NKANDA WUTHETI WU YOANE

1 Yiku lusonikina matedi mutu awowo wuba tona vana thonono, no befu tuyuwa, tumona mu mesu mitu, tusimba mu mioko mitu ayi no wutuala diambu di luzingu. 2 Bukiedika, luzingu lumonika ayi befu tumona luawu. Befu tuntanga kimbangi ayi tunzabikisanga luawu kuidi benu, luzingu lu mvu ka mvu, lo luba va kimueka na Tata ayi luyiza monika kuidi befu. 3 Mambu befu tumona ayi tuyuwa, tuidi mu kuluzabikisa mawu, muingi benu muba yitu kithuadi ayi muingi befu tuba kithuadi na Tata ayi Muan’andi Yesu Klistu. 4 Tumu sonikina mambu amomo, muingi mayangi mitu maba maduka.

5 Tsangu tuyuwa kuidi nandi ayi tuku muzabikisa, yakayi: Nzambi widi kiezila ayi ni kitombi kimueka kisi ko mu nandi. 6 Befu kutuba ti “tuidi kithuadi ayi nandi,” vayi tuntatamana kudiatila ku kitombi, tuidi bankua luvunu ayi tuisinzingila ko mu kiedika. 7 Vayi boti tuidi mu kudiatila ku kiezila dedi bo naveka kadidi ku kiezila, buna tuidi kithuadi befu na befu ayi menga ma Muan’andi Yesu, ma tusukula* mu masumu moso.

8 Befu kutuba ti: “Tuisi ko ni disumu,” buna tuidi mu kuyivuna befu veka ayi kiedika kisi ko mu befu. 9 Vayi befu kufungula* masumu mitu, nandi widi wukuikama ayi wusonga muingi kulemvukila masumu mitu ayi wala ku tuvedisa* mu mambu moso makhambulu masonga. 10 Befu kutuba ti: “Tuvolanga ko masumu,” buna tuidi mu kuvanga Nzambi kamonikina nkua luvunu ayi diambu diandi disi ko mu befu.

2 Bana bami ba luzolo, yiku lusonikina mambu amama muingi lubika vola disumu. Vayi boti mutu bevola disumu, tuidi nsadisi wusonga widi va kimueka na Tata: Yesu Klistu. 2 Nandi widi nkhailu wufuana mu masumu mitu, kubika kuandi to masumu mitu, vayi mvandi ma batu boso mu nza yimvimba. 3 Ayi befu kutatamana kutumukina zithumu ziandi, buna tuidi mu kumonisa ti befu tunzabizi buboti. 4 Woso wuntuba: “Minu yinzabizi buboti,” vayi kheti bobo, kasintumukina ko zithumu ziandi, buna widi nkua luvunu ayi kiedika kisi ko mu nandi. 5 Vayi, boti mutu wuntumukina diambu diandi, mawu mammonisa ti luzolo lu Nzambi mu mutu beni lueka luduka ayi mu phila ayoyo, befu tuzebi ti tuidi yandi kithuadi. 6 Woso mutu wuntuba ti widi kithuadi na Yesu, buna kafueti tatamana kuzingila mu phila Yesu kazingila.

7 Zikhomba ziami zi luzolo, minu yisi lusonikina ko lutumu lumona vayi lukhulu; luidi lutumu benu lutambula tona vana thonono. Lutumu beni lukhulu luidi: diambu dio benu luyuwa. 8 Vayi kheti bobo lutumu alulu yiku lusonikina, luidi lumona, luidi lutumu Yesu kadidi kifuani kimboti ayi benu mvinu. Kibila kitombi kidi mu kuvioka, vayi kiezila kikiedika kidi mu kulezama.

9 Woso mutu wuntuba ti widi ku kiezila, vayi wunlendanga khomb’andi, buna nandi wukhidi ku kitombi. 10 Mutu wunzolanga khomb’andi, wuntatamananga ku kiezila ayi nandi kasi ko bibila muingi kuvanga bankaka kusumuka. 11 Vayi mutu wunlendanga khomb’andi, widi ku kitombi ayi widi mu kudiatila ku kitombi. Mvandi kasa zaba ko kuma kankuenda, kibila kitombi kibe nzibika mesu.

