NKANDA WUTHETI KUIDI BASI TESALONIKA

1 Minu Polo, Silivanu ayi Timoti, tumfila nkanda awuwu kuidi kimvuka kio kidi ku Tesalonika, kidi kithuadi na Tata Nzambi ayi Mfumu Yesu Klistu:

Bika mamboti malutidi ayi ndembama yi Nzambi biba yinu.

2 Tuntondanga beni kuidi Nzambi bo tulunatanga mu minsambu. 3 Befu tuntatamananga kutebuka moyo va ntuala Tat’itu Nzambi, mu kisalu kinu kikuikama, mangolo lummonisanga mu luzolo, ayi phila lunkindiminanga mu kivuvu luidi, mu Mfum’itu Yesu Klistu. 4 Nzambi wu luzolanga zikhomba ayi tuzebi ti, naveka wulusola, 5 kibila benu luyuwa zitsangu zimboti, kubika to mu thubulu, vayi mu lusalusu lu phevi yinlongo, ayi mu lufiatu loso. Benu luzebi buboti phila tuyivanina va khat’inu, muingi ku lutuadisa ndandu. 6 Benu lulandakana kifuani kitu ayi ki Mfumu, kibila lukikinina diambu di Nzambi mu mayangi mankuizilanga mu phevi yinlongo, kheti mu ziphasi ziwombo luviokila. 7 Mu phila ayoyo, benu luyiza ba kifuani kimboti kuidi baklistu boso badi ku Masedoni ayi ku Akaia.

8 Bukiedika, mu kibila kinu, diambu di Yave didi mu kusamunu kubika to ku Masedoni ayi ku Akaia, vayi mu bibuangu binkaka, batu badi mu kukuwa matedi kiminu kinu mu Nzambi, diawu vasi bue tombulu ko befu kutuba ni diambu matedi kiminu kinu. 9 Kibila baveka badi mu kuta kimbangi matedi khumbu yitheti tuyoluka yinu, buidi lukikinina mu Nzambi ayi phila lubikila mbuongimini yi bitumba, muingi kuba bisadi bi Nzambi yi monyo ayi yi kiedika, 10 ayi benu luidi mu kuvingila Muan’andi Yesu, no kavulubusa mu bafua, no wala kutuvukisa mu nganzi yi Nzambi bo kala fumina ku diyilu.

2 Bukiedika zikhomba, benu luzebi buboti ti lubaka beni ndandu mu thangu tuyiza lutala. 2 Kibila kheti bo tuviokila mu ziphasi ayi bo ba tuvangila mambu mambi ku Filipi dedi bo luzabidi, vayi mu kibakala ayi mu lusadusu lu Nzamb’itu, befu tununga ku musamuna zitsangu zimboti zi Nzambi. 3 Kibila mambu tumu kamba masa kuizila ko mu mayindu mambi, ma mvindu ayi ma luvunu. 4 Vayi mu kuba ti Nzambi nandi wu tusola ayi wu tuvana kiyeku ki kusamuna zitsangu zimboti, diawu tunsamuninanga, kubika ti muingi kukuangidika batu, vayi muingi kukuangidika Nzambi, no wumfionguninanga mintima.

5 Benu luzebi buboti ti tusa sadila ko mambu mambi voti ma luvunu, muingi kuvokuna biuma bi batu. Ayi Nzambi kalenda ta kimbangi mu mawu! 6 Mvandi, tusa vanga ko ni diambu muingi tutambula nkembu kuidi benu voti kuidi bankaka, kheti tuidi nsua wu kuludinda biuma binu muingi kudukisa zitsatu zitu, mu kuba bapostolo ba Klistu. 7 Vayi, befu tuyiza ba batu bamboti va khat’inu, dedi bo ngudi kankuemikinanga ayi kankiebilanga bana bandi. 8 Diawu, mu kibila ki luzolo luwombo tuidi mu benu, befu tubaka makani kubika to ma kulusamuna zitsangu zimboti zi Nzambi, vayi mvandi ma kuyivana muingi kulusadisa, kibila tumu zolanga beni.

