NKANDA WUTHETI WU PETELO

1 Minu Petelo, apostolo yi Yesu Klistu, yimfila nkanda awuwu kuidi batu Nzambi kasola badi mu kuzingila mu zitsi zi zinzenza ku Pontu, Ngalatia, Kapadosi, Azia ayi ku Bitinia. 2 Tata Nzambi wulusola tona thama dedi bo bubela lukanu luandi, muingi luba batu bantumukinanga mu lusadusu lu phevi yinlongo, ayi muingi luvedusu mu nzila menga ma Yesu Klistu.

Bika mamboti malutidi ma Nzambi ayi ndembama bibuela ba yinu.

3 Bika Nzambi, Tata yi Mfumu’itu Yesu Klistu kazitusu, kibila mu kutadila nlemvu’andi, nandi wutuvana mbutukulu yimona, muingi tubaka kivuvu ki kiedika mu nzila luvulubukusu lu Yesu Klistu mu bafua. 4 Kibila wutukubikila kiuka kikhambu bolanga, kikhambu mvindu ayi kikhambu kubukanga. Kiuka beni, kidi kisuama ku diyilu mu kibila kinu, 5 benu batu Nzambi kadi mu kukieba, kibila luidi kiminu ki kutambula phulusu nandi kala zabikisa mu bilumbu bitsuka. 6 Mu kibila akiokio, benu lunkuangalalanga beni kheti vantombulu benu kuviokila mu mambu maphasi mu mua thangu, mu kibila ki zithotolo ziwombo, 7 muingi bo kiminu kinu kinthotu, kiluta ba luvalu kena wola yiviokila ku mbazu, muingi ntindu kiminu akiokio kiluvanga kutambula nzitusu ayi nkembu bo Yesu Klistu kala monika. 8 Kibila kheti benu lummueniabu ko, vayi lu kunzolanga. Ayi kheti lummueniabu ko bubu, vayi benu lu kunlekilanga kiminu ayi lunkuangalalanga beni. 9 Ayi mayangi beni, mala kuluvanga kutambula phulusu mu kibila ki kiminu kinu.

10 Mu matedi phulusu beni, mimbikudi mio mibikula matedi mamboti malutidi ma Nzambi kuidi benu, bavanga mangolo mawombo muingi kufiongunina matedi phulusu beni. 11 Phevi yinlongo yizabikisa tona thama ti, Klistu wala viokila mu ziphasi ayi wala tambula nzitusu. Mimbikudi bavanga mangolo mawombo ma kutomba bivisa mu nzila phevi yinlongo, matedi thangu mbi mawu mala monikina. 12 Nzambi wuzabikisa kuidi mimbikudi ti, mambu bawu baba bikula, basa bikula ko mawu mu kibila kiawu, vayi mu kibila kinu. Ayi bubu benu luma zabila mawu mu nzila batu ba lusamuna zitsangu zimboti. Bawu banungina kuvanga mawu, mu kibila ki lusalusu lu phevi yinlongo yifumina ku diyilu.

13 Diawu, kubikanu kilunzi kinu muingi luvanga kisalu, mu kutatamana kuba bakotuka ayi mu kuba kivuvu mu mamboti malutidi mo muala tambula, mu thangu Yesu Klistu kala monika. 14 Bo luidi bana bantumukinanga, kalubika zinzinunu aziozio luba ava kuzaba Nzambi, zitatamana ku lutuadisa. 15 Vayi banu banlongo mu mavanga minu moso, dedi bo buididi mutu wulutela. 16 Kibila masonama: “Lufueti ba banlongo, kibila minu yidi wunlongo.”

17 Ayi boti lunsambila kuidi Tata, no wumfundisanga batu mukhambu luvasanu mu kutadila mavanga ma kadika mutu, bika mavanga minu mamonisa ti luidi boma bu Nzambi, mu thangu zioso lunzingila buka zinzenza. 18 Kibila benu luzebi ti bakana ko mu biuma binzimbalanga dedi, palata voti wola ba lukudila mu nzingulu yikhambu fuana yo bakulu binu ba lutambikisa. 19 Vayi ba lukudila mu menga ma luvalu ma Klistu, no widi buka muana dimemi dikhambulu dibela ayi dikhambulu mvindu. 20 Bukiedika, nandi wuba wuzabakana ava nza yivangu, vayi wuyiza monika to mu thangu ayiyi yitsuka mu kibila kinu. 21 Mu nzila Yesu, benu lunkikininanga mu Nzambi no wumvulubusa mu bafua, ayi wumvana nkembu, muingi benu luba kiminu ayi kivuvu mu Nzambi.

