NKANDA KUIDI BASI EFESO

1 Minu Polo, apostolo yi Yesu Klistu mu luzolo lu Nzambi, yimfila nkanda awuwu kuidi banlongo boso badi ku Efeso ayi badi bakuikama mu kithuadi na Yesu Klistu:

2 Bika mamboti malutidi ayi ndembama yi Nzambi, Tat’itu ayi yi Mfumu Yesu Klistu yiba yinu.

3 Bika Nzambi, Tata yi Mfumu Yesu Klistu, katambula nzitusu, kibila nandi wutusakumuna mu kithuadi na Klistu, mu kutuvana ntindu woso wu lusakumunu lu kiphevi mu bibuangu bidi ku diyilu, 4 mu kuzaba ti nandi wu tusola muingi tuba yandi kithuadi, ava nza yivangu muingi tuba banlongo, ayi tubika ba fotu va ntual’andi mu luzolo. 5 Kibila tona thama nandi wu tukanikisa ti, tuala ba bana bandi, mu nzila Yesu Klistu dedi buididi luzolo luandi, 6 muingi kumonisa nzitusu mu mamboti malutidi nandi ka tumonisina mu luzolo, mu nzila Muan’andi. 7 Mu kibila kiandi, befu tukulu mu thalu yinangama, mu nzila menga mandi. Bukiedika, tubaka nlemvu wu masumu mitu, mu nzila kimvuama ki mamboti mandi malutidi.

8 Mamboti moso amomo nandi ka tuvana, wutuvanina mawu mu kitesu kilutidi, mu nduenga yoso ayi mu phisulu yoso, 9 mu kutuzabikisa masuama mandi manlongo madi nguizani na luzolo luandi. Mu kutadila luzolo beni, naveka wubaka makani matedi lukanu luandi, 10 muingi kukubika biuma bo thangu nandi kasikika yala fuana, ayi kukutikisa biuma bioso bidi ku diyilu ayi va ntoto mu Klistu, ngete mu nandi. 11 No widi yitu kithuadi ayi wala baka yitu kiuka va kimueka mu thangu basikika, mu kutadila mutu wumvanganga biuma bioso, dedi buididi luzolo luandi. 12 Muingi Nzambi katambula nkembu ayi nzitusu, mu nzil’itu befu batu batheti tuyiza ba kiminu mu Klistu. 13 Vayi benu mvinu luaba kumvingila bo luyuwa kiedika ki zitsangu zimboti matedi phulusu’inu. Bo lukikinina, Nzambi wu lutula kidimbu kiandi, mu kuluvana phevi yinlongo yo kakanikisa mu nzila Muan’andi. 14 Ayi yawu yidi kivisa ki kiuka kitu, muingi kukula mu nzila khudulu biuma biandi veka, ayi muingi kuzitisa nkembu’andi.

15 Diawu bo minu mvama yiyuwa kiminu benu luidi mu Mfumu Yesu, ayi luzolo lummonisanga kuidi banlongo boso, 16 yimvutulanga matondo mu kibila kinu, ayi yintatamananga kumu nata mu minsambu, 17 muingi Nzambi yi nkembu woso, Tata yi Mfumu’itu Yesu, kamu vana phevi muingi lununga kuvisa mambu ka luzabikisanga matedi naveka. 18 Nandi wuluzibula mesu* muingi lununga kumona kivuvu kalutedila, ayi kimvuama ki nkembu nandi kalundila kuidi banlongo banga kiuka. 19 Kitesu ki mangolo mandi mu befu, kimmonikinanga mu phila kansadilanga mangolo mandi, 20 mo nandi kasadila mu Klistu, bo kamvulubusa mu bafua, ayi kamvana nsua wu kukala ku khonzu’andi yi lubakala ku diyilu. 21 Nandi wuluta kunnangika kena mintinu mioso, kimfumu, mangolo moso, luyalu ayi kena woso mutu wunkinza. Kubika kuandi to mu nza ayiyi, vayi nati mu nza yinkuiza. 22 Mvandi wutula biuma bioso ku tsi bitambi biandi, ayi wumbieka Mfumu yi biuma bioso, bitedi kimvuka, 23 kinsundula nyitu’andi. Kiawu kidi kiwala biuma bioso matedi nandi, no wundukisanga biuma bioso.

