu mambi. 8 Tombukanu ku Yelusalemi mu nkungi, vayi minu yisimfika kuenda ko mu nkungi beni, kibila thangu’ama yifueni’abu ko.” 9 Diawu, bo kamana kuba kamba mambu amomo, nandi wutatamana ku Ngalili.

10 Bo zikhomba ziandi batombuka ku nkungi beni, nandi mvandi wutombuka, vayi wuvangila mawu ku kinsueki. 11 Diawu basi yuda batona kuntombila kuna nkungi beni, ayi baba tuba: “Kuidi dibakala adiodio kadi?” 12 Ayi va khati nkangu, bawombo baba bokutina* matedi nandi. Bankaka baba tuba: “Nandi widi mutu wumboti.” Bankaka baba tuba: “Ndamba, nandi widi mu kuvuna batu.” 13 Ni mutu waba tubanga matedi nandi va nyalu nguba, kibila baba monanga boma basi yuda.

14 Bo vavioka nduka bilumbu binna tona nkungi wutona, Yesu wutombuka ku tempelu ayi wutona kulonga kuna. 15 Basi yuda bayituka ayi baba tuba: “Buidi dibakala adiodio kadidi beni nzailu mu Masonoko, boti nandi kasa longuka ko mu kikola?”* 16 Bosi Yesu wuba vutudila: “Mambu minu yinlonganga, masi ko mami, vayi madi ma mutu no wuthuma. 17 Boti mutu tidi kuvanga luzolo lu Nzambi, buna wala zaba boti malongi amama madi ma Nzambi, voti mambu yidi mu kukoluka, madi mami. 18 Mutu wunlonganga mayindu mandi veka, wuntombanga nkembu’andi, vayi mutu wuntombanga nkembu wu mutu wumfila, wuntubanga kiedika ayi wumvangilanga mambu moso mu phila yisonga. 19 Mose wulu vana Minsiku ve? Vayi ni wumueka mu benu katumukinanga ko miawu. Buabu, kibila mbi muntomba kuphondila?” 20 Bawu bantambudila: “Ngie phevi yimbi yidi yaku. Nani wuntomba ku kuvonda?” 21 Yesu wuba vutudila mu kuba kamba: “Diambu dimueka to yima vanga, vayi kheti bobo, benu muidi mu kukuituka. 22 Yindulanu mambu amama: Mose wulu vana nsiku wu kuzengisa nyitu yi kibakala (kubika ti kuidi Mose kuyizila nsiku awowo, vayi kuidi bakulu binu), ayi benu lunzengisanga nyitu yi kibakala mu kisabala. 23 Boti banzengisanga nyitu yi kibakala mu kisabala, muingi mubika levula Minsiku mi Mose, buabu kibila mbi mube kundasukila, bo yibe belusa mutu mu kisabala? 24 Bikanu kufundisa to mu kutadila mambu mammonika va mbata, vayi fundisilanu mu busonga.”

25 Bosi mua ndambu mu batu baba kalanga ku Yelusalemi, batona kutuba: “Kasi ko nandi dibakala beni bantomba kuvonda? 26 Vayi nandi widi kuandi va nyalu nguba, ayi basi kunkamba ko ni diambu. Mawu mansundula ti bakulutu bitu bankikinina ti nandi widi Klistu? 27 Befu tuzebi kuidi dibakala adiodio kafumina, vayi bo Klistu kala kuiza, ni mutu kalasa zaba ko kuidi nandi kala fumina.” 28 Bosi, bo kaba longa ku tempelu, Yesu wutuba mu mbembu yinangama: “Benu lunzabizi, ayi luzebi kuidi minu yiba. Minu yisa kuizila ko mu lutia luama veka, vayi mutu no wuthuma widi wukiedika, ayi benu lusa kunzaba ko. 29 Minu yinzebi, kibila yidi mvual’andi ayi nandi wuthuma.” 30 Mu kibila akiokio baba tombila kumbuila, vayi ni mutu kasa nunga ko kunsimba, kibila thangu’andi yisa ba ko yifuana. 31 Vayi bawombo mu nkangu wu batu banlekila kiminu, ayi baba tuba: “Bukiedika ti bo Klistu kala kuiza, wala luta vanga mambu ma kukuitukila khena dibakala adiodio?”

32 Bo bafalisi bayuwa nkangu wu batu kubokutina mambu amomo matedi nandi, zimfumu zi zinganga nzambi va kimueka na bafalisi, bafila minsungi mi tempelu muingi bambuila. 33 Bosi Yesu wutuba: “Yinkuiza kala yinu mua thangu, ava minu kuvutuka kuidi mutu wuthuma. 34 Benu muala kuthomba, vayi mualasa kumbakula ko, ayi ko yinkuenda, benu mulendi nunga ko kukuenda kuawu.” 35 Diawu, basi yuda batona kuyikuvusa: “Kuidi dibakala adiodio kantomba kukuenda, ko befu tulendi nunga ko kumbakula? Bukiedika ti nandi wuntomba kukuenda kuidi basi yuda batiamuka mu bibuangu binkalanga basi ngeleko, muingi kalonga basi ngeleko? 36 Mbi nandi kantomba kutuba mu bikuma abibi: ‘Benu muala kuthomba, vayi mualasa kumbakula ko, ayi ko yinkuenda, benu mulendi nunga ko kukuenda kuawu’?”

37 Mu kilumbu ki tsuka, kilumbu kilutidi nkinza mu nkungi, Yesu wutelama ayi wutuba mu mbembu yinangama: “Boti vadi mutu widi phuila, kiza kuidi minu ayi kanua. 38 Woso wunlekila kiminu mu minu, ‘mu khati’andi muala kumba nlangu wu luzingu, dedi bo Masonoko mantubila’.” 39 Vayi nandi waba tubila matedi phevi, yo batu ba kunlekila kiminu, bala tambula; kibila nati mu thangu beni, ni mutu kasa tambula ko phevi, kibila buna Yesu katambudiabu ko nkembu. 40 Bankaka mu nkangu wu batu bayuwa mambu amomo, batona kutuba: “Bukiedika, anono widi Ḿbikudi.” 41 Bankaka baba tuba: “Anono, widi Klistu.” Vayi bankaka baba tuba: “Bukiedika kuandi ti Klistu, kalenda kuizila ku Ngalili? 42 Masonoko masintuba ko ti Klistu, wala kuizila mu nkuna Davidi, ayi ti wala butukila ku Betelemi, buala bo Davidi kabutukila?” 43 Mu phila ayoyo, nkangu wu batu wuyiza ba wukabuka, mu kibila kiandi. 44 Bankaka mu bawu, baba tomba kunkanga, vayi ni mutu kasa nunga ko kunsimba.

45 Bosi, minsungi bavutuka kuidi zinganga nzambi ayi bafalisi. Bawu baba yuvula: “Kibila mbi lube khambu tuadila Yesu akuku?” 46 Minsungi beni baba vutudila: “Tumueni’abu ko mutu wunkolukila mu phila yinani!” 47 Bosi bafalisi baba kamba: “Leka, benu mvinu babe ku luvuna? 48 Vadi wumueka mu zimfumu zitu, voti bafalisi babe kunlekila kiminu? 49 Vayi nkangu wu batu badi mu kunlekila kiminu, basa zaba ko Minsiku, badi batu basingu.” 50 Vayi wumueka mu bawu, no baba tedilanga Nikodemi, no wuyenda kuidi Yesu mu bilumbu bivioka, wuba kamba: 51 “Bukiedika ti Minsiku mitu mimvana nsua wu kufundisa mutu, mukhambu kunkuwa theti ayi kuzaba mambu kamvanga?” 52 Bawu bamvutudila: “Ngie mvaku widi musi Ngalili? Fiongunina ayi wunkuiza mona ti ni ḿbikudi wumueka, wala kuizila ku Ngalili.”

8 12 Bosi Yesu wubue yoluka yawu, mu kutuba: “Minu yidi muinda kuidi batu mu nza. Woso wu kundandakana, kalasa diatila ko ku kitombi, vayi wala baka muinda wu luzingu.” 13 Bafalisi bankamba: “Ngie wuntanga kimbangi matedi ngie veka. Ayi kimbangi wumvananga kisi ko ki kiedika.” 14 Yesu wuba vutudila: “Kheti minu yimvananga kimbangi matedi minu veka, kimbangi yimvananga kidi ki kiedika, kibila minu yizebi kuidi yifumina ayi kuidi yinkuenda. Vayi benu lusa zaba ko kuidi yifumina, mvandi kuidi yinkuenda. 15 Benu lumfundisilanga mu kutadila mayindu ma batu, vayi minu yifundisanga ko ni mutu. 16 Vayi kheti minu yimfundisa, phil’ama yi kufundisila yidi yi kiedika, kibila yisi ko minu veka, vayi Tata, mutu no wuthuma widi yama. 17 Mvandi, mu Minsiku minu muidi musonama: ‘Kimbangi ki batu buadi, kidi ki kiedika.’ 18 Minu yimvananga kimbangi matedi minu veka, ayi Tata no wuthuma, mvandi wumvananga kimbangi matedi minu.” 19 Bosi bawu banyuvula: “Tat’aku, kuidi kadi?” Yesu wuba vutudila: “Benu lusa kunzaba ko ayi mvandi lusa zaba ko Tata. Boti lunzabizi, khanu mvandi luzebi Tata.” 20 Yesu wutubila mambu amomo, va kibuangu baba tulanga zikasu zi minkhailu, bo kabe longa ku tempelu. Vayi ni mutu kasa kunkanga ko, kibila thangu’andi yisa ba ko yifuana.

21 Nandi wubue bakamba: “Minu yenkuenda kuama, ayi benu muala kuthomba, vayi benu muala fuila mu masumu minu. Kibila ko minu yinkuenda, benu mulendi nunga ko kukuenda kuawu.” 22 Bosi basi Yuda batona kutuba: “Nandi wunkuiza yivonda? Kibila betuba: ‘Ko minu yinkuenda, benu mulendi nunga ko kukuenda kuawu.’” 23 Yesu wubue tuba: “Benu muidi basi nza; vayi minu yifumina ku diyilu. Benu muidi basi nza ayiyi; vayi minu yisi ko musi nza. 24 Diawu yibe lukambila: Benu muala fuila mu masumu minu. Kibila boti luisinkikinina ko nani minu yidi, buna muala fuila mu masumu minu.” 25 Bawu banyuvula: “Ngie widi nani?” Yesu wuba vutudila mu kutuba: “Kibila mbi minu yidi mu kukolukila yinu? 26 Minu yidi mambu mawombo ma kutuba mu matedi benu, ayi muingi kufundisa. Bukiedika, mutu wuthuma, widi wukiedika ayi mamoso yiyuwa kuidi nandi, mawu yinkambanga batu va nza.” 27 Bawu basa visa ko ti nandi waba tubila matedi Tata. 28 Diawu Yesu wuba kamba: “Bo muala banda Muana Mutu va dikunzi, bosi muala zaba ti minu yidi Klistu, ayi yivanganga ko ni diambu dimueka mu luzolo luama veka, vayi yintubanga mo Tata kandonga. 29 Ayi no wuthuma widi yama, ayi nandi kasa kukhuekula ko, kibila thangu zioso, yimvanganga mambu ma kunkuangidika.” 30 Bo nandi katuba mambu amomo, bawombo bayiza ba kiminu mu nandi.

31 Diawu, Yesu wukamba basi yuda bakikinina mu nandi: “Benu kutatamana kutumukina malongi mami, buna muidi minlandikini miama mikiedika, 32 Benu muala zaba kiedika, ayi kiedika kiala ku lukula mu buvika.” 33 Bawu bamvutudila: “Befu tuidi bana ba Abalahami, ayi ni kilumbu tumana ba mimvika mi mutu. Buabu, buidi widi mu kutubila: ‘Benu muala kulu’?” 34 Yesu wuba tambudila: “Bukiedika yiku lukamba ti, woso mutu wunsumuka, widi mvika wu masumu. 35 Mvandi, mvika katatamananga ko kukala va nzo mfumu’andi, vayi muana wuntatamananga kukala vawu. 36 Diawu, Muana na ku lukula, benu muala ba batu bakulu mu bukiedika. 37 Minu yizebi ti benu muidi bana ba Abalahami. Vayi benu muntomba kuphonda, kibila muisinkikinina ko malongi mami. 38 Minu yidi mu kukoluka mambu mo yimona, bo yiba va kimueka na Tat’ama, vayi benu muidi mu kuvanga mambu luyuwa kuidi tat’inu.” 39 Bawu bamvutudila, mu kutuba: “Tat’itu, widi Abalahami.” Yesu wuba kamba: “Boti benu muidi bana ba Abalahami, khanu muidi mu kulandakana kifuani kiandi. 40 Vayi benu muntomba kuphonda, minu mutu yiku lukamba kiedika kio yiyuwa kuidi Nzambi. Abalahami kalendi vanga ko mambu ma phila ayoyo. 41 Benu mumvanganga mambu ma tat’inu.” Bawu bankamba: “Befu tusa butukila ko mu kitsuza. Tuidi Tata yimueka to, Nzambi.”

