NKANDA WUTHETI KUIDI BASI KOLINTU

1 Minu Polo, no batedila mu luzolo lu Nzambi muingi kuba apostolo wu Yesu Klistu, va kimueka na khomb’itu Sostene, 2 tumfila nkanda awuwu kuidi benu muidi mu kimvuka ki Nzambi ku Kolintu. Benu muidi bavedusu mu kithuadi na Yesu Klistu, ayi basolu muingi kuba banlongo, va kimueka na batu boso bamfiatilanga* mu dizina di Mfumu’itu Yesu Klistu, no widi Mfumu’awu ayi mvandi Mfumu’itu:

3 Bika mamboti malutidi ayi ndembama yi Tat’itu Nzambi ayi yi Mfumu Yesu Klistu, biba yinu.

4 Minu yintondanga beni kuidi Nzambi mu kibila kinu, mu kutadila mamboti malutidi Nzambi ka lumonisa mu nzila Yesu Klistu. 5 Kibila nandi wuluvana kimvuama mu mambu moso, mu thubulu ayi mu nzailu; 6 dedi bo benu lukikinina mu ntima woso, kimbangi matedi Klistu, 7 muingi lubika khambu ni kiuma, bo lumvingila mu phuila thangu Mfumu’itu Yesu Klistu, kala monika. 8 Mvandi, nandi wala ku lukindisa nati ku tsuka, muingi lubika ba fotu mu kilumbu ki Mfumu’itu Yesu Klistu. 9 Nzambi no wulutela muingi luba kithuadi na Muan’andi Yesu Klistu, Mfumu’itu, widi wukuikama.

10 Zikhomba, yiku mukindisa mu dizina di Mfumu’itu Yesu Klistu, muingi luba kithuadi mu thubulu, ayi bikanu kutuadisa kithatu va khat’inu. Vayi banu kithuadi, mu kuba mayindu mamueka, ayi mu kuyindudila phila yimueka. 11 Kibila mua ndambu di batu bankalanga ku nzo yi Klowe, babe thuadila zitsangu matedi benu ti, muidi mu kutuadisa kithatu va khat’inu. 12 Mambu yintomba kutuba madi, kadika mutu mu benu widi mu kutuba: “Minu Polo wuphuidi,” “vayi minu Apolo,” “minu Sefa,” “vayi minu Klistu wuphuidi.” 13 Benu lummuena ti Klistu widi wukabuka? Bukiedika ti Polo wufua va dikunzi muingi ku lukula? Voti, benu lubotimina mu dizina di Polo? 14 Yimvutulanga matondo kuidi Nzambi, kibila yisa botika ko ni mutu mu benu, kubotula kuandi to Klispu ayi Ngaio, 15 muingi ni mutu mu benu kabika kutuba, minu yibotimina mu dizina di Polo. 16 Mvandi, yibotika batu bankalanga ku nzo yi Stefanasi. Kubotula kuandi batu abobo, minu yisa botika ko ni mutu wunkaka. 17 Kibila Klistu, kasa kumfila ko muingi yibotika, vayi muingi yisamuna zitsangu zimboti, ayi bika ti mu kusadila nzayilu yi batu, muingi lufua lu Klistu lubika ba luphamba.

18 Kibila zitsangu matedi lufua lu Yesu va dikunzi, zisi ko tsundu kuidi batu badi mu nzila yi mbungulu. Vayi kuidi befu tuidi mu nzila yi luvukusu, tuzebi ti ziawu, zimmonisa mangolo ma Nzambi. 19 Kibila Masonoko mantuba: “Yala manisa nduenga yi batu ba luzabu, ayi yala manga nzayilu yi batu ba diela.” 20 Nkua luzabu, kuidi kadi? Escriba, kuidi kadi? Mutu wumfindisanga ziphaka mu mambu ma nza ayiyi, kuidi kadi? Bukiedika ti Nzambi, kasa kitula ko nduenga yi nza ayiyi, kiuma ki buvungisi? 21 Kibila nza, mu kutadila ndueg’andi, yisa nunga ko kuzaba Nzambi. Vayi Nzambi wumona mambu mamboti mu kusadila zitsangu zio nza kammuena ti zidi zi buvungisi, muingi kuvukisa bo bankikinina.

22 Kibila basi Yuda bantomba kidimbu, vayi basi Ngeleko, bantomba Luzabu. 23 Vayi befu tuidi mu kusamuna matedi Klistu, no wufuila va dikunzi. Ayi mawu, mamvanga basi Yuda kusumuka, ayi batu ba mimvila minkaka, ba kuma tadila mambu ma buvungisi. 24 Kuidi batu basolu, kuba kuandi basi Yuda, voti basi Ngeleko, Klistu widi mangolo ma Nzambi, ayi widi nduenga yi Nzambi. 25 Kibila, kiuma ki buvungisi ki Nzambi, kilutidi nduenga kena batu ayi kiuma kikhambu mangolo ki Nzambi, kilutidi mangolo kena batu.

26 Zikhomba, benu mulenda mona mu benu veka ti, Nzambi kasa tela ko batu bawombo badi luzabu lu batu, mvandi kasa tela ko bawombo badi kimfumu ayi kasa tela ko bawombo badi nzitusu. 27 Vayi, Nzambi wusola biuma bi buvungisi bi nza, muingi kufuisa tsoni bankua luzabu, ayi wusola biuma bilebakana bi nza, muingi kufuisa tsoni biuma bidi mangolo; 28 ayi Nzambi, wusola biuma bikhambulu luvalu bi nza, ayi biuma nza kanlenzanga, biuma bikhambulu, muingi kufuisa zitsoni biuma bidi, 29 muingi ni mutu kabika kuyinangika, va ntuala Nzambi. 30 Vayi, mu kibila kiandi, diawu luyiza bela kithuadi na Yesu Klistu, no wuyiza ba nduenga yi Nzambi kuidi befu, no wutuvana luaku muingi tubaka lunungu va mesu ma Nzambi, ayi mvandi tuba banlongo ayi bakulu, mu nzila khudulu. 31 Muingi mambu mabela dedi bo busonimina: “Woso mutu wu kinyemisa, kafueti kukinyemisina mu Yave.”

2 Diawu zikhomba ziami, bo minu yiba yinu, yisa luzabikisa ko masuama manlongo ma Nzambi mu kusadila nzayilu yi batu voti thubulu yimbi. 2 Kibila yibaka makani ma kubika ku luzabikisa ni mambu mankaka, kubotula kuandi zitsangu matedi Yesu Klistu, no wufuila va dikunzi. 3 Ayi bo yiyiza kuidi benu, minu yiba wulebakana, yiba boma, ayi yaba titubuka beni. 4 Bo yiyoluka ayi yilonga, yisa tuba ko mambu mavanga bankaka ku kikinina mu lukuiku, buka bumvangilanga batu ba luzabu. Vayi mambu yilonga, madi mbonosono yi mangolo ma phevi yinlongo, 5 muingi luba kiminu mu mangolo ma Nzambi, kubika kuandi mu nduenga yi batu.

6 Buabu, befu mvitu tunkolukilanga matedi nduenga, kuidi batu bayonzuka mu kiphevi. Vayi yawu yisi ko nduenga yi nza ayiyi, mvandi yisi ko nduenga yi mintinu mi luyalu mi nza ayiyi, bala bungu. 7 Vayi befu tuntubilanga matedi nduenga yi Nzambi, yo kazabikisila mu nzila masuama manlongo. Nduenga Nzambi kasueka tona vana thonono, ava nza yivangu muingi ku tuzitisa. 8 Ayiyi, yawu nduenga zimfumu zi luyalu lu nza ayiyi basa zaba ko, kibila boti bazaba yawu, khanu basa zengila ko nkanu wu lufua Mfumu’itu yi nkembu. 9 Vayi dedi bo Masonoko mantubila: “Mesu mawu masa mona ko, makutu mawu masa kuwa ko, ayi basa ba ko phisulu yi mambu Nzambi kakubikila batu ba kunzolanga.” 10 Kibila befu Nzambi kazabikisa ziawu, mu nzila phevi’andi yinlongo, kibila phevi yi Nzambi yimfionguninanga mambu moso, kubunda mvandi mambu maphinda ma Nzambi.

11 Nani mu benu kalenda zaba mayindu ma mutu wunkaka kubotula kuandi ntima* wu mutu beni? Bobuawu mvandi, vasi ko mutu kalenda zaba mambu ma Nzambi, boti phevi yi Nzambi yisi kunzabikisa ko mawu. 12 Vayi befu, tusa tambula ko phevi yi nza, vayi tutambula phevi yifumina kuidi Nzambi, muingi tuzaba mambu mo Nzambi ka tuvanina mu luzolo. 13 Mvandi tuntubilanga matedi mambu amomo, bika ti mu kusadila mambu nduenga yi batu banlonganga, vayi mu kusadila mambu phevi yi Nzambi yinlonganga, bo tunsudikisa mambu ma kiphevi mu kusadila mambu ma kiphevi.

14 Vayi mutu wu kinsuni, kakikininanga ko mambu ma phevi yi Nzambi, kibila kuidi nandi, madi mambu ma buvungisi. Ayi nandi kalendi zaba ko mawu, kibila nandi kafueti fiongunina mawu mu kiphevi. 15 Vayi mutu wu kiphevi, wumfionguninanga mambu moso, ayi vasi ko ni mutu kalenda kumfundisa. 16 Kibila Masonoko mantuba: “nani kalenda zaba mayindu ma Yave muingi kunlonga”? Vayi befu tuidi mayindu ma Klistu.

3 Diawu zikhomba, yisa lukambila ko buka batu ba kiphevi, vayi buka batu ba kinsuni, buka bana ba bilezi mu Klistu. 2 Minu yilu vana leta, kubika kuandi bidia bingolo. Kibila mu thangu beni, benu musa ba ko bakubama muingi kudia bidia bingolo. Ayi nati bubu, mubediabu ko bakubama muingi kudia biawu, 3 kibila benu mukhidi batu ba kinsuni. Ayi va khat’inu vawedi kiphala ayi ziphaka; mawu mammonisa ti benu muidi mu kudiatila buka basi nza. 4 Kibila bo wumueka mu benu kantuba: “Minu Polo wuphuidi,” vayi wunkaka wuntuba: “Minu Apolo,” bukiedika ti mu phila ayoyo, muisi mu kudiatila ko buka batu ba nza?

