NKANDA KUIDI BASI NGALATIA

1 Minu Polo, apostolo no basola kubika ti kuidi batu, vayi kuidi Yesu Klistu ayi kuidi Nzambi, Tata no wuvulubusa Yesu mu bafua. 2 Minu ayi zikhomba badi yama akuku, tumfila zimboti kuidi bimvuka bidi ku Ngalatia:

3 Bika mamboti malutidi ayi ndembama yi Nzambi, Tat’itu ayi yi Mfumu Yesu Klistu yiba yinu. 4 Nandi wufuila mu kibila kitu muingi ku tukula mu nza ayiyi yimbi, mu kutadila luzolo lu Tat’itu Nzambi. 5 Bika Nzambi katambula nkembu wu mvu ka mvu. Amem.

6 Yidi mu kukuituka mu phila benu luidi mu kutatukila mu thinu, mutu wulutela mu mamboti malutidi mu nzila Klistu, mu kulandakana ntindu wunkaka wu zitsangu zimboti. 7 Masinsundula ko ti, vadi ntindu wunkaka wu zitsangu zimboti, vayi vadi batu bantomba ku luvukumuna ayi badi mu kubivisa zitsangu zimboti matedi Klistu. 8 Vayi, kheti wumueka mu befu voti mbasi, na ku luzabikisa zitsangu zimboti kubika kuandi zio tu luzabikisa, buna bika mutu beni kasingu. 9 Dedi bo tuma tubila, yeka bue vutukila: Woso kua mutu wu kulusamuna zitsangu zinkaka zimboti kubotula kuandi zio benu lukikinina, kafueti ba mutu wusingu.

10 Minu yidi mu kutomba kubaka lunungu va mesu ma batu voti ma Nzambi? Ove minu yidi mu kutomba kukuangidika batu? Boti minu yidi mu kukuangidika batu, khanu yisi ko kisadi ki Klistu. 11 Zikhomba, yintomba luzaba ti, zitsangu zimboti yi luzabikisa zisa fumina ko kuidi batu. 12 Kibila yisa tambudila ko ziawu kuidi batu, ayi ni mutu kasa ndonga ko ziawu, vayi Yesu Klistu nandi wunzabikisa ziawu.

13 Benu luzebi mambu moso minu yaba vanganga bo yiba mu kinganga ki basi yuda. Minu yaba kuamisanga beni kimvuka ki Nzambi, ayi yivangila kiawu mambu mawombo mambi. 14 Mvandi, luzebi ti minu yiluta landakana kinganga ki basi yuda kena bawombo mu mvil’itu baba phung’ama, kibila minu yiluta ba kifuza mu bikhulu bi matata mami. 15 Vayi bo Nzambi no wutuadisa mbutukulu’ama ayi no wuthela mu nzila mamboti mandi malutidi, kamona ti didi diambu dimboti 16 kuzabikisa Muan’andi mu nzil’ama, muingi minu yisamuna kuidi mimvila minkaka zitsangu zimboti matedi nandi, muna thangu beni yisa kue solula ko na mutu wunkaka. 17 Mvandi yisa kuenda ko ni kheti ku Yelusalemi, kuidi batu batuama kuba bapostolo kena minu, vayi yiyenda ku Arabia, bosi yivutuka ku Damasco.

18 Bosi bo vavioka mimvu mitatu, minu yitombuka ku Yelusalemi muingi kue tala Sefa, ayi yikala yandi 15 di bilumbu. 19 Vayi kubotula kuandi to Tiagu khomba Mfumu, minu yisa mona ko bapostolo bankaka. 20 Ayi mu matedi mambu minu yidi mu kulusonikina, minu yi kulukamba mu lufiatu va ntuala Nzambi ti, yisi kuluvuna ko.

21 Bosi minu yiyenda ku kizunga ki Silia ayi ki Silisia. 22 Vayi bimvuka bidi ku Yuda bidi kithuadi na Klistu, basa kunzaba ko. 23 Bawu baba kuwanga to batu kutuba: “Mutu waba ku tukuamisanga, bubu widi mu kusamuna zitsangu zimboti matedi kiminu kio nandi kaba tomba kutulula.” 24 Diawu, mu kibila kiama bawombo batona kuzitisa Nzambi.