2 Kubotula kuandi amomo, Nzambi wu luvana luzingu kheti mu kuba batu bafua, mu kibila ki zinzimbala ayi masumu minu, 2 mo benu luaba vanganga bo luaba zingilanga mu phila batu mu nza banzingilanga. Benu luaba tuadusu kuidi nyadi wu phemu yimvukumunanga batu, phevi yo bubu yintuadisanga batu bakhambu tumukinanga. 3 Bukiedika, befu boso tuaba zingilanga mu phila bawu banzingilanga, mu kuvanga mambu mankuangidika nyitu’itu yi kinsuni, ayi tuaba vangilanga mambu mu kutadila mayindu mitu. Tona mu mbutukulu’itu, tuba bafuana muingi kutambula nganzi yi Nzambi, buka batu bankaka. 4 Vayi, Nzambi nkua nlemvu, ayi mu kibila ki luzolo nandi ka tumonisa, 5 wutuvana luzingu va kimueka na Klistu, kheti bo tuba bafua mu kibila ki masumu mitu, ayi mu nzila mamboti mandi malutidi, benu lukulu. 6 Mvandi, Nzambi wu tuvulubusa va kimueka na Yesu, ayi wutuvana luaku lu kukala yandi va kimueka, mu bibuangu ku diyilu mu kithuadi na Yesu Klistu, 7 muingi mu nza yinkuiza, kamonisa kimvuama ki mamboti mandi malutidi mu nzila nlemvu ka tumonisa, mu kithuadi na Yesu Klistu.

8 Mu kibila ki mamboti malutidi ba lumonisa, benu lukulu mu nzila kiminu. Phulusu beni yisa kuizila ko mu nzila mangolo minu, vayi widi nkhailu wu Nzambi. 9 Lusa bakila ko phulusu beni mu kibila ki mavanga minu, muingi ni mutu mu benu kabika baka kibila ki kukinyemisa. 10 Befu tuidi bivangu bi Nzambi ayi tuvangulu mu kithuadi na Yesu Klistu, muingi tuvanga kisalu ki Nzambi, kio katuvana tona thama, ayi kuzingila mu kisalu beni.

11 Vayi, tebukanu moyo ti benu, luidi batu ba mimvila minkaka tona lubutuka, ayi baba lutedilanga “batu bakhambu zengusu nyitu yi kibakala,” kuidi “batu bazengusu nyitu yi kibakala,” yo yizengusu mu kinsuni kuidi batu. 12 Mu thangu beni, benu lusa zaba ko Klistu, lusa ba ko nsua wu kukala ku divula di Isaeli, lusa ba ko kithuadi na luwawanu lu lukanu lu Nzambi, lusa ba ko kivuvu ayi lusa zaba ko Nzambi. 13 Benu luba batatuka, vayi mu kithuadi na Yesu Klistu, lueka bafikama mu kibila ki menga ma Klistu. 14 Kibila nandi widi ndembam’itu, ayi wuvanga muingi mangumba ma mamuadi, maba dingumba dimueka to, mu kutulula kibaka kiba va khat’itu, kiaba kutuvasanga. 15 Mu kibila ki nyitu’andi, nandi wumanisa kimbeni, ayi Minsiku miba zithumu, muingi kuvanga mangumba ma mamuadi maba kithuadi, batu bamona* ayi kutuadisa ndembama. 16 Ayi muingi mu nzila dikunzi di ziphasi, kuvanga makabu ma mamuadi kuba kithuadi na Nzambi, mu nyitu yimueka to, kibila Yesu wumanisa kimbeni mu nzil’andi. 17 Nandi wuyiza, ayi wusamuna zitsangu zimboti zindembama kuidi benu luba batatuka, ayi ndembama kuidi batu baba bafikama. 18 Kibila mu nzil’andi, befu mangumba ma mamuadi, tumfikamanga kuidi Tata mukhambu nkaku, mu phevi yimueka to.

