NKANDA WUMMUADI WU PETELO

1 Minu Simoni Petelo, kisadi ayi apostolo wu Yesu Klistu, yimfila nkanda awuwu kuidi zikhomba bayiza ba kiminu kikiedika buka kitu, mu nzila busonga bu Nzamb’itu ayi bu Mvukisi Yesu Klistu:

2 Bika benu luluta baka mamboti malutidi ayi ndembama, binkuizilanga mu nzila nzailu yikiedika yi Nzambi ayi yi Mfumu’itu Yesu. 3 Kibila mangolo ma Nzambi, ma tuvananga biuma bioso bintombulu muingi tuzingila mu kukivana kuidi nandi, mu nzila nzailu yikiedika yi mutu no wututela mu nzila nkembu’andi ayi mu mamboti mandi. 4 Mu nzila zikhadulu ka tuvana, nandi wu tuvana zikhanu zimboti ayi zi mayangi, muingi mu nzila zikhadulu beni, tuba batu ba kiphevi buka Nzambi, ayi kuvuka mu nza ayiyi yimbi yintuadusuluanga mu mavanga mambi.

5 Diawu, vanganu mamoso lunnunga muingi lubuela va mbata kiminu kinu, mavanga mamboti; ayi va mbata mavanga mamboti, nzailu; 6 ayi va mbata nzailu, kukiyala; va mbata kukiyala, kukindama; va mbata kukindama, kukivana kuidi Nzambi; 7 va mbata kukivana kuidi Nzambi, luzolo lu kikhomba; ayi va mbata luzolo lu kikhomba, luzolo mu batu boso. 8 Kibila zikhadulu zioso aziozio, zia kuwala mu benu, ziala ku luvanga kubika ba batu balebakana, ayi bakhambu butanga mimbutu mu matedi nzailu yikiedika yi Mfumu’itu Yesu Klistu.

9 Kibila woso mutu wukhambulu zikhadulu aziozio, widi phovo, ayi wunzibikanga mesu muingi kabika mona kiezila, mvandi wuzimbakana ti bandiodisa mu masumu kaba vanganga ku mbusa. 10 Diawu zikhomba, buelanu kifuza mu matedi kusimbidila kivuvu, kio ba lutedila ayi ba lusodila, kibila benu kutatamana kuvanga mawu, ni kiuma kialasa luvongisa ko. 11 Mu phila ayoyo, luala tambula khotolo yi nzitusu mu Kintinu ki mvu ka mvu ki Mfumu’itu ayi Mvukisi Yesu Klistu.

12 Mu kibila akiokio, yintomba kutatamana ku lutebulanga moyo matedi mambu amomo, kheti benu luzebi buboti mawu ayi luidi mu kudiatila mu kiedika kio lulonguka. 13 Vayi, bo yikhidi mu nyitu ayiyi yi kinsuni, yimmona ti didi diambu dimboti kutatamana ku lukotula mu ku lutebulanga moyo, 14 mu kuzaba ti yembelama kubika nyitu ayiyi yi kinsuni, dedi bo Mfumu’itu Yesu Klistu katsudikisidi buboti. 15 Yinkuiza vanga mamoso yinnunga muingi kheti bo yimfua, lutatamana kutebukilanga moyo mambu amama.

16 Befu tusa tuba ko luvunu bo tulu zabikisa matedi ndizulu yi Mfumu Yesu Klistu, kibila befu veka tumona mu mesu mitu nkembu’andi. 17 Nandi wutambula nzitusu ayi nkembu kuidi Tata Nzambi. Mawu mamonika mu thangu Nzambi katuba mambu amama: “Awuwu widi Muan’ama, minu yikunzolanga beni ayi widi lunungu va mesu mami.” 18 Bukiedika, befu tuyuwa mbembu ayoyo yibasikila ku diyilu, bo tuba yandi va kimueka ku mongo wunlongo.

19 Diawu, tuma luta ba lufiatu mu mambu mimbikudi batuba. Ayi diambu dimboti lumvanganga mu kuteka matu mu mambu beni, kibila mawu madi buka kiezila ki muinda, kinkienzukanga ku kitombi (nati buisi bunkia, ayi kiezila ki mbuetila yimbasikanga va meni), yikienzula mintima minu. 20 Ayi bulutidi, benu luzebi buboti ti, vasi ko ni mutu wulenda nunga kusudikisa mu diela diandi veka, zimbikudulu zidi mu Masonoko. 21 Kibila vasi ko ni mbikudulu yiyizila mu mayindu ma batu, vayi Nzambi wutuadisa batu beni, mu nzila phevi’andi yinlongo.