9 Benu luntebuka moyo mangolo ayi kisalu kioso tuvanga. Befu tuaba salanga builu ayi muinya muingi tubika ba kizitu kuidi benu matedi zitsatu zitu, bo tuaba kulusamuna zitsangu zimboti zi Nzambi. 10 Benu luidi zimbangi ayi Nzambi mvandi widi mbangi matedi buidi befu tumonisina lukuikumunu, busonga ayi kukhambu fotu va khat’inu, benu minlandikini mi Klistu. 11 Benu luzebi buboti ti tuaba kumu lubulanga, kuluvana mbombolo ayi malongi, dedi bo tata kamvangilanga kuidi bana bandi. 12 Tuvangila mawu, muingi lutatamana kudiatila mu phila yinkuangidika Nzambi, no wulutela mu Kintinu kiandi muingi lutambula nkembu.

13 Bukiedika, diawu tumvutudilanga matondo kuidi Nzambi, kibila bo lutambula diambu di Nzambi dio befu tumusamuna, lusa kikinina ko diawu banga malongi ma batu, vayi benu lukikinina diawu, banga diambu di Nzambi, dio didi kumu sadisa, benu minlandikini mi Klistu. 14 Kibila benu zikhomba, luidi mu kulandakana kifuani ki zikhomba badi mu bimvuka bi Nzambi bidi ku Yuda, badi kithuadi na Yesu Klistu, kibila benu luidi mu kuviokila mu ziphasi, kuidi basi mvil’inu, dedi bo zikhomba ku Yuda badi mu kutovukila mu kibila ki basi yuda. 15 Bawu bavonda Mfumu Yesu, mimbikudi ayi mvandi ba tutuadisa ziphasi ziwombo. Kubotula kuandi amomo, bawu mvawu bavanganga ko luzolo lu Nzambi ayi bavuanga ko nkinza mambu mantuadisanga ndandu kuidi batu boso, 16 kibila bawu ba tutulanga nkaku kusamuna batu ba mimvila minkaka muingi bawu mvawu bavuka. Mu phila ayoyo, bawu bantatamananga kubuela kitesu ki masumu mawu. Vayi nganzi yi Nzambi yambelama kuba kuizila.

17 Zikhomba, bo tulutatuka mua nkadu mu kimutu, kubika kuandi mu ntima, tuba beni phuila yi kubue lumona mu kimutu, diawu tuvangila mangolo muingi kuiza lutala. 18 Bukiedika, minu Polo yaba tomba kuvanga mawu, kubika ti khumbu yimueka, vayi khumbu wadi, vayi Satana wutula nkaku mu mawu. 19 Buabu, banani badi kivuvu kitu, mayangi mitu voti kolowa yi kuyinyemisina va ntuala Mfumu Yesu, bo kala kuiza? Muisi ko benu? 20 Bukiedika, benu luidi nkembu’itu ayi mayangi mitu.

3 Befu tuba beni mu phuila yi kuzaba matedi benu, diawu tusiadila ku Atena, 2 ayi tufila khomb’itu Timoti widi kisadi ki Nzambi ayi wunsamunanga yitu zitsangu zimboti matedi Klistu. Befu tumfidila muingi kalubomba ayi kakindisa kiminu kinu, 3 muingi ni mutu kabika kuvonga mu kibila ki zikhuamusu luidi mu kuviokila, kibila benu luzebi ti befu tuisi ko bu kutinina mambu amomo maphasi. 4 Bo befu tuba yinu va kimueka, tululubula ti tuala viokila mu zikhuamusu ayi mawu madi mu kumonika. 5 Bo yimona ti yisinkuiza nunga ko, diawu yifidila Timoti, muingi yibaka bu kuzabila matedi lukuikumunu luinu, kibila minu yaba kuazuka boti Satana widi mu kuvanga mamoso muingi kuluvongisa, ayi muingi kisalu kitu kibika ba kiphamba.

6 Vayi Timoti mavitila kuku ayi be tutuadila zitsangu zimboti matedi lukuikumunu ayi luzolo luinu, mvandi betuba buidi benu luntatimininanga ku tutebukila moyo, ayi phuila yingolo luidi yi kubue tumona, dedi bo befu mvitu tuididi phuila yi kubue lumona. 7 Diawu zikhomba, kheti mu mambu makiunda ayi maphasi tuidi mu kuviokila, vayi tuma baka mbombolo mu kibila ki lukuikumunu benu luidi mu kumonisa. 8 Kibila benu kutatamana bakindama mu Mfumu, befu mvitu tunkuiza ba mu mayangi. 9 Tusa zaba ko mbi tulenda vanga muingi kutonda Nzambi, mu kibila ki mayangi mawombo benu lu tutuadisanga. 10 Builu ayi muinya befu tuntatamananga kuvanga minsambu, muingi tubaka luaku lu kubue lumona mu kimutu, ayi kubuela mambu mankambu, muingi kukindisa kiminu kinu.