5 Buabu, nani Apolo ayi nani Polo? Bawu badi to bisadi ba lusadisa kuba baklistu, dedi bo Mfumu, katuvanina luaku. 6 Minu yivata, Apolo wulembila nlangu, vayi Nzambi, nandi wumenisa. 7 Diawu, mutu wumvata ayi no wunlembila nlangu, basi ko beni nkinza, vayi Nzambi wummenisanga, nandi lutidi nkinza. 8 Mutu wumvata ayi mutu wunlembila nlangu, baba buadi bansalanga mu kithuadi, vayi kadika mutu wala tambula mfutu’andi mu kisalu kavanga. 9 Befu tuidi bisadi binsalanga va kimueka na Nzambi. Ayi benu luidi tsola Nzambi kakuna, ayi nzo Nzambi katunga.

10 Mu kibila ki mamboti malutidi Nzambi kambonisa, minu yivanga lusersu buka ntungi wupisuka, vayi mutu wunkaka, wuyiza tungila va mbata lusersu beni. Diawu, bika kadika mutu kaba keba keba, mu phila kankuiza tungila va mbata lusersu beni. 11 Kibila vasi ko mutu wulenda vanga lusersu lunkaka, kubotula kuandi lo bavanga, lunsundula, Yesu Klistu. 12 Diawu, mutu na kutungila va mbata lusersu, mu kusadila wola, palata, mamanya mathalu, mabaya, voti bititi, 13 bo thangu yi zikhuamusu yala fuana, ntindu kisalu kadika mutu kavanga, kiala monika. Kibila mbazu yala monisa kiawu, ayi mbazu beni yala monisa ntindu kisalu kadika mutu kavanga. 14 Boti nzo kadika mutu katunga va mbata lusersu beni yintatamana, nandi wala tambula mfutu; 15 boti nzo yi mutu mueka yividi, buna mutu wutunga yawu wala mona phasi, vayi mutu beni kalasa tuluka ko; nandi wala ba buka mutu bevuka mu mbazu.

16 Benu lusa zaba ko ti muidi tempelu yi Nzambi, ayi ti phevi yi Nzambi, yinkalanga mu benu? 17 Mutu na kutulula tempelu yi Nzambi, Nzambi wala kumbunga, kibila tempelu yi Nzambi, yidi yinlongo, ayi benu luidi tempelu beni.

18 Bikanu kuyivuna: Boti vadi mutu wunyindula ti widi nduenga va mesu ma batu ba nza ayiyi, buna bika kakituka kivungisi, muingi kaba mutu wu nduenga yikiedika. 19 Kibila nduenga yi nza ayiyi, yidi yi buvungisi va mesu ma Nzambi, kibila madi masonama: “Nandi wumbuilanga batu ba nduenga, mu diela diawu di buvungisi.” 20 Mvandi madi masonama: “Yave zebi ti mayindu ma batu ba nduenga, madi maphamba.” 21 Diawu ni mutu kabika kukinyemisa, mu matedi mambu batu bamvanga, kibila benu muvuidi biabioso: 22 kuba kuandi Polo, Apolo, Sefa, nza, luzingu, lufua, biuma bidi mu thangu ayiyi ayi biuma binkuiza, biabioso benu muvuidi biawu; 23 vayi benu, Klistu wu luvuidi ayi Nzambi, nandi vuidi Klistu.

4 Bika batu ba tutadila buka bisadi bi Klistu, ayi batu bankiebanga masuama manlongo ma Nzambi. 2 Ayi mutu wunkiebanga biuma, kafueti ba wukuikama. 3 Minu yisimvua ko nkinza boti benu lunkuiza mfundisa, voti bankuiza mfundisa ku nzo yi lufundusu. Kibila minu mvama yi kifundisanga ko minu veka. 4 Kibila yisa zaba ko ni diambu dimbi mu matedi minu veka. Vayi mawu masinsundula ko ti minu yidi wusonga, kibila Yave, nandi wu kumfundisanga. 5 Diawu, bikanu kufundisa ni mutu nati thangu Mfumu kala kuiza. Nandi wala tuala mambu masueku ku kitombi va kiezila, ayi wala zabikisa makani madi mu mintima, bosi kadika mutu wala tambula nkembu’andi kuidi Nzambi.

6 Zikhomba, yibe sadila mambu amama, muingi kutubila matedi Apolo ayi minu, muingi ku lutuadisa ndandu, ayi muingi mu kifuani kitu, mulonguka mambu amama: “Bikanu kusabuka ndilu mu mambu masonama,” muingi mubika ba lungundayi, ayi lubika tuadisa kithatu va khat’inu, mu kusola wunkaka ayi kulenda wunkaka. 7 Mbi bi kuvanga kuba disuasana na bankaka? Biuma mbi bidi yaku, bio ngie wukhambu tambula? Boti ngie wutambula biabioso widi, buabu kibila mbi widi mu kukinyemisina buka ti wusa bitambula ko?

8 Benu luma kukuta? Mueka busina? Luma tona kuyala mukhambu tuvingila? Minu yitidi benu mutona kuyala, muingi befu mvitu tuyala va kimueka na benu. 9 Mu phila yimmuena, Nzambi wutu vanga befu bapostolo, tuba mu nkangu wu batu badi ku tsuka, muingi kutambula nzengolo yi lufua, kibila tuidi buka bisavu mu nza, kuidi zimbasi ayi kuidi batu. 10 Befu tuidi bivungisi mu kibila ki Klistu, vayi benu luidi batu banduenga mu kithuadi na Klistu. Befu tuidi balebakana, vayi benu luidi bakinda; benu ba luzitisanga, vayi befu ba tuzitisanga ko. 11 Nati bubu, befu tumviokilanga mu nzala ayi mu phuila, tuisi ko bikhutu biwombo, ba tusuvanga khuba, tuisi ko zinzo muingi kukala, 12 ayi tunsalanga beni mu mioko mitu veka. Bo batufinga befu tuba sakumunanga; bo batukuamisa, befu tunkindamanga mu mvibudulu; 13 bo batutubila bubi, befu tuba tambudilanga mu malembi. Nati bubu, befu tuidi buka tsodo yi nza, ayi tuidi buka biuma bikhambulu nkinza.

14 Yidi mu kulusonikina mambu amama, bika ti muingi ku lufuisa zitsoni, vayi muingi ku lulonga buka bana bami ba luzolo. 15 Vayi kheti muidi 10.000 di minlongisi ba kululonganga matedi Klistu, vayi luisi ko matata mawombo, kibila minu yiyiza kituka tat’inu mu Yesu Klistu, mu nzila zitsangu zimboti. 16 Diawu minu yiku lukindisila muingi lu landakana kifuani kiama. 17 Diawu yiku lufidila Timoti, kibila nandi widi muan’ama wu luzolo, ayi widi wukuikama mu mfumu. Nandi wunkuiza lutebula moyo phila yimvangilanga mambu, mu kithuadi na Yesu Klistu, dedi bo minu yidi mu kulongila mu bimvuka bioso bidi mu bibuangu binkaka.

18 Bawombo mu benu badi mu kukinyemisa, buka ti minu yisinkuiza lutala ko. 19 Vayi Yave na kutia, valasa vioka ko beni thangu, minu yinkuiza lutala. Ayi yisinkuiza vua ko nkinza mambu batu abobo bakinyemisanga bantubanga, vayi yinkuiza tomba kuzaba boti bawu badi mangolo ma Nzambi. 20 Kibila Kintinu ki Nzambi, kisi ko matedi mambu batu bantubanga, vayi kitedi, boti mutu wummonisa mangolo ma Nzambi. 21 Mbi lutidi, muntomba minu yiza mutala na lusuadi muingi yi mubula? Voti mu luzolo ayi mu phevi yilembama?

5 Kuidi mu kukuwakana zitsangu zi butsuza va khat’inu, mambu ma khambu monikanga kuidi batu ba nza: dibakala dimueka mu benu widi mu kubundananga nyitu na nkazi wu tat’andi. 2 Vayi benu luidi mu kinyemisa mu mawu? Bikanu kukinyemisa, vayi banu mu kiunda kingolo, muingi dibakala widi mu kuvanga mambu amomo, bambotula va khat’inu. 3 Kheti minu yisi ko yinu koko mu kinsuni, vayi yidi yinu mu kiphevi ayi yima fundisa dibakala didi mu kuvanga mambu amomo, buka ti minu yidi yinu koko. 4 Bo munkuiza kutakana mu dizina di Mfumu’itu Yesu, mu kuzaba ti minu yidi yinu va kimueka mu kiphevi, ayi mu mangolo ma Mfumu’itu Yesu, 5 benu lufueti vana dibakala adiodio kuidi Satana, muingi kubotula mavanga mambi kabe tuadisa mu kimvuka.

6 Mambu luidi mu kuyinyemisina, masi ko mamboti. Benu lusa zaba ko ti mua ndambu luvi lumfunisanga falini yoso? 7 Botulanu luvi lukhulu muingi benu luba falini yimona, dedi bo benu luididi bubu. Kibila Klistu, Muana Dimemi ditu di Pasika, wuvondu. 8 Diawu, kembanu nkungi mu khambu sadila luvi lukhulu, ni luvi lu mambi ayi lukhambulu kiadi, vayi sadilanu mapha makhambulu luvi, mavedila ayi ma kiedika.

9 Yilusonikini mu nkanda yi lufididi, muingi lubika ba kithuadi na batu bamvanganga mambu ma butsuza. 10 Yisintomba ko kutuba ti lubika ba kithuadi mu mambu moso, na batu mu nza bamvanganga mambu ma butsuza, voti banzininanga biuma bingana, bamvinzanga* biuma bingana, voti bambuongiminanga bitumba. Boti buawu, khanu vankuiza tombulu benu kubotuka va nza. 11 Vayi bubu, yi kulusonikina muingi lubika ba kithuadi, na woso kua khomba wumvanganga mambu ma butsuza, wunzininanga biuma bingana, wumbuongiminanga bitumba, wumfinganga, widi kikolo ki malavu, voti wumvinzanga biuma bingana, ni kheti kudia na mutu beni. 12 Buabu, bukiedika ti minu yidi nsua wu kufundisa batu bakhambulu mu khati kimvuka? Luisi ko benu luidi nsua wu kufundisa badi mu khati kimvuka, 13 ayi Nzambi kufundisa badi kunganda? “Botulanu va khat’inu mutu widi mavanga mambi.”