42 Yesu wuba kamba: “Boti Nzambi, nandi Tat’inu, khanu benu mu kunzolanga, kibila minu yifumina kuidi Nzambi, diawu yididi avava. Yisa kuizila ko mu lutia luama veka, vayi Nzambi nandi wuthuma. 43 Kibila mbi lukhambu kikinina mambu yintuba? Kibila benu luisintomba ko kukuwa malongi mami. 44 Benu muidi bana ba tat’inu Nkadi’ampemba, ayi muntomba kuvanga mambu mankuangidika tat’inu. Nandi widi mvondi tona kavekuka, ayi kasa tatamana ko mu kiedika, kibila mu nandi muisi ko kiedika. Bo nandi kantuba luvunu, widi mu kutuba mambu madi mu khat’andi, kibila widi nkua luvunu ayi tata yi luvunu. 45 Minu yidi mu ku lukamba kiedika, vayi kheti bobo benu luisi kukhikinina ko. 46 Nani mu benu kalenda monisa bivisa ti minu yibe vola disumu? Boti minu yidi mu kutuba kiedika, kibila mbi lummanga kukhikinina? 47 Mutu wu Nzambi, wunkuwanga mambu ma Nzambi. Vayi benu lummanga kukuwila, kibila luisi ko batu ba Nzambi.”

48 Basi yuda bamvutudila, mu kunkamba: “Mamona, bakana ko mu bobo tuidi mu kukambila ti ngie widi musi Samalia ayi phevi yimbi yidi yaku.” 49 Yesu wuba vutudila: “Minu yisi ko mu thuadusulu yi phevi yimbi, minu yinkinzikanga Tat’ama, vayi benu muidi mu kundenza. 50 Minu yitombanga ko nzitusu’ama veka, Nzambi nandi wuntomba muingi yitambula nzitusu ayi nandi widi mfundisi. 51 Bukiedika yiku lukamba ti: Woso mutu wuntumukina malongi mami, kalasa fua ko.” 52 Basi yuda bankamba: “Buabu tuma visa ti ngiewu, phevi yimbi yidi yaku. Abalahami wufua, mimbikudi mvandi bafua, vayi ngie wuntuba: ‘Woso mutu wuntumukina malongi mami, kalasa fua ko.’ 53 Bukiedika ti ngie lutidi nkinza kena tat’itu Abalahami no wufua? Mimbikudi mvandi bafua, ngie wummuena ti widi nani?” 54 Yesu wuba vutudila: “Minu kuyizitisa minu veka, buna nzitusu’ama wisinkuiza ba ko nkinza, Tat’ama no benu muntubanga ti widi Nzamb’inu, nandi wu kunzitisanga. 55 Benu lusa kunzaba ko, vayi minu yinzebi. Minu kutuba ti yisa kunzaba ko, yinkuiza ba nkua luvunu buka benu. Vayi minu yinzabizi ayi yintumukinanga mambu mandi. 56 Tat’inu Abalahami wuyangalala beni mu kivuvu kaba ki kumona kilumbu kiama, nandi wumona kiawu ayi wuyangalala.” 57 Mu kibila akiokio, basi yuda bankamba: “Ngie wisi ko ni kheti 50 di mimvu, buabu buidi wumuena Abalahami?” 58 Yesu wuba kamba: “Bukiedika yiku lukamba ti: Ava Abalahami kabutuka, buna minu yidi wumonyo.” 59 Diawu, bawu bananguna mamanya muingi kunkuba, vayi Yesu wusuama ayi wubasika ku tempelu.

9 Bo Yesu kaba vioka, wumona dibakala dimueka wuba phovo* tona kabutuka. 2 Bosi minlandikini miandi banyuvula: “Rabi, kibila mbi dibakala adidi kabutukila phovo, mu kibila ki disumu diandi, voti mu kibila ki masumu ma matata mandi?” 3 Yesu wuba vutudila: “Bakana ko mu kibila ki masumu mandi, voti mu kibila ki masumu ma matata mandi, vayi mu nzil’andi muingi batu bamona mbi Nzambi kalenda vanga. 4 Tufueti vanga kisalu ki mutu no wuthuma, kibila buisi bue mbelama kukuila, thangu yo ni mutu kalasa bue sala ko. 5 Bo minu yikhidi va nza, yidi buka muinda wunsadisa batu kumona.” 6 Bo kamana kutuba mambu amomo, nandi wulobuta matha* va tsi, wusobikisa mawu na ntoto, bosi wuvinda wawu mu mesu ma dibakala beni; 7 ayi wunkamba: “Yenda sukula mesu mu ditanga di Silowe” (dizina dinsundula “wufilu”). Bosi nandi wuyenda, wusukula mesu ayi wutona kumona.

8 Batu va nsengi ayi bo baba kummonanga kundinda biuma, bayuvula: “Anono, kasi ko nandi dibakala wabe kalanga va nzila ayi wabe kuedindanga biuma?” 9 Bankaka baba tuba: “Nandi.” Vayi bankaka baba tuba: “Ndamba, kudedimina kuandi to badedimini.” Dibakala beni wutuba: “Minu kuandi.” 10 Mu phila ayoyo, bawu banyuvula: “Buabu, buidi wennungina kumona?” 11 Nandi wuba vutudila: “Dibakala no bantedilanga Yesu, besobikisa matha mandi na ntoto, bevinda mawu mu mesu mami ayi bekhamba: ‘Yenda sukula mesu mu ditanga di Silowe.’ Diawu, minu yibe kuenda yibe sukula ayi yibe tona kumona.” 12 Diawu, bawu banyuvula: “Kuawu dibakala beni kakeli?” Nandi wuba tambudila: “Yisa zaba ko.”

13 Bosi banata dibakala beni no wuba phovo kuidi bafalisi. 14 Ayi kilumbu beni Yesu kasobikisa matha na ntoto ayi kabelusa dibakala beni wuba phovo, kiba kisabala. 15 Bosi bafalisi mvandi batona kukuvula dibakala beni buidi nandi kayiza nungina kumona. Nandi wuba vutudila: “Yesu besobikisa matha na ntoto, bevinda mu mesu mami ayi bo yibe sukula mawu, yibe tona kumona.” 16 Bosi mua ndambu mu bafalisi, batuba: “Dibakala adiodio, kasi ko kisadi ki Nzambi, kibila kakinzikanga ko kisabala.” Bankaka batuba: “Buidi mutu widi nkua masumu, kalenda vangila mangitukulu ma phila ayoyo?” Diawu bayiza bela bakabuka. 17 Bawu babue kuvula phovo beni: “Mbi wulenda tuba matedi nandi, mu kuzaba ti mesu maku kabe belusa?” Dibakala beni wuba tambudila: “Nandi widi ḿbikudi.”

18 Ayi bo basi Yuda bakhambu kikinina ti nandi wuba phovo ayi wuyiza tona kumona, diawu batumisina matata mandi. 19 Bawu bayuvula matata mandi: “Awuwu nandi muan’inu, muntubilanga ti wubutuka phovo? Buabu, buidi kannungina kumona?” 20 Matata mandi baba tambudila: “Ngete, nandi muan’itu, ayi nandi wubutuka phovo. 21 Vayi befu tusa zaba ko buidi kannungina kumona, ayi mvandi tusa zaba ko nani bembelusa mesu. Yuvulanu naveka. Nandi weka nkulutu, kalenda sudikisa mawu.” 22 Matata mandi batubila mambu amomo, kibila baba boma mu makani basi Yuda babaka, ma kukuka ku nzo lukutukunu woso mutu wunkikinina ti Yesu widi Klistu. 23 Diawu matata mandi batubila: “Yuvulanu naveka. Nandi weka nkulutu.”

24 Mu kibila akiokio, babue tumisa dibakala beni wuba phovo mu ntulu wummuadi, ayi bankamba: “Vana nzitusu kuidi Nzambi! Befu tuzebi ti dibakala be kubelusa, widi nsumuki.” 25 Dibakala beni wutuba: “Boti nandi widi nsumuki, minu yisa mazaba ko. Mo yizebi, minu yibedi phovo, vayi buabu, yennunga kumona.” 26 Bosi bawu bankamba: “Mambu mbi kabe kuvangila? Buidi kabe belusila mesu maku?” 27 Nandi wuba vutudila: “Minu yima mukamba, vayi kheti bobo benu muisinkikinina ko. Kibila mbi muntomba kubue kuwila? Benu mvinu muntomba kuba minlandikini miandi?” 28 Mu kibila akiokio, bawu batona kunleza mu kunkamba: “Ngie widi nlandikini wu dibakala dinani, vayi befu tuidi minlandikini mi Mose. 29 Befu tuzebi ti Nzambi wuyoluka na Mose, vayi mu matedi dibakala adiodio, tusa zaba ko kuidi nandi kafumini.” 30 Dibakala beni wuba vutudila: “Mawu ma kukhuitula beni, kibila benu luma tuba ti, lusa zaba ko kuidi nandi kafumini! Vayi kheti bobo, nandi be belusa mesu mami. 31 Tuzebi ti Nzambi kayuwanga ko minsambu mi minsumuki, vayi mutu wunkinzika Nzambi ayi wumvanga luzolo luandi, nandi wunkuwanga minsambu mi mutu beni. 32 Tona thama, tuyuwizi’abu ko mutu mana nunga kubelusa mesu ma mutu wubutuka phovo. 33 Boti dibakala adiodio basa mfila ko kuidi Nzambi, khanu kasa nunga ko kuvanga ni diambu.” 34 Bawu bamvutudila: “Ngie wubutukila mu masumu, vayi kheti bobo wuntomba ku tulonga?” Bosi bankukisa.

35 Yesu wuyuwa ti bawu bakukisa dibakala beni, ayi bo kandengana wunyuvula: “Ngie widi kiminu mu Muana Mutu?” 36 Dibakala beni wunyuvula: “A tata, Muana Mutu beni buna nani, muingi minu yinlekila kiminu?” 37 Yesu wunkamba: “Ngie bemmona, ayi nandi widi mu kukoluka yaku.” 38 Dibakala beni wutuba: “A Mfumu, minu yidi kiminu mu nandi!” Bosi wufukama va ntual’andi. 39 Bosi Yesu wutuba: “Yiyiza fundisa nza, muingi batu bakhambu monanga bamona, ayi bo bammona bakituka ziphovo.” 40 Bo mua ndambu di bafalisi baba vana bayuwa mambu amomo, bankamba: “Buabu befu mvitu tuidi ziphovo?” 41 Yesu wuba kamba: “Boti benu muidi ziphovo, khanu luisinkuiza ba ko fotu mu masumu. Vayi bo muidi mu kutuba ti: ‘Befu tummonanga, masumu minu mankuiza tatamana.”

10 Mu bukiedika yiku lukamba ti: Woso mutu wukhambu kotila va muelu mu phaka yi mamemi, vayi wunkotila va kibuangu kinkaka, widi muivi ayi kidovula. 2 Vayi nsungi wu mamemi, wunkotilanga va muelu. 3 Nkengididi wu muelu, wunzibudilanga muelu kuidi nsungi, ayi mamemi mankuwanga mbembu yi nsungi’awu. Nandi wuntedilanga mamemi beni mu mazina ayi wunnatanga mawu ku nganda. 4 Bo kammana kubasisa mamemi mandi, nandi wumbanga va ntual’awu, ayi mawu ma kunlandakananga, kibila bazebi mbembu’andi. 5 Ni khumbu mawu mala landakana mutu bakhambu zaba, vayi mala kuntina, kibila mawu masa zaba ko mbembu yi mutu wunkaka.” 6 Yesu wusadila kifuani akiokio, vayi bawu basa visa ko mambu kaba kamba.

7 Diawu Yesu kabue bakambila: “Bukiedika yiku lukamba ti: Minu yidi muelu wu phaka yi mamemi. 8 Baboso bayiza ayi bavuna kusadila dizina diama, badi mivi ayi bidovula; vayi mamemi masa bakuwila ko. 9 Minu yidi muelu, ayi woso mutu wumviokila kuidi minu, wala vuka. Nandi wala kota ayi wala basika mu phaka, ayi wala bakula bititi bimboti. 10 Muivi kankuizilanga to muingi kuvonda, kukuiba ayi kutulula. Vayi minu yiyizila muingi benu mubaka luzingu, ayi mubaka luawu mu kitesu kifuana. 11 Minu yidi nsungi wumboti, ayi nsungi wumboti, wumvananga luzingu luandi mu kibila ki mamemi. 12 Kisadi no wukhambulu nsungi, ayi wukhambu vua mamemi, bo kammona mbua yi nsitu* kuvitila, wunyekulanga mamemi ayi wuntinanga. Bosi mbua yi nsitu beni yimvondanga ayi yintiakisanga mamemi. 13 Nandi kantininanga kibila widi kuandi to kisadi, ayi kavuanga ko nkinza mamemi. 14 Minu yidi nsungi wumboti. Yizebi mamemi mami, ayi mamemi mami manzebi, 15 dedi bo Tata kanzabidi ayi minu yizabidi Tata. Minu yidi wukubama muingi kuvana luzingu luama mu kibila ki mamemi.