12 Bana bami ba luzolo, minu yiku lusonikina kibila benu lubaka nlemvu wu masumu, mu dizina di Yesu. 13 Matata, minu yiku lusonikina, kibila benu muzebi no widi tona vana thonono. Matoko, yiku lusonikina, kibila benu lununga Nkua Mambi. Bana balezi, yiku lusonikina, kibila benu muzebi Tata. 14 Matata, minu yiku lusonikina, kibila benu muzebi no widi tona vana thonono. Matoko minu yiku lusonikina, kibila benu luidi mangolo ayi diambu di Nzambi dintatamana mu benu ayi benu lununga Nkua Mambi.

15 Bikanu kuzola nza ni biuma bidi mu nza. Woso wunzola nza, luzolo lu Tata luisi ko mu nandi. 16 Kibila biabioso bidi mu nza, phuila yi kubaka biuma bi kinsuni, biuma mesu kanzinina* ayi lunyemu lu biuma bi luzingu, bisa kuizila ko kuidi Tata, vayi bifumina mu nza. 17 Mvandi, nza ayi ziphuila zioso zidi muawu, zidi mu kuvioka, vayi woso wumvanga luzolo lu Nzambi, wala tatamana mvu ka mvu.

18 Bana bami ba luzolo, akiki kiawu kilokula kitsuka, dedi bo benu luyuwila ti vala monika batu bakhambu kikininanga mu Klistu; ayi bawombo mu bawu bama monika. Buawu tuzabidi ti akiki, kieka kilokula kitsuka. 19 Bawu babotukila va khat’itu kibila basi ko ku khonzu’itu, boti ku khonzu’itu baba, khanu batatamana yitu. Vayi bawu babotukila muingi kumonisa ti bakana ko batu boso badi va khat’itu, badi ku khonzu’itu. 20 Benu luidi basolu mu phevi yo lutambula kuidi mutu widi wunlongo, ayi benu boso luzebi kiedika. 21 Minu yiku lusonikina bika ti lusa zaba ko kiedika, vayi benu luzebi kiedika. Ayi kibila vasi ko luvunu lubasikila mu kiedika.

22 Nani widi nkua luvunu? Kasi ko no wummanganga ti Yesu nandi Klistu? Awowo nandi wukhambu kikininanga mu Klistu ayi wummanganga Tata ayi Muana. 23 Woso wukhambu kikininanga mu Muana, mvandi kasi ko lunungu va mesu ma Tata. Vayi woso wunkikinina mu Muana widi mvandi lunungu va mesu ma Tata. 24 Vayi benu lufueti tatamana mu mambu luyuwa tona vana thonono, benu kutatamana mu mambu beni, luala tatamana mu kithuadi na Muana ayi mvandi na Tata. 25 Mvandi, naveka wukanikisa ku tuvana luzingu lu mvu ka mvu.

26 Minu yiku lusonikina mambu amama, muingi yi lulubula mu matedi batu bantomba ku luvanga kuvekuka mu nzila. 27 Ayi mu matedi benu, Nzambi wu lusola mu nzila phevi’andi yinlongo. Phevi beni yintatamana mu benu ayi vasintombulu ko mutu wunkaka ka lulonga. Kibila phevi lutambula kuidi nandi, yidi yikiedika ayi yisi ko yi luvunu ayi phevi beni yi lulonganga mambu moso. Diawu tatamananu kuba yandi kithuadi, dedi bo phevi beni yiku lulongilanga. 28 Diawu bana bama ba luzolo, tatamananu kuba kithuadi ayi nandi, muingi mu thangu kala monika, tubaka bu kukolukila yandi mu lufiatu ayi tubika kuntatuka mu kibila ki zitsoni, mu thangu yi kuba yandi va kimueka. 29 Boti benu luzebi ti Yesu widi wusonga, buna mvandi luzebi ti baboso bamvanganga mambu masonga, babutukila mu Nzambi.

3 Yindulanu phila Tata ka tuzodila, nandi wu tutedila bana bandi* ayi bukiedika befu tuidi bana bandi. Diawu nza yikhambu tuzabila, kibila bawu basa zaba ko Nzambi. 2 Zikhomba zi luzolo, mu thangu ayiyi tuidi bana ba Nzambi, vayi tusa zaba ko mbi tunkuiza ba mu bilumbu binkuiza. Tuzebi ti mu thangu kala monika, befu tuala ba buka nandi, kibila tuala mona phila Nzambi kadidi. 3 Ayi woso widi kivuvu akiokio, kafueti ba wudiodila, dedi bo nandi kadidi wudiodila.