6 Boti ngie bebakasana mambu na khomb’aku, kibila mbi wu kunnatina ku nzo lufundusu muingi batu bakhambulu basonga bamfundisa, kubika kuandi kuidi batu banlongo? 2 Benu lusa zaba ko ti banlongo bala fundisa nza? Buabu, boti benu luala fundisa nza, bukiedika ti luisi ko bafuana muingi kufundisa mambu amomo makhambulu beni nkinza? 3 Benu lusa zaba ko ti befu tuala fundisa zimbasi? Buabu, kibila mbi tulendi fundisila ko mambu ma luzingu alulu? 4 Va kumonika mambu ma luzingu alulu, ayi boti mawu mantombulu kudedukusu, kibila mbi lunsodilanga kukuenda kuidi batu bo zikhomba zitu bakhambu fiatilanga muingi ba lufundisa? 5 Yiku lukamba mambu amomo, muingi lumona zitsoni. Bukiedika ti va khat’inu, vasi ko ni mutu wulenda fundisa mambu zikhomba babe bakasana? 6 Vayi khomba wunnatanga khomb’andi ku nzo yi lufundusu, muingi bamfundisa kuidi batu bakhambu sadilanga Nzambi!

7 Bukiedika, nzimbala yinneni lumvanganga bo luyifundasana benu na benu ku nzo yi lufundusu. Kibila mbi lukhambu vibidilanga bo baluvangila mambu makhambulu masonga? Kibila mbi lukhambu kikinina to kuzimbisa biuma beni? 8 Vayi benu lumvanganga mambu makhambulu masonga, ayi mu phila ayoyo, luntuadisanga ziphasi kuidi zikhomba zinu!

9 Benu lusa zaba ko ti batu bakhambulu basonga balasa vua ko Kintinu ki Nzambi? Bikanu kuyivuna. Batu bamvanganga mambu ma butsuza, bambuongiminanga bitumba, bamvanganga kiphinga, babakala ba yitulanga va kibuangu ki bakietu muingi kubundana nyitu na babakala, babakala bambundananga nyitu na babakala yawu, 10 mivi, banzininanga biuma bingana, bikolo bi malavu, bamfinganga ayi bamvinzanga biuma bingana balasa vua ko Kintinu ki Nzambi. 11 Ayi mawu benu mvinu luaba vanganga. Vayi benu ba lusukula, ba ludiodisa, ba luvedisa ayi ba lutedila batu basonga mu dizina di Mfumu Yesu Klistu, ayi mu phevi yinlongo yi Nzamb’itu.

12 Minu yidi nsua wu kuvanga mambu moso, vayi bakana ko mambu moso mantuadisanga ndandu. Minu yidi nsua mu mambu moso, vayi yisinkuiza bika ko ni diambu dimueka, dikhitula mvika. 13 Bidia binkuendanga mu kivumu, ayi kivumu kintambulanga bidia, vayi Nzambi wala tulula bia bibiodi. Nyitu yisa vangulu ko muingi kuvanganga mambu ma butsuza, vayi yivangulu mu kibila ki Mfumu ayi Mfumu mu kibila ki nyitu. 14 Vayi, Nzambi wuvulubusa Mfumu ayi mvandi wala tuvulubusa mu bafua, mu kusadila mangolo mandi.

15 Benu lusa zaba ko ti zinyitu zinu zidi binama bi Klistu? Buabu, buidi yilenda bongila binama bi nyitu yi Klistu muingi ku bikitula binama bi nyitu yi nkietu wu kindumba? Yilendi vanga ko mawu! 16 Benu lusa zaba ko ti mutu wumbundana nyitu na nkietu wu kindumba, wunkitukanga yandi nyitu yimueka to? Kibila Masonoko mantuba: “Baba buadi bala ba nsuni wumueka to.” 17 Vayi woso mutu widi kithuadi na Mfumu, wunkitukanga yandi mutu wumueka to mu kiphevi. 18 Tinanu mambu ma butsuza! Dioso kua disumu dinkaka mutu kamvanga, dibifisanga ko nyitu’andi, vayi woso wumvanga kitsuza, widi mu kubifisa nyitu’andi veka. 19 Benu lusa zaba ko ti nyitu’inu yidi tempelu yi phevi yinlongo yo Nzambi ka luvana? Kubotula kuandi amomo, benu lusa yivua ko benu veka, 20 kibila benu lusumbulu mu thalu yinangama. Diawu, zitisanu Nzambi mu zinyitu zinu.

7 Mu matedi mambu lutsonikini, bulutidi mboti dibakala kabika kusimba* nkietu; 2 Vayi mu kuzaba ti vadi mu kumonika beni mambu ma butsuza, bika kadika dibakala kaba na nkazi’andi ayi kadika nkietu kaba na nnuni’andi. 3 Nnuni kafueti vana kuidi nkazi’andi biuma* kadi nsua wu kutambula, ayi nkazi kafueti vangila nnuni’andi momawu. 4 Nkazi kasi ko mfumu yi nyitu’andi veka, vayi nnuni’andi nandi mfumu mu yawu. Bobuawu mvandi, nnuni kasi ko mfumu mu nyitu’andi veka, vayi nkazi’andi nandi mfumu mu yawu. 5 Bikanu kuyitulasana nkaku mu mambu muidi nsua wu kutambula, boti musa wizana ko kuvanga mawu mu mua thangu, muingi mubaka thangu yi kukivana mu minsambu, bosi lubue bundana. Muingi Satana kabika ku luthota mu kukhambu kuinu kukiyala. 6 Boso kua bubela, mambu yibe lukamba, madi mambu benu veka luidi nsua wu kuvanga, mawu masi ko nsiku. 7 Vayi yintomba benu boso luba buka minu. Boso kua bubela, kadika mutu widi nkhailu Nzambi kamvana. Diawu vadidi bankaka bankuela, ayi bankaka bantatamananga mukhambu kuela.

8 Buabu, yidi mu kukamba kuidi bakhambu kuela ayi kuidi mimfuizi ti, bulutidi bawu batatamana kuba buka minu. 9 Vayi, boti basinnunga ko kukiyala, buna bafueti kuela. Kibila bulutidi kukuela kena kutatamana kukualala ntima mu phuila yi kubundana nyitu.

10 Yimvana thuadusulu ayiyi kuidi bakuela, kubika ti minu vayi naveka Mfumu wumvana yawu ti, nkazi kabika kuvasana na nnuni’andi. 11 Vayi na kuvasana, buna kafueti tatamana mukhambu kuela, voti kafueti dedikisa mambu na nnuni’andi; ayi nnuni kalendi bika ko nkazi’andi.

12 Vayi kuidi bankaka minu yintuba, ngete, minu kubika kuandi Mfumu: Boti vadi khomba widi nkazi wukhambulu kiminu mu Mfumu’itu, ayi widi wukubama muingi kukala na nkazi’andi, buna khomba beni kafueti tatamana yandi. 13 Ayi boti vadi nkietu widi nnuni wukhambulu kiminu mu Mfumu, ayi widi wukubama muingi kukala yandi, buna nkietu beni kafueti tatamana na nnuni’andi. 14 Kibila dikuela didi nnuni wukhambulu kiminu mu Mfumu, didi didiodila mu kibila ki nkazi’andi. Ayi dikuela didi nkazi wukhambulu kiminu mu Mfumu, didi didiodila mu kibila ki nnuni’andi; boti bakana ko buawu, khanu bana bawu badi bamvindu. Vayi mu kibila akiokio, bawu badi badiodila. 15 Vayi, boti mutu wukhambulu kiminu mu Mfumu wumbaka makani ma kubika khomba wu nkietu voti wu dibakala, buna nandi kasiedi ko mu lukuiku lu kuzinga yandi. Vayi Nzambi wu lutela muingi luzingila mu ndembama. 16 Nkazi, ngie wusa zaba ko ti wulenda vukisa nnuni’aku? Voti nnuni, ngie wusa zaba ko ti wulenda vukisa nkazi’aku?

17 Bika kadika mutu kadiatila boso Yave kamvanina luaku ayi boso Nzambi kantedila. Ayi alolo luawu lutumu yimvana kuidi bimvuka bioso. 18 Vadi mutu wuzengusu nyitu yi kibakala ava kuba nlandikini wu Klistu? Buna bika katatamana mu phila ayoyo. Vadi mutu wukhambu zengusu nyitu yi kibakala ava kuba nlandikini wu Klistu? Buna bika katatamana mu phila ayoyo. 19 Kuzengusu nyitu yi kibakala ayi kukhambu zengusu, kuisi ko nkinza; mambu malutidi nkinza madi, kutumukina zithumu zi Nzambi. 20 Bika kadika mutu katatamana kuba dedi bo bantedila. 21 Ngie wuba mvika bo bakutela? Buna bika kukuazuka mu mawu; vayi boti widi luaku lu kuba wukulu, buna sadila buboti luaku alolo. 22 Kibila woso mutu wuba mvika mu thangu bantela muingi kuba nlandikini Mfumu, bubu weka kiphuanza mu Mfumu. Bobuawu mvandi, no wuba kiphuanza mu thangu bantela, bubu weka mvika wu Klistu. 23 Benu ba lusumbila mu thalu yinangama, diawu bikanu kubue ba mimvika mi batu. 24 Bika kadika mutu mu benu katatamana kuba dedi bo bantedila, ayi katatamana kukieba kikundi kiandi na Nzambi.

25 Buabu, mu matedi batu bakhambulu bakuela,* Mfumu kasa phana ko lutumu, vayi yimvana diyindu diama mu kuba mutu wukuikama mu kibila ki mamboti Mfumu kambonisa. 26 Diawu, mu kutadila mambu maphasi madi mu kumonika mu thangu ayiyi, mu phila yimmuena, bulutidi kadika mutu katatamana kuba mu phila kadidi. 27 Ngie widi wukuela? Buna bika kutomba kuvambana na nkazi’aku. Ngie wisi ko wukuela? Buna bika kutomba nkazi. 28 Vayi kheti ngie kukuela, wisi mvola ko disumu. Ayi boti mutu wukhambulu wukuela* wumbaka makani ma kukuela, mvandi kasi mvola ko disumu. Vayi bo bamvanga mawu, bala viokila mu ziphasi. Ayi minu Yintomba ku lusadisa mubika viokila mu mawu.