19 Diawu, benu lusiedi ko zinzenza, vayi mueka dikabu dimueka na banlongo, ayi dikanda dimueka di Nzambi. 20 Benu lutungu va mbata lusersu lu bapostolo ayi lu mimbikudi, ayi naveka Yesu Klistu, nandi widi dimanya di thokongo* di lusersu beni. 21 Mu kithuadi na Yesu, nzo yoso yidi mu kithuadi, ayi yidi mu kukonzuka, muingi yiba tempelu yinlongo yi Yave. 22 Mu kithuadi na Yesu, benu mvinu muidi mu kutungu, muingi muba kibuangu kio Nzambi kankuiza kala mu kiphevi.

3 Diawu, minu Polo, yidi mu buloku mu kibila ki Yesu Klistu, muingi ku mutuadisa ndandu, benu batu ba mimvila minkaka . . . 2 Yizebi ti benu luyuwa ti, minu yitambula kiyeku ki kulusadisa kutambula mamboti malutidi ma Nzambi, 3 ayi ti banzabikisa masuama manlongo mu kimona mesu, dedi bo yima lusonikina mu bukhufi. 4 Diawu, bo lunkuiza tanga mawu, benu lunkuiza visa ti minu yidi phisulu yi masuama manlongo ma Klistu. 5 Mu zimbandu zinkaka, masuama amomo manlongo, masa ba ko mazabakana kuidi batu, dedi bo bubu phevi kadi mu kuzabikisila mawu kuidi bapostolo banlongo ayi mimbikudi ti: 6 batu ba mimvila minkaka, mu kithuadi na Yesu Klistu ayi mu nzila zitsangu zimboti, bala ba minyadi, binama bi nyitu yimueka to ayi bala tambula yitu lukanu lumueka. 7 Minu yiyiza ba nsamuni wu zitsangu beni, mu kutadila nkhailu wu mamboti malutidi ma Nzambi, mo kambonisa mu nzila mangolo mandi.

8 Minu yidi mutu wukhambulu beni mfunu mu banlongo boso, bambonisa mamboti amomo malutidi, muingi yizabikisa kuidi mimvila minkaka zitsangu zimboti, matedi kimvuama kikhambu sukanga ki Klistu, 9 ayi kusadisa bawombo kumona buidi masuama manlongo ma Nzambi madidi. 10 Muingi mu nzila kimvuka, bazabikisa nduenga yi Nzambi mu ziphila zioso, kuidi mintinu ayi kuidi minyadi, mu bibuangu bi diyilu. 11 Mawu madi kithuadi na lukanu lu mvu ka mvu nandi kavanga, mu matedi Mfumu’itu Yesu Klistu, 12 no mu nzil’andi, tuididi kiphuanza ki kukoluka, ayi tulenda fikama kuidi Nzambi mu lufiatu, mukhambu nkaku, mu nzila kiminu kitu mu Klistu. 13 Bikanu kuvonga mu kibila ki ziphasi yidi mu kuviokila mu kibila kinu, kibila ziawu zinsundula nkembu’inu.

14 Diawu minu yimfukiminanga va ntuala Tata, 15 kibila dikanda dioso ku diyilu ayi va ntoto diyizila kuidi nandi. 16 Yinsambilanga kuidi Nzambi no widi nkembu wuwombo, kasadila mangolo mo phevi’andi yimvananga, muingi kakindisa mintima minu, ayi mayindu minu. 17 Ayi muingi mu nzila kiminu kinu, Klistu kakala mu mintima minu mu luzolo. Mvandi, bika luba basikama ayi bakindama mu lusersu. 18 Muingi va kimueka na banlongo boso, lununga kuvisa buboti kutanduka, kukula, kuzangama, kuvinda,* 19 ayi kuzaba luzolo lu Klistu, lulutidi nzailu, muingi luba zikhadulu zioso zimboti, Nzambi kamvananga.