2 Bosi, bo vavioka 14 di mimvu, yibue tombuka ku Yelusalemi na Balinabasi, ayi tunata mvandi Titu. 2 Yitombukila kuna, mu kibila ki kimona mesu bambonisa, ayi yizabikisa kuidi zikhomba matedi zitsangu zimboti, zio minu yidi mu kusamuna kuidi batu ba mimvila minkaka. Yivangila to mawu va ntuala zikhomba baba kinzikanga beni, kibila yaba tomba kuzaba boti kisalu kiama ki kusamuna kisi ko kiphamba. 3 Vayi, ni kheti Titu no wuba yama, kasa ba ko mu lukuiku lu kuzengusu nyitu yi kibakala, kheti mu kuba musi ngeleko. 4 Vayi mambu amomo, mamonikina mu kibila ki baklistu ba luvunu bakota mu kimvuka, muingi ku tukitula mimvika mu kumanisa kiphuanza tuidi mu kithuadi na Yesu Klistu. 5 Befu tusa bika ko bawu ba tuvukumuna, ni kheti mu mua thangu, muingi kiedika ki zitsangu zimboti kitatamana yinu.

6 Vayi, mu matedi zikhomba baba kinzikanga beni, kuidi minu, luaku bawu baba luisi ko beni nkinza, kibila Nzambi kafundisilanga ko batu mu kutadila kizizi. Zikhomba aziozio baba kinzikanga beni, basa kundonga ko ni diambu dimona. 7 Vayi, bo bawu bamona ti minu baphana kiyeku ki kusamuna zitsangu zimboti kuidi batu bakhambulu basi yuda, dedi bo Petelo katambudila kiyeku ki kusamuna kuidi basi yuda. 8 Kibila Nzambi no wuvana Petelo mangolo mantombulu muingi kuba apostolo kuidi basi yuda, nandi mvandi wuphana mangolo muingi yiba apostolo kuidi batu ba mimvila minkaka. 9 Ayi bo bamona bivisa bi mamboti malutidi Nzambi kambonisa, diawu Tiagu, Sefa ayi Yoane, bo baba tuama ntuala* mu kimvuka, bavanina mboti kuidi minu ayi Balinabasi, muingi kumonisa ti baba tomba kusala yitu mu kithuadi, muingi befu tuenda kuidi batu ba mimvila minkaka, vayi bawu kuidi basi yuda. 10 Vayi bawu badinda to muingi tutebukilanga moyo batu bakhambulu mbakulu, ayi mawu minu yintatamananga kuvangila mangolo.

11 Vayi, bo Sefa kavitila ku Antiokia, minu yinsemba mu mambu kavanga, kibila nandi kasa vanga ko mambu masulama. 12 Kibila ava mua ndambu mu bakundi ba Tiagu bavitila, Sefa waba dianga va kimueka na batu ba mimvila minkaka, vayi bo bakundi ba Tiagu bavitila, nandi wulembu kuvanga mawu, ayi wutatuka batu beni, kibila wuba boma bu basi yuda. 13 Basi yuda bankaka mvandi bayiza ba ku khonzu’andi, mu kuvanga mambu amomo mambi. Balinabasi mvandi wuvukumuka, mu kuvanga mawu. 14 Vayi, bo yimona ti bawu babasa zingilanga ko mu kiedika ki zitsangu zimboti, diawu yikambila Sefa va ntuala batu boso: “Boti ngiewu, kheti mu kuba musi yuda, widi mu kuzingila buka mutu wu mimvila minkaka, kubika kuandi buka musi yuda, buidi wulenda kindisila batu ba mimvila minkaka, kulandakana bikhulu bi basi yuda?”