2 Vayi mu thangu yikhulu, vamonika mvandi mimbikudi mi luvunu va khati dikabu, dedi bo buala monikina va khat’inu minlongisi mi luvunu. Malembi malembi bawu bala kotisa malongi ma luvunu, mantuadisa kithatu ayi bala manga mfumu’awu no wuba sumba. Mu phila ayoyo, bawu bala kuyituadisa mbungulu mu thinu. 2 Mvandi bawombo bala landakana mavanga mawu matsoni ayi mu kibila kiawu, batu bala tubila bubi nzila yikiedika. 3 Mvandi, mu kibila ki khunya yi zimbongo, minlongisi amiomio bala kulukuiba mu kulukamba mambu ma luvunu. Vayi bawu beka nduka kutambula nkanu baba zengila tona thama, ayi mbungulu’awu yima fikama.

4 Bukiedika, Nzambi kasa lemvukila ko zimbasi zio zisumuka, vayi wuba tula mu buloku bantedilanga Tártaro mu kuba kanga mu ziphanga ku kitombi kingolo, muingi bavingila lufundusu luawu. 5 Mvandi, kasa mona ko kiadi kufundisa mbandu yikhulu, vayi wuvukisa Nowa nsamuni wu mambu masonga va kimueka na sambuadi di batu, bo katuala khuka yi nlangu muingi kutulula bankua mambi. 6 Nandi wufundisa divula di Sodoma ayi Ngomola, mu kuma tulula mu mbazu. Mu phila ayoyo, wumonisa kifuani kuidi bankua mambi mambu bala monikina. 7 Vayi nandi wuvukisa Ló mutu wusonga, no waba kuazukanga beni mu ntima, mu kibila ki mavanga matsoni ma bankua mambi. 8 (Kibila bo kaba zingilanga va khati’awu, kadika kilumbu nandi waba kuazukanga beni mu ntima, mu kumona ayi kukuwa mambu mambi batu baba vanganga.) 9 Vayi Yave zebi kukula mu zithotolo batu ba kunkinzikanga, ayi kutuadisa mbungulu kuidi batu bakhambulu basonga mu kilumbu ki lufundusu, 10 bulutidi, batu bambivisanga bankaka mu ziphuila ziawu zi kinsuni, ayi banlenzanga batu badi kimfumu.

Bawu badi lunangu ayi badi bikutu matu, ayi basi ko boma bu kutubila bubi batu badi nkembu. 11 Kheti zimbasi balutidi mangolo kena minlongisi amiomio mi luvunu, vayi zimbasi beni baba tubilanga ko bubi, mu kibila ki lukinzu badi mu Yave. 12 Vayi minlongisi amiomio mi luvunu, badi buka bibulu bivangulu muingi baba buila ayi kuvondu, bawu bantubilanga bubi mambu bakhambu zaba. Bawu bala tambula mbungulu, 13 banga mfutu mu kibila ki mambu mambi bavanga.

Bawu bankuangalalanga kukivana mu nzingulu yimbi va nyalu nguba. Badi buka mvindu widi mu bikhutu ayi badi babivusu. Bo bambanga yinu va kimueka mu minkungi, bawu bankuangalalanga ku luvuna. 14 Bawedi phuila yi kuvanga kiphinga, banunganga ko kulembu kuvola masumu ayi bamvukumunanga batu bakhambulu bakuikama. Bawedi phuila yi kuzinina biuma bingana mu mintima miawu. Bawu badi bana basingu. 15 Bawu babika ayi bavekuka mu nzila yikiedika. Balandakana kifuani ki Balaão muana Beor, no wuzola kutambula mfutu mu kuvanga mambu makhambulu masonga, 16 vayi wutambula tsembolo mu kulevula mambu masonga. Phund’andi yiyoluka buka bunkolukilanga mutu, muingi kuntula nkaku wu kuvanga mambu mambi.

17 Babakala abobo badi buka tho yikhambu basisanga nlangu, buka dibungi bamvevumuna kuidi phemu yingolo, mvandi baba lundila kitombi kingolo. 18 Bawu bantubanga mambu mammonikinanga buka ti madi mamboti, vayi masi ko tsundu. Ayi mu nzila zinzinunu ziawu ayi mavanga mawu mambi, bawu bamvukumunanga batu bama vuka mu nzingulu yi batu bamvanga mambu mambi. 19 Kheti bawu bankanikisanga kiphuanza kuidi bankaka, vayi baveka badi mimvika mi mayindu mawu mambi, kibila woso mutu bannunga kuidi mutu wunkaka, wunkitukanga mvik’andi. 20 Kibila kheti mu kuba batu bavuka mu nzingulu yi nza, mu nzila nzailu yikiedika yi Mfumu ayi Mvukisi Yesu Klistu, vayi bamvutukanga kubue vanga momawu mambu mambi baba vanganga, ayi ba kubika mawu maba nunga, buna bawu bankuiza luta ba mavanga mambi kena bo babela va thonono. 21 Khanu bulutidi mboti boti bawu basa zaba ko nzila yikiedika yi busonga, kena kuzaba yawu, bosi kuvekuka mu malongi masonga mo balonguka. 22 Mu phila ayoyo, batu abobo badi mu kudukisa ngana ayiyi: “Mbua madia bilusi biandi, ayi ngulu bo bammana kunkobisa wubue vutuka va diyanga.*