29 Mvandi yiku lukamba zikhomba, thangu yeka yikhufi. Kutona bubu, batu badi bakazi, bazingila buka ti basi ko bakazi, 30 batu badi mu kudila, baba buka ti basi ndila ko, badi mu kukuangalala, baba buka ti basi mu kukuangalala ko, badi mu kusumba baba buka ti basi mu kusumba ko, 31 ayi batu bansadilanga nza, baba buka ti basadilanga ko yawu mu mambu moso, kibila mambu mu nza, madi mu kubaluka. 32 Minu yintomba lubika viokila mu mambu malenda ku luvanga kukuazuka. Mutu wukhambulu wukuela, wunkuazukilanga mu mambu ma Mfumu, matedi buidi bu kukuangidikila Mfumu. 33 Vayi dibakala dikuela wunkuazukanga mu biuma bi nza, mu matedi buidi kalenda kuangidikila nkazi’andi, 34 ayi nandi widi wukabuka. Mvandi nkietu wukhambu kuela ayi no ka bundiniabu ko nyitu bankuazukilanga mu mambu ma Mfumu, muingi baba banlongo kuba kuandi mu nyitu voti mu kiphevi. Vayi nkietu wukuela, wunkuazukilanga mu biuma bi nza, mu matedi buidi kalenda kuangidikila nnuni’andi. 35 Yintubila mawu muingi ku lusadisa kubika ti muingi ku lutula nkaku. Vayi ku lusadisa luvangila mambu mu phila yifuana, ayi lutatamana kusadila Mfumu mu khambu vuvuka.

36 Vayi boti mutu wummona ti widi mu kuvanga mambu mambi mu kutatamana kuba wukhambu kuela ayi boti nandi weka phunga yifuana,* buna kafueti vanga mambu amama: Bika kakuela boti widi makani ma kukuela, kasi mvola ko disumu mu kuvanga mawu. 37 Vayi boti mutu beki makani mu ntim’andi ayi kasimmona ko tsatu yi kukuela, vayi wunnunga kuyala phuil’andi yi kubundana nyitu, ayi wumbaka makani ma kukhambu kuela, buna widi mu kuvanga diambu dimboti. 38 Bobuawu mvandi, mutu wunkuela wumvanga dimboti, vayi no wuntatamana kukhambu kuela wumvanga diambu dilutidi.

39 Nkazi widi wukangama mu nnuni mu thangu nnuni’andi kadi wumonyo. Vayi boti nnuni’andi fuidi, nandi kalenda kuela woso kua mutu katidi, vayi mutu beni, kafueti ba to nlandikini wu Yesu. 40 Mu mbuenu’ama, nandi wala luta ba mayangi na kutatamana kubela bobo. Ayi yidi lufiatu ti minu yidi mu kukolukila mu thuadusulu yi phevi yinlongo yi Nzambi.

8 Buabu mu matedi bidia* bamvananga buka minkhailu kuidi bitumba, befu boso tuzebi ti tuidi nzailu mu mawu. Nzailu yimvanganga mutu kuyinangika, vayi luzolo lunkindisanga. 2 Boti vadi mutu wunyindula ti zebi mua mambu, nandi kafueti zaba ti kazebiabu ko mawu mu phila yifuana. 3 Ayi boti vadi mutu wunzolanga Nzambi, buna Nzambi wunzebi.

4 Mu matedi kudia bidia bavana buka minkhailu kuidi bitumba, tuzebi ti bitumba bidi biuma biphamba mu nza, ayi vadi Nzambi yimueka to yikiedika. 5 Kibila kheti vadi bawombo bantedilanga zinzambi, kuba kuandi ku diyilu voti va ntoto, bukiedika vadi “zinzambi” ziwombo, ayi “zimfumu” ziwombo. 6 Kuidi befu, vadi Nzambi yimueka to, no wuvanga biuma bioso ayi wutuvanga muingi tuvanga luzolo luandi. Ayi vadi Mfumu yimueka to Yesu Klistu. Biuma bioso bivangulu mu nzil’andi, ayi befu boso tuvangulu mu kibila kiandi.

7 Vayi bankaka baba buongiminanga bitumba, ba kudia bidia bivanu buka minkhailu kuidi bitumba, banyindulanga ti buka bawu badi mu kubue buongimina bitumba beni, ayi kilunzi kiawu bo kidi kilebakana, ki kuba tatisanga. 8 Mvandi bidia bisinkuiza tusadisa ko kufikama Nzambi. Mvandi tualasa ba ko batu bambi befu kumanga kudia, ayi tualasa ba ko batu bamboti befu kudia. 9 Ba keba keba muingi luaku widi lu kusola, lubika vanga badi balebakana kusumuka. 10 Boti mutu widi wulebakana, wu kumona ngiewu widi nzailu kudila ku tempelu bambuongiminanga bitumba, bukiedika ti mawu masinkuiza ntula ko divuda, ayi kumvanga kudia bidia bavana buka minkhailu kuidi bitumba, bilenda bifisa kilunzi kiandi? 11 Mu phila ayoyo, mu kibila ki nzailu’aku, khomba ayoyo widi wulebakana no mvandi Klistu kafuila va dikunzi, widi mu kuvekuka. 12 Bo lunsumukina mu phila ayoyo kuidi zikhomba zinu, ayi lumbifisa kilunzi kiawu kilebakana, zabanu buboti ti, luidi mu kusumuka kuidi Klistu. 13 Diawu, boti mbizi yimvanga khomb’ami kusumuka, buna yilendi bue dianga ko mbizi, muingi yibika vanga khomb’ami kusumuka.

9 Minu yisi ko nsua wu kuvanga mo yitidi? Minu yisi ko apostolo? Yisa mona ko Mfumu’itu Yesu? Benu luisi ko mimbutu mu kisalu kiama mu Mfumu? 2 Kheti minu yisi ko apostolo kuidi bankaka, vayi yidi lufiatu ti yidi apostolo kuidi benu. Kibila benu luidi kidimbu kimvana bivisa ti minu yidi apostolo mu Mfumu.

3 Mambu amama mawu yintuba muingi ku kikakidila kuidi batu ba kuphananga biuvu: 4 Bukiedika ti befu tuisi ko nsua wu kudia ayi kunua? 5 Bukiedika ti befu tuisi ko nsua wu kukuela khomba widi kiminu mu Klistu muingi ka tulandakananga mu viage, dedi bumvangilanga bapostolo bankaka, zikhomba zi Mfumu ayi Sefa? 6 Voti, bukiedika ti minu to ayi Balinabasi tukhambulu nsua wu kusala muingi kuyizingisa? 7 Nani wumvanganga kisalu ki busodi ayi wundukisanga zitsatu ziandi naveka? Nani wumvatanga nti wu vinu ayi wukhambu dianga makundi ma nti beni? Voti nani wunkiebanga bibulu ayi wukhambu nuanga leta yi bibulu beni?

8 Mambu amama yidi mu kukoluka, masi ko to mambu batu banyindulanga, bukiedika ti masi ko mawu mvandi Minsiku mintuba? 9 Kibila madi masonama mu Minsiku mi Mose: “Bika kukanga munu wu ngombi mu thangu kandiatila zitheti.” Buabu, bukiedika ti Nzambi widi mu kukuazukila matedi zingombi? 10 Voti, bakana ko mu kibila kitu katubila mambu amomo? Bukiedika, mawu masonimina mu kibila kitu, kibila mutu wunkubikanga ntoto ayi wuntebanga zitheti, bamvingilanga kutambula mua ndambu mu ziawu.

11 Boti befu tukuna biuma bi kiphevi mu benu, buabu kibila mbi tulendi tambudila ko lusalusu luinu lu kinsuni? 12 Boti batu bankaka badi nsua awowo mu benu, bukiedika ti befu tusa luta ko nsua mu mawu? Kheti bobo, tusa sadila ko luaku beni, vayi tuidi mu kukindama mu mambu moso, muingi tubika kutula nkaku zitsangu zimboti matedi Klistu. 13 Benu lusa zaba ko ti, batu bansalanga bisalu binlongo bandianga biuma bi tempelu? Ayi bo bansalanga kadika kilumbu va ntuala kikumu, bantambulanga mua ndambu di minkhailu bamvananga? 14 Bobuawu mvandi, Mfumu wutuba ti baboso bansamunanga zitsangu zimboti, bafueti dukisanga zitsatu ziawu mu zitsangu zimboti.

15 Vayi minu yisadilanga ko luaku yidi ayi yisa lusonikina ko mambu amomo, muingi luvanga dioso diambu kuidi minu. Kibila dilutidi mboti kufua—kena mutu kumbotula luaku yidi lu kuyinyemisa. 16 Boti minu yidi mu kusamuna zitsangu zimboti, kisi ko kibila muingi yikinangika, kibila kiawu kiyeku yitambula. Bukiedika, kiadi kuidi minu mi kukhambu samuna zitsangu zimboti. 17 Minu kuvangila mawu mu lutia luami yala tambula mfutu, vayi minu kukhambu vangila mawu mu lutia luami, kheti bobo, yitambula kiyeku mu mawu. 18 Buabu, mfutu mbi yintambulanga? Mfutu’ama widi, bo yinsamuna zitsangu zimboti, yifueti vangila mawu mukhambu vingila kutambula mfutu, muingi yibika kusakinina luaku yitambula mu matedi kusamuna zitsangu zimboti.

19 Kibila kheti yisi ko mvika wu ni mutu wumueka, minu yikikitula mvika wu baboso muingi yinunga kutuala batu bawombo mu nzila yi Klistu. 20 Kuidi basi Yuda, yiyiza kituka buka musi Yuda muingi kusadisa basi Yuda. Kuidi batu banlandakananga minsiku, yiyisa kituka buka mutu wunlandakananga minsiku, kheti minu yisi ko lukuiku lu kulandakana minsiku, muingi kusadisa banlandakananga minsiku. 21 Kuidi batu bakhambu landakananga minsiku, minu yikituka buka mutu wukhambu landakananga minsiku, vayi yinlandakanga nsiku wu Nzambi, ayi yidi mu thuadusulu wu nsiku wu Klistu, muingi kusadisa batu bakhambu landakananga minsiku. 22 Kuidi batu balebakana yiyiza kituka mutu wulebakana, muingi kusadisa bo badi balebakana. Minu yivanga mamoso yinunga, muingi kusadisa mintindu mioso mi batu, muingi mu ziphila zioso yivukisa bankaka. 23 Vayi yimvangila mamoso mu kibila ki zitsangu zimboti, muingi kusamuna ziawu kuidi bankaka.

24 Benu musa zaba ko ti mu bisavu bandumanga thinu, baboso bandumanga, vayi wumueka to wuntambulanga mfutu? Diawu, dumanu mu mangolo moso, muingi lutambula mfutu. 25 Batu boso bamvanganga bisavu bi kuduma zithinu, ba kiyalanga mu mambu moso. Bawu bamvangilanga mawu, muingi kutambula kolowa yala seka, vayi befu tumvangilanga mawu, muingi kutambula kolowa yikhambu sekanga. 26 Yidumanga ko thinu mu khambu zaba koyinkuenda, ayi yimbanga keba keba muingi mangolo* yimvanga, mabika ba maphamba. 27 Yimbulanga nyitu’ami ayi yintuadisanga yawu buka mvika, kibila minu kukhambu vanga mawu, kheti yinsamuna kuidi bankaka, yisinkuiza baka ko lunungu va mesu ma Nzambi.