15 Befu tuidi basi yuda tona tubutuka, ayi kubika ti batu ba masumu ba mimvila minkaka, 16 tunkikininanga ti mutu kalendi tedulu ko wusonga mu kulandakana Minsiku, vayi mu kuba to kiminu mu Yesu Klistu. Diawu tummonisinanga kiminu mu Yesu Klistu, muingi tutedulu batu basonga, kubika ti mu kulandakana Minsiku, kibila vasi ko mutu wulenda tedulu wusonga mu kulandakana Minsiku. 17 Vayi, boti befu mvitu ba tutedila batu ba masumu, bo tumvanga mangolo muingi ba tutedila batu basonga mu nzila Klistu, mawu mansundula ti Klistu widi mu ku tukindisa tusumuka? Ndamba! 18 Minu kubue tunga kiuma yitolumuna, buna yidi mutu wukhambu tumukinanga Minsiku. 19 Mu nzila Minsiku, minu yifua mu kibila ki Minsiku, muingi yizingila mu Nzambi. 20 Bubu, yidi wubandu va dikunzi na Klistu. Kubika ti minu yidi mu kuzinga, vayi Klistu nandi widi mu kuzinga yama mu kithuadi. Bukiedika, luzingu yidi bubu mu kinsuni, yinzingila luawu mu kibila ki kiminu yidi mu Muana Nzambi, no wunzola ayi wufuila mu kibila kiama. 21 Minu, yisimmanga ko mamboti malutidi ma Nzambi, kibila boti busonga bunkuizilanga mu nzila Minsiku, buna Klistu, wufuila mu phamba.

3 Benu basi ngalatia luidi bivungisi! Nani be luvukumuna muingi lulandakana nzila yimbi, mu kuzaba ti lutambula nzailu yikiedika yitedi lufua lu Yesu Klistu va dikunzi? 2 Vadi diambu yintomba ku lukuvula: Benu lutambula phevi yinlongo mu kuvanga mambu madi mu minsiku, voti mu kumonisa kiminu mu mambu lulonguka? 3 Bukiedika ti mambu lumvanga masimmonisa ko ti benu luidi bivungisi? Benu lutonina kudiatila mu nzila yi kiphevi, buabu luntomba kumanisina mu nzila yi kinsuni? 4 Bukiedika ti mu phamba luviokidi mu mambu maphasi? Minu yidi lufiatu ti ndamba. 5 Bukiedika ti mutu wu luvana phevi yinlongo ayi widi mu kuvanga mangitukulu va khat’inu, kadi mu kuvangila mawu mu kibila ki kulandakana mambu madi mu minsiku, voti mu kibila ki kiminu lumonisa mu mambu lulonguka? 6 Madi buka mambu mamonikina Abalahami: Nandi “wulekila kiminu mu Yave, ayi wuyiza tedulu mutu wusonga.”

7 Yidi lufiatu ti, benu luzebi ti baboso badi kiminu, bawu badi bana ba Abalahami. 8 Nzambi wutuba mu Masonoko ti, wala tedila batu ba mimvila minkaka basonga, mu kibila ki kiminu kiawu, mvandi wuzabikisa zitsangu zimboti kuidi Abalahami, mu kutuba: “Mu kibila kiaku, mimvila mioso miala tambula lusakumunu.” 9 Diawu, baboso bammonisa kiminu bala tambula lusakumunu va kimueka na Abalahami, no wumonisa kiminu.

10 Masonoko mantuba: “Batu boso bakhambu tatamana bakuikama mu mambu moso masonama mu buku yi Minsiku, ayi bammanga kuvanga mawu, badi basingu.” Diawu yiku lukambila ti, baboso bamfiatilanga mu mambu madi mu Minsiku mi Mose, badi batu basingu. 11 Mvandi bivisa bimmonisa ti, mu kutadila minsiku, vasi ko mutu kalenda tedulu mutu wusonga va mesu ma Nzambi, kibila “mutu wusonga wala zingila mu kibila ki kiminu kiandi.” 12 Diawu, Minsiku misa kuizila ko mu kiminu, vayi “woso wunlandakana minsiku wala zinga mu kuvanga mawu.” 13 Kibila Klistu wu tusumba muingi kutukula mu tsingulu yi Minsiku muingi nandi kaba wusingu va mving’itu, dedi bo madidi masonama: “Woso mutu bambanda va dikunzi, widi mutu wusingu.” 14 Mawu mamonikina, muingi batu ba mimvila minkaka batambula lusakumunu lu Abalahami mu nzila Yesu Klistu, muingi tutambula phevi ba tukanikisa mu kibila ki kiminu kitu.