16 “Ayi minu yidi mamemi mankaka, makhambulu mu phaka ayiyi, ayi yifueti tuala mvandi mawu, mawu mala kuwa mbembu’ami, ayi mankuiza ba nkangu wumueka to wu mamemi, mu thuadusulu yi nsungi wumueka to. 17 Diawu Tat’ama ka kunzodilanga beni, kibila yidi mu kuvana luzingu luama, muingi yivutuka kubue tambula luawu. 18 Ni mutu wumbotula luawu kuidi minu, vayi minu veka yimvanina luawu mu lutia luama. Yidi nsua wu kuvana luawu, ayi nsua wu kubue tambula luawu. Yitambula lutumu lu kuvanga mambu amomo kuidi Tat’ama.”

19 Bosi basi yuda bayiza bue ba bakabuka, mu kibila ki mambu amomo Yesu katuba. 20 Bawombo mu bawu baba tuba: “Nandi widi mu thuadusulu phevi yimbi, ayi malawuka. Kibila mbi lu kunkuwila?” 21 Vayi bankaka batuba: “Mutu widi mu thuadusulu phevi yimbi, kalendi tuba ko mambu amomo. Bukiedika kuandi ti phevi yimbi yilenda belusa mesu ma phovo?”

22 Bosi vayiza vangama nkungi wu khundudulu* ku Yelusalemi. Yiba thangu yi kiozi ki ngolo, 23 ayi Yesu, wabe diata ku tempelu, va Varanda yi Salomo. 24 Diawu basi yuda banzungidila ayi bankamba: “Nati thangu mbi wala tatamana ku tubika mu divuda? Boti ngie widi Klistu, buna wu tuzabikisa mawu buboti.” 25 Yesu wuba vutudila: “Minu yibe ku lukamba, vayi kheti bobo, lusa kukhikinina ko. Mangitukulu yidi mu kuvanga mu dizina di Tat’ama, madi mu kuvana kimbangi matedi minu. 26 Vayi benu lukhambu kukhikinina, kibila luisi ko mamemi mama. 27 Mamemi mami, mankuwanga mbembu’ama; minu yima zebi ayi mawu ma kundandakananga. 28 Minu yala ku mavana luzingu lu mvu ka mvu, ayi mawu malasa tuluka ko, ayi ni mutu wala kuma vionya mu mioko miama. 29 Bio Tat’ama kaphana, bilutidi kena biuma bioso binkaka, ayi vasi ko mutu wulenda vionya biawu mu mioko mi Tat’ama. 30 Minu ayi Tata, tuidi buka mutu wumueka to.”

31 Bosi, basi yuda babue nanguna mamanya muingi bankuba. 32 Diawu Yesu kaba kambila: “Minu yibe lumonisa mambu mawombo ma kukuitukila mu dizina di Tat’ama. Mu diambu mbi benu mue kukhubila mamanya?” 33 Basi yuda bamvutudila: “Befu tuisi kukuba ko mamanya mu kibila ki mambu mamboti bevanga, vayi mu kuvueza Nzambi, kibila ngiewu, kheti mu kuba mutu wu kinsuni, widi mu kuyikitula nzambi.” 34 Yesu wuba vutudila: “Mu Minsiku minu, Nzambi wutuba: ‘Benu muidi zinzambi.’ Bakana ko mawu katuba”’? 35 Boti batu ba bayisa diambu di Nzambi, ba kuba tedila ‘zinzambi’, — ayi balendi balula ko mambu masonama —, 36 buna kibila mbi muidi mu kukambila mutu no Tata kazitisa, ayi kafila va nza: ‘Ngie widi mu kuvueza Nzambi’, bo yibe tuba ti: ‘Yidi Muana Nzambi’? 37 Boti minu yisimvanga ko kisalu ki Tata, buna bikanu kukhikinina. 38 Vayi, boti yidi mu kuvanga kisalu kiandi, ayi kheti bobo muisi kukhikinina ko, kikininanu kheti mu kisalu yimvanga, muingi luzaba ayi lukikinina ti Tata widi yama kithuadi, ayi minu yidi yandi kithuadi.” 39 Bosi bameka kubue mbuila, vayi nandi wutina.

40 Nandi wubue vutuka ku khonzu yinkaka yi muila wu Yolidani, va kibuangu kio Yoane Ḿbotiki kabe botikilanga batu, ayi wukala vana. 41 Bawombo bayenda kuendengana ayi baba tuba: “Yoane, kasa vanga ko ni mangitukulu, vayi mambu moso nandi katuba matedi dibakala adiodio, madi makiedika.” 42 Ayi bawombo mu bawu, banlekila kiminu.

11 Dibakala dimueka baba tedilanga Lazalu waba bela, nandi wuba musi Betania, buala Malia ayi khomb’andi Malata baba kalanga. 2 Malia beni, nandi wudukudila nzeta yiba mfimbu wumboti mu bitambi bi Yesu ayi wufionya biawu mu minlengi miandi. Ayi Lazalu no waba bela, wuba khomb’andi. 3 Bosi, zikhomba ziandi zi bakietu bafila thumu kuidi Yesu muingi bankamba: “A Mfumu, nkundi’aku no wunzolanga beni, widi mu kubela. 4 Vayi bo Yesu kayuwa mambu amomo, wutuba: “Kimbevu akiokio, kisinkuiza sundukila ko mu lufua vayi mu nkembu Nzambi, muingi Muana Nzambi ka kembusu mu nzila mambu amomo.”

5 Yesu waba zolanga Malata, khomb’andi Malia ayi Lazalu. 6 Vayi, bo kayuwa ti Lazalu waba bela, nandi wubue viokisa bilumbu biodi ku kibuangu kaba. 7 Bosi, nandi wukamba minlandikini miandi: “Ndoko’anu tubue vutuka ku Yuda.” 8 Minlandikini miandi bankamba: “Rabi, vangi kuandi basi yuda babina kukuba mamanya, vayi kheti bobo ngie wuntomba kubue kuenda kuna?” 9 Yesu wuba vutudila: “Kilumbu kisi ko 12 di bilokula va muinya? Boti mutu widi mu kudiata va muinya* kabundanga ko thutu, kibila widi mu kumona kiezila ki muinya ki nza ayiyi. 10 Vayi, boti mutu widi mu kudiata va builu nandi wumbundanga thutu, kibila kiezila ki muinya kisi ko yandi.”

11 Bo kamana kutuba mambu amomo, nandi wubue tuba: “Nkund’itu Lazalu belala, vayi minu yenkuenda kuna muingi kuenkotula.” 12 Minlandikini miandi bankamba: “A Mfumu, boti nandi widi mu kulala, buna wunkuiza ba kuandi buboti.” 13 Yesu waba tubila matedi lufua lu Lazalu. Vayi, bawu bamuena ti nandi waba tubila matedi tolo to tunlalanga. 14 Bosi, Yesu wuba sudikisa: “Lazalu befua; 15 ayi yinkuangalala beni bo yibe khambu ba kuna, kibila mo yinkuiza vanga, mankuiza kindisa kiminu kinu. Diawu, tuendianu kuna.” 16 Diawu, Tomasi, no mvandi baba tedilanga kibaza, wukamba minlandikini minkaka: “Tuendianu befu mvitu, muingi tuefua to yandi va kimueka.”

17 Bo Yesu kavitila, wuyiza zaba ti vama vioka bilumbu binna, tona bazika Lazalu. 18 Betania buba buala bufikama na Yelusalemi. Mu kutala mu kumona, buba zikilometro zitatu mu kinanu. 19 Ayi bawombo mu basi yuda, bayenda kuna muingi kue bomba Malata ayi Malia, mu kibila ki lufua lu khomb’awu. 20 Bo Malata kayuwa ti Yesu waba vitila, nandi wuyenda kuendengana, vayi Malia wusiala ku nzo. 21 Bosi Malata wukamba Yesu: “A Mfumu, boti ngie wubedi kuku, khanu khomb’ama kasa fua ko. 22 Vayi kheti mu thangu ayiyi, minu yizebi ti, kioso kua kiuma wunkuiza dinda kuidi Nzambi, nandi wunkuiza kuvana.” 23 Yesu wunkamba: “Khomb’aku, wala vulubuka.” 24 Malata wumvutudila: “Yizebi ti nandi wala vulubuka mu kilumbu ki tsuka.” 25 Yesu wunkamba: “Minu yidi luvulubukusu ayi luzingu. Woso mutu wu kundekila kiminu, kheti nandi fuidi, wala vutuka kubue zinga. 26 Woso widi wumonyo ayi wu kundekila kiminu, nandi kalasa fua ko. Ngie wunkikinina mu mawu?” 27 Nandi wumvutudila: “Ngete, a Mfumu, minu yinkikinina ti ngie widi Klistu, Muana Nzambi no batuba ti wala kuiza va nza.” 28 Bo kamana kutuba mambu amomo, nandi wuyetela khomb’andi Malia, ayi wunkamba va baveka: “Nlongisi weka kuku ayi ngie kantela.” 29 Bo Malia kayuwa mambu amomo, muna thangu beni, wutelama ayi wuyenda kuedengana Yesu.

30 Yesu kasa fika kota ko ku khati buala beni, vayi wuba va kibuangu kio Malata kayenda kuendenginina. 31 Bo basi yuda bayenda kue bomba Malia bamona ti nandi wutelama mu thinu ayi wubasika, bawu banlandakana, kibila baba muena ti nandi waba kuenda ku dibumbi muingi kue dila. 32 Bo Malia kavitila va kibuangu Yesu kaba ayi kammona, nandi wufukama va ntual’andi ayi wunkamba: “A Mfumu, boti ngie wubedi kuku, khanu khomb’ama kasa fua ko.” 33 Bo kamona ti Malia ayi basi yuda banlandakana baba dila, Yesu wuyiza ba beni mu kiunda. 34 Nandi wuyuvula: “Vadi batudidi nyitu’andi?” Bawu bankamba: “A Mfumu, yiza mona.” 35 Ayi Yesu wutona kudila. 36 Mu kibila akiokio, basi Yuda batuba: “Talanu, nandi wube kunzolanga beni!” 37 Vayi bankaka baba tuba: “Dibakala adiodio wubelusidi mesu ma phovo, buabu, kibila mbi kakhambu tudila nkaku muingi Lazalu kabika fua?”

38 Yesu wuyiza bue ba beni kiunda, diawu kayendila ku dibumbi. Dibumbi beni diba dimanya basika ayi vaba dimanya dinkaka bafuka. 39 Yesu wutuba: “Botulanu dimanya adiodio.” Malata khomba yi mutu wufua wunkamba: “A Mfumu, ḿba nyitu’andi yeka nnuka beni, kibila vama vioka bilumbu binna.” 40 Yesu wumvutudila: “Minu yisa kukamba ko ti ngie kukikinina wunkuiza mona nkembu wu Nzambi?” 41 Diawu, babotula dimanya beni. Bosi Yesu wuvumuna thalu ku diyilu ayi wutuba: “A Tata, yi kutonda beni mu kukuwa nsambu’ama. 42 Bukiedika, minu yizebi ti ngie wu kukhuwanga, vayi yibe tubila mawu mu kibila ki nkangu awuwu wu batu badi va khonzu’ama, muingi bakikinina ti, ngiewu wuthuma.” 43 Bo kamana kutuba mambu amomo, bosi nandi wutenduka: “Lazalu, basika ku nganda!” 44 Mutu beni wuba wufua wuvulubuka, nandi wuba bitendi bizingama mu mioko, mu malu ayi mu kizizi. Bosi Yesu wuba kamba: “Nkutulanu bitendi abiobio ayi ḿbikanu kenda.”

45 Vayi bawombo mu basi yuda bayenda kue tala Malia ayi bamona mambu Yesu kavanga, balekila kiminu mu nandi. 46 Vayi mua ndambu mu bawu bayezabikisa kuidi bafalisi mambu Yesu kavanga. 47 Bosi zimfumu zi zinganga nzambi ayi bafalisi, bakutikisa dingumba di mimfundisi* ayi batuba: “Mambu mbi tunkuiza vanga mu kuzaba ti dibakala adiodio widi mu kuvanga mangitukulu mawombo? 48 Befu kuntadila kuitu bobo, baboso bankuiza lekila kiminu mu nandi ayi mawu mala vanga basi Loma biza tubotula kimfumu ku tempelu ayi mu dikabu ditu.” 49 Bosi wumueka mu bawu baba tedilanga Kaifasi, wuba nkulutu wu zinganga nzambi mu mvu beni, wuba kamba: “Benu lusa zaba ko ni kiuma, 50 mvandi luisi nyindula ko ti muingi lubaka ndandu, vantombulu mutu wumueka to kufuila mu kibila ki dikabu, kena dikabu dioso kutuluka.” 51 Nandi kasa tubila ko mawu mu mayindu mandi veka, vayi mu kuba nkulutu wu zinganga nzambi mu mvu beni, nandi wubikula ti Yesu wala fuila mu kibila ki dikabu, 52 ayi kubika kuandi to mu kibila ki dikabu, vayi muingi kukutikisa mu dingumba dimueka to, bana boso ba Nzambi badi batiamuka. 53 Mu phila ayoyo, kutona kuandi mu kilumbu beni, batona kubaka makani ma kumvonda.