10 Zikhomba ziama, yintomba luzaba ti bakulu bitu boso badiatila ku tsi dituti, ayi baboso baviokila mu ḿbu. 2 Baboso babotama mu kulandakana Mose, mu nzila dituti ayi ḿbu. 3 Baboso badia bidia Nzambi kaba vana, 4 ayi baboso banua nlangu Nzambi kaba vana. Kibila baba nuina wawu va dimanya di kiphevi diaba kuba landakana, ayi dimanya beni dinsundula, Klistu. 5 Kheti bobo, baboso basa kuangidika ko Nzambi, diawu bafuila ku thandu.

6 Mambu maba monikina, madi ndubu kuidi befu, muingi tubika zinina biuma bimbi, dedi bo bawu bazinina. 7 Bikanu kubuongimina bitumba dedi bo bawombo mu bawu babuongiminina, dedi bo Masonoko mantubila: “Dikabu dikala, badia ayi banua. Bosi batelama ayi bakemba.” 8 Ayi tubika vanga kitsuza, dedi bo bawombo mu bawu bavangila, muingi mu kilumbu kimueka, bafua 23.000. 9 Tubika kuthota Yave, dedi bo bawombo mu bawu bavangila, muingi baba vonda kuidi zinyoka. 10 Bikanu kifu ki kunyunguta, dedi bo bawombo mu bawu baba nyungutinanga, muingi baba vonda kuidi mvondi.* 11 Mambu amomo maba monikina, madi ndubu kuidi befu, ayi masonimina muingi ku tulubula befu tuidi mu kuzingila mu bilumbu bi tsuka bi nza ayiyi.

12 Woso mutu wunyindula ti widi wukindama, kaba keba keba muingi kabika kubua. 13 Zithotolo zioso mumviokilanga, ziawu mvandi bankaka bamviokilanga. Vayi Nzambi widi wukuikama, ayi nandi kalasa bika ko muthoto mu kitesu kio benu mulendi nunga ko. Vayi bo muala viokila mu thotolo, nandi wala musadisa muingi mukindama.

14 Diawu zikhomba ziama zi luzolo, tinanu mbuongimini yi bitumba. 15 Yidi mu kukoluka na batu badi phisulu; bakanu benu veka makani mu mambu yidi mu kutuba. 16 Bukiedika ti mbungu yi lusakumunu tunsakumunanga, yisi ko kithuadi na menga ma Klistu? Ayi dipha tumbukunanga, disi ko kithuadi na nyitu yi Klistu? 17 Vadi dipha dimueka to, kheti befu tuidi bawombo, vayi tuidi nyitu yi mueka to, kibila befu boso tundianga dipha beni.

18 Talanu kuidi basi Isaeli: Bo bandianga minkhailu, basi ko kithuadi na kikumu? 19 Buabu, mbi yintomba kutuba? Kiuma bamvananga buka nkhailu kuidi kitumba, bukiedika ti kidi nkinza? Voti, kitumba kidi nkinza? 20 Ndamba, vayi yintuba ti biuma basi nza bamvananga buka makaba, bamvananga biawu kuidi ziphevi zimbi, bakana ko kuidi Nzambi. Ayi minu yisintomba ko muba kithuadi na ziphevi zimbi. 21 Benu mulendi nua ko mbungu yi Yave, ayi yoyawu thangu kunua mbungu yi ziphevi zimbi. Mvandi, mulendi dia ko va “meza yi Yave,” ayi va meza yi ziphevi zimbi. 22 Voti, ‘befu tuntomba Yave kaba kiphala’? Bukiedika ti befu tulutidi mangolo kena Nzambi?

23 Tuidi nsua wu kuvanga mambu moso, vayi bakana ko mamoso, mantuadisanga ndandu. Tuidi nsua wu kuvanga mambu moso, vayi bakana ko mamoso mankindisanga. 24 Bika kadika mutu kabika tomba mamboti mandi veka, vayi katomba mamboti ma bankaka.

25 Dianu biuma bioso bansumbisanga mu mazandu ma zimbizi, mukhambu vana ni kiuvu, mu kibila ki kilunzi kinu, 26 kibila “Yave nandi vuidi ntoto ayi biuma bioso bidi muawu.” 27 Boti mutu wukhambu landakananga Mfumu wu mutumisa muingi mue dia, ayi benu kukikinina kuenda, buna dianu biabioso baku muvana mukhambu vana ni kiuvu mu kibila ki kilunzi kinu. 28 Vayi, va kuba mutu wu kulukamba ti: “Bidia abiobio bivanu buka nkhailu kuidi bitumba,” buna bikanu kudia biawu, mu kibila ki mutu be lukamba ayi mu kibila ki kilunzi. 29 Yisintubila ko matedi kilunzi kinu, vayi yintubila matedi kilunzi ki mutu wunkaka. Kibila yisintomba ko kusadila luaku yidi lu kusola, muingi kuvanga kilunzi ki bankaka kumfundisa mu mawu. 30 Boti minu yimvutulanga matondo kuidi Nzambi mu biuma ba kuphana muingi yidia, kibila mbi bafueti kuthubila bubi mu biuma yimvutudilanga matondo?

31 Diawu, boti kudia mundia, voti munnua, kuba kuandi dioso kua diambu dinkaka mumvanga, vangilanu mambu moso muingi kuzitisa Nzambi. 32 Bikanu kuvanga basi Yuda kusumuka, ni basi Ngeleko, voti kimvuka ki Nzambi, 33 dedi bo minu yintombila kukuangidika batu boso mu mambu moso, mu kukhambu tomba mamboti mami veka, vayi mamboti ma batu bawombo, muingi kuba sadisa bavuka.

11 Landakananu kifuani kiama, dedi bo minu yinlandikininanga ki Klistu.

2 Minu yiku lutonda, kibila mu mambu moso, benu muthebukila moyo, ayi muidi mu kusimbidila malongi mu phila yi mulongila. 3 Vayi yintomba luzaba ti Klistu, nandi mfumu* yi dibakala; dibakala, nandi mfumu yi nkietu; ayi Nzambi, nandi mfumu yi Klistu. 4 Dioso kua dibakala wumvanga nsambu voti wumbikula mu kufuka ntu’andi, widi mu kufuisa tsoni mfumu’andi. 5 Vayi woso nkietu wumvanga nsambu voti wumbikula mukhambu fuka ntu’andi, widi mu kufuisa tsoni mfumu’andi, kibila mawu madi buka nkietu bevuku kikuingidi. 6 Kibila, nkietu na kukhambu fuka ntu’andi, buna kafueti vuku kikuingidi. Vayi bo didi diambu ditsoni nkietu kuvuku kikuingidi, diawu kafueti fukila ntu’andi.

7 Dibakala kalendi fuka ko ntu, kibila nandi widi kifuani ayi nkembu wu Nzambi, vayi nkietu widi nkembu wu dibakala. 8 Kibila dibakala kasa kuizila ko mu nkietu, vayi nkietu wuyizila mu dibakala. 9 Kubotula kuandi amomo, dibakala kasa vangulu ko mu kibila ki nkietu, vayi nkietu wuvangulu mu kibila ki dibakala. 10 Diawu nkietu kafueti tudila ku ntu’andi kidimbu ki kutumukina, ayi mvandi mu kibila ki zimbasi.

11 Vayi mu Mfumu, nkietu kalendi zinga ko mukhambu dibakala, ayi dibakala kalendi zinga ko mukhambu nkietu. 12 Diawu, dedi bo nkietu kayizila mu dibakala, buawu mvandi dibakala kayizila mu nkietu. Vayi biuma bioso bifumina kuidi Nzambi. 13 Buabu, tubanu theti benu veka: Bukiedika kuandi ti didi diambu dimboti nkietu kusambila kuidi Nzambi, mukhambu fuka ntu’andi? 14 Mu kutadila phila batu bavangulu, muisimmona ko ti didi diambu ditsoni, dibakala kuba minlengi mikula? 15 Vayi boti nkietu widi minlengi mikula, buna miawu midi nkembu kuidi nandi. Kibila bamvanina miawu muingi kufuka ntu’andi. 16 Diawu, boti vadi mutu wumfinda ziphaka mu mambu amomo, befu tuisi ko phila yinkaka yi kuyindudila, ayi kimvuka ki Nzambi mvandi, kisi ko.

17 Vayi mu kuluvana zithuadusulu aziozio, minu yisi mutonda ko, kibila bo munkutakana va kimueka, benu muvangilanga ko mawu mu phila yifuana, vayi mu phila yimbi. 18 Kibila, yinkuwanga ti bo benu munkutakana mu kimvuka, lumbanga bakabuka. Ayi minu yidi mua lufiatu mu mawu. 19 Bukiedika, vala ba mangumba va khat’inu, ayi mawu mafueti monika, muingi batu badi lunungu va mesu ma Nzambi bazabakana.

20 Bo lunkutakana, benu lukutakananga ko muingi kudia bidia bi Mfumu va masika ma builu. 21 Kibila mu thangu yi kudia bidia bi Mfumu va masika ma builu, kadika mutu theti wundianga bidia biandi veka, bankaka bambanga mu nzala, ayi bankaka bambanga bakolu. 22 Benu muisi ko zinzo muingi kudila ayi kunuina? Voti munlenzanga kimvuka ki Nzambi, ayi lumvanganga bo bakhambulu ni kiuma kumona zitsoni? Buabu, mbi yifueti vanga? Yimu tonda? Mu mambu amomo, yilendi ku mutonda ko.

23 Kibila momawu mambu yidi mu ku lukamba, mawu mvandi Mfumu kakhamba ti: Mfumu Yesu, va builu ava bamvakula, wubonga dipha, 24 ayi bo kamana kusambila, wubukuna dipha beni, bosi wutuba: “Dipha adidi dinsundula nyitu’ama, yinkuiza vakulu mu kibila kinu. Tatamananu kuvanganga mawu, muingi muthebukilanga moyo.” 25 Nandi wuvanga momawu mambu mu mbungu, bo bamana kudia, nandi wutuba: “Mbungu ayiyi yinsundula luwawanu lumona lutedi menga mami. Tatamananu kuvanga mawu, kadika khumbu munnua yawu, muingi mumbambukilanga moyo.” 26 Kibila kadika khumbu muala dia dipha adidi, ayi muala nua vinu ayiyi, buna muidi mu kusamuna matedi lufua lu Mfumu, nati nandi kala kuiza.