22 Mu kuba batu bandiatilanga mu kiedika, diawu luekila badiodila ayi mu kibila akiokio, benu lummonisanga luzolo lukiedika benu na benu. Diawu, tatamananu kumonisa ntindu luzolo alolo mu ntima woso. 23 Kibila benu lutambula mbutukulu yimona, kubika ti mu nkuna wumfuanga, vayi mu nkuna wukhambu fuanga mu nzila diambu di Nzambi yimonyo, no wunzinganga thangu zioso. 24 Kibila batu boso badi buka bititi, ayi nkembu’awu woso widi buka biteka mu nsitu. Bititi binkumanga, ayi biteka bimbuanga,* 25 vayi diambu di Yave dinkadidilanga thangu zioso.” “Diambu” beni, dinsundula zitsangu zimboti zio ba lusamuna.

2 Diawu, lozanu mambu moso mambi, luvunu, nsoki ayi mvandi kutubanga mambu malenda bivisa bankaka. 2 Buka bana batsombi, mufueti ba phuila yi kunua leta bakhambu sobikisa, yinsundula diambu di Nzambi. Ayi mu nzila diambu beni, benu mufueti konzuka muingi kutambula phulusu. 3 Kibila benu luidi bivisa ti Mfumu widi nkua mamboti.

4 Vayi bo lumfikama kuidi nandi, dimanya dimonyo dio batu bakhambu vua nkinza, vayi dio Nzambi kasola ayi didi luvalu va mesu mandi, 5 benu mvinu mu kuba mamanya mamonyo, luidi mu kutungu buka nzo yi kiphevi, muingi luba zinganga nzambi zinlongo, ayi muingi luvana minkhailu mi kiphevi midi mifuana va mesu ma Nzambi, mu nzila Yesu Klistu. 6 Kibila Masonoko mantuba: “Talanu! Yintula ku Mongo Sioni dimanya disolu, dimanya dithalu ayi didi nkinza mu lusersu, ayi woso mutu wala lekila kiminu mu diawu, kalasa fua ko tsoni.”

7 Dimanya beni didi nkinza, kubika ti kuidi batu bammanga kukikininanga mu Mfumu, vayi kuidi benu lunkikininanga mu nandi, “dimanya dio mintungi bakhambu vua nkinza, diawu diyiza ba dimanya dinkinza va thokongo,”* 8 “dimanya dio batu bambundila thutu ayi dimbuisa batu.” Bawu bambundilanga thutu, kibila batumukinanga ko diambu di Nzambi. Ayi mambu amomo, mawu babikula ti mala kuba monikina. 9 Vayi benu luidi “dikabu disolu, luidi zinganga nzambi bansalanga buka mintinu, dikabu dinlongo dio naveka Nzambi kasola, muingi lusamuna zikhadulu zimboti” zi Mutu no wu lubotula ku kitombi, muingi ku lutuala ku kiezila kiandi. 10 Kibila mu thangu yikhulu benu lusa ba ko dikabu diandi, vayi bubu lueka dikabu di Nzambi. Mvandi kabasa lumonisanga ko kiadi, vayi bubu nandi widi mu kulumonisa kiadi.

11 Diawu zikhomba ziama zi luzolo, mu kuba zinzenza ayi kuzinga mu mua thangu ku tsi yingana, yiku lukindisa muingi lutatuka ziphuila zioso zi kinsuni, zidi ku munuanisa mu khat’inu. 12 Tatamananu kumonisa zikhadulu zimboti va khati batu ba nza, muingi bo batu ba luvunina ti luidi bankua mambi, bawu bamona mavanga minu mamboti ayi bata kimbangi. Benu kuvanga mawu, bawu bala zitisa Nzambi, mu kilumbu nandi kala kuiza.

13 Mu kuba bisadi bi Mfumu, tumukinanu zimfumu zioso zi luyalu, kuba kuandi ntinu, kibila bawu ba lulutidi. 14 Kuba kuandi minyadi mi mavula, kibila mintinu bawu ba kuba biekanga, muingi kusemba bankua mambi, ayi kuzitisa bankua mamboti. 15 Kibila luidi luzolo lu Nzambi kuvanga mambu mamboti, muingi luzibika miunu mi batu badi buvungisi. 16 Lufueti ba batu badi kiphuanza, vayi bikanu kusadila kiphuanza beni buka luaku lu kuvangila mambu mambi, vayi sadilanu kiphuanza beni muingi kuba bisadi bi Nzambi. 17 Zitisanu batu boso, monisanu luzolo lu kikhomba, kinzikanu Nzambi ayi zitisanu ntinu.

