NKANDA KUIDI BASI KOLOSAI

1 Minu Polo, apostolo yi Yesu Klistu mu luzolo lu Nzambi, va kimueka na khomb’itu Timoti, 2 tumfila nkanda awuwu kuidi banlongo ayi zikhomba zikuikama mu kithuadi na Klistu badi ku Kolosai:

Bika mamboti malutidi ayi ndembama yi Tat’itu Nzambi, yiba yinu.

3 Bo tulunatanga mu minsambu, tumvutulanga matondo kuidi Tata yi Mfumu’itu Yesu Klistu. 4 Kibila tunkuwanga matedi kiminu kinu mu Yesu Klistu, ayi luzolo benu lummonisanga kuidi banlongo boso, 5 mu kibila ki mfutu luala tambula ku diyilu. Benu luyuwa matedi mfutu awowo, mu nzila kiedika ki zitsangu zimboti, 6 zio lutambula. Diawu, dedi bo zitsangu zimboti zidi mu kuvanina mimbutu ayi zidi mu kubuelimina mu nza yoso, mawu mvandi madi mu kumonika mu benu, tona mu kilumbu luyuwa ayi luzaba mu phila yisulama kiedika ki mamboti malutidi ma Nzambi. 7 Amomo, mawu benu lulonguka kuidi khomb’itu Epafala, widi kisadi kikuikama ki Klistu ayi wunsadilanga va mving’itu. 8 Nandi mvandi wu tuzabikisidi matedi luzolo muidi mu mambu ma Nzambi.

9 Diawu, tona kilumbu tuyuwa mawu, befu tumu natanga mu minsambu ayi tundindanga muingi luba nzailu yiwombo yikiedika matedi luzolo luandi, mu nduenga yoso ayi phisulu yi kiphevi, 10 muingi ludiatila mu phila yifuana va mesu ma Yave, ayi muingi kunkuangidika mu mambu moso mu thangu luntatamana kuvana mimbutu mu mavanga moso mamboti, ayi muingi lubuela nzailu yikiedika mu matedi Nzambi. 11 Mvandi, tundindanga kuidi Nzambi kasadila mangolo ma nkembu’andi, ayi kaluvana mangolo malutidi muingi lubaka bu kukindimina mu mvibudulu ayi mu mayangi. 12 Muingi lutatamana kutonda Tata, no wulusadisa kuba bafuana muingi lutambula kiuka ki kiezila va kimueka na banlongo.

13 Nandi wutukula mu lulendu lu kitombi, ayi wutunata mu Kintinu ki Muan’andi wu luzolo. 14 Mu nzila khudulu’andi, muawu tubakila kiphuanza ayi nlemvu wu masumu mitu. 15 Nandi widi kifuani ki Nzambi wukhambu monikanga, ayi widi kivangu kitheti mu bivangu bioso. 16 Kibila biuma bioso bidi ku diyilu ayi va ntoto, bivangulu mu kibila kiandi, biuma tummonanga ayi tukhambu monanga, kuba kuandi bikundu bi kimfumu, luyalu, minyadi voti batu badi kimfumu. Biuma bioso binkaka bivangulu mu kibila kiandi ayi bidi biandi. 17 Mvandi, nandi wutuama kuzinga ava biuma bioso binkaka bivangu, ayi mu nzil’andi, muawu biuma bioso binkaka bivangulu. 18 Ayi nandi widi ntu wu nyitu, yinsundula kimvuka. Nandi widi thonono yi biuma bioso ayi widi wutheti mu bafua. Mu phila ayoyo, nandi widi wutheti mu biuma bioso. 19 Kibila Nzambi, wuyangalala kutula zikhadulu ziandi zioso mu Klistu. 20 Ayi mu nzil’andi wutuadisa kithuadi ki biuma bioso binkaka kuidi nandi, kuba kuandi bidi ku diyilu ayi va ntoto, mu kutuadisa ndembama mu nzila menga katengula va dikunzi.

21 Bukiedika, benu luabasa zabanga ko Nzambi ayi luba zimbeni ziandi, kibila luaba tsikikanga mayindu mu mambu mambi. 22 Vayi bubu, nandi wuvutula kithuadi luba yandi, mu nzila nyitu yi mutu no wukivana muingi kufua, mu phila ayoyo, luba banlongo va ntual’andi mu khambu mvindu ayi ni fotu. 23 Bukiedika, mawu mankuiza monika to benu kutatamana mu kiminu, kuba basikama mu lusersu ayi bakindama mukhambu zimbisa kivuvu ki zitsangu zimboti luyuwa, zio basamuna kuidi batu boso va ntoto. Ayi mu matedi zitsangu aziozio zimboti, minu Polo, yiyiza ba kisadi.

