NKANDA WUMMUADI KUIDI BASI TESALONIKA
1 Minu Polo, Silivanu ayi Timoti, tumfila nkanda awuwu kuidi kimvuka kidi ku Tesalonika, kidi kithuadi na Tat’itu Nzambi ayi Mfumu Yesu Klistu:
2 Bika mamboti malutidi ayi ndembama yi Nzambi, ayi yi Mfumu Yesu Klistu biba yinu.
3 Zikhomba, befu tuidi mu lukuiku lu kutondanga kuidi Nzambi mu kibila kinu, ayi mawu tufueti vanga, kibila kiminu kinu ayi luzolo luidi mu benu na benu, bidi mu kukonzuka beni. 4 Diawu tunkolukilanga mu lufiatu matedi benu mu bimvuka bi Nzambi, mu kibila ki kukindama ayi kiminu lummonisa mu zikhuamusu, ayi mu mambu maphasi luidi mu kuviokila. 5 Mawu madi bivisa ti zimfundusu zi Nzambi zidi zisonga, ayi mu kibila akiokio, benu lueka bafuana muingi kutambula Kintinu ki Nzambi. Ayi kiawu kibila luidi mu kuviokila mu ziphasi.
6 Kibila didi diambu disonga va mesu ma Nzambi, naveka kuvutudila mambi kuidi batu ba kulutuadisanga ziphasi. 7 Vayi benu luidi mu kuviokila mu zikhuamusu aziozio, luala tambula luvovomu va kimueka na befu, mu thangu Mfumu Yesu ayi zimbasi ziandi bala fumina ku diyilu, 8 ayi bala kuizila va khati mbazu, muingi kuvutudila mambi kuidi batu bakhambu zaba Nzambi, ayi kuidi bo bakhambu tumukinanga zitsangu zimboti matedi Mfumu’itu Yesu. 9 Batu abobo bala tambula lufundusu lu mbungulu yi mvu ka mvu, ayi bala zimbala vantuala Mfumu Yesu. 10 Mawu mala monika bo kala kuiza muingi kutambula nkembu kuidi banlongo bandi. Ayi mu kilumbu beni, baboso ba kunlekilanga kiminu bala kuituka, kibila benu lukikinina kimbangi tumuvana mu kiminu.
11 Diawu tumu natinanga mu minsambu ayi tundindanga kuidi Nzambi, muingi luba batu bafuana bo nandi katela, ayi mu mangolo mandi kamanisa kisalu kioso kimboti nandi kantomba benu luvanga. Ayi muingi lununga kudukisa kisalu kinu ki kiminu, 12 muingi dizina di Mfumu’itu Yesu dizitusu kuidi benu, ayi muingi benu luba yandi kithuadi mu kutadila mamboti malutidi ma Nzamb’itu, ayi ma Mfumu Yesu Klistu.
2 Vayi zikhomba, mu matedi ndizulu yi Mfumu Yesu Klistu, ayi mu matedi kuba yandi va kimueka, tuku mudinda 2 muingi lubika vunuka ni kususuka mu yoso kua tsangu, kuba kuandi yo yimmonikina buka ti yibe fumina kuidi Nzambi, voti yo yidi mu nkanda wummonikina buka ti befu tube fila wawu, yintuba ti kilumbu ki Yave kima tuka.
3 Ni mutu kabika ku luvukumuna, kibila kilumbu akiokio, kialasa kuiza ko, ava baklistu ba luvunu ayi mutu wunlevulanga minsiku, wunsundula muana wu mbungulu, bamonika. 4 Nandi widi mbeni ayi wunluta kukinangikanga kena woso mutu bantedilanga nzambi, voti bioso biuma bambuongiminanga, ayi mu phila ayoyo, nandi wunkalanga ku tempelu yi Nzambi, ayi wuyikitulanga nzambi. 5 Tebukanu moyo ti bo minu yiba yinu va kimueka, yaba ku lukambanga mambu amomo.
6 Buabu, benu luma zaba ti kisalu ki mutu wunlevulanga minsiku, kima tona, ayi nandi wala luta ba wuzabakana mu thangu yifuana. 7 Bukiedika, masuama amomo ma mutu wunlevula minsiku, madi mu kusalama, vayi mawu mala tatamana masuama, nati mu thangu mutu widi mu kulevula minsiku, kalasa bue monika ko. 8 Bosi, mutu no wunlevulanga minsiku, wala ba beni wuzabakana, no Yesu Klistu kala tulula mu mangolo ma mambu mala basikila mu munu’andi. Ayi mu thangu Yesu kala monika, nandi wala tulula mutu beni. 9 Vayi, mutu beni wunlevulanga minsiku, kadi mu kuvangila mawu, mu kibila ki lusalusu lu Satana, mu kusadila mangolo mandi, bidimbu ayi mangitukulu ma luvunu, 10 ayi mu kusadila ntindu woso wu luvunu, lunkuizilanga mu mambu moso makhambulu masonga, kuidi bo bala tambula mfutu wu mbungulu, kibila bamanga kuzola kiedika muingi bavuka. 11 Diawu Nzambi kambikilanga muingi bavukumuka, ayi bakikinina malongi ma luvunu, 12 muingi baboso batambula lufundusu, kibila basa kikinina ko kiedika, vayi bakikinina mu mambu makhambulu masonga.