15 Zikhomba ziama, yintubila mambu amama mu kutadila mambu mammonikanga: bo luwawanu lumvangama, kheti batu bamvanga luawu, vasi ko ni mutu kalenda vingisa luawu voti kubuela muna mambu mankaka. 16 Vayi Nzambi wuvana zikhanu ziandi kuidi Abalahami ayi nkun’andi. Masonoko masintuba ko “kuidi minkuna miandi” buka ti, midi miwombo. Vayi mawu mantuba “kuidi nkun’andi,” mammonisa ti widi wumueka to, wunsundula Klistu. 17 Kubotula kuandi amomo, minu yiku lukamba: Minsiku bayiza vana bo vavioka 430 di mimvu, misa balula ko luwawanu lukhulu Nzambi kavanga, muingi zikhanu zibika salama. 18 Boti kiuka beni kiyizila mu minsiku, buna kisa kuizila ko mu mambu Nzambi kakanikisa. Vayi mu luzolo, nandi wuvana kiawu Abalahami mu nzila zikhanu ziandi.

19 Kibila mbi bavanina Minsiku? Bavanina miawu muingi masumu mazabakana, nati nkuna wu Abalahami no bakanikisa zikhanu wala kuiza. Ayi Minsiku beni ba mizabikisila mu nzila zimbasi, mu mioko mi nsadisi. 20 Vantombuluanga to nsadisi boti batu buadi bamvanga luwawanu, vayi Nzambi naveka wuvanga luwawanu beni. 21 Buabu, bukiedika ti Minsiku mimbundula zikhanu zi Nzambi? Ndamba. Kibila boti bavana minsiku milenda vana luzingu, khanu busonga mvandi buyizila mu minsiku. 22 Vayi Masonoko mavana biabioso mu lukiebu lu disumu, muingi zikhanu zinkuizila mu kiminu mu Yesu Klistu, zivanu kuidi bo bammonisa kiminu.

23 Vayi ava tuba baklistu, tuba basuama ku tsi minsiku, ayi tuvanu mu lukiebu luandi mu kuvingila kiminu kiala monika. 24 Minsiku miaba ku tutuadisa muingi kutunata kuidi Klistu ayi tutedulu batu basonga, mu kibila ki kiminu. 25 Vayi bo tueka kiminu mu Klistu, tusiedi ko mu tuadusulu yi mutu wunkaka.

26 Benu boso luidi bana ba Nzambi, mu nzila kiminu mu Yesu Klistu. 27 Kibila benu boso lubotimina mu Klistu, lummonisanga zikhadulu zi Klistu. 28 Vasi ko musi yuda, musi ngeleko, mvika, mutu widi kiphuanza, ni dibakala voti nkietu, kibila benu boso luidi mutu wumueka mu kithuadi na Yesu Klistu. 29 Mvandi, boti benu luidi minlandikini mi Klistu, buna muidi nkuna wu Abalahami, ayi luala vua kiuka dedi bo Nzambi katubila.

4 Yintuba ti, mutu wumvua kiuka, boti wukhidi muana kilezi, kasi ko disuasana na mvika, kheti nandi widi mfumu yi biuma bioso, 2 vayi nandi widi ku tsi thuadusulu yi batu ba kuntuadisa, nati kilumbu tat’andi kasikika tona thama, kiala fuana. 3 Bobuawu mvandi, bo tuba bana ba bilezi, befu mvitu tuba mimvika mi biuma bi nza ayiyi. 4 Vayi bo thangu yifuana, Nzambi wufila Muan’andi, no wubutukila mu nkietu, ayi nandi wuba ku tsi Minsiku, 5 muingi kutukula mu kutusumba ku tsi Minsiku, muingi tubaka luaku lu kuba bana bandi.