27 Diawu, woso mutu wundia dipha adidi, ayi wunnua vinu ayiyi yi Mfumu mu phila yikhambu fuana, wala ba fotu mu matedi nyitu ayi menga ma Mfumu. 28 Theti, bika kadika mutu kayifiongunina ayi kabaka bivisa mu naveka, bosi kadia dipha ayi kanua vinu. 29 Kibila woso mutu wundia ayi wunnua, na kukhambu fiongunina boti yawu yidi nyitu yi Mfumu, buna widi mu kudia ayi kunua lufundusu luandi veka. 30 Diawu bawombo mu benu badidi balebakana, ayi badi mu kubedila; ayi mvandi bawombo badi mu kuladila mu lufua. 31 Vayi befu kuyifiongunina befu veka buidi tuididi, basinkuiza tufundisa ko. 32 Vayi bo Yave kadi mu ku tufundisa, widi mu ku tusemba, muingi tubika baka nzengolo va kimueka na basi nza. 33 Diawu zikhomba, bo lunkutakana muingi kudia bidia bi Mfumu va masika ma builu, vingilanganu bankaka. 34 Boti vadi mutu widi nzala, kafueti dia ku nzo, muingi bo munkutakana, mawu mabika kutuadisa lufundusu. Buabu mu matedi mambu mankaka, yinkuiza luzabikisa mawu bo yala kuiza koko.

12 Buabu zikhomba, mu matedi minkhailu mi kiphevi, yintomba muingi luzaba buboti matedi miawu. 2 Benu luzebi buboti ti bo luba basi nza, baba luvukumunanga muingi lubuongimina bitumba binkhambu tubanga, muaba landakananga biawu koso kuma biaba ku lunatanga. 3 Diawu, zabanu ti, vasi ko ni mutu wuntubila mu phevi yi Nzambi, kalenda tuba: “Yesu widi mutu wumbi!” Ayi ni mutu kalendi tuba ko: “Yesu widi Mfumu!” boti kasintubila ko mu phevi yinlongo.

4 Vadi minkhailu miviakana, vayi phevi yidi yimueka to; 5 ayi, vadi ziphila ziviakana zi kusadisila bankaka, vayi vadi Mfumu yimueka to. 6 Vadi ziphila ziwombo phevi yinlongo yinsadilanga mu batu muingi bawu bavanga mambu mawombo. Vayi, vadi Nzambi yimueka to wunsadisanga batu boso kuvanga mambu beni. 7 Vayi lusadusu lu phevi yinlongo, lummonikanga mu batu boso, ayi Nzambi wumvananga yawu muingi kutuadisa ndandu kuidi baboso. 8 Kibila mu nzila phevi beni, bankaka batambula nkhailu wu kutuba mambu ma nduenga, bankaka batambula nzailu. 9 Yoyawu phevi, yivana kuidi bankaka nkhailu wu kiminu, bankaka nkhailu wu kubelusa bimbevu, 10 kuidi bankaka nkhailu wu kuvanga mambu ma kukuitukila, bankaka nkhailu wu kubikula, bankaka nkhailu wu kuvisa boti mambu mayizila kuidi Nzambi voti ndamba, bankaka nkhailu wu kukoluka zimbembu ziwombo ayi bankaka nkhailu wu kusekula zimbembu ziwombo. 11 Vayi yoyawu phevi, yimvanganga mambu moso ayi yimvananga kuidi kadika mutu nkhailu, dedi bo yawu yitididi.

12 Kibila dedi bo nyitu yididi yimueka to, vayi yidi binama biwombo. Ayi binama bioso bidi mu nyitu kheti bidi biwombo, vayi bidi nyitu yimueka to, buawu mvandi buididi Klistu. 13 Kibila befu boso tubotimina mu phevi yimueka to muingi tuba nyitu yimueka to, kuba kuandi basi Yuda, basi Ngeleko, mimvika voti badi kiphuanza ayi befu boso tunuina mu phevi yimueka to.

14 Kibila nyitu yisi ko to kinama kimueka, vayi muidi binama biwombo. 15 Boti kulu kuntuba: “Bo yikhambulu koko, buna yisi ko kinama ki nyitu,” kheti bobo, mawu masinsundula ko ti nandi kasi ko kinama ki nyitu. 16 Ayi boti dikutu dintuba: “Bo yikhambulu diesu, buna yisi ko kinama ki nyitu,” kheti bobo, mawu masinsundula ko ti nandi kasi ko kinama ki nyitu. 17 Boti nyitu yoso yidi diesu, khanu vama mbi vadi makutu? Ayi boti nyitu yoso yidi makutu, khanu vama mbi vadi diyilu? 18 Vayi Nzambi wutula binama bioso mu nyitu, dedi bo nandi kaba tombila.

19 Boti biabioso bidi kinama kimueka to, khanu vama mbi vadi nyitu? 20 Binama, bidi biwombo, vayi nyitu yimueka to. 21 Diesu kalendi kamba ko koko, “Yisi kutomba ko.” Ni ntu kalendi kamba ko bitambi, “Yisi kutomba ko.” 22 Vayi binama bi nyitu bimmonikinanga buka ti bidi bilebakana, bidi nkinza, 23 ayi binama bi nyitu tuntadilanga ti bisi ko beni nkinza, biawu tunluta vananga nzitusu. Mu phila ayoyo, binama bikala bisuama, biawu tunluta kiebanga buboti. 24 Vayi binama bilutidi kitoko bitombuluanga ko ntindu lukiebu alolo. Vayi Nzambi wuvangila nyitu mu phila ayoyo, mu kuvana nzitusu binama bintombulu nzitusu yiwombo, 25 muingi nyitu yibika ba yivasuka, vayi binama bioso bitambula loluawu lukiebu biawu na biawu. 26 Boti vadi kinama kimbela, buna binama bioso binkaka bimbela yandi va kimueka. Boti vadi kinama kintambula nzitusu, buna binama binkaka binkuiza yangalala yandi va kimueka.

27 Benu luidi nyitu yi Klistu, ayi kadika mutu mu benu, widi kinama ki nyitu beni. 28 Ayi Nzambi wutula mu kimvuka binama biwombo biviakana: theti, bapostolo, kimmuadi, mimbikudi, kintatu, minlongisi, bosi bamvanganga mambu ma kukuitukila, badi nkhailu wu kubelusa bimbevu, badi nkhailu wu kusadisa bankaka, badi nkhailu wu kutuadisa, ayi badi nkhailu wu kukoluka zimbembu ziwombo. 29 Bukiedika ti baboso badi bapostolo? Baboso badi mimbikudi? Baboso badi minlongisi? Voti baboso bamvanganga mambu ma kukuitukila? 30 Bukiedika ti baboso badi nkhailu wu kubelusa bimbevu? Baboso badi nkhailu wu kukoluka zimbembu ziviakana? Voti baboso badi nkhailu wu kusekula zimbembu? 31 Vayi tatamananu kutomba minkhailu milutidi. Mu phila ayoyo, minu yinkuiza lumonisina nzila yilutidi.

13 Minu kukolukila mu mbembu yi batu ayi mu mbembu yi zimbasi, vayi boti yisi ko luzolo, yidi buka gongo voti simbalu* yintula lusuku luphamba. 2 Ayi minu kuba nkhailu wu kubikula, wu kuzaba masuama moso manlongo, nzayilu yoso, mvandi minu kuba kiminu kilenda kuphanga kunanguna miongo ayi ku mitula va kibuangu kinkaka, vayi minu kukhambu ba luzolo, buna yidi mutu wuphamba. 3 Mvandi minu kuvana biuma biama bioso muingi kudikila bankaka, ayi kuvana luzingu luama muingi kuyinyemisa, vayi minu kukhambu ba luzolo, buna mamoso yimvanga masi ko nkinza.

4 Luzolo luidi mvibudulu ayi luidi mamboti. Luzolo luisi ko kiphala, lukinyemisanga ko ayi lukinangikanga ko. 5 Luvanganga ko mambu makhambu fuana, lutombanga ko mamboti mandi veka, lufika fuemanga ko, lusuekilanga ko nganzi. 6 Luyangalalanga ko mu mambu makhambulu masonga, vayi lunkuangalalanga mu mambu masonga. 7 Lunkuikamanga mu mambu moso, lumvingilanga mu mambu moso, ayi lunkindamanga mu mambu moso.

8 Luzolo lusukanga ko. Vayi nkhailu wu kubikula wala mana, nkhailu wu kukoluka zimbembu wala mana, ayi nkhailu wu kubaka nzailu wala mana. 9 Kibila tuidi mua ndambu nzailu ayi tumbikulanga to mua nkadu. 10 Vayi bo tuala baka nzailu yiduka, buna mua nzailu tuidi bubu yala mana. 11 Bo minu yiba muana kilezi, yaba kolukilanga buka muana kilezi, yaba tadilanga mambu buka muana kilezi, ayi yaba yindudilanga buka muana kilezi. Vayi bo yima konzuka, yibika zikhadulu zi bumuana. 12 Bubu tuisimmona ko buboti, kibila tuidi mu kutadila mu lumuenu luidi tutulu. Vayi kuntuala tuala mona buboti buka befu tuntalasana na mutu widi wufikama. Bubu, minu yizebi mua ndambu to, vayi kuntuala yala zaba buboti, dedi bo minu yididi wuzabakana buboti. 13 Zikhadulu azizi zitatu, ziawu zintatamana bubu: kiminu, mvibudulu ayi luzolo. Vayi luzolo lulutidi mu ziawu.

14 Monisanu luzolo, vayi tatamananu kuvangila mangolo minkhailu mi kiphevi, bulutidi nkhailu wu kubikula. 2 Kibila woso mutu wuntuba mbembu yinkaka, kasinkoluka ko na batu, vayi na Nzambi, kibila vasi ko mutu wumvisa, kheti widi mu kutuba masuama manlongo ma Nzambi, mu nzila phevi. 3 Vayi, mutu wumbikula, wunkindisanga, wunsadisanga, ayi wumbombanga bankaka mu mambu kantuba. 4 Woso mutu wunkoluka mbembu yinkaka, wuyikindisanga to naveka, vayi woso mutu wumbikula, wunkindisanga kimvuka. 5 Minu yintomba benu muyoluka zimbembu zinkaka, vayi bulutidi mubikula. Bukiedika, woso mutu wumbikula wulutidi kena mutu wunkoluka zimbembu zinkaka, kibila boti vasi ko mutu wunsekula ziawu, buna kimvuka kisinkuiza kindusu ko. 6 Vayi zikhomba, minu kukuiza mutala, ayi kukoluka yinu mu zimbembu ziviakana, ndandu mbi yinkuiza mutuadisa boti yisi muzabikisa ko mambu Nzambi kabe nzabikisa, nzailu, mbikudulu, voti malongi?