13 Vayi, befu tuidi mu lukuiku lu kutondanga Nzambi mu kibila kinu. Zikhomba, Yave wu kuluzolanga, kibila tona vana thonono, nandi wulusola muingi luvuka mu kuluvedisa mu phevi’andi yinlongo, mu kibila ki kiminu kinu mu kiedika. 14 Mu phila ayoyo, nandi wulutela mu nzila zitsangu zimboti, zio tumu samuna muingi lubaka nkembu wu Mfumu’itu Yesu Klistu. 15 Diawu zikhomba, tatamananu bakindama ayi simbidilanu malongi mo tumu longa, kuba kuandi mo tulu kamba, voti mo tulusonikina mu minkanda. 16 Kubotula kuandi amomo, bika Mfumu’itu Yesu Klistu, ayi Tat’itu Nzambi no wutuzola, wutuvana mbombolo yi mvu ka mvu, ayi wutuvana kivuvu kimboti, mu nzila mamboti mandi malutidi, 17 balukindisa, muingi lutatamana kuvanga ayi kutubanga mambu mamboti.
3 Buabu zikhomba, tatamananu ku tunatanga mu minsambu muingi diambu di Yave ditatamana kutembakana mu thinu ayi dizitusu, dedi bo buidi mu kumonikina va khat’inu, 2 ayi muingi Nzambi katuvukisa kuidi batu badi mavanga mambi ayi ba tutuadisanga ziphasi, kibila bakana ko batu boso badi kiminu. 3 Vayi Mfumu widi wukuikama, nandi wala kulukindisa ayi wala kulukieba kuidi Nkua Mambi. 4 Mvandi mu matedi benu, tuidi lufiatu mu Mfumu ti, luidi mu kulandakana ayi muala tatamana kulandakana zithuadusulu tumuvana. 5 Bika Mfumu katatamana kutuadisa mintima minu, muingi luzola Nzambi ayi lukindama mu Klistu.
6 Zikhomba, tumu vana zithuadusulu mu dizina di Mfumu’itu Yesu Klistu, tatukanu woso khomba, widi ntu ngolo ayi wukhambu landakananga malongi mo befu tumulonga. 7 Kibila bo tuba va khat’inu, befu tuabasa diatilanga ko mu phila yikhambu fuana. Diawu landakananu kifuani kitu. 8 Befu tusa dia ko biuma binu mu phamba, vayi tusala beni builu ayi muinya, muingi tubika ba kizitu kuidi benu mu matedi zitsatu zitu. 9 Masinsundula ko ti benu lulendi kutukabila ko ni kiuma, vayi tuvanga mamoso muingi kulubikila kifuani kio lulenda landakana. 10 Bukiedika, bo tuba yinu koko, tuluvana thuadusulu ayiyi: “Boti mutu kasintomba ko kusala, buna mvandi kalendi dia ko.” 11 Kibila tuyuwizi ti vadi batu mu benu badi mu kudiatila mu phila yikhambu fuana, bawu basintomba ko kusala ayi bankotanga mu mambu mangana. 12 Mu matedi batu abobo, befu tumvana zithuadusulu ayi khindusulu mu Mfumu Yesu Klistu ti, vantombulu bawu kusala muingi babaka bi kudia.
13 Zikhomba, benu lufueti tatamana kuvanga mambu mamboti. 14 Vayi boti vadi mutu wummanga kutumukina mambu tuidi mu kulukamba mu nkanda awuwu, banu keba keba mu nandi ayi bikanu kubue ba yandi kithuadi, muingi kafua tsoni. 15 Kheti bobo, bikanu kuntadila banga mbeni, vayi tatamananu kumvana malongi ayi lufueti kuntadila banga khomba.
16 Bika Mfumu yi ndembama katatamana kuluvana ndembama mu ziphila zioso. Bika Mfumu kaba yinu.
17 Azizi, ziawu zimboti ziama minu Polo, zio minu veka yisonika. Akiki kiawu kidimbu yintulanga mu minkanda mioso mio minu yinsonikanga.
18 Bika mamboti malutidi ma Mfumu’itu Yesu Klistu, maba yinu.