4 Noso mutu wuntatamana kuvola disumu, widi mu kulevula nsiku, kibila kuvola disumu kunsundula kulevula nsiku. 5 Ayi benu luzebi ti Yesu wumonika muingi ku tukula mu masumu mitu ayi nandi kasa sumuka ko. 6 Woso mutu wuntatamana kuba yandi kithuadi, katatamananga ko kuvola disumu. Woso wuntatamana kuvola disumu, kasa kunzaba ko ayi kasi ko kiminu mu Yesu. 7 Bana bama ba luzolo, ka mubika ni mutu ka luvukumuna. Woso mutu wuntatamana kuvanga mambu masonga, widi wusonga dedi bo Yesu kadidi wusonga. 8 Woso wuntatamana kuvola disumu, wuyizila mu Nkadi’ampemba, kibila Nkadi’ampemba wuntatamananga kusumuka tona thama.* Diawu Muana Nzambi kamonikina, muingi kutulula mavanga moso ma Nkadi’ampemba.

9 Woso mutu wubutukila mu Nzambi, katatamananga ko kuvola disumu, kibila phevi yinlongo yi Nzambi yintatamananga mu nandi ayi nandi kalendi tatamana ko kuvola disumu, kibila wubutukila mu Nzambi. 10 Ayiyi yawu phila tunzabilanga banani bana ba Nzambi ayi banani bana ba Nkadi’ampemba: mutu wukhambu vanganga mambu masonga ayi wukhambu zolanga khomb’andi, kasa kuizila ko mu Nzambi. 11 Kibila benu luyuwa tona vana thonono mambu amama: tufueti zolasananga befu na befu. 12 Tubika ba buka Kaini wuvonda khomb’andi, mu kulandakana mavanga ma Nkadi’ampemba. Kibila mbi kamvondila? Kibila mavanga mandi maba mambi, vayi ma khomb’andi maba masonga.

13 Zikhomba, bikanu kukuituka mu phila nza yiku lulendilanga. 14 Befu tuzebi ti tuba bafua, vayi buabu tueka bamonyo kibila tunzolanga zikhomba zitu. Noso wukhambu zolanga, wuntatamana wufua. 15 Noso wunlenda khomb’andi, widi mvondi ayi benu luzebi ti ni mvondi wumueka wala baka luzingu lu mvu ka mvu. 16 Mu kibila akiki, tuyiza zaba mbi binsundula kuzola: nandi wuvana luzingu luandi mu kibila kitu, diawu befu mvitu, tuidi nsua wu kuvana luzingu luitu mu kibila ki zikhomba zitu. 17 Vayi boti mutu widi mbakulu ayi wummona khomb’andi kuviokila mu tsatu, vayi kheti bobo wummanga kummona kiadi, buna bukiedika ti luzolo lu Nzambi luntatamana mu nandi? 18 Bana bama ba luzolo, tubika tubanga to va munu ti tunzolanga, vayi tufueti monisa mawu mu mavanga ayi mu bukiedika.

19 Mu phila ayoyo, tuala zaba ti tuyizila mu kiedika ayi ntim’itu wala ba wuvumbama va ntuala Nzambi, 20 mu yoso kua thangu wawu* wutu fundisa, kibila Nzambi wulutidi kena ntim’itu ayi nandi zebi mambu moso. 21 Zikhomba zi luzolo, boti ntim’itu wisi tufundisa ko, buna tunkuiza yoluka na Nzambi mu lufiatu, 22 ayi biabioso tu kundinda tunkuiza bitambula, kibila tuidi mu kutumukina zithumu ziandi ayi tuidi mu kuvanga mambu mamboti va mesu mandi. 23 Bukiedika, alulu luawu lutumu luandi: tufueti ba kiminu mu dizina di Muan’andi Yesu Klistu ayi tufueti zolasana befu na befu dedi bo nandi ka tutumina. 24 Kubotula kuandi amomo, woso mutu wuntumukina zithumu ziandi, wuntatamananga mu kithuadi na Yesu. Ayi Yesu wuntatamananga mu kithuadi na mutu beni. Mvandi, mu nzila phevi ka tuvana, tuzebi ti nandi wunkuiza tatamana kuba yitu kithuadi.