54 Mu kibila akiokio, Yesu kabasa bue monikanga ko beni va mesu ma basi yuda. Vayi wunanguka vana ayi wuyenda ku kizunga kiba kifikama ku thandu, ku divula dimueka baba tedilanga Efraim, ayi wukala kuna na minlandikini miandi. 55 Pasika nkungi wu basi yuda waba fikama, ayi bawombo baba mu mala batombuka ku Yelusalemi ava nkungi wu Pasika, muingi bayidiodisa dedi bo busonimina mu Minsiku. 56 Bawu baba bila Yesu kuna tempelu ayi baba kuyikuvusa: “Buidi lummuena? Bukiedika ti nandi kasinkuiza ko mu nkungi?” 57 Vayi zimfumu zi zinganga nzambi ayi bafalisi, bavana nsua muingi woso mutu wummona Yesu, kaba zabikisa muingi bawu babaka bu kunkangila.

12 Bo vaba khambu bilumbu bisambanu ava Pasika, Yesu wuyenda ku Betania, ko kuaba kalanga Lazalu mutu wo kavulubusa mu bafua. 2 Bo batuka kuna, bantumisa muingi kadia. Malata nandi waba kuba tudila bidia, Lazalu wuba wumueka mu batu baba dia yandi. 3 Bosi Malia wubonga nduka kilu yimueka yi malasi ma nardo madi mfimbu wumboti mo bakhambu sobikisa, ayi maba beni thalu, bosi wudukula mawu mu bitambi bi Yesu, ayi wufionya biawu mu kusadila minlengi miandi. Nzo yoso yiyiza wala mfimbu wumboti yi nzeta beni. 4 Vayi Yuda Isikalioti, wumueka mu minlandikini miandi no waba belama kumvakula, wutuba: 5 “Kibila mbi ba bekhambu sumbisila nzeta ayoyo mu 300 di zidenario ayi kuvana zimbongo beni kuidi batu bakhambulu beni mbakulu?” 6 Nandi waba tubila mambu amomo, kubika ti waba tatubuka matedi batu bakhambulu beni mbakulu, vayi kibila wuba muivi ayi nandi waba lundanga kasu yi minkhailu ayi waba kuibanga zimbongo baba tulanga muna. 7 Bosi Yesu wutuba: “Bikanu kutatisa nkietu awowo, kibila kadi mu kuvangila mawu, muingi kukubika nyitu’ama yinkuiza ziama. 8 Batu bakhambulu beni mbakulu bala tatamana kuba yinu, vayi minu yalasa tatamana ko kuba yinu.”

9 Mu thangu beni, bo nkangu wu basi yuda bazaba ti Yesu wuba ku Betania, diawu bayendila kuna. Vayi, kubika ti muingi kuemona to Yesu, vayi mvandi muingi bemona Lazalu no nandi kavulubusa mu bafua. 10 Zimfumu zi zinganga nzambi, babaka mvandi makani ma kuvonda Lazalu, 11 kibila mu kibila kiandi, diawu bawombo mu basi yuda baba kuendilanga kuna ayi batonina kulekila kiminu mu Yesu.

12 Mu kilumbu kilanda, nkangu wu batu wuyenda mu nkungi wu Pasika ku Yelusalemi, bayiza zaba ti Yesu mvandi waba kuiza. 13 Diawu bazengila zingiemvu zi maba ayi babasika mu nzila muingi kuendengana mu kue tendukanga: “A Nzambi, tuku dinda mvukisa! Mayangi kuidi no wunkuizila mu dizina di Yave, mayangi kuidi Ntinu wu Isaeli!” 14 Bosi Yesu wumona muana phunda ayi wumaka muawu, dedi bo masonimina: 15 “Muana nkietu wu Sioni, bika kumona boma. Tala! Ntinu’aku widi mu kukuiza ayi nandi widi va mbata muana phunda.” 16 Va thonono, minlandikini miandi basa visa ko mambu amomo, vayi mu thangu Yesu katambula nkembu ku diyilu, bawu batebuka moyo ti mambu amomo, masonimina mu kibila kiandi ayi masundukila mu nandi.

17 Batu baba na Yesu mu thangu nandi katela Lazalu ayi kamvulubusa mu bafua, mvawu baba ta kimbangi. 18 Diawu nkangu wu batu beni wuyenda kuendenginina, kibila bayuwa ti nandi wuvanga mangitukulu beni. 19 Diawu, bafalisi bakambasana: “Talanu, befu tuisinnunga ko kuvanga ni diambu. Tala phila batu boso bankuendila kuidi nandi!”

20 Mu batu bayenda mu nkungi muingi kue buongimina, muba mvandi basi Ngeleko. 21 Bawu bafikama vaba Filipi musi Betesaida yidi ku Ngalili ayi bandinda: “A nkulutu, befu tuntomba kumona Yesu.” 22 Filipi wuye kamba mawu Andele, bosi Andele ayi Filipi bayoluka na Yesu.

23 Vayi Yesu wuba vutudila: “Thangu yima fuana yo Muana Mutu kafueti kembusu. 24 Yiku lukamba mu bukiedika ti, boti lutheti lu trigu luisi mbua ko va ntoto ayi luisi mfua ko, buna lunkuiza tatamana kuandi to kuba lutheti; vayi lua kufua luala buta mimbutu. 25 Woso wunzodila ngolo luzingu luandi, wala ku luzimbisa, vayi woso wunlenda luzingu luandi mu nza ayiyi, wala luvukisa muingi katambula luzingu lu mvu ka mvu. 26 Woso mutu wuntomba kuba kisadi kiama, kafueti kundandakana ayi voso vo minu yidi, vawu kisadi kiama mvandi kafueti ba. Ayi woso tidi kuba kisadi kiama, Tat’ama wala kunzitisa. 27 Mu thangu ayiyi, minu yidi beni mu kiunda, ayi mbi yilenda tuba? Tata, phukisa mu thangu ayiyi. Vayi mu kibila ki mambu mambelama kumonika,* diawu yiyizila. 28 Tata, zitisa dizina diaku.” Bosi vayuwakana mbembu yifumina ku diyilu yituba: “Minu yimana dizitisa ayi yinkuiza bue zitisa diawu.”

29 Nkangu wu batu wuba vana bo bayuwa mbembu beni batona kutuba ti ayoyo nzazi yima banda. Bankaka baba tuba: “Mbasi yima koluka yandi.” 30 Yesu wuba vutudila: “Mbembu ayoyo, yisa kuwakana ko mu kibila kiama, vayi mu kibila kinu. 31 Buabu, lufundusu lu nza ayiyi luma tona ayi ntuadisi wu nza ayiyi bankuiza nkukisa. 32 Vayi bo bala kumbotula va ntoto,* yala vanga mintindu mioso mi batu kufikama kuidi minu.” 33 Nandi katubila mambu amomo, muingi kumonisa buidi kankuiza fuila. 34 Diawu nkangu wu batu bantambudila: “Minsiku mintuba ti Klistu wala tatamana kuzinga mvu ka mvu. Buabu, buidi ngie wuntubila ti Muana Mutu bafueti kumbanda va dikunzi? Muana Mutu beni buna nani?” 35 Bosi Yesu wuba kamba: “Kiezila kinkuiza kala yinu mu mua thangu to. Diatilanu mu kiezila, bo kiawu kikhidi yinu, muingi kitombi kibika ku lununga. Mutu wundiatila ku kitombi, kanunganga ko kumona ko kankuenda. 36 Bo kiezila kikhidi yinu, lekilanu kiminu mu kiezila muingi luba bana ba kiezila.”

Bo kamana kutuba mambu amomo, Yesu wuyenda ayi wuba suama. 37 Ayi kheti nandi wuvanga mambu mawombo ma kukuitukila va ntual’awu, bawu basa kunlekila ko kiminu, 38 muingi mambu ḿbikudi Yesaya kasonika masunduka, mawu mantuba: “A Yave, nani wulekila kiminu mu mambu tutuba? Ayi kuidi nani kumonikina koko ku Yave?” 39 Yesaya wutubila mvandi kibila ki bavanga babika kikinina: 40 “Nandi wuba zibika mesu ayi wuvanga mintima miawu miba mingolo, muingi mesu mawu mabika mona ayi babika kubaka phisulu mu ntim’awu ayi babalula mavanga mawu, muingi minu yiba belusa.” 41 Yesaya katubila mawu, kibila wumona nkembu wu Klistu ayi wutubila matedi nandi. 42 Kheti bobo, bawombo mu zimfumu zi basi yuda balekila kiminu mu nandi. Vayi mu kibila ki bafalisi, bawu babasa zabikisanga ko mawu va nyalu nguba, muingi babika kuba kuka ku nzo yi lukutukunu. 43 Kibila bawu baba luta tomba kubaka lunungu* va mesu ma batu, kena kubaka lunungu va mesu ma Nzambi.

44 Bosi, Yesu wutuba mu mbembu yinangama: “Woso mutu wu kundekila kiminu, kasinlekila ko to kiminu mu minu, vayi mvandi widi mu kulekila kiminu mu mutu no wuthuma; 45 ayi woso wu kumbona, buna widi mu kumona mvandi no wuthuma. 46 Minu yiyiza buka muinda va nza, muingi woso mutu wu kundekila kiminu, kabika tatamana ku kitombi. 47 Vayi, woso mutu wunkuwa malongi mami ayi wunkhambu matumukina, minu yimfundisanga ko, kibila yiyizila va nza, kubika ti muingi kufundisa, vayi muingi kuvukisa nza. 48 Woso mutu wukhambu kuthumukina ayi kukikinina malongi mami, vadi mutu wala kumfundisa. Mambu yintubanga mawu mala kumfundisa mu kilumbu ki tsuka. 49 Kibila yisintubila ko mu mayindu mami veka, vayi naveka Tata no wuthuma nandi wuphana lutumu matedi mambu yifueti tuba, ayi phila yifueti tubila mawu. 50 Ayi yizebi ti lutumu luandi lunsundula luzingu lu mvu ka mvu. Diawu, mamoso yintubanga, yintubilanga mawu dedi bo Tata kakhambila.”

13 Ava nkungi wu Pasika, Yesu wuzaba ti thangu yi kubika nza ayiyi, muingi kuvutuka kuidi Tata yima fuana. Bo kazola minlandikini miandi, nandi wutatamana kuba zola nati ku tsuka luzingu luandi. 2 Mu thangu baba dia, Nkadi’ampemba wukotisa mu ntima wu Yuda Isikalioti, muana Simoni, mayindu ma kuvakula Yesu. 3 Yesu wuzaba ti, Tata wuyekula biuma bioso mu mioko miandi, wuzaba mvandi ti wufumina kuidi Nzambi, ayi waba kuenda kuidi Nzambi; 4 mu phila ayoyo, nandi wunanguka va meza ayi wuvula kikhutu kiandi ki mbata. Bosi wubonga dituaya ayi wukanga diawu mu lukietu. 5 Bosi wutula nlangu mu dibola, ayi wutona kusukula malu ma minlandikini miandi, ayi wufionya mawu mu kusadila dituaya beni kakanga mu lukietu. 6 Bosi wuvitila vaba Simoni Petelo, vayi Petelo wunkamba: “A Mfumu, ngie wuntomba kusukula malu mama?” 7 Yesu wumvutudila: “Mambu yidi mu kuvanga, ngie wulendi visa ko mawu mu thangu ayiyi, vayi wala visa mawu ku ntuala.” 8 Petelo wunkamba: “A Mfumu, yilendi kubika ko wusukula malu mama.” Bosi Yesu wunkamba: “Minu kukhambu sukula malu maku, buna ngie wisi ko yama kithuadi.” 9 Simoni Petelo wumvutudila: “A Mfumu, boti buawu, buna bika to kutsukula malu, vayi sukula mvandi mioko ayi ntu’ama.” 10 Yesu wunkamba: “Mutu be kobila, wumbanga nawoso wudiodila, ayi vasintombulu ko kubue sukula binama binkaka, kubotula kuandi to malu. Benu muidi badiodila, vayi kubika ti benu boso.” 11 Nandi wuzaba nani waba belama kumvakula. Diawu katubila: “Kubika ti benu boso, muidi badiodila.”

12 Bo kamana kusukula malu mawu ayi kavuata kikhutu kiandi ki mbata, nandi wubue kala va meza ayi wuba kamba: “Benu mumvisa tsundu yi mambu amomo, yima muvangila? 13 Benu mu kuthedilanga ‘Nlongisi’ ayi ‘Mfumu’, benu munnunga, kibila minu yidi. 14 Diawu, boti minu, Nlongisi ayi Mfumu, yima sukula malu minu, buna benu mvinu mufueti kuyisukulanga malu benu na benu. 15 Kibila yima lumonisa ntungulu mufueti landakana, muingi dedi bo minu yima luvangila, benu mvinu luvangila buna buawu. 16 Bukiedika yiku lukamba ti: “Kisadi, kasa lutila ko mfumu’andi, mvandi mvuala kasa lutila ko mutu wumfila. 17 Boti luzabizi mambu amama, lunkuiza ba mu mayangi benu kusadila mawu. 18 Yisintubila ko matedi benu boso, kibila minu yizebi batu bo yisola. Vayi muingi mambu amama madi mu Masonoko, masalama: ‘Mutu no wabe dianga yama dipha va kimueka, wumbalukila.’ 19 Yiku lukambila mambu amama, mu thangu ayiyi, ava mawu mamonika, muingi bo mala monika, benu lukikinina nani minu yidi. 20 Bukiedika yiku lukamba ti: Woso wuntambula mutu minu yimfila, buna mvandi widi mu kuthambula, ayi woso wu kuthambula, buna mvandi widi mu kutambula Mutu no wuthuma.”