7 Mawu mvandi mammonikanga mu biuma bikhambulu monyo bansikilanga minkunga, kuba kuandi flaute voti harpa. Boti nyingu wisinkuwakana ko buboti, buidi mutu kalenda zabila mambu badi mu kusika mu flaute voti harpa? 8 Kibila boti basinsika ko buboti tulumbeta, nani wunkuiza ba wukubama muingi kunuana mvita? 9 Bobuawu mvandi, boti benu lunkoluka mambu mu zimbembu, zio bankaka bakhambu visa, buidi wunkaka kankuiza zabila mambu bantuba? Bukiedika, mawu mala ba buka benu munkoluka na phemu. 10 Mu nza, muidi zimbembu ziwombo ziviakana, ayi ziazioso zidi nkinza. 11 Kibila boti minu yisimvisa ko mambu mutu wunkaka kantuba, buna minu yidi nzenza kuidi mutu beni, mvandi mutu wuntuba mambu beni, widi nzenza kuidi minu. 12 Bobuawu mvandi benu, bo luidi beni phuila yi kubaka minkhailu mi kiphevi, tombanu kubaka minkhailu miwombo miala kindisa kimvuka.

13 Diawu, woso mutu wunkoluka mbembu yinkaka, kafueti sambila muingi kanunga kusekula yawu. 14 Kibila boti minu yinsambila mu mbembu yinkaka, buna nkhailu wu phevi wo baphana, wawu wunsambila, vayi minu veka yisimvisa ko mawu. 15 Buabu mbi yilenda vanga? Yinkuiza yimbila muingi kuzitisa Nzambi mu nkhailu wu phevi, mvandi yinkuiza yimbila muingi kuzitisa Nzambi mu mayindu mami. 16 Boti ngie widi mu kuvanga nsambu wu kuvutudila matondo mu nkhailu wu phevi yinlongo, bukiedika kuandi ti mutu widi va khonzu’aku kalenda tuba “amem,” boti nandi kasimvisa ko mambu widi mu kutuba mu nsambu? 17 Bukiedika, ngie widi mu kuvanga nsambu mu phila yimboti, vayi wisinkindisa ko wunkaka. 18 Yimvutulanga matondo kuidi Nzambi, kibila minu yiviokizi kuzaba zimbembu ziviakana kena benu. 19 Vayi, mu kimvuka, bulutidi mboti minu kukoluka bikuma bitanu bio bimvisuka muingi kulonga bankaka, kena kutuba kumi di bivevi di bikuma, mu mbembu yinkaka.

20 Zikhomba, bikanu kuba bana balezi mu phisulu. Vayi banu bana balezi mu matedi mambi, ayi banu bakulutu mu phisulu. 21 Madi masonama mu Minsiku: ‘“Mu mbembu yi kinzenza ayi mu munu wu zinzenza, yala kamba dikabu adidi, vayi kheti bobo, bawu bala manga kukuwa,’ butubidi Yave.” 22 Kibila, zimbembu ziviakana, ziawu zinsadisanga batu bakhambulu baklistu kuba baklistu, vayi zilonganga ko baklistu. Diawu, kubikula, kisi ko kidimbu ki batu bakhambulu baklistu, vayi ki baklistu. 23 Buabu, boti kimvuka kioso kibe kutakana, ayi baboso bankoluka zimbembu ziviakana, mutu wukhambu longuka voti wukhambu kikininanga mu Klistu, na kukota muna, kasinkuiza tuba ko ti benu luma lawuka? 24 Vayi, boti benu boso muidi mu kubikula, va kukota mutu wukhambu kikininanga mu Klistu, voti wukhambu longuka, nandi wunkuiza sembu, ayi wunkuiza fiongununu buboti kuidi baboso mu mambu kankuwa. 25 Masueku ma ntim’andi, mala zabakana, nandi wala fukama, wala yinika kizizi kiandi va tsi, ayi wala sambila kuidi Nzambi mu kutuba: “Bukiedika, Nzambi widi yinu.”

26 Buabu zikhomba, mbi lufueti vanga? Bo lunkutakana va kimueka, bankaka bafueti ba nkunga wu kuyola, bankaka malongi, bankaka kuzabikisa mambu batambula kuidi Nzambi, bankaka kukoluka zimbembu ziviakana, ayi bankaka kusekula ziawu. Vangilanu mambu moso mu phila yinkindisa bankaka. 27 Ayi boti vadi mutu wunkoluka mbembu yinkaka, buna vafueti ba to batu buadi voti batatu, vayi kadika mutu mu khumbu’andi, ayi vafueti ba wunkaka wunsekula ziawu. 28 Vayi, boti vasi ko mutu wunsekula ziawu, nandi kafueti ba sui mu kimvuka, ayi kafueti koluka na Nzambi ku tsi ntim’andi. 29 Bika mimbikudi miodi voti mitatu batuba, ayi bankaka bafiongunina tsundu. 30 Vayi, boti mutu wunkaka betambula mambu mabe fumina kuidi Nzambi mu thangu kadi wukala, buna mutu widi mu kulonga, kafueti vuena sui. 31 Kibila benu boso mulenda bikula, vayi kadika mutu mu khumbu’andi, muingi benu boso mulonguka ayi mubaka kindusulu. 32 Ayi mimbikudi, bafueti yadila minkhailu miawu mi kiphevi, mi kubikula. 33 Kibila Nzambi, kasi ko Nzambi yi divunza, vayi yi ndembama.

Dedi bo buididi mu bimvuka bioso bi banlongo. 34 Bika bakietu bavuena sui mu kimvuka, kibila basi ko nsua wu kukoluka. Vayi bafueti tumukina, dedi bo Minsiku mintubila. 35 Boti bawu bantomba kulonguka mua diambu, bafueti kuvula banuni bawu ku nzo, kibila didi diambu di tsoni, nkietu kukoluka mu kimvuka.

36 Bukiedika ti kuidi benu diambu di Nzambi difumina? Bukiedika ti benu to lubaka ndandu mu diawu?

37 Boti vadi mutu wunyindula ti widi ḿbikudi voti widi nkhailu wu kiphevi, nandi kafueti zaba ti mambu yidi mu ku lusonikina, madi zithumu zi Mfumu. 38 Vayi, boti vadi mutu wukhambu kikinina mawu, buna nandi mvandi bala kummanga. 39 Diawu zikhomba ziama, tatamananu kuvanga mangolo muingi kubikula. Mvandi, bikanu kukandimina bankaka kukoluka zimbembu ziviakana. 40 Vayi, bika mambu moso mavangimina mu phila yisulama, ayi mukhambu divunza.

15 Buabu zikhomba, yintomba ku lutebula moyo matedi zitsangu zimboti yi lulonga, zio benu lukikinina ayi zio lubakila makani ma kutatamana bakuikama. 2 Benu kutatamana mu nzila zitsangu zio yi luzabikisa, buna mvinu muidi mu kuvuka, vayi benu kukhambu vanga mawu, kiminu kinu kinkuiza ba kiphamba.

3 Kibila mu khati mambu matheti yi luzabikisa, mvandi muba mambu mo minu yitambula mantuba ti: Klistu wufuila mu kibila ki masumu mitu, dedi buntubila Masonoko. 4 Mvandi wuziku ayi Nzambi wumvulubusa mu kilumbu kintatu, dedi buntubila Masonoko. 5 Ayi wumonikina kuidi Sefa, bosi kuidi Kumi Wadi di bapostolo. 6 Mvandi wumonikina kuidi 500 di zikhomba mu khumbu yimueka, ayi nduka batu boso mu bawu bakhidi bamonyo, kheti bankaka mu bawu badi mu kulala mu lufua. 7 Wumonikina mvandi kuidi Tiagu, bosi kuidi bapostolo boso. 8 Ayi kutsuka mu baboso, wumbonikina mvandi buka muana wubutuka mu thangu yikhambu fuana.

9 Kibila minu yidi apostolo wukhambulu beni nkinza, ayi yisi ko wufuana muingi kutedulu apostolo, kibila yiyamisa kimvuka ki Nzambi. 10 Vayi mu kibila ki mamboti malutidi ma Nzambi, diawu yididi kiyeku akiki. Ayi mamboti mandi malutidi mu minu, masi ko maphamba, kibila minu yiluta sala kena baboso, kubika ti minu, vayi mamboti malutidi ma Nzambi madi yama. 11 Diawu mu phila ayoyo, kuba kuandi minu voti bawu, tusamuna ayi benu lukikinina.

12 Buabu, boti befu tunsamunanga ti Klistu bamvulubusa mu bafua, kibila mbi bawombo mu benu badi mu kutubila ti valasa ba ko luvulubukusu lu bafua? 13 Boti vasi ko luvulubukusu lu bafua, buna Klistu basa mvulubusa ko. 14 Vayi boti Klistu basa mvulubusa ko, buna mambu tunsamunanga madi maphamba ayi kiminu kinu mvandi, kidi kiphamba. 15 Kubotula kuandi amomo, boti bafua balasa vulubuka ko, buna mvandi tuidi mu kuta kimbangi ki luvunu matedi Nzambi, kibila tuntubanga ti Nzambi wuvulubusa Klistu mu bafua, mutu no nandi kakhambu vulubusa. 16 Kibila boti bafua balasa vulubuka ko, buna Klistu mvandi basa mvulubusa ko. 17 Ayi boti Klistu basa mvulubusa ko, buna kiminu kinu kidi kiphamba, ayi mvandi buna luidi mu kutatamana mu masumu. 18 Buna bo badi balala mu lufua mu kithuadi na Klistu, badi bazimbala mvu ka mvu. 19 Boti tuidi to kivuvu mu Klistu bo tuidi bamonyo, buna befu tufueti luta tambula tsembulu kena bankaka.