6 Mu phila ayoyo, mu kuba ti muidi bana, diawu Nzambi kafidila phevi yi Muan’andi mu mintima mitu, ayi phevi beni yintelanga: “Aba, Tata!” 7 Diawu ngie wusiedi ko mvika, vayi weka muana, ayi boti weka muana, Nzambi mvandi wala kuvana kiuka.

8 Diawu, ava kuzaba Nzambi, benu luba mimvika mi zinzambi zi luvunu. 9 Vayi, bo luma zaba Nzambi, voti bo lueka bazabakana kuidi Nzambi, kibila mbi luntomba kubue vutukila kuba mimvika mi biuma bi nza, bi lebakana ayi biluelu? 10 Benu lunkembanga bilumbu, zingonda, zithangu ayi mimvu. 11 Yidi mu kukuazukila mu kibila kinu, kibila mangolo moso yivanga muingi ku lusadisa, malenda ba maphamba.

12 Zikhomba ziama, yiku lulomba: Landakananu kifuani kiama, kibila minu mvama, yiba buka benu. Benu lusa kuphangila ko ni diambu dimbi. 13 Vayi benu luzebi ti mu kibila ki kimbevu kiba yama, diawu yibakila luaku lu kumu samuna zitsangu zimboti, mu khumbu yitheti. 14 Ayi kheti kimbevu kiama ki lutuadisa ziphasi, vayi benu lusa kukhieba ko mu lulenzu, ni kumbona khenyi. Vayi muthambula banga mbasi yi Nzambi, ayi buka Yesu Klistu. 15 Mayangi luba, kuidi makeli? Kibila minu yidi lufiatu ti, boti benu lubaka luaku, khanu lubotula mesu minu, muingi luphana mawu. 16 Buabu, bukiedika ti minu yeka mben’inu, bo yima lukamba kiedika? 17 Bawu, badi mu kuvanga mamoso bannunga, muingi ba luvua, vayi basi ko mayindu mamboti. Bawu bantomba ku lutatula kuidi minu, muingi benu luba fikama ayi luba landakana. 18 Bukiedika, didi diambu dimboti boti mutu wuvanga mangolo muingi ku luvua, mu mayindu mamboti, vayi kubika to mu thangu yidi yinu akoko. 19 Benu luidi bana bama, bo yekila mianga mi kubuta, nati muala ba zikhadulu zi Klistu. 20 Minu yintomba kuba yinu va kimueka, ayi ku lukambila mu phila yinkaka, kibila yidi mu kukuazuka beni mu kibila kinu.

21 Benu muntomba kulandakana Minsiku, khambanu: Lusa zaba ko mambu madi mu Minsiku? 22 Dedi, madi masonama ti, Abalahami wubuta bana buadi, wumueka na kisadi kiandi, ayi wunkaka na nkazi’andi wukhambu ba kisadi. 23 Vayi muana wu kisadi, wubutukila dedi bo bumbutukilanga bana bankaka, vayi muana wu nkazi, wubutukila mu lukanu lu Nzambi. 24 Mambu amomo, madi bivisa bi mambu mankuiza kuntuala, kibila bakietu abobo, bansundula zitsila* wadi, yimueka yinsundula mongo Sinai, kumbutukilanga bana ba kivika, wunsundula Agar. 25 Agar ba kumfuanikisa mongo wu Sinai widi ku Arabia, wunsundula Yelusalemi yi bubu, kibila nandi widi va kivika na bana bandi. 26 Vayi, Yelusalemi yi diyilu, yidi kiphuanza, nandi widi ngud’itu.

27 Kibila madi masonama: “Yangalala ngie nkietu widi kisita, wukhambu butanga, tenduka mu mayangi, ngie nkietu wukhambu monanga mianga mi kubuta, kibila nkietu bayekula, wala luta buta kena nkietu widi nnuni.” 28 Zikhomba, benu muidi bana bakanikisa, dedi bo bakanikisila Isaki. 29 Vayi, dedi bo mutu wubutukila mu kinsuni, kaba kuamisila mutu wubutukila mu nzila phevi, mawu mvandi mammonikanga bubu. 30 Buabu, mambu mbi Masonoko mantuba? “Kukisa kisadi ayi muan’andi, kibila muana wu kisadi, kalendi tambula ko kiuka va kimueka na muana wu nkazi.” 31 Diawu zikhomba, befu tuisi ko bana ba kisadi, vayi bana ba nkazi.