21 Bo kamana kutuba mambu amomo, Yesu wuyiza ba beni mu kiunda ayi wutuba: “Bukiedika yiku lukamba ti: Wumueka mu benu, wunkuiza phakula.” 22 Minlandikini miandi batona kuyitalasana bawu na bawu, mu khambu zaba nani mu bawu kaba tubila. 23 Wumueka mu minlandikini miandi, no Yesu kaba zolanga beni wuba wukala va khonzu Yesu. 24 Diawu, Simoni Petelo wuvana kidimbu kuidi nlandikini beni mu ntu, ayi wunkamba: “Wu tukamba matedi nani kadi mu kutubila.” 25 Diawu, nlandikini beni wuyekama Yesu, ayi wunyuvula: “A Mfumu, nani widi mu kutubila?” 26 Yesu wumvutudila: “Woso mutu yamvana kitini ki dipha yambondika mu kibobola, buna nandi. Bosi, Yesu wumbondika dipha ayi wuvana Yuda, muana Simoni Isikalioti. 27 Bo Yuda kabonga kitini beni ki dipha, Satana wutona kuntuadisa, bosi Yesu wunkamba: “Vanga mu nsualu mo widi mu kuvanga.” 28 Vayi, baboso baba yandi va meza, babasa visa ko kibila Yesu kankambila mambu amomo. 29 Mu kuba ti Yuda, nandi waba kiebanga kasu yi minkhailu, diawu bawombo baba yindudila ti Yesu waba kunkamba: “Sumba biabioso bintombulu, muingi kukubika nkungi”, ove kavana kioso kiuma kuidi batu bakhambulu mbakulu. 30 Diawu, bo kamana kutambula kitini beni ki dipha, nandi wubasika mu thinu. Yiba thangu builu.

31 Bo nandi kabasika, Yesu wutuba: “Bubu, Muana Mutu mazitusu, ayi Nzambi mvandi mazitusu mu nzil’andi. 32 Naveka Nzambi, wunkuiza nzitisa, ayi wunkuiza nzitisa mu thinu. 33 Bana bama, mu mua thangu to yinkuiza bue kala yinu. Benu muala kuthomba, vayi dedi bo yikambila basi yuda, buabu mvandi yiku lukamba: ‘Ko minu yinkuenda, benu mulendi kuenda ko kuawu.’ 34 Minu yiku luvana lutumu lumona: Zolasananu benu na benu, dedi bo minu yi muzodila, benu mvinu, mufueti zolasana. 35 Benu kuba luzolo benu na benu, buawu batu boso bala zabila ti luidi minlandikini miama.”

36 Simoni Petelo wunkamba: “A Mfumu, kuidi ngie wenkuenda?” Yesu wumvutudila: “Ko minu yenkuenda, ngie wulendi ko kundandakana mu thangu ayiyi, vayi ku ntuala, wala kundandakana.” 37 Petelo wunkamba: “A Mfumu, kibila mbi yilendi ko kulandakana mu thangu ayiyi? Minu yidi wukubama, muingi kuvana luzingu luama mu kibila kiaku.” 38 Yesu wuntambudila: “Ngie wunkuiza vana luzingu luaku mu kibila kiama? Bukiedika yiku kamba ti: Ava tsusu kukokula, ngie wunkuiza mbanga khumbu zitatu.”

14 “Bikanu kukuazuka mu mintima. Lekilanu kiminu mu Nzambi, ayi mu minu. 2 Ku nzo yi Tat’ama, kuidi bibuangu biwombo bi kukala. Boti kuisi ko, khanu yibe lukamba. Ayi minu yenkuenda, muingi kumu kubikila kibuangu. 3 Mvandi, bo yala kuenda muingi kumu kubikila kibuangu, yala bue vutuka, muingi yiza mu landa, muingi voso vama yala ba, benu mvinu muba vana. 4 Ayi benu muzebi nzila yi kibuangu kio minu yenkuenda.”

5 Tomasi wunkamba: “A Mfumu, befu tusa zaba ko kibuangu kio wenkuenda. Buabu, buidi tulenda zabila nzila?”

6 Yesu wumvutudila: “Minu yidi nzila, kiedika ayi luzingu. Vasi ko mutu wulenda kuenda kuidi Tata, boti kasimviokila kuidi minu. 7 Boti benu lunzabizi, khanu luzabizi mvandi Tat’ama. Kutonina kuandi bubu, benu luma kunzaba, ayi lu kummonanga.”

8 Filipi wunkamba: “A Mfumu, wu tumonisa Tata, ayi mintima mitu minkuiza yangalala mu mawu.”

9 Yesu wumvutudila: “A Filipi, thangu yiwombo yeka yinu, vayi kheti bobo musa kunzaba ko? Woso wu kumbona, buna mueni mvandi Tata. Buabu, buidi wu kukhambila: ‘Wu tumonisa Tata’? 10 Benu muisinkikinina ko ti minu yidi kithuadi na Tata ayi Tata widi yama kithuadi? Mambu yiku lukamba masa kuizila ko kuidi minu, vayi kuidi Tata, no widi yama kithuadi, ayi nandi widi mu kuvanga mambu amama ma kukuitukila. 11 Khikininanu, bo yiku lukamba ti, minu yidi kithuadi na Tata, ayi Tata widi yama kithuadi. Boti luisi kukhikinina ko, buna kikininanu kheti mu mambu yimvanga. 12 Bukiedika yiku lukamba ti: Woso mutu wu kundekila kiminu, mvandi wala vanga mambu minu yimvanganga. Ayi mo kala vanga, mala luta kena mambu amama, kibila minu yenkuenda kuama kuidi Tata. 13 Mvandi, kioso kiuma muala dinda mu dizina diama, minu yala ku luvana, muingi Tata kazitusu mu nzila Muana. 14 Kioso kiuma muala dindila mu dizina diama, minu yala ku luvana kiawu.

15 “Boti benu mu kunzolanga, buna munkuiza tumukina zithumu ziama. 16 Minu yala dinda kuidi Tata, ayi nandi wala ku luvana nsadisi wunkaka wala tatamana kuba yinu mvu ka mvu: 17 phevi yinlongo yi kiedika, yo nza kalendi tambula ko, kibila ba yimonanga ko ayi basa yizaba ko, vayi benu muzabizi yawu, kibila yawu yintatamananga yinu, ayi yidi yinu. 18 Yalasa mukuekula ko. Minu yala bue vutuka kuidi benu. 19 Mua thangu to yisiedi, nza yalasa bue kumbona ko, vayi benu muala kumbona, kibila minu yinzinganga ayi benu mvinu muala zinga. 20 Mu kilumbu beni, benu muala zaba ti minu yidi kithuadi na Tata, ayi benu muidi yama kithuadi, ayi minu yidi kithuadi na benu. 21 Woso wunkikinina zithumu ziama ayi wuntumukina ziawu, nandi wu kunzolanga. Mvandi, woso wu kunzolanga, Tat’ama wala kunzola, minu mvama yala kunzola, ayi yala kuyizabikisa buboti kuidi nandi.”

22 Yuda, kubika ti no baba tedilanga Isikalioti, wunyuvula: “A Mfumu, mambu mbi mabe monika, ma kuvanga kuyizabikisa buboti kuidi befu, kubika kuandi kuidi nza?”

23 Yesu wumvutudila: “Woso mutu wu kunzola, ayi wuntumukina mambu mama, Tat’ama wala kunzola, ayi befu tuala kuenda kuidi mutu beni, ayi nandi wala ba yitu. 24 Woso mutu wukhambu kunzolanga, katumukinanga ko mambu mami. Mambu munkuwanga kuidi minu, masi ko mami, vayi madi ma Tat’ama, no wuthuma.

25 “Minu yidi mu ku lukamba mambu amama, bo yikhidi yinu va kimueka. 26 Vayi nsadisi, phevi yinlongo, yo Tat’ama kala fila mu dizina diama, yala ku mulonga mambu moso, ayi yala ku muvanga kutebuka moyo mambu moso minu yi lukamba. 27 Yiku lubikila ndembama, yiku luvana ndembam’ama, yisi ku luvanina ko yawu dedi bo nza yimvaninanga. Bikanu kukuazuka mu mintima minu, ayi bikanu kumona boma. 28 Benu muyuwa mambu yi mukamba: ‘Minu yenkuenda kuama, ayi yala bue vutuka kuidi benu.’ Boti benu mu kunzolanga, khanu mufueti kuangalala bo yenkuenda kuidi Tata, kibila Tata, nandi lutidi kena minu. 29 Minu yiku lukamba mambu amomo, ava mawu mamonika, muingi bo mala monika, benu lukikinina. 30 Yisinkuiza bue yolukanga ko beni yinu, kibila nyadi* wu nza widi mu kukuiza, ayi nandi kasi ko mangolo va ntual’ama. 31 Vayi muingi nza yizaba ti minu yinzolanga Tata, yimvangilanga mambu moso mu phila Tata kathumina. Telamanu, ayi tuendianu kuitu.

15 Minu yidi nti wu vinu wukiedika, ayi Tat’ama widi mvati. 2 Nandi wumbotulanga matafi moso mu minu makhambu butanga ayi wundiodisanga matafi moso mambutanga muingi mabuela kubuta. 3 Benu lueka badiodila mu kibila ki mambu yimu kembi. 4 Tatamananu kuba yama kithuadi, ayi minu yala tatamana kuba yinu kithuadi. Dedi bo kitafi kilendi butila ko mimbutu boti kisi ko kinamanana mu nti wu vinu, benu mvinu, mulendi vana ko mimbutu boti luisi ko yama kithuadi. 5 Minu yidi nti wu vinu, benu luidi matafi. Woso mutu wuntatamana kuba yama kithuadi ayi minu kutatamana kuba yandi kithuadi, nandi wala buta mimbutu miwombo, vayi benu kukhambu ba yama kithuadi, lualasa vanga ko ni kiuma. 6 Woso mutu wunkhambu tatamana kuba yama kithuadi, ba kunlozanga ku nganda dedi bo banlozilanga kitafi ki yuma. Matafi amomo, bankupikanga mawu ayi bamvikanga mawu ku mbazu. 7 Benu kutatamana kuba yama kithuadi ayi malongi mami ma kutatamana mu benu, buna dindanu kuinu kioso kiuma luntomba ayi luala tambula kiawu. 8 Diambu dinzitisanga Tat’ama diakadi: lutatamana kubuta mimbutu miwombo ayi monisanu ti, luidi minlandikini miama. 9 Dedi bo Tata ka kunzodilanga, minu mvama yimu zolanga, diawu, tatamananu mu luzolo luama. 10 Boti benu luntumukina zithumu ziama, buna luala tatamana mu luzolo luama. Dedi bo minu yintumukinanga zithumu zi Tat’ama ayi yintatimininanga mu luzolo luandi.

11 “Minu yibe lukambila mambu amomo, muingi lumona momawu mayangi minu yidi mu kumona ayi muingi mayangi minu maba maduka. 12 Alulu luawu lutumu luama: Zolasananu benu na benu, dedi bo minu yilu zodila. 13 Vasi ko mutu lutidi luzolo kena mutu no wumvana luzingu luandi mu kibila ki bakundi bandi. 14 Benu luala tedulu bakundi bama, benu kuvanga mo yi lutuma. 15 Minu yisi bue lutedila ko mimvika, kibila mvika kazabanga ko mo mfumu’andi kamvanga. Vayi minu yiku lutedila bakundi, kibila yilu zabikisa mamoso yiyuwa kuidi Tat’ama. 16 Benu luisa kutsola ko vayi minu yimu sola ayi yilu bieka muingi luenda ayi lutatamana kubuta mimbutu miala kadidila, muingi kioso kua kiuma lundinda kuidi Tata mu dizina diama, nandi wala ku luvana.

17 “Yilu tuma luvanga mambu amomo, muingi luzolasana benu na benu. 18 Boti nza yi lulendanga, buna zabanu ti minu theti yawu yituamina kulenda. 19 Boti benu luidi kithuadi na nza, khanu yawu yi muzolanga, kibila luidi yandi kithuadi. Vayi mu kuba ti benu luisi ko kithuadi na nza, ayi minu yimu sola mu nza, diawu yawu yi lulendilanga. 20 Tebukanu moyo bo yilu kamba ti: Mvika kasa lutila ko mfumu’andi. Boti bathovula, buna benu mvinu bala lutovula ayi boti batumukina mambu mami, buna bala tumukina mvandi mambu minu. 21 Vayi bala luvangila mambu moso amomo, mu kibila ki dizina diama, kibila bawu basa zaba ko no wuthuma. 22 Boti minu yisa kuiza ko ayi kukoluka yawu, khanu bawu basi ko fotu mu masumu. Vayi bawu badi fotu mu masumu mawu. 23 Woso mutu wu kundenda, mvandi wunlendanga Tat’ama. 24 Boti minu yisa vanga ko mangitukulu mo ni mutu kavengiabu ko, khanu bawu basi ko fotu mu masumu mawu, vayi bawu bambona kuvanga mawu ayi kheti bobo bandenda, ayi banlendanga Tat’ama. 25 Vayi mawu mamonikina muingi kudukisa mambu masonama mu Minsiku, mantuba: ‘Bandenda mu khambu kibila.’ 26 Bo yala lufila phevi yinlongo yikiedika, nsadisi no minu yilu kanikisa yala fumina kuidi Tata, yawu yala vana kimbangi matedi minu. 27 Ayi benu mvinu luala vana kimbangi matedi minu, kibila benu luba yama tona vana thonono.