20 Vayi diambu dikiedika didi, Klistu bamvulubusa mu bafua, mu kuba mutu wutheti* mu baboso balala mu lufua. 21 Kibila, mu kuba ti lufua luyizila mu nzila mutu wumueka, luvulubukusu lu bafua mvandi luyizila mu nzila mutu mueka. 22 Kibila dedi bo baboso bamfuilanga mu kibila ki Adami, bobuawu mvandi, baboso bala baka luzingu mu kibila ki Klistu. 23 Vayi kadika mutu mu khumbu’andi: theti Klistu, bosi bo badi kithuadi na Klistu, mu thangu nandi kala monika. 24 Bosi kutsuka nandi wala vutula Kintinu kuidi Tata Nzambi, bo kala mana kutulula mintinu mioso, bimfumu bioso ayi mangolo moso. 25 Kibila nandi kafueti yala nati thangu Nzambi kala tula zimbeni ziandi ku tsi bitambi biandi. 26 Ayi lufua, yawu mbeni yitsuka bala tulula. 27 Kibila Nzambi “wutula biuma bioso ku tsi bitambi biandi.” Vayi bo nandi* kantuba ti ‘biuma bioso bidi ku tsi luyalu luandi’, kasimbunda ko Mutu wumvana luyalu lu biuma beni. 28 Vayi bo biuma bioso biala ba ku tsi luyalu luandi, mvandi Muana wala tumukina Mutu wumvana luyalu lu biuma bioso, muingi Nzambi kayadila biuma bioso ayi mvandi batu boso.

29 Boti bakana ko buawu, buna mambu mbi batu badi mu kubotama muingi bafua bala vanga? Boti bafua balasa vulubuka ko, kibila mbi bawu badi mu kubotimina muingi bafua? 30 Kibila mbi befu mvitu tumbelanga va kingela thangu zioso? 31 Minu yimbanga va kingela kadika kilumbu mu matedi lufua. Mawu madi makiedika dedi bo yikinyemisinanga mu Mfumu’itu Yesu Klistu, mu kibila kinu zikhomba. 32 Boti yinuana na bibulu binganzi ku Efeso buka babakala bankaka, buna ndandu mbi mathuadisa? Boti bafua balasa vulubuka ko, “buna tudia kuitu ayi tunua kuitu, kibila kimba yono tuala fua.” 33 Bikanu kuvunuka. Minkangulu mimbi mimbifisanga zikhadulu zimboti. 34 Vutulanu zikhadulu zinu zimboti mu kuvanga mambu masonga ayi bikanu kutatamana kuvola masumu, kibila mua ndambu mu benu muisi ko nzailu yi Nzambi. Yintubila mambu amomo, muingi ku luvanga kumona zitsoni.

35 Vayi, ḿba mutu kalenda tuba: “Buidi bafua bala vulubukila? Ayi ntindu mbi nyitu yala kuiza yawu?” 36 Batu bakhambulu diela! Benu lusa zaba ko ti biuma bio lumvata, theti bifueti fua muingi bibaka bu kumenina. 37 Ayi bakana ko nyitu yinkonzukanga yawu mumvatanga, vayi mua lutheti lo mumvatanga, kuba kuandi lu trigu voti ntindu wunkaka wu lutheti. 38 Vayi Nzambi wumvananga lutheti beni nyitu, dedi bo nandi katididi ayi wumvananga kadika lutheti nyitu’andi. 39 Zinyitu zioso zisi ko dedi mueka, vadi zinyitu zi batu, zi bibulu, zinyitu zi zinuni ayi zi zimfu. 40 Ayi vadi zinyitu zi diyilu ayi zinyitu zi ntoto, vayi nkembu wu zinyitu zi diyilu widi wu phila yinkaka, ayi nkembu wu zinyitu zi ntoto widi wunkaka. 41 Nkembu wu muinya widi wu phila yinkaka, nkembu wu ngonda widi wu phila yinkaka, ayi nkembu wu zimbuetila widi wunkaka, vayi nkembu wu mbuetila yimueka widi disuasani na mbuetila yinkaka.

42 Mawu mvandi mammonikanga mu luvulubukusu lu bafua, nyitu banzikanga yimbolanga, vayi nyitu yimvulubuka yibolanga ko. 43 Nyitu yinzikuanga mu khambu nzitusu, vayi yimvulubukanga na nzitusu. Yinzikuanga yilebakana, vayi yimvulubukanga na mangolo. 44 Yinzikuanga mu kinsuni, vayi yimvulubukanga nyitu yi kiphevi. Boti vadi nyitu yi kinsuni, buna vadi mvandi nyitu yi kiphevi. 45 Dedi bo busonimina: “Dibakala ditheti Adami, wuyiza ba kivangu ki monyo.” Vayi Adami wutsuka, wuyiza ba phevi yimvana luzingu. 46 Diawu, nyitu yi kiphevi yisi ko yawu yiyiza theti. Vayi nyitu yi kinsuni, yawu yiyiza theti, bosi yi kiphevi. 47 Dibakala ditheti wuyizila mu ntoto ayi wu vangulu mu ntoto, vayi dibakala dimmuadi wuyizila ku diyilu. 48 Dedi bo bubela mutu wuvangulu mu ntoto, buawu mvandi buididi baboso bayizila mu ntoto. Ayi dedi bo buididi mutu wuyizila ku diyilu, buawu mvandi buididi batu bala kuenda ku diyilu. 49 Ayi dedi bo tuididi kifuani ki mutu wuvangulu mu ntoto, buawu mvandi tuala natina kifuani ki mutu wuyizila ku diyilu.

50 Diawu yiku lukambila mambu amama zikhomba, nsuni ayi menga bilendi kota ko mu Kintinu ki Nzambi. Ayi mvandi, nyitu yimbolanga yilendi tambula ko nyitu yikhambu bolanga. 51 Yuwanu, yeka lukamba masuama manlongo: Bakana ko baboso bala lala mu lufua, vayi Nzambi wala ku tukitula befu boso, 52 mu kinzimbukulu, mu mua thangu, bo tulumbeta yi tsuka yala siku. Kibila bo tulumbeta yala kuwakana, bafua bala vulubuka na zinyitu zikhambu bolanga, ayi Nzambi wala ku tukitula. 53 Kibila nyitu yimbolanga, yifueti kituka nyitu yikhambu bolanga, ayi nyitu yimfuanga, yifueti kituka nyitu yikhambu fuanga. 54 Vayi, bo nyitu yimbolanga yala kituka nyitu yikhambu bolanga ayi bo nyitu yimfuanga, yala kituka nyitu yikhambu fuanga, buna mambu madi masonama mu Masonoko, mala salama: “Lufua, luala bungu mvu ka mvu.” 55 “Lufua, ngie wusiedi ko lunungu, kibila mangolo maku ma kutovula batu, masiedi ko.” 56 Disumu, mawu mangolo mantuadisanga lufua, ayi Minsiku, miawu mimvananga mangolo beni kuidi disumu. 57 Vayi, tumvutula matondo kuidi Nzambi, kibila nandi wu tuvana mangolo, mu nzila Mfumu’itu Yesu Klistu.

58 Diawu zikhomba ziama zi luzolo, banu bakindama, bakuikama, ayi lukivananu mu kisalu ki Mfumu, mu kuzaba ti kisalu kioso lumvanga mu Mfumu, kisi ko kiphamba.

16 Buabu, mu matedi kukongula zimbongo muingi kusadisa banlongo, benu lulenda landakana zithuadusulu yivana kuidi bimvuka ku Ngalatia. 2 Kadika kilumbu kitheti ki sabala, kadika mutu mu benu, kafueti tula mua kiuma va khonzu, dedi buididi mbakulu’andi, muingi lubika kongula zimbongo bo yala tuka koko. 3 Vayi bo yala tuka koko, minu yala fila babakala bo benu veka lusola, dedi bo lutsonikina mu minkanda, muingi banata makaba minu ku Yelusalemi. 4 Vayi, boti vala tombulu minu mvama kukuenda, buna bawu mvawu bala kuenda yama va kimueka.

5 Vayi, yala kuiza lutala bo yala fumina ku Masedoni, kibila kuawu yala viokila, 6 ayi ḿba minu yala kala yinu mu mua thangu, voti nati thangu yi kiozi kingolo yala vioka, muingi lue phekisa mua nkadu kuma yala kuenda. 7 Kibila Yave na kutia, yintomba kuviokisa yinu thangu, kibila yisintomba ko to ku lutala bo yala vioka. 8 Vayi yala tatamana ku Efeso, nati Nkungi wu Pentekoti wala mana, 9 kibila bapheni luaku* luwombo mu kisalu kiama ki kusamuna, vayi vadi zimbeni ziwombo.

10 Bo Timoti kala vitila koko, salanu yandi mu kithuadi muingi nandi kabika kukuazuka, kibila widi mu kuvanga kisalu ki Yave, dedi bo minu yimvangilanga. 11 Vayi bikanu kunlenza. Mvekisanu mu ndembama, muingi kiza kuidi minu, kibila minu ayi zikhomba zidi yama, nandi tuidi mu kuvingila.

12 Ayi matedi khomb’itu Apolo, yitatiminizi kundinda muingi kiza lutala va kimueka na zikhomba, vayi mu thangu ayiyi, kabekiabu ko makani ma kukuiza koko, vayi na kubaka luaku, wala kuiza lutala.

13 Banu bakotuka mu kiphevi, bakuikama, bakinda mu kiminu, ayi banu kibakala. Mvandi banu mangolo. 14 Vangilanu mambu moso mu luzolo.

15 Yidi mambu yintomba ku luzabikisa zikhomba, benu luzebi ti batu bankalanga ku nzo Stefanasi bawu batheti bakikinina kiedika ku Akaia, ayi bawu bakivana muingi kusadila banlongo. 16 Benu lufueti tumukina batu ba phila yoyo, ayi baboso bankaka bambuelanga mioko ayi bansalanga beni. 17 Vayi minu yidi mu kukuangalala mu kibila ki Stefanasi, Fortunatu ayi Akaiku, kibila bawu badi yama va mvinginu. 18 Kibila bawu ba khindisidi ayi ba lukindisidi mvandi. Diawu, vananganu luvalu batu ba phila yoyo.

19 Bimvuka bidi ku Azia, ba ku lufila zimboti, Akila ayi Priska va kimueka na kimvuka kinkutakananga ku nzo’awu, ba ku lufila zimboti mu Mfumu. 20 Zikhomba zioso ba ku lufila zimboti. Luvanasananu zimboti benu na benu mu ku yivanasana zibesu zinlongo.

21 Buabu, minu Polo yiku lufila zimboti zio minu veka yibe sonika.

22 Boti vadi mutu wummanga kuzolanga Mfumu, buna bika kaba mutu wusingu. A Mfumu’itu, yiza! 23 Bika mamboti malutidi ma Mfumu Yesu maba yinu. 24 Bika luzolo luama luba kuidi benu boso, mu kithuadi na Yesu Klistu.