20 Ayi kuidi no wunsadilanga mangolo mandi muingi kutusadisa, no wulenda vanga malutidi, kuvioka mo tundinda, ayi mo tunyindula, 21 bika nandi katambula nzitusu, mu nzila kimvuka ayi mu nzila Yesu, mu zimbandu zioso ayi mvu ka mvu. Amem.

4 Diawu minu yidi mu buloku mu kibila ki Mfumu, yiku ludinda muingi ludiatila mu phila yifuana, mu kutadila kivuvu ba lutedila, 2 mu kuyikulula, kuyivumbika, mu mvibudulu, ayi mu luzolo monisanu mvibudulu kuidi bankaka, 3 mu kuvanga mangolo mu kifuza mu kutuadisa kithuadi ki phevi mu nzila ndembama. 4 Vadi nyitu yimueka to, phevi yimueka to ayi kivuvu kimueka to kio ba lutedila. 5 Vadi Mfumu yimueka to, kiminu kimueka to, mbotumunu yimueka to, 6 Nzambi yimueka to, Tata yi batu boso ayi no widi kimfumu mu biabioso. Nandi wunsadilanga bivangu bioso muingi kuvanga biuma bioso.

7 Kadika mutu mu befu, wutambula mamboti malutidi mu kitesu kio Klistu kakabila nkhailu beni. 8 Kibila Masonoko mantuba: “Bo nandi kamaka ku diyilu, wunata basi buloku ayi wuvana minkhailu mi batu.”* 9 Buabu, mbi binsundula kikuma “nandi wumaka”? Kiawu kinsundula ti nandi mvandi wukuluka ku kibuangu kilutidi ku wanda, kinsundula ntoto. 10 Nonandi mutu wukuluka, nandi mvandi wumaka ku kibuangu kilutidi zangama ku diyilu, muingi kadukisa mambu moso.

11 Ayi nandi wuvana bankaka kiyeku ki kuba bapostolo, bankaka mimbikudi, bankaka minsamuni, bankaka minsungi ayi bankaka minlongisi, 12 muingi kusadisa banlongo kudiatila mu nzila yisulama, muingi kuvanga kisalu ki kusadisa bankaka, ayi kukindisa nyitu yi Klistu, 13 nati bankuiza tusadisa kuba kithuadi mu mambu moso tunkikininanga, ayi muingi tuba nzailu yikiedika yitedi Muana Nzambi. Mu phila ayoyo, befu tunkuiza ba batu bayonzuka. 14 Diawu tubikanu kuba buka bana balezi, banga batu bannata kuidi mayo ayi bamvevumuna mu phemu mu zikhonzu zioso, mu malongi ma luvunu, mu diela di batu ayi mu mintambu miawu mi luvunu. 15 Vayi mu kutuba kiedika, tuyonzukanu mu mambu moso ayi mu luzolo mu kulandakana kifuani ki Klistu, no widi Mfumu. 16 Mu nzil’andi, nyitu yoso yidi kithuadi ayi yidi yibundana buboti mu madikulu* madi mu nyitu. Bo kadika kinama kimvanga kisalu kiandi mu phila yifuana, nyitu yoso yinkonzukanga ayi yintatamananga kutungu yaveka mu luzolo.