16 “Yibe lukambila mambu amama, muingi benu lubika sumuka. 2 Batu bala ku lukukisa mu zinzo zi zikhutukunu ayi vala ba thangu yo batu bala kumu vonda mu kuyindula ti badi mu kuvanga kisalu kinlongo ki Nzambi. 3 Vayi batu bala vangila mawu, kibila basa zaba ko Tata ayi mvandi basa kunzaba ko. 4 Vayi minu yiku lukambila mambu amomo, muingi bo thangu mala salimina yala fuana, benu luala tebuka moyo ti minu yi lukamba mawu.

“Minu yisa kulu kamba ko mambu amomo va thonono kibila yiba yinu va kimueka. 5 Buabu yenkuenda kuidi mutu no wuthuma. Vayi kheti bobo, ni wumueka mu benu kasa kukhuvula ko: ‘A Mfumu, kuidi wenkuenda?’ 6 Vayi mintima minu mibe wala mu kiunda, kibila minu yibe lukamba mambu amomo. 7 Vayi minu yiku lukamba mu bukiedika ti, yinkuendila muingi ku lutuadisa ndandu. Kibila minu khambu kuenda, nsadisi kalasa kuiza ko kuidi benu. Vayi minu kukuenda, yala ku lufila nsadisi beni. 8 Bo nsadisi kala kuiza, nandi wala vana bivisa bikiedika mu matedi disumu, busonga ayi lufundusu: 9 theti mu matedi disumu, kibila bawu balekilanga ko kiminu mu minu; 10 bosi mu matedi busonga, kibila yenkuenda kuidi Tata ayi benu luisinkuiza bue mbonanga ko; 11 bosi mu matedi lufundusu, kibila nyadi wu nza ayiyi mafundusu.

12 “Yikhidi mambu mawombo muingi ku lukamba. Vayi mu thangu ayiyi, benu lulendi nunga ko kuvisa mamoso. 13 Vayi mu thangu phevi yinlongo yikiedika yala kuiza, yawu yala kumu tuadisa mu kiedika kioso. Kibila yawu yalasa lulonga ko mambu mandi veka, vayi yala ku lulonga mambu mo kayuwa, ayi yawu yala ku luzabikisa mambu mankuiza ku ntuala. 14 Yawu yala kunzitisa, kibila yala ku luzabikisa mambu katambula kuidi minu. 15 Biuma bioso bi Tat’ami, mvandi bidi biami. Diawu yibe ku lukambila ti nandi, wala ku luzabikisa mambu moso katambula kuidi minu. 16 Mua thangu to yisiedi, benu lualasa bue kumbona ko. Ayi mvandi mua thangu to yisiedi, benu luala bue kumbona.”

17 Mu kibila akiokio, mua ndambu mu minlandikini miandi batona kuyikuvusa: “Mbi nandi kantomba kutuba mu mambu amama: ‘Mua thangu to yisiedi, benu lualasa bue kumbona ko. Ayi mvandi mua thangu to yisiedi, benu luala bue kumbona’ ayi ‘kibila yenkuenda kuidi Tata’?” 18 Bawu baba tuba: “Mbi nandi kantomba kutuba mu bikuma abibi: ‘Mu mua thangu’? Tuisimvisa ko mbi kantomba kutuba.” 19 Yesu mu kuzaba ti bawu baba tomba kumvana biuvu, diawu kaba kambila: “Benu luidi mu kuyikuvusa benu veka mbi binsundula bikuma abibi yibe tuba: ‘Mua thangu to yisiedi, benu lualasa bue kumbona ko. Ayi mvandi mua thangu to yisiedi, benu luala bue kumbona’? 20 Bukiedika yiku lukamba ti: Benu luala dila ayi luala ba mu kiunda, vayi nza yala kuangalala. Benu luala ba mu kiunda, vayi kiunda kinu kiala kituka mayangi. 21 Mu thangu nkietu kambuta, nandi wummonanga beni ziphasi. Vayi bo kammana kubuta, nandi kasikikanga ko mayindu mu ziphasi kabe viokila, mu kibila ki mayangi ma kutuala mutu wunkaka va nza. 22 Bobuawu mvandi, benu luidi mu kiunda mu thangu ayiyi, vayi minu yala bue lumona ayi mintima minu miala kuangalala, ayi ni mutu kalasa lubotula ko mayangi luala ba. 23 Mu thangu beni, benu lualasa kuphana ko ni kiuvu. Bukiedika yiku lukamba ti: Kioso kua kiuma lundinda kuidi Tat’ama mu dizina diami, nandi wala luvana kiawu. 24 Nati mu thangu ayiyi, benu ludindizi’abu ko ni kiuma mu dizina diami. Dindanu ayi luala tambula, muingi mayangi minu maba maduka.

25 “Minu yibe lukamba mambu amomo mu kusadila bifuani. Vayi vala ba thangu yala khambu sadila bifuani muingi ku lukamba mambu. Ayi mu thangu beni, minu yala ku lusudikisa buboti matedi Tata. 26 Mu kilumbu beni, benu muala dinda kuidi Tata mu dizina diami. Mawu masinsundula ko ti minu yala ku ludindila kuidi Nandi. 27 Kibila naveka Tata wuku luzolanga ayi benu lu kunzolanga ayi lunkikininanga ti minu yidi mvuala wu Nzambi. 28 Yiyiza mu nza, banga mvuala wu Tata. Buabu, yembika nza ayi yemvutuka kuidi Tata.”

29 Minlandikini miandi batuba: “Buabu a Mfumu, widi mu kutu zabikisa buboti mambu mu khambu sadila bifuani. 30 Buabu tuma zaba ti mfumu, ngie zebi mambu moso ayi vasintombulu ko ba kuvana biuvu. Diawu befu tunkikinina ti ngie Mfumu wufumina kuidi Nzambi.” 31 Yesu wuba vutudila: “Buabu benu luma kikinina? 32 Yuwanu, vala ba thangu—ayi ayiyi yawu thangu beni—yo benu luala tiakana ayi kadika mutu wala kuenda ku nzo’andi ayi luala kumbika minu veka. Vayi minu yisi ko minu veka, kibila Tat’ami, widi yami. 33 Yima lukambila mambu amomo, muingi lubaka ndembama mu nzil’ami. Nza yala ku lukuamisa, vayi banu kibakala ayi kindamanu! Minu yima nunga nza.”

17 Bo Yesu kamana kutuba mambu amomo, wuvumuna thalu ku diyilu ayi wutuba: “A Tata, thangu yima fuana. Zitisa muan’aku muingi muan’aku ka kuzitisa. 2 Vanga mawu dedi bo wumvanina kimfumu mu batu boso, muingi nandi kavana luzingu lu mvu ka mvu kuidi batu boso wumvana. 3 Luzingu lu mvu ka mvu lunsundula: ku kuzaba ngiewu Nzambi yimueka to yikiedika, ayi kuzaba mutu no wufila, Yesu Klistu. 4 Minu yima kuzitisa va ntoto ayi yima manisa kisalu kio wuphana muingi kuvanga. 5 Buabu a Tata, nzitisa va khonzu’aku mu yoyawu nzitusu minu yiba, bo yiba va khonzu’aku ava nza yivangu.

6 “Yima zabikisa dizina diaku kuidi batu wuphana mu nza. Bawu baba batu baku, vayi ngie wuphana bawu ayi bawu bama tumukina diambu diaku. 7 Buabu, bawu bama zaba ti biuma bioso wuphana, kuidi ngiewu bifumina. 8 Kibila yima bazabikisa mambu wuphana ayi bawu babe kikinina mu mawu, buabu beka bivisa ti minu yiyiza banga mvual’aku ayi bawu, bama kikinina ti ngie wuthuma. 9 Minu yindindila mu kibila kiawu, yisindindila ko mu kibila ki nza, vayi mu kibila ki batu bo wuphana, kibila bawu badi batu baku. 10 Ayi biuma biama bioso bidi biaku, mvandi biuma biaku bioso, bidi biama ayi minu yizitusu va khati’awu.

11 “Minu yambelama kubotuka va nza muingi yiza kuidi ngiewu, vayi bawu bakhidi va nza. Diawu Tat’ami Wunlongo, wuba kieba mu kibila ki dizina diaku, dizina dio wuphana muingi bawu baba buka mutu wumueka to, dedi bo befu tuididi buka mutu wumueka to. 12 Bo minu yibedi yawu, yaba kuba kengidilanga mu kibila ki dizina diaku, dizina dio wuphana ayi minu yiba kieba ayi ni wumueka kasa zimbala ko, kubotula kuandi muana wu mbungulu muingi mambu madi mu Masonoko masalama. 13 Buabu minu yankuiza kuidi ngiewu, ayi yidi mu kutubila mambu amama bo yikhidi va nza, muingi bawu bamona mayangi mawombo minu yidi mu kumona. 14 Minu yiba kembi diambu diaku, vayi nza yiba lendanga, kibila bawu basi ko kithuadi na nza dedi bo minu yikhambulu kithuadi na nza.

15 “Yisi kudinda ko muingi wuba botula va nza, vayi wuba kengidila mu kibila ki Nkua Mambi. 16 Bawu basi ko kithuadi na nza, dedi bo minu yikhambulu kithuadi na nza. 17 Wuba diodisa mu nzila kiedika, kibila diambu diaku didi dikiedika. 18 Dedi bo ngie wuthumina mu nza, minu mvama yiku bafila mu nza. 19 Ayi minu yiku yidiodisa mu kibila kiawu, muingi bawu mvawu baba badiodila mu nzila kiedika.

20 “Yisindinda ko to mu matedi bawu, vayi mvandi mu matedi baboso ba kundekila kiminu mu kibila ki mambu bawu banlonga. 21 Muingi baboso baba buka mutu wumueka to, dedi bo ngie Tata wididi yama kithuadi, ayi minu yidi kithuadi na ngiewu, muingi bawu mvawu baba yitu kithuadi ayi muingi nza yikikinina ti ngie wuthuma. 22 Minu yiku bakinzikanga dedi bo ngie wu kukhinzikilanga, muingi bawu baba buka mutu wumueka to, dedi bo befu tuididi buka mutu wumueka to. 23 Minu yidi yawu kithuadi ayi ngie Tata widi yama kithuadi, muingi bawu mvawu baba kithuadi ayi muingi nza yizaba ti ngie wuthuma; ayi ti ngie wuba zolanga dedi bo wu kunzodilanga. 24 Tata, minu yintomba muingi batu wuphana baba yama voso vo yinkuenda, muingi bamona nkembu wuphana, kibila ngie wunzola ava nza yivangu. 25 Tata Wusonga, nza yisa kuzaba ko, vayi minu yiku zebi ayi batu ababa bazebi ti ngie wuthuma. 26 Minu yiba zabikisa dizina diaku ayi yela tatamana ku dizabikisa, muingi bawu bamonisa luzolo kuidi batu bankaka, dedi bo ngie wumbonisina luzolo ayi minu yala ba yawu kithuadi.”

18 Bo Yesu kamana kutuba mambu amomo, nandi ayi minlandikini miandi bayenda ku khonzu yinkaka yi ḿbuinga wu Sedroni. Ku kibuangu beni nandi ayi minlandikini miandi bakota, kuba nlumba. 2 Yuda no waba belama kumvakula, mvandi wuzaba kibuangu beni, kibila Yesu wabe kuendanga kuna khumbu ziwombo na minlandikini miandi. 3 Mu phila ayoyo, Yuda wutuala nkangu wu masodi, ayi mvandi minsungi, bo zimfumu zi zinganga nzambi ayi bafalisi batuma. Bawu baba na minda ayi mata. 4 Bo Yesu kazaba mambu mabe belama kummonikina, diawu kayendila va ntuala ayi wuba yuvula: “Nani benu muntomba?” 5 Bawu bantambudila: “Yesu, musi Nazaleti.” Nandi wuba kamba: “Minu Yesu beni.” Yuda, mvakudi, mvandi wuba yawu.

6 Vayi bo Yesu kaba kamba: “Minu Yesu beni”, bawu bavutuka mbusa, ayi babua va tsi. 7 Yesu wubue bakuvula: “Nani benu muntomba?” Bawu batuba: “Yesu, musi Nazaleti.” 8 Yesu wuba vutudila: “Minu yima lukamba ti, minu wuwu kuandi. Boti minu muntomba, buna bikanu batu abobo benda.” 9 Mambu amomo mamonikina, muingi mambu katuba masalama: “Yisa zimbisa ko ni wumueka mu batu wuphana.”

10 Bosi Simoni Petelo wutitika mbedi ayi wuzenga dikutu di khonzu yi lubakala di kisadi ki nkulutu wu zinganga nzambi. Dizina di kisadi beni diba, Malko. 11 Vayi Yesu wukamba Petelo: “Vutula mbedi mu lubunda, bukiedika ti vasintombulu ko minu kunua mbungu yi Tat’ama?”