18 Bika bisadi bioso batumukina zimfumu ziawu, ayi baba monisa lukinzu bafueni tambula, kubika kuandi to kuidi zimfumu zidi mavanga mamboti ayi badi balembama, vayi mvandi kuidi zimfumu zidi mavanga mambi. 19 Kibila, bo mutu kankindama mu ziphasi ayi kamviokila mu mambu makhambulu masonga mu kibila ki kilunzi kiandi, mawu mankuangidikanga Nzambi. 20 Buabu, ndandu mbi benu luala baka boti ba lubula mu kibila ki mambu mambi luvengi? Vayi boti benu lunkindama mu ziphasi mu kibila ki mambu mamboti lumvanga, buna mawu mankuangidikanga Nzambi.

21 Diawu ba lutedila, kibila naveka Klistu wutovuka mu kibila kinu, ayi wu lubikila kifuani muingi lulandakana buboti zithambi ziandi. 22 Nandi kasa vola ko disumu, ayi kasa tuba ko ni diambu di luvunu. 23 Mu thangu batu baba kumvangilanga mambi, nandi kabasa vutudilanga ko mambi. Mu thangu kaba tovuka, nandi kabasa woninanga ko bankaka, vayi waba fiatilanga mu Mutu no wumfundisilanga mu busonga. 24 Nandi wunata masumu mitu mu thangu nyitu’andi yibandu va dikunzi, muingi tuba bafua mu masumu, vayi bamonyo mu busonga. Ayi “ba lubelusa mu kibila ki zimbeza ziandi.” 25 Kibila benu luba buka mamemi mazimbala, vayi bubu luma vutuka kuidi nsungi ayi kuidi nkengididi wu miela minu.

3 Bobuawu mvandi, benu bakazi, tumukinanu banuni binu kibila mu phila ayoyo, kheti bawu basintumukina ko diambu di Nzambi, vayi balenda ba kiminu, kubika ti mu mambu luntuba, vayi mu kibila ki mavanga minu mamboti. 2 Mawu malenda monika, kibila bawu bammonanga zikhadulu zinu zimboti ayi lukinzu luwombo luidi mu bawu. 3 Bikanu kuyibongisa to mu biuma bi mbata dedi,—phila yi kukangila minlengi, kuvuata minsanga mi wola voti bikhutu bi thalu. 4 Vayi tombanu kitoko kikhati kio kikhambu mananga, kio kinkuizilanga mu kuba khadulu yinlembami, ayi kidi luvalu luwombo va mesu ma Nzambi. 5 Kibila buawu bakietu banlongo mu thangu yikhulu, baba kikininanga mu Nzambi baba kuyibongisilanga, mu kutumukinanga banuni bawu, 6 buka Sala waba tumukinanga Abalahami, mu kuntedila mfumu’andi. Ngie wala ba muan’andi ngie kutatamana kuvanga mamboti ayi kukhambu bika boma bu kutuadisa.

7 Bobuawu mvandi, benu banuni, tatamananu kuzinga na bakazi binu ayi visanu buboti mabanza mawu. Wuba vananu nzitusu, kibila bawu badi buka bibasa bilebakana, mu kuzaba ti nandi mvandi wala vua yaku kiuka ki luzingu. Kibila ngie kumanga kuvanga mawu, Nzambi kalendi kuwa ko minsambu miaku.

8 Mvandi banu kithuadi mu mayindu, vuanu bankaka nkinza, monisanu luzolo lu kikhomba, monisanu kiadi kuidi bankaka ayi lukikululanu. 9 Ba ku kuvangila mambi, bika kuvutudila mambi. Ba kufinga, bika kuvutudila bifingu. Vayi luba vutudila mamboti, kibila benu lutedulu muingi kumonisa zikhadulu aziozio. Ayi benu kuvanga mawu, muala tambula lusakumunu.

10 Kibila “mutu wunzolanga luzingu ayi wuntomba kuzinga bilumbu bi mayangi, kafueti bika kutubanga mambu mambi ayi luvunu. 11 Kafueti tina mambi ayi kuvanga mamboti; mvandi kafueti tuadisa ayi kukieba ndembama. 12 Kibila Yave wunsikikanga thalu’andi kuidi batu basonga, ayi wunkuwanga minsambu miawu. Vayi Yave widi wutatuka kuidi batu bamvanganga mambu mambi.”