17 Diawu, yiku lukamba ayi yiku lulubula mu Mfumu: bikanu kubue zingila buka batu ba nza, kibila bawu banzingilanga to mu kutadila mayindu mawu mambi. 18 Mayindu mawu madi ku kitombi ayi basi ko kivuvu ki kutambula luzingu lo Nzambi kamvananga, kibila basintomba ko kuzaba Nzambi. 19 Bawu bazimbisa mayindu moso mamboti, ayi bakivana mu kuvanga mambu moso matsoni, muingi kuvanga ntindu woso wu mambu mamvindu.

20 Vayi benu lusa longuka ko ti buawu Klistu kadidi, 21 kibila benu luyuwa ayi lulongukila mu nzil’andi mu kutadila kiedika kidi mu Yesu. 22 Benu lulonguka ti lufueti bika kimutu kikhulu kio kidi kithuadi na phila luaba diatilanga, ayi kio kidi mu kubivusu mu mayindu mandi mambi. 23 Tatamananu kubalula phil’inu yi kuyindudila 24 ayi vuatanu kimutu kimona, kio kidi kithuadi na luzolo lu Nzambi, mu busonga bukiedika ayi mu lukuikumunu.

25 Diawu bo luma bika luvunu, tubanganu kiedika benu na benu, kibila tuidi binama bi yivuidi befu na befu. 26 Ngie kuba mu nganzi, fueti ba keba keba muingi wubika sumuka. Bikanu kulundanga nganzi nati va masika, 27 bikanu kuvana luaku kuidi Nkadi’ampemba. 28 Boti ngie widi muivi, buna bika kubue kuibanga. Vayi wukivana mu kisalu, muingi wubaka kioso kiuma ki kukabila bo badi mu tsatu. 29 Mubika tubanga ni diambu dinlueka bankaka ntima,* vayi tubanganu to mambu mamboti muingi kukindisa bankaka, dedi bo buntombulu, muingi kuzabikisa kuidi batu bankuwa mambu ma kuba tuadisa ndandu. 30 Ayi bikanu kunyongisa phevi yinlongo yi Nzambi, yo nandi kaluvana buka kidimbu nati mu kilumbu ki phulusu mu nzila khudulu.

31 Bikanu kulundila bankaka nganzi mu ziphila zioso dedi, kubanga mu nganzi, kutendukila bankaka ayi bifingu va kimueka na mambu moso mambi. 32 Vayi monisanu mamboti ayi kiadi kuidi bankaka, mu kuba lemvukilanga mu ntima woso, dedi bo Nzambi kalulemvukila mu ntima woso mu nzila Klistu.

5 Landakananu kifuani ki Nzambi, kibila luidi bana bandi ba luzolo. 2 Ayi tatamananu kudiatila mu luzolo, dedi bo Klistu katuzodila ayi kayivanina mu kibila kitu, buka dikaba ayi nkhailu widi mfimbu wumboti wunkuangidika Nzambi.

3 Lubika koluka mambu ma butsuza, mambu moso mamvindu, ayi phuila yi kubaka biuma biwombo, kibila mambu amomo, matuadisanga ko ndandu kuidi banlongo. 4 Ni mambu matsoni, masolo ma buvungisi, ayi kutubanga mafunza, ni mambu mankaka makhambu fuana. Vayi vutulanganu matondo. 5 Kibila benu luzebi ayi lumvisanga buboti ti: ni mutu wumvanganga kitsuza, widi mayindu ma mvindu, widi phuila yi kubaka biuma biwombo, yinsundula kubuongimina bitumba, kalenda tambula kiuka mu Kintinu ki Nzambi, kio Yesu kadidi Ntinu.