12 Bosi, masodi na mfumu’awu ayi minsungi mi basi Yuda, babuila Yesu ayi bankanga. 13 Bawu bannata theti kuidi Anasi, kibila nandi wuba nkuekizi wu Kaifasi, no wuba nkulutu wu zinganga nzambi mu mvu beni. 14 Bukiedika, Kaifasi nandi wukamba basi yuda ti vaba tombulu mutu wumueka to kufua, mu kibila ki dikabu.

15 Simoni Petelo ayi nlandikini wunkaka, baba landakana Yesu. Nlandikini beni wuba wuzabakana kuidi nkulutu wu zinganga nzambi, ayi nandi wukota na Yesu ku khati luphangu lu nkulutu beni. 16 Vayi Petelo wusiala va muelu ku khonzu yi nganda. Diawu nlandikini beni wunkaka no wuba wuzabakana kuidi nkulutu wu zinganga nzambi, wubasika, wuyoluka na kisadi ki nkietu kiaba kengidilanga muelu, ayi nandi wukotisa Petelo ku khati. 17 Bosi, kisadi beni ki nkietu wuyuvula Petelo: “Ngie wisi ko wumueka mu minlandikini mi dibakala adiodio?” Petelo wuntambudila: “Ndamba, yisi ko.” 18 Bisadi ayi minsungi baba kota mbazu, kibila kiosi kuba. Petelo mvandi wuba vana muingi kukota mbazu.

19 Bosi nkulutu wu zinganga nzambi wuyuvula Yesu matedi minlandikini miandi, ayi matedi mambu kaba longa. 20 Yesu wumvutudila: “Yilonga batu va nyalu nguba. Yintatamananga kulongila mu zinzo zi zikhutukunu ayi ku tempelu, ko basi yuda bankutikininanga, ayi yisa vangila ko ni diambu ku kinsueki. 21 Buabu, kibila mbi ngie mfumu wu kuphanina biuvu? Yuvula kuidi batu bayuwa mambu yilonga. Yidi lufiatu ti bawu bazebi mambu minu yilonga.” 22 Bo Yesu kamana kutuba mambu amomo, wumueka mu minsungi wuba vana, wunkata mbata ayi wunkamba: “Ayoyo yawu phila yi kutambudila mfumu yi zinganga nzambi?” 23 Yesu wuntambudila: “Boti diambu dimbi minu yibe tuba, buna khamba diambu beni dimbi yibe tuba, vayi boti mambu yibe tuba madi mamboti, buabu, kibila mbi wu kukhatila mbata?” 24 Bosi, Anasi wufila Yesu wukangama kuidi Kaifasi, nkulutu wu zinganga nzambi.

25 Simoni Petelo wuba vana ayi waba kota mbazu. Bosi banyuvula: “Ngie mvaku widi wumueka mu minlandikini miandi ve?” Nandi wumanga, mu kutuba: “Minu yisi ko.” 26 Wumueka mu bisadi bi nkulutu wu zinganga nzambi, musi dikanda di dibakala bazenga dikutu kuidi Petelo, wunyuvula: “Bakana ko ngie yibe mona yandi va kimueka ku nlumba?” 27 Vayi, Petelo wubue manga, ayi muna thangu beni tsusu yikokula.

28 Bosi, babotula Yesu ku nzo yi Kaifasi, ayi bannata ku nzo yi Pilatu, no waba yadila kizunga ki Yuda. Meni bavangila mawu. Vayi bawu basa kota ko ku nzo yi nyadi beni, muingi babika kuba mvindu, kibila baba belama kudia bidia bi pasika. 29 Diawu, Pilatu wubasika muingi kuba dengana ayi wuba yuvula: “Mambu mbi muidi mu kufundila dibakala adiodio?” 30 Bawu bantambudila: “Boti dibakala adiodio, kasa vanga ko diambu dimbi, khanu tusa ntuala ko kuidi ngiewu mfumu.” 31 Mu phila ayoyo, Pilatu wuba kamba: “Nnatanu benu veka, ayi mfundisanu mu kutadila minsiku minu.” Basi yuda beni bankamba: “Tuisi ko nsua wu kuvonda ni mutu.” 32 Mawu mamonikina, muingi mambu Yesu katuba matedi ntindu lufua kaba belama kufua, masalama.

33 Bosi Pilatu wubue kota ku nzo yi minyadi, wutela Yesu ayi wunyuvula: “Ngie widi ntinu wu basi Yuda?” 34 Yesu wunkamba: “A mfumu, widi mu kukhuvudila kibila buawu buididi mayindu maku, voti bankaka babe kukamba mawu?” 35 Pilatu wuntambudila: “Ngie wummuena ti minu yidi musi Yuda? Dikabu diaku ayi zimfumu zi zinganga nzambi, bawu babe kutuala kuidi minu. Mambu mbi bevanga?” 36 Yesu wumvutudila: “Kintinu kiama, kisi ko ki nza ayiyi. Boti kiawu kidi ki nza ayiyi, khanu bisadi biama babe nuana, muingi babika kuphakula kuidi basi yuda. Vayi Kintinu kiama, kisi ko ki nza ayiyi.” 37 Bosi Pilatu wunyuvula: “Buabu, ngie widi ntinu?” Yesu wuntambudila: “Ngie veka widi mu kutuba ti, minu yidi ntinu. Yibutukila ayi yiyiza va nza mu kibila akiki: muingi kuvana kimbangi matedi kiedika. Ayi woso mutu widi ku khonzu kiedika, wunkuwanga mbembu’ama.” 38 Pilatu wunyuvula: “Kiedika buna mbi?”

Bo kamana kutuba mambu amomo, nandi wubue basika ayi wuye dengana basi yuda, bosi wuba kamba: “Yisimmona ko kibila mu nandi, muingi kunzengila nkanu. 39 Kubotula kuandi amomo, minu yifueti kumu basisila mutu mueka mu buloku, mu thangu nkungi wu Pasika, buabu muntomba yimu basisila Ntinu wu basi yuda?” 40 Bawu babue tenduka: “Tuisintomba ko dibakala adiodio; tuntomba Balabasi!” Vayi, Balabasi wuba kidovula.

19 Bosi Pilatu wunata Yesu ayi wutuma muingi bambula bikoti. 2 Masodi bavanga kolowa yi zitsendi ayi batula yawu ku ntu’andi, mvandi bamvuika kiyunga kibenga. 3 Bawu baba fikamanga vo kaba ayi baba tubanga: “Mboti, Ntinu wu basi yuda!” Mvandi baba kunkatanga zimbata. 4 Pilatu wubue basika ayi wukamba dikabu: “Yuwanu! Ya kuntuala ku nganda kuidi benu, muingi luzaba ti yisa mona ko ni kibila mu nandi muingi kunzengila nkanu.” 5 Bosi Yesu wubasika, nandi wuba wuvuata kolowa yi zitsendi na kiyunga kibenga. Ayi Pilatu wuba kamba: “Nakawu dibakala beni!” 6 Diawu, bo zimfumu zi zinganga nzambi ayi minsungi bammona, batenduka: “Ḿbanda va dikunzi! Ḿbanda va dikunzi!” Pilatu wuba kamba: “Nnatanu benu veka muingi lumvonda, kibila minu yisimmona ko kibila ki kunzengila nkanu.” 7 Basi yuda bamvutudila: “Befu tuidi minsiku, ayi mu kutadila minsiku beni, diawu nandi kafueti fuila, kibila widi mu kutuba ti widi muana Nzambi.”

8 Bo Pilatu kayuwa mambu baba tuba, nandi wuyiza luta ba mu boma. 9 Pilatu wubue kota ku nzo yi minyadi ayi wukamba Yesu: “Ngie widi musi na?” Vayi Yesu kasa mvana ko ni mvutu. 10 Diawu Pilatu kankambila: “Ngie mengi kukoluka yama? Ngie wusa zaba ko ti minu yidi nsua wu kubasisa ayi mvandi wu kuvonda?” 11 Yesu wumvutudila: “Ngie khanu wisi ko lutumu mu minu, boti Nzambi kasa kuvana ko luawu. Diawu, dibakala be kuphakula kuidi ngie, nandi lutidi masumu.”

12 Diawu, Pilatu waba tomba luaku muingi kumbasisa, vayi basi yuda baba tenduka: “A mfumu, ngie kubasisa dibakala adiodio, buna wisi ko nkundi wu Sesali. Kibila woso mutu wuntuba ti widi ntinu, widi mbeni Sesali. 13 Pilatu bo kayuwa mambu amomo, wunata Yesu ku nganda ayi nandi wukala va kikundu ki mfundisi, va kibuangu bantedilanga Nganda yi Mamanya, vayi mu kiebeleo, Ngabata. 14 Mawu mamonika mu kilumbu baba kubika Pasika, mu kilokula ki nsambanu. Ayi Pilatu wukamba basi yuda: “Nakawu ntinu’inu!” 15 Vayi bawu baba tenduka: “Mvonda! Mvonda! Ḿbanda va dikunzi!” Vayi Pilatu wuba yuvula: “Yifueti vonda ntinu’inu?” Zimfumu zi zinganga nzambi bamvutudila: “Kubotula Sesali, befu tuisi ko ntinu wunkaka.” 16 Mu kibila akiokio, Pilatu wuyekula Yesu mu mioko miawu muingi bamvondila va dikunzi.

Diawu, bawu banata Yesu. 17 Ayi naveka Yesu wunata dikunzi nati ku kibuangu bantedilanga Kibuangu ki Mimvesi Mintu, kio bantedilanga Ngolongota, mu kiebeleo. 18 Ayi va kibuangu beni, vawu bambandila va dikunzi, ayi vaba babakala buadi babanda va khonzu’andi, wumueka ku khonzu lubakala, wunkaka ku khonzu lukietu. 19 Mvandi Pilatu wusonika bisono va dibaya ayi wubanda diawu va dikunzi. Biawu biaba tuba: “Yesu musi Nazaleti, Ntinu basi Yuda.” 20 Bawombo mu basi yuda batanga mambu beni, kibila kibuangu babandila Yesu kiba kifikama na divula. Ayi basonikina mambu beni mu kiebeleo, mu latim ayi mu mbembu yi kingeleko. 21 Vayi zimfumu zi zinganga nzambi bakamba Pilatu: “Bika kusonika: ‘Ntinu basi yuda’, vayi sonika ti naveka wutuba: ‘Minu yidi Ntinu wu basi yuda. 22 Vayi Pilatu wuba vutudila: “Mo yibe sonika, mabe fuana.”

23 Bo bamana kubanda Yesu va dikunzi, masodi babonga bikhutu biandi ayi bakaba biawu mu bitini binna, kadika disodi wubonga kitini kimueka, bosi babonga mvandi kiyunga kiandi. Vayi kiyunga beni kisa ba ko kitungu, kibila wuba nledi wumueka to kutona kuyilu nati ku wanda. 24 Diawu, bawu bayikambasana: “Tuisi ḿbaka ko kiawu, vayi tuenta kisavu,* muingi tuzaba nani wunkuiza baka kiawu.” Mambu amomo mamonikina muingi mambu madi mu Masonoko masalama, mantuba: “Bakabana bikhutu biama ayi bata kisavu mu matedi kiyunga kiama.” Bukiedika, mambu amomo, mawu masodi beni bavanga.

25 Va ndeku dikunzi babandila Yesu, vaba mam’andi ayi khomba mam’andi. Mvandi vaba Malia nkazi Kleupa ayi Malia Madalena. 26 Ayi bo kamona ti mam’andi ayi nlandikini’andi no kaba zolanga beni, baba babelama vo nandi kaba, Yesu wukamba mam’andi: “Awuwu, nandi muan’aku!” 27 Bosi nandi wukamba nlandikini’andi: “Awuwu, nandi ngudi’aku!” Ayi tona mu kilumbu beni, nandi wunata ngudi Yesu ku nzo’andi.

28 Mu kuzaba ti nandi wuvanga mambu moso Tat’andi kandinda, Yesu wutuba: “Yidi phuila.” Katubila mawu muingi kudukisa mambu madi masonama mu Masonoko. 29 Vaba kibasa kimueka kiba kiwala vinu yi ngami. Bosi babonga mua esponja kiba mu mua nti wu hissopo ayi babuika mu vinu beni, bosi bakuika kiawu mu munu’andi. 30 Bo katota vinu beni yiba ngami, Yesu wutuba: “Mamoso ma masalama!” ayi nandi wudukika ntu ayi wumana monyo.*

31 Bo kilumbu beni kiba kilumbu ki khubumunu, muingi zinyitu zi batu babanda zibika tatamana mu makunzi mu kilumbu ki kisabala, (kibila kisabala beni kiba kisabala kinneni), basi yuda bandinda Pilatu muingi kaba vana nsua wu kubokuna malu ma batu baba babandu va makunzi ayi kubotula zinyitu ziawu. 32 Bosi masodi bayenda ayi babokuna malu ma babakala baba buadi baba mu zikhonzu ziwadi. 33 Vayi, bo bavitila vaba Yesu bawu bamona ti nandi wuba wufua, diawu bakhambu bue bokunina malu mandi. 34 Vayi kheti bobo, wumueka mu masodi wuntobula luvati mu kusadila dionga, ayi muna thangu beni menga ayi nlangu bibasika. 35 Ayi no wumona mawu, wumvana kimbangi ayi kimbangi kiandi kidi kikiedika; ayi nandi zebi ti widi mu kutuba kiedika muingi benu lukikinina mawu. 36 Bukiedika, mambu amomo mamonikina muingi kudukisa mambu madi masonama, mantuba: “Balasa bokuna ko ni mvesi’andi wumueka.” 37 Ayi mvandi, Masonoko mankaka mantuba: “Bala tala mutu no batobula.”