13 Buabu, nani wala ku muvanga bubi benu kuba kifuza ki kuvanga mambu mamboti? 14 Vayi kheti lumviokila mu ziphasi mu kibila ki busonga, luala baka mayangi. Diawu, bikanu kumona boma biuma bio bawu bammonanga boma ayi bikanu kutatubuka. 15 Vayi kembisanu Mfumu Klistu mu mintima minu, ayi banganu bakubama mu zithangu zioso, muingi kuvutudila mu malembi ayi mu lukinzu batu boso batidi kuzaba matedi kivuvu kinu.

16 Tatamananu kuba kilunzi kidiodila, muingi kheti bo ba lutubila bubi, batu beni bafua zitsoni mu kibila ki zikhadulu zinu zimboti, mu kuba minlandikini mi Klistu. 17 Kibila bulutidi mboti kutovuka mu kuvanga mamboti boti mawu madi mu luzolo lu Nzambi, kena mu kuvanga mambu mambi. 18 Kibila Klistu wufua khumbu yimueka to mu kibila ki masumu, mutu wusonga wufuila mu kibila ki batu bakhambulu basonga, muingi ku lufikika kuidi Nzambi. Nandi wufua mu kinsuni, vayi wutambula luzingu mu kiphevi. 19 Ayi bo nandi kavutuka, wusamuna* kuidi ziphevi zidi mu buloku. 20 Ziphevi zio zimanga kutumukina Nzambi, bo nandi kaba tedimina mu mvibudulu mu thangu Nowa kaba tunga nzaza yo yikota to batu baluelu, mawu mansundula, nana di batu bavuka mu khuka yi nlangu.

21 Tulenda dedikisa mbotumunu yidi mu kuluvukisa bubu, na mambu mamonika mu bilumbu binani, (vayi mawu masinsundula ko kubotula mvindu wu nyitu, vayi mu kudinda Nzambi kilunzi kidiodila) mu nzila luvulubukusu lu Yesu Klistu. 22 Nandi widi va khonzu koko ku lubakala lu Nzambi, kibila wuyenda ku diyilu. Zimbasi, minyadi ayi zimfumu zioso, badi ku tsi luyalu luandi.

4 Mu kumona ti Klistu wutovuka mu kinsuni, diawu benu mvinu banu bakubama, mu kuba momawu mayindu, kibila mutu wuntovukanga mu kinsuni, wubika nzingulu yi masumu. 2 Muingi mu thangu yoso kakhidi zingila mu kinsuni, kazingila yawu kubika ti mu kuvanga luzolo lu batu, vayi lu Nzambi. 3 Kibila mu bilumbu kumbusa, benu luviokisa thangu yiwombo mu kuvanga luzolo lu nza, bo luaba kuyivananga mu mambu matsoni, mu phuila yingolo yi mambu mambi, mu kukoluanga malavu, mu kuvanganga minkungi mimviokisanga kitesu, mu phulu yi kunua ayi mu kubuongimina bitumba. 4 Bawu bankuitukanga beni kibila benu, lusiala ko be diata yawu mu nzingulu yi mvindu, diawu ba ku lutubilanga bubi. 5 Vayi batu abobo, bala tambula lufundusu lu mutu widi wukubama, muingi kufundisa batu bamonyo ayi bafua. 6 Bukiedika, diawu basamunina mvandi zitsangu zimboti kuidi bafua, muingi kheti ba kuba fundisa mu kinsuni mu kutadila mayindu ma batu, bawu bala zinga mu kithuadi mu phevi, mu kutadila mayindu ma Nzambi.

7 Vayi tsukulu yi biuma bioso yima fikama. Diawu banu batu banduenga, ayi banu bakotuka mu matedi kuvanganga minsambu. 8 Bulutidi, tatamananu kumonisa luzolo lungolo benu na benu, kibila luzolo lumfukanga* masumu mawombo. 9 Yambasananganu benu na benu mukhambu nyunguta. 10 Bika kadika mutu mu benu, kasadila nkhailu katambula muingi kusadisa bankaka, mu kuba kisadi kimboti ki mamboti malutidi ma Nzambi, mamboti mo ka tumonisanga mu ziphila ziwombo. 11 Boti vadi mutu wutambula nkhailu wu kukoluka, kafueti sadila wawu muingi kuzabikisa zitsangu zi Nzambi, no wutambula nkhailu wu kusadisa bankaka, kafueti vangila mawu mu mangolo ma Nzambi, muingi Nzambi kazitusu mu mambu moso mu nzila Yesu Klistu. Nkembu ayi mangolo bidi biandi mvu ka mvu. Amem.