6 Ni mutu kabika kuluvuna mu mambu maphamba, kibila mu mambu amomo, buawu nganzi yi Nzambi, yinkuizilanga kuidi batu bakhambu tumukinanga. 7 Diawu, bikanu kuba yawu kithuadi. 8 Kibila, benu luba ku kitombi, vayi bubu lueka ku kiezila mu kithuadi na Mfumu. Tatamananu kudiatila buka bana ba kiezila, 9 kibila ḿbutu wu kiezila wunsundula mambu moso mamboti, masonga ayi makiedika. 10 Tatamananu kufiongunina mambu mankuangidikanga Mfumu, 11 ayi bikanu kuvanga mambu ma kitombi, vayi sembanu mawu. 12 Kibila mambu bamvangilanga ku kinsueki, madi mambu matsoni muingi kutubila mawu. 13 Vayi mambu moso madi mazabakana, kiezila kiawu kinzabikisanga mawu. 14 Dedi bo madidi masonama: “Kotuka ngie widi mu kulala, vulubuka mu bafua, ayi Klistu wala kuvana kiezila.”

15 Diawu, banu keba keba muingi lubika diatila buka bivungisi, vayi banga batu ba nduenga, 16 mu kusadila buboti thangu’inu, kibila bilumbu bieka bimbi. 17 Diawu, bikanu kudiatila buka bivungisi, vayi lufueti visa mbi Yave kantomba benu luvanga. 18 Mvandi, lubika kukoluanga malavu, kibila mawu malenda ku lunata kuvanga mambu mambi, vayi bikanu phevi yinlongo yi mutuadisa. 19 Yolukanu benu na benu mu minkunga minzitisa Nzambi, yolanu minkunga mi kiphevi, ayi yodilanu mu ntima woso kuidi Yave, 20 ayi tatamananu kuvutula matondo mu mambu moso kuidi Tat’itu Nzambi, mu dizina di Mfumu’itu Yesu Klistu.

21 Tumukinanganu bankaka, mu kumonisa lukinzu kuidi Mfumu’itu Klistu. 22 Nkazi kafueti tumukina nnuni’andi, dedi bo kantumukinanga Mfumu Yesu, 23 kibila nnuni, nandi mfumu* wu nkazi, dedi bo Klistu kadidi Mfumu yi kimvuka, ayi mvukisi wu nyitu* beni. 24 Diawu, dedi bo kimvuka kintumukinanga Klistu, nkazi mvandi kafueti tumukinanga nnuni mu mambu moso. 25 Nnuni, tatamana kuzola nkazi’aku, dedi bo Klistu kanzodilanga kimvuka, ayi kayivanina mu kibila ki kimvuka, 26 muingi kuvedisa kimvuka, kudiodisa kiawu mu nlangu, mu nzila Diambu di Nzambi, 27 muingi kuvanga kimvuka kiba kidiodila va mesu mandi, mukhambu mvindu, mimfutu,* ni mambu mankaka ma phila ayoyo, vayi kiba kivedila ayi kidiodila va mesu ma Nzambi.

28 Bobuawu mvandi, nnuni kafueti zolanga nkazi dedi bo kanzodilanga nyitu’andi. Dibakala wunzolanga nkazi’andi, wuyizolanga naveka, 29 kibila vasi ko mutu wunlendanga nyitu’andi, vayi nandi wuyidikilanga ayi wunkiebanga yawu, dedi bo Klistu kankiebilanga kimvuka, 30 kibila befu tuidi binama bi nyitu’andi. 31 “Mu kibila akiokio, dibakala wala bika tat’andi ayi mam’andi ayi wala kangama mu nkazi’andi muingi baba buadi baba nsuni wumueka to.” 32 Masuama amomo manlongo, madi beni mfunu. Vayi yintubila mawu mu kibila ki Klistu, ayi mu kibila ki kimvuka. 33 Diawu, kadika nnuni mu benu, kafueti zola nkazi’andi dedi bo kayizodilanga naveka. Ayi mvandi, nkazi kafueti ba lukinzu luwombo mu nnuni’andi.

6 Bana, tumukinanganu matata minu mu kithuadi na Mfumu, kibila mambu amomo madi mamboti va mesu ma Nzambi. 2 “Zitisa tat’aku ayi mam’aku”— alolo luawu lutumu lutheti luidi kithuadi na lukanu alulu: 3 “Muingi mambu maku moso menda buboti, ayi muingi wutatamana kuzinga mu mimvu miwombo va ntoto.” 4 Matata, bikanu kufuemisanga bana binu, vayi lutatamana kuba longila mu tsembolo ayi mu malongi ma Yave.

