NKANDA KUIDI TITU

1 Minu Polo kisadi ki Nzambi ayi mvuala wu Yesu Klistu, mu kutadila kiminu ki batu bo Nzambi kasola ayi mvandi mu kutadila nzailu yikiedika yidi yidedakana na kuba wukangama mu kubuongimina to Nzambi 2 ayi mambu amomo, matedi kivuvu ki luzingu lu mvu ka mvu lo Nzambi yikhambu vunanga kakanikisa tona thama. 3 Vayi mu thangu’andi yifuana, nandi wuzabikisa diambu diandi mu nzila kisalu ki kusamuna kaphana, dedi bo Nzambi mvukis’itu katumina. 4 Kuidi ngiewu Titu, muana wu luzolo mu kithuadi na kiminu tuidi:

Bika ndembama ayi mamboti malutidi ma Tat’itu Nzambi, ayi ma mvukis’itu Yesu Klistu, maba yaku.

5 Minu yi kubika ku Krete, muingi kuludika mambu maba tombulu ayi kusola zikhomba badi bafuana muingi kuba bakulutu ba kimvuka mu kadika divula, mu kulandakana zithuadusulu azizi yi kuvana: 6 Muingi kuba nkulutu wu kimvuka, khomba kafueti ba mutu bakhambu zabila mu kuvanga mambu mambi, kafueti ba nkazi wumueka to, bana bandi bafueti ba bakuikama ayi bakhambu zabakana mu mavanga mambi ayi ntu ngolo. 7 Kibila mu kuba mutu Nzambi kabieka, nkulutu wu kimvuka, kafueti ba mutu wukhambulu tsembulu, lungundayi, wukhambu fika fuemanga, wukhambulu kikolu ki malavu,* wukhambulu buphunya ayi wukhambu bakilanga biuma mu luvunu.* 8 Vayi kafueti ba, mutu wunyambanga bankaka, wunzolanga mamboti, widi nduenga,* wusonga, wukuikama, zebi kukiyala, 9 kafueti ba wukuikama mu diambu di Nzambi mu matedi phil’andi yi kulongila, muingi kakindisa bankaka mu malongi mamboti ayi kusemba batu bamfindanga ziphaka.*

10 Kibila, veka batu bawombo badi ntu ngolo, bankolukanga phamba ayi bankua luvunu. Vayi bulutidi bo bantatamana kukuika bankaka kuzengisa nyitu yi kibakala. 11 Vantombulu kuba zibika miunu, kibila batu abobo bantatamana kutulula makanda mu kulonga mambu makhambu fuana, muingi babaka ndandu. 12 Wumueka mu mimbikudi miawu wutuba: “Basi Krete, badi bankua luvunu, badi buka bibulu bi nganzi ayi bandianga beni,* vayi batianga ko kusala.”

13 Mambu amomo madi makiedika. Diawu tatamana kuba vana tsembulu yingolo, muingi batatamana bakindama mu kiminu 14 ayi babika teka matu mu binongo bi luvunu bi basi Yuda ayi malongi ma batu batatuka kiedika. 15 Kuidi batu badiodila, biuma bioso bidi bidiodila, vayi kuidi batu bakhambulu badiodila ayi bakhambulu kiminu, vasi ko kiuma kidiodila, kibila mayindu mawu ayi kilunzi kiawu, bidi mvindu. 16 Bawu bantubanga va nyalu nguba ti bazebi Nzambi, vayi bamonisanga ko mawu mu mavanga, ayi basi ko bafuana muingi kuvanga ni diambu dimueka dimboti.

2 Vayi ngiewu, tatamana kulonga mambu madi madedakana na malongi mantuadisanga ndandu. 2 Zikhomba zi babakala zima nuna, bafueti zaba kukiyala, kuba batu balufiatu, ba nduenga, bafueti kindama mu kiminu, mu luzolo ayi bafueti ba bakuikama. 3 Bobuawu mvandi, zikhomba zi bakietu zima nuna, bafueti ba zikhadulu zimboti, babika tubilanga bankaka bubi, babika ba mimvika mi malavu, bafueti ba minlongisi mi mambu mamboti, 4 muingi babaka bu kukindisila bakietu bakhidi bikhupa* bazola banuni, bazola bana bawu, 5 baba nduenga, badiodila, babika ba bolo* bu kuvanga bisalu bi nzo, bamonisa mamboti, batumukinanga banuni mu kuyikulula, muingi batu babika tubila bubi diambu di Nzambi.