11 Bika Tat’itu Nzambi ayi Mfumu’itu Yesu Klistu, bazibula nzila muingi tuiza lutala. 12 Bika Mfumu ka lukindisa muingi lumonisa luzolo benu na benu, ayi luzola batu boso dedi bo befu tu kuluzodilanga beni. 13 Nandi wala kindisa mintima minu ayi wala luvanga lubika ba fotu, vayi luba banlongo va ntual’andi mu thangu Mfumu’itu Yesu Klistu, kala kuiza na banlongo bandi.

4 Bukiedika zikhomba, benu muidi mu kuvanga mambu tumu vanina zithuadusulu, matedi buidi lufueti diatila muingi kukuangidika Nzambi. Diawu, tumudinda mu Mfumu Yesu Klistu, muingi lutatamana kuvanga mawu. 2 Kibila benu luzebi zithuadusulu tumuvana, zifumina kuidi Mfumu Yesu.

3 Kibila amama, mawu Nzambi kantomba: banu banlongo ayi tatukanu mambu ma butsuza. 4 Bika kadika mutu mu benu kanunga kuyala nyitu’andi, mu kuyivedisa ayi kuyizitisa, 5 mu kubika ba phuila yingolo yi kubundana nyitu, dedi bo batu bakhambu zaba Nzambi badidi. 6 Ni mutu kabika vangila wadi yandi diambu dimbi, voti kumvuna mu mambu amomo, kibila Yave wala fundisa batu boso bamvanganga mambu amomo, dedi bo tulukambila ayi tululubudila. 7 Kibila Nzambi ka tutedila, kubika ti muingi tuvanga mambu mamvindu, vayi muingi tuvanga mambu madiodila. 8 Diawu, woso mutu wukhambu vua nkinza mambu amomo, kasimbayisa ko batu, vayi widi mu kubayisa Nzambi, no wu luvananga phevi yinlongo.

9 Vayi mu matedi kumonisa luzolo lu kikhomba, vasintombulu ko kubue lusonikina, kibila Nzambi widi mu kululonga muingi muzolasana benu na benu. 10 Bukiedika, mawu benu muidi mu kuvangila kuidi zikhomba zioso badi ku Masedoni. Vayi zikhomba, tuku mudinda muingi lutatamana kuvanga mawu. 11 Makani minu mafueti ba, kuzingila mu ndembama, ayi bikanu kukota mu mambu ma batu bankaka, vayi tadilanu matedi bisalu binu veka, dedi bo tumu longila, 12 muingi batu bakhambulu baklistu, bamona ti benu muidi mu kuzingila mu phila yimboti, ayi ti muisinkhambu ko ni kiuma.

13 Kubotula kuandi mambu amomo zikhomba, befu tuntomba muingi luzaba buboti kiedika kitedi batu bafua, muingi lubika ba beni mu kiunda, dedi bo batu bakhambulu kivuvu bambelanga. 14 Boti tuidi kiminu ti Yesu wufua ayi Nzambi wumvulubusa, buna mvandi tuidi kiminu ti Nzambi wala vulubusa batu boso bafua mu kithuadi na Yesu. 15 Kibila befu tumu zabikisanga mambu amama, mu kutadila luzolo lu Yave: befu tuala tatamana bamonyo nati mu thangu Yesu kala monika, tualasa ba ko batu batheti bala kuenda ku diyilu, kena bo badi mu kulala mu lufua. 16 Kibila Yesu wala kuluka ku diyilu ayi mbembu yi nkulutu wu zimbasi yala kuwakana. Mvandi tulumbeta yi Nzambi yala siku, bosi batu bafua mu kithuadi na Yesu Klistu, bawu theti bala vulubuka. 17 Bosi, befu tuala tatamana bamonyo, bala kutunata va kimueka na bawu mu matuti, muingi tuedengana Mfumu Yesu. Ayi mu phila ayoyo, tuala tatamana kubanga va kimueka na Mfumu Yesu. 18 Diawu, luyivanasananga mbombolo benu na benu mu mambu amomo.