24 Minu yidi mu kukuangalala mu kibila ki ziphasi yidi mu kuviokila mu kibila kinu, ayi yidi mu kutovuka dedi bo Yesu katovukila. Vayi yifueti manisa ziphasi beni, muingi kutuadisa ndandu mu nyitu Klistu, yinsundula kimvuka. 25 Yiyiza ba kisadi ki kimvuka akiokio, mu kutadila kiyeku Nzambi kaphana, muingi kulutuadisa ndandu mu kusamuna diambu di Nzambi mu kifuza. 26 Mu diambu beni, muidi masuama manlongo mo maba masuama tona thama mu zimbandu zima vioka. Vayi bubu, badi mu kuzabikisa mawu kuidi banlongo bandi. 27 Nzambi wuyangalala kuzabikisa kimvuama kinkembu ki masuama mandi manlongo, kuidi mimvila minkaka. Masuama beni manlongo, madi Klistu no widi yinu kithuadi, mansundula kivuvu ki kuba yandi mu nkembu. 28 Matedi nandi tunsamunanga, tunlubulanga ayi tunlonganga batu boso mu nduenga yoso, muingi kusadisa batu boso badi kithuadi na Klistu, baba bayonzuka mu kiphevi, va ntuala Nzambi. 29 Diawu yinsadilanga mu kifuza mu lusadusu lu mangolo mandi, mo nandi ka kuphananga.

2 Kibila minu yintomba benu luzaba mvita wunneni yinnuananga mu kibila kinu, mu kibila ki batu badi ku Laodiseia, ayi mu kibila ki batu boso bakhambu kunzaba. 2 Makani mami madi: muingi babaka mbombolo, baba kithuadi mu luzolo, ayi babaka kimvuama kioso kinkuizilanga mu kuba lufiatu mu phisulu, muingi kubaka nzailu yikiedika yi masuama manlongo ma Nzambi, mansundula Klistu. 3 Mu nandi muidi musuama kimvuama kioso ki nduenga ayi ki nzailu. 4 Yiku lukambila mambu amomo, muingi ni mutu kabika luvukumuna, mu mambu ma luvunu. 5 Kheti minu yisi ko yinu va kimueka, vayi yidi yinu mu kiphevi. Yinkuangalalanga beni bo lumvangila mambu mu phila yifuana, ayi bo luidi basikama mu kiminu, mu Klistu.

6 Diawu, dedi bo lukikinina mu Mfumu Yesu Klistu, tatamananu kudiata yandi mu kithuadi, 7 dedi bo zinganzi zididi zisikama mu nti, benu mvinu lufueti ba bakindama mu Yesu, ayi lufueti kindama mu kiminu, dedi bo balulongila, mu kuvutulanga matondo.

8 Banu keba keba muingi ni mutu kabika lukitula mimvika mu malongi ma luvunu, ayi maphamba, mankuizilanga mu bikhulu bi batu, mu mambu ma nza, kubika kuandi mu Klistu; 9 kibila zikhadulu zioso zi Nzambi, zidi mu nandi. 10 Ayi mu nzil’andi, benu muidi biabioso. Nandi widi mfumu yi mintinu mioso ayi minyadi. 11 Mu kithuadi ayi nandi, benu mvinu muzengusu nyitu yi kibakala, kubika ti mu mioko mi batu. Vayi muzengusu nyitu yi kibakala mu Klistu, mu kubika nyit’inu yi kinsuni. 12 Kibila baluzika yandi va kimueka mu mbotumunu’andi, mu kithuadi ayi nandi, mvandi ba luvulubusa va kimueka ayi nandi mu nzila kiminu kinu, mu mangolo ma Nzambi, no wumvulubusa mu bafua.

13 Mvandi, kheti benu luba bafua mu kibila ki masumu minu, ayi kheti lusa zengusu ko nyitu yi kibakala mu kinsuni, vayi Nzambi wu luvana luzingu va kimueka ayi nandi. Mu luzolo, nandi wulemvukila zinzimbala zitu zioso, 14 ayi nandi wukubula Minsiku mioso miba misonama mu minkanda, miaba ku tufundisanga. Nandi wukubula minsiku mu kubanda miawu va dikunzi. 15 Nandi wununga mintinu ayi minyadi, ayi wuba fuisa tsoni va nyalu nguba, mu kuba nata buka batu bannata mu buloku.