6 Bobuawu mvandi, tatamana kukindisa babakala bakhidi matoko bamonisa nduenga. 7 Ayi wufueti ba ntungulu wumboti mu mambu moso. Longa mambu mavedila, mukhambu sakana, 8 mu kusadila bikuma bi nduenga bio batu bakhambu baka bu kutubila bubi, muingi zimbeni bamona tsoni ayi babika baka kibila ki kututubila bubi. 9 Bika mimvika batatamana kutumukina zimfumu ziawu mu mambu moso, mu kuvanga mambu ma kuba kuangidika, mukhambu nyunguta, 10 mukhambu ba kuiba, vayi mu kumonisa ti, badi batu ba lufiatu. Muingi mu mamoso, batu bazitisa malongi ma Nzambi, Mvukis’itu.

11 Kibila Nzambi wumonisa mamboti malutidi, mu kutuadisa phulusu kuidi mintindu mioso mi batu. 12 Nandi wutu kubikanga muingi tubika mavanga mambi ayi phuila yi biuma bi nza. Vayi tumonisa mayindu mamboti, busonga ayi kuba bakangama mu Nzambi, kheti mu kuzingila mu nza ayiyi, 13 bo tumvingila kivuvu ki mayangi ayi thangu Nzambi kala monikina mu nkembu’andi va kimueka na Mvukis’itu Yesu Klistu, 14 no wukivana muingi ku tukula mu mambu moso makhambulu nguizani na Minsiku ayi mu kudiodisa batu muingi baba dikabu diandi di luvalu ayi didi kifuza mu mavanga mamboti.

15 Tatamana kulonga mambu amomo, lubula ayi semba mu kibakala kioso. Ayi kawubika ni mutu ka kulenza.

3 Tatamana kuba tebula moyo, muingi batumukina zimfumu zi luyalu ayi baba bakubama mu kumonisa mavanga mamboti. 2 Babika tubila bubi ni mutu, babika ba batu bantianga kunuana, vayi baba batu bakhambu tombanga mambu mavangimina mu phil’awu ayi baba batu balembama kuidi baboso. 3 Kibila befu mvitu kumbusa, tusa ba ko nduenga, tuabasa tumukinanga ko, ba tuvukumuna, tuba mimvika mi zinzinunu ayi minyengu,* tuaba zingilanga mu kuvanga mambu mambi, tuba nsoki, tuba mavanga mambi ayi tuabasa yizolasananga ko.

4 Vayi bo Nzambi Mvukis’itu kamonisa mamboti mandi ayi luzolo kuidi batu, 5 nandi wu tukula (kubika ti mu mavanga mitu masonga, vayi mu kibila ki kiadi kiandi) mu kutusukula mu nlangu, muingi tubaka luzingu ayi wu tukitula bamona mu lusadusu lu phevi’andi yinlongo. 6 Nandi wutu kulumunina phevi’andi mu nzila Mvukis’itu Yesu Klistu, 7 muingi bo tuala tedulu batu basonga mu kibila ki mamboti malutidi, tubaka luaku lu kutambula kivuvu ki luzingu lu mvu ka mvu.

8 Mambu amomo, madi ma lufiatu ayi yintomba wutatamana kulonga mawu, muingi baboso bankikinina mu Nzambi, batsikika mayindu mu kuvanga mambu mamboti. Kibila mambu amomo, madi mamboti ayi mantuadisanga ndandu kuidi batu.

9 Vayi tinanga batu badi biuvu bi buvungisi, bantianga beni kutubila mambu ma kikhulu, badi kifu ki kusombula, bamfindanga ziphaka mu matedi Minsiku, kibila mambu amomo masi ko mfunu ayi matuadisanga ko ndandu. 10 Boti malubula mutu wuntiamuna malongi ma luvunu mu khumbu yitheti ayi mu khumbu yimmuadi, vayi nandi wuntatamana, buna fueti kuntatula.* 11 Kibila nandi bevekuka mu nzila, widi mu kusumuka ayi widi mu kuyivana nzengulu naveka.

12 Bo yala kufila Alitemasi voti Tikiku, vanga mamoso wunnunga muingi wiza thala ku Nikópoli, kibila kuawu yala viokisila thangu yi kiozi kingolo. 13 Kubika biuma bioso bintombulu, muingi Zena mutu wupisuka mu Minsiku ayi Apolo, banata mu viage. Muingi babika khambu ni kiuma. 14 Ayi bika zikhomba zitu mvandi, balonguka kuvanga mambu mamboti, mu kuba bakubama muingi kudukisa zitsatu zi batu bantombulu lusadusu mu thinu. Mu phila ayoyo, bankuiza vanga kisalu kimboti.

15 Baboso badi yama akuku, ba luveka zimboti. Vana mvandi zimboti ziama kuidi zikhomba zioso ba tuzolanga mu kiminu.

Bika mamboti malutidi ma Nzambi maba yinu.