5 Klistu wu tukula muingi tubaka kiphuanza beni. Diawu tatamananu bakindama ayi kamu bika ni mutu kabue muvutula va kivika.

2 Tekanu matu! Minu Polo yiku lukamba ti, benu kuzengusu nyitu yi kibakala, buna Klistu kasiedi ko mfunu kuidi benu. 3 Yinkamba kuidi dioso kua dibakala wunzengusu nyitu yi kibakala ti, nandi widi mu lukuiku lu kutumukina Minsiku mioso. 4 Benu luntombanga kuba batu basonga mu kulandakana Minsiku, vayi muisi ko kithuadi na Klistu ayi lukitatula mu mamboti mandi malutidi. 5 Vayi kuidi befu, mu phevi tumvingila mu phuila, kivuvu ki kubaka busonga bunkuizilanga mu kumonisa kiminu. 6 Kibila mu kithuadi na Yesu Klistu, kuba kuandi kuzengusu nyitu voti kukhambu zengusu nyitu, kuisi ko mfunu, vayi kuba kiminu mu nzila luzolo, mawu madi mfunu.

7 Benu lube diatanga* buboti. Buabu, nani widi mu kulutula nkaku kutatamana kutumukina kiedika? 8 Mayindu amomo, masa kuizila ko kuidi Mutu no wulutela. 9 Mua nkadu luvi* lumfunisanga falini yoso. 10 Yidi lufiatu ti benu muidi kithuadi na Mfumu, luisinkuiza yindudila ko phila yinkaka. Vayi boso kua bubela mutu wu kuluvukumuna, nandi wala tambula lufundusu kafueni. 11 Zikhomba, boti minu yikhidi samuna matedi kuzengusu nyitu yi kibakala, buabu kibila mbi yikhidi viokila mu zikhuamusu? Boti buawu, buna dikunzi di ziphasi zi Yesu dituluka. 12 Minu yintomba muingi babakala boso badi mu kuluvukumuna, baba bisita ayi bavonda bibutulu biawu.

13 Zikhomba, benu ba lutedila muingi lubaka kiphuanza. Diawu, bikanu kusadila kiphuanza akiokio banga luaku lu kutomba ziphuila zi kinsuni, vayi mu nzila luzolo, salanu buka mimvika benu na benu. 14 Kibila Minsiku mioso midi mu lutumu lumueka: “Zola wadi yaku dedi bo wuyizodilanga ngie veka.” 15 Boti benu luntatamana kuyitebila ayi luyituadisa ziphasi benu na benu, banu keba keba muingi lubika kuyivondasana.

16 Vayi minu yiku lukamba ti, tatamananu kudiatila mu phevi ayi lualasa ba ko ziphuila zi kinsuni. 17 Kibila nsuni wisi ko kithuadi na phevi mu ziphuila ziandi, ayi phevi yisi ko kithuadi na nsuni. Baba buadi badi kimbeni, diawu benu lukhambu vangilanga mambu mo luntomba kuvanga. 18 Mvandi, boti benu luntuadusulu mu phevi, buna muisi ko mu lukuiku lu kutumukina Minsiku.

19 Zikhadulu zi kinsuni, zimmonikanga buboti. Ziawu zidi: kitsuza, mambu mamvindu, mambu matsoni, 20 mbuongimini yi bitumba, kindoki, bisombulu, kiphala, nganzi, kukhambu wizana, kithatu, kufonda mangumba, 21 nsoki, kukolo malavu, minkungi mimvioka kitesu ayi mambu mankaka maphila ayoyo. Yidi mu kululubula mu matedi mambu amomo, dedi bo minu yilulubudila: baboso bamvanganga mawu, balasa kota ko mu Kintinu ki Nzambi.