4 Zikhomba ziama zi luzolo, lubika kikinina mu zitsangu zioso ba mutuadila. Vayi fionguninanu ziawu buboti muingi kuzaba boti kuidi Nzambi zibe fumina, kibila mu nza, mueka mimbikudi miwombo mi luvunu.

2 Tala phila mufueti zabila tsangu yifumini kuidi Nzambi: tsangu yoso yinkikinina ti Yesu Klistu wubutuka mu kinsuni, yiyizila kuidi Nzambi. 3 Yoso tsangu yikhambu kikinina mu Yesu, yidi tsangu yimfumina kuidi batu bakhambu kikininanga mu Klistu, batu benu luyuwa ti bala kuiza ayi mu thangu ayiyi, bawu beka mu nza.

4 Bana bama ba luzolo, benu luyizila mu Nzambi ayi luba nungizi, kibila no widi yinu kithuadi, wulutidi kena no widi kithuadi na nza. 5 Bawu babasikila mu nza, diawu bantubilanga mambu mabasikila mu nza ayi batu badi mu nza, baba kuwanga. 6 Befu tuyizila mu Nzambi. Noso mutu zebi Nzambi wutukuwanga, vayi no wukhambu kuizila kuidi Nzambi, ka tuyuwanga ko. Buawu tunzabilanga disuasana didi mu tsangu yikiedika ayi yi luvunu.

7 Zikhomba zi luzolo, tutatamana kuzolasana befu na befu, kibila luzolo lufumina kuidi Nzambi. Ayi noso mutu wunzola, wubutukila mu Nzambi ayi zebi Nzambi. 8 Mutu wukhambu zolanga, kasa zaba ko Nzambi, kibila Nzambi luzolo.* 9 Tala phila Nzambi ka tumonisina luzolo: Nandi wufila Muan’andi wumueka to va nza, muingi tubaka luzingu mu nzil’andi. 10 Luzolo lutedi mu mambu amama: kubika ti befu tutuama kuzola Nzambi, vayi nandi wutuama ku tuzola, mu kuvana Muan’andi buka nkhailu wufuana mu kibila ki masumu mitu.

11 Zikhomba ziama zi luzolo, boti Nzambi wu tuzodila phila ayoyo, buna befu mvitu tuidi nsua wu kuzolasana befu na befu. 12 Vasi ko mutu wumana mona Nzambi. Befu kutatamana kukizolasana befu na befu, Nzambi wala tatamana kuba yitu, ayi luzolo luandi mu befu luala ba luduka. 13 Mu phila ayoyo, tuzebi ti tuala tatamana kuba yandi kithuadi ayi nandi wala ba yitu kithuadi, kibila nandi wu tuvana phevi’andi. 14 Kubotula kuandi amomo, befu tummona ayi tuidi mu kuvana kimbangi ti Tata wufila Muan’andi, muingi kukula nza. 15 Noso wunkikinina ti Yesu widi Muana Nzambi, buna Nzambi wuntatamananga kuba yandi kithuadi ayi nandi mu kithuadi na Nzambi. 16 Befu tuzebi luzolo Nzambi kadi mu befu ayi tunkikininanga mu luzolo beni.

Nzambi luzolo, ayi woso mutu wuntatamana mu luzolo, wuntatamananga mu kithuadi na Nzambi ayi Nzambi wuntatamananga mu kithuadi ayi nandi. 17 Mu phila ayoyo, luzolo luyiza ba luduka mu befu, muingi tuyoluka mu lufiatu mu kilumbu ki lufundusu, kibila dedi bo Yesu kadidi, befu mvitu buawu tuididi mu nza ayiyi. 18 Batu badi luzolo, basi ko boma; vayi luzolo luduka lunnunganga boma, kibila boma bu tutulanga nkaku. Bukiedika mutu widi boma, luzolo luandi luisi ko luduka. 19 Befu tunzolanga, kibila nandi wutuama ku tuzola.

20 Mutu na kutuba ti: “Minu yinzolanga Nzambi,” vayi wunlendanga khomb’andi, widi nkua luvunu. Kibila mutu wukhambu zolanga khomb’andi no kammonanga, kalendi zola ko Nzambi no kakhambu monanga. 21 Ayi tutambula lutumu alulu kuidi nandi: mutu wunzolanga Nzambi, kafueti zola mvandi khomb’andi.