16 Diawu, kamu bika ni mutu ka mufundisa, mu biuma lundia, munnua, voti mukhambu kemba nkungi, kuba kuandi nkungi wu ngonda yimona, voti matedi kilumbu ki kisabala. 17 Mambu amomo, madi mbonosono yi mambu mala kuiza, vayi Klistu nandi kiedika ki mambu amomo. 18 Banu keba keba muingi ni mutu wumvunikisanga kuyikulula, ayi wumbuongiminanga zimbasi, ka lutula nkaku mu kutambula mfutu. Batu ba phila ayoyo, bantatamananga mu mambu bamona. Bukiedika, mu kuyinangika, bawu bawedi mayindu ma kinsuni, 19 ayi bawu batumukinanga ko ntuadisi,* no wuntuadisanga ndandu mu nyitu yoso, ayi kithuadi mu madikulu.* Nzambi nandi wumvanganga nyitu beni kukonzuka.

20 Benu lufua va kimueka na Klistu, mu kumanga mayindu ma nza. Buabu, kibila mbi lukhidi zingila buka batu badi mayindu ma nza? Ayi kibila mbi lukhidi tumukina zithumu azizi: 21 “Bika kusimba, bika kubonga, ayi bika kubimba,”* 22 biuma binsukanga bo bammana kudia biawu, mu kulandakana malongi ayi zithumu zi batu? 23 Mawu mammonikinanga buka ti madi manduenga, vayi batu bamvanganga mawu, bansolanga phil’awu yi kubuongimina. Bawu bantovulanga zinyitu ziawu, kibila bantomba bankaka batuba ti bawu ba kikululanga, vayi mawu masi ko luvalu, kibila mamanisanga ko ziphuila zi kinsuni

3 Vayi, benu ba luvulubusa va kimueka na Klistu, diawu tatamananu kutomba biuma bi diyilu, ko Yesu kadi wukala va khonzu yi lubakala lu Nzambi. 2 Tatamananu kusikika mayindu mu mambu ma Nzambi, kubika kuandi mu biuma bi nza. 3 Kibila benu lufua ayi luzingu luinu luidi lusueku mu Klistu, mu kithuadi na Nzambi. 4 Mu thangu Klistu no wumvananga luzingu kala monisa mangolo mandi, buna benu mvinu muala monika yandi mu nkembu.

5 Diawu, vondanu binama bioso bi nyitu’inu mu matedi butsuza, mambu ma mvindu, phuila yingolo mu mambu mambi, ziphuila zinkaka zimbi, ayi phuila yi kubaka biuma biwombo, yinsundula mbuongimini yi bitumba. 6 Kibila batu bamvanganga mambu amomo, bamfuemisanga Nzambi. 7 Benu mvinu, luaba vanganga mambu ma phila ayoyo. 8 Vayi bubu, lufueti bika mambu moso amama: nganzi, kudasuka, bifingu, ayi kutubanga mafunza. 9 Bikanu kuyivunasana. Lufueti vula zikhadulu zi kimutu kikhulu, 10 ayi vuatanu kimutu kimona, kio badi mu kukitula kimona mu nzila nzayilu yi kiedika, muingi kiba kidedakana na Mutu wuvanga kiawu. 11 Mu phila ayoyo, vasiedi ko musi ngeleko, musi yuda, mutu wuzengusu nyitu yi kibakala, voti wukhambu zengusu nyitu yi kibakala, nzenza, mutu wukhambu longuka beni, mvika, ni mutu widi kiphuanza. Vayi Klistu, nandi widi biuma bioso ayi widi mu baboso.

12 Diawu, mu kuba batu Nzambi kanzolanga, kasola, ayi banlongo, vuatanu khadulu yi kiadi, mamboti, kuyikulula, kuba nlembami, ayi mvibudulu. 13 Tatamananu kuvibidila ayi kulemvukilanga bankaka mu ntima woso, kheti vadi kibila ki kufuemina mutu wunkaka. Dedi bo Yave kalulemvukila mu ntima woso, benu mvinu lufueti vanga momawu. 14 Vayi, kubotula kuandi mambu moso amomo, lufueti ba luzolo, kibila yawu khadulu yintuadisanga kithuadi.

15 Mvandi, bika ndembama yi Klistu yiba mu mintima minu. Kibila benu ba lutedila muingi luba binama bi nyitu yimueka to. Ayi vutulanganu matondo. 16 Bika malongi ma Klistu, mawala mu mintima minu, ayi mu phila ayoyo benu lunkuiza ba batu ba nduenga. Diawu tatamananu kulonga ayi kukindasana benu na benu, mu kuyola minkunga minzitisa Nzambi, ayi minkunga mi kiphevi. Ayi yodilanu mu ntima woso kuidi Yave. 17 Dioso kua diambu lumvanga, kuba kuandi mu thubulu voti mu mavanga, vangilanu mamoso mu dizina di Mfumu Yesu, ayi vutulanganu matondo kuidi Tata Nzambi, mu nzil’andi.