22 Vayi mbutu wu phevi widi: luzolo, mayangi, ndembama, mvibudulu, mamboti, kumonisa mamboti, kiminu, 23 kulembama ayi kukiyala. Vasi ko nsiku wumfundisa mambu amomo. 24 Mvandi, minlandikini mi Yesu Klistu babanda zinyitu ziawu zi kinsuni, ziphuila ayi zinzinunu va dikunzi.

25 Boti tunzingilanga mu phevi, tutatamananu mvandi kudiatila mu phevi. 26 Tubika ba batu bayinangikanga mu kuyidedikisa befu na befu, ayi kumona nsoki bankaka.

6 Zikhomba, kheti vadi mutu wumvanga diambu dimbi mu khambu zaba, benu muidi bayonzuka mu kiphevi, nsadisanu kavutuka mu nzila, vayi vangilanu mawu mu phila yivumbama. Ayi banu keba keba muingi benu mvinu lubika vukumuka. 2 Tatamananu kuyisadisa benu na benu, ayi mu phila ayoyo, benu lunkuiza tumukina nsiku wu Klistu. 3 Kibila boti mutu wunyindula ti widi mfunu, vayi kasiandi ko mfunu, buna widi mu kuyivuna naveka. 4 Vayi bika kadika mutu kafiongunina mavanga mandi, ayi kabaka kibila ki kukuangalala mu naveka, kubika ti mu kuyidedikisa na mutu wunkaka. 5 Kibila kadika mutu wala nata kizitu kiandi veka.

6 Mvandi, woso mutu banlonga mambu ma Nzambi, bika kakabila mua biuma kadi kuidi mutu widi mu kunlonga.

7 Bikanu kuvunuka, Nzambi bansakininanga ko. Kibila bioso biuma mutu kamvata, biawu mvandi kala vela. 8 Kibila woso wumvata mu kulandakana mavanga ma kinsuni, wala vela mbungulu, vayi woso wumvata mu kulandakana mavanga ma kiphevi, wala vela luzingu lu mvu ka mvu. 9 Diawu, tubika vonga kuvanga mambu mamboti, kibila befu kukhambu vonga, tuala vela mu thangu yifuana. 10 Diawu, boti tuidi luaku lu kuvanga mamboti, tufueti vangila mawu kuidi baboso, vayi bulutidi kuidi zikhomba zitu zi kiphevi.

11 Talanu phila bisono bidi kutola yilusonikini mu mioko miami veka.

12 Batu boso banyindula ti badi batu bamboti mu kutadila mayindu ma batu, bawu badi muku lukuika kuzengusu nyitu yi kibakala. Bawu bamvangilanga mawu, muingi babika viokila mu zikhuamusu mu kibila ki Yesu. 13 Kibila batu banzengusuanga nyitu yi kibakala, mvawu batumukinanga ko Minsiku. Vayi bawu bantomba muingi benu luzengusu nyitu yi kibakala muingi babaka kibila ki kukinyemisina mu zinyitu zinu. 14 Diawu, yilendi kukinyemisa ko mu ni kiuma, kubotula kuandi mu kibila ki lufua lu Mfumu’itu Yesu Klistu va dikunzi. Kibila kuidi minu, mu nzila lufua beni nza yidi yifua, ayi minu mvama yidi wufua kuidi nza. 15 Kibila kuzengusu nyitu voti kukhambu zengusu nyitu kuisi ko mfunu, vayi kuba kivangu kimona, kuawu kulutidi mfunu. 16 Bika ndembama ayi nlemvu wu Nzambi wuba kuidi baboso banlandakananga lutumu alolo, ngete, kuidi Isaeli yi Nzambi.

17 Kutona bubu, ni mutu kabika kuthuadisa ziphasi, kibila mu nyitu’ama muidi bidimbu bimmonisa ti minu yidi kisadi ki Yesu.

18 Zikhomba, bika mamboti malutidi ma Mfumu’itu Yesu Klistu maba yinu, bo lummonisa zikhadulu zimboti. Amem.