5 Noso wunkikinina ti Yesu widi Klistu, wubutukila mu Nzambi ayi noso wunzolanga mutu wutuadisa mbutukulu’andi, wunzolanga mvandi muan’andi. 2 Befu tummonisanga ti tunzolanga bana ba Nzambi, bo tunzola Nzambi ayi tuntumukina zithumu ziandi. 3 Kibila luzolo lu Nzambi lunsundula: kutumukina zithumu ziandi, ayi zithumu beni zisi ko phasi.* 4 Noso mutu wubutukila mu Nzambi, wunnunganga nza. Ayi kiminu kitu, kiawu ki tuvanga kununga nza.

5 Nani kalenda nunga nza? Kasi ko no widi kiminu ti Yesu, widi Muana Nzambi? 6 Yesu Klistu, nandi mutu wuyizila mu nlangu ayi menga, kubika to mu nlangu vayi mu nlangu ayi mu menga. Ayi phevi yinlongo yimvana kimbangi mu mawu, kibila yawu yimvananga kimbangi ki kiedika. 7 Vadi biuma bitatu bimvananga kimbangi: 8 phevi, nlangu ayi menga; ayi bia bitatu bimvana kimbangi kimueka.

9 Boti tunkikininanga mu kimbangi batu bamvananga, buna tufueti luta kikinina kimbangi Nzambi kamvana. Kibila kimbangi Nzambi kavana kiawu akiki: kimbangi kavana mu matedi Muan’andi. 10 Noso wunlekila kiminu mu Muana Nzambi, widi kimbangi mu khati’andi. Vayi woso wukhambu kiminu mu Nzambi, widi mu kuvanga Nzambi kamonikina buka nkua luvunu, kibila kasi ko kiminu mu kimbangi Nzambi kavana mu matedi Muan’andi. 11 Akiki kiawu kimbangi: Nzambi wu tuvana luzingu lu mvu ka mvu, ayi luzingu beni luidi mu Muan’andi. 12 Woso widi kithuadi na Muana, widi kivuvu ki kuzinga mvu ka mvu, vayi woso wukhambulu kithuadi na Muana Nzambi, kasi ko kivuvu ki kuzinga mvu ka mvu.

13 Yinsonikina mambu amama kuidi benu, batu balekila kiminu mu Muana Nzambi, muingi luzaba ti luidi kivuvu ki kuzinga mvu ka mvu. 14 Ayi alulu luawu lufiatu tuidi mu nandi: befu kudinda dioso kua diambu didi kithuadi na luzolo luandi, nandi wala ku tukuwa. 15 Ayi boti tuzebi ti nandi wunkuwanga mambu tu kundinda, tuala tambula bio tu kundinda, kibila kuidi nandi tundinda biawu.

16 Boti mutu bemona khomb’andi kuvola disumu dikhambu natanga ku lufua, buna nandi kafueti kunnata mu minsambu ayi Nzambi wunkuiza mvana luzingu. Ngete, yidi mu kutubila matedi disumu dikhambu natanga ku lufua. Kibila vadi disumu dinnatanga ku lufua. Vayi disi ko diawu disumu yintubila, muingi kunatina mutu awowo mu minsambu. 17 Diambu dioso dikhambulu disonga, didi disumu, vayi vadi disumu dikhambu natanga ku lufua.

18 Tuzebi ti woso mutu wubutukila mu Nzambi, katatamananga ko kuvola disumu ayi woso mutu wubutukila mu Nzambi, nandi wu kunkengidilanga ayi Nkua Mambi kasi ko bu kunsimbila. 19 Tuzebi ti Nzambi nandi wutu vuidi, vayi Satana* nandi widi mu kuyadila nza yimvimba. 20 Ayi tuzebi ti Muana Nzambi wuyiza ayi wu tuvana phisulu muingi tuzaba Nzambi yikiedika ayi mu nzila Muan’andi Yesu Klistu, befu tuidi kithuadi na Nzambi. Bukiedika, nandi widi Nzambi yikiedika ayi widi tho yi luzingu lu mvu ka mvu. 21 Bana bama ba luzolo, tatukanu mbuongimini yi bitumba.*