12 Zikhomba ziama zi luzolo, bikanu kukuituka mu mambu maphasi luidi mu kuviokila, mu kuyindula ti benu to luidi mu kuviokila mu mawu. 13 Vayi, tatamananu kukuangalala bo lumviokila mu ziphasi dedi zio Klistu kaviokila, muingi mu thangu nandi kala monika, benu mvinu luba mu mayangi mawombo. 14 Boti luidi mu kuviokila mu ziphasi mu kibila ki dizina di Klistu, buna luidi kibila ki kuba mu mayangi, kibila mangolo ma Nzambi ayi nkembu’andi, bidi mu benu.

15 Vayi, ni mutu mu benu kabika tovuka mu kuba mvondi, muivi, nkua mambi, voti mu kukotanga mu mambu mangana. 16 Vayi, boti vadi mutu wumviokila mu ziphasi mu kuba nlandikini wu Yesu, kabika kumona zitsoni, vayi katatamana kuzitisa Nzambi mu kuba nlandikini wu Klistu. 17 Kibila ayiyi yawu thangu yifuana, yifueti tonina lufundusu mu kimvuka ki Nzambi. Diawu, boti lufundusu luala tonina theti kuidi befu, buna buidi buala bela batu bakhambu tumukinanga zitsangu zimboti zi Nzambi? 18 “Ayi boti vantombulu mutu wusonga kuvanga mangolo mawombo muingi Nzambi kamvukisa, buabu, mbi biala monikina mutu wumbayisanga Nzambi ayi kuidi nsumuki?” 19 Diawu, bika batu boso badi mu kutovuka mu kuvanga luzolo lu Nzambi, bakiyekula kuidi Mvangi wukuikama, bo bantatamana kuvanga mamboti.

5 Diawu, minu mvama mu kuba nkulutu wu kimvuka, ayi mu kuba mbangi mu matedi ziphasi Klistu kaviokila, ayi wumueka mu basolu wala tambula nkembu wo wala kuiza, yimvana dilongi adidi kuidi bakulutu va khat’inu: 2 kengidilanu mamemi ma Nzambi madi mu lukiebu luinu, mu kusadila buka minkengididi, kubika ti mu lukuiku, vayi mu ntima woso va ntuala Nzambi. Kubika ti mu kutomba ndandu, vayi mu kifuza. 3 Kubika ti mu kumonisa kimfumu kuidi batu Nzambi ka luvana, vayi lufueti ba kifuani kimboti kuidi mamemi. 4 Ayi bo mfumu yi minsungi kala kuiza, benu luala tambula kolowa yi nkembu, yikhambu vavukanga.

5 Bobuawu mvandi, benu matoko, lufueti tumukina bakulutu. Ayi benu boso lufueti kuyikululanga va ntuala bankaka, kibila Nzambi wunlendanga batu ba kuyinangikanga, vayi wummonisanga mamboti malutidi kuidi bo bayikululanga.

6 Diawu, lukikulula va ntuala Nzamb’itu nkua ngolo zioso, muingi nandi ka lunangika mu thangu yifuana. 7 Yekulanu bizitu binu bioso kuidi Nzambi, kibila nandi wu kulukiebanga. 8 Diatilanu mu nduenga ayi banu bakotuka, kibila mben’inu Nkadi’ampemba, widi mu kululenga buka khosi yimvuma ayi yintomba ki kudia. 9 Vayi benu lufueti kunnuanisa mu kukindama mu kiminu, mu kuzaba ti zikhomba zinu zioso mu nza yimvimba, mvandi badi mu kuviokila mu zioziawu ziphasi. 10 Vayi, bo luala mana kutovuka mu mua thangu, naveka Nzambi nkua mamboti malutidi, no wala kuluvana luzingu lu mvu ka mvu, mu kithuadi na Klistu, wala dukisa khubumunu’inu. Nandi wala kulusikimisa, wala kuluvana mangolo, ayi wala ku lutelimisa mukhambu nyikuka. 11 Nandi vuidi mangolo mu zithangu zioso. Amem.

12 Silivanu khomba wukuikama, nandi betsadisa ku lusonikina mua nkanda awuwu. Yisa lusonikina ko mambu mawombo, vayi yibe lusonikina muingi ku lukindisa, ayi kuluzabikisa ti, Nzambi wulumonisa mamboti mandi malutidi. Diawu, tatamananu kusimbidila mawu. 13 Nkietu widi ku Babiloni,* no mvandi basola buka benu, wuku lufila zimboti, muan’ama Malaku mvandi wuku lufila zimboti. 14 Vanasananu mboti benu na benu, mu kuyivanasana besu yi luzolo.

Bika benu boso luidi kithuadi na Klistu, luba mu ndembama.