18 Bakazi, tumukinanu banuni binu, dedi bo minlandikini mi Mfumu bamvangilanga. 19 Banuni, tatamananu kuzola bakazi binu, ayi bikanu kuba vangila mambu mambi. 20 Bana, tumukinanu matata minu mu mambu moso, kibila mawu mankuangidikanga Mfumu. 21 Matata, bikanu kufuemisanga bana binu, muingi bawu babika ba mu kiunda. 22 Bisadi, tumukinanu zimfumu zinu mu mambu moso, kubika to bo luidi va ntuala batu, muingi kukuangidika batu, vayi vangilanu mawu mu ntima woso, muingi kumonisa lukinzu* kuidi Yave. 23 Dioso kua diambu lumvanga, vangilanu diawu mu ntima woso, mu kibila ki Yave, kubika kuandi mu kibila ki batu, 24 kibila benu luzebi ti Yave, nandi wala ku luvana mfutu wu kiuka. Diawu, salanu buka mimvika mi Mfumu, Klistu. 25 Bukiedika, woso mutu wumvanga diambu dimbi, wala tambula mfutu mu diambu dimbi kavanga, kibila Nzambi kasi ko luvasanu.

4 Benu zimfumu zi bisadi, kebilanu bisadi binu mu phila yimboti ayi yisonga, mu kuzaba ti benu mvinu luidi Mfumu ku diyilu.

2 Tatamananu kuvanganga minsambu ayi vutulanganu matondo. 3 Mvandi, lutunatanganu mu minsambu muingi Nzambi ka tuvana luaku lu kusamuna diambu diandi, ayi lu kuzabikisa masuama manlongo matedi Klistu, mo minu yididi wukangama mu ziphanga, 4 ayi muingi yibaka kiphuanza ki kusamuna mawu mu phila yifuana.

5 Tatamananu kuzingila mu nduenga na batu bakhambulu baklistu, ayi sadilanu buboti thangu’inu. 6 Dedi bo tsalu yimvangilanga bidia kuba lueki, bika mambu lunkoluka maba mamboti, muingi lununga kuvana mvutu kuidi woso kua mutu mu phila yimboti.

7 Tikiku khomb’ama yi luzolo, kisadi kikuikama ayi wunsalanga yami mu Mfumu, wunkuiza luzabikisa zitsangu zioso matedi minu. 8 Minu yidi mu kumfila kuidi benu, muingi luzaba buidi befu tuididi ayi kabomba mintima minu. 9 Nandi widi mu kukuiza va kimueka na Onezimu, khomb’ami yi luzolo ayi wukuikama, no waba kalanga yinu akoko. Bawu bankuiza luzabikisa mambu moso tuidi mu kuviokila akuku.

10 Alistalaku widi yami mu buloku wuku lufila zimboti, Malaku khomba* Balinabasi mvandi wuku lufila zimboti (matedi Malaku benu lutambula zithuadusulu muingi lunyamba buboti, bo kala kuiza lutala). 11 Yesu no bantedilanga mvandi Yustu, wuku lufila zimboti. Mu basi yuda boso badi ku Loma, babakala abobo, bawu to bansalanga yama mu kisalu ki Kintinu ki Nzambi, ayi bawu badi tho yimbombolo ayi khindusulu kuidi minu. 12 Epafala, no waba kalanga yinu akoko, kisadi ki Yesu Klistu, wuku lufila zimboti. Nandi wuntatamananga kulunata mu minsambu muingi luba bakindama, ayi luba lufiatu mu mamoso Nzambi kala vanga. 13 Minu yinta kimbangi ti nandi wu kukivananga mu kisalu mu kibila kinu, ayi mu kibila ki zikhomba badi ku Laodiseia ayi Hirapoli.

14 Luka, mfelimi wu luzolo va kimueka na Dema, baku lufila zimboti. 15 Vananu zimboti ziama kuidi zikhomba ku Laodiseia, kuidi khomb’itu yi nkietu Nifa, ayi kuidi zikhomba badi mu kimvuka kinkutakananga ku nzo’andi. 16 Bo lunkuiza mana kutanga nkanda awowo, filanu wawu kuidi kimvuka kidi ku Laodiseia, muingi bawu mvawu batanga wawu. Bosi wuba dindanu muingi baluvana nkanda wo yifila kuna, muingi benu mvinu lutanga wawu. 17 Mvandi, kindisanu Alikipu: “Muingi kavanga mangolo ma kudukisa kiyeku katambula mu Mfumu.”

18 Ayiyi yawu mboti’ama minu Polo yisonika. Tatamananu kutebukila moyo ziphanga zio bakhanga. Bika mamboti malutidi ma Nzambi maba yinu.