5 Buabu zikhomba, mu matedi bilumbu ayi zithangu Nzambi kasola, vasintombulu ko kubue lusonikina ni diambu. 2 Kibila benu luzebi buboti ti kilumbu ki Yave, kiala kuizila dedi bo bunkuizilanga muivi va builu. 3 Mu thangu batu bala tuba: “Ndembama ayi nsika!” Buna mu kinzimbukulu mbungulu yala kuba kuizila dedi bo mianga mi kubuta minkuizilanga kuidi nkietu widi buemba, ayi bawu balasa vuka ko. 4 Vayi benu zikhomba luisi ko ku kitombi, muingi kilumbu beni kiluyizila dedi bo kiezila kinkuizilanga kuidi muivi. 5 Kibila benu luidi buka batu bandiatila ku kiezila ayi bandiatila va muinya. Befu tuisi ko batu bandiatilanga ku kitombi ni va builu.

6 Diawu, tubika lala tolo dedi bo bankaka banladilanga, vayi tuba bakotuka mu kusadila diela ditu. 7 Kibila batu banlalanga, banlalanga va builu ayi batu bankoluanga, bankoluanga va builu. 8 Vayi befu tundiatilanga va muinya, tufueti sadila diela ditu mu kuvuata kikhutu ki kisengu ki kiminu, ki luzolo ayi kuvuata phu yi kisengu, yinsundula kivuvu ki phulusu. 9 Kibila Nzambi wutusola, bakana ko muingi ku tumonisa nganzi’andi, vayi muingi tuvuka mu nzila Mfumu’itu Yesu Klistu. 10 Yesu wufuila mu kibila kitu muingi tuzinga yandi va kimueka, kheti tuidi bakotuka voti tuidi balala mu lufua. 11 Diawu, tatamananu kukindasana ayi kubombasana benu na benu, dedi bo luidi mu kuvangila.

12 Tuku mukindisa zikhomba, muingi lukinzika batu bansalanga beni va khat’inu, ba lutuadisanga mu Mfumu ayi ba luvananga malongi. 13 Lufueti luta kuba kinzika ayi kuba monisa luzolo, mu kibila ki kisalu bamvanganga. Ayi lufueti zingila mu ndembama benu na benu. 14 Kubotula kuandi mambu amomo, tuku mukindisa mvandi muingi lusemba bankua divunzi, bombanu badi mu kiunda, kindisanu bo badi bavonga, ayi monisanu mvibudulu kuidi batu boso. 15 Lufueti ba keba keba, muingi lubika vutudila mambi mu mambi, vayi lufueti tatamana kumonisa mamboti benu na benu, ayi kuidi batu boso.

16 Tatamananu kuba mu mayangi. 17 Tatamananu kuvanganga minsambu. 18 Vutulanganu matondo mu mambu moso. Amomo mawu Nzambi kantomba mu benu, mu nzila Yesu Klistu. 19 Bikanu kutula nkaku mambu phevi kalenda vanga mu benu.* 20 Bikanu kulenza mambu madi mu zimbikudulu. 21 Fionguninanu boti mambu moso madi makiedika. Vayi simbidilanu mambu mamboti. 22 Tatukanu mambu moso mambi.

23 Bika Nzambi yi ndembama kaluvedisa mu ziphila zioso. Mvandi bika zikhadulu zinu zimboti, ayi nyitu’inu, biba binlongo ayi bidiodila mu ziphila zioso, nati Mfumu’itu Yesu Klistu kala monika. 24 Kibila mutu wulusola widi wukuikama, ayi nandi wala vanga mambu amomo.

25 Zikhomba, tatamananu kutunatanga mu minsambu.

26 Vananu zimboti kuidi zikhomba zioso, mu kuba vana besu yinlongo.

27 Minu yiku lulomba mu Mfumu, luvanga mamoso lulenda nunga, muingi zikhomba zioso bayuwa mambu madi mu nkanda awuwu.

28 Bika mamboti malutidi ma Mfumu’itu Yesu Klistu, maba yinu.