38 Bo mambu amomo mavioka, bosi Yozefi musi Alimateia (no mvandi wuba nlandikini Yesu ku kinsueki, kibila boma kaba monanga basi yuda) wuyuvula Pilatu boti kalenda kue botula nyitu Yesu va dikunzi, ayi Pilatu wumvana nsua. Diawu nandi kaye landila nyitu beni. 39 Nikodemi, dibakala dio diyenda mu khumbu yitheti kuendengana va builu, mvandi wuyenda ayi wunata malasi mavangulu mu mila ayi aloes, maba zita nduka 33 di zikilu. 40 Bawu babonga nyitu Yesu ayi bazinga yawu mu minledi mivangulu mu linho, badukudila malasi dedi bo bubela kifu ki basi yuda, mu matedi kukubika nyitu yo bakue zika. 41 Ayi va kibuangu beni bavondila Yesu, vaba nlumba ayi va nlumba beni vaba dibumbi dimona, dio ka bazikidiabu ko ni mutu. 42 Bo kiba kilumbu ki khubumunu ki basi yuda, ayi bo dibumbi beni diba difikama, diawu batudila muna nyitu yi Yesu.

20 Mu kilumbu kitheti kisabala, meni meni, buna kukhidi mua kitombi, Malia Madaleni wuyenda ku dibumbi ayi wumona ti dimanya dio bafuka vana, ba dibotula. 2 Diawu, nandi wuduma, wuyenda kuidi Simoni Petelo, ayi kuidi nlandikini wunkaka no Yesu kaba zolanga beni ayi wuba kamba: “Babe botula nyitu yi Mfumu ku dibumbi, ayi tuisa zaba ko vama mbi babe tula yawu.”

3 Bosi Petelo ayi nlandikini wunkaka babasika ayi bayenda ku dibumbi beni. 4 Baba buadi batona kuduma va kimueka vayi nlandikini wunkaka wuluta zithinu kena Petelo, diawu nandi kavitidila wutheti ku dibumbi. 5 Vayi bo kayinama ayi katala kuna khati dibumbi, nandi wumona ti minledi mi linho bazinga Yesu miba vana, vayi nandi kasa kota ko. 6 Bosi Simoni Petelo wuvitila kuna, wukota ku dibumbi ayi wumona ti minledi mi linho misiala vana. 7 Vayi nledi wo banzinga ku ntu, wisa ba ko va kimueka na minledi minkaka, vayi wawu wuba va khonzu yinkaka. 8 Bosi nlandikini wunkaka, no wuvitila theti va dibumbi mvandi wukota, wumona ayi wukikinina mu mawu. 9 Kibila nati mu thangu ayoyi, bawu babasa visa ko Masonoko maba tuba ti Nzambi wala kumvulubusa mu bafua. 10 Bosi, bawu bavutuka ku nzo.

11 Vayi Malia wutelama ku nganda, va khonzu dibumbi beni ayi waba dila. Bo kaba dila, nandi wuyindimina ku khati dibumbi beni, 12 ayi wumona zimbasi wadi baba mazuela maphembi, baba bakala va kibuangu kiba nyitu yi Yesu; wumueka mu bawu wuba ku khonzu yi ntu ayi wunkaka ku khonzu yi malu. 13 Bawu banyuvula: “A nkietu, kibila mbi widi mu kudidila?” Nandi wuba vutudila: “Babe nata nyitu yi Mfumu’ami, ayi yisa zaba ko vadi babe tula yawu.” 14 Bo kamana kutuba mambu amomo, nandi wutala kumbusa ayi wumona dibakala dimueka wuba wutelama vana; vayi kasa zaba ko ti dibakala beni wuba Yesu. 15 Bosi Yesu wunyuvula: “A nkietu, kibila mbi widi mu kudidila? Nani widi mu kutomba?” Malia kaba muena ti dibakala beni nandi waba kiebanga nlumba wuba kuna, diawu kankambila: “A tata, boti ngie bebotula nyitu’andi, buna khamba kuidi be yitula, muingi minu yinata yawu.” 16 Bosi Yesu wuntela: “A Malia!” Malia wubalula thalu ko kaba, ayi wuntambudila mu kiebeleo: “Raboni!” (Dizina dinsundula: “Nlongisi!”). 17 Yesu wunkamba: “Bika kutsimbidila, kibila yiyendiziabu ko kuidi Tat’ama. Vayi yenda kuidi zikhomba ziami ayi wuba kamba: ‘Minu yentombuka kuidi Tat’ama ayi Tat’inu; kuidi Nzambi’ama ayi Nzamb’inu.’” 18 Malia Madalena wuyenda ayi wukamba kuidi minlandikini: “Minu yibe mona Mfumu!” ayi wuba zabikisa mambu moso nandi kankamba.

19 Yiba thangu yi masika mu kilumbu kitheti ki sabala ayi mielu ku kibuangu kio minlandikini baba, miba mizibama, kibila baba boma bu basi yuda. Bosi Yesu wuba monikina va khati’awu, ayi wuba kamba: “Bika ndembama yiba yinu.” 20 Bo kamana kutuba mambu amomo, nandi wuba monisa makanda mandi ayi luvati luandi. Bosi minlandikini miandi bayangalala mu kumona Mfumu. 21 Yesu wubue bakamba: “Bika ndembama yiba yinu. Dedi bo Tata kathumina, minu mvami yiku lutuma.” 22 Bo kamana kutuba mambu amomo, wuba fula phemu ayi wuba kamba: “Tambulanu phevi yinlongo. 23 Benu kulemvukila masumu ma mutu, nandi wala baka nlemvu wu masumu; vayi benu khambu lemvukila masumu ma mutu, nandi kalasa baka ko nlemvu wu masumu.”

24 Vayi Tomasi, wumueka mu Kumi Wadi di bapostolo, no baba tedilanga Kibaza, kasa ba ko yawu bo Yesu kaba monikina. 25 Diawu minlandikini minkaka bankambila: “Befu tube mona Mfumu!” Vayi nandi wuba kamba: “Minu khambu mona bidimbu mu makanda mandi, mu bibuangu bambandila zitsesi ayi minu khambu tula luzala luami mu bidimbu beni, ayi kutula dikanda diami va luvati luandi, yilendi kikinina ko mawu.”

26 Bo vavioka nana di bilumbu, minlandikini miandi babue kutakana ayi Tomasi mvandi wuba yawu. Kheti mielu miba mizibama, vayi Yesu wuba monikina va khati’awu ayi wuba kamba: “Bika ndembama yiba yinu.” 27 Bosi Yesu wukamba Tomasi: “Tula luzala luaku avava ayi tala makanda mami, tula dikanda diaku va luvati luama. Bika kufinda ziphaka ayi kikinina.” 28 Vayi Tomasi wutuba: “Mfumu’ama ayi Nzambi’ama!” 29 Yesu wunkamba: “Ngie makikinina to kibila mambona? Vayi mayangi kuidi bo bakikinini, kheti mu khambu kumbona.”

30 Bukiedika, Yesu wuvanga mangitukulu mawombo va ntuala minlandikini miandi, vayi mangitukulu beni, masi ko masonama mu buku* ayiyi. 31 Vayi mambu amomo masonimina, muingi benu lukikinina ti Yesu nandi Klistu, Muana Nzambi, ayi mu kukikinina, mubaka luzingu mu nzila dizina diandi.

21 Bosi, Yesu wubue monikina minlandikini miandi ku khonzu ḿbu wu Tibeliade. Nandi wumonikina mu phila ayiyi: 2 baba va kimueka Simoni Petelo, Tomasi (no baba tedilanga Kibaza), Natanaeli, musi Kana yiba ku Ngalili, bana ba Zebede ayi minlandikini miandi miodi minkaka. 3 Simoni Petelo wuba kamba: “Minu yenkuenda kue loba.” Bawu bamvutudila: “Befu mvitu tuenkuenda yaku.” Mu phila ayoyo, bayenda ayi bamaka mu buatu, vayi mu builu boso basa baka ko ni mfu yimueka.

4 Bo buisi bukia, Yesu wuba mu ndeku ḿbu, vayi minlandikini miandi basa zaba ko ti nandi wuba Yesu. 5 Bosi Yesu wuba nyuvula: “Bana bama, benu muidi kioso kiuma muingi kudia?” Bawu bamvutudila: “Ndamba.” 6 Nandi wuba kamba: “Kubanu dikondi ku khonzu yi lubakala yi buatu, ayi munkuiza baka zimfu.” Bawu bakuba dikondi, vayi basa nunga ko kutitika diawu, kibila muba zimfu ziwombo. 7 Bosi, nlandikini no Yesu kaba zolanga beni wukamba Petelo: “Awowo Mfumu!” Bo kayuwa mawu, Simoni Petelo wuvuata kikhutu kiandi ki mbata, kibila pheni* kaba ayi wuyikuba mu ḿbu. 8 Vayi, minlandikini minkaka bayizila mu mua buatu beni, ayi baba kuiza titikanga dikondi beni diba diwala zimfu, kibila basa ba ko beni batatuka na disimu. Vayi, vaba to nduka 90 di zimetro.

9 Bo bavitila ku disimu, bamona mbazu ayi zimfu ziba va makala, ayi mvandi dipha. 10 Yesu wuba kamba: “Tualanu mua ndambu di zimfu zio benu luma baka.” 11 Bosi Simoni Petelo wumaka mu buatu ayi wutitika dikondi beni va disimu. Diawu diba diwala zimfu; muba 153 di zimfu zinneni. Kheti muba beni zimfu, vayi dikondi beni, disa bakuka ko. 12 Yesu wuba kamba: “Yizanu mudia.” Ni wumueka mu minlandikini wununga kunkuvula nani nandi kaba, kibila bazaba ti wuba Yesu. 13 Yesu wubonga dipha ayi wuba vana, mawu mvandi kavanga mu mfu. 14 Ayoyo, yawu khumbu yintatu Yesu kamonika kuidi minlandikini miandi, tona Nzambi kamvulubusa mu bafua.

15 Bo bamana kudia, Yesu wuyuvula Simoni Petelo: “Simoni, muana Yoane, ngie wunluta kunzolanga kuvioka abibi?”* Nandi wumvutudila: “Ngete a Mfumu, ngie zebi ti minu yi kuzolanga.” Yesu wunkamba: “Dikilanga bana bama ba mamemi.” 16 Nandi wubue nkuvula mu khumbu yimmuadi: “Simoni, muana Yoane, ngie wu kunzolanga?” Nandi wumvutudila: “Ngete a Mfumu, ngie zebi ti minu yi kuzolanga.” Yesu wunkamba: “Kiebanga bana bama ba mamemi.” 17 Nandi wubue nkuvula mu khumbu yintatu: “Simoni, muana Yoane, ngie wu kunzolanga?” Petelo wuyiza ba mu kiunda, kibila nandi wubue nkuvula mu khumbu yintatu: “Ngie wu kunzolanga?” Diawu nandi kankambila: “A Mfumu, ngie zebi mambu moso, ngie zebi ti minu yi kuzolanga.” Yesu wunkamba: “Kiebanga bana bama ba mamemi.” 18 Bukiedika yi kukamba ti: “Bo ngie wuba ditoko, ngie waba vuatanga ngie veka ayi waba kuendanga voso vama waba tombanga, vayi bo wala nuna, wala tamba mioko ayi mutu wunkaka wala kuvuika bikhutu. Ayi wala kunata va kibuangu kio ngie wukhambu tomba.” 19 Katubila mawu, muingi kumonisa ntindu mbi lufua Petelo kala zitisila Nzambi. Bo kamana kutuba mambu amomo, nandi wunkamba: “Tatamana kundandakana.”

20 Bosi Petelo wutala ku mbusa ayi wumona nlandikini no Yesu kaba zolanga beni, waba kuba landakana. Nlandikini beni, nandi wuyekama Yesu mu kilumbu baba dia ayi no wunyuvula: “A Mfumu, nani wunkuiza kuvakula?” 21 Diawu, bo Petelo kammona, nandi wuyuvula Yesu: “A Mfumu, mbi binkuiza momikina dibakala adiodio?” 22 Yesu wunkamba: “Minu kutia ti nandi katatamana kuzinga nati minu yala vutuka, mbi mawu ma kutedi? Ngie tatamana to kundandakana.” 23 Mu phila ayoyo, batiamuna tsangu kuidi zikhomba ti, nlandikini awowo, kalasa fua ko. Vayi Yesu kasa tuba ko ti nandi kalasa fua ko, vayi wutuba to: “Boti minu yitidi nandi katatamana nati yala kuiza, mbi mawu ma kutedi?”

24 Nlandikini beni, nandi wumvana kimbangi ki mambu amomo, ayi nandi wusonika mawu, ayi befu tuzebi ti kimbangi kiandi, kidi ki kiedika.

25 Bukiedika, vadi mambu mawombo mankaka Yesu kavanga, ayi boti basonika kadika diambu kavanga, mu phila yimmuena, mu nza yimvimba khanu vasi ko kibuangu kilenda lundimina zibuku zisonama mambu beni.