3 Zikhomba ziama zi luzolo, awuwu wawu nkanda wummuadi yi kulusonikina, ayi dedi bo bubela nkanda wutheti yi lusonikina, yintomba ku lulubula ayi kulutebula moyo ti, vantombulu kusadila buboti nkhailu luidi wu kuyindula, 2 muingi lutebuka moyo mambu mimbikudi minlongo babikula, ayi malongi ma Mfumu ayi Mvukisi, mo bapostolo ba lulonga. 3 Zabanu ti mu bilumbu bitsuka vala monika batu bala vueza mambu mamboti, mu kuvanga luzolo lu zinzinunu ziawu zi kinsuni, 4 bawu bala tuba: “Nandi wu tukanikisa ti wala bue kuiza muingi kuba yitu, buabu kuidi kadi? Kibila tona mu thangu bakulu bitu bafua nati bubu, mambu moso mantatamananga buna buawu tona Nzambi kavanga batu va nza.”

5 Kibila batu abobo mu lutia luawu bammanga kukikinina mambu amama: Tona thama Nzambi wuvangila diyilu ayi ntoto mu luzolo* luandi, ayi ntoto beni wuyizila mu nlangu ayi wuvangulu mu nlangu, 6 ayi mu nzila mambu amomo, nandi wubunga mbandu yi Nowa mu ku yidiamisa. 7 Vayi mu nzila luzolo* luandi beni, diyilu ayi ntoto bidi mu thangu ayiyi, bidi mu kuvingila mbungulu yi mbazu mu kilumbu ki lufundusu, kio kala bunga batu bankua mambi.

8 Diawu zikhomba ziama zi luzolo, bikanu kuzimbakana diambu adidi: Kuidi Yave kilumbu kimueka kidi buka kivevi ki mimvu, ayi kivevi ki mimvu midi buka kilumbu kimueka. 9 Yave kakalanga ko kisina muingi kudukisa lukanu luandi dedi bo bankaka banyindudilanga, vayi nandi wu lumonisanga mvibudulu, kibila kasintomba ko ni mutu kabungu, vayi wuntomba baboso babalula mavanga mawu. 10 Vayi kilumbu ki Yave kiala kuiza buka muivi, ayi mu kilumbu beni diyilu diala zimbala mu kibila ki biyoko bingolo, ayi biuma bidi ku diyilu biala siulumuka* mu mbazu, ntoto ayi mavanga ma batu mala monika.

11 Mu kuzaba ti biuma bioso abiobio biala siulumukila mu phila ayoyo, lufueti yindula ntindu mbi batu lufueti ba. Lufueti ba batu badi zikhadulu zinlongo, ayi batu bammonisanga mu luzingu luawu ti bakivana kuidi Nzambi. 12 Bo mumvingila, lufueti tebukanga moyo kilumbu ki Yave, kio diyilu diala tuluka mu mbazu ayi biuma bidi ku diyilu biala siulumuka mu diamu* di mbazu. 13 Vayi, vadi diyilu dimona ayi ntoto wumona bio tumvingila mu kutadila lukanu luandi, ayi mu thangu beni, biuma bioso biala ba bisonga.

14 Diawu zikhomba ziama zi lozolo, mu kuzaba ti luidi mu kuvingila mambu amomo, vanganu mamoso lunnunga muingi bo nandi kala kuiza, kiza lubata basonga, bavedila ayi mu ndembama. 15 Mvandi, lufueti tadila mvibudulu wu Mfumu’itu buka luaku muingi kuvuka, dedi bo khomb’itu Polo ka lusonikina, mu nzila nduenga Nzambi kamvana. 16 Nandi wutubila mambu amomo, dedi bo kansonikinanga mu minkanda miandi mioso. Kheti vadi mua mambu mu minkanda beni madi phasi mu kuvisa, ayi mawu minlongisi mi luvunu badi mu kubalula tsundu, dedi bo bamvangilanga mvandi mu Masonoko moso muingi bayituadisa mbungulu.

17 Diawu zikhomba ziama zi luzolo, mu kufika zaba mambu amomo, lufueti ba keba keba muingi lubika vekuka mu kulandakana batu abobo, ayi muingi lubika vongisa lukuikumunu luinu. 18 Vayi lufueti tatamana kukonzuka mu mamboti malutidi ma Nzambi, ayi mu nzailu yi Mfumu’itu ayi Mvukisi Yesu Klistu. Bika nandi katambula nkembu kuba kuandi bubu ayi mvu ka mvu. Amem.