5 Bisadi, tumukinanu zimfumu zinu mu ntima woso, ayi luba monisa lukinzu luwombo, dedi bo luntumukinanga Klistu, 6 kubika to bo luidi va ntuala batu bankaka, muingi kukuangidika batu, vayi mu kuba bisadi bi Klistu, vanganu luzolo lu Nzambi mu ntima woso. 7 Banu bisadi mu mayindu mamboti, buka benu lunsadila Yave kubika kuandi batu, 8 kibila benu luzebi ti, Yave wala sakumuna kadika mutu mu kutadila mambu kavanga, kuba kuandi mvika voti mutu widi kiphuanza. 9 Benu zimfumu zi bisadi, vangilanu momawu bisadi binu mu khambu ku batundila, kibila benu luzebi ti, Mfumu’inu ayi mfumu yi bisadi binu widi ku diyilu, ayi nandi kasi ko luvasanu.

10 Bika lukindasana mu Mfumu, ayi mu lulendu lu mangolo mandi. 11 Vuatanu binuanunu biduka bi Nzambi, muingi lununga kuba bakindama mu mintambu mi Nkadi’ampemba, 12 kibila tuidi mu kunuana mvita kubika ti na batu ba kinsuni, vayi na minyadi, zimfumu, minyadi mi nza ayiyi yi kitombi, ayi ziphevi zimbi zidi mu bibuangu ku diyilu. 13 Mu kibila akiokio, vuatanu binuanunu biduka bi Nzambi, muingi lubaka bu kukindimina mu thangu yi mambu mambi. Benu kuvanga mambu moso amomo, luala nunga kukindama.

14 Diawu tatamananu kuba bakindama, mu kuvuata phonda* yi kiedika, ayi kuvuata kikhutu ki kisengu ki busonga, 15 ayi vuatanu zisandali muingi kumonisa ti, luidi bakubama mu kusamuna zitsangu zimboti zi ndembama. 16 Kubotula kuandi amomo, sadilanu nkaku wu kisengu wu kiminu, muingi lununga kuzimisa madionga moso mambazu ma Nkua Mambi. 17 Vuatanu mvandi phu yi kisengu yi phulusu, ayi sadilanu mbedi yi phevi, yinsundula diambu di Nzambi, 18 ayi mu kulomba kuidi Nzambi, benu lufueti kukivana mu minsambu mu zithangu zioso, mu kutatamana kusambila mu phevi. Ayi muingi mawu mamonika, tatamananu bakotuka, ayi tatamananu kulomba kuidi Nzambi mu kibila ki banlongo. 19 Ndatanganu mvandi mu minsambu muingi yibaka ma kukoluka, ayi muingi yinunga kukolukila mu kibakala, bo yinzabikisa masuama manlongo ma zitsangu zimboti, 20 zio yididi wukangama mu ziphanga mu kuba mvuala, ayi muingi yiyolukila matedi ziawu mu kibakala, dedi bo bufueti bela.

21 Tikiku khomba yi luzolo ayi kisadi kikuikama mu Mfumu, wunkuiza lukamba mambu moso minu yidi mu kuviokila, muingi benu luzaba mawu. 22 Diawu mu kibila akiokio, yikumfila kuidi benu, muingi luzaba buidi tuididi, ayi muingi nandi kabomba mintima minu.

23 Zikhomba, bika lubaka ndembama ayi luzolo lu kiminu lunkuizilanga kuidi Tata Nzambi, ayi kuidi Mfumu Yesu Klistu. 24 Bika mamboti malutidi maba kuidi benu boso lunzolanga Mfumu Yesu Klistu, mu luzolo lukhambu sukanga.